“Këngë te Kopshti” në Lumbardh

Posted on 23 Korrik, 201823 Korrik, 2018 by Kult Plus

Fondacioni Lumbardhi prezanton koncertin “Këngë te Kopshti”, që do të mbahet të shtunën me 28 Korrik 2018 në orën 21:00 në Lumbardh.

Në këtë koncert do të performojnë tre bende fenomenale: SYTË, Oborri dhe BLLA BLLA BLLA…

Biletat kushtojnë 2 EURO para koncertit dhe mund të blehen në Prizren te Lumbardhi kurse në Prishtinë në Dit’e’Nat. Biletat te dera do të kushtojne 4 EURO.

SYTË:

EP e parë e bendit tregon historinë e dy shpirtrave të lidhur së bashku nga yjet. Vokali i sinqertë lundron nëpër tingujt e ëmbla të sintit dhe gitarave bittersweet, të cilat e ngjyrosin bazamentin që e krijon basi dhe tupanat hip hop, për të përshkruar një dashuri që duket sikur është përzgjedhur nga një konstelacion.

OBORRI:

Oborri është një duo bend i formuar në vitin 2014 në Prishtinë, Kosovë, i përbërë nga Arbër Salihu dhe Tomor Kuci. Pasi që ishin aktivë për 8 vite në skenën e muzikës në Prishtinë , duoja nxorri albumin “Oborri” në 2017. Grupit i bashkohet kompositori Liburn Jupolli dhe bubnjari Vedat Hasani, kshtu që në performanca live grupi bëhet me 4 anëtarë .

BLLA BLLA BLLA…:

Blla Blla Blla… është një bend shumë i njohur nga Shkupi. Në 2000 bendi nxorri albumin e tyre të parë dhe shumë të suksesshëm “Blla Blla Blla”. Ata janë edhe autorë të albumeve “Over the Blakanshire Reform”, “Lamtumirë ” dhe “Brum per Medioker”.

Sponsor i programit veror janë Raiffeisen Bank dhe Ministria e Kulturës Rinisë dhe Sportit.

Kino Lumbardhi tanimë i Komunës së Prizrenit

Posted on 19 Korrik, 201820 Korrik, 2018 by KultPlus

Pas 19 vitesh paqartësi në lidhje me statusin pronësor të Kino Lumbardhit, kërkesa e Komunës se Prizrenit për kthim të pronës nga Agjencia Kosovare e Privatizimit është pranuar në mbledhjen e fundit të Qeverisë së Republikës së Kosovës, të mbajtur më 17 korrik 2018.

I themeluar në mes të shekullit XX, “Kino Lumbardhi” është ndër kinematë e vetme në Ballkan me sallë të mbyllur e të hapur. Për 70 vite ka qenë qendër e shfaqjeve të filmave, festivaleve dhe e aktiviteteve kulturore në qytetin e Prizrenit. Pas çaktivizimit të ndërmarrjes shoqërore “Bistrica”, kinemaja u la në degradim, ndërsa qyteti i Prizrenit mbeti pa kinema. Si reagim, në vitin 2002, një grup qytetarësh themeluan DokuFest-in, për ta rikthyer kinemanë në këtë qytet për filmdashës dhe për të kërkuar aktivizimin e “Kino Lumbardhit”.

Siç mbahet në mend, pas luftës kinemaja ka qenë subjekt i debateve dhe i nismave të ndryshme për rrënimin e saj. Shoqëria civile e Prizrenit ka reaguar nëpërmjet Iniciativës për Mbrojtjen e “Kino Lumbardhit” në 2007 dhe 2014, e udhëhequr nga DokuFest dhe EC Ma Ndryshe, në mbështetje edhe të 58 organizatave dhe 8000 qytetarëve, nënshkrues kundër rrënimit dhe tjetërsimit të Kino Lumbardhit.

Aktivizimi qytetar ka korrur sukses në 2015, kur kërkesa e parashtruar nga kjo iniciativë u pranua dhe “Kino Lumbardhi” ka fituar statusin e monumentit të mbrojtur të trashëgimisë kulturore.

Për të vazhduar iniciativën, përfaqësuesit e saj kanë themeluar Fondacionin Lumbardhi dhe në marrëveshje me AKP-në i kanë rihapur dyert e kinemasë, duke e kompletuar fazën emergjente të restaurimit dhe funksionalizimit të saj dhe duke e vënë në shfrytëzim të mbi 60 organizatave dhe shoqërive gjatë këtyre 3 viteve.

Komuna e ka vlerësuar angazhimin qytetar për kthimin e kinemasë dhe ka shprehur gatishmërinë për ta zgjidhur përfundimisht çështjen e pronësisë se saj, duke e adresuar një kërkesë në Qeveri të Kosovës dhe duke ndërmarrë veprime konkrete në këtë drejtim. Po ashtu, Komuna e Prizrenit prej fillimit të mandatit qeverisës ka pasur bashkëpunim pro-aktiv me Fondacionin Lumbardhi, duke e diskutuar planin e menaxhimit të hapësirës, duke mbajtur takime me donatorë dhe palë të ndryshme për të siguruar financimin për ri-vitalizimin e plotë të tij.

Ky bashkëpunim do të vazhdojë derisa kinemaja e dikurshme të kthehet në funksion të plotë si institucion kulturor multi-funksional.

Komuna e Prizrenit dhe Fondacioni Lumbardhi falënderojnë Qeverinë e Kosovës dhe të gjithë akterët e përfshirë në plotësimin e kërkesës shumëvjeçare të qytetarëve të Prizrenit. /KultPlus.com

Programi “E ardhmja është këtu” i DokuFest këtë vit reflekton shpresën e të rinjve

Posted on 19 Korrik, 201819 Korrik, 2018 by Kult Plus

Ky vit shënon gjeneratën e gjashtë të nxënësve të shkollave të mesme të cilët regjistrohen në kampet e trajnimit të organizuara nga programi edukativ “Shkolla dhe dokumentari”, i cili fokusohet në natyrën praktike të filmave, duke u ofruar nxënësve mjetet, njohuritë dhe asistencën profesionale të nevojshme për të bërë filmat e tyre, shkruan KultPlus.

“Kur filluam shkollën e filmit “E ardhmja është këtu” para 6 vjetësh, nuk na shkoi mëndja që do të arrijmë të frymëzojmë kaq shumë gjenerata të të rinjve të talentuar, që të kthejnë pasionin e tyre në projekte konkrete”, shkruhet në njoftimin e DokuFest.

Një grup tutorësh me përvojë janë aty për të ndërtuar një urë mes nxënësve. Në edicionin e gjashtë janë pranuar 15 të rinj entuziastë, nga 88 aplikime për t’iu bashkuar kampit të parë veror ku do të trajnohen përmes qendrës së produksionit të dokumentarëve në DokuFest, përmes procesit të udhëhequr nga profesionistët në terren, prej ideve deri në fazat përfundimtare. Kureshtja e tyre për botën që i rrethon është kyçe për aspektin transformues në punëtori.

Së fundmi, janë përzgjedhur shtatë projekte premtuese për t’u udhëhequr më tutje nga tutorët e programit Blerta Zeqiri, Gullermo Careras-Candi, Emilio Guerra, Gazmend Bajri, Hakan Karamuço dhe Samir Karahoda. Duke ju dhënë kamera për të treguar historitë e tyre dhe për të krijuar një ndërgjegjësim më të madh mbi çështjet sociale, u ngjall dashuria për procesin e realizimit të tregimeve mes këtyre shtatë studentëve të mahnitshëm.

Filmat e tyre janë personal, që përshkruajnë jetën e tyre përmes historive të rëndësishme dhe gjithëpërfshirëse. Shtrirja e gjerë e temave trajtojnë çështje se si media sociale formon jetën e përditshme të adoleshentëve, ose se si paragjykimet dhe diskriminimi ndikojnë në jetën e një të riu në Kosovë. Një nxënës rom vendosi të filmonte një festë që simbolizon lumturinë e cila kremtohet me shumë krenari nga komuniteti rom, ndërsa një tjetër histori e një filmbërësi të ri ka të bëjë me krijesat magjike dhe mitike shqiptare që posedojnë fuqitë mbinatyrore dhe bukurinë e jashtëzakonshme.

