Etiketë: muzeu onufri

Demo: Konsolidohet piktura murale në katin e sipërm në Muzeun “Onufri”

Posted on by Kult Plus

Mirëmbajtja dhe kujdesi ndaj trashëgimisë kulturore është pjesë e përditshme e punës në Muzeun Kombëtar të Ikonografisë “Onufri”.

Restauratori i Muzeut “Onufri”, Erion Lezi ka kryer procesin e konsolidimit të pikturës murale në hapësirën e katit të sipërm në Muzeun “Onufri”.

Kryetari i bashkisë së Beratit, Ervin Demo ndau në rrjetet sociale momente nga puna për konsolidimin e pikturës.

“Në pikturë paraqitej plasaritje jo kritike të murit mbi të cilin është realizuar piktura e shek. XIX-XX. Injektimi i konsolidantit nëpër plasaritje dhe mbushja e xhepave bosh parandalojnë dëmtimin nga faktorë të ndryshëm dhe e bëjnë jetëgjatë këtë pasuri kulturore”, tha Demo.

Koleksioni i Muzeut Kombëtar “Onufri” përbëhet nga 200 objekte të përzgjedhura nga fondet e kishave dhe manastireve të rrethit të Beratit. Ai përbëhet kryesisht nga ikona dhe një grup objektesh liturgjike.

Veprat e këtij muzeu datojnë nga më të vjetrat të shekullit XIV deri në fillim të shekullit XX. Ikonat janë realizuar nga piktorët ikonografë si: Onufri, Nikolla i biri i Onufrit, Onufër Qiprioti, David Selenica, Kostandin Shpataraku, Adam Kristo si dhe piktorët me mbiemër Çetiri (Gjergji, Joani, Nikolla, Naumi, Gjergji i riu dhe Ndini), si dhe nga shumë piktorë të tjerë anonimë./atsh/KultPlus.com

Muzeu “Onufri” rekord vizitorësh, 100 mijë në 10 muaj

Posted on by Kult Plus

Drejtori i Qendrës Muzeore Berat, Miklor Pasku, deklaroi për ATSH-në se, muaji tetor ka rezultuar me një vizitueshmëri të lartë për Muzeun “Onufri”. Pasku tha se për herë të parë në historinë e Muzeut “Onufri” është kaluar pragu i 100 mijë vizitorëve.

Krahasuar me të njëjtën periudhë të një viti më parë, muajt janar-tetor 2024 shënuan një rritje me 40% të vizitueshmërisë, ku shumicën e përbëjnë turistët e huaj (grupe të organizuara nga agjenci shqiptare e të huaja).

Vizitorët e huaj të këtij muzeu kryesisht janë polakë, spanjollë, italianë, francezë etj. I pyetur për grupmoshat që frekuentojnë më shumë këtë muze, drejtori Pasku tha se, kryeson ajo e mbi 40-vjeçarëve, por kufiri i moshës është zgjeruar dhe gjithashtu është rritur ndjeshëm edhe numri i vizitorëve vendas.

Muzeu i ikonografisë “Onufri” është organizuar në ambientet e kishës “Fjetja e Shën Marisë”, në kalanë e Beratit, prej 27 shkurtit të vitit 1986.

Muzeu mban emrin “Onufri”, kushtuar kryemjeshtrit të pikturës ikonografike shqiptare në shekullin e XVI. Katedralja përfaqëson një nga arkitekturat më tipike pas-bizantine në qytetin e Beratit./atsh/KultPlus.com

“Gjashtë Apostujt me Shën Mëhillin”, për të parën herë para publikut të muzeut “Onufri”

Posted on by Kult Plus

Pas një pune disamujore, kryer në laboratorin e Konservimit dhe Restaurimit në muzeun “Onufri” nga restauratori Erion Lezi, përfundoi ndërhyrja riparuese për ikonën “Gjashtë Apostujt me Shën Mëhillin”, vepër e fillimit të shekullit XVII, atribuar Onufër Qipriotit.

Restaurimi i kësaj vepre është një arsye më shumë për të vizituar muzeun “Onufri” me ekspozimin për herë të parë të një tjetër thesari të shpëtuar ikonografik.

Kjo ikonë, e dimensioneve të mëdha, është pjesë përbërëse e deisit të madh e cila kompozohet nga dy skena. Ajo prej dekadash ka qëndruar në fondin e muzeut “Onufri” dhe për herë të parë ekspozohet për publikun.

