Edicionin e 27-të të Panairit të Librit që po zhvillohet në Tiranë, kryeministri Edi Rama e ka cilësuar si një organizim vlerash dhe promovimi të leximit.
Kryeministri ndau përmes rrjeteve sociale, pamje nga panairi, duke shkruar “Atmosferë e bukur në Panairin e Librit. Kënaqësi të shohësh kaq shumë interes në këtë organizim vlerash dhe promovimi të leximit”.
Në pamjet e publikuar nga Kryeministri Rama, vërehen fëmijë e të rritur të cilët kanë një interes të shtuar në drejtim të librit dhe botimeve më të fundit që ekspozohen në panairin e Librit, “Tirana 2024”
Edicioni i 27-të i panairit “Tirana 2024”, nisi dje, si një prej ngjarjeve më të mëdha të librit në Shqipëri. Motoja e këtij viti është “Të lexosh do të thotë: të jetosh, të zbulosh, të rritesh”.
Panairi ka mbështetjen e Shoqatës së Botuesve dhe Qendrës Kombëtare të Librit dhe Leximit. Në të marrin pjesë 90 botues, jo vetëm nga Shqipëria por edhe nga treva të tjera shqipfolëse. Në këtë panair, përveç titujve të rinj për lexuesit, do të vijnë dhe takime me autorë dhe përkthyes të ndryshëm./atsh/KultPlus.com
Kryetarja e Kuvendit, Elisa Spiropali dhe kryetari i Kuvendit të Maqedonisë së Veriut, Afrim Gashi vizitua sot Panairin e 27-të të Librit në Tiranë.
Në një postim në rrjetet sociale, Spiropali tha se ngjarja e rëndësishme kulturore e letrare si panairi ndodh në prag të Ditës së Alfabetit.
Panairi i 27-të i Librit “Tirana 2024”, ngjarja më e shënuar për kulturën dhe letërsinë shqiptare u hap sot në Pallatin e Kongreseve në Tiranë.
Janë gjithsej 90 botues pjesëmarrës në panair, një pjesë e tyre edhe Kosova, Maqedonia e Veriut dhe Mali i Zi.
Gashi ndodhet për një vizitë zyrtare në Tiranë me ftesë të kryeparlamentares Spiropali. Gjatë takimit mes tyre Spiropali e vuri theksin te bashkëpunimi dypalësh në fushën e integrimit evropian dhe krijimi i mekanizmave të përbashkët për shkëmbimin e informacionit e përvojave, të cilat do të rrisin efikasitetin e reformave./atsh/KultPlus.com
Panairi i Librit: Tirana 2024, do të mbahet nga 13 deri më 17 Nëntor, në Pallatin e Kongreseve nga ora 09:00 deri më 20:00.
Synimi i këtij Panairi është t’i ofrojë akoma më tepër tituj dhe mundësi leximi publikut shqiptar por edhe të mundësinë që të vijë në kontakt me krijuesit e librave nëpërmes aktiviteteve të ndryshme.
Në eventin më të madh të librit në shqip, janë edhe Botimet e shtëpisë botuese ‘Akropoli i Ri’ që do ofrohen për publikun. Stenda e ‘Akropoli i Ri’ do të jetë në Katin 2, në Pallatin e Kongreseve.
Komuna e Tuzit ka organizuar panairin e pestë të librit, një ngjarje kulturore e rëndësishme që tërheq vëmendjen e shtëpive botuese dhe dashamirësve të librit.
Ky panair synon të promovojë letërsinë, autorët dhe botimet e reja, duke krijuar një platformë për të lidhur lexuesit me krijimet më të fundit nga shtëpitë botuese të ndryshme.
Në këtë panair, morën pjesë shtëpi botuese nga Shqipëria, Kosova, Mali i Zi, Maqedonia e Veriut, duke ofruar libra në fusha të ndryshme si historia, filozofia dhe arti. Kjo ngjarje ndihmon gjithashtu në nxitjen e bashkëpunimit kulturor mes vendeve të rajonit dhe përhapjen e vlerave të përbashkëta kulturore përmes librave.
Në Panairin e Librit,Tuz 2024, janë të pranishme edhe botimet e Akademisë të Shkencave të Shqipërisë./atsh/KultPlus.com
U hap dje edicioni i 23-të i Panairit të Librit në Ulqin, një ngjarje e rëndësishme kulturore që mbahet çdo vit në qytetin bregdetar.
Në ceremoninë e hapjes ishin të pranishëm kryetari i Komunës së Ulqinit, Genci Nimanbegu, ministrja e Kulturës dhe Mediave e Malit të Zi, Tamara Vujoviq, Ministri për të Drejtat e Njeriut dhe të Pakicave, Fatmir Gjeka, drejtoresha e Qendrës Kombëtare të Librit dhe Leximit, Alda Bardhyli, drejtoresha e Institutit të Librit dhe Promocionit, Irena Toçi.
Në këtë panair ku janë paraqitur rreth 50 botues nga Mali i Zi, Shqipëria, Kosova, Serbia, Maqedonia e Veriut, Bosnja Hercegovina etj, do të ketë shumë aktivitete, takime me krijues të njohur, ndarje çmimesh etj. me qëllim promovimin e letërsisë dhe kulturës, si dhe nxitjen e leximit dhe shkëmbimit kulturor ndërmjet shkrimtarëve, botuesve dhe lexuesve.
“Ulqini është qyteti me tradita të pasura e kultura të ndryshme etnike e fetare, qyteti ku jetojnë në harmoni disa etni; shqiptarët, malazezët, serbët, boshnjakët e romët. Ndaj, rikthimi në Ulqin, në këtë ngjarje madhore për kulturën shqiptare, e cila prej vitesh është kthyer në një hapësirë të rëndësishme komunikimi për botuesit, autorët, lexuesit shqiptarë është gjithnjë një ndjesi e bukur”, thuhet nga QKLL./atsh/KultPlus.com
Me moton “Përgjigjja është libri” erdhi këtë vit edicioni i 24-t i Panairit të Librit, organizuar nga Shoqata e Botuesve të Kosovës, në bashkëpunim me Ministrinë e Kulturës, Rinisë dhe Sportit, Komunën e Prishtinës dhe Pallatin i Rinisë.
Ceremonia e hapjes u mbajt sot më 5 qershor në orën 12:00. Në këtë edicion i ftuar special i Panairit ishte shkrimtari francez Éric Faye, fitues i Çmimit të Madh për roman të Akademisë Franceze dhe i Çmimit Deux-Margots.
