Mbrëmjen e 8 tetorit është mbajtur koncerti i dyfishtë i natës përmbyllëse të edicionit të XXIII të festivalit ReMusica, ku me interpretime të shumta e me një koncert autorial, u shënua edhe 75-vjetori i lindjes së themeluesit të këtij festivali, kompozitorit të njohur Rafet Rudi.
“Meloditë e Zemrës” me mezzo-sopranen Flaka Goranci dhe kitaristen Tringa Sadiku, hapën koncertin duke u përcjellë me duartrokitje të shumta. Koncerti nuk kishte se si të fillonte më mirë se sa me tingujt e qetë të kitarës nga Tringa Sadiku, kombinuar me zërin fantastik të sopranos Flaka Goranci. Që të dyja bënë një udhëtim të mrekullueshëm në këngët popullore, duke nxjerrë në pah pjesë të paharruara të Manuel de Falla dhe Heitor Villa-Lobos. Në programin e tyre kishin përfshirë këngë nga Carlo Domeniconi, Manuel de Falla, Antonin Dvorak e Violeta Parra.
Flaka Goranci është mezzo-soprano e dalluar që shquhet për interpretimin e shumë roleve operistike. Teatri i Vjenës, Opera e Magdeburgut, Festivali i Operës Langenthal në Zvicër, Teatri i Operës Ostrava, Salla e Koncerteve në Berlin, Salla e koncerteve në Vjenë, janë vetëm disa nga institucionet ku ajo merr pjesë. Flaka bashkëpunon me dirigjentë të njohur si N. Harnoncourt, U.Windfuhr, L.Suganandarajah, E.Delamboye, D.Spaë, R. Rudi,C.V. Kerssenbrock etj. Poashtu ka performuar nën regjinë e U.E. Laufenberg, S.Lawless etj.
Në një intervistë për KultPlus, Goranci u shpreh se përgatitjet për këtë koncert kanë shkuar shumë mirë dhe se provat kanë zgjatur shumë.
“Përgatitjet kanë shku shumë mirë, ne jemi përgatitur edhe në Graz të Austrisë bashkë me Tringën ku kemi pas dy prova të gjata dhe pastaj këto ditë kemi ardhur në Prishtinë ku kemi bërë prova çdo ditë. Është dashur të përgatitemi shumë pasi shumicen e programit e kemi luajtur për here të pare sonte dhe e kemi sjell premierë një program të posaçëm për këtë festival”.
Ndërsa, kitaristja Tringa Sadiku u shpreh se përgatitjet për këtë festival kanë qenë shumë natyrale dhe se ka qenë një kënaqësi për të që të bashkëpunojë me mezzo-sopranon Flaka Goranci.
Mbrëmja ka vazhduar me pjesën e dytë të koncertit që iu kushtua shënimit të 75-vjetorit të profesorit Rafet Rudi. Në skenë u ngjitën Zana Abazi me flaut dhe Andi Duraku në piano, duke sjellë “Impresione” para publikut që ishin mbledhur në Atelien e Pallatit të Rinisë në këtë mbrëmje të veçantë.
Pas një pauze të shkurtër, radha ishte për dy gra të mrekullueshme, Lirika Pula në piano dhe Sihana Badivuku me violinë, sollën “Fantasia in Si”.
Mbrëmja vazhdoi nën magjinë që sollën kitaristët Petrit Çeku, Diar Aliu dhe Tringa Sadiku, të cilët për pak minuta bënë që e gjithë vëmendja të kthehej tek ata, duke interpretuar “Three albanian songs” apo “Tri këngë shqiptare”.
E pas përgatitjeve të skenës që zgjatën pak minuta, dritat e skenës ranë mbi Korin e Filharmonisë së Kosovës, të cilët nën drejtimin mjeshtëror të dirigjentit Marcio da Silva, dhe nën shoqërimin e tingujve të kitares nga mjeshtri Petrit Çeku, sollën interpretimin e veprës “Deti i varrëve të hapura”, që është vepër e vet kompozitorit Rafet Rudi.
Soliste në interpretimin e kësaj vepre ishte Elona Sadiku, e cila për KultPlus u shpreh se për të ishte nder e kënaqësi që t’i besohej pjesa solistike e veprës.
“Nuk ishte aspak e vështirë të punoj me profesionist të tillë siç është edhe dirigjenti Marcio da Silva, për mua ka qenë kënaqësi të më besohet pjesa solistike e veprës nga vet kompozitori Rafet Rudi, për të cilin edhe jemi mbledhur sot”, u shpreh Sadiku për KultPlus.
Tutje, Sadiku u shpreh se përgatitjet nuk kanë zgjatur sepse i kanë pasur vetëm dy vepra të cilat Filharmonia e Kosovës i ka kënduar edhe herë të tjera pasi janë pjesë e pashkëputur e reportuarit të tyre.
Kurse, në mbyllje të këtij koncerti, është interpretuar vepra “In A”, nga sopranot e njohura Adelina Paloja dhe Kaltrina Miftari. Në piano ishte Andi Duraku dhe Lekë Salihu, kurse në perkusione Patris Berisha, Meriton Zajmi dhe Kenan Bytyqi.
Në një bisedë të shkurtër, Adelina Paloja u shpreh për KultPlus se ndjehet shumë e emocionuar dhe se ka pranuar ftesën me shumë kënaqësi në këtë koncert autorial të Rudit, për dy arsye shumë të veçanta.
“Kam pranuar ftesën me shumë kënaqësi për dy arsye të veçanta. E para sepse gjithmonë kam pasur një bashkëpunim të ngushtë me Filharmoninë e Kosovës dhe e dyta sepse profesori Rafet Rudi ka qenë mbështetje e imja qysh në fillet e mia të para, që nga mosha 6 vjeçare kur veçse kam filluar të merrem me këndim dhe piano”, u shpreh Paloja për KultPlus.
Ajo tha se është shumë e lumtur që të festojmë jetën e tij si një personalitet shumë i rëndësishëm i komunitetit të tyre dhe jetik për rrjedhën e muzikës klasike.
E për fund, natyrisht që një prononcim i shkurtër nuk mund të mungonte nga protagonisti i mbrëmjes, kompozitori dhe profesori Rafet Rudi. Ai tha se është i lumtur me revolucionin që ka pësuar ReMusica.
“Unë edicionin e shiqoj vetëm nga anash pasi nuk jam i përfshirë në organizimin e tij më. Më duket interesat sepse ka ndërru fizionomia e festivalit, Donika si presidente e festivalit dhe Viktori si producent kanë bërë një lloj revolucioni. Një ndryshim të fizionomisë që ka qenë mjaft frytdhënës dhe mbaroi me sukses”, u shpreh Rudi për KultPlus./KultPlus.com
Në kuadër të ReMusica, mbrëmë ReNew ka sjellur në natën e tretë kitaristin Diar Aliu dhe grupin “Trio Elogio”, me në krye Petrit Çekun. ReNew është program që ka shërbyer si skenë për promovimin e artistëve të talentuar kosovarë.
Diar Aliu, me disa interpretime mbrëmë e me tinguj të qetë nga kitara e tij, bëri që salla të mbushej dhe u shpërblye me duartrokitje të shumta, pas çdo interpretimi. Mbrëmja filloi pak minuta pas orës 19:00, ku nën dritën që po e përcjellte vetëm Aliun, filloi menjëherë me interpretimin e parë, që ishte “Grande Ouverture” nga Mauro Giuliani.
Pas duartrokitjeve të shumta nga publiku, kitaristi i ri vazhdoi me një program nga Federico Moreno Torroba, duke interpretuar disa këngë të tij si “Castillos de Espana”, “Alcaniz”, “Siguenza” e “Torija”.
Tutje, ai vazhdoi të interpretonte këngë të Mario Castelnuovo, Krzyztof Penderecki e Heitor Villa-Lobos. Pikërisht kur u mendua se Aliu e përfundoi interpretimin, ai u kthye sërish për interpretimin e fundit, mirëpo këtë radhë bashkë me Kuartatin Harkor Amati, që është formuar në vitin 2023 dhe përbëhet nga vajzat e talentuara si Fjolla Koxha dhe Eliona Raqi në violinë, Alkesta Gllogjani në violë dhe Donjeta Cërmjani në violonçelo. Vajzat janë bashkuar për të promovuar muzikën kamertale me një nivel të lartë cilësie. Kuarteti ka performuar në ngjarje të rëndësishme dhe duan të ndajnë enërgjinë pozitive dhe unitetin e tingujve të tyre me publikun.
Pas performimit te tyre, programi i Diar Aliut perfundoi me shumë duartrokitje, lavdata e shumë përshendetje nga publiku për të, duke vazhduar edhe me fotografi.
Në një pauzë prej 5 minutash para se të fillonte koncerti i dytë, KultPlus pati mundësinë që të realizonte një bisedë të shkurtër me Aliun. Ai tha se ishte shumë i lumtur që ishte pjesë e ReMusica dhe ishte një emocion shumë i madh, duke shtuar se edhe përgatitjet kanë shkuar shumë mirë.
“Kam qenë shumë entuziast për festivalin ReMusica dhe kemi bërë prova edhe me Kuartetin, ka qenë një eksperiencë shumë e mirë para festivalit edhe gjatë koncertit”, është shprehur kitaristi Aliu.
Tutje ai tha se ishte hera e tij e parë si solist në Remusica dhe që ishte pjesë e koncerteve në mbrëmje. Ai tha se ishte një eksperiencë që nuk do ta harroj kurrë.
Ndërsa, për projektet që do e shohim tani e tutje, Aliu nuk shpalosi asgjë, duke thënë se nuk i dihet me çfarë projekti do të merret. Aliu është kitarist i shquar klasik, që aktualisht studion në Universitetin e Muzikës dhe Arteve Skenike në Graz të Austrisë. Gjatë karrierës 10-vjeçare ai ka fituar çmime prestigjioze në Greqi, Kosovë, Mal të Zi, Bullgari, Turqi, Austri e Gjermani.
Ndërsa, mbrëmja vazhdoi me koncertin e dytë të mbrëmjes, ku performuan “Trio Elegio”, që është nje grup që u themelua në vitin 2009 nga Petrit Çeku, Pedro Ribeiro Rodrigues dhe Tomislav Vukšić, muzicientë që kanë përfunduar Akademinë e Muzikës në Zagreb. Trio Elogio u mirëpriten me shumë entuziazëm nga publiku, duke filluar menjëherë me programin e tyre, fillimisht me një interpretim të Wolfgang Amadeus Mozart, duke vazhduar më pas me disa interpretime të Bruno Vlahek. Pastaj, ata vazhduan me “Follow the Star” nga Stephen Schubert.
Ndërsa, programin vendosën që ta përmbyllin me “Four Impromptus” nga Franz Schubert. Grupi Trio Elogio kanë performuar në festivale të mëdha ndërkombëtare si Grachtenfestival, Wonderfeel (Holandë), Festival Internacional de Musica de Marvao, Cistermusica (Portugali), Kyburgiade (Zvicër) dhe Alpenarte (Austri), në festivale te muzikWs dhe seri koncertesh në të gjithë Kroacine si Zagreb Kom, Festivali Veror i Dubrovnikut, Mbrëmjet Muzikore në Shën Donat, Festivali i Muzikes Samobor, Mbrëmjet Muzikore të Osorit dhe Tribuna Muzikore në Osijek. Ata kanë arritur bashkëpunime te suksesshme me muzicientë të njohur, përfshirë Santiago Canon Valencia, Sara Ferrandez, Gili Schëarzman, Filip Mercep, Ivana Kuljeric Bilic dhe Sebastian Manz. Trio Elogio është fitues i mimit “Milka Trnina” të Shoqates Kroate të Artistëve të Muzikës për arritjen më të mirë muzikore në vitin 2022./KultPlus.com
Pak ditë pas një debutimi të suksesshëm në skenën e Teatrit të Operës së Vjenës, sopranoja Elbenita Kajtazi rikthehet te rrënjët e saj për të interpretuar në skenën e improvizuar vendore, në koncertin e dyfishtë hapës të Festivalit ReMusica, nën shoqërimin e pianistes Elda Laro. Përderisa pjesë e hapjes së edicionit të XXlll-të të ReMusica ishte edhe kori më i njohur në vend, Siparantum, i cili po ashtu pak ditë më parë nën drejtimin e Memli Kelmendit i siguroi shtetit të Kosovës dy çmime në Spanjë, shkruan KultPlus.
Në mesin e figurave të njohura të artit, kulturës, medias e politikës, koncerti filloi rreth orës 19:10, në Atelienë e Pallatit të Rinisë, së cilës sallë për ta shëndrruar në një ambient më të bukur, e estetik i ishin m’veshur perde të zeza rreth e përqark. Kombinimi me dritat e projektorëve dhe shkronjat ndriçuese të ReMusica-s jepnin një pamje solide. Mbrëmja u hap nga organizatorët Donika Rudi dhe Viktor Berisha, të cilët përveq fjalimit përshëndetës, njoftuan audiencën për rrjedhën e festivalit, i cili do të mbahet përgjatë katër netëve me double koncerte.
Pas pak në skenë u paraqit sopranoja e njohur Elbenita Kajtazi dhe pianistja Elda Laro me kontrabastin Fraim Gashi, për të filluar performancën me veprën e Ardian Gegës “Trembem”. Për shkak të tensionit që e ndiente artistja këtë performancë e dha ulur, si shkak i shtatëzanisë së saj. Nuri shëndrritës dominonte përkundër fustanit dhe flokut të saj të zi, duke u përshtatur shumë me pamjen pianistes flokë-artë. Një koncert me një artiste që performon në skena të njohura në botë nuk kishte se si të fillonte më bukur pos me tinguj e fjalë të gjuhës sonë të lashtë shqipe.
Tinguj shpërthyes që nxirrnin në pah vokalin e kristaltë të sopranos Kajtazi u dhanë në veprën e Claude Debussy “Apparition Suite bergamasque, L.75: III. Clair de lune”. Të gjithë sy e vesh ndiqnin performancën e artistes që po e bën krenarë një popull të tërë. Duartrokitjet nuk mungonin në fund të secilës pjesë: Franz Liszt- “Die Lorelei S.273”, Erich Wolfgang Korngold- “Mariettas Lied opera Die tote Stadt” & “Vier fröhliche Walzer, II. Margit”, Charles Gounod- “Amour, ranime mon courage” Roméo et Juliette”, Giacomo Puccini- “Senza mamma” – Suor Angelica, dhe Sergei Rachmaninov- “Elegie op.3 nr.1”.
Kurse vepra “Tatiana’s letter” – Eugene Onegin e Peter Ilich Tschaikovsky e fundit me radhë ishte ajka e mbrëmjes. E mishëruar në rolin e Tatianës, Kajtazi shpërfaqte historinë tragjike të një dashurie të pamundur. Ishte mimika dhe lëvizjet e saj që tregonin historinë e ngjarjes, përderisa zëri i saj aq sa i bukur, po aq zgjonte trishtim të thellë në zemrat e publikut duke e ndierë dhimbjen e personazhit të veprës.
