Pas 21 çmimeve nga mbarë bota, filmi me regji të Blerta Bashollit, “Zgjoi”, ka shkruar histori me shkronja të arta, duke thyer rekorde në shumë festivale të cilat ka marrë pjesë, ndërsa tani ëndërron për “Oscars 2022”, shkruan KultPus.
Deri më tani kemi parë një udhëtim të jashtëzakonshëm të këtij filmi që po pret të shënojë një kapitull tjetër, aty ku suksesi arrin nivelin më të lartë, atë të “Oscars”.
Lista përfundimtare do të bëhet e ditur më 8 shkurt, në qoftë se filmi “Zgjoi” do të marrë pjesë në ceremoninë gala më 22 mars, me ç’rast gazeta online mbi artin dhe kulturën, KultPlus bënë thirrje që i gjithë komuniteti artistik dhe jo vetëm, të jenë pjesë e festës në KultPlus Caffe Gallery, në një ditë të mbushur me plot ethe, shpresë, besim e dashuri me bollëk.
Andaj, nesër duke filluar nga ora 12:00 e tutje, KultPlus Caffe Gallery do të bëhet shtëpia që pret rezultatin e shumëpritur nën atmosferën e ngrohtë shpirtërore që vendi sjell.
“Zgjoi” po tenton që të arrijë në majën e lartë e të artë duke u nominuar për çmimin më të mirë ndërkombëtarë në Akademinë e Arteve.
Ceremonia e 94-të e Çmimeve të Akademisë, e prezantuar nga Akademia e Arteve dhe Shkencave të Filmit, do të nderojë filmat më të mirë të publikuar nga 1 marsi deri më 31 dhjetor 2021 dhe është planifikuar të zhvillohet në Teatrin Dolby në Hollywood më 27 mars 2022.
Ndërkohë, kujtojmë se votimi nga anëtarët e kësaj Akademie ka filluar më 27 janar. / KultPlus.com
Edicionet tashmë të përvjetshme të MuralFest Kosova kanë ndikuar që qytete e vende të ndryshme të marrin një dukje të re, duke shtuar përmes artit gjallëri, freski dhe buzëqeshje, shkruan KultPlus.
Drejtoresha ekzekutive e MuralFest, Lebibe Topalli, në një intervistë për KultPlus tregoi se viti 2021 ishte shumë i suksesshëm dhe kjo gjë ka ndikuar që të përgatiten edhe më shumë për planet që po vijnë këtë vit.
“Ngjashëm si viteve të kaluara edhe këtë vit MF do vazhdojë të sjellë projekte në të mirën artistike dhe kulturore të shoqërisë”, thotë ajo.
Topalli njofton të gjithë lexuesit e KultPlus se vitin 2022 do ta fillojnë me një projekt të mbështetur nga Ambasada Amerikane në Prishtinë, i cili do shënohet me ardhjen e një artisteje amerikane për të punuar së bashku me të rinjtë e Kosovës vendas jo vetëm murale, por edhe në cilësi të mentores në punëtori të ndryshme artistike.
Ajo njofton se përgatitjet për edicionin e ri veçse kanë filluar, derisa muralet i cilësojnë si pjesë më të rëndësishme të punës sonë dhe vazhdojnë të jenë prioritet për organizatë tonën.
“Këto përgatitje janë nisur duke caktuar temën e këtij edicioni, lokacionet e edhe ftesat për artistët pjesëmarrës. Sa i përket kësaj të fundit, gjatë muajit Shkurt do bëhet publikimi zyrtar për qytetarët rreth këtij edicioni”, shton tutje ajo.
Tutje, Topalli zbulon edhe detaje nga edicioni i shtatë duke thënë se tema do të jetë shumë më ndryshe nga hera e kaluar, derisa e lë në “enigmë” pjesën e figurave të reja kombëtare, duke shtuar se do të ketë shumë punë e risi nga ana e tyre.
Muralet në Kosovë kanë qenë të pikturuara nga artistë të ndryshëm nga Evropa, e madje edhe nga Shtetet e Bashkuara të Amerikës, e kjo traditë do të vazhdojë edhe për edicionin e shtatë.
“Ajo që vlen të theksohet për vitin që lamë pas është se brenda 2021 kemi realizuar 20 murale të përmasave të mëdha me temën HOME, e prej tyre 10 me artistë vendas. Si progres tanë vlerësojmë me krenari muralet nga artistët tanë”, e thotë me modesti të plotë Topalli.
Vitin 2021, MuralFesti e filloi me portretin e Rita Orës, derisa e mbyllën me figurën e jashtëzakonshme të Nexhmije Pagarushës.
Misioni i Mural Fest është promovimi i artit dhe kulturës në vend, duke e përdorur artin si mjet për ndërgjegjësimin për kauza të ndryshme që shqetësojnë shoqërinë. /KultPlus.com
Ministri i Ministrisë për Kulturë, Rini dhe Sporte Hajrulla Çeku ka listuar sukseset e këtij viti që po lëmë pas, duke e vlerësuar si një kthesë për fushën e kulturës dhe sportit, pikërisht me rritjen e buxhetit që është bërë në këto dy fusha. Çeku ka folë edhe për Sallën Koncertale, objektin e Teatrit të Operës dhe Baletit, propozimin e KultPlus për themelimin e Festivalit të Muzikës në kuadër të RTK-së, e ka vlerësuar si ide të mirë, sikurse që ka folë edhe për kishën ortodokse brenda Kampusit të UP-së.
KultPlus: Jemi në fund të vitit, dhe brenda kësaj periudhe sa edhe po e udhëhiqni Ministrinë për Kulturë, Rini dhe Sporte, e keni vlerësuar si vit që është bërë shumë për fushat të cilat edhe janë brenda kësaj ministrie, në fakt, cila është e arritura më e madhe që e konsideroni edhe si kthesë për kulturën kosovare?
Hajrulla Çeku: Dy shtyllat kryesore të angazhimit tonë në kulturë janë: institucionet publike të kulturës dhe skena e pavarur kulturore. Planet vjetore të prokurimit, aktivizimi i petty cash, angazhimi i zyrtarëve shtesë financiar, konkurset për drejtuesit, renovimet dhe sigurimi i hapësirave shtesë, janë disa nga veprimet për t’i adresuar nevojat e institucioneve publike të kulturës. Në anën tjetër, mbështetja e përgjithshme për artistë dhe organizata kulturore për vitin 2021 është 3.8 milionë Euro, një rritje prej 60 përqind, krahasuar me vitin e kaluar.
KultPlus: Edhe këtë vit, filmi dhe sporti janë dy fushat më të arrira, ku edhe Kosova është përfaqësuar dhe po vazhdon të përfaqësohet në mënyrën më të mirë, a do të krijoni një fond edhe më të madh për këto dy fusha?
Hajrulla Çeku: Fondi shtetëror për filmin është dyfishuar për 2022, ndërsa buxheti do të rritet edhe viteve në vijim. Gjatë vitit 2022 do të miratohet ligji i ri për kinematografinë për të krijuar kushte nxitëse për zhvillimin e industrisë së filmit. Buxheti për sportin është rritur gjatë vitit 2021. Mbështetja e përgjithshme për federatat e sportit, klubet sportive dhe sportistët është 6.35 milionë Euro, 57 përqind më tepër se në 2020 dhe 51 përqind më tepër se në 2019.
KultPlus: Serbia vazhdon të krijojë filma për luftën e Kosovës, duke e shtrembëruar të vërtetën, të cilët kanë realizuar filma edhe për Kosharen, Reçakun, duke mos përjashtuar edhe shumë filma dokumentarë po për luftën e Kosovës, a do të duhej të kishim një thirrje të veçantë, për filma me tematikë të caktuar, në mënyrë që të realizohen sa më shumë filma për luftën e Kosovës?
Hajrulla Çeku: Filmat për luftën e Kosovës janë prodhuar dhe do të prodhohen në vazhdimësi. Gjatë vitit 2022 do mbështesim krijimtarinë audio-vizuele për të promovuar të vërtetën mbi luftën dhe shtetin e Kosovës nëpër botë.
KultPlus: Kur jemi te kjo thirrje, duke pas parasysh edhe bashkëpunimin kulturor mes Kosovës dhe Shqipërisë, a do të duhej që një thirrje e tillë të ishte e përbashkët?
Hajrulla Çeku: Veprimtaria filmike ndjek metodën e bashkëprodhimit. Filmi “Zgjoi” është një shembull ilustrues, pasi edhe Shqipëria është njëra nga bashkëprodhueset. Besoj që viteve në vijim do të kemi bashkëpunim të shtuar me Shqipërinë në fushën e prodhimtarisë filmike.
KultPlus: Prej pasluftës e këndej, çdo ministër ka premtuar ndërtimin e objektit të Operës dhe Baletit të Kosovës, por që ende ky objekt mbetet vetëm premtim për zgjedhje. Në ndërkohë, para objektit, ju themeluat institucionin e operës, sa mendon se kemi kapacitet kuadrosh për funksionalizimin e një institucioni të tillë?
Hajrulla Çeku: Institucioni i Operës së Kosovës është themeluar, ka mbajtur koncertin inaugurues, ka miratuar aktet e brendshme, ka strukturën drejtuese dhe është në përgatitje të programit të rregullt vjetor për vitin 2022. Ne jemi në komunikim me Komunën e Prishtinës, dhe në momentin e ndarjes së lokacionit do të shpallet edhe konkursi për projektim, për te vazhduar pastaj me hapat e nevojshëm për ndërtimin e Teatrit të Operës.
KulPlus: E sa i përket objektit të Operës dhe Baletit, sa herë keni folur për këtë objekt, por edhe institucionit nuk iu keni referuar si Opera dhe Baleti i Kosovës “Ibrahim Rugova”, por vetëm Opera dhe Baleti i Kosovës, a ka ndonjë ndryshim në emërtim, pasi që më herët, këtij objekti i janë referuar me emrin e Ibrahim Rugovës?
Hajrulla Çeku: Fokusi im janë puna dhe realizimi i zotimeve. Institucioni është funksionalizuar, në radhë është ndërtesa.
KultPlus: E sa i përket Sallës Koncertale, do të mbetet objekti Gërmia, apo pritet të ketë ndonjë ndryshim?
Hajrulla Çeku: Procesin e ndërtimit të sallës koncertale në objektin e Gërmisë nuk mund ta kthejmë në pikën zero, pasi janë zhvilluar disa faza të procedurës. Viti 2022 duhet të na gjejë me dinamizim të punëve drejt synimit të përbashkët për sallë koncertale.
KultPlus: Ndërkohë, së fundi keni diskutuar me kryetarin e Komunës së Prishtinës, Përparim Ramën edhe për objektin e Muzeut të Artit Bashkëkohor, mund të na shpjegoni se ku dhe si do të realizohet ky objekt?
Hajrulla Çeku: Në fillim të vitit të ardhshëm do të ngritet një këshill profesional për konceptimin dhe themelimin e institucionit. Bashkë me Komunën e Prishtinës do ta identifikojmë hapësirën më të përshtatshme ku do të vendoset Muzeu i Artit Bashkëkohor. Bienalja nomade Manifesta do të jetë platforma profesionale e dialogut gjithëpërfshirës për themelimin e institucionit.
KultPlus: Kur jemi te objektet, mund të flasim për objektin e Kishës Ortodokse brenda kampusit, mund të jetë si alternativë për ndonjë projekt kulturor?
Hajrulla Çeku: Për strukturën në fjalë që gjendet brenda kampusit të Universitetit të Prishtinës ekziston një proces i hapur gjyqësor. Pa përfunduar procesi gjyqësor nuk mund të ndërmarrim ndonjë veprim.
KultPlus: Kur jemi te themelimi i institucioneve, objekteve dhe iniciativave të ndryshme kulturore, Kosovës edhe më tej i mungon festivali i këngës, e që do të duhej të funksiononte brenda RTK-së. E dimë që ende nuk jemi anëtarë të EBU-së, që Kosova të përfaqësohet në Eurovizion, por a nuk do të duhej që Kosova të krijonte një traditë me këtë festival edhe para se të fillonte përfaqësimin?
Hajrulla Çeku: Mendoj që është ide e mirë. Duhet të flasim me RTK-në.
KultPlus: Ndërkohë, kemi një përfaqësim super dinjitoz në nivel ndërkombëtar, kur kemi parasysh suksesin e Dua Lipës, Rita Orës, Erza Muqollit, “Gjon’s Tears” dhe shumë artistëve të tjerë, kur kemi gjithë këta artistë të famshëm, a do të duhej të mendonim më seriozisht për një projekt që mund ti bashkonte këta artistë?
Hajrulla Çeku: Edhe kjo mendoj që është ide shumë e mirë.
KultPlus: Dhe për fund, cili është plani kryesor i vitit 2022, qe është edhe prioritet i MKRS-së, por edhe i Qeverisë së Kosovës, sa i përket fushës së kulturës?
Hajrulla Çeku: Viti 2022 është i reformës në sferën e kulturës. Do ta ndërtojmë bazën e nevojshme për funksionim efikas të institucioneve publike të kulturës dhe partneritet strategjik e fuqizim të skenës së pavarur kulturore. Do t’i dinamizojmë procedurat për Sallën Koncertale, Muzeun e Artit Bashkëkohor, Teatrin e Operas dhe Baletit dhe Teatrin e ri Kombëtar./ KultPlus.com
Zbresim shkallët teposhtë në heshtje nga kati i shtatë Me bisht syni i shikojmë supet e njani tjetrit dhe siluetën e portreteve të ngrysuna nën dritën e paktë
Një kat më poshtë bajmë
një ngatërrim të hapave
dhe gati përfundojmë në përqafim të trembun E sforcojmë ecjen vertikale
dhe shikimin e rreptë
derisa shkelim të pestin
dhe të katërtin kat si dy armiq të rastësishëm
E shtrëngon çantën tuj m’pa si një rrëmbyes Kurse unë me qëllim nuk e shpejtoj hapin Arrimë tek i dyti tashmë të militarizuem
në mospërfillje
Zhurma e takeve t’ua e tradhëtojnë heshtjen e zemrave dhe shpeshtojnë frymëmarrjen Për herë të parë e shoh ngjyrën e syve të kaltër
Në përdhese gjithçka fashitet tokëzohen ndjenjat e trazueme dhe kujtimet se dikur të kisha njohur mirë Por tash maska e moshës na kishte tjetërsue
Ti vazhdon ma tutje e bindur se shpëtove nga një vardisës i mundshëm i bezdisshëm
Kurse unë vazhdova për në bodrum tek fletoret e moçme të kërkoj përshkrimin tim për portretin tand në rini
–Poezi e shkruar nga Afrim Demiri, njëra nga poezitë finaliste në konkursin mbarëkombëtar të poezisë ‘KultStrofa’, organizuar nga gazeta online për kulturë KultPlus./KultPlus.com
Ambienti i KultPlus Caffe Gallery tashmë është shndërruar në një hapësirë ku letërsia, kultura e arti janë gërshetuar mes vete e kanë zënë vendin e tyre të veçantë mu në mesin e shumë miqve artdashës, shkrimtarëve të cilët kanë një bagazh të mirëfilltë prapa tyre, shkrimtarëve të rinj, entuziazmi i së cilëve dallohej në linjat e fytyrave të tyre, si dhe ekipit të mrekullueshëm të KultPlus.