Ikona edhe pse e restauruar përpara disa dekadash, paraqiste problematika të ndryshme si çarje suporti, dëmtim të kornizimit, dëmtim të grundit dhe shtresave përgatitore, dëmtim të pelikulës piktorike, shoqëruar me papastërti të qëndrueshme të lëna nga restaurimi i mëparshëm (dyll dhe parafine) si dhe oksidim verniku. Të gjitha këto copëtonin tërësinë e skenës, tjetërsonin ngjyrat dhe bukurinë e ikonës si dhe rrezikonin degradimin e saj./atsh/KultPlus.com

Muzeu “Onufri” ekspozon relikuarin e mermertë të shek. VI

Posted on by Kult Plus

Me rastin e Ditëve Europiane të Trashëgimisë, Qendra Muzeore Berat  ka ekspozuar një nga objektet arkeologjike që ka në fondin e saj, relikuarin prej mermeri i shekullit VI.

Relikuari u ekspozua në Muzeun Ikonografik “Onufri”, pas një procesi pastrues e konservues.

Ky objekt i rrallë i periudhës paleokristiane përmendet për herë të parë në një studim të historianit austriak Bushbek në vitin 1918 që e evidenton brenda Kishës së Ungjillëzimit (Evangjelizmoit) por në vitin 1990 studiuesi gjerman Guntram Koch publikon një studim te detajuar në revistën Monumentet 1990 (Nr 40).

Simbolet, figurat dhe përmasat e vogla bëjnë të mendosh për një mbajtës relikesh të shenjtorëve. Shembuj të ngjashëm si ky objekt gjenden në Sirinë e largët në territoret e dikurshme të Perandorisë Bizantine dhe mermeri është i importuar nga një vend i panjohur por është punuar nga mjeshtër lokalë, që korrespondon me periudhën e dytë të lulëzimit të Beratit (Pulheriopolis) në çerekun e dytë të shekullit VI./atsh/KultPlus.com

Muzeu “Onufri”, i pari që aplikon sistemin e audioguidës

Posted on by Kult Plus

Muzeu i Ikonografisë “Onufri” rrëfen përmes një sistemi audioguide kryeveprat e tij në katër gjuhë: shqip, anglisht, italisht dhe gjermanisht.

“Onufri” është muzeu i parë që ka aplikuar teknologjinë në zbulimin e thesareve kulturore kombëtare falë kujdesit të drejtpërdrejtë nga Ministria e Kulturës.

Me një pagese simbolike, vizitës në këtë muze, i shtohen të tjera vlera përmes  zbulimit të pasurive të trashëgimisë së jashtëzakonshme të Muzeut “Onufri”.

Koleksioni i muzeut përbëhet nga 200 objekte të përzgjedhura nga fondet e kishave dhe manastireve të rrethit të Beratit. Ai përbëhet kryesisht nga ikona dhe një grup objektesh liturgjike. Veprat e këtij muzeu datojnë nga më të vjetrat të shekullit XIV deri në fillim të shekullit XX.

Një ndër veprat më të mira të krijuara nga mjeshtrit shqiptarë të drugdhendjes, siç është ikonostasi i katedrales Fjetja e Shën Mërisë mban (1807) gjendet në këtë muze, së bashku me kodikët e purpurt, të mbrojtur nga UNESCO. / atsh / KultPlus.com

Muzeu “Onufri” në Berat, pret vizitorët e parë të 2023

Posted on by Kult Plus

Muzeu “Onufri” në Berat vazhdon të zgjojë interesin e vizitorëve e sidomos atyre të huaj edhe në këtë fillim viti, me vlerat e koleksioneve të tyre.

Qendra Kombëtare e Muzeumeve në Berat ndau sot në rrjetet sociale momente nga vizita e turistëve në këtë muze.

Drejtori i Qendrës Kombëtare të Muzeumeve në Berat, Agron Polovina tha sot për ATSH-në se “muzeu ka qenë i hapur edhe ditën e djeshme dhe është vizituar nga çift gjermanësh, një grup me vizitorë italianë, por edhe shqiptarë”.

Muzeu Ikonografik “Onufri”, që mban emrin e njërit prej kryemjeshtrave të pikturës shqiptare të shekullit XVI, është ndërtuar mbi rrënojat e një kishe të rindërtuar në vitin 1797 në lagjen “Kala”, e cila ka qenë katedralja e qytetit, që është monumenti më përfaqësues i arkitekturës pasbizantine në qytetin e Beratit.

