Teksa shumë turistë nga mbarë bota ndaluan të vizitonin Pallatin e Versajës, Kullën Eifel dhe vende të tjera gjatë Lojërave Olimpike të Parisit, muzeu më i vizituar në botë u zbraz. Gjatë Lojërave, midis 27 korrikut dhe 11 gushtit, frekuentimi në Luvër ra me 22% krahasuar me të njëjtën periudhë të vitit të kaluar. Frekuentimi javor i muzeut ra në 331,759 njerëz, ose mesatarisht 23.644 vizitorë ditorë. Numri i vizitorëve u tkurr gjithashtu përpara fillimit të lojërave, sipas Luvrit, i cili pa 166.604 vizitorë midis 15 dhe 26 korrikut. Kjo shënon një rënie masive prej 45 % nga shifrat për të njëjtat data në 2023.
Një gjë, që kontribuoi në shifrat më të ulëta se zakonisht, ishte fakti që muzeu u mbyll për ceremoninë e hapjes së Lojërave më 25 dhe 26 korrik.
Shifrat e përgjithshme të vizitorëve në Luvër për vitin 2024 deri më sot qëndrojnë në mbi 5 milionë, një rënie prej 4% krahasuar me të njëjtën periudhë të vitit të kaluar. Në fillim të këtij viti, muzeu rriti çmimin bazë të biletës nga 19 dollarë në 24.50 dollarë, në mënyrë që të mund të subvenciononte programet e pranimit falas për disa vizitorë. Ishte rritja e parë e çmimit që nga viti 2017 dhe po përdoret gjithashtu për të kompensuar një rritje prej gati 90 % në faturat e energjisë. Lëvizja është pjesë e një plani të zbatuar nga drejtori i Luvrit, Laurence des Cars, për të kontrolluar frekuentimin, i cili preku 8.9 milionë vizitorë në vitin 2023, duke i dhënë institucionit titullin e muzeut më të vizituar në botë.
Për gati 200 vjet, kjo pikturë ka qenë simboli i republikës franceze.
Piktura ‘Liria që udhëheq popullin”, e cila përshkruan një grua duke valvitur një flamur trengjyrësh dhe duke udhëhequr njerëzit e saj mbi trupat e të rënëve gjatë Revolucionit Francez të 1830-ës, kishte humbur ngjyrat e saj origjinale për shkak të kalimit të viteve.
Për këtë arsye ajo iu nënshtrua një restaurimi 6 mujor, ndërhyrja e së cilës ka përfunduar dhe është rikthyer sërish në muzeun e Luvrit.
“Kjo pikturë është një nga kryeveprat e mëdha që gjenden në muzeun e Luvrit, ndoshta e dyta më e famshëme pas Mona Lizës. Për shkak të kalimit të viteve piktura kishte humbur intensitetin e ngjyrave dhe detajet.”
Muzeu i Luvrit, më i madhi në botë, ka kryer rreth 200 restaurime që nga viti 2015, duke përfshirë shumë vepra të njohura./tvklan/KultPlus.com
Muzeu i Luvrit ka njoftuar se do të rrisë çmimet e biletave, gjashtë muaj para Olimpiadës, kur Parisi pritet të presë edhe më shumë turistë se zakonisht.
Tarifa e hyrjes në Luvrin nga 15 janari do të jetë 22 euro, ndërsa nga viti 2017 ka qenë 17 euro.
Luvri është muzeu më i vizituar në botë, me 86,000 metra katror hapësirë të hapur për publikun. Muzeu u vizitua nga 7.2 milionë njerëz vitin e kaluar.
Muzeu fitoi 76.5 milionë euro në arkë vitin e kaluar. Kjo mbulonte vetëm një të katërtën e kostove operative të saj, ndërsa pjesa tjetër financohej nga kreditë e Ministrisë së Kulturës dhe mjete të tjera, përfshirë edhe patronazhin.
I hapur në 1793 në një ish-pallat mbretëror në zemër të Parisit, Luvri është një nga atraksionet kryesore turistike të Parisit.
Ai paraqet koleksione jashtëzakonisht të pasura, të cilat variojnë nga qytetërimet e Mesdheut dhe Lindjes së Mesme disa mijëvjeçarë para erës sonë deri te artet e bukura të shekullit të 19-të.