Mbrëmë, atmosfera poetike futi rrënjët e saj dhe morri përsipër ceremoninë e konkursit mbarëkombëtar “KultStrofa” të organizuar nga KultPlus e që konsiderohet si një ndër konkurset më serioze në nivel mbarëkombëtar, me ç’rast në natën finale të edicionit të katërt u ndanë edhe çmimet e këtij konkursi poetik i cili çdo vit pret poezi krejtësisht të veçanta e autentike jo vetëm nga Kosova por edhe Shqipëria, Maqedonia, Mali i Zi e Lugina e Preshevës, Gjermania, Spanja, Italia dhe Zvicra, shkruan KultPlus.
Por fillimisht, në hapjen zyrtare të natës finale, fjalën e mori moderatori Arbër Selmani.
“Unë me shumë kënaqësi e pranova ftesën që të jam edhe pjesë e jurisë bashkë me profesorin Sali Bashota dhe profesoreshën Nerimane Kamberi, të cilët i kanë vlerësuar këto poezi”, thotë Selmani.
Sipas tij, ky edicion i ka mbledh gjithsej 93 poezi të cilat kanë ardhur në KultPlus pas thirrjes së hapur e më pas ato poezi janë vlerësuar e që në fakt nuk ka qenë fare e lehtë për ta.
“Në edicionin e parë e kemi pasur fitues Ragip Sylën, në të dytin e kemi pasur Arjola Zadrimën dhe në të tretin, fitues ishte Merita Bërdica”, thotë ai.
Tutje, fjalën e mori edhe drejtoresha e KultPlus, Ardianë Pajaziti, e cila shprehet tejet e lumtur që edhe sivjet në dhjetëshen finaliste ka emra shumë të mirë.
“Faleminderit shumë që keni ardhur. Faleminderit jurisë për përkushtimin që gjatë këtyre ditëve e kanë dhënë për këto poezi, teksa unë i ndiqja vlerësimet e juaja. Faleminderit krejt poetëve që kanë aplikuar në edicionin e katërt nga të gjitha anët e botës. Edicioni sivjet që po e shënon të katërtin na ka munguar vjet për shkak të pandemisë e që ka ndikuar edhe tek ne. Por, në fakt energjinë e kemi mbledhur sivjet edhe pse përsëri në kushte pandemike. Jam shumë e lumtur që edhe në dhjetëshen e sivjetshme finaliste, kemi emra shumë të mirë por mbi të gjitha poezi të cilat lexuesit e KultPlus-it ende nuk kanë pasur rastin me i pa e që do ti shohin në ditët në vazhdim”, thotë Pajaziti.
Sipas saj, së bashku me ekipin e KultPlus-it, ajo është duke u munduar që të dhurojë maksimunin që gazeta të shndërrohet në opozitën e të gjitha atyre antivlerave që po ndodhin në Kosovë edhe pse kjo nuk konsiderohet fare e lehtë.
“Ky është vetëm edicioni i katërt e së bashku kemi shumë rrugë për të bërë”, përfundon Pajaziti.
Ndërsa, kryetari i jurisë së këtij konkursi, profesori Sali Bashota, e konsideroi punën e KultPlus një punë me plot përkushtim e angazhim të plotë.
“Ne kemi qenë të nderuar që jemi marrë me vlerësimin e punimeve tuaja që keni konkuruar në edicionin e katërt të “KultStrof-ës”, tek një gazetë i cili me punën e përkushtimin e kryeredaktores Ardianë Pajaziti dhe ekipit të saj, është shembull i angazhimit, përkushtimit e vlerësimit të krijuesve por edhe të institucioneve kulturore sepse kjo hapësirë pothuajse që dy vjet e më shumë është ndoshta vendi ku edhe frymëzohen poetët për shkak se shohin një punë të vyer të Ardianës e një punë të vyer e të mrekullueshme të ekipit të saj”, thotë Bashota.
Sipas tij, të vlerësosh poezinë është një ndjenjë e përgjegjësisë së lartë për atë që mendohet të dhurohet një vlerësim sa më objektiv me argumente e fakte që në një mënyrë, kjo konkurrencë e madhe të vlerësohet sa më mirë.
“Poezia është së pari përjetim, pra emocion edhe te vlerësuesi e jo vetëm tek ai që shkruan. Madje, Borgesi ka thënë se i vetmi zhanër që nuk shpjegohet është poezia. Ajo vetëm përjetohet. Andaj, temat, idetë, stilet, motivet, preokupimet, figuracioni dhe elementet tjera përbërëse të poetikës së poezisë janë shqyrtuar nëpërmjet aktit të komunikimit midis jurisë”, përfundon Bashota.
Po ashtu, anëtarja tjetër e jurisë së këtij konkursi, profesoresha Nerimane Kamberi, tregoi se përzgjedhja nuk ishte e bazuar në asnjë lloj elementi tjetër, përveç të bukurës e emocionit.
“Sigurisht që nuk ka më bukur se këto kohë festash që të festojmë me poezi. U tha nga fillimi që jemi profesorë, por me një modesti të vogël, do të thosha se ne jemi edhe poetë. Të vlerësosh është shumë e vështirë sepse në një anë e xhelozon pse nuk dita unë të shkruaj ashtu kurse në anën tjetër ke frikë se e lëndon por fundja ne këtu nuk kemi shiku as nga vjen, as nga gjinia, as nga përkatësia fetare, as nga orientimet seksuale. Këtu vetëm e kemi shiku të bukurën. Fjalën e bukur dhe atë që na ka zgjuar emocione”, thotë Kamberi.
Pas këtyre fjalimeve, më në fund, radha që vargjet të fillojnë të jehojnë bujshëm para të pranishmëve, erdhi. Edicioni i katërt i konkursit të poezisë “KultStrofa”, edhe kësaj here dëshmoi forcën hyjnore të poezisë që fjalë pas fjale, varg pas vargu, bënë bashkë ndjenjat nga më të ndryshmet dhe ato i shndërron në një ylber emocionesh që vrullshëm derdhet në shpirtrat e të pranishmëve e fuqishëm mbizotëron në brendësinë e trupave tanë, për të kapluar kështu çdo qelizë, muskul, venë e arterie tonën.
Para të pranishmëve, poezitë e dhjetë finalistëve të përzgjedhur nga juria e përbërë nga profesori Sali Bashota (kryetar i jurisë), profesoreshës Nerimane Kamberit dhe shkrimtarit Arbër Selmani: Agon Rexhepi, Afrim Demiri, Bekim Shala, Gentiana Bajrami Atashi, Flamur Dardeshi, Liridon Mulaj, Nikas Kaça, Redon Elshani, Shazim Mehmeti dhe Valentina Broja, u vazhduan të lexohen njëra pas tjetrës duke bashkuar kështu poetët nga trevat e ndryshme shqiptare të cilët po interpretonin në dialektin gegë e toskë e po ashtu duke sjell fjalë të vjetra e të ruajtura shqiptare.
Në një mënyrë krejt rastësore, nga vetë autorët e pranishëm, u interpretuan poezitë: “Zbresim shkallëve” nga Afrim Demiri, “Kur njeriu vdes” nga Redon Elshani, “Lama e Pejës” nga Gentiana Bajrami Atashi, “Marrja e shpisë” nga Agon Rexhepi dhe “Mikes” nga Bekim Shala.
Në mungesën fizike të pesë autorëve të tjerë finalistë, redaktorja e KultPlus, Jeta Zymberi lexoi poezinë “Grahme” të Valentina Brojës, gazetarja Era Berisha lexoi poezinë pa titull të Liridon Mulajt, gazetari Uranik Emini lexoi poezinë “Ne” të Flamur Dardeshit si dhe studentja e letërsisë, Edlira Musliu lexoi poezitë: “Faleminderit” të Shazim Mehmetit dhe “Liria” të Nikas Kaçes.
Më pastaj, u ndanë mirënjohjet ndaj poetëve: Afrim Demiri, Bekim Shala, Redon Elshani, Valentina Broja, Flamur Dardeshi, Liridon Mulaj, Nikas Kaca dhe Shazim Mehmeti.
Agon Rexhepi u radhit në vendin e tretë në këtë edicion me “Marrja e shpisë”, ndërsa Flamur Dardeshi u radhit i dyti me poezinë “Ne”.
Autorja Gentiana Bajrami Atashi, fitoi vendin e parë në edicionin e katërt të këtij konkursi me poezinë “Lama e Pejës”.
“Së pari dua ta ndaj një sekret të vogël me ju. Pas një dekade që merrem me poezi, është hera e parë që e hapa sirtatin e letrave dhe vendosa që të marr guximin që ta dërgoj në email-in e juaj duke mos i treguar askujt. Sonte jam vërtetë e emocionuar sepse poezia ime u vlerësua e u zgjodh e para. E pikërisht këtë çmim ia dedikoi motivit të poezisë sime, babait tim, që falë tij jam kjo që jam dhe jam ktu ku jam sot”, tha Atashi pasi pranoi çmimin.
Kështu për të përmbyllur këtë edicion, edhe një herë fjalën e mori drejtoresha e gazetës KultPlus, Ardianë Pajaziti e cila ndau mirënjohjen vjetore për performancë të shkëlqyer në redaksinë e gazetës.
“Asgjë nuk mund të bëjmë vetë. Gjithçka që e bëjmë e çdo organizim që zhvillohet, e kemi dikë në krah e në fakt asnjërin nga ekipin tonë nuk mund ta ndajë sepse të gjithë janë një shtyllë e fortë e imja. Por, këtë vit, këtë çmim vendosa t’ia ndaj një personi që e kam krah të djathtë, Liridona Spahiut”, thotë Pajaziti.
Kurse, përgjegjësja e marrëdhënieve me publikun, Liridona Spahiu, është shprehur tejet e lumtur që është pjesë e një ekipi të tillë.
“Jam shumë e nderuar që punoj në një redaksi siç është KultPlus, e jam shumë me fat që jam afër juve ku momentet më të mira të jetës i kemi ndarë së bashku. Unë jam shumë e befasuar sonte, e në të njejtën kohë edhe shumë falënderuese”, tha Spahiu.
Ndërkaq, ishin shkrepjet e fotografive që dëgjoheshin në çdo çast e meloditë muzikore që vinin nga këngëtari Endrit Rexhepi si dhe vogëlushja Anna Krasniqi, të cilët ëmbëlsisht sollën melodi shqipe dhe jo vetëm. Një atmosferë e pakrahasueshme dhe e mbushur me plot lumturi, dashuri e miqësi, shënoi fundin e kësaj nate të paharrueshme.
‘KultStrofa’ organizohet nga gazeta e parë shqiptare për art dhe kulturë ‘KultPlus’, dhe është konkurs mbarëkombëtar i tëri si ide origjinale e prodhuar nga KultPlus. / KultPlus.com
Ka disa ditë që ka përfunduar konkurrimi për konkursin e poezisë ‘KultStrofa’, ku edhe po shënon edicionin e katërt të kësaj gare mbarëkombëtare.
Juria profesionale e këtij konkursi e përbërë nga Sali Bashota, kryetar i jurisë dhe Nerimane Kamberi e Arbër Selmani, me shumë përkushtim kanë bërë vlerësimin e poezive dhe kanë zgjedhur 10 poezitë finalistë të këtij konkursi.
Mbrëmja finale dhe poetike e këtij konkursi do të enjten, më datë 23 dhjetor, në ora 19:00 në KultPlus Caffe Gallery. Në këtë mbrëmje do të jenë prezentë finalistët e konkursit ku edhe do të lexohen poezitë dhe do të shpërblehen tri vendet e para fituese.
Ngjarja është e hapur për të gjithë. ‘KultStrofa’ organizohet nga gazeta e parë shqiptare për art dhe kulturë KultPlus, dhe është konkurs mbarëkombëtar i tëri si ide origjinale e prodhuar nga KultPlus. / KultPlus.com
Nuk njoh burrë tjetër si Maduja. I madh në plotninë e tij, i rrëmbyeshëm I vrulltë, shpejtësi që nuk kontrollohet, i zjarrtë, Ma rroku belin me gishtat furtunë, Pak i kaftë, i kafshuar prej valëve të detit I kristaltë, pa flokë, Nuk është koha të thyhet ky trup i bëftë. Nuk njoh burrë tjetër që më ka puthur me aq triumf, sa Maduja. Natën vonë, më përtypi si të isha ansambël këpurdhash Ky Madu, me epshin e tij dru, Si asnjë tjetër. Me një gojë me shije bambusi, i errët, në momente i dritshëm I vë gaz flakës ku më ka gjuajtur me sa forcë ka. Ai, Maduja. Nuk njoh burrë tjetër që më ka çmuar me aq kujdes, sa Maduja. I guximshëm, puthi trupin tim me saktësi matematike, Me dy duar si të ishin tetë, a dhjetë, më dha jetë, Maduja, I trandur, i futur në vaskën e bukurisë, i lëmuar Lëng frutash po shijoja, pa blerë asnjë në dyqan Trupi i kockuar bukur i Madusë Shtog, Shegë, Kokos, Shafran. Nuk njoh burrë tjetër me shpirt të hekurtë e të njomë, sa Maduja. I pashëm sa s’ka, një plagë e rinisë në fundin e barkut, burrë murrlan I jashtëzakonshëm, nisa të lehja si kafshë, Maduja, ky mësues biologjike e fizike Ma la mbi këmbë mua kiminë e tij të përjetshme, Le të ndalen dritat e të gjitha stadiumeve pa dashnorë, I imi Madu, E përthekoj, pij tërë natën ujëvarën e tij, mbetet mbret me kurorë. Nuk njoh burrë tjetër që më bën të shtangem, të mpihem, Si Maduja. I përpiktë, i rrebelshëm, lehtazi m’i ra thikë zemrës, Një rezervuar i mbushur me kënaqësi, një maje mali që flladitë Nuk ka si Maduja im, Nuk ka mundësi të ketë një të dytë Që më zhytë, që ma humbë kthjelltësinë, që më kredhë mes gjoksit Ante i botës sime. Me Madunë, bëj be në atë natë Më krijoi për së dyti, ma largoi etiketën ‘i ngratë’. Atë natë, vdekja do të më ishte e sheqertë, fushë e blertë, Si emri yt Madu. /KultPlus.com
Ansambli i Këngëve dhe Valleve “ Kemajl Azizi” nga Vitia, është pranuar zyrtarisht partner i Organizatës CIOFF, që përndryshe është partner zyrtar i UNESCO-së (Organizata për Edukim, Shkencë dhe Kulturë e Kombeve të Bashkuara), përcjellë KultPlus.
Komuna e Vitisë ka njoftuar për lajmin përmes një postimi në llogarinë e tyre zyrtare në “Facebook”, ku edhe kanë bërë të ditur se me të gjitha votat e shteteve anëtare me të drejtë vote, është votuar në kongresin 50-të në Budabest të Hungarisë që A.K.V “Kemajl Azizi” nga Kosova të jetë partner zyrtar i kësaj organizate që cilësohet si ndër më të mëdha në botë.
