Etiketë: mkrs

Ministria e Kulturës akuzon Komunën e Prishtinës për ndërhyrjet në zonat e mbrojtura të trashëgimisë kulturore

Posted on by Kult Plus

Në Ministrinë e Kulturës, sot është mbajtur konferencë për media ku është akuzuar Komuna e Prishtinës për ndërhyrjet në zonat e mbrojtura të trashëgimisë kulturore, përcjell KultPlus.

Në vijim gjeni njoftimin e Ministrisë së Kulturës:

Në Ministrinë e Kulturës, sot është mbajtur konferencë për media lidhur me ndërhyrjet e paligjshme të Komunës së Prishtinës, në zonat e mbrojtura të trashëgimisë kulturore.

Në konferencë u paraqitën sekretari i përgjithshëm i MKRS-së, Bislim Bislimi, kryeinspektori i Inspektoratit për Trashëgimi Kulturore, Imer Hakaj, drejtoresha e Institutit të Kosovës për Mbrojtje të Monumenteve, Rreze Loxha-Vitaku, drejtoresha e Qendrës Rajonale për Trashëgimi Kulturore, Edona Durguti, dhe U.D. i departamentit të Trashëgimisë Kulturore, Bari Zenelaj.

Fjalimi i plotë i sekretarit Bislim Bislimi:

Të nderuar përfaqësues të mediave,

Ju faleminderit për pjesëmarrjen tuaj sot në këtë konferencë për shtyp të ftuar nga Ministria e Kulturës, Rinisë dhe Sportit me qëllim të qartësimit të opinionit publik për zhvillimet e fundit që kanë ndodhur në Komunën e Prishtinës, me ç’rast, në mënyrë të përsëritur kemi shkelje të Ligjit për Trashëgimi Kulturore nga ana e Komunës së Prishtinës derisa vazhdojnë të ndërhyjnë në zona të mbrojtura të trashëgimisë kulturore të cilat i nënshtrohen dispozitave ligjore, pa marrë leje nga institucioni kompetent sikurse e përcakton Ligji edhe përkundër paralajmërimeve tona.

Sot me mua në këtë konferencë është edhe kryeinspektori i Inspektoratit për Trashëgimi Kulturore z. Imer Hakaj, Drejtoresha e Institutit të Kosovës për Mbrojtje të Monumenteve, znj. Rreze Loxha Vitaku si dhe Drejtoresha e Qendrës Rajonale për Trashëgimi Kulturore, znj. Edona Durguti, respektivisht institucionet përgjegjëse të trashëgimisë kulturore që kanë mandat të përcaktuar me ligj për të vepruar në emër të administratës shtetërore, sa herë që cenohet Ligji për Trashëgimi Kulturore.

MKRS disa herë përmes shkresave nga institucionet e trashëgimisë kulturore si Qendra Rajonale për Trashëgimi Kulturore në Prishtinë, Instituti i Kosovës për Mbrojtjen e Monumenteve, i është drejtuar Komunës së Prishtinës me kërkesën për bashkëpunim në rastet e ndërhyrjeve nga Komuna nëpër asete dhe zona mbrojtëse të trashëgimisë kulturore. Nga ana tjetër, MKRS me shkresen e datës 18.12.2024 të Sekretarit të Përgjithshëm të MKRS –së, u është drejtuar kryetarëve të komunave me një letër që kërkon nga ta, të përmbahen nga veprimet administrative që trajtojnë ndërhyrje nëpër asete apo zona mbrojtëse, pa leje të shkruar nga institucioni kompetent i trashëgimisë kulturore. 

Komuna e Prishtinës, kohëve të fundit, siç duket me qëllim është duke e shmangur ligjin dhe atë në disa raste radhazi:

– Zhvillimi i projektit, prokurimi i tij dhe nisja e zbatimit të punëve në projektin e lidhjes së Lagjes Arbëria me Pllatonë e Pallatit të Rinisë;

– Zhvillimi i projektit, prokurimi i tij dhe nisja e zbatimit të punëve në Sheshin George Bush;

– Zhvillimi i projektit, prokurimi i tij në projektin e rrugës “Agim Ramadani”,

– Zhvillimi i projektit, prokurimi i tij dhe nisja e punëve në Rrugën “Rexhep Luci”, që të gjitha këto ndërhyrje pa leje të shkruar derisa dihet se janë sipërfaqe të mbrojtura të trashëgimisë kulturore ku ndërhyrjet janë të kontrolluara dhe mund të lejohen vetëm me leje të shkruar nga institucioni kompetent.

MKRS konsideron se këto veprime derisa janë të përsëritura i vlerëson si të qëllimshme nga ana e Komunës së Prishtinës dhe me precendent të rrezikshëm për palët tjera në Republikën e Kosovës duke inkuarjuar paligjshmëri dhe rrezik të drejtpërdrejtë për vlerat e trashëgimisë kulturore si vlera të mbrojtura me Kushtetutën e vendit dhe me ligjet në fuqi.

MKRS si institucion përgjegjës për rregullimin dhe menaxhimin publik të fushës së trashëgimisë kulturore, ka analizuar me kujdes edhe implikimin ligjor të veprimeve të tilla nga ana e Komunës. Këto veprime, përvec të kundërligjshme në kuptimin e dispozitave të Ligjit për Trashëgimi Kulturore, janë të parashikuara edhe me Kodin Penal si vepra penale përkatësisht me nenin 354 dhe 355 të Kodit Penal të Republikës së Kosovës.

Në këtë drejtim, përveç përpjekjeve të vazhdueshme e të dokumentushme të MKRS për të vendosur bashkëpunim ndërinstitucional në funksion të zbatimit të ligjit kur janë përmbushur kushtet, institucionet tona ka ndërmarrë masa administrative në drejtim të ushtrimit të mandatit ligjor, për të parandaluar veprime të palejuara. Konkretisht Inspektorati i Trashëgimisë Kulturore ka ndaluar punimet e paautorizuara dhe të kundërligjshme sipas mandatit të tij të përcaktuar qartësisht me aktet normative në fuqi.

Nga ana tjetër, deri më tani, MKRS ka referuar dy shkresa të arsyetuara në organet e ndjekjes penale në Republikën e Kosovës për veprime të kundërligjshme nga Komuna e Prishtinës.

Në lidhje me projektin e lidhjes së Lagjes Arbëria me Pllatonë e Pallatit të Rinisë, më datë 27.12.2024, MKRS ka kallëzuar penalisht kryetarin e Komunës së Prishtinës z. Përparim Rama në Prokurorinë Speciale të RKS. Kjo për faktin se përvec zhvillimit të projektit dhe kontraktimit të tij për ekzekutim në zonë mbrojtëse të asetit, e inkriminuar penalisht në kuptim të nenit 355 të Kodit Penal, i njëjti ka vepruar në drejtim të vënies nën detyrim kontraktual të një shume prej 6.5 milionë eurosh në një projekt të pa maturuar ligjërisht me cka direkt e rrezikon buxhetin publik gjithashtu edhe ka vepruar në drejtim të kryerjes së punëve në një pronë që tashmë Komuna i kishte ndarë MKRS –së për shfrytëzim afatgjatë, për realizimin e TOB.

E njëjta situatë tashmë ka ndodhur edhe në rastin e projektit të Sheshit George Bush, Rrugës “Agim Ramadani” dhe Rrugës “Rexhep Luci”.

