Etiketë: PAAF

Nesër fillon festivali i vetëm i promovimit të punës së studentëve në Prishtinë

Posted on by Kult Plus

I konceptuar për të promovuar punën e studentëve të arteve, festivali i vetëm i studentëve në Kosovë, Prishtina Arts&Architecture Festival, nis të mërkurën edicionin e tij të dytë.

Ky edicion që do të zgjasë nga 22-24 maj 2019, në hapësirat moderne të Kolegjit AAB do të sjellë risi në përmbajtjen e tij, ndërsa do të prezantohet krijimtaria njëvjeçare e studentëve të të gjitha fushave: pikturë, dizajn grafik, dizajn mode, arkitekturë, enterier, produksion filmik e muzikë.

Në ditën e parë të tij PAAF2019 do të sjellë një program artistik të studentëve të Fakultetit të Muzikologjisë, të cilët do të performojnë vepra të ndryshme muzikore individuale e grupore, në këndim e instrumente, ndërsa do të ketë edhe një prezantim të Korit të studentëve të Kolegjit AAB me një varg numrash muzikorë.

Po kështu, dita e parë e PAAF 2019, do të jetë edhe dita hapëse e Ekspozitës Kolektive të Studentëve, ku do të prezantohen dhjetëra punime të studentëve.

Në ditën e dytë të festivalit, vëmendje e veçantë i është kushtuar Dizajnit të Modës. Nën titullin e punës “Tulipan”, studentët e Dizajnit të Modës, do të sjellin kreacionet e tyre në dizajnin e veshjeve, të cilat janë punuar nën përkujdesjen e mësimdhënësve Flutura Dedinja e Krenare Rugova.

Dita e dytë e festivalit, do të fokusohet gjithashtu edhe në fushën e arkitekturës, në kuadër të së cilës do të mbahet Konferenca Shkencore e Arteve dhe Arkitekturës “Love and Hate”, e ku me punimet e veta do të parqiten studiues nga Kosova, Shqipëria, Maqedona e Veriut, Italia e Sllovenia.

Gjatë tre ditëve të festivalit, një pjesë të rëndësisë së veçantë do ta ketë Seksioni i Filmit, që organizohet nga Fakulteti i Komunikimit Masiv, drejtimi Produksion, e ku në këtë vit me projektet e tyre filmike paraqiten shkolla të filmit dhe pjesëmarrës nga ShBA, Brazili, Turqia, Italia, Sllovenia, Mali i Zi dhe Kosova.

Një pjesë të rëndësishme të Festivalit, sivjet e zënë edhe punëtoritë (workshop), ku studentët do të ndjekin trajnime e punëtori, si: Punëtoria e Vitrazhit – një mjeshtëri artistike në qelq, pastaj punëtori për arkitekturë: “Studim Urb-Arkitektonik i pjesshëm i kampusit të AAB”, “Fisnikërimi/revitalizimi i hapësirave publike në qytetin e Prishtinës”,

“Studim Urban, Arkitektonik, Vizual-Estetik alternativ”, “Dizajnimi i një shtëpie / ville” dhe

“Fisnikërimi/revitalizimi i hapësirave publike në qytetin e Prishtinës”.

Në seksionin e filmit, studentët do të ndjekin punëtorinë “Si të arrihen kooproduksionet në film”, i cili do të udhëhiqet nga producentja kroate, Tea Korolia.

Veçanti tjetër e edicionit të dytë të PAAF 2019 do të jetë edhe Kolonia Artistike, ku studentë të arteve vizuele nga Kolegji AAB, Universiteti i Prishtinës, por edhe nga universitete nga Maqedonia e Veriut e Shqipëria, për dy ditë radhë do të punojnë në ambientetet e Kolegjit AAB për të shkëmbyer përvojat e tyre dhe për të krijuar vepra që do të mbeten gjatë në Galeritë e Kolegjit AAB.

PAAF 2019 do të jetë më ndryshe, andaj ftohen të gjithë të interesuarit të vijnë dhe të na vizitojnë. Për detaje mund të na përcillni edhe në faqen e festivalit: https://paaf.aab-edu.net/KultPlus.com

Përfundon edicioni i parë i festivalit “Prishtina Arts and Architecture Festival”

Posted on by Kult Plus

Alberina Haxhijaj

Të premten në kuadër të “Prishtina Arts and Architecture Festival” është bërë ndarja e shpërblimeve për kategoritë të cilat kanë qenë në gara, ndërsa mbrëmë është bërë mbyllja e festivalit, shkruan KultPlus.

