Është përmbyllur edicioni i 4-të i festivalit teatror, Prishtina International Theatre Festival, shkruan KultPlus.

Në këtë edicion të sivjetmë të PITF, garuan gjithsej 4 shfaqje, të cilat ishin trupa teatrale nga Bullgaria, Kroacia, Kosova dhe Maqedonia e Veriut.

Edicioni i 4-të i këtij Festivali nën vlerësimin e jurisë së medias dhe të studentëve, përzgjodhi fituesit e çmimeve për shfaqjen, aktorin/en, regjinë dhe rolin dytësor më të mirë.

Juria profesionale përbëhej nga aktorët Donat Qosja, Arbnesha Grabovci Nixha dhe Adam Haraga. Studentët dhe veprimtarët e teatrit prisnin me padurim kumtimin e fituesve, teksa fituesit e çmimeve dalëngadalë filluan të thuheshin.

Çmimi “Best plays student’s choice” shkoi për shfaqjen “Possible Words” nga Maqedonia e Veriut.

Nën vlerësimin e jurisë të përbërë nga gazetarët Lumira Kelmendi nga RTK, Sabri Musliu nga Korrespodenti dhe Erza Matoshi nga Fakte Plus shfaqja “Allo Allo” nga Kosova  fitoi çmimi “Best play media choice”.

Në anën tjetër nga po kjo shfaqje, Valmir Krasniqi arriti të fitoj çmimin “Best supporter actor”.

Çmimi “Best director” iu dha Ivan Leo Lemo, me shfaqjen “Vla-vla-Vlajland” nga Kroacia.

Çmimin “Shfaqja më e mirë” e morri shfaqja vendore “Allo Allo”.

Në anën tjetër, çmimin “Aktori në rolin më të mirë” e ndau drejtoresha artistike e Festivalit, Burbuqe Berisha për Ecija Ojdanić, me shfaqjen nga Kroacia “Vla-vla-Vlajland”.

Edicioni i 4-të i Prishtina International Theatre Festival u përkrah nga Ministria e Kulturës, Rinisë dhe Sportit si dhe Drejtoria Komunale e Prishtinës për Kulturë. / KultPlus.com

Shfaqja, e cila nxjerr në pah sfidat e një çifti në kohën moderne ka triumfuar në Festivalin Ndërkombëtar në Prishtinë. “Voliš li me?” (A më do?) nga Kroacia, me regji të Janez Vajevec, ka marrë Çmimin për shfaqjen më të mirë në “Prishtina International Theater Festival”, që organizohet nga kolegji ”AAB”.

Të shtunën mbrëma, kur edhe është mbajtur ceremonia e ndarjes së çmimeve në Teatrin që mban emrin e aktorit me nam Faruk Begolli, ka përfunduar edicioni i tretë i Festivalit Ndërkombëtar të Teatrit, shkruan sot “Koha Ditore”.

Për shfaqjen më të mirë të vlerësuar nga juria profesionale, Çmimin e ka ndarë aktorja Adriana Matoshi.

Regjisori i shfaqjes, Janez Vajevec, para publikut ka thënë se mund të flasë në shumë gjuhë, por më e mira është të flasë me gjuhën e emocioneve.

Çmimi për regjisorin më të mirë e ka fituar regjisori grek Angelopoulos Tasos për shfaqjen e tij “Moskov Selim”.

Drejtoresha artistike e Festivalit, regjisorja Burbuqe Berisha, ka ndarë Çmimin për aktorin më të mirë nga shfaqjet që kanë marrë pjesë në edicionin e sivjetmë. Ky Çmim i ka takuar aktorit nga Maqedonia, Tome Stanovski, për rolin e tij në shfaqjen “I’m Actor Human”.

Për rolin më të mirë dytësor është shpërblyer aktori i gjeneratës së re nga Kosova, Mikel Markaj. Ai është pjesë e kastës së aktorëve në shfaqjen “Shumë zhurmë për asgjë” me regji të Zana Hoxhës.

Pesë shfaqje ishin pjesë e garës së sivjetme të Festivalit, që kishte moton “Besim, dije, guxim”. “Shumë zhurmë për asgjë” nga Kosova nën regji të Zana Hoxhës, “Moskov Selim” nga Greqia e Angelopoulos Tasos, “I’m actor human” nga Maqedonia e Veriut e regjisores Tea Begovska, “Voliš li me” nga Kroacia e Janez Vajevec dhe “Truth or Dare” nga Bullgaria e Vasil Duev, ishin pesëshja e shfaqjeve garuese për çmimet e festivalit./ Koha Ditore / KultPlus.com

Edicioni i tretë i festivalit të vetëm ndërkombëtar të teatrove në Kosovë, tashmë ka hyrë në fazën finale të përgatitjeve.

