Bonusi i Rijetësimit, restaurohet banesa Icka në qendrën historike të Pogradecit

Posted on 13 Qershor, 202313 Qershor, 2023 by Kult Plus

Përfundoi restaurimi i banesës së vëllazërisë Icka, në zemër të qendrës historike në Pogradec. Drejtori i Administratës Rajonale të Zonave të Mbrojtura Korçë, Gjergji Koki, ka ndarë në rrjetet sociale pamje nga banesa, restaurimi i të cilës nisi kur Koki ishte drejtor i DRTK Korçë.

“U riktheva si vizitor i përhershëm i Pogradecit për të parë nga afër punën për restaurimin dhe rijetëzimin e kësaj banese emblematike e cila ishte pjesë e skemës mbështetëse të Bonusit të Rijetësimit e bashkëfinancuar nga Ministria e Kulturës”, shkruan Gjergji Koki.

Ai thotë se rezultatet flasin vetë, pasi duket që është punuar me kujdes ndaj detajeve dhe janë bërë punë me imtësi.

Banesa e vëllezërve Icka është shembulli se si trashëgimia kthehet në një motor zhvillimi për ekonomitë e vogla lokale. “Rivlerësimi i kësaj trashëgimie, do të jetë një ogur i mbarë për fillimin e punës për rijetësimim e Qendrës Historike të Pogradecit”, është shprehur Gjergji Koki.

Ndërtesa historike e cila dikur ka shërbyer si punishte e mjeshtërisë së drurit, zanat i përcjellë ndër breza, është shpëtuar nga degradimi. Ndërhyrjet në kuadër të programit të Ministrisë së Kulturës, për “Rijetësimin”, përfshinë konservim, restaurim e rijetësim. Kjo ndërtesë është Monument Kulture Kat. I. / KultPlus.com

Dumoshi prezanton planet e menaxhimit të Qendrës Historike dhe Kalasë së Prizrenit

Posted on 17 Dhjetor, 202017 Dhjetor, 2020 by Kult Plus

Ministrja e Kulturës, Rinisë dhe Sportit, Vlora Dumoshi së bashku me Kryeministrin e Republikës së Kosovës Avdullah Hoti dhe Kryetarin e Komunës së Prizrenit Mytaher Haskuka, ka bërë prezantimin e planeve të menaxhimit të Qendrës historike në Prizren dhe Kalasë së Prizrenit.

Me këtë rast Ministrja Vlora Dumoshi tha se Muzeu Kombëtar i Kosovës edhe në këtë kohë pandemie mbetet nga institucionet që po na bën bashkë për aktivitete të ndryshme.

“Sot jemi së bashku për të miratuar dy planet e para të menaxhimit të aseteve të trashëgimisë kulturore për Qendrën Historike të Prizrenit dhe për Kalanë e Prizrenit.” tha ministrja Dumoshi.

“E veçantë e këtij procesi është gjithëpërfshirja dhe transparenca e bartësve të këtyre proceseve që të dyja të hartuara nga organizatat jo qeveritare më përvojë në fushën e trashëgimisë kulturore Organizata Ec më ndryshe dhe Organizata e CHwB Kosova të kombinuara e mbështetura edhe nga Ministria e Kulturës, Rinisë dhe Sportit dhe institucionet varëse të saj. Pavarësisht sfidave kanë bërë një punë të shkëlqyer.” – tha ministrja Dumoshi.

Gjithashtu ministrja Dumoshi shprehu mirënjohje edhe për Ambasadën e Amerikës në Kosovë dhe misionin e OSBE-së në Kosovë të e cilat po përkrahin vazhdimisht projektet e MKRS-së.

“Qendra historike e Prizrenit vazhdon të mbetet prioritet i Qeverisë. Është hartuar projekti për ndërtesën e ish-burgut në Prizren dhe jemi në procedurë përfundimtare për disa projekte në Prizren. Ne do të angazhohemi edhe në finalizimin e memorandumit për ndërtimin e muzeut të filigranit,” tha ministrja ndër të tjerash ministrja Dumoshi.

Ndërsa, Kryeministri i Kosovës, Avdullah Hoti me këtë rast tha është gjithmonë kënaqësi pjesëmarrja në aktivitete kulturore, sportive të organizuara nga Ministria e Kulturës, Rinisë dhe Sportit.

“Sot është ngjarje e veçantë meqë me anë të këtyre dy planeve ë menaxhimit, atij të Qendrës historike të Prizrenit dhe atij të Kalasë së Prizrenit po mundësohet ruajtja e trashëgimisë kulturore për brezat e ardhshëm” – tha Kryeministri. / KultPlus.com

Kumbaro në Gjirokastër me drejtorin e Bankës Botërore, gati investimi tjetër në Qendrën Historike

Posted on 20 Shtator, 201820 Shtator, 2018 by Kult Plus

Në Gjirokastër pritet të nisë së shpejti një tjetër investim i rëndësishëm në drejtim të ruajtjes së vlerave muzeale të qytetit dhe zhvillimit të turizmit. Bëhet fjalë për rikualifikimin e Qendrës Historike dhe Kalasë së Argjirosë.

Lajmin e konfirmoi ministrja e Kulturës, Mirela Kumbaro, njëkohësisht edhe deputete e qarkut. “Ne e kemi përfshirë Gjirokastrën në një seri projektesh. Kam kënaqësinë të ndaj me ju sot lajmin e mirë që Gjirokastra do të ketë rikualifikimin e rrjetit muzeal, ku përfshihet jo vetëm Qendra Historike, por edhe rehabilitimi i Muzeut të Armëve, Muzeu Etnografik etj. Ky investim është në kuadër të programit të Bankës Botërore”, tha Kumbaro gjatë një komunikimi me mediat, shkruan gazetatema.net

Ndërkohë gjatë mbrëmjes ministrja e Kulturës pati edhe një darkë pune në Gjirokastër me Patrizio Pagano, një prej drejtorëve ekzekutivë të Bankës Botërore, si dhe vizituan pazarin karakteristik. Projekti për Zhvillimin e Turizmit dhe Trashëgimisë Kulturore i mbështetur nga Banka Botërore do të zbatohet në 4 qytete; Gjirokastër, Berat, Sarandë dhe Përmet. Më herët gjatë ditës Kumbaro ishte edhe në Universitetin ‘Eqrem Çabej’, ku u zhvillua një leksion i hapur nga Adrian Majuru, i cili kishte mbërritur në qytetin e gurtë bashkë me një delegacion rumun, të përbërë nga 4 drejtorë muzeumesh të Bashkisë së Bukureshtit./ KultPlus.com