Rrëfimet e këtyre të rinjve janë pasqyrim i shoqërisë dhe reflektojnë shpresë dhe optimizëm. Prandaj DokuFest i fton të gjithë që të bashkohen në shfaqjen e këtyre filmave në kinemanë e mbi lum të DokuFest, nën mbishkrimin “E ardhmja është këtu”./ KultPlus.com

Haskuka: Investimi në njerëzit e kulturës nuk është humbje, ai kthehet shumëfish

Posted on 14 Korrik, 201814 Korrik, 2018 by KultPlus

Kryetari i Prizrenit Mytahir Haskuka, ka pritur një delegacion të Shoqatës së Shkrimtarëve dhe Artistëve Shqiptarë “Papa Klementi XI Albani” në Suedi. Takimi u realizua, në kuadër të përgatitjeve që kjo shoqatë po i bën për mbajtjen e Sesionit të gjashtë shkencore në Kompleksin e Lidhjes Shqiptare në Prizren.

Kryetari i Shoqatës, Hysen Ibrahimi e ftoi kryetarin e Prizrenit që të marrë pjesë në punimet e këtij sesioni, që do të mbahet më 25 korrik 2018.

“Deri tani Shoqata e Shkrimtarëve dhe Artistëve Shqiptarë “Papa Klementi Xi Albani” në Suedi ka botuar afër 300 vepra e të autorëve, të cilët jetojnë kryesisht në mërgim, por edhe vepra të autorëve tjerë. Këtë vit Shoqata është përcaktuar të shënojë dy ngjarje të mëdha për kombin shqiptar, që janë edhe ngjarje jubilare: 140 vjet të Lidhjes Shqiptare të Prizrenit dhe 550 vjetorin e vdekjes së Skënderbeut”, tha Hysen Ibrahimi gjatë një prezantimi të punës së shoqatës në takim me kryetarin Haskuka.

Ibrahimi bëri të ditur se përmbajtja e sesionit të gjashtë shkencor do të botohet në numrin e 10-të të Thesarit Kombëtar dhe ajo do të përkthehet edhe në gjuhën suedeze, në mënyrë që edhe suedezet të mësojnë për Lidhjen Shqiptare të Prizrenit dhe formatin e mbajtjes së saj në kohë. Me këtë rast, ai i dhuroi kryetarit të Prizrenit vëllimet e Thesarit Kombëtar të Mërgatës Shqiptare, që përgatitet nga kjo shoqatë.

Ndërkaq, Haskuka premtoi bashkëpunim të drejtpërdrejtë me SHSHASH “Papa Klementi XI Albani”, duke thënë se investimi në njerëzit e kulturës nuk është humbje. “Përkundrazi, nëse investon dhe i përkrah njerëzit e kulturës, ata do të jenë ambasadorë të mirë të këtij vendi kudo në botë, siç kanë bërë shoqata “Papa Klementi XI Albani” dhe shumë shoqata tjera. Investimi në kulturë, kthehet shumëfish”, tha Haskuka. Për këtë arsye, ai bëri të ditur se do të hapë një zyre në komunë që do të bashkëpunojë dhe do të komunikojë drejtpërdrejt me mërgatën. Ndërkohë do të nisë një projekt i ndërmarrësisë për të rinjtë, të cilët do të kenë nevojë për këmbime përvojash edhe nga Suedia.

Pas interesimit të Hysen Ibrahimit rreth investimeve që bën komuna e Prizrenit për fushën e kulturës, kryetari, Mytahir Haskuka, foli për investimet që bëhen por nuk ishte i kënaqur me fondin që ndahet për kulturë dhe sport, e as me mënyrën e financimit të aktiviteteve të kulturës. Me vetëm afër 300 mijë euro financohen projektet e kulturës në Prizren, derisa zhvillohen shumë aktivitete gjatë gjithë vitit. Haskuka tha se do të insistojë që kultura dhe projektet e kësaj fushe të mbështeten përmes subvencioneve, për të shmangur mangësitë në organizime dhe cilësinë e dobët që ofrohen. Ai veçoi festivalin “Zambaku i Prizrenit”, për të cilin tha se i ka rënë cilësia, për shkak të mënyrës së financimit të festivalit.

Haskuka u shpreh i hapur për bashkëpunim me SHSHASH “Papa Klementi XI Albani” dhe mërgimtarët që veprojnë në Suedi. Ai kishte një përvojë të mirë nga një vizitë që kishte më herët në Suedi dhe bëri të ditur se do ta kenë një konsulencë mbështetëse për muzetë e Prizrenit, nga një ekspert suedez i muzeve. Ndërkaq, falenderoi Hysen Ibrahimin, dhe SHSHASH “Papa Klementi XI Albani” për mbajtjen e sesionit shkencor në Prizren. “Prej prillit të këtij viti kemi pasur disa aktivitete që janë mbajtur për Lidhjen e Prizrenit. Ky i shoqatës tuaj do t’iu shtohet atyre ngjarjeve si ndër më të mëdhatë që do të jenë në qytetin tonë”, tha Haskuka.

Më pas, delegacioni i SHSHASH “Papa Klementi XI Albani”, vizitoi edhe Kompleksin e Lidhjes së Prizrenit, për të parë përgatitjen e nevojshme për mbajtjen e sesionit të gjashtë shkencor. Hysen Ibrahimi tha se tashmë është çdo gjë gati për të shënuar 140 vjetorin e Lidhjes Shqiptare të Prizrenit, si një aktivitet qendror i Shoqatës së Shkrimtarëve dhe Artistëve Shqiptarë “Papa Klementi XI Albani” për këtë vit. /KultPlus.com

Apostolova: Kosova është e pasur me trashëgimi kulturore

Posted on 12 Korrik, 201813 Korrik, 2018 by KultPlus

Zyra e Bashkimit Evropian në Kosovë dhe Programi i Kombeve të Bashkuara për Zhvillim lansuan sonte në Prizren projektin e financuar nga BE “Dialogu ndërmjet komuniteteve përmes mbrojtjes përfshirëse të trashëgimisë kulturore”, i cili përkon me vitin e trashëgimisë kulturore evropiane 2018.

Me këtë rast, shefja e Zyrës së BE-së në Kosovë, Nataliya Apostolova, tha se projekti do të fillojë së shpejti dhe do të ketë aktivitete të shumta për të dëshmuar vlerat e trashëgimisë evropiane. Ajo theksoi se ruajtja e trashëgimisë kulturore është një ndër vlerat e çmuara të Bashkimit Evropian, i cili ka dhënë një ndihmë të rëndësishme në këtë fushë në Kosovë, përmes së cilës promovohet vendi në botë.

“Kosova është e pasur me trashëgimi kulturore që kanë jetuar këtu në të kaluarën në diversitetit duke bërë Kosovën unike. Projekti është testament e vlerave të mëdha për ruajtjen e trashëgimisë kulturore dhe komuniteteve. Përmes këtij projekti të rehabilitimit, promovohet trashëgimia kulturore e vendit. Kinema Lumbardhi ku ne jemi sot është zgjedhur për këtë ngjarje pasi përfaqëson një erë të rëndësishme për qytetin dhe jetën e tij kulturore. Projekti tregon diversitetin e komuniteteve për t’i afruar së bashku, në veçanti të rinisë, komunitetet e të cilave ndajnë trashëgiminë për të punuar së bashku”, tha ajo.

Ulrika Richardson, koordinatore e OKB-së për zhvillim dhe përfaqësuese e përhershme e UNDP-së, tha se faza e dytë e projektit që implementohet nga kjo organizatë, promovon ndërtimin e mirëbesimit përmes restaurimit dhe ruajtjes së trashëgimisë kulturore. “Në fazën e parë kemi punuar me intensitet të madh me komunën, me komunitetet, shoqërisë civile, policinë dhe institucionet nacionale dhe kemi vënë një bazë solide për të vazhduar me frymë të njëjtë. Në fazën e dytë do të rritim angazhimin e të rinjve, pasi Kosova ka një popullsi kryesisht të re dhe ndajnë përgjegjësinë për ruajtjen e asaj që është më e vlefshme, trashëgimisë kulturore”, tha Richardson.