Arsim Abazi, Drejtor Ekzekutiv i AKV “Kemaj Azizi”, ka potencuar rëndësinë e pranimit të Kosovës në këtë organizatë ndërkombëtare duke thënë se Integrimi ne arenën ndërkombëtare për promovimin e trashëgimisë kulturore në nivel ndërkombëtar është shumë e rëndësishëm për vendin tonë. Ai shtoj se përmes tyre, Kosova po promovon vlerat e mirëfillta kulturore të etnosit shqiptar në çdo cep të botës.
Drejtori Abazi falënderoj të gjithë ata që kanë mbështetur A.K.V “Kemaj Azizi” në këtë arritje në veçanti kryetarin e komunës së Vitisë, Sokol Haliti më pas edhe Ministrinë e Punëve të Jashtme dhe Diasporës, Ambasadën e Kosovës ne Hungari por edhe të gjithë artistet e këtij ansambli për punën e tyre të madhe duke u zotuar se ata do të vazhdojnë të promovojnë vlerat e mëdha që ka kultura shqiptare në Kosovë.
Këshilli Ndërkombëtar i Organizatave të Festivaleve Folklorike dhe Arteve Popullore është një organizatë ndërkombëtare joqeveritare në Partneritet Zyrtar me UNESCO-n dhe është i akredituar për të ofruar shërbime këshillimore për Komitetin e Konventës së UNESCO-s për Mbrojtjen e Trashëgimisë Kulturore. /KultPlus.com
Edicionin e tij të katërt, projekti “Ta zbardhi ftyrën” që mbahet nën organizimin e gazetës online për art dhe kulturë ‘KultPlus’, mbrëmë e shënoi me një interpretim nga artisti kosovar Gjon Muharremaj, i njohur si ‘Gjon’s Tears’, i cili ekskluzivisht solli për publikun një repertor me gjithsej katër këngë, tre nga të cilat nuk janë kënduar asnjëherë më parë në Prishtinë. Këto këngë të mbushura me një mrekulli melodish e tingujsh u rrëfyen nën flakërimin e notave të larta të zërit buçues të artistit që së bashku me interpretimin e tij në piano, krijuan ndjesi të larmishme tek të pranishmit duke shkrirë kështu artin muzikor në një trazirë të vrullshme artistike që nuk po e njihte shfrenimin në asnjë çast të vetëm, shkruan KultPlus.
Ajo se çka dallohej në hyrje të Amfiteatrit të Ri të Bibliotekës Universitare të Kosovës, ishin fytyrat e shumta e të rinjve të cilët prisnin me padurimin e tyre të ëmbël, daljen në skenë të artistit të njohur Gjon’s Tears. Ndërsa, hyrja në këtë sallë për dikë që po vinte për herë të parë do ti dukej krejtësisht një ambient që posedon një hapësirë të gjerë, karrige të shumta e të vendosura në secilin kënd, për të mbushur kështu sallën në një numër të madh të artistëve të njohur shqiptar dhe jo vetëm. E kjo hapësirë ndërlidhej në një mënyrë të veçantë me inkuadrimin e reflektorëve me ngjyrë të kaltër dhe perdet ngjyrë bardhë, që njëkohësisht portretizonin dy nga ngjyrat e logo-s së KultPlus.
Dritat e ngrohta të vendosura në dy kënde të sallës së bashku me dritën natyrale e cila binte pingul nga qielli mbi kokat e secilit, ishin elementet që mbrëmë ndërruan komplet vendet e tyre me njëra-tjetrën. Teksa ora po shënonte 19:00, tashmë drita natyrale ishte zhdukur për të lënë hapësirë që errësira të kaplonte qiellin e të vëzhgonte sallën përbrenda, e dritat e ngrohta fuqishëm gjallëruan funksionin e tyre në të dy anët për të ngritur akoma më lart etjen për të parë artistin në skenë, me ç’rast vezullimi në sytë e çdo kujt vetëm sa vinte e shtohej.
Hapjen e edicioni të katërt të mbrëmjes artistike “Ta zbardhi ftyrën”e nisi drejtoresha e gazetës KultPlus, Ardianë Pajaziti.
“Gjon, faleminderit që kë ardhur e që ke qenë kaq bashkëpunues për të qenë i pranishëm para audiencës së Prishtinës e që do të kenë rastin ta dëgjojnë rrëfimin tënd qysh nga fëmijëria e deri tek suksesi i madh në Evrovizion por edhe jemi duke pritur me padurim performancën tënde live”, thotë Pajaziti.
Sipas saj, ‘Ta zbardhi ftyrën’ ka ardhur si ide se si njerëzit si fëmijë marrin komente nga prindërit kur ata merrnin një notë të mirë në shkolla fillore duke u shprehur me fjalët: na zbardhe ftyrën.
Ndërsa, drejtori i Drejtorisë së Kulturës në Komunën e Prishtinës, Adrian Berishaështë shprehur falënderues ndaj ekipit të KultPlus për punën e tyre të jashtëzakonshme.
“Gjon mirësevjen në Prishtinë dhe faleminderit shumë që na ke bërë krenarë. Faleminderit shumë ekipit të KultPlus për një punë të jashtëzakonshme që e bëjnë duke e mbuluar fushën e artit dhe kulturës dhe duke na dhënë informacione të sakta se si duhet ti qasemi artit e kulturës”, ka thënë Berisha.
Në fund, ata u shprehen falënderues ndaj të pranishmëve duke i uruar atyre një natë të këndshme.
Pas këtyre fjalimeve, në sallë mbizotëruan duartrokitjet e zjarrta të publikut artdashës, kur Gjon’s Tears hodhi hapat e tij drejt skenës për të nisur këtë mbrëmje me një rrëfim rreth jetës së tij artistike e shpalosjes së shumë momenteve të veçanta qysh nga fëmijëria e tij e deri më sot.
“Unë e fillova muzikën kur isha 8 vjeç dhe arriti momenti që të gjithë në klasën time të kishin nga një hobi, dhe e mbaj mend që njëra kishte pasion zhytjen në det dhe thosha vetmevete se unë skam asnjë pasion dhe më duhet ta gjej një. I thoja nënës pse asnjëherë nuk po performoja në piano apo diçka të tillë, e ajo ma ktheu se unë asnjëherë nuk e kam kërkuar një gjë të tillë. Aty nisi edhe provat e mia të para drejt këtij rrugëtimi artistik”, thotë Muharremaj.
Sipas tij, fillimisht ishin karate dhe patinazhi artistik, dy sporte të cilat ai i nisi por që ishin shumë herët në mëngjes dhe u përmbysën këto opsione menjëherë, por që me pianon ndodhi diçka ku ai e ndjeu veten të lidhur në një mënyrë shumë të çuditshme.
“Ajo se çka më ka lënë përshtypje ishte mënyra se si njerëzit e shihnin muzikën klasike dhe se si ata e shikonin Mozartin, Beethovenin e Bachin, si me qenë një ‘Zot’. E mua më pëlqeu ky admirim i tyre e andaj doja shumë që ta kuptoja këtë admirim të tyre, prandaj fillova provat në piano jazz. Një ditë, gjyshi im rastësi që të dëgjonte këngën e Elvis Presleyit, të titulluar ‘can’t help falling in love’, dhe më pyeti mua që të këndoja për të këtë këngë të preferuar të tij dhe unë atëherë nuk kisha kënduar asnjëherë më parë”, shpalos Muharremaj.
Momentin kur gjyshi i tij filloi të qante pasi dëgjoi Gjonin duke kënduar, konsiderohet një cast ku Gjoni e ka ndjerë veten si një super hero. Ndërsa, vendosja e gjyshit në atë pozitë ishte momenti kur ai vendosi që të vazhdonte të bënte këtë gjë, pra të vazhdonte me muzikë.
Pastaj, intervista e Gjonit herë pas here shoqërohej me video-prezantime ku shfaqej rrugëtimi i tij, duke filluar nga performanca e tij e parë në ‘Albanian’s Got Talent’ e deri tek ajo e fundit në ‘Evrovizion’.
Teksa ai fliste për rrugëtimin e tij, tregon edhe për një moment të veçantë ku ai zgjodhi emrin e tij artistik ‘Gjon’s Tears’ e që bazohej në dy arsyeje. Njëra ishte se ai bën muzikë për ti emocionuar njerëzit dhe qëllimi i tij është që ata ti bëj të qeshin e të qajnë dhe jo vetëm e këtu gjithçka nisi me lotin e gjyshit të tij andaj lotët e tij i mban në emër. Ndërsa, arsyeja e dytë është se emri i tij shqip tingëllon edhe anglisht dhe qysh si i vogël ëndrra e tij ishte të zhvillonte një karrierë ndërkombëtare.
Në mesin e rrëfimit të tij ai tregon edhe një moment të cilin ai e përjetoi dje në mëngjes ku kryeministri i Kosovës, Albin Kurti i tha atij se: është një gjë tek shija se a do të të pëlqejnë njerëzit apo jo, por është një gjë tjetër kur ke mundësinë për të çuditur, atëherë është një ndjenjë krejtësisht ndryshe dhe që do të të mbetet në kujtesën tonë përgjithmonë sepse ke arrirë të jesh ndryshe nga të tjerët e të jesh unik. Prandaj, këtë kritikë të mirë Gjoni po provon ta mbështes gjithmonë.
I pyetur nga moderatorja Fëllënza Çitaku, për momentin fitues të votave të jurisë në Evrovizion, Gjoni është shprehur se e vetmja gjë që posedon ai është zëri dhe me atë zë ai ka arritur të përjetoj një eksperiencë shumë të veçantë.
“Unë gjithmonë kam provuar që kënga të dalë sa më mirë dhe kam punuar shumë sepse e vetmja gjë që kam është puna sepse nuk kam ndonjë muskul që të shfaqi, kështu që vetëm zërin e kam. Prandaj, ishte një eksperiencë shumë e veçantë”, thotë Muharremaj.
Krejt në fund të intervistës Gjoni shpalosi edhe momentin kur ai morri ftesën e gazetës KultPlus, nga drejtoresha e gazetës Ardianë Pajaziti, dhe se si e priti ai këtë ftesë.
“Unë e prita me shumë kënaqësi sepse një herë unë nuk e kam parë fare email-in dhe mesazhin e saj, por babai im e pa atë dhe më tha se ka ardhur një mesazh nga Kosova dhe trajtoje atë. Pas Evrovizionit ishte një ‘tërmet’ i madh sepse kënga kishte arritur vendin e parë në tabelat në Suedi, Norvegji, Holandë e Spanjë, dhe unë direkt shkova në këto vende por sa më shpejt erdha në Shqipëri dhe Kosovë. Prandaj, momenti kur na ka kontaktuar Ardiana ishte mëse i duhur dhe për mua është kënaqësi e madhe sepse unë nuk kam pasur shumë oferta në Kosovë e Shqipëri por edhe unë nuk i kam pranuar shumë ato sepse dua ti kem ekskluzivisht këngët e mia si p.sh sonte këtu para juve”, shpalos Muharremaj.
Tutje në ekran u shfaqën edhe videoklipet e tij. Pas intervistës së shkurtër ku Gjoni shpalosi rrugëtimin e tij artistik në muzikë e kënaqësinë që ishte në mesin e shumë artistëve dhe që njëkohësisht u përcoll herë me buzëqeshje e me të qeshura të mëdha e herë me një përqendrim serioz të fokusit nga ana e publikut, ishte radha që ai të performonte gjithsej katër këngë nga repertori i tij duke pushtuar kështu qytetin e Prishtinës për herë të parë e njëkohësisht për të lënë gjurmët e tij në kujtesën kosovare.
Në skenë me një hijeshi të pakrahasueshme, Gjon Muharremaj nisi koncertin me këngën ‘Repondez moi’. I shoqëruar me pianon përballë tij si një trup i dytë i vendosur në skenë, interpretimi i tij theu heshtjen e publikut kur meloditë e para të pianos ranë papritmas mbi atmosferë e përnjëherë kapluan në emocione publikun që po përhumbeshin brenda kësaj kënge që ndonëse në gjuhën frënge, zëri i tij po futej thellë brenda çdo njeriu të pranishëm e po vallëzonte së bashku me fluturat e krijuara në stomakun tonë.
Luhatjet e vogla të kokës, veshja e tij e veçantë, flokët e rregulluara mbi kokë, ritmi i tij në çelësat bardh e zi, shtypja e petaleve me këmbë, sytë e tij të mbyllura teksa vazhdonte performimin dhe shprehjet e fytyrës të tij që tregonin se kënga dhe ai ishin shndërruar në një melodi të vetme, atë hyjnoren, veçse po dëshmonin se mbrëmë të pranishmit përjetuan një shpërthim tingujsh që me butësinë, ëmbëlsinë dhe notat jashtëzakonisht të larta të këtij artisti, plasariti para nesh emocione dhe ndjenja që zgjonin rrëqethet e trupit të cilat frymonin në çdo cep të sallës.
Më pas, këngët e radhës si: ‘Babi’, ‘Tout l’Universe’ dhe ‘Moj e bukura More’, u performuan aq bukur aq sa edhe po ti mbledhësh të gjitha fjalët shqipe së bashku në një frymë, nuk do të mund të arrihej të përshkruhej kjo natë që ishte e mbushur përplot me elegancë artistike të cilën Gjoni arriti ta krijoj me veçantinë e tij duke mahnitur kështu publikun e duke i rrëmbyer ata në karusel ndjenjash nga ato më të bukurat e nga ato të cilat lënë një shteg kujtimesh që nuk do të harrohen kurrë për arsye se tashmë ato janë të strukur në pafundësinë e emocioneve tona duke thyer kështu limitin e ekzistencës së dashurisë brenda nesh.
Gjon Muharremaj, një emër ky që do duhej të na rikujtonte përsëri se dashuria, pasioni, sinqeriteti, sikleti, dëshira, ëndrra, butësia, brishtësia e ndjeshmëria, janë ndjenja këto të cilat nëse një artist si ai nuk frymon në çdo sekondë me pikërisht ato emocione, atëherë ai artist nuk ka arritur të përjetoj magjinë e të qënurit i tillë.
1 orë e gjysmë tashmë kishin kaluar, e interpretimi i tij që ende jehonte në shpirtërat e çdo njeriu, tashmë gjeti fundin për tu shpërblyer me çmimin tradicional të mbrëmjes artistike ‘Ta zbardhi ftyrën’, e që u dhurua pikërisht nga artistja Erza Muqolli, e cila ishte fytyra paraprake e ‘Ta zbardhi ftyrën’.
Pastaj, në skenë për t’iu bashkangjitur drejtoreshës Ardianë Pajaziti, u ftua edhe i gjithë ekipi i KultPlus: Jeta Zymberi, Liridona Spahiu, Xhemile Hysenaj, Era Berisha dhe Flonja Hoxhaj, për të realizuar një fotografi që do mbetej gjatë në kujtesën e tyre.
Pas këtij koncerti, të pranishmit patën rastin të shijojnë këtë mbrëmje tutje me një koktell në KultPlus Caffe Gallery, ku Gjon Muharremaj ka nënshkruar autografet për të pranishmit e realizuar një numër të pafund fotosh me çdo kë që shprehte dëshirë për të biseduar me të.
Për të treguar më shumë rreth natës së mbrëmshme dhe performancës unike të tij, për KultPlus foli artisti Gjon Muharremaj.
