Etiketë: proteste

Nxënësit e tri gjimnazeve të Prishtinës organizojnë protestë: Protestojmë sepse është traumë, jo lojë

Posted on by Kult Plus

Nxënësit e tri shkollave të mesme “Sami Frashëri”, “Xhevdet Doda, dhe “Ahmet Gashi” në Prishtinë, kanë paralajmëruar protesta në lidhje me rastin e ngacmimit seksual ndaj një vajze të klasës së parë, me thirrjen ‘Traumë, jo lojë’, shkruan KultPlus

“Videoja e djeshme, shpërfaq nivelin e ulët në të cilin kemi rënë si shoqëri, dhe nevojën e lartë që shoqëria jonë e ka për ngritjen e vetëdijesimit ne raport me fenomenin e ngacmimeve seksuale”, thuhet në komunikatën e dërguar nga përfaqësuesit e nxënësve.

Protesta do të zhvillohet ditën e mërkurë duke filluar nga ora 14:30 me pikëtakim sheshin Zahir Pajaziti, për të vazhduar më pas marshimin deri tek sheshi i Përmendores dhe Komuna e Prishtinës.

 “Të mërkurën, në 14:30, nxënes të dashur e gjimnazistë te Prishtinës, vajza e gra të qytetit tonë, qytetarë e media të nderuara, PROTESTOJMË SË BASHKU TE SHESHI “ZAHIR PAJAZITI”, me distancë dhe maska, duke respektuar rregullat e pandemisë. Protestojmë për vajzat dhe gratë tona, për motrat dhe nënat tona, protestojmë sepse është “TRAUME, JO LOJË”, thuhet tutje në komunikatë.

Më poshtë mund të lexoni komunikatën ë tyre të plotë:

Lexoni deklaratën e tyre të plotë më poshtë.

TRAUMË, JO LOJË

Të dashur gjimnazistë, filloristë, shokë e shoqe, media, qytetarë te Prishtinës.

Pas lajmit të djeshëm, që tronditi të gjithë prej nesh, për rastin e ngacmimit seksual të një të miture, nga dy të mitur të tjerë, të gjithë nxënës të shkollës “Faik Konica”, si nxënës të tri Gjimnazeve kryesore të qytetit, “Sami Frashëri”, “Xhevdet Doda, dhe “Ahmet Gashi”, kemi vendosur që te mërkurën të organizojmë marshin protestues “TRAUMË, JO LOJË”, me pikëtakim tek sheshi “Zahir Pajaziti – Grandi, dhe marshim deri tek sheshi i Përmendores, tek ndërtesa e Komunës se Prishtinës.

Videoja e djeshme, shpërfaq nivelin e ulët në të cilin kemi rënë si shoqëeri, dhe nevojën e lartë që shoqëria jonë e ka për ngritjen e vetdijësimit në raport me fenomenin e ngacmimeve seksuale.

Të mërkurën, në 14:30, nxënes të dashur e gjimnazistë të Prishtinës, vajza e gra të qytetit tonë, qytetarë e media të nderuara, PROTESTOJMË SË BASHKU TE SHESHI “ZAHIR PAJAZITI”, me distancë dhe maska, duke respektuar rregullat e pandemisë.

Protestojmë për vajzat dhe gratë tona, për motrat dhe nënat tona, protestojmë sepse është “TRAUME, JO LOJË”./ KultPlus.com

Gjermanët protestojnë kundër ligjit të ri për izolim

Posted on by Kult Plus

Qindra persona protestuan të mërkurën në Berlin kundër një ligji që pritet të votohet në kuvend për t’i dhënë kompetenca qeverisë qendrore për të vendosur izolim në zonat me shkallë të lartë infeksionesh.

Kancelarja Angela Merkel vendosi që ta hartojë ligjit që nxiti kritika nga kundërshtarët politikë, të cilët kanë thënë se i kufizon liritë personale, pasi 16 shtetet federale refuzuan të vendosin masa të rrepta izolimi pavarësisht shtimit të rasteve me Covid-19.

Në mesin e masave pritet të jenë ora policore nga ora 22 deri në 5 të mëngjesit, kufizimi i tubimeve private dhe kufizimi i dyqaneve e qendrave sportive. Shkollat do të mbyllen dhe nxënësit do t’i kthehen mësimit “online”, nëse shënohen më shumë se 165 raste për 100 mijë banorë, shkruan Reuters, transmeton Gazeta Express.

Qindra protestues, pak prej tyre me maska, u grumbulluan në një ditë me diell afër Portën se Brandenburgut, jo shumë larg ndërtesës së Bundestagut, në qendër të Berlinit.

Protestuesit valëvitën flamuj gjermanë dhe parulla me mbishkrimet “paqe” dhe “demokraci” si dhe lëshuan muzikë. Veturat e policisë ishin të parkuara në rrugë, ndërsa policët vëzhgonin.

Gjermanët janë të ndjeshëm ndaj masave që e kërcënojnë lirinë e lëvizjes për shkak të së kaluarës naziste dhe komuniste. Protesta kundër ligjit të ri jë javët e fundit janë mbajtur në disa qytete në mbarë vendin. / KultPlus.com

Në Argjentinë protestohet kundër mbylljes së shkollave dhe kalimit në mësimin online

Posted on by Kult Plus

Qindra njerëz në Argjentinë protestuan ndaj pezullimit të qeverisë të arsimit ballë për ballë për shkak të përkeqësimit të fundit të situatës së krijuar nga pandemia e Coronavirusit (COVID-19), transmeton KultPlus.

Qindra njerëz u mblodhën tek obelisku “Obelisco” në qendër të kryeqytetit Buenos Aires me thirrjen e opozitës, duke protestuar kundër qeverisë së presidentit të Argjentinës, Alberto Fernandez, dhe masave të marra pasi rritjes së shifrave të rasteve të Coronavirusit, raporton Anadolu Agency (AA).

“Po arsimit ballë për ballë” dhe “Hapini shkollat” shkruante në disa nga pankartat e mbajtura nga protestuesit, të cilët po ashtu brohorisnin slogane kundër qeverisë.

Protesta u mbajtën gjithashtu përpara rezidencës presidenciale, Rezidencës Olivos, si dhe në vende të ndryshme në Buenos Aires. Demonstratat vazhduan deri vonë.

Presidenti argjentinas Fernandez më 15 prill njoftoi një seri masash të reja kundër pandemisë, pasi rastet me COVID-19 arritën nivelet më të larta në vend.