Duke u shprehur falënderues ndaj shtëpive botuese që kanë sjellur në gjuhën shqipe librat e tij, ‘Buzuku’ dhe ‘Skanderbeg books’, Faye tregoi edhe për lidhjen që ai ka me Kosovën.
“Dua të them që deri tani kam qenë vetëm një herë në Prishtinë, shumë kohë më parë, në vitin 1977 dhe atëherë e shihja botën me sytë e një fëmije, nuk mbaj mend shumë nga ajo periudhë ku bënte vapë e madhe në kryeqytetin tuaj por që nga ajo datë e kam percjellur aktualitetin e Kosovës sepse shumë gjatë e kam ushtruar edhe profesionin e gazetarit. Datat e marsit dhe prillit të viteve 81’ e 99’ për mua janë të shënuara në kujtesën time si një ecje e vështirë dhe e dhimbshme deri në Pavarësi.”
Faye poashtu tregoi që përmes dy shkrimtarëve tanë, Kadare e Qosja ishte njohur më për së afërmi me Kosovën. Duke përmendur këta dy autorë ai potencoi që letërsia ka një rëndësi tejet të madhe në relacionet mes shkrimtarëve dhe lexuesve dhe së falë letërsisë ai sot mund t’i takoj lexuesit e librave të tij në gjuhën shqipe. Shkrimtari francez uroi për fund edhe anëtarësimin e Kosovës në institucionet evropiane.
Kryetari i Shoqatës së Botuesve të Kosovës, Edon Zeneli falënderoi bashkëpunëtorët, lexuesit, shtëpitë botuese dhe MKRS.
“Duke vizituar panairin e duke blerë libra ju kontribuoni për një shoqëri më të hapur, më të shëndetshme e më të arrirë”.
Të ftuar për fjalë rasti ishin edhe Hajrulla Çeku, Arbërie Nagavci dhe drejtoresha për Kulturë në Komunën e Prishtinës, Sibel Halimi.
“Ne duhet që duke filluar nga klasa e parë e deri tek studimet të lexojmë libra që na ndërtojnë mendimin kritik dhe e zhvillojnë frymëzimin dhe imagjinatën. Panairi i librit është më shumë së sa një vendtakim për shkrimtarët dhe lexuesit, është një simbol i përpjekjeve tona të përbashkëta për të ndërtuar një shoqëri më të hapur, më të ditur dhe më të drejtë”, tha ndër të tjera Halimi.
Në Panair marrin pjesë rreth 100 botues nga Kosova, Shqipëria, Maqedonia e Veriut dhe Diaspora.
Numri i titujve të rinj – rreth 2000. Numri i titujve të viteve të fundit – rreth 6000.
Përvjetorët që shënohen në Panairin e 24-t të librit janë:
– 300-vjetori i lindjes së Jul Varibobës
– 100-vjetori i lindjes së At Zef Pllumit
– 100-vjetori i lindjes së Jup Kastratit
– 100-vjetori i vdekjes së Franz Kafkas
Panairin pritet ta vizitojnë rreth 40000 vizitorë: studentë, nxënës të shkollave të mesme dhe fillore të Kosovës, qytetarë dhe personalitete të shquara nga jeta akademike, letrare, politike e intelektuale e Kosovës.
Panairi do të jetë i hapur për vizitorë çdo ditë nga 9:00-21:00. Panairi do të mbyllet më 9 qershor në orën 19:00./express/KultPlus.com
Ditën e sotme, duke filluar nga ora 12:00, do të hapet Panairi i 24-t i librit “Prishtina 2024”.
Ministria e Kulturës, Rinisë dhe Sportit ka treguar se panairi do të vjen me moton “Përgjigjja është libri” dhe është organizuar nga Shoqata e Botuesve të Kosovës, me ndihmën dhe bashkëpunimin e vyer nga Ministria e Kulturës, Rinisë dhe Sportit, Komuna e Prishtinës dhe Pallati i Rinisë.
Duke filluar nga sot, panairi do të jetë i hapur për vizitorë çdo ditë nga ora 9:00 deri në 21:00, ndërsa më datën 9 qershor do të mbyllet në ora 19:00.
Në panair do të marrin pjesë rreth 100 botues nga Kosova, Shqipëria, Maqedonia e Veriut dhe Diaspora, numri i titujve të rinj do të jetë rreth 2000, kurse numri i titujve të fundit rreth 6000.
Poashtu do të jenë mbi 40 aktivitete, promovime dhe autorë të pranishëm, ku spikasin i ftuari i nderit shkrimtari francez Éric Faye, fitues i Çmimit të Madh për roman të Akademisë Franceze dhe i Çmimit Deux-Margots
Panairin pritet ta vizitojnë rreth 40000 vizitorë: studentë, nxënës të shkollave të mesme dhe fillore të Kosovës, qytetarë dhe personalitete të shquara nga jeta akademike, letrare, politike e intelektuale e Kosovës. Ky panair përkon edhe me përvjetorë të rëndësishëm që do të shënohen me aktivitete, përkujtime e debate./KultPlus.com
Ministria e Kulturës, Rinisë dhe Sportit ka njoftuar se më 5 qershor, do të hapet Panairi i 24-t i librit “Prishtina 2024”, me moton “Përgjigjja është libri”.
“Me moton “Përgjigjja është libri” vjen edicioni i 24-t i Panairit të Librit, organizuar nga Shoqata e Botuesve të Kosovës, me ndihmën dhe bashkëpunimin e vyer nga Ministria e Kulturës, Rinisë dhe Sportit, Komuna e Prishtinës dhe Pallati i Rinisë”, thuhet në njoftim.
Ceremonia e hapjes do të bëhet të mërkurën në ora 12:00 dhe do të jetë i hapur për vizitorë çdo ditë nga ora 9:00 deri në 21:00, deri më datën 9 qershor në ora 19:00.
Në panair do të marrin pjesë rreth 100 botues nga Kosova, Shqipëria, Maqedonia e Veriut dhe Diaspora, numri i titujve të rinj do të jetë rreth 2000, kurse numri i titujve të fundit rreth 6000.
Përvjetorët që shënohen në Panairin e 24-t të librit janë:
– 100-vjetori i lindjes së At Zef Pllumit
– 100-vjetori i vdekjes së Franz Kafkas
Në panair do të jenë mbi 40 aktivitete, promovime dhe autorë të pranishëm, ku spikasin i ftuari i nderit shkrimtari francez Éric Faye, fitues i Çmimit të Madh për roman të Akademisë Franceze dhe i Çmimit Deux-Margots
– Botimi dhe promovimi i vëllimit testament të Rexhep Qosjes, po ashtu i ftuar i nderit
Panairin pritet ta vizitojnë rreth 40000 vizitorë: studentë, nxënës të shkollave të mesme dhe fillore të Kosovës, qytetarë dhe personalitete të shquara nga jeta akademike, letrare, politike e intelektuale e Kosovës. Ky panair përkon edhe me përvjetorë të rëndësishëm që do të shënohen me aktivitete, përkujtime e debate./KultPlus.com
Dje ka hapë dyert edicioni i tretë i Panairit të Librit “Kamza Lexon”, në Kamzë të Shqipërisë, panair që ka sjellë tituj nga shtëpi të ndryshme botuese, shkruan KultPlus.
