Tenori Ramë Lahaj mbrëmë ka mbajtur një koncert në Washington për shënimin e 20 vjetorit të çlirimit të Kosovës.

Ambasada e Kosovës në SHBA së bashku me Washington Performing Arts organizuan këtë koncert, njofton Klan Kosova.

Ambasadorja Vlora Çitaku performancën e Ramë Lahajt dhe Vasel Shkrelit në lahutë e cilësoi si magjike.

“Ambasada e Kosovës së bashku me Washington Performing Arts shënoi 20 vjetorin e çlirimit të Kosovës me koncertin e tenorit tonë fantastik duke i dëshmuar audiencës së zgjedhur në DC se talenti nuk njeh kufij. Falënderoj në mënyrë të veçantë zotin Vasel Shkreli i cili na i solli tingujt autokton të lahutës. Mbrëmje fantastike”, shkroi Çitaku në Facebook.

Ndërsa, tenori me famë botërore në një postim në Instagram tha se kështu kremtohen 20 vjetët e paqes dhe çlirimit.

“Duam të falënderojmë SHBA-në që ishte me ne gjatë periudhës më të vështirë.Faleminderit që vepruat dhe ndaluat gjenocidin. Faleminderit që sollët paqe në shtetin tim dhe shpresë për gjeneratat e reja. Faleminderit që ndaluat regjimin brutal të Serbisë që na kushtoi me aq shumë jetë. Përgjithmonë mirënjohës”, shkroi Lahaj.

Kryeministri Ramush Haradinaj ka takuar tenorin shqiptar me famë botërore, Ramë Lahaj. Në takim është biseduar edhe për ndërtimin e sallës koncertale.

“Tenori prestigjioz, Ramë Lahaj, përpos që ka arritur majat personale të suksesit, ka lartësuar emrin e Kosovës në qendrat më të njohura kulturore në botë. Kënaqësi e veçantë të flisnim për angazhimin e tij të madh, ruajtjen dhe avancimin e vlerave kulturore dhe të këmbenim mendime rreth ndërtimit të sallës koncertale, e cila do të jetë strehë ku artistët do t’i shpalosin veprat e tyre”, ka shkruar Haradinaj në Facebook.

Aksioni për Nëna dhe Fëmijë po organizon një mbrëmje filantropie në qytetin e New Yorkut, për të ngritur fonde për shpëtimin e jetëve të nënave dhe fëmijëve në Kosovë.

Kjo mbrëmje e bamirësisë do të mbahet në klubin prestigjioz Yale të New Yorkut me datën 16 tetor 2018 nga ora 18:30 deri në 21:00.

Fadil Berisha, Vlora Çitaku, Teuta Sahatçija dhe shumë personalitete të tjerë nga bota e biznesit, kulturës, politikës dhe arteve kanë konfirmuar pjesëmarrjen dhe mbështetjen e tyre. Kjo mbrëmje bëhet e mundur falë miqve dhe anëtareve të bordit të fondacionit që jetojnë dhe veprojnë në Amerikë siç janë, Bledar Asllani, Drin Kukaj, Mark Kosmo, Sara Shala dhe Valon Xharra.

Mbrëmja do te përfshijë muzikë, rrjetëzim, koktel dhe ankand të qetë, ku gjatë mbrëmjes do të performojë edhe tenori shqiptar Ramë Lahaj i cili njihet si performues i famshëm në skenën ndërkombëtare të operave. Pjesëmarrës në ngjarjet ‘Meet us Halfway’ gjatë viteve të kaluara kanë qenë Dua Lipa, Valerie Rockefeller e Albert Stanaj.

Të gjitha shitjet e biletave do të orientohen për mbështetjen e programeve të Fondacionit në Kosovë, specifikisht në: furnizimin me pajisje mjekësore, mbështetjen e dorëzimit të medikamentit Surfaktant, zhvillimin e sistemit të transportit neo-natal, zgjerimin e ‘Klasave për Nëna‘ si dhe skrinimin e kancerit të qafës së mitrës.

