Lasgush Poradeci lindi me emrin Llazar Gusho, më 27 dhjetor të vitit 1899.
Lasgushi është autori i dy vëllimeve poetike “Vallja e yjeve” dhe “Ylli i zemrës”, të cilat i botoi në Bukuresht të Rumanisë.
Përveçse si poet ai njihet edhe si përkthyes i afirmuar, që solli në shqip lirikat e poetëve të mëdhenj si Gëte, Lermontov, Bllok, Hajne, “Eugjen Onjeginin” e Pushkinit e të tjerë.
Lasgush Poradeci është autor i më shumë se 100 poezive, një pjesë e mirë e të cilave janë poezi dashurie. Ai mbeti gjithmonë adhurues i fjalëve arkaike, shprehje filozofike popullore, e po ashtu ishte ithtar i fjalëve të reja dhe eksperimenteve leksikore.
Lasgush Poradeci u quajt “princi i poezisë shqipe”.
Më poshtë KultPlus ua risjell poezinë e tij ‘Malli’
Malli
Syri i bukur që t’u mvrenjt
Syri yt që më lëndon
Do më lërë a vonë a shpejt,
Do më lërë a shpejt a vonë.
Sapo shpirti m’u delir
Shpirti im i nxirë krejt
Do më lërë me pahir
Syri i bukur qe t’u mvrenjt
E do mbetem përnjemend
Varfanjak si mbret pa fron:
Mbretëresha që më cmend
Do më lërë a shpejt a vonë
Do më lërë a vonë a shpejt,
Do me lërë a shpejt a vonë,
Syri i bukur qe t’u mvrenjt
Syri yt që më lëndon.
Do më lërë…A! por si
Qofë ahere ose tani
Do të qaj aq dashuri
Që do humb me mall te ti?
Mua mendja s’m’a kupton,
Mua syri s’ma veshtron
Po fillon edhe vajton,
E kullon, kullon, kullon:
Mall! o mall! që vjen e shkon!
Vjen e shkon e prapë vjen,
Mall qe len nga perëndon:
Len e vjen e zjen e bren:
Malli mallin më s’e gjen…/KultPlus.com
