Etiketë: shfaqje

“Mosmarrëveshja”, shfaqja absurde që solli për herë të parë punën e regjisores Fata Hyseni në TKK

Posted on by KultPlus

Alberina Haxhijaj

Fata Hyseni mbrëmë ka fituar titullin regjisore përmes premierës së shfaqjes “Mosmarrëveshja”, me të cilën ajo arriti edhe të diplomoj. Shfaqja “Mosmarrëveshja” po ashtu bëri që emri i regjisores Fata Hyseni të shënohet përkrahë regjisorëve të njohur të cilët shfaqjet e tyre i kanë sjellë në Teatrin Kombëtar të Kosovës, shkruan KultPlus.

Hyseni solli në skenën e vogël të teatrit, tekstin e skenaristit Albert Kamy, fituesit të Çmimit Nobel për Letërsi, i cili është i njohur për qasjen e tij absurde. Kamy ishte inskenuar edhe më parë në Teatrin Kombëtar përmes regjisorit Kushtrim Koliqi i cili vitin e kaluar solli shfaqjen “Kaligula”. Dhe të dy shfaqjet krijojnë lidhshmëri pasi që shfaqin çmendurinë njerëzore. Nuk ka si të jetë tjetër kur i gjithë opusi letrar i këtij shkrimtari bazohet në idenë absurde të ekzistencës së njeriut. E tillë është edhe “Mosmarrëveshja”.

Nënë (Kumrije Hoxha) dhe bijë (Florieta Bajrakatari) jetojnë të izoluara në një bujtinë afër lumit duke ëndërruar që të largohen nga ai vend. Dëshira e tyre në pamje të parë është shumë e thjeshtë, të jetojnë afër detit, të prekin me këmbët e tyre rërën e detit, të zbulojnë pyetjen që i preokupon ‘A do na i djegë rëra shputat e këmbëve, a është aq e nxehtë?’. Mirëpo çdo gjë bëhet e komplikuar në momentin kur për tu larguar nga ky izolim atyre ju nevojiten para, dhe mënyra më e lehtë për t’i fituar është përmes krimit. Nënë dhe bijë pranojnë klientë në bujtinën e tyre, i vrasin dhe ju marrin paratë. Regjisorja Hyseni tregoi për KultPlus se ajo dhe ekipi i kësaj shfaqje kanë punuar së bashku dy muaj për të sjell këtë dramë absurde.

“Kemi punuar dy muaj mirëpo ka pasur edhe disa muaj punë të tjera për finalizimin e kësaj shfaqje dhe konceptit të saj. Tekstin e kam përzgjedhur pasi që është një tekst i pasur dhe i cili ka kohë që nuk është punuar e që trajton temën e izolimit të dy grave brenda një bujtine. Me e punu një tekst të tillë ka qenë e vështirë, me shumë përgjegjësi por edhe kënaqësi”, theksoi Hyseni.

Jeta e “zakonshme” e të zonjës së bujtinës dhe vajzës së saj ndryshon kur një ditë atyre ju shkon në bujtinë për të kërkuar një dhomë një djalë jo i zakonshëm. ‘Ky është ndryshe nga të tjerët’, i thonë nënë dhe bijë njëra-tjetrës. Në fakt ai edhe është i tillë, Zhani djali i vetëm i shtëpisë i larguar njëzet vjet më parë, e që jeton afër detit kthehet pasi që e ndjen se dy gratë e familjes duhet të kenë nevojë për një burrë në shtëpi. Vendimi që në fillim të lajmërohet si një klient, do i kushtojë atij me jetë. Pikërisht vdekja e Zhanit dhe zbulimi i vërtet i identitet të tij shënon edhe një thyerje tjetër në rrjedhën e kësaj drame. Aktorja Kumrije Hoxha sjell dhembjen e një nënë e cila mendon se ka jetuar mjaftë. ‘Jetova më shumë se djali”.

Në anën tjetër Marta e cila erdhi përmes aktores Florieta Bajraktari, është ajo që zbërthen tutje absurdin brenda kësaj shfaqje. Indiferente ndaj vrasjes së të vëllait duke u arsyetuar se të paktën ai ka jetuar i lirë për aq sa ka jetuar, është vetëvrasja e nënës ajo që e bënë Martën të bëjë të njëjtën gjë. Duke goditur vetën me thikë, Marta lë të shokuar gruan e Zharkut e cila e kërkon të shoqin gjersa shërbëtori largohet me paratë. Sipas aktores Florieta Bajraktari, bashkëpunimi brenda ekipit ka bërë që procesi i punës të jetë i lehtë.

