OBSH paralajmëroi se muajt në vijim do të jenë të vështirë pasi numri i të infektuarve me Covid-19 po rritet ndjeshëm, kryesisht në Europë dhe Amerikën e Veriut.

Drejtori i Përgjithshëm i organizatës, Tedros Ghebreyesus tha se me uljen e temperaturave dhe ardhjen e dimrit, situata mund të përkeqësohet edhe më shumë, kjo për shkak edhe të mungesës së kapaciteteve në spitale.

OBSH kërkon nga qeveritë më shumë aksion për të ndërprerë zinxhirin e transmetimit, përmes masave kufizuese që mund të shpëtojnë jetë, investigim të rasteve të infeksionit, të karantinojnë të prekurit dhe kontaktet e tyre më të ngushta, të sigurojnë cilësi më të lartë të kujdesit shëndetësor e të mbështesë stafin mjekësor.

Mike Ryan, kreu i OBSH për Europën kërkoi masa më të ashpra në kontinent, duke iu kujtuar europianëve se nëse vazhdojnë me këto shifra, do të rikthehen në izolim të plotë dhe kjo nuk do t’i shërbejë askujt. / KultPlus.com

Kufizimet e ashpra janë plotësisht të nevojshme për të shpëtuar jetë. Kështu pohon Organizata Botërore e Shëndetësisë që paralajmëron Europën, e cila po përballet me valën e dytë të pandemisë koronavirus.

Kjo vjen ndërsa miliona qytetarë në kontinentin e vjetër po jetojnë mes masave tepër strikte. Por OBSH saktëson se situata nuk është e njëjtë me atë të marsit apo prillit.

“Jemi me të vërtetë të shqetësuar dhe është koha për të shtuar masat, por përsëri, në një mënyrë graduale. Dhe disa vende që janë më keq duhet të shkojnë shumë më larg se vendet e tjera. Por nuk duhet të përmbahemi. Pra, mesazhi kryesor këtu për qeveritë është ‘mos u përmbani’ me veprime relativisht më të vogla në mënyrë që të shmangni të njëjtat veprime shumë të dhimbshme dhe dëmtuese që pamë në valën e parë”, u shpreh Hans Kluge, drejtor rajonal i OBSH për Europën.

Shtete si Polonia, Çekia, Holanda e shumë të tjera në Europë kanë shtuar kufizimet për të frenuar pandeminë, ku nuk kanë munguar dhe izolimet e pjesshme apo mbyllja e shkollave e bareve. OBSH paralajmëroi se rritja e rasteve ditore me koronavirus në Europë mund të pasohet nga një shtim i nivelit të vdekshmërisë. Shqetësim që konfirmohet edhe nga Bashkimi Europian.

“Shifrat e Covid-19 po shkojnë qartësisht në drejtim të gabuar. Po ndjekim me shqetësim të madh shtimin gjithnjë e më të shpejtë të nivelit të infeksionit në të gjithë Bashkimin Europian. Bashkë me të, po shohim gjithashtu edhe një shtim të numrit të shtrimeve në spitale. Fatkeqësisht po shohim edhe një shtim të numrit të qytetarëve që po humbasin jetën”, tha Stella Kyriakides, komisionere e BE për shëndetësinë.

Eurokomisionerja këshillon shtetet që të marrin masa për të shmangur pasojat shkatërruese, sociale dhe ekonomike, që sjellin izolimet e përgjithshme. Zyrtarja prezantoi në Brukskel dhe strategjinë e Bllokut për vaksinën kundër koronavirusit të ri, ndërsa tha se ajo nuk do ta zhdukë pandeminë si me magji, por do të luajë një rol të rëndësishëm në shpëtimin e jetëve. / KultPlus.com

Pandemia me koronavirus është duke pasur ndikim të madh në vendet e varfra andaj shtetet e pasura duhet t’i kushtojnë vëmendje kësaj situate, ka thënë i dërguari special i Organizatës Botërore të Shëndetësisë për sëmundjen Covid-19, që shkakton ky virus, David Nabarro.

“Në njërën anë është sëmundje që është e lidhur me rreziqe serioze të vdekjes dhe në të njëjtën kohë, shtetet e varfra nuk kanë burime, qoftë në aspektin e shërbimeve shëndetësore, apo masave tjera mbrojtëse”, ka thënë ai.

Si rezultat, ka shtuar ai, të ardhurat e njerëzve janë duke u zhdukur brenda natës.

“Është e habitshme shpejtësia e varfërisë me të cilën përballen njerëzit, kur iu kërkohet të ulin aktivitetin ekonomik, në mënyrë që të ndalin përhapjen e virusit”, ka deklaruar ai.

