“Mural Fest Kosova” këtë vit organizoi kampin e Artit Reciklues, i cili është mbajtur për 5 ditë radhazi në Jezerc të Ferizajt, nga 4 deri më 8 prill.
Nga “Mural Fest Kosova” kanë thënë se ky kamp është program i ri i “Mural Festit” që do jetë i përvitshëm. Në këtë kamp trajtohen tema të ndryshme të cilat konsiderohen shqetësues për shoqërinë, por gjithmonë duke i qëndruar besnik artit.
“Qëllimi kampit të organizuar nga “Mural Fest Kosova” është që të trajnojë të rinjtë në disiplina të ndryshime të artit dhe t’i edukojë ata për çështje të ndryshme sociale përmes artit”, thuhet në përgjigjen e “Mural Festit”.
Në këtë kamp kanë qenë 20 pjesëmarrës nga qytete të ndryshme të Kosovës dhe komunitete të ndryshme.
Për të qenë pjesë e këtij kampi pjesëmarrësit është dashur të mbledhin më së paku 20 shishe të plastikës, për shfrytëzim si material për krijimin e veprave të artit.
“Pjesëmarrësit si kusht për tu pranuar në këtë kamp kanë pasur mbledhjen e më së paku 20 shisheve të plastikës, që ka qenë edhe materiali bazë për punimin e veprave të artit përgjatë pesë ditëve sa është mbajtur kampi”, kanë treguar nga “Mural Fest”.
Tutje bëhet e ditur se përveç punës praktike, ka pasur edhe aktivitete të tjera të cilat kanë shërbyer për vetëdijesimin e të rinjve për riciklimin e materialeve të ripërdorshme si dhe aftësi të buta.
Veç këtyre pjesëmarrësit gjatë 5 ditëve qëndrimi në kamp kanë pasur edhe detyra tjera, kanë shikuar filma e dokumentare si dhe janë mbajtur diskutime rreth tyre./21Media / KultPlus.com