Në këtë edicion janë realizuar edhe takime me tema të ndryshme, ku mes tjerash është diskutuar edhe për rolin e medieve në letërsi, panel që ka mbledhë drejtues të medieve që japin kontribut në mbështetje të letërsisë dhe artit në përgjithësi.
Paneli që u udhëhoq nga Liridon Mulaj, kishte në përbërje: Ardianë Pajaziti nga KultPlus, Bujar Hudhri nga ExLebris, Anna Latannzi dhe Albert Vataj, të dy poashtu nga fusha e medies.
Në këtë panel u vu në pah domosdoshmëria e mbështetjes së medieve për letërsinë, sikurse që u vlerësua roli i medieve që tashmë veç mbështesin artin dhe kulturën: KultPlus që është me seli në Prishtinë dhe ExLibris me seli në Tiranë.
Bujar Hudhri si drejtues i ExLibris ka thënë mes të tjerash se promovimi i librit në një medium të shtypur sikurse është ExLibris, është me rëndësi të madhe, ku sipas tij një rëndësi të madhe ka edhe ballina e kësaj gazete, sepse ballina është edhe një matës i cilësisë.
Kurse drejtoresha e KultPlus, Ardianë Pajaziti ka treguar para të pranishmëve për rolin e KultPlus me një shtrirje gjjthëkombëtare, ku përpos qe mbështetet libri, ajo ka thënë se promovim dhe mbështetje gjen edhe fusha e teatrit, filmit, trashëgimisë…
Përpos rolit të gazetës, Pajaziti ka folur para të pranishmëve edhe për dy shtyllat e tjera të KultPlus: “Ta zbardhi ftyrën” dhe “KultStrofa”, projekte këto që tashmë po hyjnë në vitin e shtatë dhe që e para sjell artistët më të suksesshëm shqiptarë nga shtetet e jashtme, kurse e dyta ka karakter garues të poezisë në nivel mbarëkombetar.
Liridon Mulaj rolin e Ardianë Pajazitit e ka krahasuar me luftën e Don Kishotit, por që në këtë rast Don Kishot, sipas tij është një grua.
Anan Latannzi ka folur për rëndësinë e promovimit të letërsisë shqipe në gjuhën italiane, gjë që e bën nëpërmjet punës së saj në Itali. Përderisa Albert Vataj ka thënë se secilit t’i jepet mundësia dhe hapësira, e pastaj lexuesi të vlerësojë se nëse është apo jo pjesë e letërsisë.
Kamza Lexon në këtë edicion që ka përfshirë shumë panele e shumë diskutime është mbyllë sot me prezantimin e librit “Girl of Monday”, libër që ka përmbledhë disa poetë shqiptarë./ KultPlus.com
Antologjia e poezisë shqipe, e hartuar nga Dr. Luan Topçiu dhe Dr. Renata Topçiu-Melonashi, e përkthyer në rumanisht ka fituar çmimin e panairit të librit “LIBREX 2024, në qytetin e Jashit në Rumani.
Vlerësimi i kësaj vepre të rëndësishme është dhe një nder dhe vlerësim jo vetëm për hartuesit dhe përkthyesit e saj, por për kulturën shqiptare dhe poezinë shqipe në të gjitha kohërat dhe në të gjitha trevat
Panairi i Librit LIBREX 2024 u zhvillua në kryeqendrën kulturore të Rumanisë, në qytetin e Jashit, nga datat 10-14 prill 204. Këtë vit ishte edicioni i 29 i këtij panairi me pjesëmarrjen e 76 Shtëpive Botuese nga gjithë Rumania. Në ceremoninë e mbylljes së aktivitetit u krye ceremonia e ndarjes së Çmimeve nga Kryetari i Lidhjes së Shkrimtarëve të Rumanisë, filiali Jash, zoti Cassian Marian Spiridon dhe Kryetari i Bashkisë së qytetit të Jashit, Mihai Chirica.
Juria akordoi 15 çmime të rëndësishme sipas gjinive letrare.
Këtë vit Shtëpia Botuese e ALAR-it mori çmimin Laurențiu Ulici për antologji letrare për botimin e Antologjisë së poezisë shqipe nga zanafilla deri në ditët e sotme me koordinuar Dr. Luan Topçiu dhe Dr. Renata Topçiu – Melonashi. Antologjia e poezisë shqipe (700 faqe) dhe me 63 autorë shqiptarë që nga zanafilla dhe deri më sot është botuar nga Shtëpia Botuese e ALAR, Asdreni, me një studim hyrës nga kritiku dhe shkrimtari Marius Chelaru, kryeredaktor i revistës “Poezia”, organ i Lidhjes së Shkrimtarëve të Rumanisë.
Në këtë mënyrë, juria LIBREX shpërbleu vlerën e botimit të antologjisë së poezisë shqipe në rumanisht. Vlerësimi i kësaj vepre të rëndësishme është dhe një nder dhe vlerësim jo vetëm për hartuesit dhe përkthyesit e saj, por për kulturën shqiptare dhe poezinë shqipe në të gjitha kohërat dhe në të gjitha trevat.
Anëtarë të jurisë ishin Eugen Munteanu, Prof. Dr. në Fakultetin e Letërsisë të Universitetit “Alexandru Ioan Cuza” Jash, Ioan Holban, shkrimtar, drejtor i Teatrit “Luceafărul” Jash, Petru Nicu Gavrilută, profesor PhD në Fakultetin e Filozofisë dhe Shkencave Politike të Universitetit “Alexandru Ioan Cuza” në Jash, Cassian Maria Spiridon, shkrimtar, kryetar i Lidhjes së Shkrimtarëve të Rumanisë, filiali Jash, Florin Cîntic, historian dhe shkrimtar, Valeriu Stancu, shkrimtar dhe Dragoş Pătrașcu, artist figurativ dhe profesor universitetit në UNAGE Jash./tema/KultPlus.com
Dje në Ditën Ndërkombëtare të Librit, në ambientet e jashtme të Akademisë së Shkencave të Shqipërisë u hap Panairi i 3-të mbarëkombëtar i librit akademik dhe shkencor, i cili do të vijojë deri më 25 prill.