Duke e vlerësuar përsëritjen e vazhdueshme të veprimeve të tilla nga Komuna e Prishtinës, MKRS më datë 02.04.2025, ka bërë kërkesën e radhës për fillimin e hetimeve në Departamentin e Hetimeve në Policinë e Kosovës. Sikurse u tha më lartë, këto veprime në kuptimin e mbrojtjes ligjore të trashëgimisë kulturore, janë të inkriminueshme si vepra të vecanta penale sipas Kodit Penal. Megjithatë, MKRS vlerëson se derisa kemi një shumë financiare dhjetëra milionëshe të krijuara si detyrim kontraktual në projekte që janë në shkelje të ligjeve në fuqi nga Komuna, konsideron se kjo poashtu paraqet rrezik për shkaktimin e qëllimshëm të situatave kur këto shuma, do të konsideroheshin të përmbarueshme nga operatorët ekonomik duke i shkaktuar një dëm dhjetëra milionësh buxhetit të Komunës. I takon organeve të drejtësisë të ndriçojnë këto rrethana të lidhjes së këtyre kontratave nëse janë apo jo të qëllimshme derisa janë kaq shpesh të përsëritura dhe kaq të qarta.

Sqarojmë poashtu se Komuna e Prishtinës, i ka mjaft mirë të njohura procedurat e pajisjes me leje dhe pëlqime nga institucioni kompetent i trashëgimisë kulturore sepse në të kaluarën kanë bashkëpunuar dhe janë pajisur me leje dhe pëlqime për projekte të ndryshme si: Rruga model, ndërtesa e ish Gërmisë, rruga për fëmijë afër Shkollës “Elena Gjika”, projekti për restaurimin e ndërtesës së Shkollës “Sami Frashëri” etj.

MKRS është e përkushtuar që në cdo rast, të sigurojë zbatimin e obligimeve të saj ligjore për të vepruar ndaj kujtëdo që cenon Ligjin e rrezikon vlerat e trashëgimisë kulturore, ndërsa veprimet e kryetarit të Komunës për të ushtruar një kallëzim penal të rremë ndaj inspektorit të trashëgimisë kulturore, i vlerëson si përpjekje për manipulim të opinionit dhe keqpërdorim të mjeteve e mekanizmave juridik në dispozicion sic duket të vetëdijshëm se vet ndodhen në shkelje të rëndë të të gjitha ligjeve që rregullojnë ndërhyrjet dhe zhvillimet në zona mbrojtëse të trashëgimisë kulturore.

Ne, na vjen keq që kryeqyteti ynë udhëhiqet nga shembuj kaq brutal të shkeljes së ligjit, rrezikimit të vlerave të trashëgimisë kulturore dhe të fondeve publike.

Ne presim nga organet e ndjekjes penale që të veprojnë sa më shpejt që është e mundur në drejtim të marrjes në përgjegjësi të atyre që kanë prodhuar situatat e tilla në mënyrë që shembuj kaq të qartë të shkeljeve të interesit publik, të dekurajohen./KultPlus.com

MKRS ndan Çmimet Vjetore për Teatër, Qendra Multimedia nderohet me çmimin për prezantim të suksesshëm ndërkombëtar

Posted on by Kult Plus

Në Ditën Botërore të Teatrit, në Amfiteatrin e Teatrit Kombëtar të Kosovës në Pallatin e Rinisë, u mbajt ceremonia e ndarjes së Çmimeve Vjetore për Teatër 2024.

Ministri i Kulturës, Hajrulla Çeku, bazuar në vlerësimin e jurisë profesionale, i dhuroi Qendrës Multimedia çmimin për prezantim të suksesshëm ndërkombëtar.

Ministri Çeku në fjalën e tij ka uruar laureatët e çmimeve, duke theksuar se MKRS-ja dhe Qeveria u është falënderues të gjithë atyre që përbëjnë kominitetin teatror, nga ata të cilët na bie t’i shohim më shpesh, aktorët/et në skenë, skenaristët, regjisorët, dramaturgët dhe ekipet e tjetra profesionale e deri te pjesa që i shohim më pak, por që janë shumë të rëndësishëm, ata që qëndrojnë prapa skenave të cilët e bëjnë të mundur magjinë e teatrit. /KultPlus.com

MKRS ndan Çmimet Vjetore për Teatër, kostumografja Samka Ferri nderohet me çmimin kombëtar për vepër jetësore

Posted on by Kult Plus

Në Ditën Botërore të Teatrit, në Amfiteatrin e Teatrit Kombëtar të Kosovës në Pallatin e Rinisë, u mbajt ceremonia e ndarjes së Çmimeve Vjetore për Teatër 2024.

Ministri i Kulturës, Hajrulla Çeku, bazuar në vlerësimin e jurisë profesionale, i dhuroi çmimin kombëtar për vepër jetësore kostumografes Samka Ferri.

Pjesë e jurisë profesionale në këtë edicion ishin: Alban Beqiraj, Aurita Agushi, Agon Myftari, Blerta Syla Surroi dhe Xhevdet Doda.

Ministri Çeku në fjalën e tij ka uruar laureatët e çmimeve, duke theksuar se MKRS-ja dhe Qeveria u është falënderues të gjithë atyre që përbëjnë kominitetin teatror, nga ata të cilët na bie t’i shohim më shpesh, aktorët/et në skenë, skenaristët, regjisorët, dramaturgët dhe ekipet e tjetra profesionale e deri te pjesa që i shohim më pak, por që janë shumë të rëndësishëm, ata që qëndrojnë prapa skenave të cilët e bëjnë të mundur magjinë e teatrit./KultPlus.com

Hoxha: Ndoshta Uliksit tim, si mënyrë mbijetese shkrimtari, do t’i kërkoj taksë për emrin që bartë

Posted on by Kult Plus

-Për Çmimin Anton Pashku për Prozë nga MKRS e Kosovës

Shkruan: Ballsor Hoxha

Më duhet ta pranoj, duke qenë shkrimtar, jam një gjë, krijesë, krejt e çuditshme, e pashpjegueshme për dy fëmijët e mi, Hanën dhe Uliksin. Shkrimtarët, ndoshta, prej natyrës janë të çuditshëm, por shtoja kësaj edhe të lexuarit dhe të shkruarit me ditë të tëra, për dy fëmijët e mi ngjaj si një, le të themi, radio, pa asnjë sinjal, e prishur, e braktisur prej kohësh. “Pse shkruan, bab” më pyet shpesh Uliksi në tërë habinë e tij prej 10 vjeçari, kur më sheh të tërin të pasionuar pasi që kam gjetur ndonjë zgjidhje për ndonjë situatë; ndërsa vajza Hana, tash në moshën që e ka, 16 vjet, më shikon me dhembshuri, sikur një të dehur në aromën e shtypit dhe “hieroglifeve” të letërsisë.

Kur edhe nuk di çka të bëj me veten, në këtë harrim ku kam mbetur, si shkrimtar, kur nuk di t’i përgjigjem Uliksit, meditoj dhe gjej viktima të tjera, të letërsisë, gjej botues si shtëpitë botuese Onufri, që me pasionin e tyre për letërsi po ashtu nuk kanë shpëtim nga po e njëjta, dhe i mendoj, i mendoj pikërisht si e mendonte Maurice Blachot pasionin për letërsi – një kumar, një varësi prej të cilës nuk ke shpëtim.

Pastaj, në mendje më vjen edhe kjo Ministri e Kulturës së Kosovës, që ka financuar për botim hiç më pak se dy libra të mi, vitin e kaluar. Pastaj, zinxhiri i meditimit arrin në një dinamikë dhe më vijnë në mendje edhe ata fare pak lexues që sikur të varur nga aroma e librave nuk dinë ku ta kalojnë kohën dhe as si, përpos duke lexuar e lexuar libra.