Pas një pauze disa minutëshe, skenës me një energji të lartë nga fundi i sallës iu bashkua Kori më me nam në vend, Siparantum. Pjesa e dytë e koncertit filloi me vepre e Jeffery Ames- “Tshotsholoza Traditional South African”, tinguj ritmik që të ftonin në vallëzim. Secili pesëtar i korit përmes energjisë së vet luante rol në plotësimin e mozaikut SIPARANTUM.
Interpretimi i tyre që herë ishte plotë energji e zjarr, herë në tinguj të brishtë, herë në përshpërima të mistershme, e herë neutralë, kombinuar me përplasjet e fuqishme të këmbëve dhe duarve, në çdo moment dëshmonte nivelin e lartë artistik, me të cilin Kosovës arrijnë t’i sigurojnë çmime e medalje në çdo prezantim nëpër botë.
Pikat interpretuese të cilat u dhanë nën drejtimin e dirigjentit Memli Kelmendi ishin: Vepra e Michael McGlynn- “Media Vita” (Leon Shehu, vocal, Fidan Strumcaku, shaman drum), Jan Van der Roost- “Amor io fallo”, Katerina Gimon- “Fire” (Fidan Strumcaku, shaman drum), Josephine Poelinitz- “City called heaven, traditional spiritual” (Erijon Palucaj, solo, Denita Dedushaj, piano), Jake Runestad- “Nyon, Nyon” dhe Samo Vovk- “Ta na solbici”.
Kurse vepra e kompozitorit Baki Jashari “Pakëz në ëndërr, pakëz në zhgëndër” (Aurora Hyseni, recitatore) e cila u dha krejt në fund të koncertit përbën pothuajse një himn të Korit, e cila me një peshë të madhe artistike trajton fatin tragjik të popullit shqiptar, që ndër mileniume është persekutuar nga armiq shekullorë.
Kështu, emra shqiptar të njohur në botë, në natën hapëse të ReMusica sollën përvojën dhe shpirtin e tyre në vendin prej nga e filluan rrugëtimin artistik ndonëse në kushte aspak të përshtatshme.
Në një prononcim për media organizatori i Festivalit, Viktor Berisha ka thënë se ndihej i lumtur që nata ahpëse e festivalit filloi mbarë.
“Nata e sotme ishte me shumë sfida, por më duket që treguesi më i mirë ka qenë reagimi i publikut në të dy koncertet. Për ne më mbarë nuk ka mundur të niset pjesa e konceteve të mbrëmjes. Pas një dite me shumë aktivitete kjo ka qenë një përfundim që na fle edhe neve si një nismë e mbarë”, ka thënë Berisha duke i treguar ngjarjet pasuese të ReMusica-s.
“Është dinamikë e njejtë. Edhe tri ditë tjera plotë aktivitete, prej mëngjesit deri në mbrëmje si për fëmijë me tryeza të diskutimeve, ashtu edhe me koncerte të parambrëmjes dhe me koncertet qëndrore. Nesër tërë ditën jemi në Prizren, ku kemi një duo nga Spanja që do të sjellin një repertor të muzikës mesjetare me ansamblin vokal të ReMuzica-s. Është viti i dytë që kjo nismë e jona është duke u jetësuar për publikun Prizrenas, kështu që jemi shumë të lumtur”, ka thënë organizatori Berisha.
Kurse, dirigjenti i Korit Siparantum Memli Kelmendi i cili sapo është kthyer me dy çmime nga Spanja mbrëmjen e ka cilësuar të jashtëzakonshme, përkundër kushteve aspak të përshtatshme.
“Emocioni brenda vendit është krejt ndryshe prej të gjitha atyre koncerteve që ne i mbajmë jashtë vendit. Natyrisht skenat në të cilat ne perforojmë janë krejtësisht ndryshe nga këtu. Do të kisha dashur që edhe Prishtina të ketë një sallë adekuate, sepse vërtetë sonte ka qenë një sfidë e madhe të punoj me një akustikë të tillë. Ka kohë që nuk kam koncertuar në Prishtinë dhe uroj që në skena të tilla të mos realizojmë koncerte sepse kjo është diçka që ndikon drejtpërdrejtë te atmosfera dhe energjia brenda vokalit. Gjithsesi ne kemi arritur që të mbajmë energjinë dhe pulsin”, ka thënë dirigjenti Kelmendi duke uruar që koncertin e radhës ta mbajnë në një sallë adekuate.
Tutje, dirigjenti Kelmendi tha se ndihej jashtëzakonisht i lumtur që në koncertin hapës u paraqit me shoqen e tij të klasës, Elbenita Kajtazi, e cilas sipas tij është inspirim për të gjithë.
“Ishte një mbrëmje jashtëzakonisht e bukur. Aq më bukur kur sonte në pjesën e parë ishte kolegia, shoqja ime e klasës, Elbenita, një vokaliste fantastike, e cila të gjithëve na bën krenarë për sukseset dhe rrugëtimin e saj. Konsideroj, dhe është inspirim për të gjithë ne”, ka thënë Kelmendi.
Kurse kompozitori Baki Jashari bashkëdyjëzimin e dy koncerteve në një e ka cilësuar si gjetje interesante.
“Koncerti i sotëm i dyfishtë ishte një mbrëmje maft inetereant edhe pse ishin dy botë të ndryshme. Në njërën anë kishim solisten tonë të mrekullueshme, me zërin e saj të jashtëzakonshëm, me karrierën e saj të jashtëzakonshme botërore që ishte në rolin e solistes. Në anën tjetër kishim korin Siparantum si një ansambël i të rinjve shumë të suksesshëm me dirigjent Memli Kelmendin. Ndërlidhja e këtyre dy pjesëve të koncertit ishte vokali. I uroj për këtë mbrëmje të mrekullueshme, shumë interesante me gjithë këtë paletë të veprave dhe stileve të ndryshme”, ka thënë kompozitori Baki Jashari duke potencuar që ndihej i lumtur që vepra e tij “Pakëz ëndërr pakës Zgjëndërr” po paraqitet dhe po depërton edhe jashtë vendit.
“Kori Siparantum u paraqit edhe me veprën time “Pakëz në Ëndërr pakës në zhgjëndërr” që është shkruar qysh në vitin 1986. Unë e pata marrë si bazë tekstin e autorit tonë të mirënjohur Din Mehmeti, e cila është një poezi jashtëzakonisht e fuqishme edhe pa muzikë. Ajo ishte aq e fuqishme dhe dramatike në thelbin e saj ku përshkruan vuajtjet e popullit tonë dhe aspiratat tona për liri, ku përmenden në mënyrë poetike, se si popull kemi qenë të shtypur, të ndjekur, të rrahurr. Dirigjenti Memli ka kërkuar që kjo vepër të shkurtohet dhe të përshtatet për skena jashtë Kosovës, dhe në shumë gara ku Kori Siparantum prezantohet kjo vepër është në program mes tjerash. Dhe, më vjen mirë që pothuajse në çdo prezantim të tyre Siparantum po fitojnë medalje. Ky është një plus i madh edhe për korin por edhe që vepra po depërton jashtë”, ka thënë dirigjenti Jashari.
Ndëraq, pianistja e njohur Lejla Pula, e cila ishte pjesë e publikut i ka përgëzuar kolegët për fillimin e suksesshëm, e të mbarë të festivalit ReMuzica.
“Më ka ardhur jashtëzakonisht mirë që përsëri kam pasur rastin ta dëgjoj Elbenitën, e cila me të vërtetë është një soprano në ngritje e sipër të karrierës së saj. Interpretimi i saj ishte jashtëzakonisht emocional dhe me aftësi të jashtëzakonshme zanore. Ka krijuar një ambient artistik të jashtëzakonshëm, nën përcjelljen e Elda Laros e cila ishte një artiste dhe profesioniste tejet e shkëlqyer. Vërtetë jemi kënaqur me muzikimin e tyre dhe ju dëshiroj shumë suksese”.
Më tej, pianistja Lejla Pula ka uruar që në të ardhmen festivali i saj dhe i kolegëve të tjerë të mbahen në një vend me kushte kualitative.
“Paraqitja e tyre skenike dhe artistike e Korit Siparantum është aq komplete, aq interesante, me një përkushtim të jashtëzakonshëm. Unë i përgëzoj për paraqitjet dhe çmimet e fundit nëpër botë. Vërtetë ishte një kënaqësi e madhe që të jem sonte këtu. Unë ju dëshiroj të gjithëve suksese të mëtejme, dhe gjithashtu kam dëshirë që festivalet tona të kenë shtëpinë koncertale, ku në të ardhmen të mbahen këto koncerte kaq kualitative” ka thënë ajo.
Ndërsa, pjesëtari i Korit Siparantum, Shaban Behramaj, ka thënë se është ndier i lumtur me pjesëmarrjen e madhe të publikut, para të cilit kanë përgjegjësi artistike të paraqitjes sikurse në garat e ndryshme gjithandej nëpër botë.
“Ishte një ndjenjë shumë shumë e veçantë sepse Festivali ReMusica këtë vit ka pasur “double koncerte”, ku ne sot ndamë skenën dhe mbrëmjen bashkë me sopranon tonë tashmë me famë botërore Elbenita Kajtazi. Për ne ka qenë një kënaqësi e jashtëzakonshme për të interpretuar në natën hapëse të festivalit Remusica për këtë edicion, para publikut kosovar që ishte në numër shumë të madh, gjë e cila në bëri të ndihemi shumë mirë. Ne sapo u thyem nga Barcelona ku fituam dy çmime në garat botërore, për ne përgjegjësia është shumë e madhe që edhe para publikut tonë të sjellim repertorin e njejtë, por edhe atmosferën dhe energjinë e njejtë me të cilën ne garojmë në të gjitha këto gara”, ka përfunduar Behramaj.
TOGETHERNESS (SË BASHKU) – është motoja e sivjetme e edicionit të XXlll-të të ReMusica në të cilin përveç tjerësh deri më 8 nëntor do të interpretojnë edhe Petrit Çeku, ReVocal Ensemble, Trio Elogio, Margherita Berlanda, Flaka Goranci etj. / KultPlus.com
Festival Edicioni i 13-të i ReMusica Festival do të fillojë sonte, dhe programi i sontëm do të sjell një spektakël të madh, shkruan KultPlus.
Organizatorët kanë bërë të ditur se mbrëmja e sontme përfshinë sopranon e njohur Elbenita Kajtazi, pianisten Elda Laro dhe Korin Siparantum me dirigjent Memli Kelmendin.
Kjo mbrëmje do të flllojë në ora 19:00 në Atelienë e Pallatit të Rinisë në Prishtinë./ KultPlus.com
Prej 5 deri më 8 nëntor do të mbahet edicioni i 23-të të Festivalit ReMusica, e që këtë vit a për temë “Togetherness – Së Bashku”, shkruan KultPlus.
Për katër ditë sa edhe do të zgjasë ky edicion i këtij festivali do të paraqitet një program, me theks të veçantë mbi përsosmërinë muzikore, zhvillimin edukativ dhe shkëmbimin kulturor global.
“Ky edicion do të jetë një festë e muzikës dhe artit, duke promovuar si shumëllojshmërinë ashtu dhe gjithëpërfshirjen”, thuhet nga organizatorët.
“Qëllimi i tij është të ngrisë skenën e muzikës klasike të Kosovës përmes gërshetimit të muzikës klasike dhe bashkëkohore, edukimit dhe diplomacisë kulturore, duke krijuar kështu mundësi të qëndrueshme për artistët dhe krijuesit e festivalit brenda rajonit” është detajuar më tutje.
Këtë vit, ReMusica vendos në qendër të vëmendjes artistët vendas me karriera ndërkombëtare, duke i bërë bashkë ata nga vende të ndryshme. Programi përfaqëson frymën e bashkimit, teksa këta artistë angazhohen në partneritete kuptimplota dhe shkëmbejnë perspektivat e tyre unike.
“Përveç këtyre performancave bashkëpunuese, këtë vit Festivali ReMusica është nikoqir i mysafirëve ndërkombëtarë, përfshirë udhëheqës të festivaleve europiane, organizata, anëtarë të medias ndërkombëtare, etj. Mysafirët do kenë privilegjin të përjetojnë festivalin në mënyrë unike, të eksplorojnë komunitetin artistik vendas dhe të hapin rrugë për mundësi dhe bashkëpunime në të ardhmen.Në zemër të festivalit zë vend pasioni dhe përkushtimi i artistëve të përfshirë, që kanë një ndikim të rëndësishëm në komunitetet e tyre, nga talentet lokale deri te yjet ndërkombëtarë” thuhet më tutje për përmbajtjen e programit të sivjetmë.
Edicioni i 23-të me mbi 200 pjesëmarrës nga Kosova, Belgjika, Franca, Portugalia, Austria, Gjermania, Spanja, Italia dhe nga e gjithë Europa, do t’ofrojë një program të gjerë, duke filluar nga Koncertet: me artistët më të çmuar të skenave botërore dhe vendore; Diskutime: Panele diskutimi me tema të rëndësishme si qëndrueshmëria dhe praktikat mjedisore brenda industrisë duke synuar krijimin e një platformë për dialog ekspertësh dhe shkëmbim idesh.; Koncertet akusmatike & elektroakustike; Rrjetëzim: mundësi për rrjetëzim, bashkëpunim dhe krijim lidhjesh midis artistëve vendas, mysafirëve ndërkombëtarë, krijuesve të festivaleve dhe profesionistëve të industrisë; Programi Edukativ – punëtori dhe masterklasa, një mjedis dinamik dhe pasurues ku artistët, studentët dhe dashamirët e muzikës mund të bashkohen për të shkëmbyer ide, ndërtuar lidhje dhe frymëzuar njëri-tjetrin. Poashtu, Festivali do të përfshijë një gamë aktivitetesh, duke përfshirë programin tradicional ReMusica Junior për fëmijë, punëtori, programin ReNeë për artistë të rinj dhe shumë më tepër!
Kurse për artistët pjesëmarrës të këtij edicioni, organizatorët kanë shpalosë disa prej emrave, e ata janë: Petrit Çeku, Raquel Andueza, Elbenita Kajtazi, ReVocal Ensemble, Trio Elogio, Margherita Berlanda ./ KultPlus.com
ReMusica Festival i drejtuar nga kompozitorja Donika Rudi do të ketë dy paraqitje në Himara International Music Festival.
Në pikën më të lartë të kalasë, në kalanë shekullore të Himarës në Shqipëri, “Lament of the Earth” nga kompozitorja Donika Rudi do të hapë festivalin Himara International Music Festival këtë të enjte, përcjell KultPlus.
“Lament of the Earth” është vepër kushtuar efekteve të ndryshimeve klimatike në Tokë dhe ngrohjes globale e mbështetur nga platforma IN SITU – European Platform for Artistic Creation in Public Space, në kuadër të projektit (UN)COMMON SPACES, të bashkëfinancuar nga Programi Creative Europe i Bashkimit Evropian / Teatri ODA.
Shfaqja do të prezantohet dy herë, në orën 19.30 dhe në orën 20.00.