Në mesin e masave janë pezullimi i arsimit ballë për ballë, kufizimi i qarkullimit jashtë nga ora 20:00 deri në orën 06:00 dhe mbyllja e qendrave tregtare.

Fernandez njoftoi se masat e reja vlejnë për Rajonin Metropolitian Buenos Aires (AMBA), që përfshin kryeqytetin Buenos Aires, ku jetojnë rreth 15 milion njerëz, dhe 40 rrethe të tjera. Rajoni është më i populluari në vend dhe më i prekuri nga COVID-19. / KultPlus.com

Protestohet për shkarkimin e Adrian Kastratit: Seksizmi nuk do të financohet nga taksat tona

Posted on by Kult Plus

“Seksizmi nuk do të financohet nga taksat tona”, “Gjuha seksiste është urrejtje”, “Seksistat jashtë”, “Universiteti për studim. Trupi im s’është turpi im”, ishin këto vetëm disa nga thirrjet që u bënë sot në protestën e mbajtur para rektoratit të Universitetit të Prishtinës “Hasan Prishtina”, ku po kërkohej shkarkimi i profesorit Ardian Kastrati, shkruan KultPlus.

Ishte Liridona Sijarinës nga Qendra Kosovare për Studime Gjinore që mbrëmë përmes një statusi në Facebook bëri thirrje për protestë e secilës sot ju bashkuan një numër i konsiderueshëm i njerëzve.

Përmes kësaj proteste e cila erdhi si pasojë e kundërshtimit të gjuhës së urrejtjes dhe seksizmit që profesori i UP-së përdori ndje në një status në Facebook, pa zgjedhjes së Vjosa Osmanit, presidente të Republikës së Kosovës, po kërkohej edhe përjashtimi i tij nga Universiteti i Prishtinës.

Në këtë protestë u shpalosën tri kërkesa kryesore të cilat nëse nuk do të miratohen, atëherë u paralajmërua se do të zhvillohet një protestë tjetër.

Kërkesat përfshinin: Përjashtimin e Ardian Kastratit nga stafi akademik. Një inicim të menjëhershëm rast-dhënë nga rektori i UP-së ndaj Këshillit të Etikës lidhur me deklaratën dhe kërkimin për përjashtimin e Kastratit për shkeljen e kodit të etikës dhe promovimin e gjuhës së urrejtjes. Andaj, Rektori duhet që menjëherë të themelojë një komision drejtues i cili do ta hetojë procesin e punësimit të Adrian Kastratit në stafin akademik. Kërkesa nga Ministri i Arsimit i cili duhet të shkarkojë këshillin drejtues të UP-së për zvarritjen 3 vjeçare të miratimit të rregullores dhe për parandalimin e mbrojtjes nga ngacmimet seksuale dhe Miratimin e rregullores për parandalim dhe mbrojtjen nga ngacmimet seksuale ashtu siç është dorëzuar nga grupi punues, nga Këshilli apo Rektorati deri të premten.

“Mbrëmë deputeti i Kuvendit të Kosovës dhe profesori universitar Ardian Kastrati, bëri një deklaratë seksiste dhe fyese ndaj presidentes së Republikës së Kosovës, Vjosa Osmani-Sadriu. Ai e komentoi në mënyrë fyese dhe ofenduese pamjen fizike të saj. Kjo deklaratë e cila është cilësuar si satirike, assesi nuk është satirike prandaj një qasje e tillë nuk guxon assesi të lexohet si gabim, i cili mund të administrohet dhe të tejkalohet si rast i izoluar. Por duhet lexuar si një mundësi e shkarkuar e cila është krejtësisht patriarkale”, tha Liridona Sijarinës nga Qendra Kosovare për Studime Gjinore.

Sipas saj, të gjithë janë dëshmitarë që kjo mundësi është dominante ndaj personave të tillë, kryesisht burrave të cilët vazhdojnë ti konsiderojnë gratë thjesht si objekte duke e cenuar kështu integritetin e tyre. Kjo gjuhë e cila prodhon gjuhë të urrejtjes është një ndër shkaktarët kryesorë të nënshtrimit të grave, dhunës dhe vrasjes së tyre. E kur kjo bëhet nga personat publikë e aq më shumë personave universitar, kjo është e patolerueshme dhe duhet të dënohet.

Duke e ndëshkuar fuqishëm këtë mendësi të shpërfaqur nga Kastrati, Sijarina së bashku me protestuesit e po ashtu edhe aktivistin Rron Gjinovci deklaruan se do të qëndrojnë pas kërkesave deri në plotësimin e tyre.

“Seksistët nuk duhet të paguhen nga taksat tona prandaj duhet tu përdorim të gjitha mjetet tona demokratike për luftimin e patriarkalit brenda institucioneve publike dhe krijimin e mjediseve të sigurta dhe të drejta për secilin nga ne”, përfundon Sijarina.

Pas kësaj deklarate u kërkua edhe shpërndarja e protestuesve për shkak të rrethanave pandemike, por që qëllimi i tyre do të vazhdojë përpara. / KultPlus.com

Nesër protestohet për përjashtimin e Ardian Kastratit nga UP-ja

Posted on by Kult Plus

Liridona Sijarina nga Qendra Kosovare për Studime Gjinore, përmes një statusi në rrjetin social Facebook ka njoftuar se nesër para rektoratit të UP-së do të mbahet një protestë simbolike përmes së cilës kërkohet përjashtimi i Ardian Kastrati nga Universiteti i Prishtinës, përcjell KultPlus.

‘‘Pas një konsultimi të aktiviste/ëve, u vendos që nesër me fillim nga ora 11:00, në oborrin e rektoratit të UP-së mbahet protesta simbolike dhe tubimi përgatitor për fillimin e protestave me qëllim të ndërprerjes së gjuhës seksiste nga stafi akademik i UP-së, konkretisht përjashtimit të Ardian Kastratit nga UP ku ai është profesor.

Seksizmi nuk do të financohet nga taksapaguesit’‘, thuhet në njoftim. / KultPlus.com

‘Gratë në të zeza’ protestojnë sot në Serbi kundër racizmit ndaj shqiptarëve

Posted on by Kult Plus

Në ditën Ndërkombëtare Kundër Racizmit, organizata “Gratë në të zeza” në Serbi, do të marshojë sot kundër racizmit dhe fyerjes ndaj shqiptarëve.

Sipas një njoftimi në Facebook nga kjo organizatë, bëhet e ditur se ky aksion do të organizohet mesditën e sotme, në rrugën “Knez Mihailova” në Serbi.

