Radhës së figurave nga dylli të personaliteteve të showbizit në muzeun Madame Tussauds në New York, iu shtua edhe një figurë.
Dashamirët e DJ-it të famshëm botëror, Avicii-t, tani kanë shansin që figurën e tij nga dylli ta shohin në këtë muze. DJ suedez vdiq vitin e kaluar në moshën 28 vjeçare. Shkaku ishte depresioni i thellë, shkruan rtv21.tv
Këngët e Avicii-t, apo Tim Bergling, si quhej në të vërtetë, përfshirë këtu “Levels,” “Wake Me Up,” “Seek Bromance,” “Silhouettes” e shumë të tjera, ndihmuan në dhënien e formës së vallëzimit gjatë vitit 2010 e edhe sot.
Muzika e tij ishte vërtetë ikonike. Pra, adhuruesit e Aviciit tani nuk kanë shansin të jenë të pranishëm në vendngjarje muzikore të tija, të cilat veçoheshin si risi muzikore sepse ai çdo herë ka sjellë në skenë ritme të reja, por ata kanë shansin që figurën e tij nga dylli ta shohin në muze. Si zakonisht, siç ndodh edhe me figurat tjera nga dylli të cilat punohen me aq përpikëri, edhe figura e Avicii-t duket e përkryer, sikur të ishte duke realizuar muzikë për adhuruesit e tij.
Figura do të qëndrojë në ekspozitë në këtë muze, pranë figurave të disa personaliteteve po ashtu të njohura botërore, si Taylor Swift, Rihanna, Justin Timberlake, Ed Sheeran e të tjerë./21Media / KultPlus.com