Ky panair zhvillohet si nismë e përbashkët e Akademisë së Shkencave të Shqipërisë dhe Akademisë së Shkencave e Arteve të Kosovës dhe synon t’i bëjë të njohura arritjet më cilësore në botimet akademike, shkencore dhe universitare dhe promovimin e figurës dhe personalitetit të shkencëtarit e studiuesit shqiptar në hapësirën mbarëkombëtare.
Sipas Qendrës Kombëtare e Librit dhe Leximit, ky panair është më shumë se një ekspozim librash dhe aktivitetesh, pasi është një mesazh mbi nevojën për t’u mbështetur te një shoqëri që mendon dhe lexon, te një shoqëri ku intelektualët, shkencëtarët, studiuesit dhe gjuhëtarët nderohen dhe orientojnë zhvillimet e një vendi.
Nisur edhe nga dy edicionet e mëparshme (i pari në Tiranë në vitin 2022 dhe i dyti në Prishtinë në vitin 2023), ky panair shërben për ta nxjerrë më në pah botën akademike, shkencore shqiptare përmes botimeve, që në pjesën më të madhe të rasteve nuk kanë pasur vëmendjen e duhur publike.
Sipas Qendrës Kombëtare të Librit dhe Leximit, libri shkencor e ka më të vështirë rrugën për te publiku dhe pse mendimi i tij është aq i rëndësishëm për zhvillimin shoqëror.
Tri ditët e panairit, përpos ekspozimit të librit në stenda të dedikuara, përmes promovimeve të arritjeve në nivel akademik; përmes paraqitjes së botimeve më të reja të institucioneve të lidhura drejtpërdrejt me kërkimin shkencor, të kërkuesve; studiuesve, trupave pedagogjikë, botuesve, panairi do të shërbejë si hapësirë dhe mundësi diskutimi mbi tema të rëndësishme të dijeve shqiptare, kërkimit shkencor dhe të drejtës së autorit./tema/KultPlus.com
Drejtoria e Përgjithshme e Arkivave (DPA) paraqiti 5 botimet më të reja studimore, që trajtojnë tematika historike dhe të lëmit të arkivistikës.
Për vitin e dytë radhazi, në çeljen e siparit të Panairit Kombëtar të Librit, DPA-ja rikthehet pas një periudhe të gjatë mungese në funksionin e botueses, duke sjellë për libradashësit studime mbi periudha dhe figura të rëndësishme në historinë e vendit, si edhe mbi metodologjinë arkivore në hapësirën shqiptare.
Të pranishëm në këtë aktivitet ishin kreu i DPA-së, prof. asoc. dr. Ardit Bido, akademikë, anëtarë të Këshillit të Lartë të Arkivave (KLA), përfaqësues nga Arkivi Qendror Shtetëror (AQSH), të Akademisë së Shkencave të Shqipërisë (ASH), si dhe arkivistë e studiues të fushave përkatëse.
Në fjalën e tij përshëndetëse, Bido, i cili moderoi edhe diskutimin në tryezën e rrumbullakët, nënvizoi se këto botime japin një kontribut në historiografinë shqiptare, duke vlerësuar në veçanti bashkëpunimin e DPA-së me Agjencinë Shtetërore të Arkivave të Kosovës (ASHAK) në përgatitjen e revistës arkivore të përvitshme.
“Ne financojmë botime që janë në suazën e përmbledhjeve të dokumenteve arkivore, të monografive, të revistës së Arkivave Shqiptare, si edhe të kolanës së botimeve të udhërrëfyesve, që shpresojmë ta hapim vitin tjetër. Janë katër botime të rëndësishme sa i përket historiografisë shqiptare. Unë do flas shkurtimisht për botimin e pestë, për revistën Arkivat Shqiptare. Kjo revistë është e përbashkët e Drejtorisë së Përgjithshme të Arkivave dhe e Agjencisë Shtetërore të Arkivave të Kosovës (ASHAK), ku përmblidhen kumtesa dhe studime të fushës së arkivistikës. Është vendimarrje e vështirë sepse janë shumë të paktë ata që kryejnë një hulumtim mbi arkivistikën. Kjo sinergji që kemi me ASHAK-un dhe me Institutin e Trashëgimisë Kulturore dhe Shpirtërore të Shqiptarëve në Shkup, na ka mundësuar që të kemi të rejat e fundit të shkencës së arkivistikës kudo në rajon, në mënyrë që jo vetëm të avancojmë, por edhe të unifikojmë standartet. Revista është produkt i Konferencave Mbarëkombëtare të Arkivistikës. Kemi qenë në Tiranë, në Prishtinë, në Shkup, në Sarandë, në Tuz, në Boletin dhe në Manastir, me arkivistë nga Shqipëria, nga Kosova, nga Maqedonia e Veriut dhe nga Mali i Zi. Revista ‘Arkivat Shqiptare’ ka krijuar traditën e vet, është viti i 59-të i botimit të saj”, u shpreh Bido.
Katër prej botimeve të publikuara rishtas vijnë në trajtën e punimeve monografike ose të përmbledhjeve të dokumenteve rreth personaliteteve dhe zhvillimeve historike. Mes tyre, bën pjesë edhe një udhëzues rreth tematikës së gjerë të punës kërkimore në arkiv. Në diskutimin e hapur të mbajtur në Sallën Ovale të Pallatit të Kongreseve, dr. Endrit Musaj, Myrteza Sharra, Vera Lushaj dhe bashkëstudiuesit Armando Boçe dhe Arbër Bilbili, referuan përkatësisht mbi botimet e titulluara:
“Manual tekniko-praktik për dokumentet dhe arkivat në Shqipëri”, “Musine Kokalari në dokumentet arkivore (Përmbledhje dokumentesh)”, “Dokumente të reja arkivore për Bajram Currin” dhe “Dokumente mbi marrëdhëniet e PPSH me partitë dhe lëvizjet marksiste-leniniste jashtë kampit socialist (Përmbledhje dokumentesh)”.
“Është libri më i plotë për arkivistikën bazuar në përvojën kombëtare dhe ndërkombëtare. Jep informacione, metoda teorike dhe praktike për arkivistët, për krijuesit dhe për përdoruesit e dokumentave”, tha dr. Musaj mbi botimin e përgatitur nga dr. Ivan Loli.