Vizitorët vijnë nga e gjithë bota për të admiruar, ndër të tjera, Mona Lizën e Leonardo da Vinçit (fillimi i shekullit të 16-të), Venus de Milo (shekulli II para Krishtit) ose antikitetet egjiptiane në gjendje të shkëlqyer./KultPlus.com
Muzeu i Luvrit në Paris, më i madhi në botë, u mbyll sot në mesditë për arsye sigurie, ndërsa Franca është në alarm, një ditë pas një sulmi islamik në Arras.
“Luvri mori një mesazh me shkrim që raportonte një rrezik për muzeun dhe vizitorët e tij dhe ne zgjodhëm (…) ta evakuonim dhe ta mbyllnim atë për gjithë ditën, ndërkohë që po kryejmë kontrollet thelbësore”, tha një zëdhënës në X.
Një burrë vrau një mësuese pas një sulmi me thikë, në një shkollë të mesme në Arras, Francën veriore.
Transmetuesi francez BFMTV tha se viktima ishte një mësuese dhe se një person tjetër u plagos.
BFMTV raportoi se njeriu u dëgjua duke bërtitur “Zoti është i madh” përpara se të kryente sulmin e tij.
”Autori u ndalua nga policia”, njoftoi ministri i Brendshëm francez Gérald Darmanin.
”Motivimi i sulmit ishte ende i paqartë”, tha policia.
Megjithatë, hetimin e ka marrë prokuroria e antiterrorizmit.
”Sulmuesi dhe vëllai i tij, i cili gjithashtu u arrestua, thuhet se janë nga Çeçenia”, raportoi gazeta ”Le Figaro” duke cituar burime të Ministrisë së Brendshme./KultPlus.com
Muzeu i Luvrit në Paris ka kufizuar numrin e vizitorëve. Tashmë hyrja në këtë muze do të jetë më ekskluzive.
Nëse deri më tani muzeu i Luivrit ka qenë në listën tuaj të destinacioneve për t’u vizituar, sigurohuni mirë përpara se të shkoni, pasi mund të mbeteni jashtë.
Luvri i njohur i Parisit, muzeu më popullor në botë, po kufizon frekuentimin e tij të përditshëm në një përpjekje për t’u ofruar vizitorëve “një vizitë më të rehatshme dhe për të siguruar kushte optimale pune për stafin”, thuhet në njoftimin për shtyp të lëshuar javën që shkoi.
Muzeu që deri përpara pandemisë priste mesatarisht 45,000 vizitorë në ditë, prej muaj e ka ulur ndjeshëm fluksin e numrit të vizitave në afro 30, 000 dhe duket se këto ritme do të ruhen.
“Shifrat jashtëzakonisht pozitive për vitin 2022 janë jashtëzakonisht inkurajuese për të gjithë stafin tonë”, shprehet presidenti i Luvrit, Laurence des Cars.
“Shpresoj që vizitorët të shijojnë kalimin e kohës në Musée du Louvre, veçanërisht ata që zbulojnë muzeun për herë të parë, të cilët përfaqësojnë 60 përqind të tyre. Ne po punojmë gjithnjë e më shumë për të përmirësuar kushtet e vizitës dhe për të vazhduar të ofrojmë një program me cilësi të shkëlqyer dhe një grup unik performancash live që rezonojnë me atë që ndodh në muze.”
Ky vendim i heshtur i stafit drejues të Louvre ka hasur në kundërshtime nga artistë dhe kuratorë të cilët nuk mendojnë se kufizimi i vizitave në një muze si ai i Luvrit përmirëson përvojën e vizitorëve të cilët udhëtojnë nga anë e mbanë globit për të parë veprat e ekspozuara në këtë muze ikonik./Gazeta Tema/ KultPlus.com
Muzeu i Luvrit në Paris, muzeu më i vizituar në botë, tani do të kufizojë numrin e vizitorëve ditorë në 30,000 “për të mundësuar një vizitë të rehatshme dhe për të siguruar kushte optimale pune për stafin e muzeut”, raporton Artnews.
Përpara pandemisë, Luvri mund të mirëpresë deri në 45,000 vizitorë çdo ditë. Kur Luvri u rihap pas bllokimit në korrik 2020 pas një mbylljeje 16-javore, ai nuk e kufizoi zyrtarisht kapacitetin, megjithëse pjesëmarrja e tij ishte në rënie për shkak të pandemisë së vazhdueshme dhe kufizimeve të udhëtimit ndërkombëtar.