LAMENT OF THE EARTH (Vajtimi i Tokës)është cikël i veprave audio-vizuale nga kompozitorja Donika Rudi kushtuar efekteve të ndryshimeve klimatike në Tokë, është thirrje për ndërgjegjësim dhe kujdes ndaj planetit tonë. Fokusi thelbësor i këtij cikli është shtjellimi i temës së ndryshimeve klimatike dhe eksperiencës tingullore për komunitetin e shurdhët. Vepra është ndërtuar duke u bazuar në grafikën e “warming stripes” apo shiritat e ngrohjes globale, të cilat vizualisht portretizojnë ndryshimin afatgjatë të temperaturës në sipërfaqen e Tokës. Në pjesën e parë vepra përqendrohet në tinguj organikë, kryesisht në një qetësi dhe harmoni me tekst të autores Doruntina Basha, përderisa kulminacioni arrihet me tinguj të transformuar, të deformuar dhe vajtimin e tokës, thirrjes për veprim nga sopranoja Kaltrina Miftari. Gjuha e shenjave dhe vallëzimi është pjesë integrale e këtij cikli, ku përmes lojës së lëvizjeve, vallëzimit dhe “visual vernacular” do interpretohet dhe përjetohet emocioni i tingullit. Vepra adreson atë që të gjithë ndjejmë por nuk e flasim, vërejmë por nuk e shohim, atë që na afekton por ne qëndrojmë indiferent.
Për këtë vepër me profesionalizmine tyre kanë punuar: Donika Rudi, kompozitore, Kaltrina Miftari, soprano, Agnes Nokshiqri, gjuha e shenjave/visual vernacular & vallëzim Doruntina Basha, teksti Hana Zeqa (Fight or Flight), kostumi / skenografia, Labinot Rudi, sound / zëri.
Gjithashtu, kompozitorja Donika Rudi ka bërë më dije për KultPlus se në këtë festival do të paraqiten edhe me një tjetër koncert nga ReMusica Vocal Ensemble.
Nën qiellin e hapur, midis shtëpive të vjetra dhe Kishës së Gjithë Shenjtorëve në fshatin e Himarës, koncerti i Ansamblit vokal ReMusica do të mbahet me datën 3 Gusht 2023.
Programi i ansamblit vokal ReMusica paraqet një zhytje të madhe në thesarin historik të muzikës shqiptare (deri vonë të panjohura për histiorografinë shqiptare ) të shekullit XIII dhe XIV me kompozitoret Gjergj Danush Lapacaj , Jan Kukuzeli (i cili njihet si reformator i notacioni të kishës lindore) dhe duke vazhduar deri te krijimtaria e kompozitorëve kosovarë si Mendi Mengjiqi, Memli Kelmendi dhe poashtu repertoari modern botëror.
Ky program i pasur, kryesisht me vepra të autorëve tanë do t’jepet me datën 3 Gusht 2023 në Himarë.
Ansambli vokal i Kosovës ReMusica është ansambël i formuar nga Festivali ReMusica dhe ai karakterizohet për repertoarin e tij të gjerë stilistik, duke filluar që nga muzika e vjetër – renesansë & barok, repertoari modern shqiptarë e deri tek repertoari botëror bashkëkohor. Nën udhëheqjen e dirigjentit Rafet Rudi, tetë profesionistë janë bashkuar për të shpalosur muzikën korale me një finesë, ndjeshmëri interpretative duke synuar një standard shumë kërkues. / KultPlus.com
Mbrëmë, në Sallën e Kuqe me një koncert nga Orkestra e të Rinjve të Bashkimit Evropian, është shënuar përmbyllja e edicionit të 22-të të Festivalit ‘ReMusica’, shkruan KultPlus.
Koncerti i mbrëmshëm, i 13-ti me radhë dhe i fundit njëkohësisht, ka qenë një bashkëpunim mes kësaj orkestre dhe instrumentistëve të rijnë nga Kosova, të cilët performuan në dy pika të koncertit.
Hapjen e koncertit e bëri organizatori i festivalit Shaban Behramaj, i cili i falënderoi të pranishmit për prezencën e tyre si dhe dha një rezyme të asaj çfarë do të përmbante koncerti në përgjithësi, ku me këtë rast edhe e paralajmëroi përmbylljen e festivalit.
Ndonëse një vend jo adekuat për mbajtjen e një koncerti të tillë, ambientet e Sallës së Kuqe ishin dekoruar me drita dhe lule, të cilat megjithatë dhanë një pamje të një skene solide ku mund të mbahej një koncert me muzikë klasike.
Në skenë dolën anëtarët e orkestrës me instrumente në duar. Ngjyra e zezë e veshjes, i dha skenës një elegancë të theksuar, ndërsa shallet të cilat vajzat i kishin të vendosura mbi supet e majta të tyre, shpërfaqnin flamuj të BE -së.
Pika e parë interpretuese qe ajo nga Johann Sebastian Bach, me Musical Offering in C minor, BWV.1079: Ricercar a 6, e cila filloi me tinguj të qetë të violinave, duke u pasuar pak më vonë edhe nga violonçelat.
Pas kësaj pike instrumentistëve të cilët gjendeshin në skenë, iu shtuan edhe muzicientët me instrumentet frymore, të cilët tingujve, u jepnin melodi më të hollë nga ajo që u interpretua deri tani. Kjo pikë u pasua nga tinguj më kumbues pasi në vallen e instrumenteve u përfshi edhe instrumenti goditës Bass Drum.
Këtë pikë, publiku në sallë e shijoi shumë, pasi sikur me radhë të gjitha instrumentet i prinin valles së bukur të melodive. Melodinë e bënte më të theksuar instrumenti frymor, prej së cilit pasoi violina, e cila i la radhë përsëri instrumentit frymor, dhe pastaj violinë dhe fyell së bashku në interpretim i dhanë tonin interpretimit, të cilin audienca po e shijonte shumë.
Kështu me radhë performuan secili instrumentist, duke pasur mundësi që të gjitha instrumentet t’i jepnin hijeshinë mbrëmjes.
Pika e tretë interpretuese, Terry Riley In C, filloi duke iu bashkuar edhe disa anëtarë të tjerë orkestrës, tingujve të së cilës iu shtuan edhe tingujt nga hapat e instrumentistëve të cilët ngjiteshin në skenë, ku gjatë gjithë kohës po performonte tinguj të njëtrajtshëm.
Kjo pikë u interpretua nga tinguj të lartë dhe të ulët të instrumenteve, ku instrumentet frymore i jepnin theks interpretimit, fundi i së cilës pikë përfundoi me tinguj konstant ashtu siç edhe filloi.
Pika e katërt e interpretimit ishte ajo e kompozitorëve Antonio Vivaldi, Hugh Crosthwaite dhe Cramen Fizzarotti me The Four Seasons. Kjo pikë, në qendër pati edhe solistin profesionist Daniel Rowland me violinë, përderisa në dy grupe përballë njëri tjetrit ishin pozicionuar violinistët tjerë. Pasioni i Rowland për këtë instrument dhe profesionalizmi tanimë vërehej shumë lehtë nga publiku, pasi ai tërë kohën fliste edhe me mimikë dhe pozitë trupore, e cila të jepte përshtypje se ishte fluide.
Në mesin e gjithë atyre violinave të cilat prodhonin tinguj jashtë mase të bukur, katër prej violinistëve filluan të interpretonin me gishtërinj, duke prodhuar tinguj shumë të veçantë, por që tingëllonin bukur po ashtu.
Solisti i Daniel Rowland, u shpreh se ishte i lumtur që po performonte, edhe pse për të ishte ishte hera e parë që po merrte pjesë në një koncert në Kosovë dhe në ‘ReMusica’ gjithashtu.
“Ishte kënaqësi të luanim në vendin tuaj për herë të parë. Unë jam këtu për herë të parë, por jo edhe të fundit. Unë jam shumë krenarë për këtë festival fantastik dhe çdo gjë që organizohet në këtë festival”, ka thënë solisti Daniel Rowland.
Pas koncertit në një prononcim për KultPlus, muzicientja Hana Hana, ka thënë që ky bashkëpunim me Orkestrën e të Rinjve të Bashkimit Evropian, ka qenë një eksperiencë shumë e bukur edhe pse ishte hera e parë që kishin bashkëpunuar me një orkestër të tillë.
“Ishte një eksperiencë shumë e mirë. Për herë të parë na u dha rasti edhe neve të bashkëpunojmë me këtë orkestër, pasi ne si shtet nuk na është dhënë mundësia që të jemi pjesë e kësaj orkestre. Mendoj që ishte një mundësi shumë e mirë dhe siç edhe u vërejt nga instrumentistët edhe ata ishin të kënaqur me ne. Kështu që ishte mjaftë bukur sonte”, ka thënë Hana.
Instrumentistja më tutje shtoi se bashkëpunimi u kishte pëlqyer edhe kolegëve evropian, nga ku edhe shprehu dëshirë që shteti tu mundësonte edhe bashkëpunime të tilla të tjera.
“Kjo orkestër ka gati rreth 50 vite që është e themeluar dhe është hera e parë që vijnë në Kosovë. Kjo ishte hera e parë që kanë performuar në Kosovë. Disa nga instrumentistët u ndanë mjaftë të kënaqur, thanë që ishte një eksperiencë shumë e mirë. Shpresojmë që edhe vetë shteti do të jetë përkrahës i këtyre bashkëpunimeve që këta të mund të vijnë përsëri, dhe pse jo edhe ne si instrumentistë të rijnë të bashkëpunojmë me ta” ka thënë Hana.
Ndërsa muzicientja tjetër Alkesta Gllogjani në një prononcim për KultPlus, po ashtu tha se bashkëpunimi me Orkestrën e të Rinjve të Bashkimit Evropian iu dha një ndjenjë të veçantë, dhe se interpretimi së bashku me kolegë të vendeve evropiane ishte privilegj.
“Sot kaluam shumë mirë. Ishte një ndjenjë shumë e veçantë bashkëpunimi me orkestrën e të rinjve të Evropës, që është një ndër orkestrat më të mira të rinjve në Evropë. Ishte me të vërtetë privilegj të luash me ta”, ka thënë Gllogjani.
Ajo më tutje tha se gjatë provave nuk e kanë pasur as më të voglin problem pasi përgatitjes së instrumentistëve evropian iu ishin përgjigjur me profesionalizëm.
“Orkestra e të rinjve të Evropës ka filluar me përgatitje qysh moti, kurse ne kemi pasur t’i paraqesim dy vepra në koncert. Orkestra e të rinjve të Evropës më herët na ka dërguar veprat nëpërmjet rrjeteve. Pastaj normalisht, ne i kemi ushtruar dhe sot për herë të parë jemi takuar me ta në provat gjenerale, nuk e kemi pasur asnjë problem gjatë përgatitjes për koncert pasi edhe ne e kemi treguar profesionalizmin tonë, ka thënë Alkesta Gllogjani.
Ky koncert shënoi edhe përfundimin e këtij edicioni të Festivalit ReMusica i cili kishte filluar më 3 maj, e i cili i dhuroi publikut të Prishtinës koncerte me pika të ndryshme artistike./KultPlus.com
Mbrëmë në kuadër të festivalit ‘ReMusica’ u prezantuan veprat e kompozuara nga kompozitorët e rinj e premtues kosovarë. Si çdo edicion tjetër, edhe në edicionin e 22-të të këtij festivali nuk mungoi hapësira, inkurajimi dhe motivimi për kompozitorët dhe instrumentistët e rinj, e që u kurorëzua me koncertin e djeshëm në Kishën Katolike ‘Shën Ndou’ në Prishtinë, shkruan KultPlus.
Në mbrëmjen katërt të festivalit ‘Remusica’ publiku pati mundësinë të shijojnë tingujt e kompozimeve të kompozitorëve të rinj Fjolla Gashi, Dea Ahma, Leutrim Sahiti, Lum Halabaku, Ersan Januzi, Leart Sejdiaj.
E këto vepra u interpretuan në përfeksion nga dy ansamble të klarinetëve “4clariSonore” me anëtarët Ardit Ibrahimi, Blendi Axhillari, Fisnik Shkodra, Jon Rrecaj dhe “Lorenc Antoni” i përbërë nga Megi Rexhepi, Orges Thaçi, Eriona Shabani, Adis Kurtaj dhe ansamblin e flautave Yllka Simnica, Alba Basha, Elda Meka, Ujana Këpuska.
Pak para fillimit të koncertit, muzikanti Shaban Behramaj, i cili është edhe pjesë ‘Remusicas’ u shpreh i lumtur për këtë koncert të radhës së festivalit.
“Jemi shumë të lumtur që sonte po e shënojmë një sukses të radhës të këtij edicioni të ‘ReMusica’. Kjo është një prej mbrëmjeve më të veçanta për neve sepse si festival e dijmë që ndër vite i kemi kushtuar një rëndësi të madhe e në fakt gjeneza e këtij festivali është në motivimin dhe inspirimin e kompozitorëve të rinj”, u shpreh Behramaj, teksa i la më pas hapësirën instrumentistëve e me ç’rast u interpretuan gjashtë vepra premierë.
I pranishëm në këtë koncert kushtuar muzicientëve të rinj e premtues ishte edhe kompozitori Valton Beqiri, i cili pas koncertit vlerësoi lart veprat të cilat u interpretuan këtë natë.
“ Mund të them që jemi fatlumë që kemi një gjeneratë të tillë të kompozitorëve, jo vetëm kompozitorët por edhe instrumentistët meqë kanë pranuar ta marrin përsipër këtë program. Besoj që festivali si festival po e mban edhe më tutje frymën e stimulimit të krijimtarisë muzikore tek ne. Pavarësisht pse kësaj radhe ishin edhe instrumentistët vendorë , në të kaluarën kemi pasur ansamble të cilay na kanë vizituar nga bota dhe ata kanë interpretuar edhe veprat tona”, u shpreh Beqiri i cili më tutje i përgëzoi artistët dhe instrumentistët për këtë paraqitje.
Ndërsa Donika Rudi, drejtoreshë artistike e festivalit ‘ReMusica’ thotë se që në fillimin e tij ky festival i ka pasur gjithmonë në fokus artistët dhe kompozitorët e rinj.
“ ‘ReMusica’ që nga viti 2002 në fokus gjithmonë i ka pasur kompozitorët e rinj, për shkak se ata janë një pasuri e vendit, janë talentë të mëdhenj të skenës muzikore në vend dhe ata duhet të promovohen dhe këtë po mundohemi dhe po e bëjmë ndër vite në këtë festival. Që nga fillimi i këtij rrugëtimi të gjatë të ‘ReMusica’ kemi pasur rreth 500 vepra të autorëve tanë, kryesisht vepra të reja dhe vepra të porositura nga vetë festivali. Këtë vit kemi 10 premiera botërore nga kompozitorët tanë me ç’rast gjashtë prej tyre i dëgjuam sonte nga kompozitorët e rinj”, tha Rudi, duke shtuar se veprat e interpretuara mbrëmë ishin të një niveli të lartë dhe të interetuar jashtëzakonisht bukur nga instrumentistët e rinj.
Ndërkaq, Dea Ahma, e cila u prezantua në këtë festival me kompozimin e saj ‘Chant’, vlerëson hapësirën që ky festival u jep përherë kompozitorëve të rinj dhe jo vetëm.