Por, ka një pikëllim në fund të këtij zinxhiri të meditimit, që përfundon kaq shpejt, një pikëllim si kur përfundon së lexuari librin më të bukur në botë, prej ku edhe lind e shfaqet një dyshim që ndoshta ka lidhje me të gjitha fundet e kësaj bote; një shije e hidhur e vegjëlisë, një melankoli e të qenit; por edhe një melankoli e komunitetit letrar, sot, sidomos ndaj të gjitha mënyrave të tjera të mundshme sot, për të vrarë kohën, e për të ndër-shkëmbyer njerëzimin. Apo qoftë për të mbajtur gjallë shpirtërisht po ashtu njerëzimin e shoqërinë ku takon shkrimtari, si që ndodhi me Kadarenë dhe letërsinë e tij.

Por, në tërë këtë melankoli, në këtë pikëllim, kujtoj se ka ndodhur disa herë në histori të njerëzimit, ky dyshim në letërsinë, disa herë është parë kjo kockë e zhveshur e letërsisë si në njëlloj pleqërie të dhunshme e para shpirtit të saj, si njëlloj vdekje e saj: e kemi tejet të qartë pikërisht këtë, që në dukje ngjante në fund të letërsisë, gjatë Shqipërisë Komuniste. Në këto kohëra ishte zhdukur letërsia, ishte zhvendosur jeta e rëndë, që e bënte edhe më të rëndë ajo letërsi e soc-realizimit, me një diell të portretizuar keq; ishte përmbysur rendi njerëzor, ndërmjet vete e ndërmjet pushtetit dhe njeriut; ishte shndërruar qoftë edhe arkivi, ndërdija, dhe vetëdija kolektive e letërsisë. Ndoshta për disa po e teproj, por, le të themi se e kam nga pasioni për letërsinë e tij, Ismail Kadare, ndër të vetmit, në këto kohëra, po aq kumarxhi me tërë atë që kishte, shpirtin dhe jetën e tij, në letërsi, krijoi një zanafillë të letërsisë, edhe nën një tirani si kjo.

Pastaj, nuk bën dhe as që do të mund ta harrojmë ndonjë herë në Kosovë, tërë ndalimin e shkronjës deri tek universiteti e akademia shqipe, etj, por që u ringjallën më shpejtë se disa zee tjet të njohura në njerëzim.

Pas këtyre meditimeve, ndaj një fenomeni njerëzor siç është letërsia, sidomos, po ky meditim bartet në një qark tjetër, pyetem: a ishte shkrimtari, vetë njeriu, që e krijoi letërsinë, apo letërsia ishte para tij. Është paradoks, dhe e kuptoj se është pyetje e njëlloj infantileje shkrimtari dhe letërsie, por edhe si përgjigje ndaj Uliksëve tanë, e Hanave tona.

1. në rastin e parë, nëse kishim në vetëdijen e njerëzimit, ndër shumë shprehje letrare, një gjë që njihej si Kimera, vetë ndërthurja, krijimi i ri, shndërrimi, e që është vetë letërsia thënë shkurt;

dhe nëse kishim një Platon që mbeti kulmi i dijes njerëzore deri para disa kohësh, që e ndalonte pikërisht poezinë, letërsinë, e që ishte pushteti më klasik, pra pa ushtri e armë;

dhe duke pasur këto të dyja në vetëdijen njerëzore gjithherë, në një mënyrë nuk kishte nevojë për shkrimtar, sepse e tëra që duhej ishte vetëm përshkrim, aq më shumë të raportit të këtyre dyjave. Kështu i bie se kishte letërsi, para shkrimtarit.

2. Apo, shkrimtari ishte mallkimi i njeriut për të bartur atë situatën që e rikrijon Ismail Kadare në esenë e tij Eskili ky humbës i madh, ku jemi ne, njeriu që në kohërat më të hershme “me një gropë në mes” e që është varri sot, sepse atëherë ende nuk kishte lindur bartja e dhembjes së njeriut, nga njëri te tjetri, e kështu nuk kishte as gjuhë të mjaftueshme për të mveshur të dashurin e mbetur në këtë gropë në tokë. Në këtë ese Kadare i kundërvihet edhe Niçes për intepretimin e tij të Lindjes së Tragjedisë, duke thënë se arti, si krijim, diçka e krijuar nga ku edhe e merr emrin, lindë në afërsinë me varrin, pashpjegueshmërinë e jetës, dhe fundin e jetës së dashurisë, të më të dashurve. Dhe tutje të bartjes së dhembjes së këtij fundi, sikur një Orfe, deri në thellësitë e vdekjes, me dëshirën më të zjarrtë të njeriut për të ngjallur dashurinë. Shkrimtari, si Orfeu, duke iu kundërvënë edhe vdekjes.

Këtu, është e dukshme, në mua, shkrimtari është një kundërvënie. Kujt, vdekjes, pushtetit, etj.

Dhe tani këtu, kur e mendoj prozën time letrare, shpërblyer me këtë çmim nga Ministria e Kulturës së Kosovës, që janë një vëzhgim, dhe studim dhe përvojë e kapjes së qytetit në dhembjet e rritjes, thellimin e fytyrës së njeriut në një krater të pafundmë; pastaj shkurorëzimin, vrasjen, shkrimtarin besa, pastaj vetminë dhe në fund edhe tradhtarin, e shoh veten duke gjurmuar nëpër qytet, e qytete, sikur të isha përgjithmonë si Uliksi im, 10 vjeç, Hana vajza ime; duke u mahnitur me jetën, me botën, me përvojën, me konstelacionet e çdo gjëje, i habitur, i magjepsur, i fantaksur, e besa, edhe i çmendur, në një masë, pafundësisht, dhe për secilën herë. 

Përnjëherë më kapë një trishtim, një melankoli e tmerr e ankth, çka nëse njeriu një nga këto ditë do ta harrojë këtë mundësi udhëtimi, këtë mundësi të hapjes së botës, këtë dashuri e urrejtje me botën, këtë magji? Apo, ndoshta Uliksit tim, si mënyrë mbijetese shkrimtari, dhe si revoltë, do t’i kërkoj taksë për emrin që bartë, të udhëtarit të parë në po këtë magji të kësaj bote./ KultPlus.com

MKRS: Paraqitje e mrekullueshme e Orkestrës së Filharmonisë së Kosovës në Bern

Posted on by Kult Plus

Mbrëmë, Orkestra e Filharmonisë së Kosovës ka mbajtur koncert në Bern të Zvicrës nën drejtimin e dirigjentit Antoine Marguier, përcjell KultPlus.

Ministria e Kulturës, Rinisë dhe Sportit, nëpërmjet një postimi në Facebook e ka konsideruar këtë koncert si një paraqitje e mrekullueshme e Orkestrës së Filharmonisë së Kosovës.

Në vijim, KultPlus ua sjell postimin e plotë të MKRS-së:

Paraqitje e mrekullueshme e Orkestrës së Filharmonisë së Kosovës në Bern. 🇽🇰🇨🇭

Nën drejtimin e Antoine Marguier, koncerti, i cili u mbajt në kuadër të festimeve të 17-vjetorit të Pavarësisë së Kosovës, nisi me intonimin e himneve të Kosovës, Zvicrës dhe Lihtenshtajnit, për të vijuar më pas me “Bareshën” e Rexho Mulliqit.

Orkestra solli traditën muzikore kosovare përpara publikut në kryeqytetin zviceran me Koncertin për saksofon, harqe dhe perkusione të Valton Beqirit, me solist saksofonistin Vitaly Vatulya. Sopranoja Besa Llugiqi mbizotëroi skenën me interpretimin e saj, duke filluar me arien “Un bel dì vedremo” nga opera Madama Butterfly dhe “È strano… Sempre libera” nga La Traviata e G. Verdit, ku iu bashkua tenori Oscar Esmerode. Në bis, Llugiqi interpretoi “Agimet shqiptare” të Avni Mulës.

Në pjesën e parë të koncertit, orkestra interpretoi gjithashtu uverturën e operës Nabucco të G. Verdit.

