Etiketë: Peshkopi

Ansambli arkitektonik i një zone të Peshkopisë shpallet pasuri kulturore dhe historike

Posted on by Kult Plus

Qeveria shqiptare miratoi vendimin për shpalljen e “Ansamblit Arkitektonik Urban” të një zone të qytetit të Peshkopisë, si pasuri kulturore e historike, së bashku me zonën mbrojtëse dhe planin për ruajtjen, mbrojtjen dhe administrimin e tij, në bashkëpunim me Bashkinë Dibër.

Lajmi u dha nga ministri i Ekonomisë, Kulturës dhe Inovacionit, Blendi Gonxhja, i cili vlerëson se, ky vendim i hap rrugë rijetësimit të zonës, duke e kthyer atë në një qendër tërheqëse për turizmin kulturor dhe zhvillimin e qëndrueshëm.

“Një investim për kujtesën dhe të ardhmen e qytetit, që synon të rikthejë shkëlqimin e tij historik, të përmirësojë infrastrukturën dhe të ruajë vlerat qytetare dibrane për brezat e ardhshëm”, u shpreh ministri Gonxhja./atsh/KultPlus.com

Koncert i Forcave të Armatosura në qytetin e Peshkopisë

Posted on by Kult Plus

Një shfaqje unike me muzikë të përzgjedhur ka gjallëruar qytetin e Peshkopisë, duke krijuar një atmosferë festive dhe emocionuese.

Shfaqja erdhi në kuadër të 80-vjetorit të çlirimit, e organizuar nga Big Band, Orkerstra Simfonike e Forcave të Armatosura si dhe Ministria e Ekonomisë, Kulturës dhe Inovacionit, duke ofruar një përvojë të re për publikun.

Ky aktivitet kombinonte tingujt e muzikës tradicionale të Big Band-it me ritmet moderne të DJ-ve, duke sjellë një set të veçantë të këngëve patriotike të remiksuara. Aktiviteti erdhi si një bashkim kulturash duke nderuar historinë dhe traditat e vendit në një mënyrë inovative.

Koncerti u pëlqye nga të pranishmit. Peshkopia ishte një ndër ndalesat e turneut që do të përfshijë 6 qytete. Më herët Orkestra Simfonike e Forcave të Armatosura u mirëprit edhe në Elbasan e Tiranë.

Sot Muzeu i Forcave të Armatosura do të organizojë një veprimtari të veçantë, në sheshin para bashkisë në Berat, në kuadër të 80-vjetorit të çlirimit. Një pjesë e ekspozitës me arte-fakte nga Lufta e Dytë Botërore do të zhvendoset për të sjellë më afër publikun dhe për të ndihmuar në përkujtimin e ngjarjeve historike. Aktiviteti do të shoqërohet nga interpretimi i Big Band./atsh/KultPlus.com