Nga data 4-9 nëntor 2019, në dy skenat e Teatrit AAB “Faruk Begolli” në Kolegjin AAB, do të ngjiten shtatë trupa artistike në programin konkurrues, të cilat vijnë nga Kosova, Shqipëria, Maqedonia e Veriut, Greqia, Bullgaria e Kroacia.

Programit garues të këtij edicioni do t’i paraprijë shfaqja nikoqire, prodhim i Teatrit AAB, “Bretkosa”, në regji të Burbuqe Berishës, e cila do të jepet jashtë programit garues, në natën e 4 nëntorit.

Edicioni i tretë i PITF2019 vjen më i veçantë nga ana vizuale për shkak të brendingut. Hyjnesha në fron, që është simbol i këtij festivali ndërkombëtar, këtë vit vjen me një lule Irisi në kokë.

Sikur edhe në edicionet e mëhershme, ajo që e dallon PITF, përveç programit ndërkombëtar, është edhe programi përcjellës në mbrëmjet pas shfaqjeve, ku të gjithë pjesëmarrësit do të kenë mundësi të argëtohen nga bende e artistë të ndryshëm.

Festivali do të ketë dy lloj biletash: festival pass që do të jetë e vlefshme për të gjithë programin dhe biletat e veçanta për shfaqje. Studentët do të kenë prioritet pasi biletat do t’u ofrohen me çmime speciale, ndërsa po ashtu edhe transporti nga qyteti në kampusin e Kolegjit AAB do të jetë gratis për të gjithë vizitorët. / KultPlus.com

“If we cannot see the world, let the world speak of us” (“Nëse s’ mund ta shohim botën – bota le të flasë për ne”)!

Ky është mesazhi që Festivali i vetëm Ndërkombëtar i Teatrove “Prishtina International Theater Festival”, që organizohet nga Teatri AAB “Faruk Begolli”, synon të përcjellë përmes edicionit të tij të dytë që vjen nga datat 29 nëntor – 06 dhjetor 2018, në hapësirat e Kolegjit AAB.

Një nismë krejtësisht vetanake, me përkrahje tejet modeste të partnerëve të Teatrit AAB “Faruk Begolli”, në edicionin e tij të parë të mbajtur në tetor 2017, PITF solli në Kosovë aktorë e trupa artistike nga më të mirat, nga Irani, nga Bullgaria, Kroacia, Maqedonia, Shqipëria e Kosova.

Duke synuar që PITF të shndërrohet në brend të Kosovës, edicioni i dytë i këtij festivali mëton që të flitet për të kudo, prandaj “nëse ne nuk mund ta shohim botën – bota le të flasë për ne”.

Festivali PITF synon të na afrojë me botën, të promovojë vlerat tona dhe mbi të gjitha t’ i mundësojë publikut kosovar të njihet me rrjedhat bashkëkohore në lëminë e artit, në këtë kohë kur vazhdojmë të mbetemi të izoluar.

Në edicionin e dytë që nis nga e enjtja 29 nëntor 2018, në programin garues të PITF 2018 do të paraqiten 7 shfaqje teatrore që vijnë nga Italia, Bullgaria, Kroacia, Maqedonia, Shqipëria e Kosova.

Në natën e fundit të festivalit, më 06 dhjetor 2018, do të jepet premierë shfaqja “Bretkosa”, një prodhim i Teatrit AAB “Faruk Begolli”, në cilësinë e shfaqjes mysafire, jashtë programit garues.

Krahas programit garues sa zgjatë festivali, çdo natë të festivalit do të ketë edhe program off në ambientet e Kolegjit AAB, ku vizitorët, komuniteti artistik e studentët do të mund të argëtohen e të shoqërohen mes vete, nën atmosferën e krijuar nga bende e këngëtarë të përzgjedhur me shije.

Festivali “Prishtina International Theater Festival” është një mundësi e mirë për të parë dhe shijuar gjëra të bukura që ndodhin edhe në Kosovë.

Ju mund ta ndiqni Festivalin PITF 2018, në hapësirat e Kolegjit AAB në Prishtinë.

Biletat e festivalit tashmë janë në shitje në Kolegjin AAB, ndërsa së shpejti ato do të mund t’ i gjeni edhe në pikat më frekuentuese në Prishtinë. /KultPlus.com