Komiteti për Koordinimin dhe Vlerësimin e situatës epidemiologjike dhe mbrojtjen nga rreziku i përhapjes së Coronavirusit në Republikën e Kosovës, përmes një komunikate për media u ka bërë thirrje të gjithë bashkëatdhetarëve që të përpiqen të reduktojnë në minimum vizitat në vendlindje, gjatë javëve në vazhdim.

“Kosova është një nga vendet e pakta evropiane ku ende nuk është konfirmuar prania e COVID 19. Mirëpo, duke pasur parasysh situatën e krijuar së fundmi, në Itali dhe vendet tjera në rajon, rreziku i përhapjes së këtij virusi vdekjeprurës është shumë i madh”, thuhet në njoftim.

Tutje në këtë njoftim thuhet se “Për rrjedhojë, ky komitet, përmes Ministrisë së Punëve të Jashtme dhe Diasporës, u lutet bashkëatdhetarëve të kenë mirëkuptim ndaj kërkesës për reduktim të vizitave në vendlindje, duke pasur parasysh se Kosova është një shtet i ri, në zhvillim, dhe me një sistem shëndetësor që ka kaluar nëpër shumë sfida”.

Ju bëjmë të ditur se Ministria e Shëndetësisë e Republikës së Kosovës ka përgatitur Planin e Veprimit për zbatimin e Planit të Gatishmërisë dhe të Reagimit kundër Covid-19, Qeveria ka ndarë mbi dhjetë milionë euro për nevojat e zbatimit të këtij plani dhe në rast nevoje do të merren edhe masa të tjera për të parandaluar rrezikun e përhapjes së virusit që e detyroi Italinë të funtet në karantinë.

COVID 19 është shfaqur për herë të parë në Kinë, në fund të muajit dhjetor të vitit të kaluar, për t’u përhapur më pas, për pak javë, pothuajse në shumicën e vendeve të botës. Sipas Organizatës Botërore të Shëndetësisë, deri më tani nga ky virus janë të prekur 121,738 veta në nivel global, janë shëruar 66,943 veta, kanë vdekur 4,382 veta, ndërkohë që vazhdojnë përpjekjet shkencore për gjetjen e vaksinës, thuhet në kërkesën e Komitetit për Koordinimin dhe Vlerësim. /Insajderi.com /KultPlus.com

Fakulteti i Mjekësisë i  Universitetit te Prishtinës “Hasan Prishtina” ka mbajtur sot ligjëratë informuese rreth COVID-19 ( Koronavirusi i ri 2019), përkatësisht mbi mënyrat e mbartjes dhe parandalimit të infeksionit me SARS-CoV-2.

Ligjëruesi Xhevat Jakupi, rejtor i Departamentit të Mikrobiologjisë në Institutin Kombëtar të Shëndetësisë Publike, informoi në detaje rreth prejardhjes së virusit, familjes që i takon, llojit, përhapjes së SARS-CoV-2, si dhe çka pritet në të ardhmen në vend lidhur me këtë virus.

Përpos shpjegimeve shkencore, ai informoi edhe rreth masave që duhet të ndërmerren për të shmangur infektimin nga ky virus.

“Lani duart sa më shpesh me ujë të rrjedhshëm, minimumi 20 sekonda me sapun. Nëse nuk kemi mundësi për t’i larë duart me ujë të rrjedhshëm, duhet të përdorni antiseptik duke i fërkuar mirë duart për disa sekonda, derisa ato të thahen vetë. Duhet shmangur kontaktet me persona të sëmurë, me shenja të infeksionit”, tha ndër të tjerash Jakupi.

Për të shmangur turmat, UP-ja përmes Laboratorit të Medias “MediaLab”, ka transmetuar drejtpërdrejtë ligjëratën në rrjetin social Facebook, e cila është e qasshme në: https://bit.ly/36IZbSF

Ndërkaq, edhe disa profesorë të UP-së kanë transmetuar gjatë orëve mësimore të ndryshme drejtpërdrejtë ligjëratën në fjalë, duke i kushtuar orën kësaj tematike dhe duke e ndjekur atë bashkë me studentët.

Në amfiteatrin ku u mbajt ligjërata, të pranishëm ishin: rektori i UP-së, prof. dr. Marjan Dema, dekanë dhe pjesëtarë të tjerë të stafeve menaxheriale të fakulteteve, staf administrativ dhe studentë, transmeton Klan Kosova / KultPlus.com.