Kryetari i Komunës së Prizrenit, Mytaher Haskukaj, ka thënë se ruajtja e trashëgimisë kulturore është investim në ruajtjen e bashkëjetesës dhe se do të ketë mbështetjen e komunës që ai drejton. “Si prizrenas kudo që kam shkuar në botë kam qenë krenar me Prizrenin. Krenaria për qytetin tim ka buruar nga dashuria për të, por edhe nga lavdatat e njerëzve që kanë vizituar Prizrenin. Ndër lëvdatat që kam dëgjuar janë për njerëzit e saj, mikpritjen dhe gatishmërinë për të ndihmuar të tjerët. Kjo mirësi që hetohet në Prizren, bazohet në trashëgiminë kulturore të saj, në xhaminë, katedrale, sheshe e rrugicave, sahat kullë e kalldrëmin e Prizrenit bazohet në trashëgiminë e Prizrenit, por edhe artizanale”, tha ai.

Një mesazh të para-incizuar përmes video-linkut për të pranishmit ka mbajtur Tibor Navracscis, komisionar evropian për arsim, kulturë, rini dhe sport, ndërsa Ares Shporta ka prezantuar një histori të shkurtër të kinemasë Lumëbardhi- vendet kulturore si qendra të kohezionit shoqëror. /KultPlus.com

Restaurohet edhe një ndërtesë e Trashëgimisë Kulturore në Qendrën Historike të Prizrenit (FOTO)

Posted on 6 Korrik, 20186 Korrik, 2018 by KultPlus

Qendra Rajonale për Trashëgimi Kulturore në Prizren ka vazhduar edhe këtë vit restaurimin e ndërtesave të Trashëgimisë Kulturore. Njëra ndër to është edhe shtëpia e familjes Puka, përcjellë KultPlus.

Shtëpia e familjes Puka gjendet në Qendrën Historike të Prizrenit, respektivisht në zonën e tetë (Zona e banimit sipas trendeve aktuale të ndërtimit) sipas Planit të Konservimit dhe Zhvillimit për Qendrën Historike të Prizrenit. Ndërtesa gjendet në lagjen e vjetër të ashtuquajtur Qafa e Kishës, e rrethuar me ndërtesa të banimit individual.

Shtëpia i takon tipit të banesave të mbyllura me kat, me fasadën ballore të orientuar kah oborri perëndimor. Ka planimetri drejtkëndëshe, e ndërtuar në përdhes dhe kat.

Si rezultat i vjetërsisë së ndërtesës, mungesës së ndërhyrjeve konservuese, shtëpia është vlerësuar në gjendje të keqe fizike dhe rrezikohej nga dëmtimet e mëtutjeshme.

Problemi kryesor ishte depërtimi i lagështisë nga struktura e amortizuar dhe e dëmtuar e kulmit, deformimi i strukturës së mureve dhe depërtimi i lagështisë nga toka.

Pas vlerësimit të dëmeve dhe hartimit të projektit për gjendjen ekzistuese dhe ndërhyrjet konservuese në ndërtesë, janë implementuar ndërhyrjet e restaurimit të pjesshëm, me ç ‘rast janë kryer këto punë: Shtangimi i strukturës së mureve dhe formimi i skeletit metalik mbajtës të konstruksionit të kulmit; Rindërtimi i strukturës së kulmit me të gjitha elementet përcjellëse; Restaurimi i nyjës sanitare duke përfshirë edhe ndërhyrjet dhe instalimet e reja; Restaurimi i murit jugor; dhe restaurimi i tavanit të çardakut.

Ministria e Kulturës, Rinisë dhe Sportit do të vazhdojë të mbështes projektet të cilat kanë për qëllim mbrojtjen dhe ruajtjen e Trashëgimisë sonë Kulturore./KultPlus.com

Rrënohet edhe një ndërtesë e trashëgimisë në Prizren, kësaj radhe me leje nga komuna

Posted on 5 Korrik, 20185 Korrik, 2018 by Kult Plus

Ndërtesa që i takonte fillimit të shekullit XX, e ndërtuar me teknikë tradicionale të ndërtimit në rrugën “Adem Jashari” (nr. i ngastrës 804-0) në Prizren, është rrënuar në tërësi. Kjo ndërtesë është rrënuar me leje të Komunës së Prizrenit, gjegjësisht Drejtoratit për Urbanizëm dhe Planifikim Hapësinor (DUPH), edhe pse për rastin në fjalë Qendra Rajonale për Trashëgimi Kulturore (QRTK) në Prizren, si institucion kompetent i trashëgimisë, nuk ka dhënë pëlqim për një veprim të tillë.

Me datë 22 shkurt 2018, DUPH (Komuna e Prizrenit), pas aplikimit të investitorit të ndërtesës në rrugën “Adem Jashari” (nr. i ngastrës 804-0), i drejtohet QRTK-së në Prizren me kërkesë për dhënie të pëlqimit për ndërtimin e objektit të banimit me lokal afarist. Në bazë të informatave zyrtare të marra nga QRTK në Prizren, ky autoritet në fillim të këtij viti kishte refuzuar kërkesën e investitorit për ndërtim të objektit të ri në këtë parcelë.

Sipas përgjigjes së QRTK-së, kjo ndërtesë ka qenë pjesë e Zonës së Dytë Mbrojtëse të qytetit sipas Planit Zhvillimor Urban (PZHU) të Prizrenit. “Fasada ballore e ndërtesës në fjalë ka qenë e punuar me elemente dekorative lineare, karakteristikë e fillimit të shekullit XX dhe pranë saj në varg gjenden edhe katër ndërtesa tjera të cilat datojnë nga kjo periudhë, të cilat ruajnë karakterin historik të çarshisë tradicionale të zhvilluar në vijë kontinuale, ku posedojnë vlera historike. Komisioni ka vlerësuar që në këtë potez nuk duhet të prishet ansambli arkitektonik, rrjedhimisht që gabariti dhe fasada ballore nuk duhet të rrënohet andaj ka vendosur që të refuzohet kërkesa e palës për ndërtim të ri në këtë parcelë”, thuhet në përgjigjen e QRTK-së.

Në anën tjetër, në bazë të përgjigjes zyrtare të datës 2 korrik 2018 të marrë nga DUPH (Komuna e Prizrenit), konfirmohet se kjo drejtori “më 29 maj 2018 ka lëshuar aktvendim me të cilin është lejuar rrënimi i objektit ngase objekti ka qenë jashtë zonës së Qendrës Historike të Prizrenit dhe konsideron se nuk nevojitet rekomandimi nga QRTK-ja, përveç rasteve kur objekti gjendet në Listën e objekteve të mbrojtura.”

“EC Ma Ndryshe, vendimin e DUPH-së për rrënimin e ndërtesës në fjalë e konsideron si vendim jo të drejtë dhe kontradiktor. Kjo drejtori fillimisht ka kërkuar pëlqim nga QRTK Prizren për lëndën në fjalë, i refuzohet kërkesa për rrënim dhe ndërtim të ri dhe më pas vet DUPH e konsideron se nuk ka nevojë për një rekomandim të QRTK-së. EC rikujton se Komuna e Prizrenit, gjegjësisht DUPH edhe pse ka filluar me procesin e hartimit të Hartës Zonale, ka ende në fuqi Planin Zhvillimor Urban 2003-13. Në bazë të analizave, të dhënave dhe komfor parimeve ndërkombëtare për zonim të vlerave të trashëgimisë kulturore, ky Plan definon tri Zona nën Mbrojtje në kuadër të qytetit të Prizrenit: Zonën e Parë të Mbrojtjes (Qendrën Historike të Prizrenit), Zonën e Dytë të Mbrojtjes dhe Zonën e Kontaktit”, thuhet në njoftim dërguar medieve.

