Baleti Kombëtar i Kosovës do të paraqitet në Lisbonë të Portugalisë, me shfaqjen “Aeon” më 27 korrik.
Premierën e shfaqjes ‘Aeon’ Baleti Kombëtar e pati në Prishtinë gjatë muajit qershor duke shënuar premierën e katërt gjatë këtij viti, që këtë herë erdh si bashkëpunim me koreografin Daniel Cardoso.
Shfaqja jepet më 27 korrik, në CINETEATRO D. JOÃO V, në ora 19:00, në Lisbonë, Portugali.
Ministria e Kulturës, Rinisë dhe Sportit ka njoftuar se Filharmonia e Kosovës është duke e vazhduar programin mbresëlënës të klasikëve në Portugali, përcjell KultPlus.
Sipas MKRS-së, publiku portugez përjetoi bukurinë dhe madhështinë e muzikës klasike në ndërtesën më të vjetër fetare në Portugali, Katedralja e qytetit verior Braga.
“Me repertorin e saj të gjerë, Filharmonia e Kosovës, për herë të dytë gjatë javës kulturore, përmes tingujve shqip arriti të krijoj një përvojë vërtet të paharrueshme për të pranishmit”, thuhet në njoftim. / KultPlus.com
Kori Siparantum do të përfaqësoj Kosovën në Festivalin Internacional të Koreve “Lisbon Sings” – Portugali, në mesin e 22 koreve nga 17 shtete të botës, aktivitet ky që është pjesë e “WORLD’S BEST CHOIRS Rankings of the Top 1000 Choirs and Ensembles”, ku tashmë Kori Siparantum është pjesë e saj. Festivali do të mbahet nga data 09-14 Nëntor.
“Jemi tejet të lumtur që do të përfaqësojmë vendin tonë në këtë festival tepër të rëndësishëm të muzikës korale. Përpos sfidave dhe sakrificave që ballafaqohemi, falë punës, përkushtimit maksimal dhe dashurisë për vendin tonë, ne po ia dalim suksesshëm. Kemi punuar gjatë dhe me shumë përkushtim për këtë program, shpresoj që do të kthehemi me suksesin e radhës. Ne tashmë e kemi dëshmuar këtë”, thotë Memli Kelmendi, dirigjent i korit.
Kori Siparantum garon në dy kategori: Competition in Category A1 – Choirs of Mixed Voices – Difficulty Level I (Kategoria më e vështirë e festivalit) dhe Competition in Category S – Sacred Choral Music a cappella.
Përpos këtyre dy aktiviteteve Kori do të jetë pjesë e koncertit Friendship Concert e cila do të mbahet në sallën e njohur Universidade de Lisboa – Aula Magna (Universidade de Lisboa – Aula Magna Universiteti i Lisbonës (Universidade de Lisboa) është universiteti më i madh dhe më prestigjioz në Portugali dhe është një nga universitetet kryesore të Evropës).
Rikujtojmë që Kori Siparantum është shpërblyer me pikët maksimale në Festivalin Internacional të Koreve “The Golden Lime of Tuhelj” Kroaci, duke i sjellur vendit tonë “Medalje të Artë”; Fitues i kategorisë “ Musica Contemporanea” në garën më të madhe të koreve në botë, WORLD CHOIR GAMES (2021) dhe Diplomë të Artë; Fitues i dy vendeve të para (Kategoria F dhe Kategoria G) në Europian Festival for Young People, Belgjikë. Kori Siparantum ka qenë pjesë e skenave të mëdha në mesin e tyre, salla më e njohur “Berlin Philharmonie” që ndryshe konsiderohet ëndërr e çdo artisti. / KultPlus.com
Portugalia sot ka hapur urën më të gjatë të këmbësorëve në botë. Një urë kjo e cila ka marrë plot tre vite për t’u ndërtuar, përcjell KultPlus.
Ura quhet “516 Arouca” dhe është e gjatë 516 metra, ndërkaq është e vendosur në qytetin e Aroucas, e cila lidh ujëvarën e Aguieriras dhe Paiva Gorges.
Ajo është bërë e njohur pasi do të krijojë mundësi për zhvillimin e sporteve ekstreme. Rruga nëpër urë mund t’ia marr secilit afërsisht 10 minuta, për ta kaluar.
Ura është e stilit Tibetin, ndërkohë që ajo është e ndërtuar në atë mënyrë, që mbahet nga kabllo të hekurit dhe dy kulla në formë të V-së. Ajo ndodhet afro 515 metra në lartësi prej tokës. / KultPlus.com
E vendosur rrëzë malit Fafe në Portugalinë Veriore, Casa do Penedo mund të radhitet ndër objektet më të çuditshme në botë
Kjo shtëpi, e ndërtuar në vitin 1974, perfekt përshtatet në peizazhin malor falë idesë së pazakonshme të ndërtuesit që shtëpinë ta vendosë në katër shkëmbinj masivë, transmeton KultPlus.