“Roli është shumë sfidues dhe është dashtë mjaft shumë me punu po e rëndësishme ka qenë me dal ajo që regjisorja ka dashtë e që ka qenë tema e izolimit. Kryesisht këtë temë e bart personazhi im tek i cili vërehet edhe një ndryshim psikologjik, e që e ka bërë edhe me sfidues procesin që me hy brenda këtij roli”, tha Bajraktari.

Sfidën e parë si regjisore të Fata Hysenit e vlerësoi edhe Butrint Berisha. Ai theksoi se shfaqja arrin që të sjellë klaustrofobinë, e që është gjetja kryesore e kësaj shfaqje.

“Si koleg i klasës e kam përcjellë procesin e shfaqjes dhe po ashtu e njoh edhe si tekst dhe sonte erdhi një realizim më ndryshe i shfaqje. Erdhi ajo klaustrofobia e shfaqjes e që ka qenë si gjetje kryesore e shfaqje. Po ashtu loja e aktorëve ishte e bukur. Zhanri i kësaj shfaqje nuk është zhanër që e tërheq publikun për shkak të natyrës së errët që e ka. Mirëpo po shpresoj që përmes qasjes regjisoriale dhe lojës së aktorëve shpaloset përralla që e diskuton teksti”, tha ai.

Reprizat e para të kësaj shfaqje do të jenë më 21 dhe 22 maj duke filluar nga ora 21:00./KultPlus.com

“Mirandolina” shfaqja më e re në teatrin “Istref Begolli”

Posted on by Kult Plus

Një nga veprat e njohura të dramaturgjisë botërore komedia “Mirandolina” e autorit të njohur Italian Karlo Goldon, do të vihet në skenë me trupën e aktorëve të këtij teatri.

Provat kanë nisur këtë të mërkurë, ndërsa premiera është planifikuar që të shfaqet në Ditën e Çlirimit të Pejës, me 16 qershor.

Edhe pse vepra është shkruar që në shek.XVIII, ajo përcjell mesazhe emancipuese dhe i flet realitetit tonë.

“Mirandolina” është vënë në skenë për herë të parë në Venecia në 1752.

Komedia ka porosi të forta për pozitën e femrës, një debat që zhvillohet edhe sot për trajtimin që i bëhet asaj edhe në shoqërinë kosovare.

Komedia më moderne e komedianit italian Carlo Goldoni, përballë femrën me mashkullin në skenën teatrore.

Goldoni si një mjeshtër i madh i karaktereve dhe në një kohë kur femra ishte e dhunuar nga arroganca mashkullore, e ngre lart figurën e Mirandolinës, protagonistes kryesore të veprës, si një ftesë për emancipimin e një shoqërie tejet patriarkale.

Drejtori i Kulturës në Komunën e Pejës, Engelbert Zefaj pret një shfaqje të nivelit të lartë. “Duke i çmuar kapacitetet e regjisores Nura, ekipit që e ka përzgjedhur dhe trupën e aktorëve, jam optimist se do të kemi një shfaqje mjaft të sukssesshme në teatrin tonë që do të mirëpritet edhe nga publiku”, ka theksuar ai.

Kjo vepër është inskenuar në shumë skena botërore dhe kritikët e kanë krahasuar me kryeveprën e Shekspirti, “Ëndrra e një nate vere”.

“Përmbajtja e komedisë sjell situata të këndshme humori dhe me konceptin tim regjisorial, bashkë me trupën e Pejës, do të realizojmë një shfaqje me vlera të larta artistike dhe të pëlqyer nga publiku”, u shpreh regjisorja Elmaze Nura.

Edhe në shoqërinë kosovare, ku shfaqet shpesh një kulturë tejet maskiliste kjo vepër është apel për emancipim.

Vepra të tilla kanë mesazhe pa fund dhe secili spektator shikon diçka nga vetja, që është e mishëruar tek karakteret e veprës, si tradhtia, xhelozia, dashuria, etj.

