E kuruar nga arkitektja Silvana Annicchiarico, ekspozita e titulluar “3CODESIGN | 3Rs: Reduce Recycle Reuse” është shpalosur sot pikërisht në Qendrën ‘Bogdani Polis’ në Katedralen “Nëna Terezë”. Me një koncept tejet interesant, qysh nga fillimi e deri në fund, ekspozita ka pasur një synim të qartë, e ajo është ofrimi i një pasqyre sintetike por paradigmatike për të treguar se si dizajni italian është duke punuar në drejtimin e qëndrueshmërisë mjedisore, shkruan KultPlus.
E gjithë ajo se çfarë Ministria e Punëve të Jashtme dhe Ambasada e Italisë në Kosovë ka për qëllim, është festimi i tipareve konotative të dizajnit të ri italian. E kjo u dëshmua edhe sot nga idetë kreative e të shumta që publiku pati rastin të shoh në hapjen e ekspozitës që hapi dyert në orën 19:00.
Kjo ekspozitë, emri tjetër i së cilës është “Ecodesign”, ka prezantuar një përzgjedhje objektesh, produktesh dhe aksesorësh të ricikluar ose të bërë me materiale dhe teknologji të qëndrueshme, të gjitha të projektuara nga projektuesit italianë dhe të prodhuara nga kompanitë italiane.
Ndërkaq, në hapje të kësaj ekspozite, i pranishëm ishte edhe ambasadori i Italisë në Kosovë, Antonello De Riu.
“Ndjej një arritje veçanërisht krenare për sjelljen e kësaj ekspozite në Prishtinë, e cila është ekspozuar në disa lokacione nëpër botë. Që kur mbërrita në Kosovë, kam dashur të organizoj një ekspozitë mbi dizajnin e qëndrueshëm italian gjatë ‘Manifesta 14 Prishtina’, bienalen e artit bashkëkohor që dëshiron të kontribuojë në rigjenerimin e hapësirave publike edhe përmes projekteve të arkitekturës italiane Carlo Ratti. Përmes ‘Ecodesign’, synojmë të theksojmë kontributin që rishikimi i proceseve të prodhimit në vazhdim në industrinë italiane të projektimit ofron për rigjenerimin e vlerës së objekteve në qarkullim”, thotë ai.
Ai tutje për KultPlus ka shpalosur idenë se si kuratorja Annicchiarico ka sjellë këtë ekspozitë sipas nevojave më të fundit të qëndrueshmërisë mjedisore duke krijuar një përmbysje të vërtetë të trendit në krahasim me sistemet e prodhimit dhe strategjive të projektimit të përdorura gjatë shekullit të 20-të.
“Është një rimendim i përgjithshëm dhe radikal i një modeli prodhimi që synon mbishfrytëzimin e burimeve; kjo do të thotë të rishikohen të gjitha fazat e projektimit dhe prodhimit, duke menduar, që nga fillimi, për objektet dhe produktet që bëhen të riparueshme, të rikuperueshme, të ripërdorshme, të ndashme dhe të riciklueshme. Në vend se të përfundoj në deponi, vlera e një objekti duhet të mbetet në qarkullim, duke u vetë rigjeneruar vazhdimisht”, thuhet në njërën nga banerat e ekspozitës.
Ndërkaq, pikat kryesore të ekspozitës konsiderohen të jenë:
Reduktimi i përdorimit dhe harxhimit të lëndëve të para dhe ndikimi në mjedis;
Riciklimi atyre që janë konsumuar, duke filluar nga plastika;
Ripërdorimi dhe dhënia e një jetë të re produkteve të shpërdoruara ose dukshëm të vjetruara.
Ekspozita “Ecodesign” apo ndryshe “3CODESIGN | 3Rs: Reduce Recycle Reuse” do të qëndrojë e hapur deri më 23 gusht (e hënë – e shtunë, orari i hapjes 12:00 – 19:00, e diel, orari i hapjes 15:00 – 20:00).
E artikuluar në një hapësirë prej 200 metrash katrorë, ekspozita tregon – nëpërmjet objekteve, imazheve dhe teksteve – bazat e ekonomisë rrethore, zhvillimin e materialeve dhe produkteve të reja me ndikim të ulët ekologjik, filozofinë e projektimit të disa prej dizajnerëve të rinj që po punojnë në një ekologji të re të artificiales.
Ekspozita është hapur në Pragë, Doha, Dubai, Hong Kong, Uashington, Toronto dhe Tunis dhe pas Prishtinës ekspozita do të ndalet në Talin. / KultPlus.com