“Unë ndjehem shumë krenarë që e kam pasur këtë mundësi për tu prezantuar te KultPlus e sidomos në Prishtinë dhe dua të falënderoj KultPlus që më ka dhënë këtë çmim të kësaj mbrëmjeje artistike. Ishte një kënaqësi e madhe edhe të takoja kryeministrin Albin Kurti, presidenten Vjosa Osmani, andaj edhe ishte një ditë pak e ‘çmendur’ por ndihem shumë mirë sonte sepse morra një energji shumë pozitive dhe biseda me moderatoren ishte tejet interesante, ndërsa bashkëbisedimi me publikun ishte po ashtu tepër e mirë”, thotë Muharremaj për KultPlus.
Sipas tij, ajo që e bëri atë të kënaqej më së shumti ishte reagimi i njerëzve kur i shikonte, e qëllimi i tij për ti emocionuar njerëzit dhe për të parë vezullimin e tyre në sy, për të konsiderohet krenaria më e madhe.
“Besoj se mënyra e duhur për të shpërndarë kulturën është që ajo të tregohet me njerëzit e kulturës dhe me këtë mundësinë për të regjistruar me kamerë live që e keni bërë ju, kjo për mua ishte shumë e bukur dhe KultPlus është bërë gjuhën e duhur”, tregon Muharremaj.
Për Muharremajn, performimi në Prishtinë ishte shumë e veçantë sepse ai ka një publik që e njeh nga afër e së bashku me Shqipërinë, janë dy vendet që janë shumë ndryshe nga vendet e tjera për arsye se ai e ndjen një veçanti që nuk e ndjen në asnjë tjetër vend.
Ndërsa, kompozitori Florent Boshnjaku, për KultPlus tregoi se kjo natë për të ishte shumë e mrekullueshme.
“Ka qenë një natë e mrekullueshme dhe falënderoj KultPlus që e ka mundësuar një natë të tillë. Në anën tjetër jam ndjerë keq që shumë njerëz ndoshta nuk kanë mundur të jenë prezent. Përveç performancës së mrekullueshme të Gjonit të cilën na dhuroi në fund, pjesa e tregimit të tij i historisë muzikore dhe mënyrën se si ai e ka qasjen në pop muzikë e jo në muzikë klasike, është diçka që me të vërtetë na mungon që njerëzit këtu me kuptu që arti nuk është biznes por është diçka e domosdoshme për gjeneratat e reja”, thotë Boshnjaku për KultPlus.
Sipas tij, mënyra se si Gjoni e shpjegoi emrin artistik të tij, i ka lënë përshtypje tej mase e që ishte një ndërlidhje e jashtëzakonshme e muzikës me emocionin dhe pastaj edhe performanca e fundit e tij që dëshmon se Gjoni është një vazhdimësi e shumë artistëve shqiptar që na përfaqësojnë e po na zbardhin fytyrën.
“Një mbrëmje si kjo, jo që janë të domosdoshme por nuk bën pa to fare. Vetë fakti që KultPlus e mundëson një mbrëmje të tillë artistike, një tregim të tillë me dëgju publiku të një artisti, është e jashtëzakonshme dhe e domosdoshme. Këtu shfrytëzoj rastin për të falënderuar KultPlus për këtë mundësi që edhe neve që jemi në muzikë por edhe publikut të gjerë, me ia dhuru një tregim e një mbrëmje të tillë muzikore”, përfundon Boshnjaku për KultPlus.
Po ashtu, drejtoresha e KultPlus, Ardianë Pajaziti për KultPlus tregoi përshtypjet e saj rreth përfundimit të edicionit të katërt të mbrëmjes artistike “Ta zbardhi ftyrën”.
“Është hera e katërt që po mbahet kjo mbrëmje dhe e kemi dëshmuar se titulli i kësaj mbrëmjeje artistike nuk është një rastësi sepse njerëzit që i kemi sjell përgjatë këtyre katër viteve, po ngërthehen shumë mirë në atë se çfarë kemi menduar me projektin. ‘Ta zbardhi fytyrën’. vazhdimisht po shkon duke e formuar atë mozaikun për të cilën edhe e kemi themeluar”, thotë Pajaziti.
Sipas saj, ajo është shumë me fat për mënyrën se si Gjon’s Tears e ka vlerësuar KultPlus duke ndarë ekskluzivitetin e këngëve të tij të fundit që përmes KultPlus pikërisht për herë të parë në Prishtinë janë performuar para një audience.
Kujtojmë që në edicionet paraprake në “Ta zbardhi ftyrën” mysafirë ishin artistët e njohur si: Sislej Xhafa, Imer Kutllovci, Flaka Goranci dhe Erza Muqolli, të cilët edhe kanë një karrierë të pasur në botën ndërkombëtare.
Projekti “Ta zbardhi ftyrën” i organizuar nga gazeta online për kulturë dhe art KultPlus, në partneritet me Komunën e Prishtinës, Ambasadën e Zvicrës, Universitetin e Prishtinës, Stone Castle, Hotel Opera, Birra Beg, Fluidi, Grand Decor dhe Uji Dea. / KultPlus.com
12 punime do të prezantohen në ekspozitën “Interpretations” që do të hapet sot në KultPlus Caffe Gallery, punime këto që janë nga artistë të rinj, shkruan KultPlus.
“Interpretations” që vjen e kuruar nga Bora Kelmendi është është reflektim i një procesi pune krijues. Përbërje kryesore e këtij procesi është interpretimi dhe në një forme, narrative e njohurive të ditura tashmë apo të prezantuar së fundmi. Interpretimi, është produkt I narrativës personale, pasqyrim i lirë i momenteve, ndodhive, ideve jo materiale në tentativë për të kthyer në diçka materiale.
Ekspozita “Interpretations” vjen si rrjedhojë e projektit “Art dhe Artist te rinj”, projekt që është mbështetë nga Ministria e Kulturës, Rinisë dhe Sporteve.
Ekspozita hapet sot, në ora 19:00, dhe do të rri e hapur për disa ditë. / KultPlus.com
Romani ‘’Spanjës me Dashuri’’ (A España con Amor) i shkrimtarit dhe përkthyesit shumëgjuhësh Elvi Sidheri, që në vete ngërthen ndaras tre pjesë përbërëse të shtjellimit të ngjarjeve dhe personazheve të tij ku tre dashuri, tre kohë, tre periudha historike dhe tre pikëtakime shqiptaro-spanjolle, të sendërtuara në jetët, dashuritë, ngjarjet mbresëlënëse dhe historitë e tre grave, mishërojnë thelbin e këtij libri dhe urat lidhëse midis kulturave shqiptare dhe spanjolle, me ç’rast promovimi i këtij libri mbrëmë u bë në ambientin e KultPlus Caffe Gallery, shkruan KultPlus.
Ky roman përbëhet nga tre periudha të ndryshme kohore, që rrëfehen përmes historive të tre grave, tre femrave të cilat simbolizojnë në mënyrë të përkryer këtë origjinë kaq unike, të shpërfaqur me rrugëtimin e tyre jetësor, me kryeneçësinë burimore shqiptaro-spanjolle, me pasionet e zjarrta, antikonformizmin e përhershëm dhe karakterin e paepur tipik të këtyre dy popujve dhe kulturave.
Ngjarjet e këtij romani zhvillohen duke nisur nga ndodhitë e vrullshme të fillimit të Luftës Civile Spanjolle, me takimin e parë shqiptaro-spanjoll mes flakëve të këtij konflikti që pati shënjuar thellësisht shekullin XX, dhe vijojnë me vazhdimësinë e këtyre lidhjeve shqiptaro-spanjolle, përmes një tjetër figure femërore, në Tiranën e viteve 1970, mes mugëtirës së regjimit monist, dhe kulturës tiranase që nuk iu përkul diktaturës, ndërsa pjesa e tretë e librit shënon kthimin në Spanjë të ngjarjeve, përmes personazhit të tretë femëror, në kërkim të rrënjëve të saj në Madridin e ditëve të sotme.
Të pranishmit mbrëmë patën rastin të dëgjojnë dhe të bashkëbisedojnë në lidhje me përmbajtjen e këtij romani që autori e ka sjell para publikut shqiptar. Ndërsa, të pranishëm në këtë promovim ishin gazetarja e njohur Vera Pelaj dhe poeti, muzikanti dhe ish sportisti i njohur kosovar me banim në Madrid, Sylë Maxhera.
Fillimisht, mbrëmja nisi me fjalimin e gazetares Vera Pelaj e cila fillimisht kujtoi takimin e parë me autorin e tutje vazhdoi të fliste rreth romanit të tij.
“Para disa vitesh ishim në mbrëmje në një tavolinë krijuesish pas përurimit të krijimtarisë të një autori që u mbajt në Bibliotekën Kombëtare. Në atë tavolinë kishte botues, shkrimtarë, studiues, profesorë universitar, unë gazetare dhe Elvi. Nuk e njihja por ma morri mendja që edhe Elvi do të duhej të ishte nga bota krijuese”, ka thënë Pelaj.
Sipas saj, Elvi është një erudit i jashtëzakonshëm, poliglot i cili me punën e tij ditë e natë gjen libra nëpër stepa që ti përkthej e t’ia ofroj lexuesit shqiptar.
“Në romanin ‘Spanjës me dashuri’, ai ngërthen tre periudha që ndërlidhen ngjarjet e ndryshme mes Spanjës dhe Shqipërisë me personazhe interesante. Përmes romanit ai sjell botën spanjolle dhe shqiptare përmes tri periudhave të ndryshme kohore me breza të ndryshëm. Në letërsinë moderne shqipe Elvi sjell ngjarje, imazhe, personazhe e dashuri, kulturë madrilene e tiranase përmes romanit. Elvi ka stil të veçantë të të shkruarit, narracionit e trajtimit të ngjarjeve e personazheve. Ka fjalor shumë të pasur që lexuesi përveç kënaqësisë për të lexuar këtë roman, do të mësoj shumëçka tjetër”, përfundon Pelaj.
Ndërsa, muzikanti Sylë Maxhera i cili mezi priste të këndonte këngë spanjolle romantike, fillimisht ndau një kujtim dhe foli rreth rëndësisë që një autor si Elvi ekziston.
“Nuk kam absolutisht asgjë të përgatitur se është lehtë të flas për dikë si Elvi, si mik e si poet. Ai është një yll. Djali im 13 vjeçar më pyeti se pse Spanja nuk e njeh shtetin e Kosovës, dhe unë iu përgjigja se ka ca çështje politike. Ai më thotë se ‘’Jo babi, por janë trullana’’ në gjuhën shqipe. Prandaj, kemi njerëz si Elvi që është gjëja më e mirë që po na ndodh”, ka thënë Maxhera.
Tutje, vetë autori i këtij romani, Elvi Sidheri foli rreth përmbajtjes së librit dhe mesazhit të tij.
“Titulli i romanit nuk është thjeshtë dashuria ime si autor për Spanjën por është një libër ku dashuria shqiptaro-spanjolle është thelbi i librit. Janë tre breza të ndryshëm të mishëruar nga tre gra në tre kohë të ndryshme. Janë tre periudha historike e tre dashuri shqiptaro-spanjolle. Ngjarjet nisin në fillimin e luftës civile spanjolle. Unë desha të ringjallja në pjesën e parë të romanit dashurinë shqiptare-spanjolle mes një shqiptari idealist që shkon në luftën e Spanjës dhe një spanjolle aristokrate”, thotë Sidheri.
Sipas tij, këta dy personazhe janë dy njerëz të ndryshëm me dy filozofi të kundërta jete e dy vende të ndryshme që takohen dhe që në atë pikë dashuria e tyre shndërrohet në luftën e tyre.
“Kjo dashuri shqiptaro-spanjolle pastaj vazhdon në vitet e 70-ta në Tiranë pasi vajza e këtyre të dashuruarve lind në Tiranë dhe është brezi i dytë i këtij libri. Jam përpjekur që ta vë theksin në jetën kulturore të Tiranës së viteve 70-të sepse ka një problem pasi që pas viteve 90-ta me përshkrimin letrat të diktaturës është parë gjithmonë bardh e zi”, thotë ai.
Për Sidherin, brezi i tretë në këtë libër është mbesa e tretë shqiptaro-spanjolle ku më pas në vitet 2000 ajo kthehet në Spanjë në rrënjët e saj dhe kështu është sjell romani në ditët e sotme. Pra, janë tre breza, tre gra, tre lidhje kulturore shpirtërore shqiptaro-spanjolle.
Po ashtu, nëna e autorit, Luiza Sidheri e cila njëkohësisht është edhe redaktorja e këtij romani, foli për rëndësinë e grave dhe vajzave që shtypen në një shoqëri të tillë patriarkale.
“Pavarësisht zhvillimeve industriale e artit që lëviz përpara e mirëqenies në disa shtresa, jetojmë në shoqëri thellësisht patriarkale. Jemi vende me mendësi patriarkale andaj roli i fuqishëm i grave nuk dihet ose thjesht margjinalizohen. Prandaj, Elvi tek romanet e veta promovon gratë e vajzat që kanë guxim e dinë të shohin përtej humbjes së tyre e dinë të kërkojnë me dinjitet të drejtat e tyre”, thotë ajo.
Ndërsa, ëmbëlsia e natës ishte performanca muzikore e këngëtares së vogël Anna Krasniqi, e cila interpretoi këngët si: ‘Snowman’ nga Sia dhe ‘Tumankuqe’ duke kapluar tërësisht atmosferën në KultPlus Caffe Gallery me talentin e saj të veçantë e zërin që nuk njihte kufij.
Kështu, krejt në fund duartrokitjet ishin ato që zëvendësuan fjalimet ku të pranishmit patën rastin të shtrojnë pyetje ndaj autorit. Pastaj, nata vazhdoi tutje me biseda mes miqsh dhe artdashës të cilët u shoqëruan me meloditë e këngëve spanjolle ku kënga ‘No Volvere’ nga Gipsy Kings pushtoi atmosferën në KultPlus Caffe Gallery.
Elvi Sidheri është shkrimtar, përkthyes letrar, folës i pesëmbëdhjetë gjuhëve të huaja, me një bagazh përkthimesh të përbërë nga dhjetëra libra të zhanreve më të ndryshme, të përkthyera nga një sërë gjuhësh. / KultPlus.com
Ambienti i KultPlus Caffe Gallery sot kishte marr një pamje krejtësisht ndryshe. Ishin fëmijët ata të cilët me laramanin e tyre e buzëqeshjet e sinqerta kishin mbërthyer fuqishëm këtë hapësirë e po e përçonin njëkohësisht tek të rriturit ku secila fytyrë që ishte prezente po rrezatonte dashuri e mirësi, njëkohësisht mirënjohje që fëmijët arrijnë të krijojnë atmosfera të tilla, shkruan KultPlus.
Konkursi “Letër Presidentes” i cili ishte hapur ditë më parë nga KultPlus ishte arsyeja që kishte mbledhur këta fëmijë në një vend.
Përmes këtij konkursi, fëmijët janë motivuar për të shkruar një letër për presidenten duke shprehur kërkesat dhe dëshirat e tyre më të sinqerta. Pas rreth 100 letrave që kishin arritur në adresën e KultPlus, juria profesionale e përbërë nga shkrimtari Ibrahim Kadriu, aktorja Adriana Matoshi dhe përfaqësuesja e KultPlus, redaktorja Jeta Zymberi, janë zgjedhur edhe dhjetë letrat më të mira të fëmijëve, të cilët sot do të prezantoheshin edhe para presidentes.