Regjizorja Elmaze Nura rikthehet në Teatrin “Istref Begolli”, pas realizimit të dramës “Mendje djallëzore” të autorit Blerim Haxhiaj, një shfaqje që u vlerësua lart për nivelin artistik dhe e prezantoi Pejën në Festivalin Ndërkombëtar të Teatrove në Rumani./KultPlus.com

“Mosmarrëveshja” e Kamys fillon provat në Teatrin Kombëtar të Kosovës

Posted on by KultPlus

Drama “Mosmarrëveshja” e autorit të madh Albert Kamy, kësaj radhe do të jetësohet në Teatrin Kombëtar të Kosovës, shkruan KultPlus.

Nën regjinë e Fata Hysenit kjo shfaqje tashmë ka filluar provat dhe pritet që deri në muajin maj gjithçka të finalizohet.

Krahas temës së dashurisë dhe mos dashurisë, regjisorja i kushton rëndësi temës së izolimit brenda shtetit. Ngjarja ndodhë në një bujtinë që është e dy grave, nënë e bijë, të cilat pranojnë klientë në bujtinën e tyre që ti vrasin dhe të ja u marrin të hollat. Mbledhja e të hollave bëhet me qëllimin që të ikin nga vendi për një jetë më të mirë.

Ekipi i aktorëve që është angazhuar për këtë projekt përbëhet nga: Kumrije Hoxha, Shpetim Selmani, Florieta Bajraktari, Armend Ballazhi dhe Fatlume Bunjaku.

Shfaqja pritet të vij premierë në muajin maj në skenën e vogël të Teatrit Kombëtar të Kosovës. / KultPlus.com

Teatri ODA dhe Blessed Unrest janë ribashkuar për projektin “Strehim”

Posted on by KultPlus

Gjatë muajve prill dhe maj në Nju Jork, aktorët: Ilire Vinca, Eshref Durmishi, Daniela Markaj dhe regjisori Florent Mehmeti do t’i  bashkëngjiten pjesës amerikane të ekipës për të finalizuar shfaqjen që për rrëfim ka historinë, shumë pak të njohur, të shpëtimit e strehimit të hebrenjve nga shqiptaret “Strehim” (“Refuge”), gjatë Luftës II Botërore. 

“Strehim” (“Refuge”) është shfaqja e tretë origjinale e krijuar nga Teatri ODA dhe Blessed Unrest që nga viti 2005.

Gjashtë turne janë organizuar gjithsej deri tash në Ballkan, Evropë dhe në Nju Jork, përfshirë edhe projektin “Doruntine” që ka pasur dy turne të suksesshme në Amerikë dhe ka fituar Çmimin e Festivalit “Secondo” në Cyrih, Zvicër.

Premiera e “Strehim (“Refuge”) do të jetë më 25 prill në Baruch Performing Arts Centre në Manhattan në Nju Jork, për të vazhduar me shfaqjet deri më 11 maj 2019. / KultPlus.com

Monodrama “02.08.1944” vjen premierë të dielën

Posted on by KultPlus

Një monodramë e cila trajton temën e viktimizimit të romëve gjatë Luftës së Dytë Botërore në Kampin e Përqendrimit në Auschwitz, do të shfaqet premierë në Shtëpinë e Kulturës “Xhemajli Berisha” në Prizren, përcjellë KultPlus.

Shfaqja e titulluar “02.08.1944” është e autorit Edis Galushi.

Vetëm në këtë kamp thuhet se janë burgosur afër 23 mijë romë. Nata e 2 Gushtit 1944 njihej si “zgjidhja përfundimtare” për romët në Auschwitz. Atë natë gjithsej 2,989 romë janë shfarosur në dhomën e gazit. Përmes rrëfimit personal të personazhit të shfaqjes tregohet trajtimi i tmerrshëm i romëve para dhe gjatë Luftës së Dytë Botërore. Hyrja është me ftesa, andaj për rezervime ju lutem kontaktoni në numrin 049/663-375. Me respekt, Ekipi organizativ Ky projekt kulturor është mbështetur nga programi Kultura për ndryshim, projekt i financuar nga Bashkimi Evropian dhe i menaxhuar nga Zyra e Bashkimit Evropian në Kosovë. Ky projekt implementohet nga Qendra Multimedia dhe Goethe-Institut. Qëllimi i mbështetjes është forcimi i sektorit kulturor si një shtysë për zhvillimin socio-ekonomik të Kosovës përmes përkrahjes të projekteve të qëndrueshme, dhe aktiviteteve të organizatave kulturore që promovojnë kreativitetin, gjithë-përfshirjen sociale dhe bashkëpunimin.