Studiuesi Bilbili shpjegoi se “Dokumente mbi marrëdhëniet e PPSH me partitë dhe lëvizjet marksiste-leniniste jashtë kampit socialist (Përmbledhje dokumentesh)”, përqendrohet në raportet politike të Shqipërisë komuniste me dy shtete europiane. “Ky vëllim përfshin dokumente mbi raportet reciproke me grupet, me veprimtarët dhe në ndonjë rast edhe me individë marksistë-leninistë nga Spanja dhe Italia të Partisë së Punës së Shqipërisë. Ashtu si në vëllimin e parë, janë përzgjedhur dy shtete europiane, kjo për vetë rëndësinë dhe vështirësinë që paraqisnin marrëdhëniet me grupet politike në këtë kontinent”, shpjegoi studiuesi Biblili.
Për të shtatin vit, bashkëpunimi mes DPA-së dhe Agjencisë Shtetërore të Arkivave të Kosovës (ASHAK) kurorëzohet me botimin e numrit të radhës së revistës “Arkivat Shqiptare”. Ky publikim, që është i vetmi në fushën e arkivave në mbarë trojet shqiptare, përmbledh punimet periodike të studiuesve dhe të arkivistëve në mbarë trojet shqiptare, të prezantuara në Konferencat Mbarëkombëtare të Arkivistikës. Kjo revistë i mundëson çdo arkivisti apo të interesuari që të thellohet në disiplinën e arkivistikës, si shkencë të mëvetësishme nga historia apo nga shkencat e tjera të përafërta.
Botimet e prezantuara së fundmi, vijnë në përgjigje të thirrjes periodike të DPA-së adresuar çdo të interesuari të bashkësisë shkencore, për të përgatitur studime mbi një larmi temash në rrafshe të ndryshme të veprimtarisë publike. Këto botime, së bashku me të tjera publikime të mëparshme të DPA-së me tematika të rëndësishme historike, do të gjenden në stendën e Akademisë së Shkencave të Shqipërisë (ASH), deri në mbyllje të panarit, ditën e diel, më datë 19 nëntor./atsh/KultPlus.com
Sot, ka filluar panairi më i madh i librit në botë, në Frankfurt të Gjermanisë, me mesazhin “Fjalët bashkojnë botën”, në të cilin marrin pjesë 7.500 ekspozues me mbi 285.000 profesionistë të fushës nga e gjithë bota, ku tradicionalisht i pranishëm është edhe shteti i Kosovës.
Edicioni i 75-të i Panairit të Librit në Frankfurt fokusohet në agresionin e Rusisë në Ukrainë dhe Hamasit në Izrael, duke artikuluar problemin e dhunës dhe agresioneve aktuale.
Nën moton “Koshere e fjalëve”, e ftuar e nderit e këtij viti, Sllovenia, do të prezantojë zhvillimet dhe prirjet në jetën e saj letrare dhe kulturore dhe, veçanërisht, industrinë e saj aktuale letrare dhe krijuese. Përmes letërsisë, do ta zbulojmë këtë vend që nuk përfaqësohet vetëm me bukuritë natyrore të vlefshme për t’u vizituar.
Muaji tetor shquhet si muaji më i rëndësishëm për ngjarjet kulturore të fushës së librit me dy kryengjarjet: Çmimi Nobel dhe Panairi i Librit në Frankfurt.
Kosova është e pranishme në sallën 4.1 stenda F96, sallë e botuesve dhe shteteve ndërkombëtare si: Ukraina, shtetet skandinave, bota arabe, shtetet baltike, Belgjika, shtetet e Evropës Qendrore, Holanda, etj. Janë botimet më të reja të botuesve kryesorë të Kosovës, si: “Buzuku”, “Koha”, “Faik Konica”, “Pema”, “Artini”, “Skanderbeg Books”, “Dukagjini”, “Albas”, “Meshari”, “Magjia e Librit”, “Noa”, e të tjerë, si dhe institucioneve si Akademia e Shkencave dhe e Arteve e Kosovës, Instituti Albanologjik, Instituti i Historisë dhe Universiteti i Prishtinës.
Në fundjavë, panairi hapet edhe për qytetarët dhe vizitorët, me ç’rast mbahen promovime me autorë dhe orë letrare në stendën e Kosovës, që është edhe pikëtakim i qindra kosovarëve që jetojnë në Gjermani. Një rast i jashtëzakonshëm ky për të gjithë diasporën që jeton në Gjermani, që të njoftohet me prurjet nga letërsia dhe kultura shqiptare, duke mbajtur gjallë lidhjen e trashëgiminë kulturore.
Të shtunën, në aktivitetin gjithëditor, shënohen përvjetorët e Ernest Koliqit, Petro Markos, Jakov Xoxës e Teki Dërvishit. Promovohen autorët Ag Apolloni, Rita Petro, Loreta Schillok, Sadije Aliti, Mechthild Henneke dhe Jetlira Avdijaj, prezentë në Panairin e Librit në Frankfurt edhe fizikisht, me ç’rast takohen me lexuesit dhe të interesuarit, koordinuar nga Seveme Fetiqi e Bekim Gashi.
Të dielen, stenda e Kosovës do të shërbejë si pikëtakim për Lidhjen e Shkrimtarëve Shqiptarë në Frankfurt dhe takimet mes autorëve e lexuesve./KultPlus.com
Sot u bë ceremonia e hapjes së edicionit të 23-të të Panairit të Librit në Prishtinë, shkruan KultPlus.
Panairi i Librit në Prishtinë është një panair i përvitshëm kushtuar librit ku mblidhen të gjitha shtëpitë botuese dhe dashamirët e librit, jo vetëm nga Kosova por edhe nga viset përreth.
Kryeministri i Kosovës Albin Kurti, Kryetari i Kuvendit Glauk Konjufca, Ministri i Kulturës Hajrullah Çeku, kryetari i Prishtinës Përparim Rama dhe shumë fytyra të tjera njohura morën pjesë në këtë panair.
Mysafir nderi në këtë Panair të Librit, ishte vetë i madhi Ismail Kadare, së bashku me bashkëshorten e tij.
Moderatori Rron Gjinovci, e ftoi parinë shtetërore për një fjalim rasti. Por para se t’i thërrasë ata, ai e ftoi shkrimtarin shqiptar me famë mbarëbotërore, gjeniun e shkrimit, ikonen e letërsisë, Ismail Kadaren.
“Çkado që mundohem për ta përshkruar këtë njeri, rrezikoj të përfundoj duke thënë diçka klishe, andaj zonja dhe zotërinj ta mirëpresim shkrimtarin Ismail Kadare”, tha Gjinovci I lodhur pak, por shumë i mirëpritur nga të gjithë të ftuarit. Me një fjalim të shkurtë por të dashur, Kadare citoi:
“Jam shumë i gëzuar që ndodhem midis jush në këtë ditë kaq të bukur dhe frymëzuese. Ne shqiptarët për fat të keq disa herë jemi ndier të neglizhuar, por pastaj jemi kujtuar, jemi rikthyer dhe unë shpresoj se do rikthehemi më mirë, më fort, më bukur. Ju falënderoj për këtë pritje kaq të gëzueshme”, shtoi Kadare.
