Etiketë: Muzeu Kombëtar

Muzeu Kombëtar i Artit Mesjetar zbulon për artdashësit simbolikat e artit bizantin

Posted on by Kult Plus

Muzeu Kombëtar i Artit Mesjetar, përmes ciklit “Zbulo ikonën bizantine”, fton artdashësit ta vizitojnë duke zbuluar sekretet e simbolikat e artit bizantin.

“Zbulo ikonën bizantine” sjell vazhdimisht informacione mbi botën e pikturës bizantine e veçanërisht mbi objekte të fondit të këtij muzeu. “Gjithë Shenjtorët” (IN 5791) është ikona e shekullit XVIII, me autorë Kostandin & Athanas Zografin.

Kjo ikonë vjen nga Kisha e Manastirit të Apostujve, Vithkuq.

Ikona me përmasa 50.5 x 117 cm paraqet përfaqësime nga të gjitha grupet e shenjtorëve, në pamundësi për të paraqitur të gjithë shenjtorët, ajo ndahet në gjashtë breza: Në pjesën e sipërme në një rreth i cili brendashklruhet në një kuadrat, paraqitet Trinia e Shenjtë, Ati, Biri dhe Shpirti i Shenjtë në formën e pëllumbit. Ata rrethohen nga kerubinë, serafinë dhe fuqi të tjera qiellore.

Në katër cepat e kuadratit paraqiten simbolet e ungjillorëve. Në krahun e majtë paraqitet Hyjëlindësja dhe në të djathtë Joan Pagëzori në formë Deissis. Pas tyre paraqiten grupimet e kryeengjëjve dhe engjëjve.

Në brezin poshtë rrethit paraqiten Adami dhe Eva në qëndër, në të majtë grupimi i mbretërve dhe profetëve (Moisiu, Aaroni, Jezekil, Daniel, Avakum…), në të djathtë qëndrojnë oshënarët (Andoni i madh, Eftimi, Sava, Onufri etj.).

Në brezin tjetër shohim në qëndër kryeapostujt Pjetri e Pavli duke mbajtur maketin e kishës, në të majtë janë vendosur Hierarkët (Vasili, Grigori, Joan gojëarti, Spiridoni etj.), në të djathtë pjesa tjetër e apostujve (Joan teologu, Marku, Mateu, Andrea, Jakovi etj.).

Brezi më poshtë paraqet në pjesën qendrore Kostandinin dhe Elenën me veshje perandorake dhe pas tyre Shën Silvestri, Në të majtë janë paraqitur strategët martirë Gjergji dhe Dhimitri, pas tyre grupimi i mjekëve anargjendë (Kozma dhe Damian). Në të djathtë paraqiten mbretëreshat Varvara dhe Katerina si dhe Julita, Maria Egjiptiania dhe fëmija Kiriku.

Në pjesën fundore të ikonës paraqitet parajsa me bimësi të shumtë, tre etërit biblikë Abrahami, Isaku dhe Jakovi, të cilët mbajnë në duar shpirtrat e fëmijëve të masakruar nga mbreti Irod. Gjithashtu shohim edhe hajdutin e kryqëzuar me Krishtin./atsh/KultPlus.com

Muzeu Kombëtar i Artit Mesjetar në Korçë sjell ikona për herë të parë

Posted on by Kult Plus

Muzeu Kombëtar i Artit Mesjetar në Korçë ka hapur ekspozitën “Johan Pagëzori”, që sjell figurën Pagëzorit si një nga figurat më komplekse, të jashtëzakonshme dhe më të pikturuar në traditën e ikonografisë bizantine.

Drejtoresha e këtij muzeu Fjoralba Prifti ka bërë me dije se pjesa më e madhe e ikonave ekspozohen per herë të parë.

“Ikona të cilat janë të përzgjedhura përgjatë shekujve 14-20, përmbajnë stile dhe interpretime të ndryshme, mbeten autorë anonim por kemi e autorë të shquar Kostandin Jeremonaku, i përkasin periudhave dhe stileve të ndryshme dhe secila është unike në llojin e vet”- u shpreh Fjoralba Prifti.

Mitropoliti i Korçës, Voskopojës dhe gjithë juglindjes Hirësia e tij Imzot Joan Pelushi është shprehur se Joan Pagëzori është një nga 3 figurat më të rëndësishme të krishterimit.