Premiera vjen ditën e diele më datë 27 janar, duke filluar nga ora 19:00. /KultPlus.com

Shfaqja ‘Artisti i vetëm’ vjen premierë në teatrin ‘Faruk Begolli’

Posted on by KultPlus

Teatri Faruk Begolli në Prishtinë kësaj radhe do të mirëpres premierën e shfaqjes “Artisti i vetëm”, me autor dramaturgun gjerman Ralph Hammerthaler, përcjellë KultPlus.

Në shfaqje luan aktori Naim Berisha ( në rolin e personazhit Hans Klipp), i cili njëkohësisht është edhe regjisor i shfaqjes, kurse regjisor mbështetës është Shkelqim Bunjaku.

“Artisti i vetëm” trajton dramën e brendshme të një artisti të madh, i cili për shkak të degradimit të artit dhe shijes se publikut, përjashtohet nga shoqëria me dhunë, për tu vënë në situatë të skajshme jetësore dhe ekzistenciale.
Personazhi i vetëm i kësaj shfaqje Hans Klip, gjatë prezantimit të tij të fundit para publikut të tij të zgjedhur rrëfen jetën e tij, momentet kulminante artistike në të kaluarën dhe dramën e tij në të tashmen. Në fund të shfaqjes Hans Klip vetlargohet dëshpërueshëm nga arti i tij dhe nga vetvetja, duke renë në humnerën e pakthyeshme të dëshpërimit.

Shfaqja në mesazhin e sajë, bënë thirrje për kthimin e vlerave kulturore, në një shoqëri që është zvetënuar nga vlerat e mirëfillta dhe paraqet protestën më sublime kundër antivleres.

Premiera e shfaqjes vjen më datë 2 nëntor në ora 18:00 në Teatrin “Faruk Begolli” në AAB. /KultPlus.com

Shfaqja “Kur hana del”, premierë në teatrin “Adriana” të Ferizajt

Posted on by KultPlus

Të hënën, 1 tetor 2018, në teatrin “Adriana” të Ferizajt do të mbahet premiera e shfaqjes “Kur hana del”, me regji të Ben Apollonit. Kjo dramë është shkruar nga Ag Apolloni dhe paraqet historinë tragjike të luftës së fundit në Kosovë dhe fatet e personave që kanë humbur familjarët, por edhe mendjen.

E vendosur në një spital psikiatrik, ngjarja ndërtohet mes dy simboleve, hënës (që simbolizon luftën, tragjedinë, errësirën) dhe diellit (që simbolizon shpresën, jetën, lirinë). Drama “Kur hana del”, prej në titull sugjeron lidhje të drejtpërdrejtë me traditën shqiptare, gjë që përforcohet me motivin e besës, baladat shqiptare dhe këngët shqiptare, ndërsa storja lidhet me kontekstin historik të luftës në Kosovë dhe me shpalljen e Pavarësisë.

Drama është e konceptuar në dy pjesë. Në të parën jepet përfundimi i luftës dhe shpalosja e tragjedive të personazheve, ndërsa në të dytën, shpallja e Pavarësisë dhe fundi tragjik i Hanës, nuses që humbi burrin në luftë. Kjo është një histori e trishtë që përçon jo vetëm fatin tragjik të të vrarëve të luftës, por edhe të familjarëve që nuk e përballuan humbjen e tyre. “Kur hana del” ndërtohet si tragjikomedi, pasi rrëfimet tragjike të personazheve shoqërohen me veprimet komike të tyre. Izolimi i tyre në një spital psikiatrik, nata dhe hëna, loja e shahut, por edhe mosrealizimi i dashurisë mes Lulit dhe Hanës, nënkuptojnë triumfin e vdekjes mbi jetën, ku e para ia bën mat të dytës.

Në këtë shfaqje do të luajnë: Ali Krasniqi, Edona Berisha-Bekteshi, Vjosa Abazi, Dashuri Rexhepi, Jajush Ramadani, Arben Marevci, Sherif Bega, Mevlan Saraçi, Gresa Gashi, Ekrem Jakupi. Skenografia e shfaqjes është bërë nga Lebibe Topalli, kostumografia nga Pranvera Sylejmani, ndërsa muzika nga Shaban Ratkoceri. Reprizat e shfaqjes do të mbahen me 2 dhe me 3 tetor. /KultPlus.com

Dino Mustafiç vjen në Tiranë me shfaqjen“Nëna dhe fëmija”, rikthehet në skenë Ema Andrea

Posted on by KultPlus

“Nëna dhe fëmija” vepër e autorit Jon Fosse rikthen si regjisor në Tiranë Dino Mustafiç. Premiera mbrëmjen e së shtunës në Tulla Center sjellë në role aktoren Ema Andrea dhe Matia Llupa.