“Remusica për vite me radhë ka pasur hapësirë sidomos për muzikën moderne dhe bashkëkohore që çdo ditë e më shumë është duke sjellë në skenë si insturmentistë ashtu edhe kompozitorë që i përkasin rrymave të tilla. Këtë vit ka qenë edhe një edicion i veçantë për ne për faktin se na është siguruar një hapësirë e veçantë. Nata e sotme ka qenë e kushtuar vetëm për ne kompozitorët e rinj dhe për punën tonë së bashku me prezantimin që u është bërë edhe instrumentistëve të rinj të cilët kanë marrë përsipër me i interpretu këto vepra”, deklaroi mes emocionesh Ahma.
Sonte ‘Remusica’ mban koncertin e radhës në Kishën ‘Shën Ndou’ në Prishtinë e ku do të performojnë grupi ‘Duo Aliada’./ KultPlus.com
Edicioni i 22-të i Festivalit Ndërkombëtar të Muzikës ReMusica po nis me mision që të ju përkujtojë mbi rëndësinë e kujdesit për veten. “Inhale – Enxhale” është moment reflektimi dhe ndërgjegjësim për shëndetin dhe mirëqenien mendore, përcjell KultPlus.
Në jetën e shpejtë dinamike në të cilën jetojmë, shpeshherë humbasim sensin dhe ndjeshmërinë për gjërat e vogla, që në realitet janë me shumë rëndësi. Koha dhe përkushtimi ndaj vetes para së gjithash, është pjesë qenësore e ekuilibrit dhe marrëdhënies që ndërtojmë pastaj dhe me të tjerët. Së dyti mbështetja, besimi dhe mirëmbajtja e raporteve të shëndosha përmes kujdesit ndaj njëri tjetrit dhe në fund, kujdesi ndaj natyrës, planetit tokë.
Duke u nisur nga kjo perspektivë, ReMusica ju merr nën krahë për të ofruar kapacitetin e saj duke shërbyer si hapësirë dhe vend takimi për të gjitha grupet, komunitetet për të rritur ndërgjegjësimin për shëndetin dhe mirëqenien mendore.
Në kuptimin përmbajtësor, Edicioni i 22-të do të ofrojë një program të gjerë, duke filluar nga koncertet – me artistët më të çmuar të skenave botërore dhe vendore; diskutime – ku fokus do të jetë pikërisht shëndeti mendor; instalacione – konceptuale, tingullore; masterklase, punëtori me gjeneratat e reja; ReMusica Junior – programe për fëmijë; koncertet akusmatike & elektroakustike e deri tek performancat unike ku muzika takon meditimin.
Orkestra e themeluar nga Claudio Abbado, me ish-drejtoret e muzikës Vladimir Ashkenazy, Bernard Haitink dhe me kryedirigjent Vasily Petrenko – EUROPEAN UNION YOUTH ORCHESTRA, Kuinteti frymor CALEFAX nga Holanda, të njohur ndërkombëtarisht për lojën e tyre virtuoze dhe si një ndër ansamblet më të çmuara të frymës, Ansambli Vokal ReMusica dhe kori shumë aktiv i viteve të fundit – Siparantum, pianisti Julien Libeer janë vetëm disa nga emrat që do të jenë pjesë e këtij Edicioni të Festivalit ReMusica.
Merrni frymë thellë dhe përgatituni për një edicion plot jetë i cili nis më datë 3 maj dhe zgjatë deri më datë 23 maj 2023. / KultPlus.com
Koncerti i Ansamblit vokal ReMusica mbahet sot më5 Shkurt 2023, në Bruksel, Belgjikë në një ndër sallat kryesore koncertale të Brukselit, në FLAGEY. Koncerti i Ansamblit Vokal ReMusica do tëjetë në natën përmbyllëse të Festivalit “La Semaine du Son” 2023.
Programi i ansamblit vokal ReMusica paraqet një zhytje të madhe në thesarin historik të muzikës shqiptare (deri vonë të panjohura për historiografinë shqiptare ) të shekullit XIII dhe XIV me kompozitoret Gjergj Danush Lapaca , Jan Kukuzeli (i cili njihet si reformator i notacioni të kishës lindore) dhe duke vazhduar deri te krijimtaria e kompozitorëve kosovarë si Mendi Mengjiqi, Lorenc Antoni, Mark Kacinari, Memli Kelmendi dhe poashtu repertori modern botëror. Ky program i pasur, kryesisht me vepra të autorëve tanë do të jepet para publikut belg me datën 5 Shkurt 2023 në Bruksel.
Ansambli vokal i Kosovës ReMusica është ansambël i formuar nga Festivali ReMusica dhe ai karakterizohet për repertorin e tij të gjerë stilistik, duke filluar që nga muzika e vjetër – renesansë & barok,repertoari modern shqiptarë e deri tek repertoari botëror bashkëkohor. Nën udhëheqjen e dirigjentit Rafet Rudi, tetë profesionistë janë bashkuar për të shpalosur muzikën korale me një finesë, ndjeshmëri interpretative duke synuar një standard shumë kërkues.
Ky koncert mbështet nga Presidenca e Republikës së Kosovës.
Ansambli vokal i Kosovës ReMusica është ansambël i formuar nga Festivali ReMusica dhe ai karakterizohet për repertorin e tij të gjerë stilistik, duke filluar që nga muzika e vjetër – renesansë & barok, repertori modern shqiptarë e deri tek repertoari botëror bashkëkohor. Nën udhëheqjen e dirigjentit Rafet Rudi, tetë profesionistë janë bashkuar për të shpalosur muzikën korale me një finesë, ndjeshmëri interpretative duke synuar një standard shumë kërkues.
Programi i ansamblit vokal ReMusica paraqet një zhytje të madhe në thesarin historik të muzikës shqiptare (deri vonë të panjohura për historiografinë shqiptare ) të shekullit XIII dhe XIV me kompozitoret Gjergj Danush Lapaca , Jan Kukuzeli (i cili njihet si reformator i notacioni të kishës lindore) dhe duke vazhduar deri te krijimtaria e kompozitorëve të gjeneratës së re nga Kosova dhe repertori modern botëror.
Rafet Rudi, në jetën muzikore të Kosovës, me veprimtarinë tij si kompozitor, si dirigjent, si mendimtar shprehur në fushën e publicistikës dhe filozofisë së muzikës, si anëtar i Akademisë Europiane të Shkencës dhe Arteve, paraqet personalitetin më të spikatur dhe më aktiv në 2-3 dekadat e fundit në botën muzikore të Kosovës.
Rudi ishte dirigjent i Korit Profesional të Radio – Televizionit të Prishtinës në periudhën 1980-1987 dhe me këtë ansambël, koncertoi në të gjitha vendet e ish Jugosllavise. Ai ishte prezent në Festivalet e rëndësishme të kohës si Festivali i Dubrovnikut, Ohrit, Beogradit, Festivali i muzikës modern në Opati, Kroaci, etj. Në vitet 2006 – 2020 , ai udhëheqë Korin e Filharmonisë të Kosovës dhe realizon qindra paraqitje publike me programe a capella si në Kosovë ashtu edhe jashtë saj si në Angli, Maqedoni, Kroaci, Shqipëri, Itali. Nën drejtimin e tij, Kori dhe Orkestra e Filharmonisë realizojnë një mori veprash të rëndësishme vokalo-instrumentale si: Missa D-dur e Mozartit, ‘Vespro della Beata Virgine 1610’ e Monteverdit, Kantata Nr. 28 e Bahut, ‘Gloria’ e Vivaldit, Mesha C-dur e Beethovenit, Rekuiemi i Mocartit etj.
Në vitet e fundit, Rudi i përkushtohet pikërisht zbulimit, restaurimit dhe adaptimit të literaturës korale të autorëve të vjetër shqiptarë Gjergj Danush Llapacaj (shek. XVI), Jan Kukuzelit (shek. XIII) dhe Niketa i Remisianës (shek. IV). / KultPlus.com
ReMusica Vocal Ensemble së shpejti me koncert në FLAGEY, Bruksel, Belgjikë, në kuadër të Festivalit “La Semaine du Son” 2023.
“Vitrail Albanese’ Koncerti i Ansamblit vokal ReMusica do të mbahet me datën 5 Shkurt 2023, në Bruksel, Belgjikë në një ndër sallat kryesore në Bruksel, në Flagey . Koncerti i Ansamblit Vokal ReMusica do t’jetë në natën përmbyllëse të Festivalit La Semaine du Son – De Ëeek van de Klank 2023./ KultPlus.com
Ajka e veprave të mahnitshme nga kompozitorë të huaj dhe shqiptarë mbrëmë lindën nëpërmjet talentit të pakrahasueshëm të kitaristit Petrit Çeku dhe Kuartetit harkor “Viva String Quartett”, të cilët së bashku frymuan në një frymë që vazhdimisht buronte melodi dhe tinguj që u ndezën mahnitshëm në atmosferën e ngrohtë dhe lëshuan një harmoni e cila vështirë se do të rikrijohet përsëri, duke përmbyllur kështu edicionin e 21-të të festivalit ReMusica që shtëpinë e gjeti në Sallën e Kuqe, shkruan KultPlus.
Ky vend i cili priti këtë dyshe të mrekullueshme në natën e fundit kishte ndërruar disa detaje të dallueshme nga netët tjera. Salla e Kuqe mbrëmë kishte shtuar dukshëm një numër të madh të karrigeve duke mbushur sallën në tri anë të saj. Me dymbëdhjetë reflektorët në ngjyrë të kaltër, drita precize në formë rrethore që vjen nga lart dhe dritat e ngrohta që ndriçonin vendin në hapësira të caktuara, Salla e Kuqe mori formën të përmbushjes në numër. Ndërkaq, pozicionimin e tyre e kishin ndërruar edhe shkronjat e mëdha në prapaskenë që portretizojnë emrin e festivalit ReMusica të cilat po qëndronin të gjalla në natyrën e tyre gjelbëruese.
Hapjen e kësaj nate e nisi drejtoresha artistike, Donika Rudi dhe producenti i festivalit, Viktor Berishaj, të cilët janë shprehur se janë tejet të kënaqur që më fund publiku është pjesë e këtyre koncerteve dhe po ashtu se festivali i është bashkuar nismës së solidarizimit me festivalet e tjera evropiane, ‘Festivals for Compassion’.
“Mirëmbrëma dhe mirë se keni ardhur në mbrëmjen përmbyllëse të festivalit ReMusica. Në program sonte do ta kemi premierë veprën e kompozitorit Valton Beqiri, e titulluar “XX”, jo rastësisht. Vitin e kaluar ReMusica ka festuar edicionin e njëzetë të festivalit, fatkeqësisht duke qenë larg jush por jemi shumë të lumtur që sonte po ju shohim dhe që sot do ta dëgjojmë këtë vepër premierë që do të jetë nga “Viva String Quartet” dhe Petrit Çekun në kitarë dhe Valton Beqiri në piano”, thotë Rudi.
Ndërsa, producenti i ReMusica-s, Viktor Berishaj tha se festivali, si çdo vit tjetër, ka trajtuar një temë e cila duhet të adresohet në shoqëri dhe jo vetëm.
“Me shumë mëdyshje e kemi nisur edicionin. Kjo është hera e parë me publik qysh duhet sepse pe shihni dhe vetë numrin e limituar të ulëseve por ka qenë një sfidë për t’u kthyer në normalitet që na është dashur shumë dhe sivjet kemi arritur që ta bëjmë këtë gjë. Si çdo vit tjetër, jemi munduar që një temë të caktuar që duhet të adresohet si shoqëri, pjesëtarë të komunitetit apo si gjallesa që jetojmë në këtë kohë, janë ato të ndryshimit klimatik dhe urgjencës së veprimit klimatik dhe mjeshtërisht Donika ka qenë ajo e cila ka arritur të futë nëpërmjet veprave këtë temë prej secilës natë të koncerteve nëpërmjet katër elementeve si uji, ajri, toka dhe zjarri”, thotë Berishaj.
Sipas tij, ka pasur një mori aktivitetesh përcjellëse, masterklasë, punëtori të ndryshme në Universitetin e Prishtinës si dhe një numër të madh të dashamirëve të muzikës. Ka pasur ansamble të mrekullueshme dhe talente të mrekullueshëm në Kosovë që kanë performuar në këtë edicion.
“Sonte po bëjmë një përmbyllje ashtu tamam si na përket neve. Sa i përket artistit që ka me performu sonte me kuartetin, nuk ka nevojë për ta prezantuar sepse të gjithë e dimë se kush është Petrit Çeku saqë edhe stadiumin e Prishtinës me pas hap, nuk do të na zinte të gjithëve për me përcjell. Megjithatë koncertin sonte do e nisim përsëri me një mesazh që kemi nevojë për ta adresuar. Pra, ne marrim frymë njësoj me qytetarët ukrainas të cilët janë duke e përjetuar një tmerr të cilin ne fort mirë e dimë. Për këtë arsye si viteve tjera ReMusica i është bashkuar nismave të ndryshme ndërkombëtare me një kauzë të caktuar. Nata do të fillojë me interpretimin e veprës së një kompozitori ukrainas të cilën e ka kompozuar në momentet kur ka nis lufta”, shpalos Berishaj.
Pas kësaj hapjeje, skena e cila mu në mes kishte të vendosura gjithsej pesë karrige të cilat me pozicionin e tyre i ngjasonin një gjysmë hëne dhe pianoja që qëndronte në qosh për t’u gjallëruar kur radha e saj do të vinte, po krijonin një hijeshi dhe atëherë kur me duartrokitje të zjarrta, publiku mirëpriti kuartetin harkor “Viva String Quartett”. Të veshur në të zeza nga koka e deri të këmbët, kuarteti harkor u fut direkt në interpretimin e veprës së parë të titulluar “Drop after drop” nga kompozitori ukrainas Maxim Shalygin, me ç’rast meloditë e veçanta që tërë kohës i ngjasonin një fëshfëritjeje, sollën një bukuri tingujsh të cilat me butësinë, qetësinë dhe ngadalësinë e tyre, vërtetë pikonin si pika të ujit, pikë pas pike deri në pikën e fundit që shënoi fundin e veprës.
Ndërsa, për veprën e dytë të radhës me titull “Guitar Quintet in D major, No.4, G, 448 – Fandango” nga kompozitori Luigi Boccherini, të pranishmit me brohoritje dhe duartrokitje që s’njihnin fund, mirëpritën kitaristin Petrit Çeku në skenë. Njashtu sikurse kuarteti harkor edhe kitaristi i veshur në ngjyra të zeza me një buzëqeshje në fytyrën e tij e nisi veprën e dytë për këtë mbrëmje.
Dy violina, një violë, një violonçel dhe një kitarë jetësuan interpretimin e melodive dhe tingujve të cilat po njëlloj sikurse pronarët e tyre, dilnin jashtë kontrollit për të shpalosur një vijë tejet ritmike. Në një hap me rimtin, kitaristi Petrit Çeku në çdo sekondë po dhuronte shpirtin e tij artistik nëpërmjet lëvizjeve të tij trupore saqë edhe flokët e tij po luhatnin në drejtime të ndryshme. Talenti i tij doli nga brendësia e tij qysh në momentin e parë të mbrëmjes dhe nuk u fut brenda në strofullin e vetë për asnjë çast.