Ministrja e Kulturës, Elva Margariti sqaroi sot disa prej masave të marra për parandalimin e përhapjes së koronavirusit në vend.

E ftuar në një studio televizive, ajo u shpreh se “masat e nevojshme duhen marrë për të parandaluar rrezikun e përhapjes”.

“Me urdhrin e djeshëm edhe aktivitetet kulturore dhe artistike duhet të anulohen të paktën për këto dy javët në vijim. Kjo prek edhe të gjithë fushën e aktiviteteve që zhvillojnë institucionet tona. Në rastin konkret kemi Teatrin e Operas dhe Baletit, Teatrin e Kukullave, Teatrin Eksperimental, po shikojmë edhe çeljen e ekspozitave, konferencat dhe dëgjesat publike janë anuluar”, tha Margariti.

Ajo theksoi se “janë anuluar po ashtu edhe të gjitha aktivitetet me rastin e Festës së Verës”. “Ky është një moment tjetër shumë delikat për t’u mirëkontrolluar, ashtu siç po ndodh edhe në vendet e tjera të botës. Masat që duhen marrë me keqardhje për jetën tonë artistike, patjetër ka hapësira më pas për t’i rikthyer”, tha Ministrja.

Ndërkohë ajo theksoi se “kinemanë nuk e shikoj shumë problematike, por rasti i koncerteve apo aktiviteteve të mëdha kërkon më shumë angazhim”.

Ajo shtoi se situata nga koronavirusi nuk e ka kushtëzuar punën e Ministrisë, por e ka transformuar atë duke shtuar edhe një tjetër prioritet.

“Puna kryesore është mospërhapja e panikut. Puna vazhdon dhe duhet të gjejmë mënyra të tjera alternative”, tha Margariti.

Duke folur për rindërtimin e objekteve të kulturës që janë dëmtuar nga tërmeti, Margariti tha se “prezenca e ekspertëve të huaj shërbeu për analizën më të shpejtë”.

“Janë mbi 55 monumente që kanë nevojë për ndërhyrje. Do të kalojmë në fazën më të detajuar për të bërë edhe pasqyrën e qartë të hapave. Restaurimi i monumenteve është një fushë e gjerë dhe me ekspertiza të shumta”, u shpreh ajo.

Margariti shtoi se deri tani janë hartuar projekte të thjeshta dhe tani do të hyjmë në projekte të detajuara”.

“Sot në Komisionin Shtetëror të Rindërtimit do të bëhet prezantimi i i objekteve arsimore dhe monument kulture dhe do të ecim me projektet e zbatimit, siç kemi bërë me planet e detyruara vendore. Në një afat të shkurtër 30-ditor besojmë të kemi programet e zbatimit.
Ky është momenti kyç. Po njësoj do të kemi ndërveprim me ekspertë të huaj. Restaurimi i monumenteve është një fushë e gjerë. Nuk është thjesht restauratori në vetvete ai që merret, janë të gjitha këto hapa studimi që për kohën që kemi kaluar ishin të pamundura për tu bërë. Besoj se jemi në një hap të mirë dhe kemi ecur shpejt, sepse kemi identifikuar një numër më të madh se 55 monumente. Amfiteatrin po e shikojmë si Parkun Arkeologjik të Durrësit”, tha ministrja. Atsh / KultPlus.com

Rrugët e Firences, Romës dhe Milanos, që zakonisht janë të mbushura me njerëz, të martën ishin bosh.

Kjo gjendje është shkaktuar pas vendimit të Qeverisë për ta vërë tërë shtetin në karantinë.

Në çdo qytet rrugët ishin të boshatisura, kafenetë pa klientë, derisa mbi 60 milionë italianë po i përmbahen detyrimit për të qëndruar në shtëpi.

Në Firence të gjitha kafenetë ishin praktikisht të zbrazëta edhe pranë atraksioneve më të njohura turistike.

E në Romë trafiku ishte shumë më i qetë sesa zakonisht dhe numri i qytetarëve të dalë nëpër rrugë ishte skajshmërisht i vogël.

Ndërkohë në Milano tregu i famshëm kishte më pak blerës.

E gjithë popullata e Italisë është urdhëruar të mos dalë prej shtëpive, pos në rast të urgjencave.