Koleksioni i muzeut përbëhet nga 173 objekte të përzgjedhura nga një fond prej më se 1 500 objektesh që i takojnë fondeve të kishave dhe manastireve të Shqipërisë./ atsh / KultPlus.com

Ikona “Shën Maria me Krishtin” i shtohet muzeut “Onufri”

Posted on by Kult Plus

Pas një ndërhyrjeje tre mujore në laboratorin e Muzeut Kombëtar Ikonografik Onufri përfundoi restaurimi i ikonës “Shën Maria me Krishtin” e tipit Udhëheqëse.

Ikona me dimensione 88 x 60,5 x 5 cm, me autor anonim, mendohet t’i përkasë shekullit të XVII për nga stili dhe trajtimi artistike.

Sipas Muzeut Kombëtar Ikonografik “Onufri” kjo ikonë paraqiste shumë problematika, si: plasaritje dhe çarje të suportit të drurit, abrasion të pelikulës piktorike, dëmtime masive dhe mungesë grundi, si dhe depozitime papastërtish të qëndrueshme, dyll, bojra vaji, parafinë, bloz si dhe oksidim të vernikut.

“Të gjitha këto rrezikonin degradimin e veprës duke mos bërë të mundur për më tepër leximin e qartë dhe të plotë të skenës ikonografike të realizuar me mjeshtëri dhe elegance nga autori. Pas ndërhyrjes restauruese u arrit rezultati i dëshiruar, duke parandaluar degradimin e saj dhe duke nxjerrë në dukje ngjyrat e ikonës, freskinë dhe madhështinë e veprës”, thekson Muzeut Kombëtar Ikonografik “Onufri”.

Kjo ikonë i ofrohet tashme e restauruar publikut të Muzeut Onufri duke pasuruar koleksionin e tij ikonografik. / KultPlus.com

Muzeu “Onufri” aplikon për herë të parë audio guidën në katër gjuhë

Posted on by Kult Plus

Nën moton “Fuqizojmë muzetë nëpërmjet teknologjisë digjitale”, një sipërmarrje madhore u promovua në vitin 2019 në muzeun e ikonografisë “Onufri”, audio guida një teknologji inovative e aplikuar për herë të parë në vend.

Qendra Kombëtare e Muzeumeve Berat shprehet se tashmë kushdo që viziton muzeun e ikonografisë “Onufri” e ka mundësinë e një “udhëtimi” individual, dhe shansin të zbulojë muzeun dhe kryeveprat e tij nëpërmjet informacionit më të zgjeruar të 40 rubrikave për rreth 90 minuta, në gjuhët shqip, anglisht, italisht dhe gjermanisht.

“Por gjithashtu, vizitori mund të fokusohet e të rikthehet në rubrikat e dëshiruara, nëpërmjet udhërrëfyesit në gjuhën e përzgjedhur pa prezencën e një guide didaktike. Padyshim që ky produkt dita ditës po i përmbush pritshmëritë tona, në raport me rritjen dhe ofertën e një shërbimi inovativ, bashkëkohor, dinjitoz e padyshim një hap i ri për kulturën e shërbimit të muzeve shqiptarë.  Kjo reflektohet në kërkesën gjithmonë në rritje të marrjes së këtij shërbimi, i cili në muajt e fundit është preferuar nga më shumë se 600 vizitorëve të huaj, vendas, studentë, etj”, thuhet nga QKMB.

Muzeu i ikonografisë “Onufri” është organizuar në ambientet e kishës “Fjetja e Shën Marisë”, në kalanë e Beratit, prej 27 shkurtit të vitit 1986. Muzeu mban emrin “Onufri”, kushtuar kryemjeshtrit të pikturës ikonografike shqiptare në shekullin e XVI.

Katedralja sipas mbishkrimeve që mbart rezulton të jetë rindërtuar në vitin 1797 mbi themelet e një kishe më të vjetër të periudhës bizantine. Ajo përfaqëson një nga arkitekturat më tipike pas-bizantine në qytetin e Berat. Koleksioni i muzeut përbëhet nga 200 objekte të përzgjedhura nga fondet e kishave dhe manastireve të rrethit të Beratit. Ai përbëhet kryesisht nga ikona dhe një grup objektesh liturgjike. Veprat e këtij muzeu datojnë nga më të vjetrat të shekullit XIV deri në fillim të shekullit XX. / KultPlus.com