Edhe Kryeministri i Kosovës, Albin Kurti, doli për një fjalim rasti.
“Panairi është si një festival i librit. Lexuesi mund të vijë çdo ditë. Panairin unë vetë e ndjej si një qytezë por edhe si një shoqëri të hapur me një mendje të hapur”, tha kryeministri Kurti.
Kurti vlerësoi lart gjithashtu kontributin e Ismail Kadare dhe veprat e tij për kombin tonë shqiptar.
“Unë për veten time për çdo vit e lexoj “Përbindëshin”, “Kronikë në gur”, “Aksidentin” dhe “Pallatin e ëndërrave”. Romanet e tij të bëjnë ta braktisësh profesionin që ke. Prandaj është e domosdoshme për mua ta mbaj këtë ritëm njëherë në vit dhe jo më shpesh”, tha mes tjerash Kurti.
Ndërsa kryetari i Kuvendit të Kosovës, Glauk Konjufca teksa ka falënderuar Ismail Kadarenë që letërsinë shqipe e bëri të përbotshme, tha se, shkrimtari është ngritur në simbolin më të lartë e kuptimplotë për popullin tonë. Kryetari i komunës së Prishtinës, Përparim Rama u shpreh me këtë rast se kryeqyteti është shndërruar në vatër që shpalos magjinë e fjalës në letër. Rama tha se është e qartë se inkurajimi i të rinjve për të lexuar libra duhet të përshtatet me epokën digjitale, por gjithmonë duke e ruajtur thelbin e të shkruarit.
Në edicionin e 23-të të panairit të librit “Prishtina 2023”, marrin pjesë rreth 100 botues nga Kosova, Shqipëria, Maqedonia e Veriut dhe diaspora. Shoqata e Botuesve të Kosovës ka bërë të ditur se janë rreth dy mijë tituj të rinj. Në kuadër të panairit do të shënohen edhe disa përvjetorë si: 120-vjetori i lindjes së Ernest Koliqit, 110-vjetori i lindjes së Petro Markos, dhe 100-vjetori i lindjes së Jakov Xoxës.
Panairin pritet ta vizitojnë rreth 40000 vizitorë, studentë, nxënës të shkollave të mesme dhe fillore të Kosovës, qytetarë dhe personalitete të shquara nga jeta akademike, letrare, politike e intelektuale.
Panairi do të qëndrojë i hapur deri pasditen e 11 qershorit./KultPlus.com
Me moton “Libri triumfon”, me 6 qershor hapet edicioni i 23-të i Panairit të Librit, i cili organizohet nga Shoqata e Botuesve të Kosovës ndërsa mbështetet edhe nga Ministria e Kulturës.
Këtë vit marrin pjesë rreth 100 botues nga Kosova, Shqipëria, Maqedonia e Veriut dhe Diaspora. Numri i titujve të rinj – rreth 2000. Numri i titujve të viteve të fundit – rreth 6000.
Panairi do të jetë i hapur për vizitorë çdo ditë nga 9:00-20:00. Panairi do të mbyllet më 11 qershor në orën 18:00. Do të jenë të pranishëm shkrimtarë ndërkombëtarë e kombëtarë, profesionistë të librit, botues, përkthyes e librarë./ KultPlus.com
Derisa shtandi i Kosovës në Panairin e Librit në Lajpcig po vijon të vizitohet, Kosova, sot, si pjesë e programit promovues, përfaqësohet nga autorët: Janet Reineck, Elizabeth Gowing, Robert Wilton dhe Ag Apolloni.
Si pjesë e Programit promovues të Bibliotekës Kombëtare të Kosovës në kuadër të programit letrar të Panairit të Lajpcigut “Leipzig liest”, në prani të autorëve, përkthyesve, botuesve e vizitorëve të panairit, Kosova u prezantua me autoren Janet Reineck dhe librin e saj “Një amerikane në Kosovë 1981-1997”.
Promovimi me temën: Kujtimet personale në Kosovë (një pasqyrë personale e përshtypjeve dhe përvojave të autores për jetën shqiptare në Kosovë), u drejtua nga Dr. Blertë Ismajli.
Aktivitetet e tjera promovuese të Kosovës në Panairin e Lajpcigut gjatë ditës së sotme janë:
“Leipzig liest” Elizabeth Gowing & Robert Wilton No Man’s Lands: eight extraordinary ëomen in Balkan history 29 prill 2023 14:00-15:00 Moderatore: Dr. Blertë Ismajli Vendi: Café Europa, Salla: 4, Shtandi: E303
BKK & TRADUKI Ag Apolloni Kësulëkuqja: përrallë për të rritur 29 prill 2023 16:00 – 16:30 Moderatore: Dr. Blertë Ismajli Vendi: TRADUKI Kafana – Salla 4, Shtandi D407
Ngjarjet promovuese të Kosovës në Panairin e Leipzigut po përcillen nga RTK./KultPlus.com
“Panairi i Librit është në të vërtetë një festë, një nga ato ngjarjet që është shkruar në kalendarin kulturor dhe shënjon një muaj të rëndësishëm si nëntori, që lidhet mbi të gjitha me Festat Kombëtare”, shkruan ministrja e Kulturës, Elva Margariti në rrjetet sociale.
Ministria e Kulturës, pavarësisht emergjencave që ka pasur këto viteve të fundit, ka gjetur gjithnjë mundësinë për të mbështetur Panairin e Librit, duke e konsideruar si një vlerë, si një tryezë e madhe debati, por edhe promovimi, takimesh mes shkrimtarëve, përkthyesve, botuesve me lexuesin.
Ndërkohë edhe Akademia e Shkencave të Shqipërisë është pjesëmarrëse në Panairin e Librit Tirana 2022, me disa botime të sajat dhe për të cilët është organizuar edhe nga një aktivitet promovues.
Një prej botimeve të ASHSH është dhe libri i Dhimitër Anagnostit “Artisti, bota, imazhi”, me bashkëautor prof. dr. Josif Papagjonin, të cilit ju bë promovimi sot, në sallën Black Box tek Universiteti i Arteve.
Një tjetër botim i akademisë është “Portreti” i Abaz Hados. Libri trajton portretin në 120 vjet histori të pikturës shqiptare, nga 1880 deri në vitin 2000. “Balada, nga oraliteti në letërsi” i Olimbi Velaj, trajton baladën si zhanër muzikor dhe letrar.