Ardhja e presidentes, Vjosa Osmani në ambientet e KultPlus Caffe Gallery veç sa shtoi edhe më shumë buzëqeshjet e fëmijëve, ndërsa fëmijët e studios “Let’s Dance” të Vjollca Llugiqit, nisën këtë ngjarje me një performancë të jashtëzakonshme nën melodinë e këngës ‘Me lule t’bukura’ nga Eliza Hoxha, me ç’rast duart e tyre të vogla po mbanin lulediellin, lule këto të cilat përfaqësonin talentin e tyre në artin e performimit të një koreografie ku balerinat mahnitën të pranishmit me veshjet e tyre në ngjyrë pembe dhe seriozitetin që dëshmonte se këto vajza një ditë do të arrijnë edhe në majat më të larta.
Pas kësaj pike, kryeredaktorja e KultPlus, Ardianë Pajaziti, doli në skenë për një fjalë rasti e ku fillimisht falënderoi presidenten që i është përgjigjur pozitivisht kësaj iniciative.
“Presidentja na ka nderuar me mbështetjen e iniciativës së KultPlus për thirrjen për letra të fëmijëve, ku këto letra përveç që zhvilluan krijimtarinë e fëmijëve, nxorën edhe disa kërkesa e dëshira duke dëshmuar se është një shenjë shumë e mirë që institucionin po e shohim shumë afër para kësaj iniciative që është mbështetur”, tha Pajaziti.
Sipas saj, këta fëmijë kanë parë një derë të hapur në KultPlus duke i drejtuar këto letra ndaj jurisë profesionale që ka zgjedhur edhe tre letrat më të mira.
“Përvojën që e kemi marrë me këtë thirrje, do të kisha pasur shumë dëshirë që të realizoja edhe viteve të tjera nëse natyrisht gjejmë mbështetje që këtë thirrje të muajit qershorit të kthejmë në një ngjarje tradicionale”, përfundoi Pajaziti.
Në ndërkohë, fjalën e morri edhe presidentja Osmani e cila fillimisht u shpreh falënderuese ndaj KultPlus-it dhe jurisë për punën e rëndësishme.
“Faleminderit për këtë aktivitet kaq të këndshëm që rëndësinë do ta ketë përtej ditës së sotme për shkak të temave që janë ngritur në letrat e fëmijëve. Nëse duam të jemi një vend i suksesshëm, duhet gjithnjë të jemi afër qytetarëve dhe të sigurohemi që të dëgjojmë zërin e tyre”, u shpreh Osmani.
Sipas saj, ku ka më mirë sesa të jesh pranë fëmijëve të Kosovës, e të dëgjosh kërkesat dhe dëshirat që ata i kanë për vendin, familjen dhe rrethin e tyre sepse Kosova që ne e duam është vendi i ëndrrave më të bukura të fëmijëve.
“Kemi shumë punë për të bërë në mënyrë që secili fëmijë në Kosovë, të ketë fëmijëri të denjë, të duhur, të mirë e në kushte të dinjitetshme. Por, ne po punojmë fort në këtë drejtim dhe do të bëjmë çdo gjë brenda mundësive tona për të plotësuar kërkesat e tyre. Fëmijët janë motivi kryesor për ne për të bërë punë të mira në vendin tonë dhe ju siguroj që sa herë që e nënshkruaj një dokument ose vendim politik, e bëj gjithnjë duke menduar impaktin që do ta ketë ai vendim në gjeneratat e ardhshme”, tha Osmani.
“Çdo buzëqeshje e fëmijëve është gëzim i shumëfishtë për ne dhe na shton jetën, prandaj duam çdo herë që tua shohim fytyrat e buzëqeshura të tyre, duke shkëlqyer në shkollë, gara, aktivitete e duke arritur majat në çdo fushë në të cilën angazhohen”, theksoi Osmani.
Krejt për fund, Osmani u shprehur se do të lexojë çdo kërkesë dhe dëshirë me shumë kujdes e do t’i përgjigjet gjithsecilit, derisa bëri edhe thirrje që fëmijët të ndjehen të lirë ti drejtohen me kërkesa sa herë që ata e shohin të nevojshme që presidentja duhet të jetë në dijeni për çështje të caktuara.
Në mesin e letrave të fëmijëve janë dalluar mjaft kërkesa, dëshira e lutje nga më të ndryshmet, andaj moderatorja Vlora Merovci ftoi anëtarin e jurisë, shkrimtarin Ibrahim Kadriun për të arsyetuar përzgjedhjen e 10 letrave nga ana e jurisë.
“Në një manifestim të tillë nuk kam pasur rastin të jem pjesë asnjëherë. Në këto letra të fëmijëve është vërejtur vullneti i tyre, dhembshuria dhe dëshira që ata të marrin pjesë në ndërtimin e Kosovës, e që kjo është shumë me rëndësi”, ka thënë Kadriu.
Pas fjalës së jurisë, të pranishmit patën rastin të dëgjojnë performancën muzikore të këngëtares së vogël Anna Krasniqi, e cila së bashku me këngëtarin Endrit Rexhepi, interpretuan këngën ‘Runnin’ nga Beyonce dhe njëkohësisht pushtuan atmosferën në KultPlus Caffe Gallery me talentin e tyre të veçantë e tejet inspirues për çdo kë.
Më në fund, pritjes së fëmijëve po i vinte fundi. Pasi nisi edhe shpërndarja e mirënjohjeve për letrat e përzgjedhura nga juria.
Henza Mahmuti, Hira Prapashtica, David Gojani, Daorsa Ahmeti, Don Duli, Gresa Haxhijaha, Lira Safedini dhe fëmiëjt nga Qendra Ditore: Amarildo Zeneli, Bajremshah Hyseni, Hamide Demiri, Isuf Kusha dhe Raul Serjani ishin fëmijët ndaj të cilëve u ndanë mirënjohje për të vazhduar tutje me tri shpërblimet e para.
Tutje presidentja Osmani u ftua që të ndajë tre çmimet e para fituese, të cilat edhe u shpërblyen.
Çmimi i tretë shkoi për letrat nga Qendra Ditore
Çmimi i dytë shkoi për: Leart Kyreziun;
Çmimi i parë shkoi për: Anesa Sadikun.
Pas ceremonisë, nxënësit fitues të tre vendeve të para, patën rastin që të lexojnë letrat e tyre para presidentes e që me fjalët e tyre emocionuan të pranishmit e madje nuk munguan as lotët.
Pas këtyre emocioneve, për tu shpërqendruar pak, fëmijët u ftuan që të bëjnë një fotografi me presidenten dhe jurinë profesionale. Po ashtu, të pranishmit vazhduan të këndonin e vallëzonin nën zërin e këngëtarit Endrit Rexhepi i cili vazhdoi të performonte në kitarë e të këndonte me zërin e tij që buçonte deri në qiell.
Në fund është bërë e ditur që letrat e fëmijëve do të publikohen edhe në gazetën KultPlus. / KultPlus.com
Fëmijëve të Kosovës ju dha mundësia që t’i drejtohen me një letër presidentes së Republikës së Kosovës, Vjosa Osmanit, përmes një konkursi të hapur nga KultPlus.
Pas mbylljes së aplikimeve ku kanë arritur mbi 100 letra në adresën e KultPlus, juria profesionale e përbërë nga shkrimtari Ibrahim Kadriu, aktorja Adriana Matoshi dhe përfaqësuesja e KultPlus, redaktorja Jeta Zymberi, janë zgjedhur edhe dhjetë letrat më të mira drejtuar presidentes përmes sëcilave fëmijët e moshave prej 10 deri 15 vjet i drejtohen presidentes duke shprehur kërkesat dhe dëshirat e tyre.
Për të shënuar këtë organizim përmes një ceremonie, KultPlus ka organizuar eventin “Letër Presidentes” ku do të jetë e pranishme edhe presidentja e Republikës së Kosovës, Vjosa Osmani ku me këtë rast dhjetë fëmijët e përzgjedhur nga kjo garë do të jenë të pranishëm e do t’i lexojnë letrat e tyre para presidentes.
Krejt në fund fëmijët do të certifikohen, kurse tri letrat më të mira edhe do të shpërblehen.
Eventi mbahet sot, më datë 30 qershor, në ora 13:00 në KultPlus Caffe Gallery. / KultPlus.com
Fëmijëve të Kosovës ju dha mundësia që t’i drejtohen me një letër presidentes së Republikës së Kosovës, Vjosa Osmanit, përmes një konkursi të hapur nga KultPlus.
Pas mbylljes së aplikimeve ku kanë arritur mbi 100 letra në adresën e KultPlus, juria profesionale e përbërë nga shkrimtari Ibrahim Kadriu, aktorja Adriana Matoshi dhe përfaqësuesja e KultPlus, redaktorja Jeta Zymberi, janë zgjedhur edhe dhjetë letrat më të mira drejtuar presidentes përmes sëcilave fëmijët e moshave prej 10 deri 15 vjet i drejtohen presidentes duke shprehur kërkesat dhe dëshirat e tyre.
Për të shënuar këtë organizim përmes një ceremonie, KultPlus ka organizuar eventin “Letër Presidentes” ku do të jetë e pranishme edhe presidentja e Republikës së Kosovës, Vjosa Osmani ku me këtë rast dhjetë fëmijët e përzgjedhur nga kjo garë do të jenë të pranishëm e do t’i lexojnë letrat e tyre para presidentes.
Krejt në fund fëmijët do të certifikohen, kurse tri letrat më të mira edhe do të shpërblehen.
Eventi mbahet nesër, më datë 30 qershor, në ora 13:00 në KultPlus Caffe Gallery. / KultPlus.com
Fëmijëve të Kosovës ju dha mundësia që t’i drejtohen me një letër presidentes së Republikës së Kosovës, Vjosa Osmanit, përmes një konkursi të hapur nga KultPlus.
Pas mbylljes së aplikimeve ku kanë arritur mbi 100 letra në adresën e KultPlus, juria profesionale e përbërë nga shkrimtari Ibrahim Kadriu, aktorja Adriana Matoshi dhe përfaqësuesja e KultPlus, redaktorja Jeta Zymberi, janë zgjedhur edhe dhjetë letrat më të mira drejtuar presidentes përmes sëcilave fëmijët e moshave prej 10 deri 15 vjet i drejtohen presidentes duke shprehur kërkesat dhe dëshirat e tyre.
Për të shënuar këtë organizim përmes një ceremonie, KultPlus ka organizuar eventin “Letër Presidentes” ku do të jetë e pranishme edhe presidentja e Republikës së Kosovës, Vjosa Osmani ku me këtë rast fëmijët e përzgjedhur nga kjo garë do të jenë të pranishëm e do ti lexojnë letrat e tyre para presidentes.
Krejt në fund fëmijët do të certifikohen, kurse tri letrat më të mira edhe do të shpërblehen.
Eventi mbahet ditën e mërkurë, më datë 30 qershor, në ora 13:00 në KultPlus Caffe Gallery. / KultPlus.com
Fëmijët e Kosovës do të kenë mundësi që ti drejtohen me një letër presidentes së Republikës së Kosovës Vjosa Osmani, shkruan KultPlus.
KultPlus fton të gjithë fëmijët prej 10 deri 15 vjet që ti drejtohen me një letër presidentes së vendit, të cilët, nëpërmjet letrave, ata mund të shprehin kërkesat dhe dëshirat e tyre, të cilat edhe do ti nënshtrohen një jurie profesionale prej tre shkrimtarëve për fëmijë.
Ardianë Pajaziti, kryeredaktore e KultPlus ka njoftuar se kjo thirrje ka për qëllim që fëmijët ti ofrojë sa më afër institucioneve të Kosovës, por në të njëjtën kohë, edhe presidentja e vendit të kuptojë se çfarë dëshira dhe kërkesa kanë këta fëmijë të këtyre moshave.
Me qëllim që letrat të jenë sa më origjinale, fëmijët duhet të shkruajnë me dorë (jo me kompjuter), më së shumti një faqe të fletores, dhe të njëjtat të fotografohen në mënyrë të qartë, të shkruhet emri dhe mbiemri i fëmiut, kontakti dhe të dërgohen në [email protected] dhe [email protected], deri më datë 17 qershor.
Juria do të përzgjedhë dhjetë letrat më të mira të kësaj gare, të cilat edhe do të certifikohen, kurse tri letrat më të mira edhe do të shpërblehen.
Për këtë thirrje për fëmijët, krejt në fund do të organizohet edhe një ceremoni, ku do të jetë e pranishme edhe presidentja e Republikës së Kosovës Vjosa Osmani./ KultPlus.com
Fëmijët e Kosovës do të kenë mundësi që ti drejtohen me një letër presidentes së Republikës së Kosovës Vjosa Osmani, shkruan KultPlus.
KultPlus fton të gjithë fëmijët prej 10 deri 15 vjet që ti drejtohen me një letër presidentes së vendit, të cilët, nëpërmjet letrave, ata mund të shprehin kërkesat dhe dëshirat e tyre, të cilat edhe do ti nënshtrohen një jurie profesionale prej tre shkrimtarëve për fëmijë.
Ardianë Pajaziti, kryeredaktore e KultPlus ka njoftuar se kjo thirrje ka për qëllim që fëmijët ti ofrojë sa më afër institucioneve të Kosovës, por në të njëjtën kohë, edhe presidentja e vendit të kuptojë se çfarë dëshira dhe kërkesa kanë këta fëmijë të këtyre moshave.
Me qëllim që letrat të jenë sa më origjinale, fëmijët duhet të shkruajnë me dorë (jo me kompjuter), më së shumti një faqe të fletores, dhe të njëjtat të fotografohen në mënyrë të qartë, të shkruhet emri dhe mbiemri i fëmiut, kontakti dhe të dërgohen në [email protected], deri më 15 qershor.
Juria do të përzgjedhë dhjetë letrat më të mira të kësaj gare, të cilat edhe do të certifikohen, kurse tri letrat më të mira edhe do të shpërblehen.
Për këtë thirrje për fëmijët, krejt në fund do të organizohet edhe një ceremoni, ku do të jetë e pranishme edhe presidentja e Republikës së Kosovës Vjosa Osmani./ KultPlus.com
Ambienti i KultPlus Caffe Gallery është shndërruar në një vend ku përveç që zënë vend organizimet nga më të ndryshme për të rinjtë që dashurojnë artin, kulturën dhe jo vetëm, tani hapësira u shfrytëzua edhe nga fëmijët të cilët përmes vizatimeve dhe pikturimit, me rastin e 1 qershorit, ata kaluan një pasdite mjaft të bukur me piktorin e njohur Kosta Zhonga, shkruan KultPlus.
Dje, një ngjarje e tillë ka mbledhur rreth vetës një numër të madh të fëmijëve dhe prindërve të tyre, ku të gjithë kishin ardhur për të kaluar një pasdite nën shoqërimin e melodive të këngëve të ndryshme për fëmijë dhe përmes ngjyrave të shumta të cilat ishin të shpërndara gjithandej, ata arritën të krijojnë një kryevepër krejt në fund, një mozaik i formuar nga copëzat e shumta që fëmijët kanë ngjyrosur, me ç’rast mozaiku zuri vend në dritaret e KultPlus Caffe Gallery.
