Me yje ndërkombëtar si Marie Christine Barrault nga Franca, Pippo Delbono nga Italia, Fatemeh Motamed-Arya nga Irani, fituese e shumë cmimeve e shumë shumë artistë të njohur në botën teatrore po shënohet edicioni i III i festivalit PRIZREN FEST.
Festivali Ndërkombëtar i Teatrit në Ambient të Hapur – Prizren Fest edhe mbrëmë solli një laramani shfaqjesh duke filluar nga shfaqjet për fëmijë, ku po vazhdon TEATROSKnga Maqedonia e Veriut, me statujat e gjalla në sheshet e qytetit të Prizrenit e po i argëton qytetarët e në vecanti fëmijët.
Shfaqja e dytë për fëmijë ishte MBRETI BRETK nga Sllovenia, një histori për një princeshë që humbi topin e saj të artë dhe një bretk që e gjen topin në pellg dhe ia kthen atë Princeshës. Por në këmbim të topit të artë, Bretku kërkon dashurinë e Princeshës. Historia trajton kërkesën gjithmonë të pranishme për kompromis dhe mesazhi i saj u kushtohet të gjitha princeshave të reja.
Në PRIZREN FEST shfaqja FËMIJA nga Irani solli historinë e përjetimeve të njerëzve të pambrojtur emigrantë, të vuajtur nga lufta dhe varfëria, një problem me të cilin bota ka qenë duke luftuar që prej kohësh. Kjo temë u paraqit përmes paraqitjes së grave dhe fëmijëve të vuajtur nga Lindja e Mesme dhe Afrika, të cilët strehohen në Amerikë dhe Evropë. Një shfaqje . që synon të përcjellë mesazhin e paqes dhe barazisë së të gjithë njerëzve në tokë.
Shfaqja LULE SAJZA nga Shqipëria është një teatër dokumentar i cili na solli historitë e të vërtetat e përjetimeve të kampit të Tepelenës. Një shfaqje që flet për dhimbjet e vërteta shqiptare. Faktet tronditëse dhe historitë e dhimbshme, rrënqethëse, në kufi me të pabesueshmen hedhin dritë mbi të shkuarën tonë të errët dhe na ftojnë që përmes vuajtjeve të së shkuarës të njohim më mirë veten, tjetrin dhe të ardhmen tonë. Emocionet u rritën edhe më shumë kur në fund të shfaqjes doli edhe vet Simon Mirakaj i cili kishte përjetuar vet tmerrin e kampit të Tepelenës, solli përjetimet personalem emocione reale të buruara nga shpirti./KultPlus.com
