Etiketë: Logu i Bjeshkëve

Rama: Xhubleta shpaloset në festivalin që promovon traditat malësore, ‘Logu i Bjeshkëve”

Posted on by Kult Plus

Xhubleta vjen e shpalosur në të gjitha dimensionet e saj në festivalin tradicional që promovon traditat malësore, “Logu i Bjeshkëve”.

Lajmin e dha sot kryeministri Edi Rama, i cili ndau foto nga kjo veshje shqiptare katërmijëvjeçare.

“Hijeshia e saj mbrohet nga UNESCO, si përkujdesje ndaj kulturës sonë kombëtare me vlera të pasura e të patjetërsueshme”, theksoi më tej kreu i qeverisë.

Në Malësinë e Madhe organizohet eventi i kthyer tashmë në traditë, “Logu i Bjeshkëve”, që bën bashkë artistët, këngëtarët dhe valltarët me fokus promovimiin e turizmit dhe trashëgimisë kulturore. Ky aktivitet artistik është një shfaqje unike e folklorit dhe xhubletës.

Xhubleta shqiptare katërmijëvjeçare u pranua në 28 nëntor 2022 në listën e Trashëgimisë Kulturore Jomateriale nën mbrojtjen e UNESCO-s. Veshja simbol e trashëgimisë tonë është tashmë pasuri e gjithë njerëzimit.

Xhubleta njihet si veshje tradicionale e grave të Malësisë. Dosja e dijebërjes artizanale të xhubletës u dorëzua në UNESCO, për shkak se veshja tradicionale unike po rrezikonte të humbiste.

Xhubleta është një veshje e punuar me dorë, e veshur nga gratë dhe vajzat në Shqipërinë e Veriut, e karakterizuar nga forma e saj e valëzuar e ziles. Kryesisht e zezë me motive shumëngjyrëshe të qëndisura, procesi i përpunimit përfshin përgatitjen e shajakut, prerjen, qepjen dhe qëndisjen e figurave simbolike. Xhubleta dikur përdorej në jetën e përditshme që nga mosha e pubertetit. Ajo tregonte statusin social dhe ekonomik të mbajtësit. Megjithatë, përdorimi dhe prodhimi i saj ka qenë në rënie gjatë dekadave të fundit për arsye socio-politike dhe ekonomike./atsh/ KultPlus.com

“Logu i Bjeshkëve” më 11 gusht kurorëzon të bukurën e dheut të Malësisë

Posted on by KultPlus

Albert Vataj

Më 11 gusht 2024, ora 10:00, në Qafën e Predelecit, Kelmend, rikthehet “Logu i Bjeshkëve”. Kurorëzimi i së bukurës së dheut në “festën e traditës”, do të mrekullojë Lëpushën, Kelmendin e krejt magjinë e bjeshkës, me hiret e vajzave, me madhështinë e xhubletës me gazmendin e festës. Zgjohet nga përjetësia e vjen i hyjt këtu mes maleve shpirti i kremtes, përmbushja e amanetit të të parëve, vijimësia e traditës.

“Nën tingujt e instrumenteve shekullore, me zërin e mrekullueshëm të artistëve të mirënjohur, me valle tradicionale dhe me paraqitjen dinjitoze të vajzave konkurrente, ju ftoj të bëheni pjesë e këtij manifestimi të madh tradicional-kulturor.” shkruan kryebashkiaku i Malësisë së Madhe në rrjetet sociale, Tonin Marinaj, i cili fton të gjithë në këtë manifestim të madh të traditës, në këtë bashkëpjesmarrje dhe përjetim që vjen me vajzën malësore, për t’i treguar të sotmes dhe brezave, se sa i pasur ishte dhe ka mbetur shpirti ynë këtu mes maleve, se ç’farë bukurie të kristaltë sjell malësorja e stolisur me xhubletën, se pse ne meritojmë të jemi të përqafuar prej kësaj bujarie të mëkimit të traditës.

I rikthyer nga kohë e largët, ky event që zhvillohej çdo vit, që nga vitin 1998, të shtunën e dytë të muajit Gusht në fshatin Lepushë të Kelmendit, në vendin e quajtur Qafa e Predelecit.

Edhe këtë vit, kjo ngjarje bashkon malësorët nga gjithë bota në “Log”; për të kuvenduar, kërcyer, kënduar dhe për të gjetur më të bukurën zanë të e zanave të malësisë.