Përmes një aktiviteti të tillë u dallua mjaft shumë edhe dëshira dhe nevoja e madhe për ngjarje të tilla që organizohen nga dhe rreth fëmijëve. Këto ngjarje jo vetëm që shpalosin talentin e tyre në një moshë të re por aty në fakt mund të nis edhe rrugëtimi i tyre për një të ardhme që ngërthen artin në formën më të mirë të mundshme.
Me fleta të bardha dhe ngjyra të shumta, fëmijët nisën të pikturonin figurën e vendosur para tyre. Lumturia që dallohej në sytë e piktorit ishte në të njëjtin nivel me atë të fëmijëve, të cilët kishin një energji të pa krahasueshme duke shfrytëzuar kështu në masë të madhe ndihmën e Zhongës për ti mësuar dy apo tre teknika të veçanta të pikturimit.
Teksa fëmijët pikturonin, prindërit ishin ata që po ndiqnin punën e tyre më buzëqeshje në fytyrat e tyre, e disa të tjerë iu vinin në ndihmë fëmijëve të tyre kur ata hasnin në ndonjë problem. Po ashtu, fotografitë dhe bisedat e ndryshme ishin bërë pjesë kyçe e këtij aktiviteti që shënoi Ditën Ndërkombëtare të Fëmijëve.
Kështu krejt në fund, pas përfundimit të pikturimit të tyre, fëmijët së bashku me piktorin morën vizatimet e tyre afër vetes dhe me një buzëqeshje që nuk hiqej dot asnjë sekondë, ata vendosën ngadalë vizatimet e tyre në dritare duke formuar kështu mozaikun final, një mozaik ku fjala ‘1 qershor’ ishte ngjyrosur nga secili fëmijë i pranishëm ku u formua edhe rasti më i mirë për të bërë një fotografi unike me piktorin.
Gjithashtu, fletoret e vizatimit të botuara dhe të firmosura nga vetë piktori ishin një kujtim i bukur i ditës së djeshme që fëmijët do ta kenë gjithmonë me vete.
Ndërsa, për të folur më shumë rreth këtyre momenteve, për KultPlus foli vetë piktori Kosta Zhonga.
“Kjo ditë është e mrekullueshme sepse po e shoh se sa të interesuar janë fëmijët dhe prindërit e tyre prandaj dua edhe ti uroj 1 qershorin. Ajo çka më pëlqeu ishte se të gjithë fëmijët shumë të talentuar me sa po e shikoj unë. Janë të mrekullueshëm si vajzat edhe djemtë. Por edhe prindërit janë shumë ta pasionuar pas pikturës”, thotë Zhonga.
Sipas tij, të gjithë ata të pranishëm e donin pikturën sepse vazhdimisht kërkonin akoma më shumë letra e ngjyra, prandaj edhe ai mundohej t’ia shpjegonte fëmijëve lëvizjet dhe teknikat e dorës për të krijuar figura të ndryshme.
“Unë jam i gatshëm gjithmonë për aktivitete të tjera të njëjta sepse përpara fëmijëve nuk ndalojmë asnjëherë”, përfundon Zhonga për KultPlus.
KultPlus me mbështetje të Komunës së Prishtinës organizoi punëtorinë me Kosta Zhongën, i njohur për fëmijët si Xhaxhi Piktori. / KultPlus.com
Ambienti i KultPlus Caffe Gallery është shndërruar në një vend ku gjithmonë zënë vend prezantimet nga më të ndryshme të artistëve, bashkëbisedimet për dhe rreth kulturës, shpalosjet e thella rreth çështjeve dhe kërkesave të rëndësishme të shtruara nga komuniteti artistik, si dhe shpalosjet e programeve për kulturë, si nga ana e qeverisë, ashtu edhe nga ajo e Ministrisë së Kulturës, shkruan KultPlus.
Mbrëmë, një ngjarje e tillë ka mbledhur rreth vetës një numër të madh artistësh e udhëheqës të institucioneve kulturore, ku të gjithë kishin ardhur për të dëgjuar nga afër programin e Ministrit të Kulturës, Rinisë dhe Sportit, Hajrulla Çekut, program ky që pritet ta zbatojë përgjatë mandatit katër vjeçar.
Përmes një diskutimi të përbashkët me komunitetin artistik, ministri fillimisht tregoi se fokusi i tij është në miratimin e programit për dy segmente ku përfshihet ndërtimi ndryshe i qasjes për nga mënyra se si funksionojnë institucionet kombëtare të kulturës dhe zhvillimi i një partneriteti strategjik me skemën kombëtare të pavarur. Këto dy drejtime janë pjesë kyçe të cilat do të përmbushin nevojën për reformën me një program më cilësor dhe më reprezentativ.
Skema e pavarur kulturore është menduar të bëhet aleat i shtetit për promovimin ndërkombëtar të artit, imazhit ndërkombëtar të shtetit dhe zhvillimit të mirëqenies së përgjithshme të qytetarëve të Kosovës. Kurse, për institucionet kombëtare të kulturës tashmë ka filluar një diskutim me Ministrinë e Financave për të siguruar një lloj autonomie financiare dhe administrative të këtyre institucioneve.
Pasi të pranishmit kishin zënë vendet e tyre, nën shoqërimin e shiut që po binte furishëm, po njëlloj ishin edhe diskutimet rreth çështjeve të ndryshme që pasuan përgjatë diskutimit, të cilat herë nisnin në një frymë humori por përfundonin në rrjedhën e seriozitetit.
Debati nisi nën moderimin e aktores Vlora Merovci e ku fillimisht, Ministri u kujdes të falënderoj gazetën KultPlus për angazhimin e vazhdueshëm dinamik.
“Faleminderit KultPlus për një angazhim që disa vite nuk po ndalet e po e mban një lloj dinamike të diskutimit mbi çështjet që lidhen me artin dhe kulturën, prandaj për mua është kënaqësi të jemi së bashku këtu”, tha Çeku.
Sipas tij, ekziston një kaos që duhet të rimendohet për një funksion efikas ndaj reformave dhe parimeve të përgjithshme të cilat në krye kanë këshilla drejtues, drejtorë dhe mënyra të ndryshme të organizimit strukturor të programeve. Andaj, puna për të fuqizuar pozitat e udhëheqësve si: menaxherët e përgjithshëm, drejtori i përgjithshëm dhe udhëheqësit artistik, do të duhej të ishte njëra ndër pikat kryesore që këto figura të jenë shumë të fuqishme.
“Qëllimi final është programi cilësor dhe zhvillimi i audiencës përmes krijimtarisë, prodhimtarisë dhe konsumit kulturor. Prandaj, ekziston diskutimi me një grup të organizatave ku modeli i financimit është më i mirë dhe më i gjallë, për arsye se Ministria e Kulturës që 20 vite është më shumë skemë sociale sesa një Ministri e zhvilluar’’, thotë Ceku.
Për Çekun, është një fatkeqësi që në kulturë të ekzistojë një logjikë e shpërndarjes së fondeve për të gjithë nga pak sepse kultura nuk duhet të funksionojë me këtë logjikë sepse siç po shihet nuk ka rezultate deri më tash. Ndërkohë, ekzistojnë edhe propozime nga organizatat për një model tjetër për fondin kulturor ku vendimmarrja për projektet të jetë e pavarur në mënyrë që kultura të financohet jo si skemë sociale por si fond zhvillimor.
Tutje, Çeku foli edhe rreth çështjes së vendimmarrjes finale sepse ai shpesh ishte sfiduar me pyetje që kërkojnë përgjigje përfundimtare e sipas tij nuk ka një përgjigje përfundimtare sepse ai beson se në art dhe kulturë nuk duhet të ekzistojnë të tilla, definitive por parime të përgjithshme dhe orientime të ndryshme ngase përgjigjet përfundimtare vijnë nga vetë komunitetet.
“Deri tash kemi humbur kohë me ndërtimin e strategjisë sektoriale prandaj duhet të gjejmë forma më kreative, më të shpejta dhe të lehta për t’i lëvizur disa gjëra që kanë mbetur të bllokuara për një kohë të gjatë. Andaj, rëndësi kanë për të marrë ato fusha ku kanë nevojë më së shumti, aty ku komuniteti më orienton mua, por kur bëhet fjalë për trashëgiminë, unë do ti dhuroj prioritet maksimal kohor dhe buxhetor, konsolidimit të rreth 200 monumenteve që janë në rrezik, në çdo moment”, tha Çeku.
Teksa ai u pyet edhe nga moderatorja Vlora Merovci rreth gjendjes të cilën ai e ka gjetur institucionin, ai është shprehur se në fakt është pjesa më e dhimbshme dhe pjesa të cilën ai më së paku ka dëshirë ta flas për arsye se nuk dëshiron të tingëllojë sikur një shfajësim apo vënie faji të dikujt tjetër ose edhe distancim nga përgjegjësia.
“Unë çdo ditë i kujtoj vetes shifrën e zgjedhjeve të fundit sepse kur dikush të voton me këtë nivel të besimit të paarritshëm në shumë vende të botës, është një përgjegjësi e madhe”, potencon ai.
Mënyra më e mirë për të racionalizuar legjislacionin, mendohet të jetë vendosja e vetëm një ligji të kulturës e për çka ai ka kërkuar ndihmën e artistëve. Gjithashtu ka bërë të ditur se shumë shpejt do të publikohen edhe parregullsitë e tjera që mediat nuk i dinë por që është një listë mjaft e madhe.
Teatri Kombëtar, Galeria e Arteve, Filharmonia e Kosovës, Muzeu i Kosovës dhe Ansambli Kombëtar i Shotës, janë vetëm disa institucione të cilat kanë nevojë për ndihmë emergjente dhe financiare, prandaj komuniteti artistik i pranishëm patën rastin të shtrojnë para Ministrit, jo vetëm problemet dhe shqetësimet e tyre por edhe kërkesat e shpresat, të cilat Çeku do të mundohet t’i realizoj.
Kërkesat dhe problemet e shtruara përfshinin: ndarjen e buxhetit, planet për vitet e ardhshme në kuptimin kapital, infrastruktura për të shfaqur punë dinjitoze, ndryshimi i administrimit politik të kulturës, mënyra e zgjedhjes së komisioneve, ndarja e subvencioneve, pajisja e institucioneve me kuadro të mirëfillta, mungesa e kritikave të mirëfillta në çdo fushë të artit, krijimi i vendeve të punës për gjeneratat e reja, drejtimi i kërkesave së klientëve në mënyrë të drejtë nga administratat, regjistrimi i projekteve në një vend ku shikohet progresi i tyre dhe vendi i saktë i tyre, planet për renovimin e Teatrit, takime me punëtorët e teatrit për çështje të ndryshme, ligji për të drejtat e autorit e shumë të tjera.
Pasi u deklarua se ai nuk e ka guximin e ministrave të kaluar që të mos raportoj parregullsitë që i detekton në ministri, Çeku, me një përgjegjësi të plotë u mundua t’i jap përgjigje secilës pyetje të artistëve.
Fillimisht tregoi se janë duke punuar fuqishëm për të themeluar institucionin e Operës për të pasur një program e aktivitet në një ambient të rregullt me premiera aktive.
Tutje u shpreh se do të punojë në minimizimin e Ministrisë së Kulturës për ta kthyer në rolin e saj që e ka realisht.
“Duhet të hiqet dominimi absurd që është vënë mbi sektorin sepse tash po e vërej që Ministri ka vendosur si të ndahen subvencionet e gjë që nuk duhet ndodhur. Do të tentoj të eliminoj logjikën për të marrë projekte me shuma të vogla sepse kjo qasje e vjetër është shfrytëzuar për të shprehur ndikim politik. Komisionet tashmë janë duke u monitoruar nga media dhe duhet të ndërrohen komplet”, tha Çeku duke treguar se tash e tutje do ta mbaj kabinetin e tij larg vendimmarrjes.
Gjatë këtij diskutimi u tregua se tashmë Ministria e Kulturës është duke i zhvilluar tre databaza për kulturë, trashëgimi dhe sport ku çështja e projekteve do të trajtohet në mënyrë online ku të mos ketë më burokraci.
Krejt për fund të këtij diskutimi u fol edhe për performancat e kulturës jashtë vendit dhe përpjekjet e anëtarësimit të Kosovës në UNESCO.
“Ky diskutim rreth cilësisë artistike lidhet me prezantimin ndërkombëtar sepse kemi nevojë për të komunikuar përmes artit dhe artistëve ku fondi të ngritet në një nivel ndërkombëtar. Ndërsa në UNESCO duhet të aplikojmë vetëm atëherë kur e dimë se do të anëtarësohemi sepse dështimi i kaluar nuk do të duhej të shndërrohej në një ndëshkim afatgjatë për Kosovën”, tha Çeku.
Kështu, krejt në fund nuk munguan as edhe admirimet për KultPlus si një forum i rëndësishëm për të debatuar rreth kulturës në një strukturë të përgjithshme si dhe lumturia për atë se çka u dëgjua përgjatë natës së mbrëmshme. Kurse, pas debatit të pranishmit lanë anash shqetësimet e tyre për të shijuar nga një gotë verë e për tu kënaqur me muzikë shqiptare që po kulmonte në ambientin e KultPlus Caffe Gallery.
Eventi ishte i sponsorisuar nga Stone Castle dhe Fluidi. / KultPlus.com
KultPlus Caffe Gallery është vendi që bënë bashkë artistët jo vetëm për shpalosjen e punës së tyre por edhe për takime të ndryshme përmes të cilave synohet që të ju bëhet zgjidhje problemeve të këtij komuniteti.
Kësaj radhe, KultPlus ka ftuar ministrin e Ministrisë së Kulturës, Rinisë dhe Sportit, Hajrulla Çekun si personin adekuatë ku do të adresohen problemet e komunitetit artistik.
Sonte, Çeku do të jetë i pranishëm për të shpalosur programin e tij dhe njëkohësisht do të takohen nga afër me artistët për të dëgjuar kërkesat e tyre të cilave pritet të ju japë zgjidhje gjatë mandatit të tij.
Eventi mbahet sonte duke filluar nga ora 19:00 në KultPlus Caffe Gallery.
Gjithashtu ju informojmë që eventi është i hapur dhe do të mbahet duke respektuar masat mbrojtëse kundër Covid-19, por për shkak të numrit të limituar, duhet njoftuar paraprakisht për pjesëmarrjen tuaj. / KultPlus.com
Rrëfimet inspiruese janë bërë pjesë e ngjarjeve që po zhvillohen në KultPlus Caffe Gallery me idenë që të rinjtë të frymëzohen për ndërtimin e një karriere të suksesshme dhe marrjen e forcës për përballimin e sfidave që i shfaq rruga, shkruan KultPlus.
Themeluesi i kompanisë së madhe “Gjirafa”, Mërgim Cahani, ishte figura e radhës që shpalosi rrëfimin e tij inspirues në KultPlus, për platfromën e tij e cila përmban video dhe studio të produksionit prandaj edhe njihet si kompani lidere e shitjes online në Kosovë.
Por për të arritur aty ku është sot, nuk ishte e lehtë. Mërgimi ka rrezikuar, sakrifikuar, ka përjetuar dështime e sfida që ndoshta edhe nuk i kishte pritur, por mbi të gjitha nuk i është ndarë qëllimit.