Janë ndaluar të gjitha tubimet publike dhe janë pezulluar të gjitha ngjarjet sportive, përfshirë edhe ndeshjet e futbollit.

Vdekjet në rajonin e Lombardisë janë rritur për 25 për qind brenda vetëm një dite, përkatësisht në 333, ndërsa numri i përgjithshëm i të vdekurve ka shkuar në 463, që është tani më i larti në botë, pas Kinës.

Më shumë se 9.000 persona janë infektuar në Itali brenda pak javësh, teksa në mbi 100 shtete të botës deri më tani janë regjistruar më shumë se 113 mijë të prekur.

Afro 4 mijë kanë vdekur në të gjithë botën, shumica dërrmuese në territorin e Kinës.

E përpos bllokadës totale, Italia, që është tani vatra evropiane e përhapjes së virusit, po përballet edhe me telashe të tjera.

Të martën Austria ka vendosur t’ua ndalojë hyrjen në vend vizitorëve nga Italia, në përpjekje për të ngadalësuar përhapjen e koronavirusit.

Ndërsa aviokompania britanike “British Airways” ka pezulluar të gjitha fluturimet për Itali dhe rreth saj.

Kryeministri holandez, Mark Rutte, iu drejtua të martën kombit me një fjalim, duke u kërkuar atyre që të mos i shtrëngojnë duart me njëri-tjetrin. Ama vetëm pak minuta më pas ai ia shtrëngoi dorën bashkëbiseduesit në konferencë, e pastaj u detyrua që të kërkojë falje.

Në anën tjetër, Shtëpia e Bardë ka njoftuar se presidenti Donald Trump nuk është testuar për koronavirus, ani pse ka pasur kontakt të drejtpërdrejtë me të paktën dy ligjvënës, të cilët u vunë në izolim vullnetar, shkaku se kanë rezultuar pozitivë në testin për virusin. /Koha.net / KultPlus.com

Kreu i qeverisë, Edi Rama, në një dalje për mediat e nisi fjalën e tij duke bërë thirrje që të kufizohen sa të jetë e mundur kontaktet fizike dhe kujdesi personal për të parandaluar përhapjen e koronavirusit.

“Mesazhi i qartë është thirrja për të kufizuar në makismiumin e mundshëm kontaktet fizike, nuk është predikim në ajër por thirrje që buron nga këshilla numër një e OBSH dhe të gjithë ekspertëve të fushës”.

Mesazhi i radhës ishte për studentët dhe nxënësit, duke e cilësuar këtë periudhë dhe si kohë luftë që duhet të luftojmë për të fituar.

“Vendosëm të mbyllim shkollat, kopshtet, çerdhet, universitet, jo për t’u dhënë vajzave dhe djemve tanë, një 2 javë pushim për t’u mbledhur nëpër disko, pube, argëtuar si kohë e zakonshme, se kjo është kohë lufte dhe luftë që padiskutim bota dhe ne do ta fitojmë, por të gjithë së bashku duhet ç’mos të kufizojmë maksimalisht dëmet që mund ti shkaktohen jo trupit fizik të vendit siç ndodhi me tërmetin, por shëndetin tonë.

Ky nuk është një luftë ku vihet në pah tërësia e virtyteve njerëzore që lidhen me trimërinë, guximin, me pasionin për liri deri në vetësakrifikim, është luftë me armik të padukshëm, i cili hyn në trupin tonë dhe në trupin e njerëzve më të dashur dhe duke kërcënuar jetën e atyre që janë më të moshuar, dhe të sëmurë mes nesh…. ne këtë rast ky armik nuk pyet as nga vjen, as kush je, as çfarë historie je, dhe as ku je… godet”.

Rama u ka bërë thirrje mediave dhe personazheve publike që hapësirën që kanë dhe ndikimin që kanë në publik, ta shfrytëzojnë për të sensibilizuar.