“Gratë në të zeza” deklarojnë se gjuha e përdorur nga përfaqësuesit më të lartë të Serbisë në komunikimin zyrtar, e legalizon gjuhën e urrejtjes dhe e shkel Kushtetutën.

“Me rastin e albanofobisë në rritje në Serbi, “Gratë në të zeza” po organizojnë një aksion anti-racist më 21 Mars – Ditën Ndërkombëtare kundër Racizmit, në rrugën Knez Mihailova, nga ora 13:00 deri në 13:30. Ne dënojmë ashpër gjuhën e urrejtjes, intolerancën dhe ksenofobinë kundër komunitetit shqiptar në Serbi, si dhe kundër shqiptarëve të Kosovës. Përfaqësuesit më të lartë të shtetit të Serbisë po prezantojnë termin racist dhe diskriminues ‘Shiptar’ në komunikimin zyrtar. Kjo legalizon gjuhën e urrejtjes shoviniste dhe raciste dhe shkel Kushtetutën dhe ligjet në fuqi”, thuhet në njoftimin për aksionin e sotëm, transmeton Express.

“Gjatë aksionit skenik “Stop Racizmit”, ne do të rendisim vetëm disa shembuj të politikës shtetërore që stigmatizon komunitetin shqiptar! Sa më shumë gjuhë të dini, aq më shumë vleni – ne mësojmë shqip! Nëse doni të shkoni, nëse doni ta bëni – mos u shqetësoni!”, thuhet në njoftim.

Në njoftimin për aksionin e sotëm janë fjalimi i deputetit shqiptar në Kuvendin e Serbisë, Shaip Kamberi në gjuhën shqipe, si dhe dënimi i kryetarit të Këshillit Kombëtar të Shqiptarëve në Serbi, Ragmi Mustafa, për ngritjen e flamurit shqiptar në selinë e Këshillit Kombëtar Shqiptar më 28 nëntor të vitit 2019.   

“Përfaqësuesi i komunitetit shqiptar në Serbi, Shaip Kamberi, u drejtua në gjuhën e tij amtare më 9 shkurt 2021 në Kuvendin e Republikës së Serbisë. Deputetët e ndërprenë atë me thirrje. “Ligji për Asamblenë Kombëtare të Republikës së Serbisë nga viti 2010 përcakton të drejtën e adresimit në gjuhën amtare”. Ragmi Mustafi, kryetar i Këshillit Kombëtar të Shqiptarëve në Serbi, i thirrur në Gjykatën e Kundërvajtjes në Vranje, akuzohet për shkelje të ligjit për flamurin e Serbisë sepse më 28 nëntor 2020 ka ngritur flamurin shqiptar në selinë e Këshillit Kombëtar të Shqiptarëve në Bujanovc. “Kushtetuta e Serbisë, neni 79 përcakton që pakicat kombëtare përcaktojnë simbolet e tyre dhe kanë të drejtë t’i shfaqin ato””, thuhet në njoftim. /gazetaexpress/ KultPlus.com

Në ditën e mësuesit protestë në Prishtinë, si shenjë pakënaqësie për gjendjen e arsimit në vend

Posted on by Kult Plus

Dita e Shkollës së parë Shqipe, apo siç dhe njihet ndryshe si Dita e Mësuesit këtë vit në Prishtinë do të shënohet më një protestë përballë Ministrisë së Arsimit dhe Shkencës, shkruan KultPlus.

Në njoftimin e bërë nga organizatorët e kësaj proteste theksohet se Kosova ka më së paku arsye për festimin e ditës së mësuesit, për shkak të gjendjes në të cilën ndodhet arsimi në vend.

“Kjo ditë tradicionalisht është festuar në Kosovë, madje edhe me dreka, darka e mirënjohje. Ne konsiderojmë, se Kosova ka më së paku arsye për të festuar, duke marrë parasysh gjendjen e rëndë në të cilen ndodhet Arsimi”, thuhet ndër të tjera në njoftim.

Tutje ata kanë shtuar se kjo protestë gjithashtu po organizohet për të ngritur vetëdijen në opinoni publik, por dhe për të kërkuar përgjegjësi nga politika që arsimi të bëhet prioritet.

“Në kuadër të aksionit para objektit të MASH ne do të vendosim një ditar shkollor ku kemi notuar me notën 1 si më e dobëta të gjithë ministrat/et që kanë drejtuar këtë ministri nga paslufta e deri më sot”, thuhet tutje në njoftim.

Kjo protestë e cila është thirrur nga Global Shapers Prishtina do mbahet sot në orën 11:00 duke respektuar të gjitha masat anti covid./ KultPlus.com

Drejtësi për gratë e vrara: Organizohet protestë para Gjykatës Themelore në Prizren

Posted on by Kult Plus

Me 3 shkurt 2021, Gjykata Themelore e Prizrenit e dënoi me 15 vite burgim Ilir Haxhiajn i cili në vitin 2019 e rrahu dhe e vrau bashkëshorten e tij, Hatije Dinën. I dënuari, sipas Gjykatës është dënuar për “lëndim të rëndë trupor” i cili çoi në vdekjen e viktimës.

Për këtë rast kanë reaguar aktivistet/ët, gratë e burrat e këtij vendi, duke u shprehur se ky gjykim është i gabuar dhe si të tillë e kundërshtojnë.

“Ilir Haxhiaj e ka vrarë viktimën dhe ky rast është edhe një rast tjetër i femicidit. Ndërsa trajtimi i tillë i vrasjes së grave nga institucionet përveç që i frikshëm, është duke iu dhënë zemër kriminelëve edhe më shumë!”, thuhet në njoftim.

Sipas tyre, ky vendim i Gjykatës është duke e theksuar edhe një herë qasjen e padrejtë të shtetit ndaj femicidit.

“Përderisa shteti vazhdon të mbajë anën e të fortëve, në duhet të vazhdojmë kundërshtimin tonë dhe t’i kundërvihemi kësaj qasjeje patriarkale dhe paternaliste. Vrasja e grave nga burrat duhet të dënohet më fuqishëm nga institucionet e drejtësisë dhe shteti duhet të merret më seriozisht me jetën e grave.”

Andaj, të revoltuar/a nga ky vendim dhe nga paternalizmi i vazhdueshëm i shtetit, ‘Kolektivi për Mendim dhe Veprim Feminist’ kanë organizuar protestë.

