REDO - KultPlus

REDO vlerësohet për barazi gjinore nga “AIGA Eye on Design”

Posted on 8 Janar, 20198 Janar, 2019 by KultPlus

Sipas hulumtimit të bërë nga “AIGA Eye on Design” mbi përfaqësimin e femrave dhe meshkujve folës në konferencat më të rëndesishme të dizajnit, REDO renditet në një prej vendeve të para që tregon barazi të plotë gjinore në mes të folësve femra dhe mashkuj.

REDO, ngjarja vjetore e dizajnit grafik që mbahet në Prishtinë, perpos që është në lista të ngjarjeve kryesore të dizajnit që duhet të vizitohet, tani është edhe në listen e konferencave që paraqet në mënyrë të barabartë, folësit mashkuj dhe femra. Ky fakt është me rëndësi sepse shumica e konferencave të karakterit të njejtë, ende janë shumë mbrapa sa i përket përfaqësimit të barabartë të folësve të gjinisë femërore dhe mashkullore.

Hulumtimi I kryer nga AIGA Eye on Design ve në pikëpamje dallimet drastike që konferencat më të rëndesishme mbi dizajnin, bëjne me numrin e folësve femra dhe mashkuj. Rezultatet e këtij hulumtimi kanë shkaktuar debate të ashpra rreth diskriminimit gjinor që bëhen në konferencat më të rëndësishme të dizajnit. Brno Biennale në Republikën e Çekisë, që njihej dikur si ngjarja më e rëndesishme e dizajnit, kishte më pak se 2 nga 12 folës te gjinisë femërore – diçka qe ka shtyrë shumë pjesëmarrës të bojkotojnë këtë ngjarje.

Gjatë 3 ditëve të konferencës, REDO sjell mbi 300 studente, profesorë nga univeristet më me influence në diciplinat e dizajnit grafik dhe arteve vizeuele nga e gjithë bota, duke kontribuar direkt në ekonominë dhe turizmin e qytetit të Prishtinës.

AIGA Eye on Design publikohet nga AIGA (Instituti Amerikan i Arteve Grafike), organizatën më prestigjioze në botë mbi dizajnin grafik, me bazë në Amerikë.

Konferenca REDO është një ngjarje treditore në lëvizje që bashkon dizajnerët, artistet vizuel, dhe artëdashësit nga e gjithë bota për të kontribuar në krijimin e diskursit rreth çështjeve dhepraktikave aktuale të dizajnit grafik. Përmes një serie diskutimesh, punëtorive, librarisë dhe udhërrëfimeve në qytet, REDO ofron mundësi që dizajnerët të bëhen bashkë në dhe përreth qytetit të Prishtinës.

Edicioni 9 do te mbahet nga 11-13 tetor, 2019.

Linku per artikullin origjinal –
https://eyeondesign.aiga.org/gender-equality-at-design-conferences-by-the-numbers/

REDO vjen me dizajn, film, radio, bar dhe udhërrëfim

Posted on 3 Tetor, 20183 Tetor, 2018 by KultPlus

Këtë të premte, me 5 tetor, në Prishtinë, hapet edicioni i tetë i REDO konferencës ndërkombëtare të dizajnit grafik. Përveç ligjëratave mbi dizajnin grafik, do të ketë edhe shfaqje filmash, librari, radio transmetim, bar dhe udhërrëfim në qytet.

Si çdo vit, konferenca do të lëvizë nga vendi në vend: Kino Armata (hapja, e premte), Shtypshkronjën Rilindja (shtune), dhe në Bibliotekën Kombëtare të Kosovës (të dielen). REDO mbahet nga data 5 deri më 7 tetor.

Prishtinën tani gjendet në listën e qendrave të rëndësishme të diskutimit të dizajnit grafik në skenën botërore dhe gjatë fundjavës pritet të vijnë mbi 300 studentë dhe profesionistë nga e mbarë bota, ku shumica janë nga shkollat dhe institucionet më me influencë në dizajn grafik.

Në edicionin e sivjetmë do të ligjërojnë: Jim Shaw (US), Marnie Weber (US), Jop van Bennekom (NL/UK), Daniela & Linda Dostalkova (CZ), Benjamin Thorel & Antonia Carrara (FR), Hammer (CH), Blerim Racaj (KOS/UK), Marietta Eugster (CH).

Programi i filmave do të shfaqet në Kino Armata dhe do të ketë repertor nga Jim Shaw dhe Marni Weber, që do të jenë të hapur për të gjithë.

Konferenca si gjithmonë organizohet në pika të ndryshme arkitektonike të qytetit, duke mundësuar për vizitorët e huaj përjetim të qytetit në mënyrë sa më të plotë. Edhe sivjet, për të theksuar edhe më tutje këtë komponentë të konferencës do të organizohet edhe një udhërrëfim në qytet, i cili organizohen nga Bekim Leka Ramku i KAF Kosovo Architecture Foundation. Udhërrëfimi nisë nga Hoteli Grand me datën 8 tetor në ora 14:30.