Ndërtesa për të cilën është dhënë leja për rrënim, gjendet në Zonën e Dytë të Mbrotjes. Sipas kapitullit 5 (Mbrojtja e trashëgimisë kulturore) të Planit Zhvillimor Urban (PZHU) të Prizrenit, gjegjësisht sipas nenit 5.11, të këtij kapitulli mes tjerash ceket se “Zona e Dytë e Mbrojtjes përfshinë pjesë të qytetit të vjetër me integritet më të vogël urbanistik dhe arkitektonik, por i cili mund të identifikohet si sistem i tërësishëm urban dhe që detyrimisht kërkon forma të koordinuara të veprimit. Kjo zonë akoma reflekton me komplekse dhe objekte me vlera historike, arkitektonike e ambientale por të cilat janë transformuar ashtu që është vënë në rrezik karakteri historik, arkitektonik dhe ambiental i zonës…”. Në nenin 5.15, pika 2 ceket se leja për zhvillim (përfshirë ndryshimin e destinimit ose ri-zhvillimin) do të jepet me kusht që: të avancohet karakteri i gjithmbarshëm, pamjet dhe shtrirja e komplekseve me fizionomi të veçantë, si dhe i ndërtesave dhe terrenit përreth tyre.

“EC Ma Ndryshe vazhdimisht ka shprehur shqetësimin për shkatërrimin e vlerave të trashëgimisë kulturore në Prizren dhe kërkon nga Komuna e Prizrenit, gjegjësisht DUPH, të mos merr hapa të ngutshëm të dhënies së lejes së rrënimit të ndërtesave të trashëgimisë, sepse humbja e vlerave të trashëgimisë është një proces i pakthyeshëm. Përderisa QRTK në Prizren konsideron që ndërtesa në fjalë posedon vlera të trashëgimisë kulturore, kërkojmë urgjentisht edhe nga Ministra e Kulturës, Rinisë dhe Sportit të vazhdojë me procesin e inventarizimit dhe ta plotësojë Listën e Trashëgimisë Kulturore nën Mbrojtje të Përkohshme për gjithë territorin e Komunës së Prizrenit. Të gjitha organet përgjegjëse shtetërore, pa përjashtim, duhet të veprojnë me seriozitet të plotë për zbatim të legjislacionit për ruajtjen dhe mbrojtjen e këtyre vlerave”, thonë nga organizata./ KultPlus.com

DokuFest thotë “I’ll Be Your Mirror” (VIDEO)

Posted on 5 Korrik, 20185 Korrik, 2018 by Kult Plus

Tema e reflektimit do të theksohet në këtë edicion të DokuFest, i cili organizohet nga data 03-11 gusht në Prizren.

Përmes një njoftimi për media, ky festival ka njoftuar se tema do të trajtohet përmes kampanjës së festivalit si dhe përmes një kombinimi të programit të filmave, ekspozitave digjitale, bisedave me artistë, punëtorive dhe performancave muzikore.

Frymëzuar nga kënga e Velvet Underground “I’ll Be Your Mirror”, programi i DokuFest synon të shndërrohet në pasqyrë të botës ku jetojmë, si një pikënisje të asaj se kush dhe çka jemi./ KultPlus.com

NgomFest ‘pushton’ Kalanë e Prizrenit

Posted on 29 Qershor, 201829 Qershor, 2018 by Kult Plus

Alberina Haxhijaj

Kalaja e Prizrenit edhe sivjet mirëpret edicionin e 8-të më radhë, të Festivalit NgomFest, i cili pritet të tundë gurët e kësaj kalaje, shkruan KultPlus.

Edicioni i 8-të i NgomFest sivjet nisë nga 12 e deri më 15 korrik.

Publiku dhe ndjekësit e festivalit NgomFest janë mësuar që të rrugëtojnë së bashku me festivalin, duke u zhvendosur nëpër hapësira të ndryshme si skena në Shatërvan, skena në Marash e të tjera. Mirëpo edhe në këtë edicion ky festival ka zgjedhur Kalanë e Prizrenit, e cila mbanë copëza të historisë dhe trashëgimisë sonë.

Kujtojmë se Festivali “bredhacak” i Prizrenit i cili në fillimet e tij ishte i njohur për zhvendosjen nga një lokacion në tjetrin, për herë të parë ishte vendosur në kala në edicionin e tij të 6-të. Edicion i cili përveç muzikës përcolli edhe mesazhin kryesor të festivalit e që është mbrojtja e monumenteve historike.

Edhe ky edicion si të tjerë do njihet për veçantit e tij theksoi për KultPlus Ulpiana Emra, nga stafi organizativ i festivalit.

“Ajo që tashmë është bërë e zakonshme edhe është veçantia e këtij festivali është vendndodhja në kalanë e qytetit të Prizrenit si dhe periudha kohore e cila e përfshin edhe lindjen e diellit në mëngjes, ku audienca jone përpos që mund të kënaqet me muzikën do e shijojë edhe një pamje të mrekullueshme”, tha ajo.

E përpos këtyre dy veçantive normalisht do të ketë edhe artist të njohur të cilët do e argëtojnë publikun për 3 net radhazi. Ndër ta janë: Nick Warren, Insolate, Deepbass, GJIKO, The Black Room, Bottlecap, dhe shumë të tjerë që do të bëhen publik së shpejti.

“Gjithashtu kemi edhe artistë të ri për të cilët skena jone gjithmonë është e hapur. Ata deri më tani kanë aplikuar që të jenë pjesë e këtij festivali dhe mendoj që është një mundësi shumë e mirë për promovimin e tyre si artistë”, u shpreh ajo.

Në kala, në kuadër të festivalit do të vendosen dy skena “Skena Kryesore” ku artistë të ndryshëm do të performojnë deri në ora 2:00 të mëngjesit dhe “Skena e Lindjes së Diellit” ku publiku mund të shijojë pamjen që ofron kalaja gjatë lindjes së diellit ndërkohë që argëtohen me muzikë.

E për gjithë këtë punë festivali i është mirënjohës të gjithë atyre që e kanë ndihmuar në edicionet e mëparshme por edhe në këtë edicionin.

“Në krahasim me vitin e kaluar këtë vit kemi pak më shumë përkrahje nga ana e institucioneve. Shpresojmë që kjo përkrahje të rritet çdo vit e më shumë për faktin se edhe ne dëshirojmë që të zhvillohemi më tepër si festival e të sjellim më shumë risi”, tha për fund Ulpiana Emra.

Biletat për këtë edicion tashmë janë në shitje dhe bileta 3 ditore kushton 10 euro, si dhe oferta: 3+1 Gratis ./ KultPlus.com

Biletat mund të blihen në dy pika në Prizren, tek Kafja Jeme si dhe Qarshia. Gjithashtu për të interesuarit jashtë Prizrenit është mundësia e rezervimit të biletës nëpërmjet emailit: [email protected]. /KultPlus.com

Hoxha u ligjëron turqisht shqiptarëve në xhaminë e Prizrenit (VIDEO)

Posted on 6 Qershor, 20187 Qershor, 2018 by Kult Plus

Hoxha nga Turqia, imam në xhaminë e Prizrenit: Ligjërimi në xhaminë “Sinan Pasha” bëhet në gjuhën turke nga një imam turk, raporton T7.

Është xhamia kryesore e qytetit. Ndodhet në qendër të kryeqytetit shpirtëror të shqiptarëve. Por brenda në këtë xhami në Prizren ligjëron një imam turk. Edhe pse xhemati janë në shumicë janë shqiptarë, aty ligjërohet vetëm në gjuhën turke.

Gjithçka në këtë institucion fetar që është rinovuar nga TIKA Turke frymon turqisht. Por imami i saj nuk ka dashur të flasë. Ligjërimi në këtë gjuhë po i shqetëson banorët prizrenas që ndodhë shpesh të jenë vizitorë të saj.

Në anën tjetër ka edhe të atillë që e përkrahin këtë lloj ligjërimi. Ata janë turqit. Megjithatë nuk janë të gjithë të këtij mendimi. Historiani Parim Kosova thotë se më këtë formë po mundohet të shtrembërohet historia. Më tej Kosova thotë se mund të gjendet një zgjidhje për imamin edhe brenda Prizrenit.

Kjo xhami e cila daton në Prizren që nga viti 1615, para shtatë viteve është rinovuar nga organizata “TIKA”.
Këshilli i bashkësisë islame të Prizrenit nuk ka pranuar të flas në lidhje me përzgjedhjen e imamit turk duke rekomanduar që përgjigje të jap BIK-u në Prishtinë. Por as ata nuk kanë folur.

Frontal merr vesh se BIK-u në Prizren ka qenë kundër që një hoxhë nga Turqia të angazhohet në Prizren por kjo ide ishte mbështetur nga selia qëndrore në Prishtinë. Udhëheqja dhe ligjërimi në turqisht në xhaminë “Sinan Pasha” po vënë në lajthitje edhe vizitorët e huaj.