Muzeu në heshtje mori vendimin për të kufizuar vizitorët e tij të përditshëm në qershor të vitit 2022.
Luvri njoftoi ndryshimin zyrtar në numrin e vizitorëve ditorë në shpalljen e shifrave të tij zyrtare të frekuentimit për vitin 2022. Vitin e kaluar, ai mirëpriti 7.8 milionë vizitorë, 120 për qind më shumë nga shifrat e vitit 2021, por ende 19 për qind më pak nga kulmi i tij prej 9.6 milionë në 2019.
Sipas muzeut, kufizimet e udhëtimit vazhduan të ndikojnë në tremujorin e parë të frekuentimit të tij, por rritja e frekuentimit në tre tremujorët e fundit “ilustron një prirje shumë pozitive”.
Me këtë ndryshim, Luvri, i cili mbyllet çdo të martë dhe në tri festa publike, mund të mirëpresë maksimumi 9.3 milionë vizitorë në vitin 2023.
Nga 7.8 milionë që vizituan Luvrin në vitin 2022, 30 për qind ishin francezë dhe 70 për qind ishin vizitorë të huaj, me vizitorë nga SHBA që përfaqësonin 18 për qind./ KultPlus.com
Një shfaqje kërcimi mes pikturave në Francë. Koreografja belge Anne Teresa de Keersmaeker dhe frnacezi Némo Flouret pushtuan Muzeun e Luvrit me një performancë kërcimi përpara veprave të artit. Muzeu ofron shfaqje nga dhjetëra artistë, lëvizjet e të cilëve hyjnë në dialog me kryeveprat e David dhe Leonardo Da Vincit. Kjo lejon që forma të ndryshme të artit të kryqëzohen më njëra-tjetrën.
Duke udhëtuar nëpër historinë e artit, Anne Teresa De Keersmaeker trajton nocionin e kohëzgjatjes duke u fokusuar në ecjen si forma më themelore e kërcimit – në të vërtetë, emëruesi themelor i përbashkët i njerëzimit në lëvizje.
“Mendoj se këtu sfida e madhe që i kemi vënë vetes nuk është të kemi një eksperiencë në muze, por të qëndrojmë në atë që është thelbi i një muzeu, që ka vepra arti që ekspozohen… ka aq shumë aktivitet, sa nuk i shikojmë më pikturat,” tha koreografja Anne Teresa De Keersmaeker.
Ndërsa koreografi francez, Némo Flouret, tha se po eksplorojnë dimensione të ndryshme të artit.
“Ne punojmë në formate që janë të sheshta, që janë 2D, të palëvizshme, të heshtura dhe kjo na shtyn, të kuptojmë pak se si ky kërcim mund të bëhet një zgjatim i këtyre formateve, duke e projektuar veten në hapësirë tredimensionale. Edhe nëse jemi disa dhjetëra centimetra nga pikturat, përpiqemi të krijojmë zgjatime duke kërcyer,” tha ai.
Në një rrugë paralele me pesë mijë vjet histori arti të përqendruar në një hapësirë të madhe, koreografët vijnë me një ftesë për të ngadalësuar shikimin, duke krijuar një dialog midis gjesteve dhe pikturave./ KultPlus.com
Në muzeun e famshëm të Luvrit dhe në Pallatin e Versajës dritat do të fiken më herët se zakonisht.
Ky vendim po merret nga autoritetet franceze për të kujtuar qytetarët për krizën energjetike të shkaktuar nga lufta në Ukrainë. Në fillim të kësaj jave, u njoftua se në Paris dritat që zbukurojnë monumentet në kryeqytetin francez do të fikeshin më herët.
Ministrja e Kulturës Rima, Abdul Malak tha se dritat në muzeun e Luvrit do të fiken në orën 23:00 në vend të orës 01:00 të mëngjesit. Ajo u bëri thirrje institucioneve kulturore franceze që të miratojnë masa të ngjashme për të kursyer energji.
Çmimet e energjisë janë rritur gjatë muajve të fundit, pjesërisht për shkak të luftës në Ukrainë./ KultPlus.com
Drejtori i Departamentit të 9-të të “Arteve të Bizantit dhe të krishtërimit të Lindjes” në Muzeun e Luvrit, Paris, Maximilien Durand, ka vizituar Muzeun e ri të Artit Mesjetar si dhe Kishat e Voskopojës dhe Mborjes.