Efikasiteti i shpejtësisë performuese, vështrimet melankolike, ndjeshmëria e tij ndaj instrumentit që qëndronte para tij si vetë hija e tij, bëri që kitaristi të emociononte secilin të pranishëm që po vështronte me kujdes elegancën e tij interpretuese. Ndërsa, kuarteti harkor me lëvizjet e duarve të tyre sollën një precizitet të pashoq. Harmonia e tyre ndërronte sa herë që ndërronte ritmi i veprave, me ç’rast ata ngulitën vështrimin e publikut drejt tyre, për të mos ia lëshuar atë asnjërit deri në notën e fundit.
Pas një pauze pesë minuta, drejt skenës ecte kitaristi Petrit Çeku i cili u shoqërua në piano nga Valton Beqiri për të sjell veprën premierë “XX” nga kompozitori Valton Beqiri, vepër kjo që pati ardhur dedikim ndaj 20 vjetorit të festivalit ReMusica por që u luajt mbrëmë për herë të parë në 21 vjetorin e festivalit. “XX”, hyri në secilin shpirt të pranishëm. Qysh nga minuta e parë e deri tek e fundit, vepra përçoi një emocion që s’kishte kush që do t’ia vinte pikën. Ndërlidhja e tingujve të pianos dhe melodive të kitarës krijoi një atmosferë tejet të ngrohtë me ç’rast publiku u fut në hipnozën e bukur që vepra posedonte. Ndonëse më e shkurtra nga tjerat vepra që u interpretuan mbrëmë, “XX” solli kulminacionin që në strehë të saj kishte dhuntinë e shkathtë të pabarazueshme.
Ndërsa, vepra e fundit për këtë natë, “Guitar Quintet op.143” nga kompozitori Mario Castelnuovo-Tedesco, e riktheu në skenë sërish kuartetin harkor “Viva String Quartett” ku së bashku me kitaristin Petrit Çeku, përmbyllën edicionin e 21-të të festivalit ReMusica në një mënyrë brilante. Pas pothuajse dy orëve interpretimi, ishte radha që publiku të mbizotëronte atmosferën me duartrokitje të pandalshme dhe brohoritje që preknin edhe qiellin. Me një ritëm të duartrokitjeve dhe brohoritjeve për këtë koncert si dhe tërë këtë edicion të mahnitshëm të ReMusica-s, u përmbyll programi i pasur dhe i larmishëm i veprave që do mbahen mend gjatë në kujtesën e secilit që ka ndjekur nga afër të gjitha koncertet e parapara për edicionin e 21-të të festivalit që shënoi një sukses përtej krahasimit.
Ndërkaq, për të treguar më shumë rreth përshtypjeve të saj për këtë mbrëmje dhe tërë edicionit në përgjithësi, për KultPlus foli Donika Rudi.
“Koncerti ishte jashtëzakonisht i bukur, pra një koncert të cilin e kemi pritur tash një kohë. Petriti është njëri nga bashkëpunëtorët më të ngushtë të festivalit ReMusica dhe pothuajse në çdo vit, në çdo edicion, atë e kemi prezent. Këtë vit ai erdhi me Kuartetin harkor nga Maqedonia Veriore “Viva String Quartet”. Një program tepër i bukur me dy elemente të cilat e karakterizuan koncertin, vepra “Drop after drop”, e kompozitorit ukrainas dhe me këtë rast u solidarizuam me festivalet e tjera evropiane në iniciativën ‘Festivals for Compassionn’ dhe kjo vepër është shkruar në këto muajt e fundit në Ukrainë dhe kush ma shumë se ne, si popull, e përjetojmë gjendjen dhe atë se çka po ndodh në Ukrainë. Me këtë vepër deshëm që të solidarizohemi me gjithë botën dhe festivalet e rëndësishme të muzikës klasike botërore”, thotë Rudi.
Sipas saj, vepra e Valton Beqirit ishte një vepër e cila është dedikim ndaj festivalit ReMusica për edicionin e kaluar. Situata e cila ka ndodhur dy vitet e fundit konsiderohet të kishte qenë mundësia jo e mirë për të dhënë premierën prandaj ajo u dha sonte.
“Mendoj që i gjithë edicioni i 21-të ka qenë një laramani me programe të ndryshme duke filluar nga koncertet në moshë të re e deri tek ajo e vjetra. ReMusica gjithmonë tenton që të ketë një program ku secili mundet me gjet vetën në stile mjaft të ndryshme. Këto njëzet vite, festivali ka pasur në fokus krijimtarinë kosovare duke stimuluar kompozitorë të rinj për vepra të reja por këtë vit kemi tentuar dhe do të tentojmë që bashkëpunimet në mes të artistëve tanë dhe atyre ndërkombëtarë ti jetësojmë duke u bërë kështu një urë lidhëse në mes krijuesve kosovarë dhe atyre ndërkombëtarë. Ajo se çka më së shumti kemi pritur ne si ekip ka qenë kontakti me publikun. Kjo energji në mes të artistit, publikut dhe organizatorëve, është një trekëndësh shumë me rëndësi i cili ka munguar shumë. Andaj, ky rikthim në 21 vjetorin tonë është një prej momenteve më të bukura të cilën kemi mundur ta përjetojmë”, përfundon Rudi.
Ndërkaq, kujtojmë se edicioni i 21-të i festivalit ReMusica, “The Sound of Change”, trajtoi temën e ndryshimeve klimatike dhe bëri thirrje për ndërgjegjësim tek publiku për veprim klimatik. E gjithë kjo, ishte reflektuar në programin e sivjetmë, duke u kujdesur që përmbajtja e tij të orientohet në këtë temë, me fokus në katër elementet e natyrës – Toka, Uji, Ajri dhe Zjarri.
Madhështia e gjithsej katër veprave të mrekullueshme nga kompozitorë të huaj dhe shqiptarë, u jetësuan mbrëmë nga talenti i violinistes Abigeila Voshtina dhe pianistes Artemida Qarri-Haxhiaj në natën e katërt të festivalit ReMusica. Këto vepra gjatë tërë natës frymuan tinguj e melodi të cilat vinë të gërshetuara magjishëm mes vete nga dy instrumentet vezulluese, me ç’rast ritmi i pakrahasueshëm dhe gjallëria perfeksioniste ishin dy aspektet që përkuan me këtë koncert, shkruan KultPlus.
Me dymbëdhjetë reflektorë në ngjyrë të kaltër, drita që rrethakon hapësirën për dy instrumentistet mu në mes të skenës, emri i festivalit që me shkronja të gjelbër gjallëronte fuqishëm në prapaskenë si dhe dritat e ngrohta të drejtuara nga ana e instrumenteve, tashmë është shndërruar në simbolin kyç të koncerteve që po mbahen në Sallën e Kuqe në Prishtinë. Kjo sallë e cila për tri net rresht priti artistë të shkëlqyer, tashmë është bërë gati të pushtohej edhe nga dy artistet që sonte sollën një muzikalitet dhe teknikë të jashtëzakonshme.
Fotografia: Rrahman Osmani
Me një duartrokitje nga ana e publikut, në skenë me një elegancë të tejskajshme, doli violinistja Abigeila Voshtina dhe pianistja Artemida Qarri-Haxhiaj, por para se programi të gjente fillimin e tij, violinistja Voshtina iu drejtua audiencës për të treguar për një ndryshim të vogël në interpretimin e veprave.
“Dua të ju informoj për një ndryshim të vogël në program. Ne sonte do të fillojmë me sonatën e Çesk Zadejës sepse mendoj që ka një identitet shumë të spikatshëm të muzikës shqiptare. Është e shkruar në vitin 19 2 dhe e luajtur për herë të parë në 19 4. Sonata është shumë atipike jo vetëm për kohën, jo vetëm për ideologjizmin e komunizmit, por edhe për kohën që jemi sot sepse ka vetëm dy kohë. E shikoni që koha e parë ka një hapësirë që mund ta quajmë mjegullore kurse koha e dytë është gjatë gjithë kohës me një ritëm shumë folklorik tonin, shumë të thyer dhe kjo tregon se sa e fuqishme ka qenë pena e Çeskut dhe pse ai quhet ‘babai i muzikës shqiptare’. E them këtë për arsye se e di që ky festival është për të gjithë ata që janë krijues të rinj dhe kompozitorë të rinj të Kosovës”, thotë Voshtina.
Pas kësaj hyrjeje, në sallë mbizotëroi heshtja për të dëgjuar veprën “Sonata për violinë e piano” e kompozitorit Çesk Zadeja. Dyshja shqiptare solli një fillim tejet të bukur ku në njërën anë lehtazi dalloheshin lëvizjet e mprehta të gishtërinjve në piano dhe në anën tjetër ishte teknika e fuqishme dhe përqendrimi preciz në instrumentin e violinës ato që dëshmonin për ritmin dinamik që gërshetohej në atmosferë me ç’rast shpirti i tyre artistik dilte jashtë çdo kufiri për të përfunduar kështu magjishëm veprën e parë për këtë natë.
Fotografia: Rrahman Osmani
Ndërkaq, në radhë ishte vepra e titulluar “Sonata për violinë e piano No.1 la minor Op.105” nga kompozitori Robert Schumann, vepër kjo që me precizitetin, shprehjet e fytyrës, luhatjet e tërë trupit dhe qetësinë adhuruese që shpërfaqnin dy instrumentistet, bëri që çdo melodi e krijuar të gjente rrugën për të hyrë në shpirtin e të pranishmëve. Performanca e tyre frymëzuese erdhi nën inkuadrimin e harkut të violinës në ngjyrë gjaku që vazhdimisht lëvizte pa ndalim dhe çelësave bardh e zi të instrumentit gjigand në ngjyrë të zezë të cilat përjetuan prekje sa të lehta aq edhe të çmendura për të sjell kështu tinguj që furishëm përçuan ndjenja diversive.
Pas interpretimit të veprës së dytë me radhë, një pauzë e shkurtër zuri vend dhe violinistja Voshtina përsëri iu drejtua publikut para se fillonte vepra e tretë.
“Kur vendosa programin dhe fola me pianisten Artemidën zgjodhëm kompozitorin Johannes Brahms i cili është jashtëzakonisht i rëndë dhe kjo nganjëherë nuk duket sepse njerëzit mendojnë që instrumentistët bëjnë ‘la la la’ por nuk është kaq e thjeshtë. Atëherë ideja se pse zgjodhëm këta dy autorë gjerman si R.Schumann dhe J.Brahms është jo sepse Gjermania për fatin tonë të madh ka shkruar me të vërtetë shumë, por këta të dy lidhen shumë me njëri-tjetrin. Kjo ishte arsyeja pse ne zgjodhëm këta dy autorë, por që me të vërtetë, kush ka dëgjuar dhe kush ka luajtur, e di natyrisht se sa e rëndë është muzika gjermane, e rëndë jo si muzikë sepse muzika është jashtëzakonisht e bukur, por që kërkon me të vërtetë shumë po shumë fuqi. Jam e sigurt se do t’iu pëlqej”, thotë Voshtina.
Fotografia: Rrahman Osmani
Një piano dhe një violinë sollën veprën e radhës të titulluar “Sonata për violinë e piano No.2 në la maxhor, op.100” nga kompozitori Johannes Brahms. Dy instrumentet kësaj here u futën në teknikën e fuqishme të dy pronareve të tyre, me ç’rast muzika e fuqishme që pasonte në çdo moment bëri që edhe flokët e interpretuesve të dridheshin me lëvizjet e tyre të shpejta dhe të sakta. Ndeshja e pianos dhe violinës tërë kohën po krijonte një gërshetim plotësues dhe të gjithanshëm që solli një gjallëri që herë vinte në formën e ngadaltë dhe më lirike, ndërsa në momentin tjetër ndryshonte duke sjell një rrotullim të zhurmshëm dhe energjik të paparë.
Ndërkaq para se edhe vepra e fundit të jehonte, violinistja Voshtina përsëri mori fjalën.
“Kemi një ‘Scherzo’ e cila po luhet për herë të parë. Duhej patjetër që ta futnim një kompozitor kosovar dhe me një krijim të ri, kështu që shpresoj të ju pëlqej”, thotë ajo.
Ishte kjo dyshe shqiptare që mbrëmë solli një interpretim magjepsës me tërë programin e luajtur, duke kapur kështu vëmendjen e të pranishmëve me performimin e notave që dukshëm buronin nga brendësia e tyre shpirtërore e kjo vërehej sidomos nga vepra “Schero” të kompozitorit Drinor Zymberi që shënoi fundin e kësaj nate, duke lënë pas momente dhe kujtime që do i përcjellin të pranishmit për një kohë të gjatë.
Krejt në fund, publiku me duartrokitjet e pa ndalura dhe brohoritjet e shumta falënderoi violinisten Abigeila Voshtina dhe pianisten Artemida Qarri-Haxhiaj për performancën e bukur dhe të paharrueshme, duke i rikthyer ato për të dytën herë në skenë, me ç’rast edhe violinistja Voshtina mori fjalën për të përmbyllur këtë koncert.
“Ky koncert ka pasur shumë episode sepse donim ta fillonim që në vitin 2019 por ra pandemia, pastaj pas pandemisë Artemida ka pasur një vajzë dhe tani më në fund erdhi ky moment, kështu që faleminderit shumë për ftesën dhe punën që ju e bëni. Faleminderit dhe publikut për pjesëmarrjen ngase pa ju asgjë nuk do të funksiononte”, thotë Voshtina.
Fotografia: Rrahman Osmani
Ndërkaq, kujtojmë se edicioni i 21-të i festivalit ReMusica, “The Sound of Change”, trajton temën e ndryshimeve klimatike dhe bën thirrje për ndërgjegjësim tek publiku për veprim klimatik. E gjithë kjo, është reflektuar në programin e sivjetmë, duke u kujdesur që përmbajtja e tij të orientohet në këtë temë, me fokus në katër elementet e natyrës – Toka, Uji, Ajri dhe Zjarri.
Festivali ReMusica do të zgjasë deri më 21 prill. Ndërsa, sonte në Teatrin Oda duke filluar nga ora 20:00, vjen koncerti i radhës “Electroacoustic and Acousmatic Night (Earth and Wind)” nga kompozitorja Elizabeth Anderson. Ndërkaq, nga ora 21:00 po ashtu në Teatrin Oda mbahet koncerti audio-vizual “Isolation Music” nga kompozitori Mehmet Can Ozder dhe kompozitori Ilir Bajri.
Fotografia në ballinë: Rrahman Osmani/ KultPlus.com
Nata e tretë e edicionit të 21-të të festivalit ReMusica, solli para të pranishmëve një interpretim nga Kuarteti harkor, “Selini String Quartet”, ku së bashku me inkuadrimin e artistëve të ftuar si: sopranoja Zana Abazi-Ramadani dhe pianisti Edon Ramadani, u sollën vepra të kompozitorëve të huaj si dhe atyre shqiptar, me ç’rast mbrëmë mahnitshëm u gërshetuan dy fryma sa të ndryshme, aq edhe të mrekullueshme, shkruan KultPlus.