Protesta do të mbahet para Gjykatës Themelore të Prizrenit, të hënën, (08 Shkurt) në ora 12:00. / KultPlus.com

Studentët protestojnë para Qeverisë, shkak mospërfshirja në Ligjin për Rimëkëmbje

Posted on by Kult Plus

Organizata studentore “Studim, Kritikë, Veprim” ka mbajtur  sot një aksion para Qeverisë së Kosovës në shenjë pakënaqësie për mospërfshirjen e  studentëve në Ligjin për Rimëkëmbje Ekonomike, i cili u votua të premten e kaluar në Kuvendin e Kosovës.

Para objektit të Qeverisë ata vendosën një pako të zezë me mesazhin “Ndihma e Qeverisë për studentë”.

Dionit Kabashi, nga kjo organizatë theksoi se ende pa nisur viti akademik i janë drejtuar me 13 kërkesa Këshillave Drejtues të Universiteteve Publike, Ministrisë së Arsimit, Shkencës dhe Qeverisë së Kosovës.

“Kemi kërkuar largimin e të gjitha tarifave për shkollim të vitit akademik 2020/2021, si ndihmë e vogël për studentët dhe familjet e tyre për shkak të krizës së madhe ekonomike si pasojë  e COVID-19 që i ka prekur ata dhe familjet e tyre”, ka thënë ai.

Kabashi theksoi se përmes aksionit simbolikë po shprehin pakënaqësitë se si qeveria në një ligj qindra milionësh nuk gjet vend për studentët e këtij vendi. /Gazeta Express/ KultPlus.com

Banorët e Krushës sot protestojnë kundër përgjysmimit të dënimit të Darko Tasiqit

Posted on by Kult Plus

Gjykata e Apelit ia ka përgjysmuar dënimin prej 22 vjetësh që kishte marrë Gjykata Themelore në Prizren në 11 vjet kriminelit të luftës në Kosovë, Darko Tasiq.

Të irrituar nga ky vendim krushjanët, familjarë të viktimave të Tasiq, janë nisur drejt Prishtinës për të protestuar kundër këtij vendimi.

Ata janë tubuar në Krushë dhe nga aty u nisën për në kryeqytet.

Sipas pikës 1 të aktakuzës, Tasiq në Krushë të Vogël mori pjesë në konfiskim të pasurisë, plaçkitje, shkatërrim të paligjshëm dhe të qëllimshëm të pasurisë (djegien e shtëpive) që nuk justifikohej me nevojat ushtarake.

Ndërsa sipas pikës 2 të aktakuzës, ai akuzohej edhe me veprime të tjera si pjesëmarrje në përdhosjen e trupave të pajetë të personave të paidentifikuar, duke i djegur ato dhe duke i hedhur në lumin Drin.

Edhe kur u dënua me 22 vjet, krushjanët para Gjykatës në Prizren protestuan ashpër duke thënë se po iu bëhet padrejtësi për herë të dytë familjarëve të tyre të vdekur. / KultPlus.com

Masat e reja anti-Covid, paralajmërohet protestë për të premten

Posted on by Kult Plus

Një thirrje për protestë po shpërndahet në rrjetet sociale për të kundërshtuar masat e reja anti-Covid të Qeverisë së Kosovës.

Protesta është paralajmëruar të mbahet të premten, në orën 11:00, ndërsa përmes saj do të kundërshtohet ora policore dhe masat e tjera të Qeverisë.

“Kjo protestë gjithëpopullore do të jetë protestë paqësore, e cila do të mbahet në sheshin Skënderbe në Prishtinë, para ndërtesës së Qeverisë. Pikat e protestës janë: jo orë policore, pakënaqësitë e shumta me qeverisje dhe masat e ndërmarra kundër covid-19, mos ofrimi i ndihmave materiale e financiare për popullin gjatë pandemisë, kthimin e shifrës prej mbi 2 milion euro të vjedhura nga thesari i shtetit (ultimatum 48 orë – të paraqiten dokumente & kryesit e aktit të turpshëm të vihen para drejtësisë, dorëheqja e Armend Zemajt nga pozita e ministrit të shëndetësisë, pozitë e cila nuk i takon me profesion”, thuhet në njoftimin e protestës.

Po ashtu, organizatorët e protestës kanë paralajmëruar se nëse këto pika të kërkuara nuk zbatohen deri më 13 nëntor, protesta do të marrë përmasa të tjera.

“Nëse këto pika nuk zbatohen nga data 13 nëntor 2020, protesta do të marrë përmasa të tjera. Pjesëmarrësit në protestë duhet të jenë me maska”, thuhet në njoftim./KultPlus.com

Arrestohet kryetari i Shoqatës së Gastronomëve

Posted on by Kult Plus

Pas protestës së gastronomeve para lokaleve të tyre është arrestuar kryetari i kësaj Shoqate, Petrit Kllokoqi.

Kllokoqi është dërguar në stacionin policor, transmeton KultPlus. Ai ka thënë se nuk kanë kërkuar leje për mbajtjen e protestës së sotme duke thënë se pjesëmarrësit kanë protestuar para bizneseve të tyre.

Kllokoqi ka shtuar se policinë e kanë lajmëruar për protestën që pritet të mbahet të hënën.

Pas përfundimit të protestës Kllokoqi ka paralajmëruar protestë masive të hënën.

“Nuk e shohim të arsyeshme që t’i mbyllim bizneset e t’i lëmë kufijtë hapur. Çdo problem që po na sjellin masat ku shteti nuk ishte në gjendje të ulet dhe t’u ofrojë bizneseve por vetëm t’u marrë. Me këtë protestë paralajmëruam protestën masive të së hënës. Nëse deri sot kemi paguar tatim kërkojmë prej shtetit që atë tatim të na kthejë. Presim një pako të veçantë”, ka thënë Kllokoqi. / KultPlus.com

Premtimi 300 euro shtesë për stafin shëndetësor nuk u përmbush, protestojnë të martën

Posted on by Kult Plus

Një protestë tjetër e stafit mbështetës shëndetësor është paralajmëruar për të martën, pranë drejtorisë së SHSKUK-së, me kërkesë që të realizohet pako prej 300 eurove .

Sipas njoftimit nga Këshilli Organizativ, kjo protestë do të fillojë të martën dhe do të vazhdojë deri në realizimin e premtimit të Qeverisë së Republikës së Kosovës..

“Këtë ditë do të fillojmë me bojkotimin e punës për një orë pune, kurse nëse nuk ka reflektim pozitiv nga menaxhmenti dhe Qeveria, ne do të vazhdojmë protestat e radhës në ditët në vijim, me radikalizim të veprimeve tona”, thuhet në njoftim.