Për të qenë pjesë e ngjarjes, biletën tuaj mund ta blini përmes platformës “Eventbrite” të cilin mund ta gjeni KËTU./ KultPlus.com

Gili Hoxhaj

Tenori i njohur Ramë Lahaj po qëndron këto ditë në Prishtinë, në kuadër të aktiviteteve për Ditën e Evropës. Ai sot u kthye përsëri në skenën ku performoi një natë më parë, kësaj here para një publiku që përbëhej kryesisht nga të rinj.

Lahaj erdhi për të ndarë një masterklasë me studentë të artit muzikor.

Para kësaj, ai ishte i hapur për të pranuar pyetje nga të pranishmit, që lidheshin kryesisht me eksperiencën e tij profesionale në skenat më të mëdha botërore. Nuk munguan as pyetjet për fillimet e rrugëtimit të tij dhe mungesën e mbështetjes. Ai tha se mungesa e mbështetjes në fillimet e tij është krejt e arsyeshme pasi që edhe për të muzika ka qenë fillimisht një eksperiment.

“Është krejt e logjikshme që s’kam pasur si të kem një mbështetje më të madhe pasi muzika për mua ka qenë një eksperiment që ka ardhë shumë vonë, shumica prej kolegëve dhe studentëve e dinë që unë kam filluar ta studioj pentagramin në një moshë shumë të vonë, në moshën 21 vjeçare dhe sigurisht që komentet s’kanë pasur si të jenë pozitive”, tregoi Lahaj.

Ai u shpreh se ajo që e pengon më së shumti është që në komunitetin muzikor artistik është krijuar një atmosferë jo shumë mbështetëse për njëri-tjetrin.

“Nëse do të mund ta kisha thënë që edhe të largohet ky mentaliteti i pedagogëve të vjetër që mendojnë se vetëm ata dinë dhe s’ka si të jetë ndryshe. Arti nuk është matematikë, ka shumë mundësi për të eksperimentuar dhe ka forma të reja të eksplorimit të artit”, u shpreh Lahaj sot gjatë ligjëratës në Amfiteatrin e Ri të Bibliotekës Universitare.
Të pranishmit ia rikujtuan edhe rëndësinë që ka ai për imazhin e Kosovës, që shpesh herë e ka dërguar emrin e Kosovës në vendet më të njohura të botës. Lidhur me këtë ai tha se ai nuk është as drita e parë e as e fundit e tunelit pasi që Kosova ka shumë ambasadorë të fushave të ndryshme në botë, për të cilët as që dihet.
“Kam pasur fatin të takoj njerëz të suksesshëm të fushave të ndryshme por sa jemi duke u dhënë ne hapësirë atyre që të na promovojnë sa më mirë, sa jemi duke i promovuar që ta dijmë kë ku e kemi dhe sa janë duke kontribuar”, u shpreh Lahaj sot.

Lahaj tha se ka mbajtur në mënyrë vullnetare trajnime në shkolla të mesme dhe në Universitet, në mënyrë që t’i ndihmojë talentët e rinj kosovarë, për të mos u larguar në tërësi nga Kosova dhe aktivitetet këtu.
“Kam ardhur me dëshirën që dy fjalë të mira të eksperiencës time do t’i ndihmojnë dikujt, kanë me i hapë një rrugë apo një vizion. Dëshira ime më e madhe në botë është që ta transmetoj këtë eksperiencë time”, tregoi tenori i njohur Ramë Lahaj.

Viteve të fundit ai ka performuar në shtete të kontinenteve të ndryshme por thotë se tek shqiptarët dhe në Ballkan, ekziston një veçanti që tek muzika funksionon perfekt.
“Tek shqiptarët dhe në përgjithësi në Ballkan ekziston një lloj nervi, një lloj temperamenti që tek muzika funksionon perfekt. Tek arti funksionon perfekt edhe tregimi njerëzor, mënyra se si je rritur, rrugëtimi yt. Besoj se pak shoqëri të tjera e gëzojnë këtë natyrë të funksionimit të dashurisë dhe lidhjet që i kemi”, tha Ramë Lahaj.
Rrugëtimi jetësor nuk ka qenë i mbushur me momente vetëm të mira, edhe tek Lahaj.
Ai tha se ka vetëm një teori, që të punohet shumë dhe që të mos dorëzohesh pasi çdo rrugëtim ka rënie dhe ngritje. Ai tha se ndryshe po ndodhë me gjeneratat e pasluftës.