Ndërsa në pjesën e dytë, Orkestra u rikthye në skenë me interpretimin e Simfonisë nr. 2 të kompozitorit Kreshnik Aliçkajt dhe e mbylli mbrëmjen me suitën nr. 2 nga “The Three-Cornered Hat” e kompozitorit Manuel de Fallas.

Të pranishëm në koncert, përveç personaliteteve nga jeta kulturore zvicerane, diplomatëve, numrit të madh të diasporës shqiptare, qe edhe Ministrja e Punëve të Jashtme dhe Diasporës e Republikës së Kosovës, znj. Donika Gërvalla-Schwarz.

Filharmonia e Kosovës do të rikthehet me koncerte në Kosovë gjatë muajit mars, fillimisht me koncertin e Korit të Filharmonisë dhe ansamblit harkor nën drejtimin e Hajrullah Sylës në Rahovec (26.03.2025), si dhe me koncertin e Orkestrës së Filharmonisë së Kosovës nën drejtimin e dirigjentit italian Marco Crispo, me solistë Liza Kerob dhe Altin Tafilaj, në mbyllje të Javës së Frankofonisë në Prishtinë. (28.03.2025).

📸Arben Llapashtica./KultPlus.com

MKRS obligon federatat që 30 përqind të buxhetit ta dedikojnë për vajza dhe gra

Posted on by Kult Plus

Pas përmbylljes së procesit të kategorizimit, janë nënshkruar memorandume ndërmjet Ministrisë për Kulturë, Rini dhe Sport si dhe federatave sportive, për zhvillimin e aktiviteteve të tyre vjetore përgjatë vitit 2025.

Sot janë nënshkruar memorandume për mbështetje financiare vjetore për vitin 2025, me Komitetin Olimpik të Kosovës, Komitetin Paralimpik, Olimpiadën Speciale të Kosovës, Federatën e Xhudos, Mundjes, Boksit, Aeronautikes, Gjimnastikës, Muay thai, Federatën e Autosporteve, Kickbox, Bodybuilding, Federatën e Padelit, Pikados, Futbollit, Volejbollit, Sportit Shkollor, Shahut, Sportit Universitar, Boullingut, Esports, Golfit, Motociklizmit, Biliardos, Ragbit, Atletikës, Shenjtarisë, Federatën e Sporteve për të Verbër, Federatën e Skitarisë, Badmingtonit, Kajakimit, Çiklizmit, Taekwondos, të Peshëngritjes dhe Federatën e Tenisit.

Zëvendësministrja Daulina Osmani me këtë rast i ka njoftuar federatat prezente që sivjet është paraparë që çdo federatë ta ketë për obligim që së paku 30% të shumës totale të përfitimit t’ia dedikojnë aktiviteteve sportive për vajza dhe gra, me qëllim të zhvillimit dhe fuqizimit të mëtejmë të sportit femëror në vend.

Shuma totale për mbështetje të të gjitha federatave sportive këtë vit është afër 8 milionë euro.

Kosova e Bullgaria nënshkruajnë marrëveshje për bashkëprodhim në kinematografi

Posted on by Kult Plus

Ministria e Kulturës, Rinisë dhe Sportit ka bërë të ditur se Nayden Todorov, Ministër i Kulturës së Bullgarisë, nesër do të qëndrojë në një vizitë zyrtare në Kosovë.

Në komunikatën për media thuhet se në kuadër të kësaj vizite, Ministri Hajrulla Çeku do të takojë homologun e tij.

Tutje, bëhet e ditur se do të nënshkruhet edhe marrëveshja e bashkëprodhimit në kinematografi Kosovë-Bullgari./KultPlus.com

MKRS: Masterplani 450 hektarësh për kompleksin ‘Adem Jashari’ një hap i madh drejt nderimit të heroizmit të familjes Jashari

Posted on by Kult Plus

Ministria e Kulturës pas prezantimit të projektit fitues për Kompleksin Memorial “Adem Jashari” ka thënë se ky projekt përbën një hap të madh drejt ruajtjes dhe nderimit të heroizmit të familjes Jashari.

MKRS përmes një komunikate për media ka thënë se masterplani 450 hektarësh në kompleksin “Adem Jashari” do të zhvillohet nga një ekip ekspertësh ndërkombëtarë me përkushtim e profesionalizëm.

“Në bashkëpunim me ekspertë vendorë e ndërkombëtarë, procesi i deritanishëm ka siguruar kujdes dhe vëmendje të veçantë për trajtimin dhe ruajtjen si të zonës si aset i trashëgimisë kulturore të Republikës së Kosovës, ashtu edhe të historisë së rezistencës së familjes Jashari me ndjeshmëri dhe profesionalizëm. Pas një periudhe intensive të punës së pandalur, u përzgjodh fituesi i konkursit ndërkombëtar për masterplanin e Kompleksit Memorial “Adem Jashari”, i cili trajton një sipërfaqe prej rreth 450 hektarësh në fshatin Prekaz të Skenderajt, si dhe zonat e veçanta të kullave dhe shtëpive të familjes, fabrikën e municionit e kullën e vrojtimit mes tjerash.

Më poshtë gjeni shkrimin e plotë të Ministrisë së Kulturës, Rinisë dhe Sportit:


Projekti fitues për Kompleksin Memorial “Adem Jashari” u prezantua mbrëmë duke kurorëzuar përkushtimin e plotë ndaj kujtimit dhe sakrificës së familjes Jashari

Gjatë ceremonisë, kryeministri Albin Kurti mori fjalën duke theksuar mbështetjen e pakursyer ndaj këtij projekti dhe ndaj kujtesës historike të kombit tonë. Si përfaqësues i familjes, z. Bekim Jashari gjithashtu mori fjalën, duke shprehur rëndësinë e kompleksit si dëshmi e përpjekjeve të vazhdueshme për të nderuar veprën dhe sakrificën e familjes së tyre.

Në bashkëpunim me ekspertë vendorë e ndërkombëtarë, procesi i deritanishëm ka siguruar kujdes dhe vëmendje të veçantë për trajtimin dhe ruajtjen si të zonës si aset i trashëgimisë kulturore të Republikës së Kosovës, ashtu edhe të historisë së rezistencës së familjes Jashari me ndjeshmëri dhe profesionalizëm. Pas një periudhe intensive të punës së pandalur, u përzgjodh fituesi i konkursit ndërkombëtar për masterplanin e Kompleksit Memorial “Adem Jashari”, i cili trajton një sipërfaqe prej rreth 450 hektarësh në fshatin Prekaz të Skenderajt, si dhe zonat e veçanta të kullave dhe shtëpive të familjes, fabrikën e municionit e kullën e vrojtimit mes tjerash.

Duke i kushtuar rëndësi të veçantë përjetimit të kompleksit memorial si të plotë, projekti që u prezantua nga fituesi i konkursit, trajton tërësinë si përvojë e kuruar e kalimit nëpër tregimin e familjes Jashari dhe luftës së Kosovës për liri. Gjatë këtij rrugëtimi, sipas projektit, kalohet nëpër pika kyçe si zona memoriale me emrat e heronjve të luftës, te shtëpitë e rezistencës të ndriçuara, kompleksi i fabrikës së municionit si muze i rezistencës, e pika të vrojtimit ku vizitorët përjetojnë peisazhin dhe kujtesën si komponente të pandara nga njëra-tjetra.