“Ju drejtohemi 1.617 punëtorëve të stafit mbështetës shëndetësor qe të martën më 6 tetor në ora 10:00, pranë Drejtorisë së SHSKUK-së, do vazhdojmë me protestën e radhës për realizimin e kërkesës tonë që edhe për këto kategori, gjysmën në shumën e të punësuarve në QKUK dhe SHSKUK të realizohet pakoja prej 300€ për ne stafin mbështetsh ishte premtimi për “heronjtë” e luftës kundër Covid-19  nga  ana e kryeministrit, ministrisë së Shëndetësisë dhe menaxhmentit tonë. Me këtë ftesë ju bëjnë thirrje që në reagimin tonë përmes kësaj proteste, të marrin pjesë dhe të na bashkëngjiten edhe të punësuarit e këtyre kategorive edhe nga regjioni i Prizrenit, Pejës e qendrave tjera të Kosovës dhe mbi 300 Specializantë që nuk janë përfshirë në këtë pako emergjente”, thuhet në njoftim. / KultPlus.com

Infermierët sot protestojnë me moton: “Na quajtët heronj, andaj mos na vrisni”

Posted on by Kult Plus

Për sot janë paralajmëruar tetë ngjarje të cilat do të mbahen gjatë ditës në Kosovë.

Një ndër këto ngjarje është edhe protesta nga infermierët e QKUK’së.

”Sindikata e Infermierëve të Kosovës, të gjithë punëtorët shëndetësorë, organizatat dhe shoqatat tjera përfaqësuese protestojnë sot me moton “Na quajtët heronj, andaj mos na vrisni”. Protesta mbahet para Klinikës së Kirurgjisë, ora 11:00.” / KultPlus.com

Protestojnë aktorët, Maxhuni: Nëse nuk na plotësoni kërkesat, atëherë mos u krenohuni me neve

Posted on by Kult Plus

Fishkëllima e filikaqave të tyre dëgjohej shumë larg, teksa në duar mbanin pankarta që shkruhej “#përteatrindodona”. Mos realizimi i kërkesave për shtimin e numrit të aktorëve në Teatrin Dodona, i bëri grupin e aktorëve të Prishtinës të protestojnë përpara Komunës së Prishtinës, shkruan KultPlus.

Aktorët e Prishtinës u bashkuan për të shprehur indinjatën e tyre ndaj Komunës për mos realizimin e kërkesave të tyre që 2 vite për krijimin e një trupe rezidente në Teatrin Dodona, në të cilën kryejnë punën e tyre vetëm 4 aktorë.

Ky numër i ulët i aktorëve është edhe kundër ligjit për Teatro në të cilin thuhet: “Teatrot profesioniste të qyteteve duhet të kenë ansambël artistik, rezident, të përbërë nga së paku njëzetë(20) aktorë cilësorë të të gjitha gjeneratave”.

Molika Maxhuni, njëra ndër aktoret pjesëmarrëse, në protestë është shprehur se mirësjellja e tyre i ka bërë që ata sot të jenë në këtë gjendje.

“Ne jemi gjithmonë bira e fundit e kavallit. Kjo nuk është mirë për secilin këtu që jemi. Kur po vie puna të krenohet një shtet, përfaqësuesit më të mëdhenj ose ambasadorët po janë artistët dhe sportistët. Atëherë le të themi mos u krenohuni me neve!”, u shpreh Maxhuni.

Në anën tjetër, Leonit Maloku tha se aktorët kanë hasur në vesh të shurdhër që 2 vite te Kryetari i Komunës dhe te Drejtoria për Kulturë, Rini dhe Sport.

“Po shpresoj që Komuna do të reflektoj dhe tash para se ta votojnë buxhetin do të propozojnë që të bëhet audicioni për shtimin e numrit të aktorëve në ‘Dodonë’ dhe të punësohen aktorët e Prishtinës”.

 Ilir Prapashtica, një aktor tjetër i qytetit të Prishtinës, duke thënë se kësaj here nuk do të flasin shumë.

“Sipas informatave të cilat i kemi Komuna e Prishtinës do ta hap një konkurs prej 5 aktorëve, që ajo është e papranueshme për ne si grup i aktorëve të Prishtinës për arsye se 5 aktorë në teatrin e qytetit është për të bërë hajgare”. Veç të tjerash, përgjatë protestës u përmend edhe një deklaratë nga Ministria e Financave se Teatri Dodona i ka 17 të punësuar. Aktorët u shprehën se është për keqardhje funksionimi i tillë i teatrit përderisa 13 prej tyre janë staf teknik dhe vetëm 4 aktorë. Grupi i aktorëve të Prishtinës vazhduan protestën e tyre me duartrokitje dhe brohoritje “bravo” në shenjë revolte ndaj Komunës. Për fund ata në shkallët hyrëse të objektit lanë pankartat e tyre me mbishkrimet “#përteatrindodona”. / Medina Pasoma/ KultPlus.com

Maloku: Për Komunën e Prishtinës, aktorët janë ‘bira e fundit e kavallit’

Posted on by Kult Plus

Suada Qorraj

Dikur Teatri i Faruk Begollit, vendi ku aktrimi i jepte jetë publikut edhe vetë sallës, sot ballafaqohet me probleme të shumta, duke u nisë prej atyre bazike, mungesës së aktorëve rezident.

Aktorë të shumtë kanë kërkuar prej Komunës së Prishtinës të jenë pjesë e ansamblit rezident të Teatrit “Dodona”,  për të pasuar me konferencë për medie, e kërkesë që tashmë po del edhe në rrugë, pasi që, një grup i aktorëve kanë paralajmëruar edhe protestë që pritet të organizohet nesër.

Një iniciativë që kishte filluar dy vite më parë, nga aktorët e kryeqytetit ende nuk ka gjetur zgjidhje. Është fjala për shtimin e numri të aktorëve rezident në Teatrin ‘Dodona’, nga katër sa janë tani, në 20, sa e kërkon edhe ligji për teatro në Republikën e Kosovës.

Në një intervistë për KultPlus, Leonit Maloku, një nga përfaqësuesit e komuniteti të aktorëve të Prishtinës ka treguar se që kur kanë filluar të ngrisin zërin për këtë çështje dy vite më parë, ende nuk kanë marrë ndonjë përgjigje definitive nga ana e Komunës së Prishtinës.

Sipas tij, ishte reagimi i kryetarit të Komunës, Shpend Ahmeti, pas rrëzimit të Teatrit të Shqipërisë, ajo çka i nxiti edhe më shumë komunitetin e aktorëve që të reagojnë për këtë çështje, por edhe premtimet e kryetarit që së bashku të gjejnë një zgjidhje.