Pas ligjëratës, Lahaj priti në skenë studentë të muzikës, të cilët i dëgjonte me kujdes, i përgëzonte, i ndalte, këndonte bashkë me ta dhe i sugjeronte me këshilla e me komente.

Tenori Ramë Lahaj po bën karrierë të bujshme muzikore jashtë Kosovës me paraqitjet e tij edhe krahas yllit të madh Placido Domingo. Ai ka qëndruar këto ditë në Kosovë me ftesë të Ambasadores Nataliya Apostolova, nga Zyra e Bashkimit Evropian dhe Qendra Kulturore dhe Informative e Bashkimit Evropian në Kosovë.
Këtyre ditëve ai është dekoruar nga Presidenti – Hashim Thaçi. / KultPlus.com

Duke filluar në ora 15:00, nesër në Amfiteatrin e Ri të Bibliotekës Universitare në Prishtinë tenori Ramë Lahaj do të mbajë një masterklasë.

Lahaj, i cili këtyre ditëve po qëndron në Kosovë me ftesë të Ambasadores Nataliya Apostolova, nesër do të mbajë një ligjëratë dhe një masterklasë në kuadër të aktiviteteve të Ditës së Evropës 2018.

Lahaj sonte po e mban koncertin e tij në kryeqytet e nesër në këtë ligjëratë e masterklasë të hapur do të ketë mundësi të njoftohet me fansat e tij nga Kosova.

Tenori Ramë Lahaj po bën karrierë të bujshme muzikore jashtë Kosovës me paraqitjet e tij edhe krahas yllit të madh Placido Domingo.

Lahaj është dekoruar këto ditë nga Hashim Thaçi. / KultPlus.com

Tenori shqiptar Ramë Lahaj, nëpërmjet një videoje, uron të gjithë shqiptarët për dhjetëvjetorin e Pavarësisë së Kosovës, shkruan KultPlus.

Ai shpreh keqaredhjen që nuk ka mundur të jetë i pranishëm në Kosovë, por prej Parisit, ai ka përshëndetur të gjithë qytetarët, nëpërmjet një interpretimi/KultPlus.com

Tenori shqiptar, Ramë Lahaj, këto ditë këto ditë po prezantohet me shfaqjen “La Traviata”, të Giuseppe Verdi në Operën Kombëtare të Parisit, shkruan KultPlus.

Ramë Lahaj më parë ka njoftuar se kjo shfaqje operistike është realizuar me regji të Benoit Jacquote dhe me dirigjent Dan Ettinger.

Ramë Lahaj në këtë shfaqje është prezentuar në rolin e Alfredos, ndërsa në krah ka Marina Rebekan, e cila është paraqitur në rolin e Violetës. KultPlus ju sjellë një fotografi të publikuar nga tenori shqiptar, me sopranon Rebeka në Operën Kombëtare të Parisit.

Në bazë të faqes zyrtare të Operës Kombëtare të Parisit, premiera e kësaj shfaqje është prezantuar më 2 shkurt ndërsa do të ketë shfaqje të tjera deri më 28 shkurt, duke numëruar gjithsejtë 8 shfaqje./ KultPlus.com

E nisi karrierën në moshë të madhe, por suksesi i erdhi në paketë. Vetëm për gjashtë vjet, qysh nga ngjitja e parë në njërën nga teatrot ndërkombëtare ka bërë që emri i tenorit Ramë Lahaj të kërkohet gjithandej nëpër teatro prestigjoze të botës. Ai tashmë ka të rezervuar agjendën deri në vitin 2021, kurse viti 2018 shënon një ngjitje tepër të rëndësishme, pasi që edhe tre shfaqje të rëndësishme do të marin formë pikërisht nga Ramë Lahaj, por që do të prezantohen në Bolshoi të Moskës, ku Ramë Lahaj në intervistën e dhënë për KultPlus ka treguar se këtë Shtëpi Operistike e vlerëson si gjigant botëror të operave.