Durand është rikthyer në Shqipëri pas më tepër se 20 vitesh për të parë nga afër ndryshimet e bëra gjatë këtyre viteve, sa i përket ruajtjes dhe ekspozimit të këtyre pasurive me vlera të mëdha.
Drejtori i Drejtorisë Rajonale të Trashëgimisë Kulturore, Korçë, Gjergji Koki, në një prononcim për ATSH-në, u shpreh se “vizita e njërit prej drejtorëve më të rëndësishëm të Muzeut të Luvrit, merr një vëmendje të veçantë, pasi promovimi që i bën zonës, ka interes për turizmin fetar dhe kulturor, por edhe për shkëmbimin, në të ardhmen të eksperiencave e teknikave të restaurimit dhe konservimit të kësaj trashëgimie”.
Durand vlerësoi shumë punën e bërë në Muzeun e Artit Mesjetar si shembull të promovimit dhe ekspozimit të ikonave, duke theksuar se “ky muze është unik në llojin e vet në rajonin e Ballkanit, për sa i përket fondit që disponon”.
Po ashtu, Durand vlerësoi punën që bëhet për ruajtjen e ikonave, në kushte ideale, profesionale dhe të standardeve botërore.
Më tej ai vazhdoi udhëtimin e tij në kompleksin e kishave të Voskopojës, ndër të cilat ka vlerësuar maksimalisht kishën e Shën Kollit.
“Kjo është “Monaliza” e artit ikonografik shqiptar”, është shprehur Durand, të cilit i kanë tërhequr më tepër vëmendjen veshjet e shenjtorëve në muralet e Zografit, Shpatarakut e Selenicës.
Ai vuri theksin tek puna për konservimin dhe ruajtjen strukturale të kishave në Voskopojë, pasi edhe ka bërë një studim mbi to, veçanërisht për veshjet në pikturat murale.
Durand theksoi nevojën që ka për ndërhyrje në afreske, si dhe për konservimin e tyre.
Gjithashtu vizitoi edhe Kishën e Mborjes, një kishë e shekullit të 13-të, ku pa nga afër proceset restauruese të cilat garantojnë një ruajtje dinjitoze.
Drejtori i Luvrit, shoqërohej në këtë vizitë nga dy ekspertë të artit të trashëgimisë kulturore të DRTK Korçë që e asistuan gjate vizitës së tij në qytetin e Korçës. Më tej ai do ta vazhdojë vizitën e tij në Shqipëri, me qytetin e Beratit, ku ka të tjera perla të artit mesjetar./atsh/ KultPlus.com
Pandemia e koronavirusit ka vazhduar të ndikojë në numrin e personave që vizitojnë muzeun e Luvrit në Paris.
Muzeu njoftoi sot se, numri i vizitorëve ka rënë me 70 për qind krahasuar me 9.6 milionë në vitin 2019.
Në vitin 2021, numri i tyre arriti në 100,000 mbi nivelin e vitit 2020.
Luvri u mbyll për vizitorët nga 1 janari deri më 19 maj 2021, si pjesë e masave të Francës për të parandaluar përhapjen e Covid-19.
Ndërkohë, pothuajse dy të tretat e vizitorëve të këtij viti vinin nga Parisi, raportoi muzeu.
Një numër rekord vizitorësh prej 10.2 milionë vizituan Luvrin në vitin 2018, duke u konsideruar si muzeu më i vizituar në botë. Përpara pandemisë, muzeu ishte i popullarizuar me turistë nga vendet jo anëtare të BE-së, kryesisht nga SHBA-ja dhe Kina, të cilët përbënin 75 për qind të vizitorëve. / KultPlus.com
Muzeu i Luvrit në Paris aktualisht është i mbyllur për shkak të kufizimeve të koronavirusit. Por brenda mureve të tij gjendet një koleksion i fshehtë kryeveprash që rrallë shfaqen për publikun. Muzeu i Luvrit në Paris priste 10 milionë vizitorë në vit, në kohërat përpara pandemisë.
Tani objekti me famë botërore qëndron bosh, përveç personelit të sigurisë dhe disa punonjësve të muzeut që punojnë për rinovime. Brenda, Mona Lisa ende buzëqesh në mënyrë enigmatike mbi galeritë, dhe kryeveprat e mëdha që varen në mure.
