Në Shkodër u prezantua sot studimi i fizibilitetit të hekurudhës Durrës- Prishtinë.
Ministrja e Infrastrukturës dhe Energjetikës, Belinda Balluku, njëherësh zëvendëskryeministre, gjatë fjalës së saj bëri të ditur se projekti për portin e ri të Durrësit ka hyrë në një fazë vendimtare.
Sipas Ballukut tashmë është përmbyllur faza e parë e projektit, faza e aplikimit të ofertave dhe vlerësimit teknik të tyre. “Jemi gati për të nisur fazën e dytë dhe më përfundimin e kësaj faze do të fillojë ndërtimi i portit të ri të Durrësit”, tha ajo..
Balluku theksoi se porti i ri do të ndërlidhet me dy porte të thata, në Prishtinë dhe Shkup, përmes linjave hekurudhore. Balluku tha njëra linjë nis nga Vora dhe kalon përmes Shkodrës drejt Kosovës, ndërsa linja tjetër, e lidhur me aksin Rrogozhinë-Pogradec, për të kaluar në Maqedoninë e Veriut.
“Porti i Durrësit nuk do t’i shërbejë vetëm Shqipërisë, por porti i Durrësit është dizenjuar për t’i shërbyer të dy vendeve Kosovës dhe Shqipërisë, por edhe Maqedonisë së Veriut, duke qenë se porti i Durrësit ndërlidhet me dy porte të thata, atë të Prishtinës dhe atë të Shkupit, që të dyja këto porte të thata të ndërlidhura me linjën hekurudhore, njëra me linjën hekurudhore që nis nga Vora dhe vjen deri në pikëlidhje, pra në Shkodër, për të vazhduar më pas në Prishtinë dhe tjetra që fillon nga Durrësi, e kemi lidhur kontratën dhe marrëveshjen për financimin e aksit të parë i cili shkon deri në Rrogozhinë dhe do të vijojmë me aksin Rrogozhinë-Pogradec, për të bërë daljen në urën e Bushtricës dhe për të kaluar në Maqedoninë e Veriut”, tha Balluku.
Balluku tha se ky zhvillim është pjesë e një vizioni më të gjerë për përgatitjen e vendit drejt integrimit në Bashkimin Evropian.
“Të gjitha këto janë zhvillime shumë të rëndësishme. Janë zhvillime të rëndësishme infrastrukturore dhe politike për trevat shqiptare. Janë zhvillime të cilat përgatisin vendin tonë, Shqipërinë, por pa dyshim edhe Kosovën për një kapitull të ri. Për një faqe të re të historisë tonë, e cila tashmë përmbyll të gjithë pjesën e tranzicionit dhe jemi gati për të kapërcyer atë prag shumë të pritur, pragun e Bashkimit Evropian. Kur tashmë ndodhemi të ulur në tryezën e negociatave, kur të gjitha sinjalet të ardhura nga komisionerët europianë, veçanërisht nga komisionerja Marta Kos tregojnë se ndoshta vetëm në dy vitet e ardhshme ne do të arrijmë që të përmbyllim gjithë fazën e negociatave, sigurisht Shqipëria, por dhe Kosova duhet të jenë gati për këtë fazë me të gjithë komponentët dhe një nga komponentët më të rëndësishëm, siç është energjia, është infrastruktura.
“Ne mund të përmbushim të gjitha detyrat e shtëpisë përsa i përket reformave ligjore, apo reformave administrative, por në rast se ne nuk do të kemi të njëjtat parametra në infrastrukturë apo në energji, nuk do të ishim gati për Europën. Kështu që me të vërtetë unë e shikoj gjithmonë atë tabelën e fundit të projekteve, ku ekspertët me shumë të drejtë vendosin afatet dhe afatet i kanë të mirëstudjuara dhe zakonisht i lënë dhe njëçik më të gjera nga ç’duhet, por i dashur përfaqësues i konsorciumit, ne këtu në Shqipëri kemi filluar ti mbarojmë punët para afatit”, tha Balluku.
Balluku shtoi se nuk kemi kohë për të humbur duke shtuar se nuk do të duhen 10 vite për të ndërtuar hekurudhën Durrës-Prishtinë.
“Pasi kemi humbur shumë kohë 50 vite të gjata dhe më pas 33 vite tranzicion dhe nuk kemi më kohë për të humbur. Ne kemi gjithçka. Ne kemi diellin, kemi detin, kemi malet, kemi fushat, kemi bujqësinë, turizmin. E vetmja gjë që mungon në këtë vend është koha. Nuk kemi më kohë për të humbur, ndaj unë jam e sigurtë që nuk do të na duhen 10 vite për ta ndërtuar atë hekurudhë, sepse edhe për tunelin e Llogarasë ishte parashikuar që duhet të ishte 48 muaj, por u mbarua vetëm në 22 muaj. Edhe për aeroportin e Vlorës janë parashikuar 48 muaj, por përfundon këtë verë. Kështu që ne duhet të rendim, sigurisht përmes projekteve të sigurta, sigurisht duke respektuar të gjitha rregullat dhe masat e ndërtimit të këtyre kryeveprave të infrastrukturës, por ama duke rendur”, tha ministrja.
Ministrja tha se Shqipëria ka të gjithë vëmendjen e tregut financiar, për sa i përket financimeve të ndryshme apo për sa i përket dhe investitorëve të huaj.
“Kështu që unë jam e sigurtë që në fund të mandatit të katërt qeveria Rama padyshim do jetë në gjendje që të flasë për disa përqind ecuri të projektit dhe jo për nisjen e tij”, u shpreh Balluku. /atsh/ KultPlus.com