Hapja e festivalit është bërë me sfilatën e kreacioneve nga studentët e Fakultetit të dizajnit dhe modës, të mentoruar nga kreatore e njëkohësisht edhe profesoreshat në Universitetin AAB, Krenare Rugova dhe Albulena Borovci. Ndërsa gjatë dy netëve të para të festivalit janë shfaqur edhe 14-të filma pjesëmarrës. Në kuadër të festivalit është organizuar edhe konferencë e arkitekturës dhe po ashtu është mbajtur edhe një koncert i muzikës akuzmatike, kompozitore Donika Rudi.

Kurse festivali është përmbyllur mbrëmë, ku janë paraqitur veshjet autoktone të Kosovës, shoqëruar nga prezantimi-tradita e përgatitjes së ushqimit tradicional dhe degostimit. E po ashtu edhe me vizita të organizuara në Muzeun e Kosovës dhe në Zonën historike të Prishtinës.

Koordinatori i Festivalit, Zija Rexhepi, theksoi se ky festival edhe në edicionet e ardhshme do të vazhdojë që në qendër të tij të ketë studentët.

“Rëndësia e këtij festivali qëndron të fakti se ky është festivali i parë mbase edhe në rajon që i përket studentëve dhe pasqyron pikërisht punën e studentëve. Realizimi i tij ka qenë i vështirë mirëpo që në fillim kemi arritur që të tejkalojmë kufijtë lokalë dhe të kemi punime të studentëve edhe nga vendet e tjera si nga Slloveni, Bosnja dhe Hercegovina, Shqipëria, Maqedonia. Ndërsa shpresojmë që në edicion e ardhshëm do të kemi pjesëmarrje edhe më të madhe të studentëve pasi që komentet që kemi marrë për këtë edicion janë mjaft pozitiv”, tha ai për KultPlus.

Në kuadër të këtij festivali të premten është bërë edhe ndarja e çmimeve për kategorinë e filmit ku çmimi kryesor u ndanë për tre filma. “Për ty atdhe”, i studentit Fitim Rrustemi, “Një ditë dimri në Blinajë”, nga studenti Valon Demiçi si dhe “Cistocs”, nga Neven Smarozic.

Më mirënjohje u shpërblyen edhe pjesëmarrësit në konferencën e arkitekturës e cila u organizua në kuadër të festivalit. Ndërsa çmimin për kategorinë brendingu më i mirë, e fitoi Çlirimi Vokshi. Në kategorinë diploma më e mirë në dizajn të interierit fitoi Arbenita Mehmeti ndërsa diploma më e mirë në kategorinë e arkitekturës i takoi Selman Sejdiut.

Tematika e festivalit për këtë vit ka qenë “Tingulli i vendit” ndërsa vitin tjetër tema do të jetë “Dashuria dhe urrejtja”.

Dekanja e Degës së Komunikimit Masiv në Kolegjin AAB, Burbuqe Berisha, e cila ka qenë një nga seleksionueset e filmave që u shfaqën në kuadër të festivalit, e sheh këtë festival si një mundësi të mirë për të nxitur prodhimin e filmave nga ana e studentëve. Diçka e cila sipas saj do i testojë edhe njohurit që ata i mbledhin gjatë studimeve.

“Kemi kontaktuar me shkolla të ndryshme dhe kemi zgjedhur filma kryesisht nga rajoni. Diçka që e kemi njohur si kinematografi prandaj edhe qasja ndaj tyre dhe thirrja ka qenë më e lehtë. Mendoj që kemi pasur një përzgjedhje shumë të mirë dhe ajo që është edhe më e mirë është fakti se studentët kanë pasur prurje të mira. Në Kosovë kemi mundësi përmes festivaleve që të shfaqim filma madje në një kohë ka qenë një lloj “Festivalo manie” sa i përket shfaqjes mirëpo të ne është problem prodhimi. Prandaj kënaqësia më e madhe është kur ka çfarë të prodhohet dhe kur ka se çfarë të shfaqet. Duke u bazuar në këtë ky festival është një promovim shumë i mirë për punën e studentëve por edhe për krijim e kontakteve me kolegë përmes filmit”, u shpreh ajo për KultPlus.

Pas edicionit të parë të Festivalit Ndërkombëtar të Teatrit, ky është festivali i dytë që po organizohet nga Universitetit AAB. Edicioni i parë i festivali “Prishtina Arts and Architecture Festival” – PAAF 2018 këtë vit është mbajtur nga 3-5 maj./ KutlPlus.com