“Pasi kryetari i Komunës, Shpend Ahmeti, bëri një status duke shprehur keqardhjen e tij për rrëzimin e Teatrit Kombëtar në Shqipëri, unë i reagova me anë të një komenti duke e pyetur se çka ka bërë për komunën tonë, menjëherë pas kësaj ishte vetë kryetari ai që më kontaktoi dhe tha që të punojmë së bashku në mënyrë që të qojmë përpara kërkesën tuaj. Mirëpo që nga ajo kohë takimet dhe mesazhet me kryetarin kanë qenë të pamundura”, ka thënë Maloku.

Maloku tregon se që nga koha kur është mbajtur konferenca me gazetarë në gusht të këtij viti, Komuna nuk i ka njoftuar lidhur me vendimet që janë marrë së bashku me Ministrinë e Financave.

Përfaqësuesi i komunitetit të aktorëve të Prishtinës, ka vetëm një hall, votimin e buxhetit nga ana e asamblesë komunale gjatë ditës së nesërme. Sipas tij në qoftë se nuk ndahet buxheti përkitazi me kërkesat e tyre atëherë teatri ‘Dodona’ do mbes edhe një vit tjetër me vetëm katër aktorë të punësuar.

“Ne kemi bërë kërkesa për shtimin e 16 aktorëve rezidentë në teatrin ‘Dodona’ përpara votimit të buxhetit në asamblenë komunale, sepse në qoftë se nuk aprovohen kërkesat tona atëherë teatri do të mbetet ashtu siç është, me vetëm 4 aktorë, edhe për një vit tjetër”, ka shtuar ai.

Leonit Maloku thotë se për Ministrinë e Financave, të punësuarit janë vetëm numra, ata shohin 17 të punësuar, por nuk e marrin në konsideratë faktin që teatri ka vetëm katër aktorë. Sipas tij janë aktorët atë që e bëjnë teatrin.

“Ministria e Financave të punësuarit i nuk i sheh ndryshe vetëm si numra të punësuar. Dodona ka 17 të punësuar, ka teknik, ka rojtar, ka biletashitës, ka ndriçues dhe vetëm katër aktorë. Por teatri nuk mund të bëhet pa aktorë, sado të nevojshëm dhe të domosdoshëm që janë pjesa tjetër e stafit, aktorët janë të pazëvendësueshëm”, ka pohuar ai.

Aktori ka thënë se Ministria po synon që të punësoj vetëm edhe 5 aktorë, e që sipas tij nuk janë të mjaftueshëm, madje në kundërshtim me ligjin për teatrot. Ai ka potencuar se Prishtina si kryeqytet ka nevojë për më shumë aktorë, sesa cilido teatër në vend.

Maloku ka shtuar se pas konferencës ata kanë menduar edhe organizimin e një proteste. Duke mos dashur të shpalosë shumë detaje rreth saj, ai ka bërë të ditur se nesër në orën 12:00 përballë Komunës së Prishtinës, komuniteti i aktorëve do të organizojë protestë, për të plotësuar kështu edhe kërkesat e tyre.

“Ne pas konferencës hapin tjetër e kemi menduar protestën dhe tash do dalim në protestë nesër në orën 12:00 para Komunës. Kurse me kohë do të mendojmë se cili do të jetë hapi tjetër që do ndërmarrim edhe pse realisht nuk di ndonjë formë tjetër që mund të kryej punë më mirë se protesta”, ka thënë Maloku.

Krejt në fund Leonit Maloku ka thënë se për komunën komuniteti i aktorëve deri më tani ka qenë ‘bira e fundit e kavallit’.

“Siç duket për komunën ne artistët jemi bira e fundit e kavallit, kështu do të mund të thoja, sepse për komunën çdo gjë po ecë edhe pa komunitetin kulturor”, ka përfunduar Maloku./ KultPlus.com

‘Kundër plagjiaturës të përbashkuar’, protestohet përpara ambasadave të Kosovës e Shqipërisë

Posted on by Kult Plus

Organizata për Rritjen e Cilësisë në Arsim bashkë me organizatën “Qëndresa Qytetare” mbajtën aksion protestues përpara ambasadave të Kosovës e Shqipërisë, duke akuzuar dy ministrat e shteteve shqiptare për plagjiaturë dhe duke bërë thirrje bashkimi kundër këtij fenomeni, shkruan KultPlus.

Për ORCA-në dhe OJQ “Qëndresa Qytetare” ministri i arsimit të Kosovës, Ramë Likaj dhe ai i Shqipërisë, Elvis Kushi kanë bërë plagjiaturë në punimet e tyre akademike.

“Plagjiatura është vjedhje. Është hajni e pronës intelektuale së dikujt. Plagjiatori është hajdut. Hajn që ka vjedhur nga tjetri”, thuhet në komunikatën e ORCA-së.

Madje, përveç shkrimit “Kundër plagjiaturës të përbashkuar”, organizatat kanë ndërruar vargjet e himnit kombëtar, duke i përshtatur ato sipas thirrjes së tyre anti-plagjiat.

“Përballë bashkimit të tyre, Qëndresa Qytetare si organizatë e shoqërisë civile në Shqipëri dhe Organizata për Rritjen e Cilësisë në Arsim (ORCA) në Kosovë, ftojnë qytetarët e Kosovës dhe Shqipërisë të përbashkohen, siç na fton himni kombëtar, kësaj radhe kundër plagjiaturës”, thuhet tutje në komunikatë.

Ndër të tjera, ata kanë përmendur edhe rezultatin e dy shteteve në testit PISA, mesataren më të dobët në rajon për punime shkencore nga këto shtete, mesataren më të dobët të prodhimit shkencor në rajon. / KultPlus.com

Protestë për dhunën ndaj grave, theksohet dështimi i institucioneve për reagim në kohë

Posted on by Kult Plus

24 vite e gjysmë iu dha dënimi një vrasësi të dyfishtë, i cili ia morri jetën gruas dhe vajzës së tij. Shumë raste për dhunën në familje u raportuan së fundmi, e madje disa përfunduan me fatalitet. Për të protestuar dhunimin dhe vrasjen e grave, organizata “Replikë” ka organizuar një aksion rrugor, shkruan KultPlus.

“Jom njeri, s’jom rob”, “Poshtë patriarkati”, “Personalja është politike”, “Gjyqësor Kanunor”, “Edhe sa thirrje të humbura” ishin disa nga mbishkrimet e pankartave të protestës ndaj padrejtësive që po iu bëhen grave në hallka sociale e institucionale.