“Shqipëria përmes syve të shtegtarëve” me autore Lida Miraj dhe “Fjalor i Shqipes së Faik Konicës” me autore Kristina Jorgaqin, janë të tjerë tituj për të cilët është kujdesur ASHSH për botimin. /atsh /KultPlus.com
Është hapur në Tiranë edicioni i 25-të i Panairit të Librit. Këtë vit ky panair do të ketë si objekt kryesor prezantimin e botimeve më të mira të hedhura në qarkullim vitet e fundit.
Ceremonia e hapjes nisi në orën 11:00 në Hollin e Pallatit të Kongreseve, ku ishin të pranishëm botues, shkrimtarë, ministrja Kushi e Margariti, kryebashkiaku Veliaj si dhe një numër i madh vizitorësh.
Fjalën e hapjes e mbajti kryetari i Shoqatës së Botuesve Shqiptarë, Petrit Ymeri.
Në këtë panair janë gjithsej 97 stenda ku marrin pjesë 100 shtëpi botuese. Ashtu si vitin e kaluar, do të ketë një kënd dedikuar intervistave, i njohur si “Sofaja e librit”. Programi i “Sofasë” do të presë çdo ditë njerëz të librit, shkrimtarë, përkthyes, botues, ilustrues, redaktorë etj. Intervistat e tyre do të transmetohen online.
Një hapësirë e veçantë u është rezervuar edhe trevave shqipfolëse. Kosova vjen e përfaqësuar me tre stenda kryesore: me stendën e Institutit Albanologjik të Kosovës, me Shoqatën e Botuesve të Kosovës, si stendë më vete, dhe me “Dukagjinin”. Secila ka marrëveshje me shtëpi të ndryshme botuese në Kosovë.
Maqedonia e Veriut ka një stendë më vete. “Logos” është shtëpi botuese e Shkupit, por sjell edhe botimet shqipe nga Tetova. Mali i Zi përfaqësohet me një stendë tjetër që është ajo e Podgoricës, por vijnë edhe pak tituj të botuar në Tuz. Tuzi pritet të jetë i pranishëm me autobusë lexuesish që vijnë në mënyrë të organizuar dhe do të kenë edhe takime për librin shqip.
Në panair do të ketë edhe një shtëpi botuese italiane. Ajo është “Besa Muci”, e cila kryesisht ka në fokus botimin e letërsisë shqipe në italisht.
Që në hapje të panairit është vënë re një numër i madh vizitorësh të vegjël. Të tjera vizita të organizuara fëmijësh priten ditët në vazhdim, edhe nga trojet shqipfolëse përtej kufirit.
Panairi i Librit 2022 do të qëndrojë i hapur 4 ditët për vizitorët në Pallatin e Kongreseve. /atsh /KultPlus.com
Hap dyert sot panairi më i madh i librit në botë, në Frankfurt të Gjermanisë, me mesazhin “Fjalët bashkojnë botën”.
Janë mbi 7.500 ekspozues me mbi 285.000 profesionistë të fushës nga e gjithë bota që marrin pjesë në panair, ndër të cilët, tradicionalisht, i pranishëm është edhe shteti i Kosovës, organizuar e prezantuar nga Shoqata e Botuesve të Kosovës, me ndihmën e Ministrisë së Kulturës, Rinisë dhe Sportit.
Panairi i Librit këtë vit fokusohet në temën e përkthimit në shumë drejtime: në gjuhë të tjera, format e tjera të mediumeve dhe konteksteve – dhe nevojës për mirëkuptim dhe komunikim ndërkulturor.
Nën moton “Creatividad Desbordante”, e ftuar e nderit e këtij viti, Spanja, do të prezantojë zhvillimet dhe prirjet në jetën e saj letrare dhe kulturore dhe, veçanërisht, industrinë e saj aktuale letrare dhe krijuese.
Muaji tetor shquhet si muaji më i rëndësishëm për ngjarjet kulturore të fushës së librit me dy kryengjarjet: Çmimi Nobel dhe Panairi i Librit në Frankfurt. Duke filluar nga fituesi i Çmimit Nobel për Letërsi 2021, Abdulrazak Gurnah, me fituesen e Çmimit Goncourt Leila Slimani, e shkrimtarë të tjerë si Elvira Sastre, Donna Leon, Florian Illies, Florence Shekete, Melanie Raabe, etj., do të jenë të pranishëm në ambientet e panairit.
Kosova është e pranishme në sallën 4.0 stenda C99, sallë e botuesve dhe shteteve ndërkombëtare si: Ukraina, shtetet skandinave, bota arabe, shtetet baltike, Belgjika, shtetet e Evropës Qendrore, Holanda, etj.
Janë botimet më të reja të botuesve kryesorë të Kosovës, si: “Buzuku”, “Koha”, “Faik Konica”, “Pema”, “Artini”, “Dukagjini”, “Albas”, “Meshari”, “Magjia e Librit”, “Noa”, e të tjerë, si dhe institucioneve si Akademia e Shkencave dhe e Arteve e Kosovës, Instituti Albanologjik, Instituti i Historisë dhe Universiteti i Prishtinës.
Në fundjavë, panairi hapet edhe për qytetarët dhe vizitorët, me ç’rast mbahen promovime me autorë dhe orë letrare në stendën e Kosovës, që është edhe pikëtakim i qindra kosovarëve që jetojnë në Gjermani. Një rast i jashtëzakonshëm ky për të gjithë diasporën që të njoftohet me prurjet nga letërsia dhe kultura shqiptare, duke mbajtur gjallë lidhjen e trashëgiminë kulturore. / KultPlus.com
Ky vit shënjoi 21-vjetorin e Panairit të Librit në Ulqin, një event i rëndësishëm i kulturës së rajonit, që ka bërë bashkë librin shqip nga të gjitha hapësirat shqipfolëse, duke pasur një kontribut në përsosjen e gjuhës shqipe përmes leximit.
Një numër i madh shtëpish botuese, institucione kulturore dhe përfaqësues të letrave nga Mali i Zi, Kosova, Maqedonia e Veriut, Shqipëria, etj., kanë sjellë në këtë panair botimet më të fundit.
Promovime librash, diskutime, konferenca kanë shoqëruar ditët e këtij panairi.
Mbrëmjen e djeshme u bë ndarja e çmimeve të panairit të 21-të të Librit “Ulqini 2022”. Çmimi “Dega e Ullirit” shkoi për shkrimtarin Xhahid Bushati për përmbledhjen me vjersha “Trumcak bredharak” (Mediaprint). Çmimi “Servantes” shkoi për Erion Gjatollin, për përkthimin nga italishtja të romanit “Ethet” të Jonathan Bazzi (Toena). Çmimi “Liburnia” shkoi për shkrimtarin Ridvan Dibra, për romanin “Gruaja që deshe” (Onufri). Çmimi “Olcinium” shkoi për Fatmir Toçin, autor i “Arbëreshët midis realitetit dhe mitit” (Toena).