Komponente të reja të konferencës do të jenë radio transmetimi live që do të realizohet nga Ja Ja Ja Ne Ne Nee (NL) në Bibliotekën Kombëtare, dhe bari i hapur “Moonshine Monday” i organizuar nga Kimberley Cosmilla & Marcel Mrejen (FR). Libraria e përkohshme lëvizëse do të ofrojë libra unik të dizajnit grafik dhe udhëhiqet nga të After 8 Books (FR).

Programi i natës apo ndejave pas konferencës përfshinë: Para-hapja në SOMA (enjte, 4 tetor), Alush në Hamam Jazz Bar (premte, 5 tetor), Zgjim dhe Hana nga kolektivi “Angry Youth” dhe Jon Dujaka nga “Servis” në Klubin (shtunë, 6 tetor), dhe mbylljen në Miqt Pub.

REDO në edicionin e shtatë mbështetet nga Komuna e Prishtinës, Ministria e Kulturës, Rinisë dhe Sportit, Fondacioni “Unë e Du Kosovën”, Culture for Change – Programi i Zyrës së BE në Prishtinë, që implementohet nga Qendra Multimedia dhe Goethe Institut, Ambasada e Holandës në Prishtinë, Swiss Arts Council Pro Helvetia. Partnerët: Kino Armata, Biblioteka Kombëtare e Kosovës, Kosovo Architecture Foundation (KAF).

Konferenca REDO është një ngjarje treditore në lëvizje që bashkon dizajnerët nga e gjithë bota të kontribuojnë në krijimin e diskursit rreth çështjeve dhe praktikave aktuale të dizajnit grafik. Përmes një serie diskutimesh, punëtorive, librarisë dhe udhërrëfimeve në qytet, REDO ofron mundësi që dizajnerët të bëhen bashkë në dhe përreth qytetit të Prishtinës./KultPlus.com

Përfundon REDO, transformon Prishtinën në pikën kryesore të dizajnit në botë

Posted on 12 Tetor, 201712 Tetor, 2017 by KultPlus

Dita e diele shënon mbylljen e edicionit të 7-të të REDO. Gjatë 3 ditëve sa ishte konferenca, janë përfunduar me sukses shtatë ligjërata në Sallë të Kuqe, ish shtypshkronjën Rilindja dhe Bibliotekën Kombëtare, është realizuar ekspozita e kolektivit nga Prishtina “Angry Youth” në galerinë “Motrat” dhe lansimi i revistës nga Girls Like Us në galerinë LambdaLambdaLambda), shëtitja nëpër qytet me Bekim Ramkun nga KAF – Fondacioni i Kosovës për Arkitekturë, koncerti i Jabolex (Gjermani) në Klub M dhe koncerti i The Homesick (Holandë) dhe Pinkmetal (Kosovë) në teatrin Oda, përcjellë KultPlus.

“Ka shumë gjëra që e bëjnë REDO-në të veçantë, por po i përmendi vetëm dy: Ideja e lëvizjes nga një hapësirë në tjetrën dhe fakti që mund ti shoh dhe dëgjojë gjithë këta folës, që janë shtyllat kryesore të trendeve më të reja të dizajnit grafik, në një vend”, ka thënë një nga studentët pjesëmarrës në konferencë.

Ligjëruesit ishin: Zgjim Elshani (RKS), dizajner grafik i diplomuar në Gerrit Rietveld Academie, Amsterdam; Jonas Voegeli (CH), udhëheqës i departamentit te Arteve Vizuele në Universitetin e Arteve në Zyrih; Coline Sunier (BE) & Charles Mazé (FR) përfaqësues të Akademisë Franceze në Rome – Villa Medici në 2014–2015 si dhe anëtarë të “Atelier National de Recherche Typographique (ANRT)” në Nancy. Francë; Žiga Testen (AU/SLO) dizajner grafik i bazuar në Melburn; Girls Like Us (BE), magazinë e pavarur që bashkon komunitetin feminist nga fusha të ndryshme; Anna Haas (CH) është profesoreshë në Lucerne University of Applied Science and Arts (HSLU), në departamentin e Arteve Vizuele; dhe Metahaven (NL), disa prej bashkëpunëtorët e të cilëve janë WikiLeaks, Icelandic Modern Media Institute (IMMI), Independent Diplomat etj.

“Mendoj që REDO ka krijuar bazë të mirë dhe duhet të mendohet se si REDO, në të ardhmen, të bëhet shkollë e dizajnit”, ka thënë Olivier Lebrun, ligjërues në REDO 5 dhe përkrahës i vazhdueshëm i konferencës. Si ligjërues në shkollë dizajni në Lyon, Francë, ai dhe rreth 15 studentë të tij e vizitojnë REDO – që nga edicioni 5.