Ardianë Pajaziti

KultPlus: Akoma nuk janë mbushur dhjetë vite nga diplomimi i juaj në Akademinë e Arteve në Tiranë, por nëse i referohemi suksesit tuaj nëpër botë, duket sikur një jetë e tërë. E keni edhe ju këtë ndjesi për ngjitjen e juaj kaq të shpejtë në karrierë, apo keni përshtypjen se tek tash ka filluar puna e madhe?
Ramë Lahaj: Në fakt, plot herë surprizohem edhe vet se sa shpejt kanë ecur gjërat për një periudhë ma pak se 6 vjeçare. Ajo që më bën shumë krenar është se mundi im i madh dhe lufta ndaj ëndrrës time u realizuar për një kohë kaq të shkurtër. Realisht ky është vetëm fillimi, konsideroj fillim sepse këto ishin vitet e mija të para ku unë kisha mundësi te bindja teatrot e mëdha që më kishin besuar produksionet e para për të më rikthyer me produksione të tjera në të ardhmen.

KultPlus: Tek në vitin 2012 rrugët e tua u hapën me një shpejtësi marramendëse dhe ofertat tashmë për role të ndryshme nëpër skena prestigjioze nuk kanë të ndalur, cilën ofertë e konsideroni si një shans që bindët profesionistët se jeni njeriu i duhur për skena të mëdha?
Ramë Lahaj: Është një paketë e madhe që unë nuk mund ta veçoj asnjë, sepse çdo produksion ka pasur rëndësinë e vet dhe kudo kam dhënë diçka ndryshe, kështu që të gjitha së bashku kanë dhënë frytin që unë të jem i rezervuar edhe për sezonin 2021…

KultPlus: Shumë herë keni deklaruar nëpër medie se rrugën prej një tenori e nisët në një moshë të madhe, në moshën 21 vjeçare, por para kësaj, keni ndjerë që ju jeni bërë për këtë profesion?
Ramë Lahaj: Po, qysh në vitin e dytë të Akademisë së Arteve e kam ndjerë se kjo është me e mira që mund të bëj , ndaj edhe nuk i jam ndarë kurrë.

KultPlus: Nëse kërkon në internet, përshkruhet se ju vini nga Istogu, nga një vend që nuk ka pas as shkollë të muzikës. Besoni se jeni një shembull për të tjerët se një ëndërr duhet ndjekur, pavarësisht rrethanave?
Ramë Lahaj: Unë jam i bindur se prejardhja se nga vjen nuk ka hiç rëndësi, përkundrazi mund të shihet si pozitive në rastin tonë, sepse nervi, temperamenti, bagazhi jetësor, vuajtja e një jete të rënd se nga kalojmë ne dhe te paret tanë, na bëjnë shumë të veçantë në skenë, janë emocione që i duhen skenës dhe që neve na ka bekuar me to.

KultPlus: Kur jemi të ëndrrat, ju e ndoqët ëndrrën apo fati ishte i tillë që të jeni këtu ku jeni?
Ramë Lahaj: Nëse presim fatin nuk bëhemi artist kurrë e as nuk realizojmë ndonjë nga ëndrrat tona, unë besoj që fryt i suksesit është vetëm puna e madhe dhe lufta për ta realizuar atë.

