Etiketë: Shën Nikolla

Nis restaurimi i kishës së Shën Nikollës në Vuno

Posted on by Kult Plus

Në fshatin Vuno ka nisur puna për restaurimin e kishës së Shën Nikollës.

Instituti Kombëtar i Trashëgimisë Kulturore bën të ditur se në kuadër të projektit për restaurimin e kishës janë planifikuar të bëhen ndërhyrjet si më poshtë: konsolidim strukturor; restaurim i strukturave të gurit; ndërtim çatie; sistemim territori; drenazhim përreth dhe dyer dhe dritare druri.

Sipas IKTK-së, aktualisht kisha, e ndodhur në pjesën e sipërme të fshatit, është e rrënuar, duke mos i shërbyer prej vitesh komunitetit të fshatit.

Kjo kishë është shpallur monument kulture i kategorisë së parë (I) në vitin 2015, ndodhet në fshatin Vuno, rreth 9 km nga qyteti i Himarës.

Projekti për restaurimin e kishës u financua nga Banka Amerikane e Investimeve.

Kisha u ndërtua në shekullin XVI nga dy familje autoktone dhe dishendente nga të cilat vijnë dhe dy emra të shquar të artit shqiptar si aktori Robert Ndrenika dhe regjisori Dhimitër Anagnosti.

Kisha ishte e ruajtur në formën e saj më të mirë deri në vitin 1967, pas shembjes me vendim të regjimit komunist. Tashmë aty gjenden vetëm rrënojat e mureve, të cilat japin më së miri idenë mbi bukurinë që ka pasur./atsh/KultPlus.com

Ekspozohet për herë të parë ikona e Shën Nikollës në Muzeun e Artit Mesjetar

Posted on by Kult Plus

Muzeu Kombëtar i Artit Mesjetar në Korçë prezanton ikonën e Shën Nikollës, pjesë e ekspozitës së përkohshme “Piktura bizantine në Shqipëri”. Kjo ikonë ekspozohet për herë të parë për publikun e gjerë.

Origjina e ikonës së Shën Nikollës është nga Kisha e Ristozit, në Mborje, të Korçës. Ikona është pikturuar mbi një panel monolit, të gdhendur në mes në forme govate. Korniza e dalë nga gdhendja është pikturuar në ngjyre të kuqe dhe skarpati me të zezë. Nuk dihet vepër e cilit piktor të kohës është kjo vepër e rrallë.

Shën Nikolla një nga shenjtët me popullorë në Shqipëri nderohet njëlloj nga të dy kishat.

Ai shërbeu si peshkop në Mira, mori pjesë në Këshillin e Parë Ekumenik dhe bëri shumë mrekulli.

Në këtë ikonë që duhet të jetë pikturuar në shek. 14-të, shenjtori paraqitet në pamje frontale deri në mes, i veshur me një fellon të dekoruar me rrathë dhe kryqe dhe një omofor të bardhë mbi supe me kryqe të zinj. Sfondi që mund të ketë qenë argjend ka ngjyrë gri të mbyllur.

Linjat kanë elegancë dhe format evidentohen bukur. Trajtimi është dekorativ dhe pjesët e mishta janë punuar grafikisht me dritë – hije të forta, gati grafike, pa shumë tonalitete. Mbi kafen e errët janë hapur dritat me tone të okrës pa kalime të ndërmjetme tonale. Vizatimi është i thjeshtë dhe linear. / atsh / KultPlus.com

Korçë, kthim në identitet për ikonën “Shën Nikolla”

Posted on by Kult Plus

Ikona “Shën Nikolla” që vjen nga kisha e fshatit Sinicë, në Korçë i është nënshtruar procesit të restaurimit.

Prej disa vitesh kjo ikonë ndodhet në Muzeun Kombëtar të Artit Mesjetar, Korçë dhe po i nënshtrohet restaurimit, konsolidimit dhe studimit nga ana e Laboratorit të Restaurimit, për t’i rikthyer identitetin dhe vlerat që ajo mbart.

Kjo ikonë mendohet të ketë qenë pjesë e ikonostasit të kishës të Shën Nikollës, e cila është ende në këtë fshat. Shën Nikolla paraqitet i ulur në fronin despotik, i cili është pikturuar me kujdes me dekoracione të stërholluara motivesh floreale, plot elegance. Edhe Shenjti ka veshur një sako të zbukuruar po me motive floreale , trëndafila të bardhë e blu, mbi supe ka hedhur një omofor të bardhë të zbukuruar me kryqe. Në qafë mban të varur një medalion me portretin e Krishtit. Ai është pikturuar në sfondin e një qielli gjithë dritë dhe sipër tij rrezaton Shpirti i Shenjtë në formën e një pëllumbi.

Ikona nuk është firmosur nga autori por duke e krahasuar me një ikonë tjetër nga po ky Ikonostas, e cila është pjesë e fondit të Muzeut Kombëtar të Artit Mesjetar specialistët thonë me bindje të plotë se ajo është pikturuar prej Johan K. Zografit nga Litohori rreth vitit 1870.

Shtresa e gruntit është tepër e dëmtuar për shkak të kushteve jo të mira dhe me shumë lagështirë, në të cilat ka qëndruar prej disa shekujsh./atsh/KultPlus.com