“Gjirafa Inc.”, është kompania me rritjen më të shpejtë në Ballkan që ofron shërbime të internetit dhe një nga start-ups me investimin më të madh VC nga investitorë me reputacion në Evropë. Po ashtu Gjirafa është cilësuar në pozitën e 11 në listën ‘Deloitte Technology Fast 50 ranking’ për Evropën Qendrore dhe në pozitën e parë në regjion, me rritje 1,500% në katër vitet e fundit.
Mërgim Cahani, përkundër sfidave dhe dështimeve në fillim, arriti të krijojë kompaninë më të suksesshme në vend, e ky rrugëtim nisi qysh në fëmijëri fillimisht me ato ëndrrat e secilit nga ne si fluturimi, frymëmarrja nën ujë e pastaj në vazhdimësi me dëshirën për lëndën e matematikës duke iu shmangur sa më shumë të shprehurit e të folurit pasi që vetë ai ishte një tip i mbyllur në vetvete.
I lindur dhe rritur në Gjakovë, ai për herë të parë pati mundësi të pronësojë një kompjuter i cili ishte nga modelet më të vjetra, nga ato modelet pa wifi, pa ‘maus’ dhe me ekranin bardh e zi. Kjo dhuratë që i erdhi nga babai, i dha atij hapin e parë të përshëndetjes me teknologjinë por që nuk pati shumë interes për arsye se ai u orientua në Shkollën e Mesme të Mjekësisë, profesion të cilin e barte edhe e ëma. Periudha gjatë asaj kohe kishte qenë e mirë por pastaj për shkak të numrit të limituar të të pranuarve, siç është problem edhe sot, ai nuk u pranua në Fakultetin e Mjekësisë as në Prishtinë, por as në Tiranë e Sarajevë.
Pas dështimit në pranimin e këtyre universiteteve, ringjallja e tij gjeti shtëpinë e fushës së matematikës dhe pranimit të tij duke u listuar në vendin e dytë në listën e të pranuarve në universitet.
Rrugëtimi i formimi të platformës Gjirafa, nisi në fundin e vitit 2001 ku Mërgimi aplikoi në një universitet në ShBA në drejtimin e shkencave kompjuterike dhe u pranua me një bursë të pjesërishme dhe pastaj me 5 janar 2002 në New York, ku edhe jetoi për 12 vite, filloi fokusi i tij intensiv në disa kompani dhe profesioni si mësimdhënës në lëndën e shkencave kompjuterike në njërën nga universitetet në ShBA.
“Nëse nuk do të kisha qenë për 12 vite në New York, ndoshta nuk do e kisha pasur intesivitetin e motivit të njëjtë e ndoshta i gjithë ky plan do të kishte marrë kahje tjetër”, thotë Cahani.
Reflektimi i tij ndodhi në një moment duke u motivuar nga thënia e një filozofi, ‘Çdo njeri i ka dy jetë dhe e dyta fillon kur e kupton se e ke vetëm një’, ku ai e gjeti veten duke menduar se aspekti emocional është më i rëndësishëm se ai ekonomik.
“Më është dukur se arrita një stabilitet nga aspekti ekonomik të cilën e quaja ‘American Dream’, një punë e cila nis nga e hëna në të premten nga ora 9:00 në 17:00. Ke një veturë të mirë dhe mund të shëtitësh”, kujton Cahani.
Periudha e mësimdhënies është një proces që merr kohë pavarësisht se është një punë fleksibile dhe me të ardhura të mira financiare. Kjo sakrificë shihet se i ka hyrë në punë Cahanit i cili iu përkushtua kompanisë së tij më një fokus të pa krahasueshëm.
Teksa ai fliste për rrugëtimin të quajtur ‘jetë’, tregon edhe për një moment të veçantë ku ai përfundoi Masterin në New York, dhe ku punoi me profesorin dhe shkencëtarin kryesor të Yahoo.com. Së bashku me të, punuan në një makinë kërkimore për Zelandën e Re. Por njohuria teknike nuk mjaftonte për të qenë i përmbushur në aspektin profesional, prandaj ai filloi të mendonte disa hapa përpara dhe kështu gjatë vizitave të tij ai nisi të krahasonte tregun në Kosovë me atë në New York.
Në mesin e rrëfimit të tij ai shfaq edhe një shembull ku në kohën e tij mund të bënte porosinë për një picë në New York, por jo edhe në Kosovë, prandaj përdorimi i internetit dhe zbulimi i një diçkaje të re me një mundësi me vlerë të madhe ishte e domosdoshme sepse tregu në Kosovë ishte një dekadë më vonë se ai në New York.
“Tërhoqa pensionin në New York dhe brenda 2 jave likuidova të gjitha çka kisha në pronësi por jo librat, dhe u ktheva në Kosovë për të krijuar një kompani teknologjike e cila ofron shërbime të cilat nuk ekzistonin asokohe, prandaj edhe sot kur flas me investitorë të huaj e përmend se aspekti i teknologjisë është i lënë pas dore në këtë rajon të Evropës për shkak të kompleksitetit që sjell”, tregon Cahani.
Vizioni i tij për të ardhmen e kompanisë “Gjirafa” ishte në një nivel të lartë, por kapaciteti i arritur tani, është menduar që të arrihet edhe më herët, por kjo nuk ndodhi. Në vitin 2021 është menduar që kompania të jetë e radhitur në tregjet financiare publike siç është New York Stock Exchange por sipas Cahanit, ky synim mendohet të arrihet në vitin 2025.
Rrezikimi i kthimit nga New York në Kosovë, nuk mund të quhet edhe plotësisht një rrezik sepse puna e bërë me zemër i tejkalon kufijtë e çmimit që një njeri paguan. Prandaj edhe principi i tij momentalisht është që nëse punën e adhuron duhet të punosh ‘full time’, e cila edhe e ndihmoi atë në suksesin e tij.
Nën moderimin e gazetares Xhemile Hysenaj dhe pjesëmarrësve, u formua një atmosferë e ngrohtë dhe e afërt me vetë themeluesin e kompanisë, i cili kur tregoi sfidat nëpër të cilat ka hasur dhe vështirësitë, duke filluar nga aspekti praktik dhe ideologjik, ai specifikon atë ideologjike sepse dedikimi për një vizion ka nevojë për një siguri totale.
Pasioni dhe dashuria për punën janë kriteret kryesore të cilat i bëjnë ballë dështimeve të cilat edhe ndodhin herë pas here sepse asnjë sukses nuk arrin në maja pa prekur tokën disa herë.
Durimi dhe kohëzgjatja për të mbërritur në fundin e shkallëve, ndonëse shkallët asnjëherë nuk kanë fund, janë diçka e domosdoshme dhe këshilla e Cahanit për njerëzit që nuk i përkushtohen punës 100%, është se puna dhe jeta private duhet të integrohen së bashku në një dhe jo ndaras në vetvete. “Just start, vetëm fillo. Pick your hard, zgjedh vështirësinë tënde”, potencon ai.
Sipas Cahanit, dorëzimi pas një gabimi, është një marrëzi e cila është prekur nga të gjithë prandaj edhe ndërrimi i planit është i domosdoshëm ose vazhdimi me një gjallëri të re. Kompania “Gjirafa” ka ende një rrugëtim të gjatë përpara, edhe pse me 200 punëtorë, delikatesa e saj në biznes ekziston.
“6 muaj nga sot ose do të jemi tre herë më të lartë ose do të zhdukemi përherë”, sugjeron shembullin Cahani i cili “Gjirafën” e konsideron larg suksesit prandaj përpara se të arrihet në sukses, e rëndësishme mbetet procesi deri në atë pikë.
Kur flasim për suksesin e të gjitha copëzave të “Gjirafës”, përmendim edhe disa nga ato të cilat janë nën hije ose nuk janë të përmendura zakonisht por që secila në vetvete ngërthen një ide të hershme pas vetes. Disa nga to janë: Gjirafa.biz dhe Gjirafa.video.
Prodhimtaria e kategorisë ‘Gjirafa.biz’, sipas Cahanit, lindi nga një projekt i dështuar sepse nuk ka qenë problem i Google por sepse orari nuk ishte publikuar për arsye se nuk ekzistonte në atë kohë. Prandaj lindi edhe ideja e digjitalizimit të tregut në online duke përfshirë hartat e nevojshme të cilat në fillim nuk ishin stabile dhe saktësia nuk ishte e qëndrueshme.
Ndërsa prodhimtaria e kategorisë ‘Gjirafa Video’, ka filluar si një ide me aktoren Doresa Rexha dhe profesorin Shkumbin Istrefi, ku aktori kishte treguar se si është ndërprerë seriali ‘Kafeneja jonë’, dhe nga kureshtja e Mërgimit pasoi edhe plani i kompanisë për rikthimin e serialit pa kamera, pa regjisorë dhe pa platformë. Të dy aktorët punuan rreth 10 episode dhe para lansimit të tyre u krijua edhe platforma ‘Gjirafa Video’, ku u lansuan episodet.
“Fituam rreth 200 mijë shikime për 3 orë, dhe pas 10 minutave, rrjeti ra për shkak të shikueshmërisë së madhe. Premiera u konsiderua tejet e suksesshme në atë kohë edhe pse platforma nuk ishte stabile”, kujton Cahani.
Kurse sot ekziston një staf me orar të plotë të produksionit me regji nga Valter Lucaj dhe shumë pjesëmarrës të cilët punojnë pa ndalur për projekte të reja.
Njëra nga sukseset e veçanta të kompanisë dhe kryeshefit ekzekutiv ishin edhe investimet direkte të cilat vinin për herë të parë në Ballkan nga kompania “Gjirafa” e cila me karakteristiken e saj dhe aftësinë e adaptimit, mbijeton me format e saja gjitare dhe në fillim ka rrumbullakuar rreth 2 milionë, e pastaj në 7 milionë, kurse tani kompania po punon për arritjen e saj deri në 15 milionë. Kompania po ashtu momentalisht me motivin e dalluar nga shtetet e tjera ballkanike, po digjitalizon vendin tonë për arsye se kompania Amazon ende nuk synon që të hedh një sy tek Kosova.
Ndërsa qëllimet e Cahanit për të ardhmen është që të fillojë replikimin e proceseve të Kosovës edhe në Maqedoni pasi që tanimë ka filluar edhe në Shqipëri. Po ashtu kompania ka filluar një vijë të re të biznesit e cila quhet ‘Gjirafa.tek’, e cila merret vetëm me teknologji dhe krijon produkte teknologjike për media dhe tregun global.
Për fund, falënderimet nuk munguan nga Cahani për KultPlus duke e vlerësuar lartë për punën dhe seriozitetin si dhe për të gjithë pjesëmarrësit të cilët patën mundësi të bashkëbisedojnë me të rreth temave të ndryshme. Përveç rrëfimit, gjatë mbrëmjes së djeshme të pranishmit u shoqëruan edhe me nga një gotë verë e muzikë të lehtë. / KultPlus.com
Historitë e jashtëzakonshme të suksesit jo çdo herë fillojnë në rrugët e lehta nëpër të cilat përballë ecjes nuk ke pengesa. Ndonjëherë pikërisht rrugët më të vështira, ato të cilat të hedhin sa në një skaj në tjetrin, janë rrugë në të cilat ndërtohet e ardhmja. E pikërisht e tillë është edhe historia e sopranos, Elbenita Kajtazi, dikur vajzës së vogël që shiste qumësht në lagje, kurse sot gruas, zëri i së cilës ka pushtuar teatrot ndërkombëtare.
Sikurse në çdo vit tjetër, edhe këtë herë KultPlus, Ditën e Gruas e shënoi pikërisht me rrëfimin e jetës, fëmijërisë, sfidave, por edhe magjinë e majës së suksesit, të sopranos Elbenita Kajtazi, shkruan KultPlus.
Nën moderimin e gazetares Xhemile Hysenaj, sopranoja Kajtazi me një modesti të jashtëzakonshme dhe një oratori për lakmi, nisi të shpaloste kujtimet e fëmijërisë, tregoi se si kur ishte fëmijë, ruante lopën, dashurinë ndaj së cilës nuk hezitonte ta shprehte. Madje ajo rrëfeu edhe kohën kur për të ndihmuar familjen, rrugët e lagjes ku banonte i kishte shfrytëzuar si vendin ku qumështin e lopës, të cilës i kishte vënë dhe emër, e shiste.
“Pas luftës, nga shtëpia e madhe ku jetonim së bashku me axhallarët, tashmë jetonim ndaras, dhe si në çdo familje tjetër ishte bërë edhe ndarja e gjërave. Ne gëzuam një nga dy lopët e familjes. Unë e kam dashur shumë atë lopë, aq sa s’mund ta përshkruaj me fjalë, Larukë i kam thënë. Me të kam shkuar në arat e fshatit. Qumështin të cilin nëna e merrte nga lopa unë e kam shitur në lagje dhe për këtë jam shumë krenare”, kujton kështu Kajtazi një pjesë nga fëmijëria e saj.
Sopranoja thekson rrugët që bënte së bashku me lopën e familjes, nga shtëpia tek arat, kalonin edhe përmes qytetit ku ajo shpesh herë takohej me nxënësit e tjerë të shkollës, të cilët pa hezituar e përqeshin faktin që ajo kujdesej për lopën. “Mua s’më ka interesuar edhe aq shumë kjo sepse unë e kam dashur lopën time aq shumë sa fjalët e tyre nuk më lëndonin”, vazhdoi rrëfimin e saj me përplot nostalgji e komplekset nuk kishin vend te kjo artiste e madhe.
Meqë ky event po mbahej pikërisht në Ditën Ndërkombëtare të Gruas, Kajtazi kishte vendosur që në rrëfimin e jetës së saj të ndalej tek tri gratë që ja ndryshuan përgjithmonë rrjedhën e jetës.
Nëna ishte udhërrëfyesi i parë në jetën e saj. Duke e drejtuar atë vetëm drejt shkollimit, dhe insistimi i saj që Elbenita t’i ndjek ëndrrat, kishin qenë forca e parë që asaj i dhanë guxim për të provuar çdo sfidë.
Andaj, Kajtazi nuk rresht së përmenduri përkrahjen e madhe që ka marrë qysh si fëmijë nga nëna e saj. Ajo thotë se ndihet krenare për faktin se nëna e ka shtyrë gjithmonë atë dhe gashtë motrat e saj drejt shkollimit, pavarësisht kushteve të vështira në të cilën gjendej familja. Dhe pikërisht nëpërmjet kësaj shtytjeje të vazhdueshme, Elbenita Kajtazi hodhi hapat e parë drejt një karriere të suksesshme në muzikë. Fillimisht ajo përfundoi shkollën e mesme të muzikës në qytetin ku kishte lindur. Për të udhëtuar më pas drejt Prishtinës dhe për të zënë vendin e saj në Fakultetin e Arteve në kryeqytet.
Por, edhe ardhja në kryeqytet nuk ishte e lehtë. Kajtazi tregon se si për të vazhduar studimet dhe për të ja lehtësuar sado pak familjes barrën, ajo kishte filluar punën në një dyqan të rrobave.