“Ndaj në këtë fazë, në këtë moment, kur jemi ende në fillimin e kësaj lufte me armikun që ka hyrë në trupat e njerëzve tanë, vazhdoj të ftoj të gjitha mediat, ata që kanë mundësi të përdorin mikrofon, ata që kanë ndjekësit e tyre aty ku postojnë opinione apo mendime të tyre, që të mos abuzojnë, të ndërgjegjësohen, se kjo nuk është një nga ato betejat e radhës, është një luftë. Është një luftë që e kemi ne në dorë, me sjelljen, angazhimin dhe zbatimin e këshillave, që ta bëjmë një luftë me dëme më të vogla, sesa dëmet që vijnë nga një luftë, ku ne sillemi në mënyrë të papërgjegjshëm dhe që s’kanë lidhje me armikun që kemi përballë “./tvklan.al

Drejtuesit e institucioneve arsimore dhe shëndetësore në Kosovë janë mbledhur sot për të diskutuar rreth planit të veprimit për ndërmarrjen e masave preventive kundër koronavirusit. Ministrja Hykmete Bajrami në koordinim me zyrtarët e Institutit Kombëtarë e drejtor komunalë të arsimit janë marrë vesh që mësimi mos të ndërpritet, raporton Gazeta Express.

“Pasi që nuk ka ende ndonjë rast të koronavirusit ne Kosovë, ne nuk do ta ndërprerejmë mësimin. Nuk ka nevojë për panik. Ju bëjë thirrje të gjithë nxënësve dhe mësuesve që të vazhdojnë procesin e rregullt të mësimit, por me higjienë të shtuar”, ka deklaruar ministrja Bajrami.

Ndërkohë drejtori i IKShP-së, Naser Ramadani i njoftoi drejtorët e arsimit rreth gjendjes aktuale.

Kujtojmë se në Shqipëri, qeveria ka marrë vendim për mbylljen e shkollave për dy javë, me që janë konstatuar 10 raste të prekura me këtë virus.

Ndërsa në Prishtinë, kryetari i komunës ka deklaruar se duhet të konsiderohet mbyllja e shkollave edhe në Kosovë. / KultPlus.com

Kërcënimi global i Covid-19 po i dërgon lexuesit drejt romaneve, të cilët kanë në qendër epidemitë. Botuesit në mbarë botën (via The Guardian) bëjnë me dije se janë rritur ndjeshëm shitjet e tri librave: “Murtaja” e Albert Kamysë, “The Eyes of Darkness” e Dean Koontz dhe “The Stand” e Stephen King.

“Murtaja” është në Top 10 e librave më të shitur në Itali sipas raportimit të revistës letrare ActuaLitté. Ndonëse përgjithësisht është konsideruar si një alegori e përvojës së popullit francez gjatë pushtimit nazist, vepra ka ngjallur interes së fundmi.

“Murtaja” e Kamysë i vendos ngjarjet në një qytet në Algjeri, Orani. Dr. Bernard Rieux vë re gjithnjë e më tepër minj të ngordhur. Pas tyre, shtohen vdekjet e njerëzve dhe krejt papritur, Orani e gjen veten të izoluar nga bota.

“The Stand” imagjinon një botë të dekompozuar nga një grip i rrezikshëm i njohur si “Captain Trips”. Edhe shitjet e “The Stand” janë rritur ndjeshëm së fundmi.

“The Eyes of Darkness” fitoi popullaritet pas teorisë që u përhap në internet, ku thuhej se Dean Koontz parashikoi koronavirusin. Thashethemi nisi të përhapej sepse virusi i librit quhet “Wuhan-400.” Është e vërtetë që Koontz shkruajti për një virus fiktiv në romanin e tij dhe që emri i tij, “Wuhan-400″ i referohet qytetit kinez ku pati origjinën koronavirusi i 2019-s (COVID-19), por sëmundja e librit nuk ka të përbashkëta me sëmundjen reale./anabel/

Ky është takimi mes dy liderëve politikë në Tanzani që ka tërhequr vëmendjen e mediave në botë.

Presidenti i vendit John Magufuli shihet duke shkëmbyer një përshëndetje me këmbë me politikanin e opozitës Maalim Seif Sharif Hamad.

Ata janë takuar sot në selinë e Presidentit për të folur për masat që ka marrë Tanzania kundër përhapjes së koronavirusit.

Ndërkohë që qeveria e vendit ka bërë thirrje që njerëzit të shmangin takimet fizike, si shtrëngimi i duarve dhe përqafimet, dy politikanët janë përshëndetur duke i dhënë këmbën njëri-tjetrit.

Sakaq, deri më tani Tanzani nuk ka regjistruar asnjë rast të me të infektuar nga koronavirusi. / KultPlus.com