Tash e tri net, është Salla e Kuqe ai vendi i cili tashmë po pushtohet nga artistë të ndryshëm të cilët gjithmonë prekin skenën e njëjtë por të cilët sjellin vepra krejtësisht unike ku secila ngërthen një veçanti në vetvete. Shkronjat gjigande që shpërfaqin emrin e festivalit në prapaskenë kësaj here kishin ndërruar pozicionimin e tyre në një kënd ndryshe që i përshtatej akoma më shumë hapësirës, ndërkaq në anën tjetër, reflektorët e vendosur mbrapa skenës ishin kthyer përsëri në ngjyrë të kaltër, për t’i shtuar hijeshinë, veprave që pas pak do të performoheshin.
Fotografia: Rrahman Osmani
Hapjen e natës së tretë të festivalit ReMusica e nisi koordinatori Shaban Behramaj, i cili i uroi mirëseardhjen të pranishmëve dhe tutje tregoi se është bërë një ndërrim i vogël në program.
“Mirë se keni ardhur në natën e tretë të festivalit ReMusica. Jemi shumë të lumtur që ju shohim sonte këtu dhe me të vërtetë na ka marrë malli që të jemi prezent në koncerte, për shkak se ishim dy vite të tmerrshme në formatin online që ishin jo aq të lehta për ne. Sonte prezantohet Kuarteti nga Austria, “Selini String Quartet”, të cilat kanë një program të mirë përzgjedhur edhe mezi po presim t’i dëgjojmë. Por, fillimisht po ju informoj për një ndërrim të vogël në program ku bëhet fjalë për vendosjen e veprës së tretë me radhë, e cila do të luhet krejt në fund të programit”, thotë Behramaj.
Po ashtu për një fjalë rasti në skenë doli dhe ambasadori austriak Christoph Weidinger, i cili thotë se është një kënaqësi që sonte do të interpretohet një program mjaft i larmishëm.
“Jam shumë i kënaqur që mund t’ju mirëpres këtu sonte në këtë koncert, i cili mbështetet nga Ambasada e Austrisë për programin “The Sound of Change”. Ky është një program i Ministrisë të Punëve të Jashtme të Austrisë i cili jep mundësinë muzicientëve të rinj që të performojnë edhe jashtë vendit, jashtë Austrisë. Andaj, jam shumë i kënaqur që sonte “Selini String Quartet” do të interpretojnë një program të larmishëm për ne. Siç shumica prej jush e dini, muzika kamertale e në veçanti kuartetet harkore kanë një traditë të gjatë në Austri dhe kjo traditë prek edhe kohën e shumë kompozitorëve si Mozart”, thotë Weidinger.
Sipas tij, është një gjë shumë e bukur që programi që do të luhet sonte, përmban një vepër nga Schubert dhe vepra të tjera nga kompozitorë bashkëkohorë nga Kosova dhe Austria.
Fotografia: Rrahman Osmani
Pas këtyre fjalimeve, me veshje në ngjyrë të zezë, në skenë doli Kuarteti harkor “Selini String Quartet”, që qysh në fillim po rrezatonte plot hijeshi dhe elegancë. Me hapa drejt skenës, ato u mirëpritën me një duartrokitje të zjarrtë. Ndërkaq, pas disa ndreqjeve të vogla të instrumenteve të tyre, fuqishëm erdhën meloditë e para të veprës “String Quartet op.20/5” nga kompozitori Joseph Haydn, vepër kjo që futi në funksion të gjithë trupin e këtyre instrumentisteve, duke lëvizur sa në një anë në tjetrën, për të goditur vazhdimisht notat e sakta që po pasonin me lehtësi.
Dy violina, një violë dhe një violonçel në ngjyrë kafe morën vëmendjen e kujdesshme të të pranishmëve, të cilët me një koncetrim të shtuar vëzhgonin lojën madhështore të kuarteti harkor. Nga vepra në vepër, lëvizjet e krahëve dhe të duarve të tyre futeshin në një cikël rrotullimi nga i cili nuk dolën për asnjë moment, me ç’rast secila nga instrumentistet tërë kohën po frymonte në një vijë me meloditë dhe tingujt pasues.
Përgjatë pothuajse dy orëve, kuarteti solli dhe veprat e njohura si: “seacoloured lightbellsounds” nga kompozitori Philipp Manuel Gutmann dhe “String Quartet no.13 ‘Rosamunde’” nga kompozitori Franz Schubert, për të lënë kështu një përshtypje se meloditë çelnin ngadalë nga instrumentet porsi lulet në pranverë, teksa ato pothuajse ishin të padëgjueshme në disa çaste por që kjo padyshim ishte dhe veçantia e tyre.
Fotografia: Rrahman Osmani
Në anën tjetër, ëmbëlsia tjetër e këtij koncerti padyshim që ishin veprat e njohura shqiptare si: “Vet’ ke mbetë” nga kompozitori Gjergj Kaçinari dhe e ripërpunuar nga Edon Ramadani dhe “Valsi i lumturisë” nga kompozitori Avni Mula, e po ashtu që erdhi e ripërpunuar nga Edon Ramadani. Këto dy vepra erdhën nën interpretimin e fuqishëm të sopranos Zana Abazi-Ramadani e cila së bashku me “Selini String Quartet” dhe pianistin Edon Ramadani, pushtuan skenën me frymën shqiptare të pakrahasueshme.
Publiku ishte ai i cili dukshëm dëgjonte me entuziazëm vokalin e pastër të sopranos teksa edhe buzëqeshjet nuk mungonin në fytyrën e tyre. Meloditë mallëngjyese dhe tejet melankolike u përjetuan nga secili i pranishëm, me ç’rast ishin ndjenjat unike ato që morën përsipër që të shfaqeshin edhe në formën fizike, atë të rrëqethjes në trupin e njeriut në një formë trajektoreje.
Kështu, krejt në fund ishte publiku ai i cili duartrokiti dhe brohoriti performancën e jashtëzakonshme të “Selini String Quaret”, sopranos Zana Abazi-Ramadani dhe pianistit Edon Ramadani, të cilët u rikthyen për të dytën herë në skenë për t’i dëgjuar nga afër ritmikën e krijuar nga të pranishmit.
Fotografia: Rrahman Osmani
“Selini String Quartett” për KultPlus tha se kjo është hera e parë që vijnë në Prishtinë dhe se veprat shqiptare janë me të vërtetë tejet të bukura.
“Është hera e parë që ndodhemi këtu në Prishtinë dhe në fakt e kemi shijuar shumë. Njerëzit janë kaq të mirë dhe moti është kaq i ngrohtë kur mbërritëm dje. Ne patëm një provë shumë të bukur dhe një masterklasë shumë të mirë këtë mëngjes me studentët, gjë për të cilën u befasuam shumë këndshëm. Sonte patëm kënaqësinë të performojmë për një publik të madh kështu që shpresojmë të kthehemi”, thotë “Selini String Quartett”.
Sipas tyre, pjesët shqiptare vërtetë ishin të mahnitshme dhe diçka e re për to, ku muzika u konsiderua më e lehtë dhe tejet e bukur.
Po ashtu, për të treguar më shumë rreth përshtypjeve për koncertin, për KultPlus foli sopranoja Zana Abazi-Ramadani.
“Fillimisht jam shumë e privilegjuar që mu dha mundësia të performoj me këtë Kuartet fantastik dhe dua të them se nuk kemi bërë asnjë provë përpos sot që kemi bërë provën që ka zgjat vetëm pesë minuta, dhe ja suksesi po shihet edhe vetë dhe shpresoj që edhe publikut i ka pëlqyer”, thotë Abazi-Ramadani.
Sipas saj, programi ishte i veçuar për shkak të shkaqeve natyrore që duhet të përkrahen në mënyrë maksimale dhe në mënyrë që vetëdijesimi të jetë akoma më i pranishëm në popull.
“Besoj që do të ketë edhe më shumë koncerte të tilla sepse siç po shihet, publiku është shumë i interesuar për të dëgjuar. Ndërsa, në anën tjetër do të duhej të ishte edhe një sallë tjetër, që është tejet e domosdoshme, njëlloj sikur shtëpia operistike për solo këngëtarët. Besoj që në të ardhmen do të realizohet një sallë e tillë, ngase kjo sallë nuk i përmbush të gjitha kushtet e nevojshme për muzicientët”, përfundon Abazi-Ramdani.
Ndërsa, pianisti Edon Ramadani për KultPlus tha se ishte një kënaqësi që ai po bashkëpunon me një Kuartet të përmasave botërore.
“Ishte një kënaqësi që të kem bashkëpunim me një Kuartet të tillë prestigjioz dhe botëror sepse “Selini Quartet” ka një agjendë të ngjeshur dhe një turne të paracaktuar nëpër botë, kështu që është me të vërtetë një kënaqësi që ReMusica së bashku me Ambasadën Austriake na mblodhi për të interpretuar së bashku ku unë dhe pata dy përpunime të dy këngëve ikonike të dy këngëtareve tona siç është Nexhmije Pagarusha dhe Vaçe Zela”, thotë Ramadani.
Sipas tij, eleganca, muzikaliteti dhe saktësia e Kuarteti, janë tri veçoritë kryesore që u panë edhe në koncert.
Ndërkaq, kujtojmë se edicioni i 21-të i festivalit ReMusica, “The Sound of Change”, trajton temën e ndryshimeve klimatike dhe bën thirrje për ndërgjegjësim tek publiku për veprim klimatik. E gjithë kjo, është reflektuar në programin e sivjetmë, duke u kujdesur që përmbajtja e tij të orientohet në këtë temë, me fokus në katër elementet e natyrës – Toka, Uji, Ajri dhe Zjarri.
Festivali ReMusica do të zgjasë deri më 21 prill. Ndërsa, sonte duke filluar nga ora 20:00, vjen koncerti i radhës “Duo Ko-Art” me violinisten Abigeila Voshtina dhe pianisten Artemida Qarri-Haxhiaj.
Fotografia në ballinë: Rrahman Osmani/ KultPlus.com
Lorik Pylla, kitaristi i talentuar mbrëmë në festivalin ReMusica solli para publikut një program jo dhe aq të zakonshëm, me ç’rast ishin veprat e përzgjedhura për këtë mbrëmje ato të cilat rrallë herë dëgjohen në shoqërinë tonë. Performimi unik dhe diversiteti i teknikave, ishin dy shtyllat kryesore që përkuan me këtë natë e cila frymoi tërësisht në stilin modern, për të shpalosur kështu melodi e tinguj që rrëshqisnin mrekullisht në skenë dhe lehtazi depërtonin përballë të pranishmëve, shkruan KultPlus.
Pikërisht si në natën e parë, nata e dytë e priti kitaristin Lorik Pylla në Sallën e Kuqe, vend ky i cili po qëndronte gjithmonë i ndezur edhe pa asnjë trup mbi të. Me reflektorë në ngjyrë të kuqe, drita të ngrohta që vështronin nga lart skenën si dhe ndriçimi i posaçëm mbi kitaristin në një formë rrethore, rriste emocionet e publikut dhe parashikonte kahjen e kësaj mbrëmjeje të veçantë.
Fotografia: Rrahman Osmani
Njashtu si perdet në ngjyrë të zezë që ishin të lëshuara prapa karriges që qëndronte e vetmuar në skenë, i veshur në të zeza kokë e këmbë, doli kitaristi Pylla me një besueshmëri në vetvete dhe hapa preciz drejt skenës. Me një ndreqje të shpejtë të duarve të tij dhe kitarës, ai hyri direkt në veprën e parë të titulluar “Chiton” nga kompozitori Uros Rojko, vepër kjo që qysh në sekondat e parë vodhi shikimin dhe përqendrimin e të pranishmëve.
E vendosur përballë tij si një trup i dytë, ishte kitara ajo e cila vazhdimisht godiste fuqishëm atmosferën me nota dhe timbër të mrekullueshëm. Në anën tjetër, ishte vetë Pylla ai i cili ishte futur në hipnozën e kitarës, për t’iu bindur plotësisht asaj e për t’i qëndruar besnik deri në momentin e fundit. Ndërsa, me plot elegancë, ishin gishtërinjtë e kitaristit ato të cilat hynin vazhdimisht në labirintin e notave dhe jo vetëm. Ato herë trokitnin e herë të tjera dhe zhdjergshin nga maja e instrumentit e vazhdonin deri në fund të saj.
Shprehjet e fytyrës, lëvizjet e kokës dhe të njërës këmbë, efikasiteti dhe teknika gjallëruese e kitaristit, dëshmoi se interpretimi në kitarë sado i lehtë të duket nga jashtë, në fakt kërkon durim dhe përqendrim të jashtëzakonshëm. Andaj, në mesin e tingujve të lehtë ku njeriu herë pas here duhej dhe të sforconte veshët për të dëgjuar atë mrekulli, shfaqej një cikël i butë prej melodive të cilat me bukurinë e tyre vërshonin mbi ajër dhe pushtonin skenën nga vepra në vepër.
Fotografia: Rrahman Osmani
Përgjatë pothuajse dy orëve, kitaristi Pylla interpretoi vepra si: “12 Impressionistic Sketches” të Allan Willcocks dhe Tilman Hoppstock, “Homenaje a Debussy” dhe “Danza del Molinero” nga kompozitori Manuel De Falla, “Due Canzoni Lidie” nga kompozitori Nuccio D’angelo, “Sonata për kitarë op.47“ nga A.Ginastera, duke kapur kështu dukshëm vëmendjen e çdo njeriu të pranishëm për të dëgjuar nga afër botën melodike të kitaristit, aty ku dhe shihej më së miri talenti i tij i cili në çdo vepër dilte jashtë për të përshëndetur secilin njeri në publik.
Po ashtu, në këtë mbrëmje si artistë të ftuar ishin dhe violinisti Rron Bakalli dhe baritoni Shaban Behramaj, të cilët së bashku me kitaristin Pylla, sollën veprën “Danza Espanola no.5” nga kompozitori Enrique Granados si dhe veprën premierë që vjen si porosi e festivalit ReMusica, e titulluar “Experior” e kompozuar nga Ersan Januzi. Ndërlidhja kitarës, violinës dhe vokalit vjen si një formacion jo i zakonshëm por që la mbresa të shumta e të veçanta në këtë mbrëmje. Tre trupa në skenë që ishin në posedim të tre talenteve, interpretuan këto dy vepra në një mënyrë tejet brilante, me ç’rast telat e kitarës dhe violinës dridheshin nën duart e pronarëve, ndërsa vokali i baritonit Behramaj dëgjohej me një kujdes të veçantë nga ana e publikut.
Ndërsa, vepra e njohur “Njëzet e pesë gërsheta” nga kompozitori Rafet Rudi, ishte veçantia e kësaj mbrëmje, ku ndonëse dallohej si më e shkurtra nga të gjitha veprat tjera, ajo la një gjurmë të ëmbël në skenë dhe jo vetëm. Në anën tjetër, ishte delikatesa e butë e kitaristit Pylla, ajo që vallëzonte si një hije e mëndafshtë mbi tërë instrumentin e kitarës, për të sjell kështu një program modern i cili do të mbahet mend për shumë gjatë si një nga programet më unike të festivalit ReMusica, ngase secila vepër qysh nga fillimi e deri në fund, fillonte si zjarri i qiririt dhe përfundonte në mënyrë precize dhe të saktë, si ndezja e një çibriti.