Edhe këtë vit, më shumë se 250 studentë nga shkolla të ndryshme dizajni nga e gjithë Evropa, erdhën në Prishtinë për të ndjekur këtë edicion. Numri i vizitorëve vazhdon të ketë rritje çdo vit dhe vitin tjetër pritet të ketë ende më shumë.

REDO në edicionin e shtatë mbështetet nga Fondacioni “Unë e Du Kosovën”, Ambasada e Holandës në Prishtinë, Ambasada e Shteteve të Bashkuara të Amerikës në Prishtinë, Ambasada e Francës në Prishtinë, Komuna e Prishtinës, Ministria e Kulturës, Rinisë dhe Sportit, Swiss Arts Council Pro Helvetia. Partnerët e konferencës ishin LambdaLambdaLambda, Teatri Oda, Klubi M, Soma Book Station dhe Hamam Jazz Bar. Shtypi është mundësuar nga ViPrint.

Fillon edicioni i shtatë i REDO konferencës së dizajnit grafik

Posted on 4 Tetor, 20174 Tetor, 2017 by Kult Plus

Për edicionin e shtatë të konferencës REDO përveç maratonës së ligjëratave për dizajn grafik Prishtina do të ketë edhe shfaqje filmash, koncerte dhe udhërrëfime në qytet. Konferenca tashmë e etabluar si ndërkombëtare edhe këtë vit ligjëratat do t’i mbajë në disa hapësira të ndryshme të qytetit. Ligjëratat do të mbahen në Shtypshkronjën Rilindja, në Bibliotekën Kombëtare të Kosovës dhe në Sallën e Kuqe të Pallatit të Rinisë.

Mbi 300 studentë dhe profesionistë nga e mbarë bota pritet të vizitojnë Prishtinën për REDO. Koferenca që sivjet mbahet nga data 6 deri më 8 tetor, sivjet organizon edicionin e shtatë duke bashkuar ligjëruesit më të njohur ndërkombëtarë të fushës.

Në edicionin e sivjetmë do të ligjërojnë Coline Sunnier & Charles Mazé (FR/BE), Girls Like Us (BE), Žiga Testen (AU/SLO), Metahaven (NL), Anna Haas (CH), Zgjim Elshani (KOS), Jonas Voegeli (CH).

Përveç ligjëratave si pjesë e konferencës do të jetë edhe shfaqja e filmave e organizuar nga Girls Like Us (BE) në bashkëpunim me galerinë LambdaLambdaLambda në Prishtinë. Filmat shfaqen çdo ditë nga data 22 shtator deri me 6 tetor në hapësirën e kësaj galerie dhe kanë për tematikë programin queer dhe feminist.

Ndërsa kolektivi “Angry Youth”, me 5 Tetor, në 19:00, organizojnë “Angry Youth Pop-up Shop”, ku do të shiten bluza te dizajnuara nga Zgjim Elshani dhe Lum Çeku dhe do të ketë sticker-a të cilat do të dhurohen falas. Në kuadër të konferencës do të mbahen edhe një seri e ndejave dhe koncerteve në mbrëmjet filluar nga data 5 tetor kur në Teatrin Oda do të performojnë The Homesick (NL) dhe Pinkmetal (KOS). Me datën 6 tetor DJ Alush do të lëshojë muzikë në Hamam Jazz Bar. Kurse me datën 7 tetor në Klubin M të Prishtinës do të performojnë Jabolex/The Breze Institute (DE).

Konferenca si gjithmonë organizohet në pika të ndryshme arkitektonike të qytetit, duke mundësuar për vizitorët e huaj përjetim të qytetit në mënyrë sa më të plotë. Sivjet për të theksuar edhe më tutje këtë komponentë të konferencës do të organizohet edhe një udhërrëfim në qytet, i cili organizohen nga Bekim Leka Ramku i KAF Kosovo Architecture Foundation. Udhërrëfimi nisë nga Hoteli Grand me datën 8 tetor në ora 14.00 deri në ora 16.00.

Me datën 7 tetor në ora 17:00 Girls Like Us e lancojnë revistën “Future issue” në hapësirën e galerisë LambdaLambdaLambda. Kurse me datën 5 tetor hapet një pop-up store në hapësirën ekspozuese Motrat nga Angry Youth (RKS).

REDO në edicionin e shtatë mbështetet nga Ambasada e Holandës në Prishtinë, Ambasada e Shteteve të Bashkuara të Amerikës në Prishtinë, Komuna e Prishtinës, Ministria e Kulturës, Rinisë dhe Sportit, Ambasada e Francës në Prishtinë, Swiss Arts Council Pro Helvetia, Fondacioni “Unë e Du Kosovën”. Shtypi nga ViPrint.