“Në muajin e parë kur kam ardhë në Prishtinë, babai më ka ndihmuar duke më dhënë paratë e nevojshme për pagesën e konviktit dhe mensës dhe kjo ishte shuma që unë kisha për tërë muajin. Ka pasur raste kur s’kam shkuar në mense për shkak të ligjëratave të vonshme dhe kështu kam qëndruar dhe pa bukë. Por, pas një muaji kisha gjetur një punë në një butik, ku punova diku rreth një muaj e gjysmë”, deklaroi Kajtazi.
Kajtazi kujton edhe një nga ditët në këtë punë ku edhe kishte takuar një nga profesorët e saj, të cilit disa herë i kishte munguar në orën e mësimit. Teksa flet për të, Elbenita tregon se si ai i kishte kërkuar që ta linte punën ngase ai do të bënte të pamundurën që Elbenitës t’i siguroi një vend në Filharmoninë e Kosovës, ngase ajo posedonte një zë e talent të jashtëzakonshëm.
Pranimi në Filharmoninë e Kosovës dhe përfundimi me sukses i studimeve shënon ëndrrën e çdo prindi për fëmijën e tyre, njëlloj sikurse edhe për prindërit e Elbenitës. Por, ëndrrat e sopranos nuk ndaleshin këtu, ajo synonte të arrinte më tepër, të ndërtonte karrierën e saj jashtë kufijve të vendit.
Elbenita tregon se si në atë kohë gjendej përballë një dëshpërimi ngase kishte marrë një refuzim nga një këngëtar i famshëm shqiptar, dhe madje kishte menduar që të ndryshonte profesionin dhe të bëhej avokate. Por, ishte pikërisht intervista e Ermonela Jahos në njërin nga televizionet shqiptare, që Elbenitës i dha guximin t’i shkruaj asaj dhe t’i kërkoj ndihmë.
“E kam marrë telefonin dhe po i shkruaj në Facebook me një mesazh shumë të gjatë, ja dërgova disa video, duke i shpjeguar se nuk po i kërkoj t’më nxjerrë nga Kosova, por thjeshtë të më tregoj se sa vlejë. Ermonela ma ka kthyer mesazhin brenda dy minutave dhe më ka thënë se ngase i pëlqen zëri im ajo dëshiron të më ndihmoj”, tregon kështu me përplot emocione sopranoja, e ku nuk i munguan as lotët.
Këtë bisedë që ajo e bëri me Ermonelën, e konsideron si një nga bisedat që i ka ndryshuar jetën më së shumti dhe për të mirë. Tutje ajo shpjegon dhe takimin e saj të parë me Ermonelën dhe këngën që ka kënduar për të.
“Ermonela Jaho më ka dhënë një qafore me zemër dhe ka thënë që zemra e saj do jetë gjithmonë me mua”, rrëfen tutje Kajtazi.
Ishte Ermonela ajo që e ndihmoj Elbenitën që të konkurroj në një garë në Itali. Teksa rrëfen peripecitë e këtij rrugëtimi, ajo thotë se kur kujton këtë kohë, e mendon veten mjaft të guximshme sepse duhet guxim të shkosh nga një vend ku nuk ka as sallë të operës, në një garë ku marrin pjesë artistë nga e gjithë bota.
“Kam shkuar tre herë në atë garë, deri sa kam zënë vendin e parë”, thotë Kajtazi duke na dëshmuar për këmbëngulësinë e saj drejt suksesit.
Por, ndryshimi më i madh në jetën e Elbenitës ende nuk kishte ndodhur, ngase ditët e kaluara në Amerikë, kur kishe shkuar të përfaqësonte Kosovën, i dhanë kahje tjetër jetës së saj. Kajtazi tregon se si kishte menduar të mos largohej nga Amerika, të qëndronte atje dhe të bënte një ndryshim në jetën e saj, duke lënë pas familjen, nënë babin, por edhe Ardianin, që tashmë është edhe bashkëshorti i saj.
“Në Amerikë takova regjisoren Vera Kalabria ku në njërën nga ditët teksa qëndronim bashkë në kamp i thashë se kam vendosur që të mos kthehem në atdhe por të qëndroj në Amerikë, në atë kohë kisha një ambicie të madhe por një pjekuri shumë të vogël. Ishte Vera ajo që më këshilloi që të kthehesha në Kosovë, duke premtuar se në momentin që unë do marr shengen vizën ajo do më ndihmonte”.
Duke qenë një vajzë luftarake, Kajtazit nuk ju deshën më shumë se një muaj që të siguronte vizën dhe t’i shkruante Verës, gruas së tretë në jetën e saj që i dha shtysën e fundit ndoshta për nisjen e një karriere të suksesshme. Ajo tregoi me përplot emocione teksa e shpjegonte edhe me duar reagimin befasues që kishte marrë nga Vera Kalabria.
Fillimisht Kajtazi kishte shkuar në Vjenë ngase aty kishte dhe familjarë të saj, ku dhe fitoi bursë studimi që në audicionin e parë, por për shkak të kushteve jo të mira ekonomike ajo duhej ta refuzonte atë.
Një gjë e tillë nuk ndali dot shpirtin luftarak dhe kërkues të Elbenitës, me ndihmën e Verës ajo udhëton për në München, ku do të mbante audicion në teatrin e këtij qyteti.
“Kur shkova në München drejt e në audicion me pantallona dhe atlete, teksa teatri ishte aq i madh dhe po aq i bukur”, rrëfen sopranoja.
Teatri i Münchenit kishte pranuar pa hezitim që Elbenitën ta bënte pjesë të ekipës së vet, mirëpo pikërisht itendanti i atij teatri, që e kishte përkrahur Kajtazin që në momentin kur kishte hyrë brenda e kishte udhëzuar që të mos pranonte një gjë të tillë sepse më pas do të kishte një karrierë të shkurtër operistike duke i siguruar asaj një tjetër audicion në Operën Gjermane të Berlinit. Madje ai i kishte ndihmuar edhe me pagesën e rrugës duke i lënë dhe një letër në të cilën i uronte fat.
Shkuarja në Berlin e takoi prapë Elbenitën me Verën ku këtë herë i kishte ndihmuar sopranos që në audicion të mos shkonte e veshur me pantallona siç kishte bërë deri atëherë. Dhe nga këtu fillon dhe karriera e saj e suksesshme në botën e operës ngase ajo tashmë ishte pranuar në Operën Gjermane të Berlinit.
Kajtazi madje tregon se si në provën e parë kishte shkuar dhjetë minuta me vonesë, e të cilën e konsideron si një nga mësimet më të mëdha të jetës sepse nga ajo ditë ajo kishte mësuar kulturën e të arriturit me kohë në prova.
Kajtazi rrëfen edhe për paraqitjen e saj të parë në skenën e operës, emocionet por dhe frikën që ka përjetuar, ngase për të ishte hera e parë që luante në një skenë aq të madhe e me një publik aq të madh. Ajo e konsideron shumë të rëndësishme faktin që pavarësisht hezitimeve të saja se nuk kishte arritur të luante si duhej në shfaqje, ishte pikërisht regjisorja ajo që e kishte frymëzuar dhe bërë më të fortë e duke e vënë në pah punën e mirë që kishte bërë.
Në mbrëmjen e organizuar nga KultPlus, Elbenita i kishte të pranishëm edhe familjarët, por një gjë të tillë nuk i has shpesh ta përjetojë edhe në skenat ndërkombëtare.
Shkaku i vizave, familjarët e saj rrallë kanë qenë të pranishëm, por që pjesërisht ata kanë arritur të shohin shfaqje të Elbenitës në skenat ndërkombëtare e ky për të mbetet një emocion i veçantë.
Kajtazi, përkundër suksesit, një bashkëpunim të mirë vazhdon ta mbajë me Filharmoninë e Kosovës dhe festivalet klasike në vendin tonë. Sopranoja tregoi se nuk përjashton mundësinë e mbajtjes së një koncerti në Kosovës së shpejti, mirëpo që sipas saj ende nuk ka ndonjë gjë definitive në këtë aspekt ngase akoma janë në bisedime e sipër.
Krejt në fund të këtij rrëfimi inspirues, ishte edhe publiku ai i cili me pyetjet e tyre u interesuan më tepër edhe për faktin nëse Elbenita ka mirësinë dhe vullnetin që tu ndihmonte studentëve, njëjtë si Ermonela që i kishte ndihmuar asaj dhe publiku vetëm sa e kuptoi që Elbenita tashmë e kishte bërë një gjë të tillë e do të vazhdonte ta bënte sa herë që të kishte mundësi.
Të pranishmit, të emocionuar pafund nga ky rrëfim, pas përfundimit të ngjarjes, e takuan nga afër Elbenitën duke e përgëzuar për guximin e ku nuk mungonin as fotografitë e shumta. / KultPlus.com
Qysh nga nominimi i filmit “Zgjoi” në festivalin prestigjioz “Sundance Film Festival”, regjisorja Blerta Basholli dhe gjithë ekipi ishin në ethe për premierën dhe kritikën që do t’i jepej filmit, ndërsa çmimet nuk i mendonin fare. Por premiera e filmit në Sundance bëri një kthesë të natyrshme edhe në pritjen e regjisores dhe gjithë ekipit, shkruan KultPlus.mirziamov.ru
Kritikat e mira dhe pritja që publiku i bëri filmit, e kthyen vëmendjen e tyre edhe tek çmimet, por asnjëherë tek tri çmimet kryesore të cilat njëherit do të thyenin rekordin e këtij festivali.
Kjo ndodhi për herë të parë me “Zgjoi”-n e Blerta Bashollit duke sjellë dje në Kosovë një emocion e gëzim të papritur. Këtij lajmi ju gëzua i gjithë vendi por në veçanti ata që qëndrojnë më afër industrisë së filmit.
“Zgjoi” i Blerta Bashollit dje bëri histori!
“Filmi më i mirë”, “Regjisorja më e mirë”, dhe çmimi i vlefshëm i publikut të festivalit më të madh të filmit të pavarur në SHBA u dedikuan për “Zgjoi”.
Momenti ku Blerta e mori lajmin ishte i ndarë në dy pjesë. Ajo fillimisht u telefonua për të marrë lajmin për çmimin “Regjisorja më e mirë” dhe ky ishte një moment feste në zyrat e Ikonë Studio aty ku Blerta po priste telefonatën. Por lajmin për dy çmimet tjera të cilin e mori tek ditën e nesërme, ajo nuk po e priste fare.
“Kemi qenë në Ikonë Studio sepse lajmin e parë e kemi marrë menjëherë pas premierës se filmit, të dielën ku gjatë gjithë ditën ishim në ethe duke pritur se si po reagon kritika dhe si po e pret publiku. Pasi kritikat ishin shumë të mira dhe kemi marrë një reagim tepër të mirë dhe shumë pyetje nga audienca e filmit, menjëherë pas premierës na kanë telefonuar dhe na kanë dhënë lajmin për çmimin e “Regjisores më të mirë”, atë natë jemi gëzuar e kemi festuar shumë. Ndërsa të nesërmen kemi marrë lajmin për dy çmimet e tjera dhe normal që këto nuk i kemi pritë por që jemi jashtëzakonisht të lumtur”, tregoi kështu Basholli për momentin e marrjes së lajmit të madh.
Lajmin fillimisht ajo e ka ndarë me producentin e filmit Yll Uka, pasi ai ishte i pranishëm gjatë telefonatës që ju bë regjisores.
“Pasi producenti më ka parë duke qajtë e ka kuptuar që po bëhet fjalë për çmim, dhe kështu ai ishte personi i parë me të cilin e kam ndarë lajmin. Ndërsa personi i dytë ka qenë Artan Korenica, bashkëshorti, sepse është njëri nga njerëzit që ka besuar në këtë projekt qysh nga fillimi dhe një prej njerëzve që më ka ndihmu shumë”, u shpreh Basholli.
Por ky lajm duhej me patjetër të ndahej shpejt edhe me zonjën Fahrije Hoti, mbi historinë e secilës është realizuar filmi. Regjisorja e takoi live Fahrijen për të ja komentuar lajmin pasi dëshironte të merrte emocionin drejtpërdrejtë.
“Në momentin kur e kemi marr lajmin zonja Fahrije nuk ka qenë prezente, ndërsa të nesërmen kemi ngrënë mëngjes bashkë dhe i treguar për çmimet, është gëzuar shumë dhe nga emocionet fjalët e parë që i ka thënë kanë qenë: Më paske qit punë me gazetarë””, tregon regjisorja.
“Zgjoi” pritet të ketë një rrugëtim të gjatë nëpër festival, ndërsa për momentin regjisorja ka treguar për KultPlus se janë në pritje të konfirmimit për premierën evropiane, teksa për premierën e filmit në Kosovë si mundësi e sheh fundin e vitit.
Krejt për fund Basholli ka një mesazh për të gjithë kineastët e rinjë.
“Kineastët e rijnë kanë shembuj shumë të mirë, jo në këtë rast vetëm për film timin por edhe shumë filma të tjerë që janë prodhuar në vitet e fundit, kështu që besoj që deri tani veç e kanë marr mesazhin që pavarësisht që jemi Kosovë e nuk ka fonde të mjaftueshme ende për filma në Kosovë, me punë edhe mund, munden me mbërri dhe këtë e kanë dëshmuar secili film që po udhëton nëpër botë e festival të mëdha dhe po kthehen me çmime. Andaj mendoj që është një mesazh i mjaftueshëm që nëse veç e donë këtë punë, me besu dhe me punu vazhdimisht sepse puna secilit i shpërblehet”, përfundon Basholli.
‘Zgjoi’ është i frymëzuar nga historia e vërtetë e Fahrijes (interpretuar nga Yllka Gashi) nga Krusha e Madhe, e cila në kërkim të burrit të saj të humbur gjatë luftës në Kosovë, fillon një biznes bujqësor për t’a siguruar mbijetesën e familjes, në një ambient tradicionalisht patriarkal ku ambicia për t’u zhvilluar nuk shihet me sy të mirë.
Në rolin kryesor luan Yllka Gashi, ndërsa në rolet tjera luajnë Çun Lajçi, Kumrije Hoxha, Aurita Agushi, Kaona Sylejmani, Mal Noah Safçiu, Adriana Matoshi, Astri Kabashi, Molikë Maxhuni, Blerta Ismaili, Valire Haxhijaj Zeneli, Armend Smajli, Ilir Prapashtica, Xhejlane Terbunja, Shkelqim Islami etj.
Me producent Yll Ukën, drejtor fotografie Alex Bloom, montazher Enis Saraçi dhe Félix Sandri, dhe me bashkëproducentë Valon Bajgorën, Agon Ukën, Britta Rindelaub-in, Kristijan Burovski-n, Tomi Salkovski-n, dhe Paskal Semini-n, “Zgjoi“ është bashkëprodhim filmik në mes të Kosovës, Zvicrës, Shqipërisë dhe Maqedonisë së Veriut, mbështetur nga Qendra Kinematografike e Kosovës, Zyra Federale për Kulturë FOC dhe Cinéforom (Zvicërr), Agjencia e Filmit e Maqedonisë së Veriut dhe Qendra Kombëtare për Kinematografi (Shqipëri), prodhuar nga Ikonë Studio dhe Industria Film, me bashkëprodhim nga Alva Film Production, Black Cat Production, AlbaSky, Swiss National TV, ndërsa të drejtat e shitjes globale i ka LevelK. / KultPlus.com