Fotografia: Rrahman Osmani
Pas gjithë kësaj nate ishte publiku në një numër të shumtë, ai i cili duartrokitjet dhe brohoritjet nuk i kurseu, duke e rikthyer në skenë përsëri kitaristin i cili me një buzëqeshje falënderonte për prezencën e tyre.
Fotografia: Rrahman Osmani
Për të treguar më shumë rreth programit si dhe përshtypjeve të tij për këtë mbrëmje, për KultPlus foli kitaristi Lorik Pylla.
“Ishte një atmosferë mjaft e mirë dhe e ngrohtë duke nisur qysh nga ndriçimi dhe gjithçka çfarë kanë bërë me skenën në këtë festival në një mënyrë profesionale, duke më bërë dhe mua të ndihem mjaft mirë. Ajo se çka më la më së shumti përshtypje është mikpritja e publikut të një programi mjaft eksperimental që e kam zgjedh me performu sonte, ngase është një muzikë moderne, muzikë të cilën unë e adhuroj shumë dhe më erdh mirë që edhe publiku e priti në një mënyrë mjaft të mirë”, thotë Pylla.
Sipas tij, muzika klasike moderne është njëra ndër adhurimet e tij dhe si pasojë edhe kitara është një instrument i dedikuar për të ardhmen dhe ai po beson dhe shpreson se kompozitorët të shkruajnë sa më shumë për këtë instrument për arsye të mungesës së një repertori.
“Deri më tani asnjëherë nuk kam luajtur një vepër premierë dhe sonte më erdhi rasti. Ishte një ndjenjë mjaft e mirë që iu dha rasti kompozitorit Ersan Januzi që atij t’i luhet vepra në prezencë fizike. Shpresoj se i ka pëlqyer. Ndërkaq, unë po ndihem mjaft mirë që jam pjesë e këtij edicioni, pasi që ky edicion i dedikohet mbrojtjes të natyrës dhe njëra nga veprat e luajtura sonte, kishte pikërisht këtë tematikë. Isha me fat që isha pjesë e këtij edicioni të festivalit ReMusica, e sidomos pas dy viteve pa publik, në këtë herë me publik, unë isha pjesë dhe ishte një ndjenjë tejet e veçantë”, thotë Pylla.
Fotografia: Rrahman Osmani
Po ashtu, baritoni Shaban Behramaj për KultPlus tregoi se kjo është hera e parë që ai performon si një solist në festivalin ReMusica.
“Së pari unë jam edhe pjesë e festivalit ReMusica dhe pa diskutim jam shumë i lumtur që festivali sivjet po rikthehet në formën fizike para publikut, që është diçka shumë e bukur duke pasur parasysh që dy vitet e kaluara kemi qenë online dhe normalisht ndjenja nuk është e njëjtë. Unë sonte pata mundësinë dhe kënaqësinë që po ashtu sonte të performoj në këtë festival si mysafir në koncertin recital të Lorik Pyllës, një kitarist i mrekullueshëm i ri dhe i talentuar, i cili vepron dhe jeton në Gjermani. Për mua është një ndjenjë tepër e veçantë për të performuar në skenën e ReMusicas pasi që është hera e parë që performoj si solist”, thotë Behramaj.
Sipas tij, veçantia e programit është që tematika jo vetëm e kësaj nate por e komplet edicionit, është lidhja direkte me ndryshimet klimatike, me ç’rast dhe vepra premierë e kompozitorit Ersan Januzi po ashtu lidhet me këtë tematikë. Po ashtu, një tjetër veçanti është bashkimi i kitarës, violinës dhe vokalit, një formacion jo i zakonshëm por i cilësuar si mjaft i lezetshëm.
“Më së shumti sonte më la përshtypje fakti që publiku ishte në një numër shumë të madh dhe fakti që publiku ka qëndruar deri në fund të koncertit duke marrë parasysh muzikën jo shumë të popullarizuar tek ne. Kjo për mu është shumë mbresëlënëse. Ndërkaq, performimi i një vepre premierë sonte ishte një ndjenjë e veçantë për shkak se është pothuajse si një vulë e vazhdimësisë së kësaj vepre në gjeneratat e ardhshme”, përfundon Behramaj.
Kujtojmë se edicioni i 21-të i festivalit ReMusica, “The Sound of Change”, trajton temën e ndryshimeve klimatike dhe bën thirrje për ndërgjegjësim tek publiku për veprim klimatik. E gjithë kjo, është reflektuar në programin e sivjetmë, duke u kujdesur që përmbajtja e tij të orientohet në këtë temë, me fokus në katër elementet e natyrës – Toka, Uji, Ajri dhe Zjarri.
Festivali ReMusica do të zgjasë deri më 21 prill. Ndërsa, sonte duke filluar nga ora 20:00 në Sallën e Kuqe vjen koncerti i radhës me kuartetin harkor Selini Quartet nga Austria si dhe artisët e ftuar si: Zana Abazi Ramadani dhe Edon Ramadani.
Fotografia në ballinë: Rrahman Osmani/ KultPlus.com
Edicionin e tij të 21-të, festivali ReMusica e nisi mbrëmë me një interpretim nga kuarteti i saksofonëve nga Holanda, “Syrene Saxophone Quartet”, që për publikun solli vepra mjaft interesante. Këto vepra që ngërthyen në vete temën e ujit, u interpretuan me një elegancë dhe hijeshi të pakrahasueshme, me ç’rast ky kuartet me të vërtetë lëvizi si rrjedhë e ujit përgjatë gjithë këtij koncerti, për të sjell kështu vepra të cilat aq butësisht hynin në shpirtin e pranishëm, shkruan KultPlus.
Salla e Kuqe ishte vendi i cili mbrëmë mirëpriti koncertin e parë të festivalit, ku me gjithsej dymbëdhjetë reflektorë të kaltër, dritat e ngrohta që vinin nga lart, dhe skena e ndriçuar në një rreth të veçantë për interpretueset, bëri që akoma pa nis ky koncert, publiku të jetë pjesë e tij. Ndërkaq, me shkronja të mëdha dhe perde të zeza të vendosura prapa, ishte emri i festivalit që erdhi në ngjyrë të gjelbër ku pothuajse dukej se po frymonte nga posedimi gjallërues që përmbante.
Hapjen e festivalit ReMusica e nisi drejtoresha artistike, Donika Rudi, e cila është shprehur se po ndjen një kënaqësi të madhe pas mungesës fizike që zgjati për dy vite.
“Është shumë kënaqësi që po ju shoh sonte këtu. Ka dy vite që po e presim këtë natë. Këtë vit shënohet 21 vjetori i festivalit. Vitin e kaluar, me shënimin e 20 vjetorit kemi planifikuar një mori koncertesh e aktivitetesh, por në minutë të fundit, u anuluan të gjitha ngase ato erdhën vetëm në formatin online. Festivali këtë vit trajton një temë të veçantë ku i kemi katër elemente të natyrës si: toka, ajri, uji dhe zjarri. Në këtë formë, është ndërtuar dhe gjithë programi që është para jush. Pra, sonte tematikën e kemi me ujë, prandaj edhe sirenat i kemi sonte këtu”, thotë Rudi.
Sipas saj, netët e tjera do të vazhdojnë me këtë tempo e ritëm. Ndërkaq, në koncertin e fundit e paraparë është edhe një vepër e një kompozitori ukrainas, Maxim Shalygin, që vjen e shkruar qysh vonë, në mënyrë që solidarizimi të jetë i pranishëm edhe në këtë festival.
Fotografia: Rrahman Osmani
Pas kësaj hapjeje, me veshje në ngjyrë të kuqe e të pembe, në skenë doli kuarteti i saksofonëve “Syrene”, që pas pak do të pushtonte skajet e gjithë sallës me tinguj të fuqishëm por edhe të butë e komplekse. Në një ndërlidhje me qetësinë absolute të të pranishmëve, erdhi vepra e parë e titulluar “Water music – Suite No.1 in F Major” e kompozitorit George Frideric Handel si dhe vepra e dytë “The Waves”, nga kompozitori Jacob Ter Veldhuis.
Katër saksofona që shndrisnin në ngjyrë ari arritën që të vjedhin vëmendjen e gjithsecilit. Të lëshuar nga agresiviteti, meloditë e zhveshura që po pasonin, herë vallëzonin në një butësi që rrëshqiste lehtazi në atmosferë e herë tjetër shndërroheshin në një cikël prej lozonjareve.
Pas këtyre dy veprave aq bukur të luajtura, Kuarteti i saksofonëve “Syrene” iu drejtua publikut për t’i thënë se ato me të vërtetë po ndihen krenare që po performojnë për herë të parë në Prishtinë.
“Faleminderit shumë për duartrokitjet tuaja. Jemi shumë të lumtur që luajmë këtu në Kosovë, në këtë mjedis. Ne ndihemi shumë të mirëpritur këtu dhe njerëzit janë shumë të mirë. Është hera e parë që luajmë këtu në Prishtinë, prandaj jemi shumë të nderuara që jemi këtu dhe luajmë për ju. Kemi vizituar edhe Universitetin e Prishtinës, ku i mësuam talenteve të reja, saksofonin”, thotë “Syrene”.
Sipas tyre, ato u ndjenë shumë të lumtura që kanë ndarë njohuritë e tyre për muzikën në ato mësime, pasi në të njëjtën kohë ato kanë ndarë edhe dashurinë e tyre për muzikën.
“Pjesa tjetër quhet “An American in Paris” nga kompozitori holandez George Gershwin. Vendi ynë, Holanda, është i rrethuar nga deti, dhe pjesa më e madhe e tokës është nën nivelin e detit, kështu që kur kemi të bëjmë me ndryshimet klimatike dhe niveli i ujit shkon më lart, shumica e tokës do të jetë në ujë. Për shekuj me radhë, ne po luftojmë kundër ujit ose thjesht po jetojmë me të. Në këtë pjesë po shkojmë vërtet në ‘ujë’, pak a shumë, prandaj është një pjesë e gjatë ku koha zhduket. Ideja është përjetimi i juaj ku ju jeni në ujë dhe deti është i pakohshëm”, thotë tutje “Syrene”.
Fotografia: Rrahman Osmani
Përgjatë pothuajse dy orëve, kuarteti dëshmoi se audioja e çdo dridhjeje që pason nga interpretimi në saksofon, timbri i pasur kualitativ, ndryshimi i dinamikës dhe teknikat e avancuara, janë vetëm disa nga magjitë e vogla të cilat krijojnë një madhështi hyjnore që publiku ka rastin të dëgjojë nga afër.
Energjia e tyre dhe komunikimi që ato kanë mes vete bëri që ky koncert të jehojë dyfish më shumë. Duke nisur nga lëvizjet trupore të tyre që herë afroheshin afër instrumentit dhe herë tjera sa më larg tij, lëvizjet e duarve dhe këmbëve në ritëm me meloditë, shikimet herë pas here në notat para tyre si dhe harmonia që ka zënë vend qysh në sekondën e parë, dëshmoi për talentin e tyre që nën heshtje derdhej dalëngadalë, porsi vala në breg të detit.
Në anën tjetër, përpara se vepra e fundit e kompozitorit Douwe Eisenga të fillonte, kuarteti përsëri mori fjalën.
“Kjo është pjesa e fundit që do të interpretojmë sonte për ju. Kjo vepër është kompozuar nga një kompozitor holandez. Është një material muzikor i vogël i cili ndërtohet mbi njëri-tjetrin. Ne thjesht duam të themi se jemi të lumtura që jemi këtu dhe nëse keni dëshirë që të na merrni me vete në shtëpi, atëherë në dispozicion janë edhe dy CD-të tona që po ashtu përmbajnë pjesët që u interpretuan sonte por edhe mjaft të tjera”, thotë “Syrene”.
Fotografia: Rrahman Osmani
Kështu, krejt në fund koncerti i kuartetit të saksofonëve “Syrene”, përmbylli natën e mahnitshme me një performancë të një vepre e cila me tinguj joshës depërtoi edhe në zemrën e të gjithë të pranishmëve duke i dërguar ata në shtëpi me kujtime aq bukur të krijuara nga ky kuartet.
Ndërkaq, kujtojmë se edicioni i 21-të i festivalit ReMusica, “The Sound of Change”, trajton temën e ndryshimeve klimatike dhe bën thirrje për ndërgjegjësim tek publiku për veprim klimatik. E gjithë kjo, është reflektuar në programin e sivjetmë, duke u kujdesur që përmbajtja e tij të orientohet në këtë temë, me fokus në katër elementet e natyrës – Toka, Uji, Ajri dhe Zjarri.
Festivali ReMusica do të zgjasë deri më 21 prill. Ndërsa, sonte duke filluar nga ora 20:00, vjen koncerti i radhës “ReNEW” me kitaristin Lorik Pylla dhe artistët e ftuar si: Shaban Behramaj dhe Rron Bakalli.
Fotografia në ballinë: Rrahman Osmani/ KultPlus.com
Edicioni i 21-të i Festivalit ReMusica “THE SOUND OF CHANGE” këtë vit trajton temën e ndryshimeve klimatike dhe bën thirrje për të rritur ndërgjegjësimin tek publiku për veprim klimatik. E gjithë kjo, është reflektuar në programin e sivjetmë, duke u kujdesur që në përmbajtjen e tij të kemi një mori veprash me këtë temë dhe me fokus në katër elementet e natyrës – Toka, Uji, Ajri dhe Zjarri, përcjellë KultPlus.
“Ndryshimi klimatik është çështja përcaktuese e kohës sonë. Nuk është një kërcënim i largët. Ai po afrohet çdo ditë e më shumë, shumë më shpejt nga sa mund të mendojmë … Të gjithë ne kemi një rol në këtë luftë dhe të gjithë ne mund të bëjmë një ndryshim. Çdo veprim ka rëndësi, i madh dhe i vogël ” – Sekretari i Përgjithshëm i OKB-së Ban Ki-moon. / KultPlus.com
Festivali ReMusica këtë vit shënon edicionin e 21-të, “The Sound of Change”.
Sipas njoftimit zyrtar, këtë vit do të trajtohen tema për ndryshimet klimatike që njëkohësisht bën thirrje për ndërgjegjësim te publiku për veprim klimatik.
“Përmbajtja e festivalit do të orientohet në katër elementët e natyrës – toka, uji, ajri dhe zjarri”, thuhet në njoftim.
Edicioni i 21-të i ReMusicas do të hapet me kuartetin e sakosfonëve nga Holanda “Syrene Saxophone Quartet” të cilët i karakterizon energjia e tyre dhe komunikimi i tyre delikat duke i bërë ato shumë të dashura për publikun.
Në koncertin e tyre të titulluar “Water Works” shtjellohet tema e ujit përmes veprave të kompozitorit George Frideric Handel dhe veprës The Wave nga Jacob Ter Veldhuis.
Vepra dedikuar ndryshimeve klimatike “Seacoloured lightbellsounds” nga kompozitori i ri austriak Philipp Manuel Gutmannm do të jetësohet në skenën e ReMusica nga kuarteti harkor nga Austria Selini String Quartet.