“BACA” sonte në Lumbardh

Posted on 14 Maj, 201814 Maj, 2018 by Kult Plus

Sot e hënë me fillim nga ora 20:00 në Lumbardhi në Prizren, do të mbahet koncerti “BACA”, shkruan KultPlus.

Pjesë e këtij koncertit do të jetë Shaqir Hoti, muzicienti që tërë jetën i dedikoi punimit e studimit të instrumenteve burimore, e në veçanti okarinës ilire.

Shaqir Hoti do të jetë i shoqëruar nga muzicientët: Armend Xhaferi, Ilir Bajri dhe Nesim Mexhuni./ KultPlus.com

Hana Arapi sjellë ekspozitën e parë personale ‘n’4tën’

Posted on 18 Prill, 201818 Prill, 2018 by Kult Plus

Hana Arapi po e sjellë ekspozitën e saj personale.
Hana Arapi është absolvente e dizajnit grafik, ndërsa për ta kurorëzuar rrugëtimin e saj katërvjeçar, ajo këtë të shtunë sjellë ekspozitën e parë personale të titulluar “n’4tën”.

Kuratore e kësaj ekspozite është profesoresha Lyra Zajmi. Punimet e Hana Arapit do të prezantohen në Prizren dhe janë të fushës së Komunikimit Vizual, duke perfshirë Mediat Dixhitale, Ilustrimin, Fotografinë dhe Tipografinë.

Ekspozita hapet këtë të shtunë, më 21 prill, në Hamamin “Gazi Mehmet Pasha” ne Prizren , duke filluar nga ora 19:00. / KultPlus.com

Aktakuzë për dëmtim të trashëgimisë kulturore në Prizren

Posted on 23 Shkurt, 201823 Shkurt, 2018 by Kult Plus

Prokuroria Themelore në Prizren ka ngritur aktakuzë kundër personit A.M., për shkak se ky i fundit rrënuar shtëpinë e familjes Myftiu, në Qendrën Historike të Prizrenit, në rrugën ‘’Mbreti Zog’’.

Kjo shtëpi ishte nën mbrojtjen e Trashëgimisë Kulturore, në bazë të një vendimi nga Ministria e Kulturës, Rinisë dhe Sportit.

Përkundër ndalim-punimit nga Inspektorati Komunal, të pandehurit kanë kaluar shiritin “Ndalohen Punimet’’, duke i futur punëtorët dhe makineritë (ekskavator dhe kamion), me ç’ rast ka rrënuar në tërësi objektin në fjalë, pasi që e njëjta i ishte shitur personit F.G./ KultPlus.com

ALGIERS me koncert në Prizren

Posted on 25 Janar, 201825 Janar, 2018 by Kult Plus

Lumbardhi nw bashkëpunim me NO RECESS prezantojnë koncertin e ALGIERS, të cilët do të performojnë në sallën e kinemasë në Lumbardhi-Prizren, të mërkurën, më 7 shkurt me fillim nga ora 20:00.

Koncertin e ALGIERS do ta hapë bendi I TPAME I TVRAME, një duo darkwave / coldwave / minimalwave / shoegaze / post-punk / industrial nga Tirana dhe Prishtina.

Muzika e ALGIERS përmban elemente të post-punk, no wave, blues, gospel dhe muzikës industriale. Muzika e tyre e vlerësuar nga kritikët është jashtëzakonisht politike; ata në këngët e tyre tingëllojnë të shqetësuar, të gëzuar dhe të zemëruar në të njëjtën kohë. ALGIERS shprehin aktivisht kritikë kulturore duke komentuar sferën politike, shoqërore dhe fetare.

ALGIERS është i bazuar në NEW YORK (ShBA) dhe Londër (Britani e Madhe). Grupi u formua në vitin 2009 në Atlanta, Gjeorgji, kur kitaristi Lee Tesche dhe basisti Ryan Mahan, të dy anëtarë të skenës së rock-ut dhe noise-it të qytetit, hasën në vokalistin dhe kitaristin Franklin James Fisher, i cili rrënjët muzikore i kishte në traditën e madhe të muzikës gospel të Deep South, soul-blues të Nina Simone dhe zhanrit funk. Të gjithë anëtarët e bendit luajnë në perkusione e tastierë dhe bëjnë programimin e daulleve.

Drejtori i Lumbardhit, Ares Shporta, shprehet i lumtur që në bashkëpunim me NO RECESS është bërë e mundshme që ALGIERS të performojnë në Prizren, respektivisht te Lumbardhi.

“Bashkëpunimi me NO RECESS është një mundësi e jashtëzakonshme për ta ndërtuar një platformë alternative në Prizren dhe kultivuar një audiencë të re në hapësirën e Lumbardhit. Jemi shumë të entuziazmuar për ardhjen e ALGIERS, por edhe të programeve tjera që do të pasojnë drejt pranverës”, pohon Shporta.

The Underside of Power, albumi i dytë i ALGIERS i publikuar në qershor 2017, është produksion i Adrian Utley dhe Ali Chant nga Portishead, derisa është miksuar nga Randall Dunn (Sunn O)))), me post-produksion nga Ben Greenberg (the Men, Hubble). The Observer e quan ‘fuzion fenomenal të muzikës klasike soul nga të 60-at me eksperimentim post-punk’, derisa ‘Rolling Stone’ e komplimenton si ‘mënyrë e re dhe origjinale për interpretim të blues-it’.

Drejtori i programit të NO RECESS, Alush Gashi, shprehet i lumtur që është bërë i mundshëm bashkëpunimi me ALGIERS dhe se ata do të performojnë në kuadër të serisë muzikore NO RECESS.

“ALGIERS janë një ndër bendet më të respektuara të skenës alternative botërore. Besoj se koncerti në Lumbardh do të jetë pikë referente për artistët tjerë të kësaj fryme muzikore që ta konsiderojnë Kosovën si pjesë e turneve të tyre ndërkombëtare”, shprehet Gashi.

NO RECESS është platformë kulturore e bazuar në Prishtinë, e cila mëton promovimin e shprehjeve alternative artistike në Kosovë, si dhe eksportimin e iniciativave të ngjashme jashtë vendit. Gjatë vitit të parë të themelimit të platformës (performanca e parë ishte më 21 dhjetor 2016 me REPETITOR nga Beogradi), para publikut vendor performuan Marc O’Reilly (IRL), Camera (GER), I Tpame I Tvrame (ALB), Kralj Čačka (Serbi, në bashkëpunim me festivalin POLIP), Desert Mountain Tribe (UK/GER), My Baby (NL), RiB (MK), Bledi Boraku dhe Dritëro Nikqi (ALB/KS), Stray Dogg (SRB), Transformer (UK), Tetris (KS), Chickn (GR), Inaktiv + Uj Pa Gaz (ALB), K-X-P (FIN), Birth Of Joy (NL), A Victim Of Society (GR), Ben Caplan & The Casual Smokers (CAN), Battleme (USA), Otherkin (IRL), AK/DK (UK), si dhe Damo Suzuki, këngëtari legjendar i bendit CAN, i cili performoi në Hamam Bar së bashku me Tetris nga Prishtina më 18 qershor 2017.

Bendi që do ta hapë natën është I TPAME I TVRAME, i përbërë nga Franc Kurti (Tirana) dhe Dina Hajrullahu (Prishtina). Në mars 2017, mini-albumi i tyre i parë “Future Attitude”, i incizuar dhe miksuar nga Bledi Boraku (Tiranë) dhe i masterizuar nga Philipp Läufer (Berlin), është publikuar në audio kasetë dhe digjitalisht nga Black Verb Records (Berlin). Altered EP u publikua në shtator 2017 në limited edition 50 kaseta (25 silver / 25 gold)./ KultPlus.com

Një kujtim nga Bekim Fehmiu që gjendet në Prizren (FOTO)

Posted on 14 Janar, 201814 Janar, 2018 by Kult Plus

Një fotografi e një veture të vjetër është shpërndarë para disa ditësh në llogarinë e Facebook-ut të ish-gazetarit Fahri Musliu, shkruan KultPlus.