Por këtu ka një thesar shumë më pak të njohur veprash – nëse dini ku të shikoni. Xavier Salmon është drejtori i Departamentit të Arteve Grafike të muzeut.
Është një bibliotekë që ruan vizatime, punime me pastel dhe në miniaturë, të ruajtura në kushtet e duhura për disa vite.
Që kur Luigji i 14-të i Francës filloi një fushatë blerjesh në shekullin e 17-të, Luvri ka grumbulluar një koleksion prej 250 mijë artesh grafike që datojnë nga shekulli i 9-të deri në mesin e viteve 1800.
Por ato nuk janë të ekspozuara në mënyrë të përhershme. Departamenti nxjerr për publikun vetëm disa shembuj çdo katër muaj.
“Departamenti i Arteve Grafike të Luvrit është me të vërtetë departamenti i tij më i fshehtë sepse punimet tona nuk shfaqen përgjithmonë në dhomat e muzeut. Por, kjo është një minierë e jashtëzakonshme për historinë e krijimtarisë njerëzore, sepse ne kemi bashkuar 250 mijë vepra arti në zemër të Luvrit, arte grafike – ato janë vizatime, pastel, punime në miniaturë, të cilat që nga shekulli i 9-të deri në 1850 ilustrojnë të gjithë historinë e krijimtarisë – oksidentale – në Evropë dhe Shtetet e Bashkuara”, thotë zoti Salmon.
Për ata që e dinë, departamenti është vendi për të parë veprën e Gaddi-t të shekullit të 14-të ‘Presentation de la Vierge au Temple’ (Prezantimi i Virgjëreshës së Tempullit).
“Këtu keni një vepër jashtëzakonisht të rëndësishme sepse është një nga vizatimet më të vjetra të ruajtura në botë. Një vizatim nga Taddeo Gaddi nga viti 1338, pra një vizatim i shekullit të 14. Ju e shihni se duke ndjekur Giotto-n (piktor i shekullit të 13-të), ne kemi lindjen e përdorimit të perspektivës – me temën fetare këtu, quhet “Prezantimi i Virgjëreshës së tempullit” dhe mënyra delikate, me të cilën Gaddi punoi duke përdorur pigmente të përziera me ujë dhe më pas e kaloi atë mbi letër, është plotësisht spektakolare, ashtu si edhe mënyra se si është ruajtur ky vizatim”, thotë zoti Salmon.
Para pandemisë, Departamenti i Arteve Grafike mirëpriste rreth 800 njerëz çdo vit – studentë, artistë, piktorë, ekspertë dhe vizitorë të përgjithshëm.
Atyre u duhej të kishin hulumtuar paraprakisht punimet që donin të shihnin dhe më pas të caktonin një takim për të vizituar këtë dhomë të veçantë konsultimi për të parë nga afër punimet. Sigurisht, që tashmë kjo nuk është më e mundshme.
Por zoti Salmon thotë se ka mënyra se si vizitorët të bëhen gati për momentin kur kjo bibliotekë të jetë në gjendje të rihapet.
“Është jashtëzakonisht e trishtueshme që ne nuk jemi më në gjendje të mirëpresim vizitorët tanë të zakonshëm, por fatmirësisht i gjithë koleksioni gjendet në internet. Ata që duan të përgatiten për vizitën e tyre kanë kohë të shkojnë në bazën tonë të të dhënave, të shikojnë vizatimet me fotot dhe informacionin dhe pasi të kenë përgatitur udhëtimin e tyre në Paris, ata rrjedhimisht mund të vijnë këtu dhe të shohin vizatimet”, thotë ai.
Zoti Salmon ka shfrytëzuar mbylljen për të riorganizuar dhe rishpërndarë vendosjen e punimeve, diçka që nuk do të ishte e mundur para pandemisë.
Është e paqartë se kur Luvri do të rihapë dyert pas masave izoluese të vendosura më 30 tetor për shkak të kufizimeve ndaj COVID-19./Zeri i Amerikes/ KultPlus.com
Abu Dabi rihapi sot, pas më shumë se tre muajsh, muzeun e tij të Luvrit, i mbyllur nga masat e vendosura nga Emiratet e Bashkuara Arabe për të kufizuar përhapjen e koronavirusit.
