Koleksioni i ri nga Nadira Kika sjell për herë të parë aspekte të reja të disenjatores

Era Berisha

Ndonëse, stresi dhe idetë e paarritshme kanë qenë prezente pothuajse çdo herë, këmbëngulja dhe vetëbesimi janë dy ndjenja që dominojnë në punën e saj të cilën ajo e sheh si një vlerë të madhe ku çdo sakrificë dhe sfidë harrohet lehtësisht kur në fund vëren suksesin e saj në punë e sidomos me koleksionin e saj të fundit që për karakteristikë ka ngjyrat e forta dhe detajet finesë të punuara me dorë, shkruan KultPlus.

Detajet si rol kyç në fushën e saj, konsiderohen një diferencë e lartë mes modeleve të ndryshme dhe stilit personal të veshjeve prandaj edhe nuk është aspak e vështirë që detajet të mbizotërojnë kur ato janë në vendin e duhur. Përveç detajeve dhe siluetave, në koleksionin e saj të fundit që dallon shumë nga stili i zakonshëm i saj me të cilën jemi mësuar ta shohim, vërehet një ndryshim i madh për sa i përket ngjyrave ku ajo e kuqja, indigo dhe portokalli përplasen fuqishëm në veshje të cilat shfaqen si një bombë e ngjyrave. E kjo në fakt është një ndryshim i madh për Kikën sepse ajo për herë të parë ka shfaqur një anë të sajën që nuk është parë më herë, për arsye se ajo anon më shumë në ngjyrat pastel.

Një pikë tjetër e fortë e këtij koleksioni si një veçanti e radhës janë edhe ‘headpieces’, që njëkohësisht me ngjyrat e ndezura, vijnë për herë të parë e të cilat janë të punuara me dorë. Ndërsa, koleksioni numëron gjithsej 10 veshje apo fustane të cilat përafërsisht kanë marrë kohë rreth 1 deri në 2 muaj ku intensiviteti nuk ishte i pranishëm për shkak se puna e ngadaltë ka sjell një punë të cilën Kika e ka dëshiruar që herët për të parë fundin total të koleksionit.

Në një intervistë për KultPlus, disenjatorja Nadira Kika, ka shpalosur edhe detajet që mbizotërojnë në të gjitha koleksionet e saj.

“Kryesisht janë: ngjyra kuqe, kaltër, portokalli dhe hiri. Nuk kam ndonjë ngjyrë që shihet më pak në dizajnet e mia por për sa i përket koleksioneve të mia, ngjyrat e kuqe janë ato që i përdori më pak sepse është një ngjyrë që nuk më inspiron dhe nuk e gjej veten”, thotë Kika.

Sipas saj, fillimisht, është një koncept mbi të cilin ajo bazohet ku ekziston një ‘moodboard’ me të cilën janë ngjyrat, format dhe detajet që atë e frymëzojnë. Kështu që nga ai moodboard procesi i saj vazhdon me skicim pastaj vazhdon me përzgjedhjen e materialeve deri në realizimin e skicave.

“Për të gjithë ata që e përcjellin stilin tim me siguri kanë parë dy lloje të stileve gjatë këtij rrugëtimi, unë gjithmonë mundohem t’i mbaj dy llojet e stilit si: “Ready to wear” dhe “Pret-a-couture”, ku njëri është me veshje të përditshme dhe tjetri është me fustane elegante. Kurse, porositë e klientëve janë kryesisht ato çka ne i postojmë në rrjete sociale, ndonjëherë me ca ndryshime në bazë të linjave trupore”, thotë Kika.

Për Kikën, njëra ndër porositë të cilën ajo do e veçonte do të ishte ajo e një gruaje e cila ka pasur kancer të gjirit e një punë kjo me të cilën Kika ka punuar me shumë delikatesë, dashuri dhe ndjeshmëri. Kurse, si njëra ndër vështirësitë më të mëdha, ajo përmendi njohjen e targetit me të cilin ajo punon. Koha dhe përkushtimi për të gjetur targetin e duhur janë dy pikat kryesorë që kanë shënuar vështirësinë e madhe në punën e saj.

Ajo tutje ka folur rreth specialitetit me të cilën dallohet nga të tjerët në fushën e saj, e për çka ajo mundohet të sjell çdo herë diçka më unike.

“Fillimisht, unë mendoj se stili im personal e bënë diferencën mes meje dhe dizajnerëve të tjerë. Llojet e materialeve me të cilat unë punoj dhe i sjell, mundohem që çdo herë të jenë më unike, e po e njëjta vlen edhe për çmimet e ndryshme. Gjithashtu, besoj se jam njëra ndër dizajneret e pakta që i mban dy linja njëkohësisht, atë me veshje të përditshme dhe atë me fustane elegante”, përfundon Kika për KultPlus.

Ndërsa, synimet e saj për të ardhmen përfshijnë së paku një apo dy koleksione brenda këtij viti, kurse momentalisht ajo është duke punuar në disa plane afatgjate për sa i përket tregut ndërkombëtarë. Në ndërkohë, të pasionuarit pas veshjeve diversive, detajeve unike qoftë në veshjet e përditshme apo edhe solemne si dhe pas ngjyrave të llojllojshme, mund ta ndjekin punën e disenjatores Nadira Kika. / KultPlus.com

Jeta Zymberi

Disenjatorja Nadira Kika, ndonëse nuk ka shumë kohë prej që ka filluar të sjellë rregullisht koleksione pothuajse në çdo sezonë, ajo ka arritur të unifikohet në mesin e dizajnerëve më të mirë në vendin tonë, kjo falë punës plot vullnet dhe mjaftë të veçantë në realizimin e kreacioneve.