Çmimet iu dorëzuan fituesve nga personalitete të kulturës së shkruar, që ishin të pranishëm: nga drejtoresha e Qendrës Kombëtare të Librit dhe Leximit Alda Bardhyli, shkrimtari Odise Kote, botuesi Bujar Hudhri, akademik Neritan Ceka.
Juria që mori në analizë këtë herë prurjet e shtëpive botuese pjesëmarrëse në panair, përbëhej nga personalitete të fushës: Arta Marku Qëndro (kryetare), Dorian Koçi (anëtar), Ismet Kallaba (anëtar).
Nesër do të jetë dita e fundit e edicionit të 21-të të panairit të Ulqinit./atsh/ KultPlus.com
Pas panairit të librit që u mbajt në Prishtinë, muaj më parë, një tjetër qytet në Kosovë që do të krijoj të njëjtën atmosferë është edhe Prizreni.
Në Prizren Panairi i Librit do të filloj me 27 korrik për të mbetur i hapur deri më 31 korrik, për 5 ditë me radhë.
Pjesëmarrës të Panarit do të jenë edhe Ditar Kabashi e Osman Goranci për të hapur diskutimet me publikun e lexuesit. Mbrëmjet e debateve në Panair të Librit në Prizren janë tashmë pjesë e programit të çdo edicioni.
Ky i sivjetmi është edicioni i 14-të më radhë i Panairit. Në mbrëmjet e Panairit buzë ‘Lumbardhit’ do të diskutohet me shkrimtarë e emra të letrave shqipe.
Panairit i Librit në Prizren mbështetet nga Instituti për Kulturë dhe Kërkime Sociale dhe nga Komuna e Prizrenit./Express/ KultPlus.com
Shoqata e Botuesve të Kosovës ka bërë të ditur se tashmë ka përfunduar Panairi i Librit “Prishtina 2022”, përcjell KultPlus.
Më poshtë gjeni statusin e plotë:
Të dashur lexues,
Të nderuar bashkëpunëtorë, të nderuara media,
Edicionit të shumëpritur të Panairit të Librit, të 22-tit me radhë, i erdhi fundi shumë shpejt. Koha e gjatë që mezi pritëm ta kishim panairin na bëri ta duam aq shumë, ta presim aq shumë, saqë duket sikur ende pa filluar mirë përfundoi. Sa mirë që u rikthye, sa mirë që u ripamë, sa mirë që libri u bë kryefjalë kudo ku flitet shqip për këto gjashtë ditë, por sa keq që u krye kaq shpejt.
Më 2 qershor 2020 planifikohej Panairi i 22-të i Prishtinës. Meqë pandemia, 2 vjet nuk u mbajt. Më 2022 u rikthye ajo që na u mor më 2020. Dhe tanimë, falë rrethanave të jashtme, çdo edicion i panairit do të jetë i njëjtë në numër me vitet e shekullit XXI. Simbolikë pas simbolike…
Më 7 qershor 2022 u hap Panairi i 22-të i Librit “Prishtina 2022”, me ç’rast folën organizatori dhe kryetari i SHBK-së, Edon Zeneli, ministri i Kulturës, Hajrulla Çeku, nënkryetari i Komunës së Prishtinës, Alban Zogaj, shkrimtari i ftuar nderi i Panairit Claude Arnaud bashkë me shkrimtaren, publicisten dhe gazetaren Klara Buda, shkrimtarja dhe drejtorja e QKL-së, Alda Bardhyli, dhe shkrimtari nga Kosova Agim Vinca.
Në panair qenë të pranishëm mbi 100 botues nga Kosova, Shqipëria, Maqedonia e Veriut e më gjerë. U prezantuan mbi 20.000 botime të viteve të fundit e mbi 3.000 botime të reja të botuara nga panairi i kaluar te ky i sivjetmi. U promovuan mbi 30 vepra e autorë, u shënuan përvjetorë të rëndësishëm dhe qenë të pranishëm personalitete kryesore të jetës publike në Kosovë e Shqipëri. Qenë të pranishëm qindra shkrimtarë/e dhe njerëz të fushës. Të gjitha mediat vendore e regjionale e përcollën panairin e librit dhe kjo i dha jehonë të jashtëzakonshme punës së palodhshme të njerëzve të urtë e dijeshumë.
Të dashur lexues,
JU FALEMINDERIT që na dhatë pafund urime, mbështetje, dorështrëngime e përqafime! Faleminderit që ishit pjesë e festës së librit me ne!
Mirë u takofshim vitin tjetër, më 6 qershor 2023, në Panairin e 23-të të Librit “Prishtina 2023”.
Me jurinë në përbërje të Majlinda Ramës, kryetare e jurisë; Reshat Sahitajt, anëtar; dhe Dan Ibrahimit, anëtar, janë ndarë çmimet e panairit kështu si vijon më poshtë:
1. Çmimi për letërsinë për fëmijë, zhanri tregime: DRITË RUHANI, me librin “Në koma”, botuar nga SAS
2. Çmimi për letërsinë për fëmijë, zhanri roman: FATMIR GJESTILA, me librin “Briri i artë shndërrues”, botuar nga EMATHIA
3. Çmimi për vepër kapitale: ALDA BARDHYLI, me librin “Kohë për rrëfim, dialog me Ismail Kadarenë”, botuar nga ONUFRI
4. Çmimi për përkthimin më të mirë, zhanri roman: DIANA ÇULI, me përkthimin “Diaboliket – Barbery d’Aurevilly”, botuar nga PEGI
5. Çmimi për përkthimin më të mirë, zhanri poezi: MIRELA PAPUÇIU, me përkthimin “Voltaikët – Laurent Grison”, botuar nga BUZUKU
6. Çmimi për veprën më të mirë poetike: ALKETA GASHI FAZLIU, me librin “Pikë”, botuar nga ARTINI
7. Çmimi për veprën më të mirë, roman: NAMIK DOKLE, me librin “Kolerë në kohë dashurie”, botuar nga TOENA
8. Çmimi për veprën më të mirë eseistike/kritike: BEHAR GJOKA, me librin “Hejza e Pashkut”, botuar nga BUZUKU
9. Çmimi Autor i vitit i huaj, për: CLAUDE ARNAUD, dhe
10. Çmimi Autor i vitit i letësisë shqipe: SHKUMBIN GASHI. / KultPlus.com