Ky projekt është hap i madh drejt ruajtjes dhe nderimit të heroizmit të familjes Jashari, simbol i lirisë dhe qëndresës sonë. Me përkushtim dhe profesionalizëm, masterplani për kompleksin do të zhvillohet më tej nga një ekip ekspertësh ndërkombëtarë me përvojë./ KultPlus.com

MKRS del me sqarim për objektin e Xhafer Devës: Punimet po zhvillohen në përputhje me projektin e miratuar

Posted on by Kult Plus

Ministria e Kulturës, Rinisë dhe Sportit pas disa diskutimeve publike lidhur me punimet restauruese të cilat po realizohen në “Ish-Ambullantën e vjetër – Shtëpinë e Xhafer Devës”, ka dalur me një sqarim publik për punimet në këtë aset të trashëgimisë kulturore, i cili bën pjesë në listën e monumenteve në mbrojtje të përhershme.

Një fotografi e cila paraqet anën e pasme të objektit, ende pa përfunduar procesi i restaurimit, duke e krahasuar me gjendjen paraprake të këtij munumenti, këto ditë ka bërë bujë. Ky krahasim i pamjes aktuale të fasadës me pamjen e dikurshme të objektit me tulla është cilësuar si tjetërsim nga pamja origjinale e këtij monumenti të arkitekturës, të ndërtuar gjatë viteve 1930.

“Jemi siguruar që punimet të zhvillohen në përputhje me projektin e miratuar, duke siguruar kështu edhe cilësi, e në veçanti trajtimi i elementeve dekorative të fasadave, është punuar në mënyrë tradicionale, duke ruajtur origjinalitetin e tyre”, thuhet në njoftimin e MKRS.

MKRS gjithashtu ka bërë të ditur se përzgjedhja e ngjyrës së fasadës, është bërë në bashkëpunim me hartuesit e projektit nga OJQ CHwB dhe përgjëgjësit e QRTK Mitrovicë në cilësinë e organit mbikëqyrës, duke u bazuar në fotografitë e vjetra dhe analogjinë me ngjyrën e cila është përdorur në ndërtesat me po atë stil të ndërtimit gjatë përiudhës së njëjtë të viteve 1930.

Më poshtë gjeni shkrimin e plotë të MKRS në facebook:

“Ish-Ambullanta e vjetër – Shtëpia e Xhafer Devës” është aset i trashëgimisë kulturore në mbrojtje të përhershme, si monument i arkitekturës së ndërtuar gjatë viteve 1930. Nga zjarrvënia e parë në vitin 2015, e dyta në vitin 2018, ky monument është lënë në gjendje shumë të keqe fizike, në mëshirë të kohës.

Ministria e Kulturës ka përfshirë këtë monument në programin e investimeve restauruese, me qëllim të mënjanimit të rrezikut të mëtejmë për shkatërrim, restaurimin e ndërtesës dhe rifunksionalizimin e saj në shërbim publik për komunitetin.

Projekti i restaurimit të ndërtesës është hartuar nga ekipi i profesionistëve të organizatës jo-qeveritare, Trashëgimia Kulturore pa Kufij, dhe është pajisur me leje nga Instituti i Kosovës për Mbrojtje të Monumenteve (Nr. 41/2021, data 07.10.2021)

Projekti i restaurimit është hartuar në përputhje me standardet dhe parimet ndërkombëtare të trashëgimisë kulturore, ku krahas rehabilitimit të strukturës së ndërtesës, është marrë parasysh trajtimi i vlerave estetike, me qëllim të rikthimit të pamjes fillestare të saj. Hartimi i projektit gjithashtu ka marrë parasysh transformimet e shumta që janë bërë në ndërtesë gjatë kohës, sikurse hapja dhe mbyllja e dritareve, të cilat nuk kanë ekzistuar në gjendjen fillestare të ndërtesës.

Bazuar në shtresat e ngjyrave në përdhesë, në fotografitë e vjetra të ndërtesës, dhe në analogjinë me ndërtesa të stilit të ngjashëm të ndërtuar gjatë periudhës së njëjtë në Kosovë, kjo ndërtesë është ndërtuar me tulla të argjilës së pjekur, të mbuluar me suva, si material që mbron strukturën e murit të ndërtuar me tulla.

Gjendja e ndërtesës para fillimit të restaurimit, ka qenë si rezultat i zjarreve të shkaktuara, dhe i ndërhyrjeve restauruese të filluara në vitin 2018, e të papërfunduara, ku janë shfaqur muret e zhveshur nga suvaja, të ekspozuar ndaj ndikimeve atmosferike.

Ministria e Kulturës ka ndarë buxhet në vlerë rreth 500,000 euro për restaurim të plotë të monumentit. Ndërhyrjet restauruese po zhvillohen nga kompania e licencuar për fushën e trashëgimisë kulturore, në përputhje me rregullativën ligjore, duke siguruar kështu që punimet të zhvillohen nga mjeshtër e profesionistë të licencuar, nën mbikëqyrjen e stafit profesional të institucioneve tona.

Përzgjedhja e ngjyrës së fasadës, është bërë në bashkëpunim me hartuesit e projektit nga OJQ CHwB dhe përgjëgjësit e QRTK Mitrovicë në cilësinë e organit mbikëqyrës, duke u bazuar në fotografitë e vjetra dhe analogjinë me ngjyrën e cila është përdorur në ndërtesat me po atë stil të ndërtimit gjatë përiudhës së njëjtë të viteve 1930.

Jemi siguruar që punimet të zhvillohen në përputhje me projektin e miratuar, duke siguruar kështu edhe cilësi, e në veçanti trajtimi i elementeve dekorative të fasadave, është punuar në mënyrë tradicionale, duke ruajtur origjinalitetin e tyre./ KultPlus.com

Çmimet Vjetore për muzikë, çmimi për veprimtari jetësore i ndahet Lorenc Antonit

Posted on by Kult Plus

Në Ditën Botërore të Muzikës, është bërë ndarja e çmimit për veprimtari jetësore “Niketë Dardani” dhe çmimet e tjera vjetore në fushën e muzikës për vitin 2023.

Në ambientet Shoqatës së Kompozitorëve, këto çmime i ndau ushtruesi i detyrës së drejtorit të Filharmonisë së Kosovës, Dardan Selimaj.

Bazuar në propozimin e Jurisë profesionale në përbërje nga kompozitorët Baki Jashari – kryesues dhe anëtarët Valton Beqiri dhe Drinor Zymberi, Çmimi Kombëtar për Veprimtari Jetësore “Niketë Dardani” iu nda kompozitorit Lorenc Antoni (post mortem), të cilin e pranoi Violeta Lekaj-Mehmeti, mbesa e tij.

Çmimi për vepër orkestrale – simfonike dhe koncertante iu nda kompozitorit Kreshnik Aliçkaj për veprën “Koncert për Violinë dhe Orkestër”.

Çmimi për vepër kamertale iu nda kompozitorit Lum Halabaku për veprën “Rush Hour 2”, të cilin çmim e pranoi babai i tij, Menderes Halabaku, ndërsa për orkestër harkore çmimi iu nda edhe kompozitorit Ersan Januzi për veprën ‘Shifting Horizonts” për septet.

Çmimi për vepër korale iu nda kompozitorit Mendi Mengjiqi për veprën “Mercury” për kor mikst dhe kompozitores Dea Ahma për veprën “Mors” për soprano solo, tri kore antifonare dhe narrator.

Çmimi për vepër solistike dhe duo iu nda kompozitorit Ardian Halimi për veprën “Momente” për violinë dhe piano, të cilin çmim e pranoi vëllai i tij, Astrit Halimi./MKRS/KultPlus.com

Shtëpitë Botuese mbështeten nga MKRS me 272 mijë e 900 euro

Posted on by KultPlus

Ministria e Kulturës, Rinisë dhe Sporteve ka publikuar listën e Shëtpive Botuese të cilat do të mbështeten për botimin e librave, shkruan KultPlus.

272.900 euro është shuma totale që është ndarë nëpër Shëtpitë Botuese, tituj që janë vlerësuar nga Këshilli I Librit.