Një projekt teatror që vjen në jetën artistike të Tiranës dhe ka angazhuar dhe të tjerë artistë të njohur. Projekti i MAM Fondation këtë herë ka në qendër veprën e autorit Jon Fosse. Premiera është më datë 28 tetor në ora 20:00, dhe vazhdon të dielën në mbrëmje për të vijuar dhe net të tjera. “Nëna dhe fëmija” do të vazhdojë dhe në muajin nëntor nga e hëna deri të enjten për publikun.

Jon Fosse është një nga shkrimtarët norvegjez me të përkthyer dhe më të interpretuar pas Henrik Ibsen. Sot dramat e tij janë pjesë e rëndësishme të repertorit të gjithë metropoleve teatrale europian. Për mendimin e shumë kritikave ai është një nga personat më inteligjentë të dramës dhe letërsisë bashkëkohore: dramaturg, poet, eseist, shkrimtar romanesh, etj. Duke lexuar veprën dramatike të Jon Fosse në mënyrë psikologjike, por tekstualisht dhe në kuptimin hapësinor gjithmonë lëvizim në hapësirë indiferencash, provincash, vetmisë, izolimit shpirtëror.

Shfaqja merret me njerëz, të cilët vuajnë nga izolimi total, vetmia dhe vështirësi komunikimi. Ata janë të burgosurit e përjetshëm të cilët ngarkojnë veten dhe të tjerët. Por ata nuk janë krijesa indiferente, por janë plot shqetësim shpirtëror, e cila mund të quhet aftësi parandjenje. Karakteret të Fosses janë të ngecur në mendimet e veta, dhe prandaj fjalët të shprehura në fakt janë monologje, të cilët ndonjëherë shkasin dhe bëhen komunikim. Atmosfera e sikletshme e tregon sekretin, i cili është i mbytur në të kaluarën dhe çdo komunikim është pak nostalgjik, zbulon ose mbetet i shtypur në egon e karakterit. Por në atë ndjesi melankolike dhe boshllëku as nëna as fëmija egzistencialisht nuk gjejnë qetësinë dhe heshtjen e dëshiruar, nuk janë në gjendje të bien në paqe me demonat (shpirtrat) personal të cilët i përndjekin. Hapësira në dramat e Fosses zakonisht është një banesë në të cilën dikush sapo ka hyrë për të banuar, dikush tjetër ka lëvizur nga ai vend, sikur kërkohet vend i përshtatshëm për sekrete, për të filluar nga e para.

Mamaja tek “Nëna dhe fëmija” jeton në “këtë banesë” prej shumë vitesh, ka ikur nga një provincë në qytet. Por provinca, fushëbeteje (arena) e ngjarjeve traumatike të rinisë së saj, të cilat flenë brenda saj deri në momentin kur i shfaqet djali para derës dhe ia kthen dobësinë e saj të kaluarën. Vepra që pritet të vijë premierë është me skenografi nga Klod Dedja, kostumografe Berina Kokona, kompozitor Ilir Bajri, as. regjisore Melissa Becoviç dhe koreografia nga Gjergj Prevazi. Dramtarugue është Zejlka, Udoviciç Plestina.

Regjisori në teatër

Regjisori Dino Mustafiç rikthehet në Tiranës me këtë shfaqjes pas dramës “Equus” në Teatrin Kombëtar. Ka krijuar shfaqje në teatro të shumta në: Paris, Sofie, Bratislavë, Beograd, Zagreb, Tiranë, Ljubljanë, Shkup, Prishtinë, Podgoricë, Rijeka, Trieste, Split, Maribor, Nova Gorica, Cetinje, etj. Shfaqjet e tij janë luajtur në Amerikë, Afrikë, Azi, dhe janë interpretuar në gjithë të ndryshme, kanë marrë çmime të shumta në festivale kombëtare dhe ndërkombëtare në: Meksiko, Kairo, Aleksandri, Romë, Firence, Venecia, Madrid, Frankfurt, Mynih, Bogota, Bratislavë, Oslo, Vjenë, Toronto, Guadalahara, Paris, Nicë, Londër, Stokholm, Stamboll, Sibiu, Vrana, Vratsa, Blagoevgrad, San Jose, Budva, Rijeka, Udine, Zagreb, Novi Sad, Subotica, Nikshiq, Beograd, Ljubljanë, Shkup, Bursa, Modena, Selanik, Skien, Ulaanbaatar, Chisinau, etj. Shfaqja “Nata e Helverit” e dhënë në teatrin Kamenog 55 ka hyrë në historinë e teatrit boshnjako-hercegovinas, si shfaqja më e vlerësuar, me 23 çmime ndërkombëtare. Ka vënë në skenë më shumë se 100 pjesë teatrale të autorëve klasikë dhe bashkëkohorë. / KultPlus.com