Kjo fotografi tregon veturën Peugeot 404, që aktori i madh shqiptar Bekim Fehmiu e kishte blerë për nënën e tij më 1968. Vetura sipas Musliut, është në oborrin e fotografit Burim Myftiu në Prizren, i cili e kishte marrë atë më 1996 nga vëllezërit Fehmiu.

Po e sjellim të plotë shkrimin e Fahri Musliut:

NJË KUJTIM NGA BEKIM FEHMIU

Burim Myftiu nga Prizreni në një emision te TV Klan Kosova ka zbuluar se posedon makinën PEZHO 404 të cilën më 1968, aktori kosovarë me famë botërore, BEKIM FEHMIU nga honorari i serialit TV ODISEJA ia kishte blerë nënës së vet Hedijes, që të mund ta vizitojë Bekimin kudo që ai xhiron. Myftiu thotë se makinën që nga vëllezërit e Bekimit e ka marre më 1996 e ka shfrytëzuar disa vite por që nga përfundimi i luftës, ajo është në gjendje të mjerueshme dhe kërkon riparim të jashtëm. Makina gjendet në oborrin e shtëpisë së tij në Prizren dhe shpreh gatishmërinë që atë dhuroj për ekspozim në ndonjë hapësirë në qendër të Prizrenit apo në kuadër të Mezeut kushtuar Bekim Fehmiut, që do të duhej të hapej në këtë qytet, si shenjë kujtimi të aktorit të madh.
Për riparimin do të duhej të shfaq interesim Komuna e Prizrenit apo edhe firmat private e individ.
Do ishte mirë që riparimi të ndodh deri në fillim të qershorit kur shënohet përvjetori i lindjes apo i vdekjes së Bekimit dhe të caktohej vendi për ekspozimin e saj.
Të interesuarit le të lajmërohen në këtë faqe ose personalisht mua në messenger.
Ju faleminderit për mirëkuptim. F.M.

QRTK reagon rreth rrënimit të shtëpisë së familjes Myftiu në Prizren

Posted on 21 Dhjetor, 201721 Dhjetor, 2017 by Kult Plus

Tani kur po afrohemi fundit të vitit kalendarik 2017 dhe të gjithë jemi duke bërë vlerësimin e arritjeve dhe sfidave që na përcollën gjatë këtij viti, rrënimi i shtëpisë së familjes Myftiu në Prizren shkaktoi një dis-balans duke e njollosur rezultatet e punimeve të kryera sivjet, e që nuk janë të pakta.

Përveç tjerash ky vit ishte edhe viti jubilar i institucionit tonë ku kohë më parë kemi shënuar 50 vjetorin e themelimit, me disa aktivitete modeste për shkak të angazhimit të madh që ka pasur institucioni ynë në përmbushjen e planifikimeve dhe objektivave programore. Vetëm sektori i arkitekturës gjatë vitit 2017 ka bërë ndërhyrje restauruese – konservuese në 20 objekte të ndryshme krahas punëve tjera si rivlerësimi, inventarizim dhe propozimi i objekteve të tjera për mbrojtje të përkohshme, hartimi i projekteve për ndërhyrje, shqyrtimi i lëndëve investive nga palët dhe institucionet, mbikëqyrje, konsultime me palë të ndryshme, etj.

Ky vit jubilar u përmbyll me aktivitete rekorde në krahasim me 18 vitet e kaluara. Shkatërrimi i shtëpisë së familjes Myftiu, këtij aseti të rëndësishëm të trashëgimisë kulturore dha një goditje të rëndë bindjes sonë se jemi duke përparuar në vetëdijesimin e opinionit dhe institucioneve në ruajtjen e trashëgimisë kulturore si vlerë universale e njerëzimit. Shtëpia e familes Myftiu është vlerësuar si monument kulture me numrin unik 507 dhe gjendet në Listën e Trashëgimisë Kulturore nën Mbrojtje të Përkohshme 2017-2018. Ndërtesa është inventarizuar, janë evidentuar vlerat e saj arkitektonike – estetike, historike, shoqërore dhe shkencore. Është bërë edhe rilevimi i gjendjes ekzistuese dhe ka qenë e propozuar për ndërhyrje restauruese gjatë këtij viti. Fatkeqësisht pronarët nuk kanë pranuar të bëhet ndërhyrja, duke u arsyetuar se ndërtesa është pronë e disa trashëgimtarëve, dhe nuk po arrijnë një marrëveshje të brendshme për të lejuar restaurimin e ndërtesës. Përkundër faktit që janë njoftuar rreth obligimeve dhe detyrimeve të pronarëve të aseteve të Trashëgimisë Kulturore, në bazë të Ligjit (Nr.02/L-88) të Trashëgimisë Kulturore, nuk kemi arritur t’i bindim për të lejuar ndërhyrjen.

Kjo situatë e palakmueshme është paraqitur në departamentin e Trashëgimisë Kulturore, me ç’rast kemi kërkuar që të ndërmerren hapat konkrete ndaj pronarëve për pengimin e ndërhyrjeve restauruese, bazuar në dispozitat ligjore. Duke menduar që ndërmarrja e veprimeve ligjore do të parandalojë rrënimin e qëllimshëm të këtyre aseteve të trashëgimisë kulturore, dhe do të kontribuojë në vetëdijesimin e pronarëve tjerë. Po ashtu është kërkuar të ndërmerren masa ligjore ndaj shkatërruesve të këtij aseti shumë të rëndësishëm kulturo-historik që përveç humbjes së monumentit kanë krijuar një imazh të shëmtuar për qytetin, respektivisht për Kosovën që nuk mund të kujdesej për trashëgiminë e vet kulturore.

Ne si Qendër Rajonale e Trashëgimisë Kulturore vazhdojmë të mbetemi të përkushtuar në përmbushjen e përgjegjësive tona për ruajtjen dhe promovimin e vlerave të trashëgimisë të përbashkët kulturore./ KultPlus.com

Vazhdojnë veprimet degraduese brenda ndërtesës së ShKA Agimit, anëtarët e kësaj shoqate i drejtohen MKRS-së

Posted on 10 Dhjetor, 201710 Dhjetor, 2017 by Kult Plus

Edhe pse në nëntor të vitit 2017-të, ministri i Ministrsisë së Kulturës, Rinis dhe Sportit në Republikën e Kosovës, nënshkroi vendimin për përfshirjen e ShKA Agimi nga Prizreni në Listën e Trashëgimisë Kulturore, degradimi brenda kësaj ndërtese nuk ka të ndalur, njoftojnë nga Shoqata Kulturore Agimi, përcjell KultPlus.

Sot në një komunikatë për medie, kjo shoqatë ka paraqitur edhe njëherë shqetësimet e tyre në lidhje me degradimet e ndryshme që po i bëhen kësaj ndërtese, siq thonë ata nga një grup i vogël individësh.

Po sjellim njoftimin e plotë të ShKA Agimi:

Gjatë muajit nëntor 2017, ministri i kulturës nënshkroi vendimin për përfshirjen e ndërtesës së ShKA Agimit në Listën e Trashëgimisë Kulturore. Ky ishte edhe një veprim konkret i yni në përpjekje për të shpëtuar ShKA Agimin. Megjithatë, veprimet degraduese të një grupi të vogël individësh të papërgjegjshëm nuk kanë të ndalur. Ky grup që ka zaptuar ndërtesën e ShKA Agimit dhe ka përjashtuar qindra anëtarë pa përfillur asnjë procedurë, ka vazhduar me veprime klandestine dhe degraduese ndaj Agimit. Të vetëshpallur “Kryesi e Agimi”, këta individë kanë vazhduar të marrin vendime në kundërshtim me të gjitha procedurat e brendshme të Shoqnisë dhe ligjet e Kosovës që rregullojnë sektorin e shoqërisë civile. Në veprimin e radhës absurd dhe joligjor, në mesin e tyre kanë shpallur një tjetër person “Kryetar” të ShKA Agimit. Ky veprim është veçse vazhdim i avazit të vjetër, ku një Kryesi fiktive, e dalë nga një Kuvend klandestin dhe jolegjitim vazhdon të luaj zgjedhjesh dhe të kontribuojë edhe më shumë në degradimin e Shoqnisë.