KultPlus jus jell të plotë listën që tashmë kanë marrë këtë mbështetje./ KultPlus.com

https://www.mkrs-ks.org/repository/docs/Lista_per_publikim_botime_2024.pdf

Hapet konkursi për çmimet vjetore në fushën e kinematografisë

Posted on by Kult Plus

Është hapur konkursi për çmimet vjetore në fushën e kinematografisë, përcjell KultPlus.

Njoftimi është dhënë nëpërmjet një postimi në faqen zyrtare të Ministrisë së Kulturës.

Në vijim KultPlus ua sjell postimin e plotë të MKRS-së:

Hapet konkursi për çmimet vjetore në fushën e kinematografisë

Ftohen të interesuarit që të propozojnë kandidatët për:
Çmimin Kombëtar për Veprimtari Jetësore “Bekim Fehmiu”
Çmimin Vjetor për Kinematografi

Çmimet u jepen krijueseve të dalluar, të cilët me krijimtarinë e tyre artistike kanë lënë gjurmë
të thella në fushën e kinematografisë

Për më shumë informacione klikoni KËTU./KultPlus.com

Nis mbulimi i fushave të tenisit në Prizren, ministri Çeku: Tenisi më nuk do të jetë sport sezonal

Posted on by Kult Plus

Ministria e Kulturës, Rinisë dhe Sportit ka bërë të ditur se në qytetin e Prizrenit ka filluar me mbulimin e fushave të tenisit, për ta shëndrruar në sport aktiv për çdo sezonë të vitit.

Ministri i MKRS, Hajrulla Çeku, po ashtu ka njoftuar se kjo nismë do të vazhdojë edhe në qytetet e tjera.

“Tenisi më nuk do të jetë sport sezonal. Nisim me mbulimin e fushave të tenisit në Prizren, për të vazhduar edhe me qytetet tjera.

Në bashkëpunim me Federatën e Tenisit të Kosovës po investojmë për konsolidimin e kushteve infrastrukturore në tenis, në përputhje të plotë me standardet ndërkombëtare”, thuhet në shrkimin e Çekut./ KultPlus.com

‘Mjeshtri që e bëri punën sikur të ishte e lehtë’- promovohet monografia e Abdurrahman Shalës, konsiderohet udhërrëfues për pasurimin e sistemit të vlerave

Posted on by Kult Plus

Vjollca Duraku
Foto: Sovran Nrecaj

Gjigand, hijerëndë e plot autoritet, qëndronte portreti i artistit Abdurrahman Shala në ballë të sallës ku pikërisht 30 vite pas vdekjes së tij, familjarë, miq, kolegë, artistë dhe përfaqësues të institucioneve, ishin mbledhur për të promovuar monografinë “Mjeshtri që e bëri punën sikur të ishte e lehtë”.

Kjo monografi e cila është realizuar nga autori Visar Krusha është përmbledhje kronologike e detajeve të jetës së Abdurrahman Shalës duke paraqitur rrugëtimin e tij jetësor, i cili ishte mjaft sfidues dhe plotë dramë jetësore, të cilat e shëndrruan atë në një mjeshtër që punën e vështirë e bënte të dukej se ishte lehtë e realizueshme.

Në libër shpaloset fëmijëria e tij e hershme dhe jeta e tij buzë detit në Shqipërinë Monarkike, përpjekja e tij e dështuar për t’u pranuar në Shkollën e Aktrimit në Beograd, aprovimi i ftesës së motrës së tij Mehribanes për t’iu bashkuar grupit të parë të trupës së aktorëve shqiptar në Teatrin e Kosovës, pjesëmarrja e së cilit në këtë institucion i dha vulën e “nismëtarit” për shumë projekte teatrale e filmike, të cilat janë paraqitur së bashku përvojat e kolegëve e familjarëve të aktorit, duke prekur thelbin e figurës së tij.

Vetë prania e mysafirëve në këtë promovim tregonte se ai qe një personalitet i jashtëzakonshëm, të cilit tre dekadat e kaluara nuk ia kishin zbehur aspak gjurmët. Përderisa, ashtu si në të gjallët e tij, figura e tij vëzhgonte në heshtje për të integruar kuptimin e thellë të ngjarjes, karakteristikë kjo që e kishte shndërruar atë në një mjeshtër të artit në disa dimensione, si aktor i teatrit dhe filmit, regjisor, producent, themeltar e drejtues institucional, e mbi të gjitha vizionar, idetë e së cilit tejkalonin aktualitetin e kohës kur ai jetoi.

Ceremonia e promovimit filloi nën interpretimin artistik të Armend Smajlit me poezinë “Deti” të Fatos Arapit e cila në mënyrë figurative përshkruante jetën e protagonistit.

Më tej përgjatë fjalimit, përveç fjalëve përshëndetëse aktori Smajli figurën e Abdurrahman Shalës e quajti pasuri shpirtërore, e cila përmes kësaj monografie është ndriçuar dhe si e tillë do të ruhet edhe për brezat e ardhshëm.

“Në përvjetorin e 30-të të vdekjes së tij ka pasur për qëllim parësor hedhjen në dritë të një figure artistike të jashtëzakonshme të vendit tonë, si një thesar i çmuar i trashëgimisë sonë teatrore e filmike. Kjo është një histori shpirtërore që duhet të ndriçohet e të ruhet për brezat e ardhshëm”, ka thënë Smajli.

Ndërsa Ministri i Kulturës, Rinisë dhe Sportit, Hajrulla Çeku, në fjalimin e tij tha se Abdurrahman Shala si artist e nismëtar i disa prej projekteve e institucioneve këtu duke përfshirë edhe “Kosova Filmin” ka lënë gjurmë të pashlyeshme në historinë e institucioneve publike, kulturore të vendit.

“Si anëtar i trupës së aktorëve shqiptar të Teatrit Kombëtar ai ishte një nga themeluesit e sektorit të dramës shqipe në këtë institucion. Bashkë me kolegët e gjeneratës së tij, luajtën për herë të parë në gjuhën shqipe por edhe në atë turke. Ai gjithashtu u bë regjisori i parë shqiptarë në këtë teatër madje duke sjellë në skenë edhe tekstin e parë shqip “Nuk martohem me pare” të Mutezan Pezës”, ka thënë Ministri Çeku.

Ai më tutje shtoi se sukseset e shumta ndërkombëtare të vendit në film dhe teatër sot, kanë gjenezën nga sukseset e gjeneratës së Abdurrahman Shalës, të cilët me filmat e tyre kanë marrë shumë shpesh edhe çmime në festivalet e kohës.

“Ky vit shënon 30 vjetorin e vdekjes së Abdurrahman Shalës. Botimi i monografisë kushtuar këtij është akti më i bukur i përkujtimit me të cilin do ta mbajmë edhe më afër kujtimin e tij të përjetshëm”, është shprehur Ministri Çeku.

Ndërsa Miranda Shala në emër të familjes së aktorit Abdurrahman Shala me nostalgji e risolli para të pranishmëve figurën e familjarit të saj, të cilin e thërrisnin “Lalko”, e  që ndër të tjera i kishte porositur që gjiththherë punën ta bënin me zemër.

“Unë jam e sigurt se shumica në këtë sallë e kanë njohur “Lalkon” dhe jam e sigurt se të gjithë pajtoheni që ai ka pasur një prezencë të jashtëzakonshme. Rreptësia në fytyrën e tij, prezenca e tij, zëri i tij kur i ka thënë ato pak fjalë kanë reflektuar seriozitet dhe të ka imponuar një autoritet të tmerrshëm. “Lalko” ka qenë njeri i pak fjalëve. Pesha e heshtjes së tij të ka pushtuar. Por prapa kësaj qehreje të rëndë “Lalko” në brendësi ka qenë tmerrësisht i butë. Mënyra se si ai na ka dashur, përkëdhelur e përqafuar dhe si dhe kur na ka komplimentuar na ka përmbushur me dashuri që ende sot na përcjellë” ka thënë Miranda Shala.