KultPlus: Paraqitjet e tua në shfaqje të mëdha prestigjioze deri në Sidney u vlerësuan shumë të suksesshme, por për karrierën tuaj të mëtutjeshme duhej edhe një vulë më madhe që të konsideroheshit si një tenor big, gjë që erdhi në vitin 2016, çmimi i Operalis, çmim që e ëndërrojnë shumë artistë, si ndikoi ky çmim për rrugëtimin e mëtutjeshëm?
Ramë Lahaj: Në kohën kur jam vlerësuar me çmimin Operalia unë tanimë vetëm kisha në kalendar teatro te mëdha, gjë që e ka bërë akoma më të komplikueshme konkurrimin për mua, por fati deshi të vlerësohesha nga vet Maestro Domingo që për mua ka qenë një ëndërr, është privilegj që vjen vetëm një herë në jetë.

KultPlus: Dhe pikërisht ky çmim ka bërë që ju të keni paraqitje të shpeshta me artistin e madh Placido Domingon, kur jeni në skenë me të, të besohet akoma se me të vërtetë jeni duke e përjetuar një paraqitje kaq të madhe, ndarjen e skenës me të madhin Domingo?
Ramë Lahaj: Paraqitja me Maestron, ka qenë një nga ëndrrat dhe synimet e mija. Jam tejet i lumtur që pata fatin ta takoj, te vlerësohem nga ai dhe njëkohësisht të më bëhet mentor i karrierës time.

KultPlus: Kurse viti 2018 është një vit i ngjeshur me shumë paraqitje duke përfshirë edhe atë në Teatrin e Moskës, po ashtu një teatër shumë prestigjioz, çfarë ndjesie keni për këtë rol që do ta paraqitni para audiencës ruse?
Ramë Lahaj: Me Moskën kam gjithsejtë katër produksione , një e kam bërë këtë nëntor e ndërsa tri të tjera vijnë sezonet e ardhshme, Bolshoi i Moskës është gjiganti i operës botërore për mua , teatër që më bën te ndihem sikur po jetoj në kohën e divave kur opera ka qenë në piedestalin më të lart, kënaqësi që nuk përshkruhet.

KultPlus: Ndërkohë, me rolet që je paraqitur deri tashti, cili është ai që të ka mbërthyer më shumë?
Ramë Lahaj: Faust nga Gounod që unë e debutova në fillim të këtij viti në Tel Aviv me një prej dirigjenteve më të talentuar të gjeneratës së re Dan Ettiger.

KultPlus: Po rolin që do të doje?
Ramë Lahaj: L’elisir d’amore nga Donizetti që do ta debutoj në një nga teatrot më prestigjioz te Spanjës.

KultPlus: Gjithë këta artistë shqiptarë nëpër botë, ëndërron për një shfaqje të madhe operistike me nivel ndërkombëtarë që do të kishte krejt trupën me artistë shqiptarë?
Ramë Lahaj: Kjo do ishte një nga gjërat që do ta bëja me shuuumë qejf, do te ndodhë së shpejti sapo teatri në Tiranë të rinovohet.

KultPlus: Megjithatë, kur ktheheni në Kosovë, ju nuk keni mundësi të shfaqni talentin e juaj para audiencës kosovare, si pasojë e mungesës së shfaqjeve operistike por edhe të një shtëpie operistike, sa të dhemb ky fakt?
Ramë Lahaj: Hmmmm ,më dhemb më shumë fakti se nuk po bëhet as edhe një gjë me e vogël në këtë drejtim që të paktën të kemi shpresë për të ardhmen… jam shumë i zhgënjyer në këtë aspekt me ata që janë përgjegjës për këtë fushë.

KultPlus: Kosova është e privuar nga këto kushte, megjithatë Shqipëria qëndron më mirë në këtë drejtim, keni ndonjë ofertë që mund të paraqiteni para audiencës shqiptare atje?
Ramë Lahaj: Kam pasur oferta të vazhdueshme, kam pasur shuumë më shumë oferta nga Tirana se sa nga Prishtina, por agjenda ime e ngjeshur nuk më ka dhënë shumë mundësi që të rikthehem në Tiranë apo Prishtinë edhe pse më me shumë qejf do të vija.
Dhe për fund, me cilin artist shqiptar më me dëshirë do të bashkëpunoje për një shfaqje operistike?
Janë shumë, nuk është vetëm një./ KultPlus.com