Lindita Ottarson, një soprano shqiptare që jeton në Norvegji kishte dëgjuar rastësisht tingujt e Agron Penit, dhe loja e tij në kitarë ka reflektuar si një thirrje që Lindita duhet të bashkëpunoj me artistin kosovar. Dhe tashmë një album i titulluar “Udhë”, është bashkëpunim i këtyre dy artistëve, album që tashmë është incizuar në Prishtinë. Në një intervistë për KultPlus, ajo ka thënë se arsyeja se pse ka vendosur që të bëjë një album me këngë shqipe është një thirrje për kthimin e saj tek rrënjët. Ajo poashtu ka thënë se kur dëgjon këngët popullore shqipe, e ndjen vetën nën këmbët e tyre.
Ardianë Pajaziti
KultPlus: Një bashkëpunim që ka nisë nga një artiste shqiptare që jeton në Norvegji dhe të një artisti që jeton në Kosovë, tashmë ka filluar të merr formë. Bëhet fjalë për albumin “Udhë”, që tashmë edhe i keni regjistruar këngët për këtë album, si erdhët deri te bashkëpunimi, duke pasë parasysh se njëri jeton në Norvegji e tjetri në Kosovë?
Lindita Ottarson: Po, ne kemi incizuar 6 këngë shqiptare, disa popullore e disa të përpunuara. Ideja ishte e imja pasi dëgjova albumet e Agron Penit në spotify. Mu duk një kitarist i mrekullueshëm. U lidha me të përgjatë muajit maj, dhe është ndërtuar programi me arritjen time në Prishtinë, program që u realizua bashkë me Penin.
KultPlus: Tashmë është realizuar incizimi i këngëve?
Lindita Ottarson: Po, dhe jemi në fazën e shtypjes së albumit?
KultPlus: Ndërkohë, ju e thatë se në albumin “Udhë”, përfshihen këngë shqipe, më saktë, për cilat këngë bëhet fjalë?
Lindita Ottarson: Po në këtë album kemi përfshirë këngë të vjetra shqipe, sikurse janë: Asaman trëndafili çelës, (Heaven’s rose of watersprings), O kujt ti qahem (Whom should I complain to) Pranvera filloj me ardhë (Spring is about to come) Kur më vjen burri nga stani, (When my man comes from the hut) Lulio luleza ime (arbëreshe) (Flower my little bud” Fluturës (To the butterfly). Dhe nga këto gjashtë këngë, tre këngët e para janë popullore (qytetare), kurse kënga e katërt e kënduar nga T. T. Koço (e përpunuar), kënga arbëreshe e njohur dhe Fluturës është këngë e kënduar nga Rudolf Stambolla dhe Anita Take.
KultPlus: Pse vendosët që të realizoni vetëm gjashtë këngë?
Lindita Ottarson: Bëmë vetëm gjashtë këngë, për shkak të punës së madhe për ti përgatitur. Pak dhe saktë.
KultPlus: Keni menduar se kur do të bëni promovimin e këtij albumi?
Lindita Ottarson: Njëherë presim të dalin nga shtypi. Unë nuk mund të rrija më gjatë në Prishtinë, kështu që promovimi do bëhet më vonë. Ideja e parë është një koncert në Berat, besoj që një të njëjtë do ta realizojmë edhe në Prishtinë. Kurse sa i përket albumit, do të provoj që albumi të prezantohet në Kosovë e në diasporë.
KultPlus: Megjithatë do të duhej të ishte një pikënisje për nxjerrjen e këtij albumi, si ndodhi?
Lindita Ottarson: Është një kthimi im tek rrënjët. Ka patur një thirrje të fortë brenda vetes përsa i përket vlerave të muzikës shqiptare dhe sidomos asaj popullore. Kur isha e re nuk i duroja dot. Më pëlqente vetëm muzika klasike. Por ka disa vjet që kur dëgjoj këngë popullore nga ato të bukurat, të kënduara nga burime të pastra e ndjej veten nën këmbët e tyre. Dhe diçka tjetër. Mua kënga popullore më bën të dal jashtë zonës së komfortit, më bën të ndjehem lakuriq. Mua më pëlqen ta sfidoj veten në të gjitha mënyrat. Kur dëgjova tingullin e Agronit duke luajtur këngë popullore mendova se nuk jam vetëm. Ka dhe të tjerë që ndjejnë si unë. Ky album është dashni./KultPlus.com