Tashmë, Kika ka sjellë edhe koleksionin e saj më të ri të titulluar “Resort 2019”, i cili qysh në shikim të parë të rrëmben me thjeshtësinë dhe rëndësinë që përmban njëkohësisht.

Kika ka folur për KultPlus rreth këtij koleksioni për të cilin ka punuar me shumë dëshirë, pasi vjeshta është edhe stina e saj e preferuar për krijime të tilla.

“Çdo punë që bëhet me vullnet dhe me pasion besoj që i zvogëlon vështirësitë, gjithashtu këto lloj veshjesh më burojnë nga shpirti dhe është sezona ime e preferuar për të krijuar. Jam e kënaqur me gjithçka që kam arritur deri tani, pasi që edhe kam filluat të cilësohem si një nga dizajneret e pakta që realizojnë veshje të përditshme e që në realizim janë më të vështira se sa fustanet dhe kanë më shumë prerje dhe detaje”, ka thënë për KultPlus disenjatorja Kika.

Por për të krijuar diçka të bukur, njeriu padyshim që inspirohet nga diçka gjithashtu e bukur, qoftë ajo ndjenjë , objekt apo diçka tjetër. Kika është shprehur që inspirimi i vjen shumë spontanisht, nga çdo gjë që e rrethon.

“Më frymëzon edhe një ditë e bukur me diell, edhe energjia pozitive e klientëve, më frymëzojnë edhe vizitat nëpër vendet Europiane. Por kur filloj realizimin e koleksioneve kryesisht filloj me ngjyrat sezonale dhe llojet e materialeve. Kryesisht kështu fillon e gjithë historia e çdo koleksioni”, ka treguar tutje ajo.

“Resort 2019” përmban veshje të përditshme dhe publikohet para sezonës Pranverë – Verë 2019 e që ka një numër më të vogël veshjesh nga 15 deri 25 veshje.

Në këtë koleksion dominon ngjyra e verdhë, jo rastësisht, por për faktin që kjo është edhe një ndër ngjyrat e sezonit që po na rrethon, andaj Kika ka arritur ta kombinojë të verdhën me të tjera ngjyra, për të sjellë kështu një “vjeshtë” tek kreacionet e saj.

“Njëra ndër ngjyrat e kësaj sezone është e verdha ose ndryshe është “Aspen Gold” d.m.th një e verdhë e zbehur. Kjo ngjyrë është tendencë e këtij viti kështu që e kam pa të arsyeshme që ta fus në koleksion si pikë të fortë. Gjithashtu edhe ngjyra qumësht është njëra ndër ngjyrat kryesore të koleksionit për ta balancuar pak kompozicionin mes ngjyrave. Ngjyrat tjera të cilat i kam përdorë janë e gjelbërta, krem, kafe dhe hiri. Zakonisht mundohem të përdorë ngjyrat bazë të cilat nuk jemi mësuar t’i shohim gjatë sezonit të dimrit. Mundohem që përmes koleksionit të sjellë ngjyra të guximshme dhe jo monotone”, ka treguar disenjatorja.

Përmes këtij koleksioni Kika ka menduar të sjellë diçka të re edhe çka mungon në qytetin tonë, gjithashtu të ekspozojë një pjesë kreative të sajën atë çka ajo di ta bëj më së miri, të krijoj veshje të përditshme me prerje dhe detaje të ndryshme. Të sjellë pallto me prerje të ndryshme e që kësaj here kryesisht janë të gjata. Gjithashtu të ju sjellë klientëve veshje unike edhe me një stil më ndryshe qofte edhe për fustane edhe për pallto.

Ky koleksion përmban gjithsej 15 veshje. Janë 5 pallto dhe kryesisht janë fustane dhe këmisha të cilat mund të vishen gjatë ditës por edhe në mbrëmje e që janë shumë komode qoftë edhe në prerje edhe në materiale.

Ky koleksion është prezantuar nga një fotosesion i realizuar nga fotografi Shenoll Zehri, ndërsa kreacionet janë shkrirë për mrekulli në trupin e modeles Dhurata Lipovica. Ndërsa nëse Kika e ndjen vetën të gatshme për një sfilita, ajo është përgjigjur se ajo është një ëndërr të cilën pret ta realizojë në momentin e duhur dhe në mënyrën e duhur.

“Mendoj që ka kohe edhe pak për të sjellë sfilat, sepse e mendoj që momenti i sfilatës duhet me qenë diçka speciale edhe duhet me qenë e menduar deri në detajin e fundit. Edhe disa vite do vazhdoj t’i publikoj në këtë mënyrë koleksionet e mia përmes photoshooting, deri sa të shoh që është momenti i duhur për sfilaten të cilën e kam ëndërruar gjithmonë”, ka thënë krejt për fund disenjatorja Nadira Kika./KultPlus.com