Kjo protestë me qëllim të parandalimit të shpërndarjes së virusit u realizua me biçikleta, ndërkaq disa që nuk kishin mundësi t’i siguronin ato, vazhduan brohoritjet në këmbë.

Bjeshka Guri, aktiviste në kuadër të kësaj proteste shprehi pakënaqësinë e saj në emër të protestuesve për dështimin e institucioneve për reagim në kohën e duhur, atëherë kur grave iu nevojitet mbrojtja.

“Institucionet tona promovojnë një kulturë dhune, duke i fajësuar viktimat e duke mos dënuar kriminelët. Jemi lodhur duke pritur në ankth për të dëgjuar për gratë e radhës që vriten e për ato që vazhdojnë të dhunohen”, theksoj Guri.

Pavarësisht lejueshmërisë së limituar të këtyre aksioneve si pasojë e Covidit, ajo tregoj se kjo protestë ka rëndësi për ta sepse jetërat e grave janë duke u rrezikuar.

“Jeta e çdo gruaja vlen dhe ne nuk mund të heshtim kundrejt padrejtësive ndaj grave vetëm pse janë gra”, u shpreh Bjeshka Guri. Në fund të fjalimit të saj, u bë thirrja publike për përgjegjësi të institucioneve të Kosovës për të siguruar drejtësi për gratë.

Protestuesit të cilën nisën aksionin e tyre në Sheshin “Zahir Pajaziti” filluan protestimin duke ecur e duke ngasur biçikletat e tyre nën brohoritjet: “Dhuna nuk ka arsyetim”, “Edhe sa thirrje të humbura”, “Drejtësi për Valbonën, për Klarën, për Antigonën”, “Dhuna po rritet, dënimet po ulen”, “Pa drejtësi nuk ka qetësi”, “Edhe sa herë doni me na vra”, “Shteti po vazhdon me na dhunu”, “Jeta e grave hajgare për shtetin”.

Protestuesit kishin zgjedhur rrugët qendrore të Prishtinës, për t’i vetëdijesuar qytetarët dhe institucionet për pasigurinë që po iu shkaktohen grave. Kështu, ata kaluan përpara Prokurorisë Speciale, Policisë së Kosovës, Avokatit të Popullit, mirëpo askush nga institucionet përkatëse nuk reagoj asgjë, përveçse dy policëve të cilët dolën dhe ecën bashkë me protestuesit. Ata vazhduan edhe në rrugët e tjera të kryeqytetit. /KultPlus.com

Gastronomët thyejnë pjata para Qeverisë

Posted on by Kult Plus


Gastronomet kanë thyer pjata para Qeverisë për t’i shprehur pakënaqësitë e tyre për mospërkrahjen financiare nga institucionet e Kosovës, si dhe për mos shfuqizimin e masave ndaj gastronomisë.

Kryetari i kësaj shoqate, Petrit Kllokoqi ka thënë se kjo është thirrje edhe për gastronomët e Kosovës që t’i bashkëngjiten këtij aksioni, si dhe protestës më 25 shtator në shesh, para Qeverisë së Kosovës.

“Përmes këtij akti simbolik po shprehim pakënaqësitë tona ndaj mospërkrahjes financiare nga institucionet e Kosovës si dhe mos shfuqizimin e masave ndaj gastronomisë. Po ashtu, iu bëjmë thirrje të gjithë gastronomëve që t’i bashkëngjiten këtij aksioni simbolik, e po ashtu edhe protestës më 25 shtator në ora 14:00, para parlamentit dhe Qeverisë”, ka thënë Kllokoqi./ gazetaexpress/ KultPlus.com

Shoqata e Gastronomëve bën thirrje për protestë: Kësaj radhe nuk do të ketë mirëkuptim

Posted on by Kult Plus

Shoqata e Gastronomëve të Kosovës ka njoftuar se më datë 25 të këtij muaji do të mbyllin bizneset për një kohë të caktuar dhe do të shkojnë para Qeverisë e Parlamentit të Kosovës për të dorëzuar kuponat fiskal, përcjellë KultPlus.

Lajmin e ka bërë të ditur Petrit Kllokoqi përmes një njoftimi në rrjetin social Facebook, ku është shprehur tejet i zhgënjyer me Qeverinë e Kosovës, duke potencuar se kësaj të fundit nuk i intereson mirëqenia e asnjë punëtori në Kosovë dhe se krejt çfarë kërkuan nga Shoqata e Gastronomëve ka qenë ‘MBIJETESA’.

Më poshtë gjeni njoftimin e plotë të Kllokoqit

Shoqata e Gastronomeve të Kosovës

SHGK: Shteti tregoi që nuk i intereson mirëqenia e asnjë punëtori në Kosovë, ne kërkuam vetëm mbijetesë

Edhe një herë u cenua e drejta e biznesit në Kosovë.
Edhe një herë shteti tregoi që nuk i intereson mirëqenia e asnjë punëtori në Kosovë.

Papunësia vetëm në pandemi shënoi rritje prej 30%, e mos të flasim për gjendjen normale që gjithnjë ka qenë katastrofale. E mos të flasim as për humbjet enorme të bizneseve.

Nuk kërkuam asgjë më tepër se sa MBIJETESË.

Vazhdimisht kërkuam që ky orar të rritet, gjithnjë duke i respektuar të gjitha masat.

Kërkuam edhe një njoftim se si të punojmë brenda lokaleve tona pasi që jemi në prag të vjeshtës.

Thirrjet tona për kryeministrin, qeverinë e parlamentin po duket të jenë të kota.

Jemi shteti i vetëm në botë që skemi as plan, e as mbështetje për krizën e thellë, kemi vetëm retorikë boshe …

Herën e fundit kur Shoqata paralajmëroi dhe mbajti protestë, Policia e Kosoves me urdhër të Kryeministrit, na lejuan vetëm 7 minuta aktivitet, ne e mirëkuptuam Policinë, nuk donim arrestime e as përkeqësim të situatës, e as situata të palakmushme në mes Policisë dhe Gastronomeve. Respektuam çdo urdhër e vendim që na u dha.

Këtë radhë nuk do të kemi mirëkuptim, sepse mirëkuptim për ne nuk pat as edhe një moment. Ne duam të jemi përgjegjës ndaj punonjësve tanë, familjeve tyre dhe familjeve tona.

Fatkeqësisht më të lehtë dhe më të përballueshme e kemi të kalojmë kohë në qeli sesa të shohim shkatërrimin e asaj që ndërtuam me shumë mund. Ne nuk na ka mbetur asnjë alternativë tjetër, po na e cënoni ekzistencën, më keq se kaq nuk ka.