Vizitorët në muze duhet të rezervojnë biletën në internet.
Ata do të lejohen të kalojnë tre orë brenda muzeut dhe duhet të përdorin maska për fytyrën dhe doreza.
Gjithashtu ata do të përdorin një aplikacion në telefon për informacion mbi veprat e artit, pasi fletushkat nuk do të jenë në dispozicion.
Autoriteti i Kulturës dhe Turizmit i Abu Dabit njoftoi se numri i vizitorëve nuk duhet të kalojë 40% të kapacitetit të përgjithshëm të një muzeu.
Javët e fundit, kryeqyteti i Emirateve të Bashkuara Arabe ka lehtësuar kufizimet, megjithëse ndalimi për hyrjen ose largimin nga vendi do të mbetet në fuqi deri më 29 qershor./atsh / KultPlus.com
Teksa të gjithë njerëzit janë të detyruar të qëndrojnë në shtëpitë e tyre, për shkak të koronavirusit, muzeumet më të famshme në botë ofrojnë vizita virtuale.
Delegacioni i Bashkimit Europian në Tiranë fton të gjithë qytetarët shqiptarë të vizitojnë virtualisht në këto ditë në karantine muzeun e jashtëzakonshëm të Louvre në Paris.
“Një tjetër muze që mund të vizitoni virtualisht në këto ditë në karantinë është edhe i jashtëzakonshmi Louvre në Paris. Seksioni i vizitave virtuale online shpalos një pjesë mjaft të madhe të thesarit të tij”, thekson zyra e BE në Tiranë.
“Ju gjithashtu mund të gjeni materiale të tjera interesante, të gjitha në lidhje me disa nga veprat më të rëndësishme të artit në botë”, përfundon zyra e BE në Tiranë.
Zyra e BE publikon edhe linkun ku mund të vizitohet virutalisht muze i Louvre në Paris./konica/ KultPlus.com
Rradhët e gjata të turistëve të cilët presin me orë të tëra për të parë tabllonë e Mona Lizës, fillojnë që jashtë Muzeut të Luvrit,vazhdojnë brenda korridoreve të tij dhe madje edhe përballë tabllosë së saj.
Për të kontrolluar dhe për të menaxhuar këto rradhë të stërgjata vizitorësh (mbi 30, 000 në ditë) menaxherët e Luvrit janë shprehur se mundësinë për të parë tabllnë e Mona Lisës do ta kenë vetëm ata persona që rezervojnë paraprakisht.
Por tani që tablloja e Mona Lizës është transferuar nga galeria e saj Salle des États si pasojë e rikonstruksionit në galerinë Médicis, duke u vendosur përbri tabllove të tjera të Rubensit, i jep të gjithë atyre që duan ta shikojnë Mona Lizën të kenë akoma edhe më pak kohë në dispozicion, më pak se një minutë. Kjo ka bërë që një numër i lartë turistësh të shprehen për mungesë organizimi dhe kaos në Muzeun e Luvrit.
“Gjithçka ishte perfekte në udhëtimin tim në Paris, me përjashtim të vizitës në Muzeun e Luvrit. Te prëshësh mbi 4 orë në rradhe dhe pastaj të të lejojnë të shikosh tabllonë e Mona Lizës për më pak se 1 minutë”, u shpreh një turist.
Një tjetër tha se e vetmja gjë që njerëzit duhet të shmangin gjatë vizitës së tyre në Paris është Muzeu i Luvrit. “Ju prisni për orë të tëra në rradhë, pastaj përballeni sërish me rradhe të gjata edhe pasi hyni brenda në muze, për të parë vetëm 30 sekonda pikturën e Mona Lizës, nga një largësi prej tre metrash”.
Muzeu i Luvrit është muzeu më i vizituar në botë, me rreth 10.2 milionë vizitorë në vit, nga të cilët 80 për qind besohet se vijnë vetëm për të parë Mona Lizën. Muajin e kaluar organizatorët, u detyruan ta mbyllin muzeun për tre ditë rrjesht për shkak të kaosit të krijuar nga rradhët e stërgjata të vizitorëve përpara tij.
Mona Liza do të kthehet sërish në galerinë e saj të zakonshme në tetor, me rastin e 500 vjetorit të vdekjes së Leonardo Da Vinçit. / KultPlus.com