“Natë misterioze” nga Ben Apolloni sonte premierë në teatër

Posted on by KultPlus

Teatri “Aleksandër Moisiu” në Durrës sonte do të mirëpres një shfaqje të re dhe shumë të veçantë, shkruan KultPlus.

Bëhet fjalë për shfaqjen “Natë misterioze” të autorit Ferdinand Hysi, e të cilën në skenë do ta sjellë regjisor nga Kosova Ben Apolloni.

Me role në këtë shfaqje paraqiten: Suela Bako, Xhejni Fama, Gjergj Doçi, Marvin Tafaj, Mimoza Marjanaku dhe Amos Muji Zaharia.

Shfaqja ka të bëjë me katër persona nga vende të ndryshme të botës të cilët takohen për herë të parë në një stacion treni dhe aty e kuptojnë se janë të ftuar nga i njëjti person dhe do të shkojnë në të njëjtën adresë. Në shtëpinë misterioze ku hyjnë, nuk i pret askush pos territ. Ngadalë fillon të ndriçohet shtëpia dhe historia e secilit personazh dhe dikur shfaqet edhe zonja e cila i ka ftuar në ditëlindjen e djalit të saj. Zonja, një grua e çmendur nga dhembja për humbjen e djalit i terrorizon katër mysafirët e ftuar duke u kërkuar organet e djalit të saj të vdekur në një aksident, organet e të cilit ajo e di se janë transplantuar në katër trupat e mysafirëve.

“Natë misterioze” shfaqet sonte nga ora 19:00, ndërsa repriza e parë vjen të mërkurën pra më 25 tetor./ KultPlus.com

Teatri i Sofjes zbriti sonte në PITF ku shpalosi përpjekjet dhe koston e lirisë njerëzore

Posted on by KultPlus

“Shërbëtoret” është shfaqja nga ekipa bullgare që erdhi në natën e dytë të Festivalit Ndërkombëtar të Teatrit “Prishtina International Theater Festival”, i cili po mbahet në Teatrin AAB “Faruk Begolli”, shkruan KultPlus.

Kjo shfaqje ishte e realizuar nga produksioni National Theatre, me autor Jean Genet dhe me regji të Diana Dobrevo. Aktorët të cilët performuan në këtë shfaqje janë: Joreta Nikolova, Aleksandra Vasilevo, Diana Dobrevo, Muja Shishkova, Niya Shiskovo. Shfaqja është në garë për njërin nga çmimet e këtij festivali, çmimi për aktorin apo aktoren më të mirë në rol kryesor, çmimi për aktorin apo aktoren më të mirë në rol dytësor, çmimi për regjinë më të mirë dhe për shfaqjen më të mirë.

Në fokus të kësaj shfaqje paraqiten në rolet e dy shërbëtoreve, Sollanzh dhe Klara duke trajtuar kështu përmes tyre jetën dhe lirinë njerëzore. Ato të rritura në një shtëpi duke ushtruar gjithnjë rolin e shërbëtoreve, tërë jetën e tyre shërbehen me synimin për të ikur nga thundra e zonjës së shtëpisë. Të uritura për jetën dhe pushtin e Madam, në momentet kur ajo nuk gjendet në shtëpi ato mbulohen në petkun e saj të kuq, ulen në karrigen e saj dhe hidhen pas planeve për ta vrarë atë. Planet e tyre vazhdimisht të dështuara dhe pamundësia për të vrarë zonjën e tyre, bën që këto përpjekje ato t’i kthejnë për të vrarë njëra- tjetrën dhe vetën e tyre.