Në anën tjetër, shumë dashamirë të ShKA Agimit dhe qytetarë të Prizrenit kanë publikuar dëshmi të degradimit kulturor që po ndodh brenda ndërtesës së Agimit. Ky grup i vogël individësh të papërgjegjshëm dhe zaptues, pas tentativës së vitit të kaluar për të tjetërsuar pronën e Agimit përmes një marrëveshje joligjore, tani kanë shndërruar hapësirën e Shoqnisë në kafene burrash ku kultivohet tallavaja. Në video dhe fotografi të publikuara ditëve të fundit shihen pamje dhe dëgjohen tinguj që asnjëherë nuk kanë qenë pjesë e ShKA Agimit përgjatë historisë së saj 73 vjeçare. Dëshmitë e këtij degradimi kulturor (videot dhe fotot) mund t’i shikoni në këto:

https://goo.gl/mtAW9A dhe https://goo.gl/qRQnzu.

Ne kërkojmë nga Ministri i Kulturës, që në pajtim me autorizimet e tij ligjore dhe në përputhje me vendimin për të shpallur ndërtesën e Agimit aset të trashëgimisë kulturore në mbrojtje të shtetit, të ndërmarrë veprime institucionale për të adresuar këto shqetësime. Shpallja e një ndërtese aset i trashëgimisë kulturore nënkupton një numër detyrimesh dhe kufizimesh, gjithnjë për t’u siguruar që vlerat për të cilat është bërë shpallja do të mbrohen. Në rastin e ndërtesës së ShKA Agimit, ku janë publikuar dëshmi të qarta të degradimit, janë duke u cenuar vlerat më fondamentale të trashëgimisë kulturore. Prandaj, reagimi urgjent institucional është një domosdoshmëri për të ndërprerë këtë praktikë degraduese dhe për të iniciuar një plan të mirëfilltë menaxhimi për ndërtesën, në përputhje me parimet dhe kriteret për mbrojtjen e trashëgimisë kulturore.

Përpjekja jonë për të shpëtuar ShKA Agimin nuk do të ndalet. Jemi të përkushtuar në angazhimin tonë të përbashkët dhe nuk do të ndalemi derisa zaptuesit të largohen nga ShKA Agimi dhe ndërtesa e saj.

Me respekt,
Kryesia e ShKA Agimit (Besim Berisha, Agnesa Çipa Laçi, Arben Mashkulli, Flaka Xërxa, Fikrim Emra, Arbëreshë Berisha dhe Luljeta Braha)./ KultPlus.com

Me koncertin e mbrëmshëm “Agimi” tundi skenën e Prizrenit (FOTO)

Posted on 27 Nëntor, 201727 Nëntor, 2017 by Kult Plus

Koncerti i mbrëmshëm i ShKA Agimit shënoi një moment të kthesës përmes një programi cilësor të ekzekutuar nga njerëzit më meritorë që ka sot Agimi, theksohet në njoftimin e njërës nga kryesitë e kësaj shoqate, në të cilën ka muaj që kanë shpërthyer fërkime se kush është legjitim në krye të saj.

Figurat më të njohura të seksioneve artistike u kthyen pas shumë vitesh për ta rikrijuar njërin nga emocionet pothuaj të harruara festive, pikërisht në ngjarjen që shënon 28 Nëntorin, Ditën e Flamurit.

Reagimi i qytetarëve dhe dashamirëve të Agimit ishte i jashtëzakonshëm, pasi që salla e Teatrit të Qytetit “Bekim Fehmiu” (Shtëpia e Kulturës “Xhemajli Berisha) u mbush mbi kapacitetin e vet, derisa dhjetëra mysafirë qendruan në këmbë gjatë dy orëve sa zgjati koncerti. Kishte kohë që ngjarjet konecrtale të ShKA Agimit nuk po priteshin me kaq interesim dhe pjesëmarrje.

Veçantia e koncertit të sivjetshëm për Ditën e Flamurit ishte rikthimi pas shumë vitesh i emrave të njohur në reportorin e Agimit. Koncerti pati një program shumë cilësor, me performansë të korit nën udhëheqjen e Fikrim Emrës, oktetit (grupit) nën udhëheqjen e Besim Berishës, orkestrës nën udhëheqjen e Kastriot Markut, grupit të valltarëve nën udhëheqjen e Luljeta Brahës dhe Blerim Gashit, valltarëve veteranë nën udhëheqjen e Mazllum Karamanit dhe rapsodëve nën udhëheqjen e Tomë Sokolit. Pjesë e programit ishin edhe solistë të njohur të Kosovës, Rina Bilurdagu, Neki Emra, Elizabeta Krasniqi dhe Agim Tejeci.

Në fjalën e hapjes, aktori dhe udhëheqësi i seksionit dramatik në ShKA Agimi, Xhevdet Doda, theksoi se koncerti është vazhdimësi e protestës artistike dhe përsëriti qëndrimin e anëtarësisë thënë nga fillimi se Agimi është i të gjithëve dhe nuk do të ndalemi së vepruari derisa të shohim këtë të realizuar plotësisht. Sipas Xhevdet Dodës, rezistenca ndaj të keqes e cila mori hov në fund të vitit të kaluar është edhe një dëshmi që Agimi gjithmonë ishte dhe vazhdon të jetë nismëtar i ndryshimeve në Prizren dhe më gjerë, duke shtuar se qindra anëtarë e dashamirë të Agimit kishin vendosur t’i japin fund heshtjes e durimit, sepse një grup i vogël individësh të papërgjegjshëm po keqpërdornin një vlerë gjithëshoqërore, duke tentuar të përvetësonin Agimin për qëllime të ngushta. Sipas tij, ajo që nisi si rezistencë ndaj kapjes dhe abuzimit me të mirën e përgjithshme në fund të vitit të kaluar, nxiti edhe lëvizje tjera që tanimë po rezultojnë edhe me ndryshime politike e shoqërore, duke e konfirmuar edhe një herë Agimin si fole dhe frymëzim të ndryshimit në Prizren.

Rezistenca e anëtarëve do të vazhdojë në formën e protestës artistike, gjithnjë me synimin që Agimi të kthehet në piadestalin e veprimtarisë dhe namit të vet, si Shoqëri që i bën bashkë të gjithë personat që ia duan të mirën Prizrenit dhe kulturës. Kjo protestë do ta vazhdojë edhe tutje, derisa Agimi t’i kthehet të gjithëve, anëtarëve të vet, dashamirëve e përkrahësve dhe gjithë qytetarëve. Paralelisht protestës artistike, po ndiqen edhe të gjitha rrugët ligjore. Dëshmitë për keqpërdorime të këtij grupi të vogël individësh të papërgjegjshëm tashmë janë dërguar në autoritetet përgjegjëse, ndërsa i gjithë dokumentacioni në formën e padisë do t’i dërgohet gjykatës kompetente brenda disa ditësh.

(Njoftimi përfundon me nënshkrimin: Kryesia e ShKA Agimit – Besim Berisha, Agnesa Çipa Laçi, Arben Mashkulli, Flaka Xërxa, Fikrim Emra, Arbëreshë Berisha dhe Luljeta Braha, ndërsa autore e fotografive theksohet emri i Elmedina Arapi)./ KultPlus.com

Vazhdon puna restauruese dhe konservuese në shtëpinë e familjes Morina

Posted on 18 Nëntor, 201718 Nëntor, 2017 by Kult Plus

Në vazhdën e projekteve për ndërhyrje konsoliduese, restauruese dhe konservuese për objektet e trashëgimisë kulturore të rrezikuara brenda Qendrës Historike të Prizrenit, Qendra Rajonale për Trashëgimi Kulturore në Prizren me sukses vazhdon në implementimin e punëve restauruese në një tjetër monument të rëndësishëm të qytetit të Prizrenit.

Si rezultat, shtëpia e Iljaz Morinës, monumenti me rëndësi të veçantë historike dhe arkitektonike për qytetin e Prizrenit, është përzgjedhur nga Qendra Rajonale për Trashëgimi Kulturore në Prizren për ndërmarrjen e masave emergjente.