Këtë vit ReMusica mirëpret edhe kitaristin Petrit Çekun që vjen në bashkëpunim me kuartetin harkor nga Maqedonia e Veriut “Viva String Quartet”, të cilët do të luajnë veprën premierë të kompozitorit nga Kosova, Valton Beqiri “XX”, e realizuar në vitin 2021, kushtuar edicionit të 20-të të ReMusica. /KultPlus.com
Edicioni i 21-të i Festivalit ReMusica “The Sound of Change” trajton temën e ndryshimeve klimatike dhe bën thirrje për ndërgjegjësim tek publiku për veprim klimatik. E gjithë kjo, është reflektuar në programin e sivjemë, duke u kujdesur që përmbajtja e tij të orientohet në këtë temë, me fokus në katër elementet e natyrës – Toka, Uji, Ajri dhe Zjarri.
Edicioni i 21-të i ReMusicas do të hapet me kuartetin e sakosfonëve nga Holanda Syrene Saxophone Quartet të cilët i karakterizon energjia e tyre dhe komunikimi i tyre delikat duke i bërë ato shumë të dashura për publikun.
Në koncerti i tyre të titulluar “Water Workds” shtjellohet tema e ujit përmes veprave të kompozitorit George Frideric Handel dhe veprës The Wave nga Jacob Ter Veldhuis. Vepra dedikuar ndryshimeve klimatike “seacoloured lightbellsounds” nga kompozitori i ri austriak Philipp Manuel Gutmannm do të jetësohet në skenën e ReMusias nga kuarteti harkor nga Austria Selini String Quartet.
Këtë vit në ReMusica mirëpret yllin e muzikës klasike, kitaristin Petrit Çekun i cili vjen në bashkëpunimin me kuartetin harkor nga Maqedonia Veriore “Viva String Quartet” ku ndër tjera, do të luajnë veprën premierë të kompozitorit nga Kosova Valton Beqiri e titulluar “XX”, vepër e realizuar në vitin 2021, dedikuar 20 vjetorit të Festivalit ReMusica.
“Karkalecat e ëndërrave” instalacioni tingullor nga artisti Félix Blume, bashkon artin dhe shkencën për të reflektuar mbi pasojat e ndryshimeve klimatike në shoqëri.
Punëtoria “ReChange Air& Water” me tutor Ilir Bajri do t’sjellë në jetë (dritë) incizime dhe vepra të reja nga pjesëmarrësit e punëtorisë pesë ditore mbi temën AJRI & UJI, përderisa koncerti tradicional elektroakustik dhe akusmatik këtë vit sjellë një nga emrat më të rëndësishëm të skenës belgo -amerikane Elizabeth Anderson, me koncertin e titulluar “Toka & Ajri”.
Duke ndarë dhimbjen me situatën me situatën në Ukrainë, ReMusica këtë vit, solidarizohet me Festivalet Europiane duke iu bashkuar iniciativës Festivals for Compassion. Vepra e kompozitorit ukrainas Maxim Shalygin e quajtur “Drop after drop” e shkruar në këto muajt e fundi do të jetë pjesë e këtij Edicioni në natën përmbyllëse të ReMusicas dhe do t’a sjellë në skenë Kuarteti harkor “Viva String Quartet”.ReMusica sërish është kujdesur që në cdo natë të Festivalit të inicoj bashkëpunimin në mes të artistëve tanë dhe atyre ndërkombëtar. Artistët sikurse sopranoja e shquar kosovare Zana Abazi Ramadani, pianistja Artemida Qarri Haxhiaj, violinistja Abigelia Voshtina, baritoni Shaban Behramaj etj do t’zënë vend të rëndësishëm në skenën e ReMusicas këtë vit. Hapësirë të veçantë i është dhënë artistëve të rinj të talentuar si Lorik Pylla, Orkestrës e të rinjëve të Kosovës me dirigjent Kushtrim Gashi, Rron Gashi, Rron Bakalli, etj dhe gjithashtu traditës drejt promovimit të kompozitorëve të rinj nga Kosova.
Masterklaset, punëtoritë, ReMusica Junior do t’jenë segmentet të cilat do t’vazhdojnë sikundër vitet e kaluara. Këtë vit, ReMusica organizon konferencën me temë “Kultura dhe veprimi klimatik” ku me përfaqësuesit e institucioneve kulturore, qeveritare, të shoqërisë civile si dhe të organizatave ndërkombëtare do të diskutohet lidhur me atë se si Festivalet dhe komuniteti artistik kosovar, mund të punojnë që të rrisin qëndrueshmërinë si dhe të ulin gjurmën e vet të karbonit. Për fund, të rikujtojmë fjaltët e Sekretarit të Përgjithshëm të OKB-së Ban Ki-moon “Ndryshimi klimatik është çështja përcaktuese e kohës sonë. Nuk është një kërcënim i largët. Ai po afrohet çdo ditë e më shumë, shumë më shpejt nga sa mund të mendojmë. Të gjithë ne kemi një rol në këtë luftë dhe të gjihtë ne mund të bëjmë një ndryshim. Çdo veprim ka rëndësi, i madh dhe i vogël”. /KultPlus.com
Tashmë janë bërë publike datat e edicionit të 21-të të Festivalit Ndërkombëtar të Prishtinës ‘ReMusica’, shkruan KultPlus.
‘ReMusica’ këtë vit do të mbahet përgjatë datave 5 deri më 13 prill të këtij viti në Prishtinë.
Kujtojmë se edicioni i 20-të i këtij festivali ishte mbajtur në formatin online ku të gjithë pjesëmarrësit kanë performuar nga vende e skena të ndryshme./ KultPlus.com
Artistët e shquar nga Franca, Pierre Fouchenneret në violinë dhe Theo Fouchenneret në piano, përmbyllën natën e fundit të festivalit ‘ReMusica’ mbrëmë. Ata sollën perlat franceze duke interpretuar vepra të Schumann, Bartok dhe Faure në koncertin e titulluar ‘The French Touch’, shkruan KultPlus.
Veprat e shquara franceze e kompletuan edicionin e sivjetëm të ‘ReMusica’ që zgjati nga 13 deri më 22 shtator.
Edicioni jubilar i festivait ‘ReMusica’ u hap me dokumentarn me regji të Hana Agimit, ‘ReMusica 20 vjet’, e cila pasqyron këtë festival në 20 vite të realizmit. Ky dokumentar shfaqi fytyra të njohura që kishin kontribuar në formimin e këtij festivali përgjatë këtyre 20 viteve.
Drejtoresha e këtij festivali, Donika Rudi, në një përgjigje për KultPlus thotë se pavarësisht se ky edicion ka qenë Edicion Hibrid (i kombinuar), për shkak të situatës me koronavirus, është arritur të mbahet ajo rrjedhë që ishte planifikuar.
“Përkundër sfidave organizative që kishim me masat të cilat u vendosën në prag të këtij edicioni jubilar, edicionin e 20-të kemi arritur që për një kohë shumë të shpejtë të ri-adaptojmë programin dhe të gjejmë mundësi që për një kohë shumë të shkurtër të mbajmë rrjedhën që kishim planifikuar.”- deklaron Rudi.
Një mori aktivitetesh përgjatë këtyre ditëve të festivalit, u mbajtën me prezencë fizike si punëtoritë dhe ligjëratat, kurse pjesa tjetër e koncerteve u mbajtën virtualisht.
Përveç Pierre dhe Theo Fouchenneret që sollën perlat e muzikës franceze, natën e parë të festivalit, publiku pati mundësinë të shijojë koncertin recital të sopranos kosovare, Elbenita Kajtazi nën shoqërimin e pianistes Camille Lemonnier ku u interpretuan vepra të kompozitorëve të shquar vendorë e ndërkombëtarë. Pianistja shqiptare, Merita Rexha-Tërshana solli emocion të pashoq me koncertin ‘Frymë shqiptare’ duke interpretuar vepra të njohura të kompozitorëve shqiptarë. Kompozitori, Ilir Bajri solli ‘ReCreate and RePlay’, artistet kosovare, sopranoja Kaltrina Miftari dhe Tringa Sadiku në kitarë prezantuan me emocione të papërsëritshme perlat e epokës elizabetiane. Përveç këtyre, në festivalin ‘ReMusica’ u paraqitën edhe ansambli evropian, Asasello String Quartet dhe Holger Maik Mertin.
“Artistët erdhën në Kosovë ashtu siç e kishim planifikuar, megjithatë koncertet u zhvilluan pa publik përderisa pjesa tjetër e aktiviteteve u mbajt ashtu sic kishte qenë e planifikuar me numër të kufizuar. Eshtë fjala për punëtoritë të cilat filluan një javë para hapjes së ReMusica.’- shton tutje Rudi për KultPlus.
Për fund, Rudi shton se pavarësisht kufizimeve të pandemisë, vulnnetin për të sjellë koncerte të tilla nuk mund ta kufizojë asgjë.
“Takimi jonë fizik, këtë vit u pamundësua. Përqafimet e ngrohta na u limituan, por vullnetin dhe dashurinë që t’ju sjellim koncerte dhe programe tē larmishme me artistë të shquar nga vendi dhe bota, asnjëherë dhe asgjë nuk do t’mund ta ndalë e kufizojë.” – shtoi ajo./KultPlus.com
Kryeministri i Kosovës, Albin Kurti, e ka cilësuar ‘ReMusican’ si një festival që ka kuptimin e muzikës së re, të ringjalljes dhe rindërtimit, përcjell KultPlus.
Kurti përmes një postimi në rrjete sociale ka shkruar se ky festival u bë bë një ndër shtyllat kryesore të zhvillimit të jetës kulturore artistike në Kosovë, duke promovuar krijimtarinë e kompozitorëve të Kosovës dhe duke mundësuar ballafaqimin e natyrshëm të krijuesve vendor me ata botërorë.
KultPlus ua sjell postimin e plotë të tij:
ReMusica ka kuptimin e muzikës së re, por edhe të ringjalljes dhe rindërtimit.
Në pranverën e vitit 2002, kur natyra po ringjallej, e Prishtina po rindërtonte jetën kulturore të pas luftës, Rafet Rudi me bashkëpunëtorët e tij, sollën festivalin ReMusica.
Festivali Ndërkombëtar i Muzikës së Re u bë një ndër shtyllat kryesore të zhvillimit të jetës kulturore artistike në Kosovë, duke promovuar krijimtarinë e kompozitorëve të Kosovës dhe duke mundësuar ballafaqimin e natyrshëm të krijuesve tanë me ata boterorë.
Gjatë këtyre viteve, krahas koncerteve me artistë kulminant të skenës ndërkombetare, ReMusica solli edhe programin tematik “Veprat e reja pedogogjike për instrumente”.
Në përmbyllje të edicionit të 20-të të ReMusica, falënderoj organizatorët dhe krijuesit për themelimin e ngritjen e këtij festivali që pasuron jetën kulturore e artistike të vendit dhe literaturën tonë pedagogjike./KultPlus.com
Me titullin ‘Elizabethan Melancholy – Melankoli Elizabetiane’, mbrëmjen e djeshme, sopranoja Kaltrina Miftari dhe kitarisja, Tringa Sadiku, sollën perlat e epokës elizabetiane për publikun e festivalit ‘ReMusica’, shkruan KultPlus.
Dy artistet kosovare, koncertin e filluan me këngën ‘Greensleewes’ nga Anon, e cila është një ndër këngët më të njohura të shekullit të XX-të. Miftari dhe Sadiku përcollën emocion të pashoq teksa interpretonin këngën tradicionale angleze.
Magjinë e epokës elizabetiane, dy artistet kosovare e vazhduan edhe me këngët, ‘Come again’, ‘Can she excuse my wrongs’, ‘Fantasia n.7’, ‘Fine Knacks for ladies’, ‘I saw my lady weep’ dhe ‘The frog galliard’ nga John Dowland duke vazhduar më pas me, ‘Never weather beaten sail’ dhe ‘My love hath vowed’ nga Thomas Campion.
Këtë mbrëmje, subjekt i së cilës ishte melankolia e epokës elizabetiane, Miftari dhe Sadiku e përfunduan në mënyrën më të veçantë duke interpretuar këngë të njohura shqiptare si, ‘Dashtnuer t’u bana’, ‘Të gëzojmë se erdh pranvera’, ‘Asaman trendafil i çelës’ të kompozitorit shqiptar, Rafet Rudi.
Ndërkaq, edicioni i sivjetëm i festivalit ‘ReMusica’ do të zgjasë deri më 22 shtator, ku edhe do të përmbyllet me koncertin ‘The French Touch’, nga Theo Fouchenneret në piano dhe Pierre Fouchenneret në violinë, ku do të interpretohen veprat nga Schumann, Bartok dhe Faure.
Përveç kësaj, në edicionin e 20-të te festivalit ‘ReMusica’ , publiku pati mundësinë të shijojë performanca nga artistë të njohur vendorë e ndërkombëtarë si, sopranoja Elbenita Kajtazi, Asasello String Quartet nga Gjermania si dhe Merita Rexha Tërshana në piano./KultPlus.com
Mbrëmja e tretë e edicionit të 20-të të festivalit ‘ReMusica’ ishte e rezervuar për pianisten nga Shqipëria, Merita Rexha-Tërshana. Me titullin ‘Frymë Shqiptare’, Rexha-Tërshana, interpretoi magjishëm në piano, këngë nga autorë të rinj e të vjetër shqiptarë duke filluar nga Tonin Harapi, Cesk Zadeja, Rafet Rudi, Aleksandër Peçi, Fahri Beqiri dhe Ersan Januzi, shkruan KultPlus.
Për t’iu përshtatur edhe më shumë natyrës së këngëve që u interpretuan, pianistja Rexha-Tërshana kishte veshur xhubletën shqiptare, që ia shtoi edhe më shumë veçantinë kësaj mbrëmjeje duke i realizuar në perfeksion veprat e kompozitorëve të njohur shqiptarë.
“Kam zgjedhur kompozitorë që kanë ndikuar shumë në formimin tim pianistik dhe janë ndër veprat më të bukura duke filluar nga kryemjeshtri shqiptar, Cesk Zadeja duke vashduar më pas, Tonin Harapi, Kozma Lara, Feim Ibrahimi, Aleksandër Peçi, Rafet Rudi dhe për të nderuar kujtimin e Fahri Beqirit që humbi jetën këtë vit” – u shpreh pianistja pak para fillimit të koncertit.
E veçanta e kësaj mbrëmje ishte interpretimi i këngës premierë “Motive Shqiptare’ të kompozitorit të ri, Ersan Januzi, e që përmbylli mbrëmjen e koncertit ‘Frymë Shqiptare’.
Ndonëse edhe në këtë koncert mungoi ngrohtësia që sjell vetëm prania e publikut në sallë, pianistja arriti që përmes këngëve shqiptare të sjellë atë ngrohtësi tek të gjithë ata që e përcollën virtualisht.
Ndërkaq, në natën e parë të edicionit të 20-të të festivait ‘ReMusica’, publiku pati rastin të dëgjojë koncertin recital të sopranos shqiptare, Elbenita Kajtazi kurse në ditët në vazhdim do të performojnë edhe disa nga artistët tjerë të shquar vendorë dhe ndërkombëtarë si Asasello String Quartet nga Gjermania, Pierre dhe Theo Fouchenneret nga Franca, si dhe soprano Kaltrina Miftari dhe Tringa Sadiku në kitarë./KultPlus.com