 Ajo më tej shtoi se mbi të gjitha “Lalko” kishte qenë edhe vizionar, i cili para 55 vitesh e kishte ideuar një projekt të domosdoshëm por që Kosovës i mungon ende.

 “Kur është themeluar “Kosova Filmi” 55 vite më parë ai e ka paramenduar atë si një vend me disa salla të kino-s, amfiteatër, parqe e restorante, me qëllim që me i sjellë fëmijët dhe njerzit për vikend të kalojnë ditën aty. Do të thotë ka dashur të bëj vend atraktiv për gjithë familjen sepse “Lalko” e ka ditë rëndësinë e artit për zhvillimin e njeriut dhe shoqërisë. Një vend i tillë na mungon edhe sot”, përfundoi Shala duke treguar se Abdurrahman Shala në kohën e Luftës së Dytë botërore kishte shpëtuar shumë shqiptarë nga burgu, gjë të cilën nuk e kishte përmenduar asnjëherë për rrethin e gjerë.

Më tej fjalën e mori autori i monografisë Visar Krusha i cili tha se shumë qejf kishte pranuar ftesën për të punuar një monografi të tillë për këtë figurë karizmatike e cila përmes projekteve filmike e kishte pushtuar.

“Ajo që më ka fascionuar mua është se në të gjitha profilet që ka punuar ka pasur profesionalizëm dhe një nivel  të lartë të performancës, njëkohësisht edhe me shumë përgjegjësi e këmbëngulje për të quar përpara dhe për të ngritur standardin e të krijuarit teatër dhe film në Kosovë, gjithmonë në favor të së mirës së përgjithshme” ka thënë autori Krusha.

Ai po ashtu tha se ndihet shumë i lumtur për botimin e këtij libri, i cili mund të shërbejë si referencë për gjeneratat e reja për të njohur më mirë traditën e filmit që e ka krijuar Shala bashkë me krijuesit e tjerë të gjeneratës së parë në Kosovë, për ta zhvilluar në traditë e për ta pasuruar këtë sistem të vlerave.

 “Mendoj që ne si gjeneratë më e re e njerëzve që merremi me teatër dhe film jemi shkëputur pak nga ajo traditë dhe sistemi i vlerave që ka krijuar kjo gjeneratë, e në anën tjetër mendoj që kemi shumë për të mësuar nga ata. Në këtë kontekst besoj që duhet të merremi më seriozisht me konsolidimin e arkivave të krijimtarisë teatrore dhe filmike në Kosovë. Ato ekzistojnë por nuk janë të sistemuara e të qasshme për publikun”, ka përfunduar autori duke potencuar se gjatë punës në këtë krijimtari ka kuptuar që arkivimi i krijimtarisë artistike, i një institucioni kulturor dhe qasja e publikut në të është po aq e rëndësishme sa edhe vetë krijimtaria artistike.

Krejt në fund të ngjarjes aktori Armend Smajli u paraqit edhe njëherë me një poezi, kësaj radhe nga autori  Din Mehmeti “Këndo ose vdis pa klithë”, pas së cilës të pranishmit patën mundësi të shijojnin ndejën nën tingujt e bukur të këngëve të Abdurrahman Shalës, krijuesit të projekteve si “Uka i Bjeshkëve të Nemuna”,  “Si të vdiset”, “Era dhe Lisi” , “Kur pranvera vonohet”, “Proka”, “Njeriu prej dheu” etj.

Monografia “Mjeshtri që e bëri punën sikur të ishte e lehtë” është botuar nga shtëpia botuese “Integra” me mbështetje nga Ministria e Kulturës, Rinisë dhe Sportit dhe fondacioni Rockefeller Brothers./ KultPlus.com

Kosova bëhet pjesë e Koalicionit Global për Gjithëpërfshirje, synohet integrimi i plotë i personave me aftësi ndryshe

Posted on by Kult Plus

Ministria e Kulturës, Rinisë dhe Sportit ka nënshkruar një marrëveshje bashkëpunimi me Olimpiadën Speciale të Kosovës, përmes së cilës Kosova bëhet pjesë e platformës “Koalicioni Global për Gjithëpërfshirje”.

MKRS ka njoftuar se kjo platformë synon të promovojë aktivitetin sportiv si mjet për integrimin e plotë të personave me aftësi të kufizuara intelektuale në shoqëri.

Në kuadër të nënshkrimit të kësaj marrëveshje, ministri Çeku dhe zëvendësministrja Osmani kanë pritur në takim një delegacion të lëvizjes globale “Olimpiada Speciale Inc. (SOI)” në përbërje të David Evangelista – president regjional i SOI-t për Evropë dhe Euroazi dhe Martha Jo Braycich, zëvendëspresidente për Evropë dhe Euroazi, po ashtu presidenten e Olmpiadës Speciale në Kosovë, Igballe Asllani Potera, drejtoreshën nacionale të OS, Drita Dushi e sportistin tonë, Florent Haziri.

Bashkë diskutuan për hapat e shpejtë që janë bërë nga vendi ynë për tu bërë pjesë e kësaj platforme dhe benefitet që do tu ofrohen sportistëve tanë nga ky anëtarësim./ KultPlus.com

MKRS me informacione shtesë për mbarëvajtjen e instalacionit të Kosovës në Bienale

Posted on by Kult Plus

Doruntina Kastrati dhe instalacioni skulpturor “Heshtjet Kumbuese të Metalit dhe Lëkurës” u nderua me “Mirënjohje të Veçantë për Përfaqësim Shtetëror” në ceremoninë e edicionin e 60-të të Ekspozitës Ndërkombëtare të Artit — La Biennale di Venezia.

Kuruar nga Erëmirë Krasniqi, instalacioni prezanton katër objekte skulpturore: dy prej tyre të modeluara sipas lëvozhgave të llojeve të ndryshme të arrave, të përdorura në prodhimin e llokumeve, dhe dy të tjerat sipas formës së protezave të përdorura për implantet kirurgjike në gjunjë. Instalacioni përcillet nga një projekt tingullor kompozuar nga Paul Hauptmeier dhe Martin Recker.

MKRS ka bërë të ditur se Pavijoni i Kosovës në edicionin e 60-të të Ekspozitës Ndërkombëtare të Artit — La Biennale di Venezia është komisionuar nga Hana Halilaj, kuratore pranë Galerisë Kombëtare të Kosovës dhe organizuar nga Ministria e Kulturës, Rinisë dhe Sportit.

Në njoftim po ashtu thuhet se Pavijoni i Kosovës si dhe Ekspozita Ndërkombëtare e Artit — La Biennale di Venezia mbesin të hapura deri më 24 nëntor, 2024.

Lokacioni:
Museo Storico Navale della Marina Militare
Riva S. Biasio, 2148
30122 Venedik VE, Itali
(në mes të hapësirave ekspozuese të Arsenales dhe Giardinit)/ KultPlus.com

Nisin punimet për rinovimin e teatrit të Mitrovicës

Posted on by Kult Plus

Ministri i Kulturës, Rinisë dhe Sportit Hajrulla Çeku, ka njoftuar se kanë nisur punimet për rinovimin e teatrit të qytetit të Mitrovicës, “Muharrem Qena”.

Çeku thekson se do të vazhdojnë me investime për përmirësimin e kushteve të punës për artistët dhe publikun.