Për të gjithë ata që vetëm kanë dëgjuar dhe do të duan të bëhen pjesë e këtij kremtimi të festës së traditës, do t’i bëjnë vetes një dhuratë të paçmuar, duke marrë pjesë në “Logun e Bjeshkëve”. Atje ata do të përcjellin, jo vetëm spektaklin e ngjyrave dhe hireve malësore, të madhështisë solemne të xhubletës dhe larminë e etnokulturës, që do të shpalosët këtë ditë festive, por do t’u jepet mundësia të takohen me vajza dhe gra të bukura, njerëz të mrekullueshëm dhe bujarë.

Kësisoj do të përcjellin atë magji unike të malësore, duke e shënjuar këtë përvojë si një privilegj të përjetimit dhe pasurimit të momenteve shpirtërore.

Malsia e Madhe përmes “Logut të Bjeshkëve”, u rrëfen të gjithëve atë që ka qenë dhe do të mbetet në shekuj e shtrenjtë dhe e çmuar, amanetin e ruajtur thellë në gjirin e këtyre maleve dhe në shpirtin e këtyre njerëzve të mrekullueshëm, të thesarit të traditës, të hirit hyjnor të malësores./ KultPlus.com

Logu i Bjeshkëve, promovim i Xhubletës dhe i vlerave të malësorëve

Posted on by Kult Plus

Në Kelmend të Malësisë së Madhe u organizua “Logu i Bjeshkëve”, një event i përvitshëm që promovon vlerat e traditat më të bukura të maleve shqiptare, e ku për çdo vit, një juri e specializuar përzgjedh vajzën më të bukur të Bjeshkëve.

Fitusese e Logut të Bjeshkëve “Miss Bjeshka 2022” u shpall vajza nga Kelmendi, Dila Bunja.

“Logu i Bjeshkëve”, organizohet prej 24 vitesh dhe një nga veçantitë  që promovon më shumë, është xhubleta.

Xhubleta, veshja unikale tradicionale shqiptare si trashëgimi shpirtërore vjen e shpalosur në të gjitha format dhe dimensionet e saj në festivalin tradicional “Logu i Bjeshkëve”.

Ky kostum dhe dijebërja e tij ka udhëtuar shumë në kohë, duke treguar për gjurmët e qytetërimit ilir në kulturën shqiptare, të cilët e dizenjonin në mënyra në dukje të bukura, por që në vetvete krijojnë simbole që na sjellin mesazhe të cilat ende dhe sot një pjesë prej tyre nuk mund ti shpjegojmë dot.

Sipas DRTK Shkodër, xhubleta, do të rrugëtojë në UNESCO si një gjest mbijetese, e përkujdesjeje ndaj kulturës sonë kombëtare me vlera të pasura e të patjetërsueshme shpirtërore. / atsh / KultPlus.com

Fillon ‘Logu i Bjeshkëve’, promovohet turizmi dhe trashëgimia kulturore

Posted on by Kult Plus

Pas një viti ndërprerje për shkak të masave kufizuese antiCOVID, Malësia e Madhe organizoi eventin e kthyer tashmë në traditë, “Logun e Bjeshkëve”.

Ky aktivitet artistik u mbajt në natyrën e mrekullueshme të Qafes së Predelecit, në praninë e mijëra spektatorëve të ardhur nga të gjitha anët e botës, nën tingujt e instrumenteve shekullore dhe me prezencen e vajzave të bukura të Malësisë së Madhe veshur me veshjen e hijshme dhe unike, xhubletën.

Në këtë aktivitet që kulmoi me përzgjedhjen e më të bukurës së bjeshkëve, ishin të pranishëm edhe kryebashkiaku i Malësisë së Madhe, Tonin Marinaj, prefektja Majlinda Angoni, Kryetari i Këshillit të Qarkut Shkodër Hilmi Lakti.

Spektakli, ku marrin pjesë nga të gjitha trevat shqiptare dhe diaspora, promovon turizmin dhe trashëgiminë kulturore të Kelmendit, por edhe krejt Malësisë së Madhe.

Pas aktivitetit artistik, i gërshetuar me performancën e vajzave pjesëmarrëse në “Miss Bjeshka 2021”, juria shpalli edhe më të bukurën e malësisë. Ajo ishte Luljeta Dekaj nga Hoti.

Në vendin e tretë u shpall Martina Gocaj, Kristina Marvukaj dhe Estela Pllumaj ndërsa në vendin e dytë, Sindi Preldakaj dhe Benardeta Marinaj. /atsh/ KultPlus.com