Shtëpia është quajtur me emrin e përshtatshëm “Shtëpia nga guri” (Casa do Penedo), ajo në mënyrë të përsosur bashkon pjesët e natyrës me njeriun.
Muret janë ndërtuar nga graniti i Portugalisë, i cili përdoret tradicionalisht si material ndërtimor për objekte vendore.
Shtëpia dykatëshe e cila sikur ka dalë nga filmi vizatimor për familjen Flinston, ka tërhequr vëmendjen e banorëve vendës dhe turistëve nga momenti kur është ndërtuar.
Turistëve tani u është ofruar mundësia që vetëm ta hedhin një shikim në shtëpinë e pazakonshme të gurit, por edhe të njihen me historinë dhe arkitekturën e shtëpisë, të drekojnë në natyrë dhe të kënaqen me pamjen në fushën e helikave për prodhimin e energjisë elektrike.
Mes 450 mësuesve më inovativë në botë në fushën e Informatikës dhe Teknologjisë, tri mësuese shqiptare janë shpërblyer për demonstrim risish në fushat e tyre përkatëse, si dhe gjatë seminareve konkurruese që ndodhën gjatë “Science on Stage Europe”.
Ato janë Mirjeta Domi, koordinatore kombëtare e Science on Stage Albania, Majlinda Hasanaj, mësuese matematike-Tik në shkollën “Hasan Prishtina” në Tiranë dhe Arbana Hallva, mësuese në shkollën 9 vjeçare “Fadil Gurmani` në Elbasan.
Ky event botëror mbledh së bashku mësuesit novatore të shkencave nga e gjithë Europa për të shkëmbyer ide me kolegë nga më shumë se 30 vende në festivalin më të madh të Shkencës në qytetin Cascais, të Portugalisë.
Qëllimi kryesor i festivalit të shkencës është përmirësimi i mësimdhënies në mënyrë që të mundësojë që sa më shumë studentë të fitojnë aftësi të përshtatshme për të ardhmen dhe t’i inkurajojë ata të konsiderojnë një karrierë në shkencë, TIK ose inxhinieri.
Shqipëria mori pjesë për herë të parë në një festival shkence të tillë, të mbështetur nga Komisioni Europian.
Ekipi i mësueseve shqiptare pjesëmarrëse nga shkollat 9 vjeçare të Shqipërisë u vlerësuan edhe me çmim nga juria ndërkombëtare prej 17 vetash./koha.net/ KultPlus.com
DokuFest është një nga 38 festivalet e filmit mjedisor nga e gjithë bota që do të marrin pjesë në Forumin e Parë Ndërkombëtar të Festivaleve të Filmit Mjedisor, që do të mbahet në Seia, Portugali, nga 13 deri më 15 tetor.
Forumi, i organizuar nga CineEco 2018 dhe Green Film Network (GFN) anëtare e së cilës është edhe DokuFest, është pjesë e edicionit të 24-të të festivalit të filmit mjedisor në Portugali dhe mbështetet nga Qendra Portugeze e Turizmit.
Gjatë këtyre tri ditëve, festivalet do të diskutojnë çështje të përbashkëta, do të forcojnë lidhjet dhe do të promovojnë reflektimin mbi rëndësinë e platformave audiovizuale që nxisin ndryshime të qëndrueshme shoqërore.
Në këtë marrin pjesë 38 festivale mjedisore nga 28 shtete: Shqipëria, Argjentina, Austria, Brazili (3), Kanadaja, Kolumbia, Kroacia, Republika Çeke, Republika Dominikane, Franca (3), Gjermania (3) Japonia, Kosova, Malajzia, Meksika, Mali i Zi, Rumania, Rusia, Serbia, Koreja e Jugut, Spanja (2), Zvicra, Turqia, Shtetet e Bashkuara të Amerikës (3) dhe Portugalia.
Pjesëmarrësit ndërkombëtar nga këto shtete do të diskutojnë për çështjet mjedisore dhe të qëndrueshmërisë dhe do ti ndajnë eksperiancat e tyre në përdorimin e filmit, artit dhe komunikimit për ti adresuar këto. DokuFest do ta prezantoj programin GREEN të festivalit si dhe përdorimin e filmave mjedisor në programin vjetor përmes projekteve që nxisin kreativitetin dhe aktivizmin qytetar tek të rinjët.
Forumi i parë botëror i festivaleve të filmit mjedisor do të zhvillohet në Seia, Serra da Estrela, një rajon malor turistik i lidhur me turizmin e natyrës, promovimin e prodhimeve vendore dhe ngjarjet kulturore që theksojnë kulturat lokale./ KultPlus.com