“Teatri i qytetit të Mitrovicës kishte kushtet më të dobëta nga të gjithë teatrot e qyteteve të Kosovës. Kështu nuk do të jetë më. Punimet për rinovimin e Teatrit të qytetit “Muharrem Qena” kanë filluar”, shkroi Çeku.

“Vazhdojmë me investime anekënd për përmirësimin e kushteve të punës për artistët dhe publikun artdashës”./KultPlus.com

Ministria e Kulturës hap thirrjen për mbështetje financiare për studime jashtë vendit

Posted on by KultPlus


Ministria e Kulturës, Rinisë dhe Sportit, përmes një njoftimi në faqen zyrtare ka bërë të ditur se është hapur thirrja për mbështetje financiare studimore në fushën e kulturës, trashëgimisë kulturore dhe sportit, shkruan KultPlus.

Në njoftim thuhet se përmes kësaj thirrje do të mbështeten studimet jashtë vendit në nivelin Bachelor, programe të specializuara në Master, Doktoraturë dhe Pos-doktoraturë.

Poashtu, ministria ka publikuar edhe linkun e thirrjes me detajet tjera të aplikimit./ KultPlus.com

Nënahkruhet memorandum bashkëpunimi mes MKRS-së dhe Komunës së Prizrenit me qëllim të ruajtjes së aseteve të trashëgimisë kulturore

Posted on by Kult Plus

Është nënshkruar memorandum bashkëpunimi mes Ministrisë së Kulturës dhe Komunës së Prizrenit, qëllimi i të cilit është sigurimi, ruajtja, funksionalizimi dhe zhvillimin i qëndrueshëm i aseteve të trashëgimisë kulturore dhe institucioneve publike kulturore në Prizren.

Bëhet fjalë për gjashtë asete me rëndësi dhe vlera të veçanta të trashëgimisë jo vetëm të qytetit të Prizrenit por edhe të Kosovës, si: muzeu i “Nënë Terezës”, kinemaja e parë, konsullata Austro-Hungareze, Lokaliteti Arkeologjik në sheshin Adem Jashari, shtëpia e Musa Shehzades dhe Shtëpia e Kulturës.

Kjo marrëveshje në veçanti koordinon veprimet për zhvillimin, mirëmbajtjen dhe menaxhimin e monumenteve të trashëgimisë kulturore në Qendrën Historike të Prizrenit, duke i shndërruar në hapësira multi-funksionale kulturore në shërbim të qytetarëve.

Memorandumi i bashkëpunimit është nënshkruar në Prizren ndërmjet u.d sekretarit të përgjithshëm të MKRS-së, Xheladin Krasniqi dhe kryetarit të Prizrenit, Shaqir Totaj./KultPlus.com

MKRS: Ngjarjet si ‘Goca e Kaçanikut’ e gjallërojnë skenën kulturore të vendit

Posted on by Kult Plus

Ministria e Kulturës, Rinisë dhe Sportit pas premierës së operës “Goca e Kaçanikut”, përmes një komunikate ka deklaruar se ngjarjet e tilla po ndikojnë në gjallërimin e skenës kulturore të vendit.

MKRS duke i falënderuar të gjithë ata që morën pjesë një realizimin e operës, shfaqjen e ka cilësuar të mrekullueshme.

Më poshtë gjeni shkrimin e plotë të MKRS në facebook:

Për herë të parë në Kosovë u shfaq opera e parë kosovare “Goca e Kaçanikut” me kompozitor Rauf Dhomin, produksion i Operës së Kosovës në bashkëpunim me Baletin Kombëtar të Kosovës.

Nën regjinë e mjeshtrit të madh Nikolin Gurakuqi, kasti i shkëlqyeshëm, kori, orkestra, balerinët dhe i gjithë ekipi ofruan një shfaqje të mrekullueshme.

Sopranoja Adelina Paloja dhe tenori Ismet Vejseli sollën në jetë Pafikën dhe Trimorin, ndërsa Hektor Leka dhe Besiana Mehmedi portretizuan Plakun dhe Plakën. Në role të tjera u prezantuan Harris Bajraktari si Rusbashi, Hekuran Bllaca si Fiqali, dhe Etrit Nura si Agjenti.

Maestro Edon Ramadani, luajti një rol kyç në sjelljen e kësaj opere në variantin më të plotë të saj.

Ngjarje të tilla po e gjallërojnë skenën kulturore të vendit ndërsa sallat janë të mbushura plot për ti ndjekur ato.

Faleminderit dhe përgëzime të gjithë atyre që ishin të angazhuar në realizimin e operës.

“Goca e Kaçanikut” do të shfaqet edhe të dielën më 25 shkurt prej orës 19:00 në Sallën AMC./KultPlus.com

MKRS lanson nesër në Podujevë programin shtetëror ‘Sport në Shkolla’

Posted on by Kult Plus

Nesër duke filluar nga ora 9:00, në shkollën “Xheladin Rekaliu” në Podujevë, do të mbahet ceremonia e lansimit të programit shtetëror “Sport në Shkolla”.

Në lansimin e programit shtetëror “Sport në Shkolla” do të marrë pjesë Kryeministri i Kosovës, Albin Kurti, Ministri i Kulturës, Rinisë dhe Sportit, Hajrulla Çeku, Ministrja e Arsimit, Shkencës, Teknologjisë dhe Inovacionit, Arbërie Nagavci, Kryetari i Komunës së Podujevës, Shpejtim Bulliqi, Kryetari i Federatës së Sportit Shkollor të Kosovës, Ardian Telaku.

Programi “Sport në Shkolla” është zhvilluar dhe do të realizohet nga Ministria e Kulturës, Rinisë dhe Sportit, në bashkëpunim me Federatën e Sportit Shkollor të Kosovës dhe me Ministrinë e Arsimit, Shkencës Teknologjisë dhe Inovacionit. Programi synon të ndërtojë një brez të ri, aktiv dhe të shëndetshëm në Republikën e Kosovës, duke investuar në shëndetin dhe edukimin e të rinjve përmes sporteve të ndryshme në arsimin parauniversitar./KultPlus.com

MKRS: Fillon rinovimi i palestrës së sportit në Istog

Posted on by Kult Plus

Ka filluar rinovimi i palestrës së sportit në komunën e Istogut, përcjell KultPlus.

Nëpërmjet një postimi në Facebook, Ministria e Kulturës, Rinisë dhe Sportit ka njoftuar se për rinovimin e kësaj palestre, ministria ndarë 300 mijë euro.

Në vijim, KultPlus ua sjell postimin e plotë të MKRS-së

Ka filluar rinovimi i Palestrës së sportit në Istog.

Ministria e Sportit po e mbështet komunën e Istogut me 300 mijë euro në këtë projekt shumë të rëndësishëm për sportin dhe sportistët e Istogut.

Po punohet me të gjitha komunat dhe federatat e sportit për të përmirësuar kushtet në hapësirat sportive të vendit tonë./KultPlus.com

Një hap më afër jetësimit të projektit për Kompleksin Memorial “Masakra e Reçakut”

Posted on by Kult Plus

Në mbledhjen e sotme të Qeverisë së Kosovës, u miratua inicimi i procedurës për shpronësimin e pronës së paluajtshme që i hap rrugë realizimit të këtij projekti.

Kjo po bëhet në prag të 25 vjetorit të përkujtimit të një prej ngjarjeve më të dhimbshme të vendit tonë, Masakrën e Reçakut, dëshmi për gjenocidin e kryer nga Serbia ndaj shqiptarëve.

Ky projekt i rëndësisë së veçantë është duke u përgatitur në bashkëpunim të ngushtë mes Ministrisë së Kulturës, Rinisë dhe Sportit, Agjencisë për Menaxhimin e Monumenteve dhe Komplekseve Memoriale dhe Komunës së Shtimes./KultPlus.com