” Mesazhi i Shën Joan Pagezorit është shumw i rëndësishëm për të gjitha kohërat. Është mesazhi i pendimit. Që do të thotë se gjithkush nga ne ka nevojë të meditoje e ndryshoje mënyrën e të menduarit dhe jetuarit, ky është pendimi i vërtetë. Është mesazhi i ardhjes së Krishtit, lajm i mirë. Është mesazhi i guximit për të thënë të vërtetën ”

Në këtë ekspozitë janë paraqitur 13 ikona të Johan Pagezorit, 11 prej të cilave paraqiten për publikun për herë të parë. Ekspozita do të qëndrojë e hapur në pjesën më të madhe të sezonit turistik./euronews/KultPlus.com

Muzeu Kombëtar sjell botimin e revistës shkencore “Studime Muzeologjike”

Posted on by Kult Plus

Muzeu Historik Kombëtar ka bërë të mundur daljen në dritë të revistës shkencore “Studime Muzeologjike”, i cili vjen sërish për lexuesin e interesuar, këtë herë në numrin 12 të tij si një botim special.

Artikujt e këtij botimi i kushtohen Konferencës Shkencore Ndërkombëtare Muzeologjike “Muzetë përtërijnë të ardhmen”, e cila u organizua nga Muzeu Historik Kombëtar në kuadër të 40-vjetorit të inaugurimit.

Prej vitit 2002, një herë në vit, Muzeu Historik Kombëtar boton revistën “Studime Muzeologjike”. Gjatë viteve 2002-2004 kanë dalë rregullisht 3 numra të revistës. Por pas një ndërprerjeje prej dhjetë vjetësh, në vitin 2014 u realizua botimi i numrit 4 i revistës “Studime Muzeologjike”. Botimi ka vijuar edhe në vitet 2015 deri në numrin e 12 të tij në maj 2022.

“Studime Muzeologjike” është organ i Muzeut Historik Kombëtar. Si i tillë, ai është i përqendruar, por jo i kufizuar në tema dhe emrat e bashkëpunëtorëve.

Në numrin 12-të të tij, revista shkencore “Studime Muzeologjike” ka të përzgjedhur një seri shkrimesh, të cilat i përmbahen muzeologjisë, historisë, antropologjisë, por ka të trajtuara gjithashtu dhe histori arti, konservim e restaurim.

Në këtë kuadër numri special i revistës Studime Muzeologjike përmban fjalët përshëndetëse që u mbajtën në konferencë nga ministrja e Kulturës, Elva Margariti, ministri i Kulturës i Republikës së Kosovës, Hajrulla Çeku, Sekretarit shtetëror në Ministrinë e Kulturës të Republikës së Maqedonisë të Veriut, Valmir Aziri, Kryetari i Akademisë së Shkencave të Republikës së Shqipërisë, Skënder Gjinushi.

Revista përmban 21 shkrime me tema të ndryshme./atsh/ KultPlus.com

“Miss Mary Edith Durham dhe shqiptarët”, një botim në dy gjuhë nga Muzeu Kombëtar

Posted on by Kult Plus

Muzeu Historik Kombëtar ka botuar përmbledhjen dygjuhëshe shqip dhe anglisht me kumtesat e Konferencës Shkencore “Miss Mary Edith Durham dhe shqiptarët”.

Studiuesit me kumtesat e tyre sollën fakte nga jeta dhe vepra e Miss Mary Edith Durhamit. Ndër kumtesat mund të veçojmë ato nga:

Dorian Koçi, Drejtor i Muzeut Historik Kombëtar: “Antropologji dhe udhëtime: Shqipëria e Edith Durhamit”;

Bardhosh Gaçe: “Miss Durhami dhe A. Herberti në mbështetje të Qeverisë së Ismail Qemalit”.

Gjithashtu një trajtim shumë interesant është edhe ai i sjell nga Elizabeth Gowing: “Sandalet që u larguan: artefakte të mbledhura nga Edith Durham në muzetë e Mbretërisë së Bashkuar”.

Gjithashtu, Abaz Hado në kumtesën e tij sjell temën: “Fryma romantike dhe sinqeriteti në vizatimet dhe skicat e Edith Durham”.

Tatjana Haxhimihali: “Miss Mery Edith Durham në korrespondencën e saj me Mr. Joseph Swire (1928 – 1929/31)”;

Shpend Bengu: “Komunikimi pamor ndër shqiptarë, në dëshmitë e Edith Durham”;

Robert Wilton: “Bizanti në Londër – Mary Edith Durham dhe marrëdhëniet britanike me Shqipërinë”;

Frederik Stamati: “Dy çentro nga Edith Durham”;

Rovena Vata: “Tradita shqiptare në syrin e Edith Durhamit gjatë udhëpërshkrimeve nëpër Shqipëri”;

Bernard Zotaj: “Edith Durham për luftëtarët shqiptarë”;

Andrea Llukani: “Kristianizmi dhe uniatizmi i shpatarakëve, sipas Edith Durhamit”;

Paulin Pushimaj: “Drishti, nga vizita e M. E. Durham në ditët e sotme”;

Qerim Vrioni: “Një velë  në  Bunë. Mbi  një  foto  të  Edith  Durham”. / DiasporaShqiptare / GazetaMetro / KultPlus.com