Etiketë: poezi nga Lulzim Tafa

Poezia në bursë ose ëndrra me vargje dhe dollarë

Posted on by Kult Plus

Poezi nga Lulzim Tafa

Sot pati sërish lëvizje
Në bursë

Pasuria ime nuk është
Sa e Bezos, Bill Gates, Zuckerberg
Është sa e të gjithëve bashkë.

Se sot pati sërish lëvizje 
Në bursë

Nafta ra
Ari ra
Interneti
Kriptovalutat

Të gjitha ranë
Vetëm shpirti u ngrit në bursë
Me produktet e tij
Fjalën, dashurinë

Dhimbjes iu ngrit vlera
I shkoi lart
Aq lart sa i pasur
Është vetëm ai që ka dhimbje
Që dashuron
Që fluturon./ KultPlus.com

Sa shpejt më harroi nana

Posted on by Kult Plus

Poezi nga Lulzim Tafa

Nana sot e ka datëlindjen
U bë katër vjeçe.
Sa ngadalë u rritkan të vdekurit.

Ajo tash atje është fëmijë
Prindërit e mbajnë për dore
Edhe andej si dikur
Këndej.

Vrapon pas fluturave
Mbledh lule
Sa shumë i donte Nana Lulet
Edhe emrin ma la Lul
Gati sa ma la Lule.

Nana i ka katër vjet
E ende nuk flet
Sa herë shkoj n’vorre.

Sa ran ish
mos me u përgjigj Nana
kur e thërret.
Mundohem me e mësu
Edhe njëherë me fol prej fillimi
Si ajo mua dikur.

Është llastu
Dhe gjithë ditën rri
në prehen të Nanës s’vet

Jam idhnu me ty Nanë
Dije.

Qysh pse?
Kur të vij atje të kallxoj
Ncncnc
Sa shpejt m’harroi / KultPlus.com