“Kam dëgjuar nga disa komunitete në Azi, ashtu sikur edhe në Afrikë dhe Amerikën Latine, ku është rritur shpejt varfëria ekstreme, dhe supozoj se ne do të shohim që kjo pandemi do të ndikojë në rritje të kequshqyerjes të nivelit që nuk e kemi parë për dekada”.

Deklarata e tij vjen në ditën kur numri i rasteve të infektuarve me këtë virus në botë ka arritur në mbi 5 milionë. Numri i saktë i të infektuarve besohet se është më i lartë për shkak të ndryshimit të testimeve brenda shteteve, vonesave dhe mosraportimit. / KultPlus.com

Organizata Botërore e Shëndetësisë ka shpallur zyrtarisht coronavirusin një pandemi.

Përhapja që filloi në Wuhan, Kinë, ka vrarë tani më shumë se 4,300 njerëz dhe ka infektuar më shumë se 121.500 të tjerë.

Ndërsa virusi vazhdon të përhapet, më shumë njerëz mund të futen nën karantinë në shtëpi ose të zgjedhin të vetë-izolohen në shtëpi.

Sipas Business Insider, përcjell Telegrafi, mijëra amerikanë që udhëtuan kohët e fundit në Kinë janë nën një karantinë të vullnetshme 14-ditore në shtëpi për të parë nëse ato shfaqin simptoma, dhe në New York, të paktën 4,000 njerëz u kërkohet të izolohen në shtëpi, sepse kohët e fundit kanë udhëtuar në një vend me një shpërthim të rëndë ose kishin kontakt të mundshëm me një pacient të infektuar.

Gjithashtu, gjithnjë e më shumë kompani po inkurajojnë ose u kërkojnë punonjësve të punojnë nga shtëpia për shkak të virusit.

Në këtë drejtim, po sipas Business Insider, Departamenti i Sigurisë së Brendshme rekomandon rezervimin e një furnizimi dy-javor me ushqim dhe ujë në rast të një pandemie.

Në rastin e ndonjë emergjence mbijetese, Kryqi i Kuq Amerikan rekomandon mbajtjen e një furnizimi me ushqim, ujë dhe furnizime shtëpiake – si pastrues rrobash dhe pelena nëse keni fëmijë të vegjël.

Mediumi në fjalë ka sjellë një përshkrim se çfarë duhet të keni në “çantën e urgjencës” në shtëpi në rast të një karantine të mundshme në shtëpi mes pandemisë së coronavirusit, sipas Departamentit të Sigurisë së Atdheut, CDC, Kryqit të Kuq Amerikan dhe ekspertëve të tjerë.

Departamenti i Sigurisë së Brendshme i SHBA-së rekomandon rezervimin e ushqimit dhe ujit të mjaftueshëm për dy javë para se të goditeni nga një pandemi.

Gjithashtu, mallrat e thatë si orizi, makaronat, fasulet dhe tërshëra duhet të jenë themeli i stokut tuaj, ka thënë për Business Insider, Alyssa Pike, një dietologe e regjistruar dhe menaxhere e komunikimeve ushqimore në Këshillin Ndërkombëtar të Informacionit të Ushqimit.

Sipas saj, ju gjithashtu duhet të rezervoni ushqime të konservuara që përmbajnë lëng, si domate, fasule dhe peshk.

Lëngu i tepërt mund të përdoret për të gatuar ushqimin e tharë si orizi dhe makaronat.

Dhe mos i lini pas dore sendet si çokollata dhe kafja, edhe pse ato nuk janë rreptësisht thelbësore.

Siç ka raportuar Business Insider, përcjell Telegrafi, sende të tilla mund të bëjnë një ndryshim të madh në shëndetin tuaj mendor dhe moralin gjatë një karantine në shtëpi.

Mund të tingëllojë e thjeshtë, por larja e rregullt dhe e plotë e duarve është një nga mënyrat më të mira dhe më të lehta për të mbrojtur veten nga coronavirusi, sipas CDC.

Prandaj mos harroni të përfshini sapunin e duarve në çantën tuaj të karantinës.

Mos harroni sende të tjera higjiene, siç janë letra higjienike, produktet për kujdesin ndaj grave dhe pelenat nëse keni fëmijë të vegjël në familje.

Veç këtyre, Departamenti i Sigurisë së Brendshme i SHBA rekomandon të kontrolloni në mënyrë periodike barnat tuaja të rregullta me recetë për të siguruar një furnizim të vazhdueshëm në shtëpinë tuaj.  /KultPlus.com