Etiketë: Mixha Rame

Kasetat e vjetra të kaltëra i kujtojnë plot gjenerata në Kosovë.

Para viteve 2000, në një tjetër kohë të teknologjisë, në këto kaseta vendosej materiali për tu dëgjuar. Radiot e shqiptarëve në Kosovë e kanë pasur vendin e posaçëm për kaseta.

Sidomos në këto kaseta dëgjohej me të madhe Mixha Ramë.

Humoristi fantastik Fitim Domi, i njohur në popullatën e gjerë si Mixha Ramë, në këto kaseta shkrinte humorin e tij metaforik dhe thumbimet ndaj realitetit.

Mixha Ramë një kohë të gjatë ka punuar si redaktor përgjegjës i programit humoristik në ish Radio Prishtinë ndërsa kohëve të fundit ishte angazhuar si redaktor në programin kulturo arsimor në Radio Kosovë.

Gjeneratat e ndryshme në Kosovë janë rritur me kasetat e kaltërta dhe me zërin e Domit, sikur ta kishim brenda në dhomë, duke qeshur me ngacmimet e tij dhe deklaratat e mira të satirës e humorit.

Mixha Ramë personazhin e tij e nisi me emrin Mixha Ramadan, më pas Mixha Rrahman dhe përfundoi në Mixha Ramë. I vetmi Mixha Ramë kaq i madh për shqiptarët.

Në video-humoret dhe video-këngët për vitin e ri, ka pasur mjaft mesele të treguara nga Mixha Ramë. Luante edhe në disa video-kaseta humori si humorist me Sabri Fejzullahun, Ali Ahmetin etj. Në vitet e ’80-a ishin regjistruar sidomos skena humori dhe të ruajtura nga Arkivi i Radio Televizionit të Prishtinës. Mixha Ramë rrahte temat politike, sociale dhe historike, ikjes së shqiptarëve për në vendet e huaja nga represioni serb, e më vonë ironizonte me diasporën kur vetëm e prekte sustën, kryhet veprimi (kishe lavdëroheshin që po bënin punë shumë të lehta, ndërsa punonin punë të rënda fizike),  etj. Shumë prej tyre i gjeni edhe sot në internet, ndërsa më së shumti ka në arkivat e produksioneve të atëhershme muzikore, arkivin e RTP-së, por edhe tek ish kolegët e tij aktorë.

Fitim Domi ka lindur më 1939 në Tiranë, ndërsa ka luajtur në disa emisione humoristike në Kosovë, përfshirë edhe atë “Qesh e Ngjesh”.

Ai ka marrë pjesë në qindra programe festive gjithandej botës, ndërsa një kohë ka jetuar edhe në Shtetet e Bashkuara të Amerikës.

Domi është dalluar edhe si këngëtar i muzikës së lehtë qytetare. Nuk është asnjëherë vonë dhe kohë e pakohë të kujtohet një njeri dhe artist si Fitim Domi – Mixha Ramë. / KultPlus.com