Monumenti në fjalë i cili gjendet brenda Kompleksit të Nënkalasë, Pantelisë dhe Potokmahallës, në rrugën Marin Barleti, shtrihet në kuadër të ndërtesave të vendosura në varg, të ndërtuara në fund të shekullit XIX dhe fillimit të shekullit XX, që paraqesin njërin prej shembujve të rrallë të ndërtesave në form vargu të ruajtura nga kjo periudhë, me funksion banimi, të kombinuar me ndërtesa administrative, fetare dhe ato tregtare. Shtëpia i takon shtëpive me tipologji të tipit me çardak në tërë ballin kryesor, e ndërtuar në kat me material guri dhe qerpiçi, të sistemit “bondruk” me trarëza prej druri.

Bazuar nga vlerësimi dhe shqyrtimi në terren nga ekipi i Qendrës Rajonale për Trashëgimi Kulturore, shtëpia është konsideruar me disa dëmtime dhe defekte të cilat duhet të trajtoheshin menjëher. Këto defekte u identifikuan në strukturë të konstrukcionit dhe mbulesë të kulmit, të mureve të jashtme dhe të brendshme, si dhe në konstrukcion meskatësh.

Degradimi i vazhdueshëm do të shkaktonte dëmtime serioze në monument, andaj duke u bazuar në këtë gjendje faktike, u ndërmorrën hapat e parë për të mbojtur shtëpinë e familjes Morina, e cila është karakteristikë për trashëgimin arkitekturore të Przrenit. Projekti në implementim realizohet si investim i Ministrisë së Kulturës Rinisë dhe Sporteve, i cili po zbatohet përmes Qendrës Rajonale për Trashëgimi Kulturore në Prizren./ KultPlus.com

QRTK përuron nesër disa projekte Restauruese-Konservuese në Qendrën Historike të Prizrenit

Posted on 15 Nëntor, 201715 Nëntor, 2017 by Kult Plus

Nesër përurohen disa projekte Restauruese-Konservuese në Qendrën Historike të Prizrenit, të realizuara nga Qendra Rajonale për Trashëgimi Kulturore në Prizren, shkruan KultPlus.

Në këtë përurim do të marrë pjesë edhe ministri i MKRS-së Kujtim Gashi.

Më poshtë gjeni të bashkangjitur agjendën:

Datë 16.11.2017 (E enjte)

12.30 – Përurimi i punimeve Restauruese – Konservuese në shtëpinë e familjes Pomaku;
12.45 – Vizitë punimeve Restauruese – Konservuese në Hamamin e Gazi Mehmet Pashës;
13.00 – Vizitë punimeve Restauruese – Konservuese në Kompleksinë e familjes Drini;
13.15 – Përurimi i punimeve Restauruese – Konservuese në shtëpinë e familjes Alili;

Gjithashtu do të bëhet përurimi i punimeve Restauruese – Konservuese edhe në:
– Dy Trafostacioneve të vjetra;
– Xhamia e Myderiz Ali Efendisë;
– Përurimi i punimeve të fasadës së familjes Zhoriq./ KultPlus.com

‘Ata që ikin’ të premten premierë në Teatrin e Qytetit ‘Bekim Fehmiu’

Posted on 7 Nëntor, 20177 Nëntor, 2017 by Kult Plus

Në Teatrin e Qytetit ‘Bekim Fehmiu’ në Prizren, të premten vjen premiera e shfaqjes me tekst e regji të Kushtrim Bekteshit ‘Ata që ikin’, shkruan KultPlus.

‘Ata që ikin’, është drama e cila ka mbledhur rreth vetës gjithsej 12 aktorë, të cilët do i dhënë frymë kësaj shfaqje. Ndërsa trajton fatet e njerëzve që ikin, qoftë nga e kaluara, nga dashuria, nga tmerri i përditshmërisë nga realiteti që ua zë frymën, nga vetvetja; me shpresë se një ditë do të ndjehen të plotësuar dhe të lumtur.

Në një intervistë të mëhershme për KultPlus, regjisori i cili rrëmbeu disa çmime me shfaqjen ‘Tartufi’, të realizuar në Teatrin ‘Migjeni’ në Shkodër, pati treguar për këtë dramë të cilën e ka shkruar para dhjetë vitesh.

“‘Ata që ikin’ është një dramë që e kam shkruar para dhjetë vitesh. Shpesh kam menduar ta inskenoj, por kur më është ofruar mundësia jam tërhequr sepse konsideroja se më duhet kohë derisa të krijoj distancën e duhur për t’iu qasur tekstit si regjisor, e duke shmangur subjektivitetin e të qenurit vetë autor i tekstit. Tanimë e ndjej se e kam krijuar atë distancë”, pati thënë për KultPlus, regjisori Bekteshi.

Në kastën e aktorëve të kësaj shfaqje bëjnë pjesë gjithsej 12 aktorë: Xhevdet Doda, Donikë Ahmeti (aktore mysafire), Ernest Malazogu, Fetah Paçarizi, Alban Krasniqi, Zanë Duraku, Hajat Toçilla, Edona Sopaj, Alban Morina, Rifat Smani, Alban Çela si dhe Afrim Kasapolli.

‘Ata që ikin’ vjen premierë më 10 nëntor, me fillim nga ora 20:00 në Teatrin e Qytetit “Bekim Fehmiu” në Prizren./ KultPlus.com

Vazhdojnë punimet restauruese-konservuese në ndërtesat e trashëgimisë kulturore në Prizren

Posted on 3 Nëntor, 20173 Nëntor, 2017 by KultPlus

Qendra Rajonale për Trashëgimi Kulturore në Prizren ka filluar së zbatuari projektin për ndërhyrje emergjente në shtëpinë e familjes Okqaboll në Prizren, përcjellë KultPlus.

Ky projekt është në kuadër të programit të QRTK Prizren për ndërhyrje emergjente në ndërtesat rrezikuara të trashëgimisë kulturore.

Projekti financohet nga Ministria e Kulturës, Rinisë dhe Sportit dhe zbatohet përmes Qendrës Rajonale për Trashëgimi Kulturore në Prizren.

Shtëpia e familjes Okqaboll paraqet një shembull reprezentativ të arkitekturës së banimit të shek. XIX. Forma, organizimi funksional, teknika e ndërtimit, marrëdhënia e vendosjes së shtëpisë në relacion me rrugën, paraqesin elementet kyçe nëpërmjet të cilave ky monument sot interpreton ndërlidhjen e ngushtë ndërmjet kulturës së banimit të transformuar ndër shekuj.

Shtëpia i takon tipit të shtëpive me çardak anësor, një nga shembujt e rrallë që ruhen akoma në Prizren dhe si e tillë ka vlera historike, artistike, shoqërore dhe të raritetit.

Bazuar në inspektimin pamor, ndërtesa është në gjendje të keqe fizike si rezultat i depërtimit të lagështisë nga struktura e amortizuar e kulmit.

Duke u nisur nga vlerësimi i gjendjes, ndërtesa është përzgjedhur për ndërhyrje emergjente, për të parandaluar dëmtimin e mëtejmë dhe për të siguruar ruajtjen e vlerave të saj. / KultPlus.com

04 Band nga Prizreni sonte në Rockuzinë

Posted on 4 Tetor, 20174 Tetor, 2017 by Kult Plus

Sonte ne Rockuzinë do të performojë grupi 04 Band nga Prizreni. Kjo është nata e parë akustike apo unppluged në Rockuzinë, shkruan KultPlus.

04 Band, grupi që po kërkohet në jetën e natës, tashmë të njohur për atmosferën e zjarrtë me
përzgjedhjen dhe trajtimin e këngëve si kurrë më parë.

04 Band është krijuar si rezultat i shumë bendeve tjera që shtruan rrugën e kultivimit të rokut, bende dhe muzicient që ndikuan në formimin e kësaj strukture të “04”. Ky grup muzikor është krijuar në fund të vitit 2015 si formacion akustik, me përbërje: Hysen Kafexhiu – vokal, Jeronim Susuri – kitarë, Uliks Hoxhaj – kitarë dhe Miran Ferati – Kajon. Zhanri i muzikës rock dhe muzikës së lehtë qytetare të trajtuara në formë unplugged janë rrymat që 04 BAND përpiqet ti kultivojë. Grupi Prizrenas gjatë kësaj kohe ka interpretuar po thuajse në të gjitha qytetet e Kosovës: Prizren, Prishtinë, Gjakovë, Rahovec etj,. Si dhe në Shqipëri, konkretisht në Tiranë./ KultPlus.com