I bëjmë thirrje të gjithë gastronomëve të Republikes së Kosovës që me datën 25.09.2020 nga ora 14:00-15:00 të mbyllin bizneset e tyre dhe të na bashkangjiten në ora 14:00 para Qeverisë dhe Parlamentit të Kosovës që të dorëzojmë kuponat fiskal!

Atë që virusi po ua shkakton njerëzve, ju po ia shkaktoni Gastronomisë së Kosovës. / KultPlus.com

“I am I” proteston për marrëveshjen në Washington: Nga një Banana në Carrot Republic

Posted on by Kult Plus

Artisti kosovar i njohur si “I am I” njihet për protestat e tij për zhvillimet e vendit. Kësaj radhe, ai ka protestuar për nënshkrimin e marrëveshjes mes Kosovës e Serbisë në Washington, shkruan KultPlus.

Ai thekson për KultPlus se kjo protestë ndërlidhet me atë të kaluar, atëherë kur në pankartën e tij shkruhej “Kujdes nga Bananja” dhe e quante Kosovën “Banana Republic”.

“Tani katër ditë pas arrritjes së asaj marrëveshjes, protesta tregon që “Për me na kojt karrotën na e kanë ly me mjaltë”, nga një Banana në Carrot Republic”, shprehet artisti “I am I”.

Harta e Kosovës është e përbërë nga karrotat, kurse yjet nga mjalta. Në pankartën e tij lexohet “Për me na kojt karrotën na e kanë ly me mjaltë”, teksa në maicën e tij shkruhet “We are not problematic guys! We are playboys!” dhe në duar mban një kavanoz me mjaltë me mbishkrim “Ku fshihet lepuri?!”, në të cilën është e zhytur një karrotë./ KultPlus.com

Artistët gjermanë protestojnë për më shumë përkrahje nga qeveria

Posted on by Kult Plus

Në Berlin, artistët po protestojnë për të kërkuar më shumë përkrahje financiare nga shteti për t’i mbijetuar krizës së shkaktuar nga koronavirusi.

Artistët performuan në rrugët e Berlinit si pjesë e protestave në të cilat u bë thirrje për më shumë përkrahje nga autoritetet, shkruan The Guardian, transmeton KultPlus.

Katharina Micada, një nga organizatoret e protestave, për një gazetë lokale tha: “Njerëzit e tjerë po marrin ndihma për t’ia dalë mbanë në këtë krizë, por ne po lihemi anash.”

Shumë gjermanë janë të zemëruar, sepse pjesë të mëdha të programit të ndihmave prej një miliard dollarësh ende nuk janë shpërndarë, ndërsa rregullat për përfitim ua kanë vështirësuar artistëve mundësinë për përfitim nga ky fond.

Juggler Fabio Zimmerman tha: “Arti nuk shihet si esencial. Skena e llojllojshme kulturore e Berlinit është një thesar, por në krizë, thesarët shiten të parët.”

Ndryshe, Gjermania është një ndër vendet me më së shumti të infektuar me koronavirus në Evropë dhe ditëve të fundit ka shënuar rritje të numrit të rasteve ditore, duke i shqetësuar autoritetet. / KultPlus.com

Protestojnë artistët: Askush nuk mund ta rishkruajë Historinë e Kosovës

Posted on by Kult Plus

Shumë artistë të njohur të Kosovës, mbrëmë në mënyrë të organizuar kanë postuar mesazhe për drejtësinë ndërkombëtare. Ata nëpërmjet mesazheve të drejtpërdrejta dhe sensibilizimit me viktimat e luftës, kanë kërkuar nga ndërkombëtarët që të gjykojnë dhe të dënojnë kriminelët serbë, shkruan KultPlus.

Kësaj nisme i janë bashkuar artistët si: Shëngjyl Ismaili, Agan Asllani, Jeton Zogiani, Ylber Bardhi, Kushtrim Sheremeti, Kushtrim Qerimi e shumë të tjerë.

Më poshtë janë disa nga mesazhet që janë postuar nga artistët e njohur të kinos dhe teatrit të Kosovës:

“Pse nuk po i gjykoni kriminelët serbë që i kryen mbi 400 masakra mizore mbi popullsinë shqiptare? #duamdrejtësi”.

“Askush nuk mund ta rishkruajë Historinë e Kosovës! #meçlirimtarët”.

“Pse po i amnistoni kriminelët serbë që i dhunuan mbi 20 mijë gra shqiptare? #duamdrejtësi”.

“Serbia e spastroi etnikisht Kosovën dhe dëboi mbi 1 milion shqiptarë nga shtëpitë e tyre. #duamdrejtësi”.

“Kriminelët serbë i dogjën mbi 120 mijë shtëpi të shqiptarëve. #duamdrejtësi”.

“Shteti i Serbisë vrau rreth 11 mijë shqiptarë të pafajshëm. #kuështëdrejtësiandërkombëtare”.

“Mbi 1300 fëmijë shqiptarë u vranë nga kriminelët serbë, të cilët lëvizin lirshëm kudo nëpër botë. #kjonukështëdrejtësi”.

“Zbardhni fatin e 1653 personave të pagjetur! #namungojnë”. “Ku janë varrezat masive? I duam eshtrat e familjarëve tanë. #duamdrejtësi”.

“Kosova është turpi i drejtësisë ndërkombëtare! #drejtësieturpit”. / KultPlus.com

Në Prishtinë protestohet sot kundër ndërtimit të Xhamisë së Madhe

Posted on by Kult Plus

Sot do të mbahet protestë kundër ndërtimit të Xhamisë së Madhe apo të ashtuquajturës “Xhamia e Erdoganit” në Prishtinë.

Protesta e cila pritet të nis në ora 11:00, është paralajmëruar në Facebook nga Binak Gashi, ish-Komandant i Ushtrisë Çlirimtare të Kosovës, tashmë pjesë e OVL-së së UÇK-së.

Protesta do të mbahet në lokacionin ku ka filluar të ndërtohet xhamia, në afërsi të objektit qendror të Telekomit të Kosovës.

Gashi ka kritikuar faktin se xhamia është e financuar nga Turqia, derisa ka thënë se Kosova nuk është provincë e Turqisë por “histori e Ilirisë që nga koha pellazge”.

“Fillimi i punimeve për këtë xhami ka ndodhur me 16 korrik si koincidencë e përvjetorit të puçit ushtarak në Turqi, tregon atak direkt kundër Pavarësisë së Kosovës dhe institucioneve të saj të heshtura”, ka thënë Gashi. / KultPlus.com