Drejtoresha artistike e festivalit, Burbuqe Berisha këtë shfaqje e cilësoi si një homazh për lirinë e të pafuqishmëve për me qenë të fuqishëm, ndërsa ardhjen e kësaj shfaqje nga Teatri Kombëtar i Sofjes e cilësoi si nder të madh për këtë festival dhe për publikun duke theksuar punën e aktorëve dhe veçanërisht të regjisores, të cilën e vlerësoi si njërën nga regjisorët më të mira në rajon.

Regjisorja e kësaj shfaqje, Diana Dobrevo tha për KultPlus se ndihet e lumtur që është pjesë e fillimit të këtij festivali, dhe tha se ndihet mjaft e lumtur që para publikut kosovar solli sonte këtë shfaqje në fokus të cilës ishte përpjekur që përmes dy personazheve kryesore të sjellë koston dhe përpjekjet për liri njerëzore.

Përveç kësaj shfaqje, në programin garues, nata e dytë e festivalit u pasua dhe nga shfaqja e dytë musafire “Shenjëtorja e errësirës”, një biografi teatrale kushtuar jetës dhe veprës së shenjtores shqiptare, Nënë Terezës. Kjo shfaqje është luajtur qindra herë në teatrot e Kroacisë e Bosnjë e Hercegovinës, ndërsa sonte solli emocione të veçanta për publikun kosovar.

Ky festival do të vazhdoi të jetë i hapur deri më datë 21 tetor. Netët në vijim edicioni i parë i këtij festivali do të mirëpres edhe këto katër shfaqje garuese : “Vdes siç vdes një vend” nga Shqipëria, “SPEAK MEDEA” nga Irani, “Darka e Thërrimeve” nga Maqedonia, “Armiku i Popullit” nga Kosova. / KultPlus.com

Sonte në ‘PITF’ jepet shfaqja “Shenjëtorja e errësirës”, biografi për jetën e Nënës Terezë

Posted on by KultPlus

Në kuadër të Festivalit Ndërkombëtar të Teatrove “Prishtina International Theater Festival”, PITF 2017, që po mbahet në Teatrin AAB “Faruk Begolli”, sot do të luhen dy shfaqje, përcjellë KultPlus.

Në programin garues të festivalit, nga ora 17.00 jepet shfaqja “Shërbëtoret”, produksion i Teatrit Kombëtar të Bullgarisë.

Nga ora 20.00 në programin mysafir të shfaqjes do të luhet shfaqja “Shenjëtorja e errësirës”, një biografi teatrale kushtuar jetës dhe veprës së shenjtores shqiptare, Nënë Terezës.

Shfaqja mysafire “Shenjëtorja e errësirës” është luajtur qindra herë në teatrot e Kroacisë e Bosnjë e Hercegovinës, ndërsa sonte sjell emocione të veçanta për publikun kosovar.

Në shfaqje luajnë: Kostadinka Velkovska, Ilir Tafa, Velimir Cokljat, Ljiljana Cokljat dhe Mia Krajcar. Regjinë e shfaqjes e ka bërë regjisorja kroate Ivana Perozh.

Të gjithë të interesuarit mund të rezervojnë biletat duke kontaktuar në numrin 045197106, apo direkt në Teatrin AAB “Faruk Begolli”, në Kolegjin AAB në Prishtinë./ KultPlus.com

Teatri Eksperimental shpallë sezonin artistik 2017-2018, në skenë Ndrenika, Anagnosti dhe Xhuvani

Posted on by KultPlus

Teatri Kombëtar Eksperimental “Kujtim Spahivogli” për sezonin artistik 2017-2018 premton të sjellë në skenën e tij 31 premiera, shfaqje të reja, për fëmijë, adoleshentë dhe të rritur.

Drejtori i teatrit Kiço Londo premtoi një sezon cilësor dhe kthimin e emrave të njohur të skenës së teatrit si Robert Ndrenika, Roza Anagnosti. Pjesë e stinës artistike janë 12 produksione teatrore për të rritur.

“Këtë sezon artistik do të jenë gjithsej 12 produksione, dyfishi nga viti i kaluar, që do të zhvillohen në laboratorin e skenës të Teatrit Kombëtar Eksperimental. Laboratori i Teatrit Eksperimental për Fëmijë do të ketë 7 produksione, por këtë vit do ti shtohet një shfaqje për fëmijët me aftësi ndryshe”, tha drejtori Londo.

Prezantimin e kalendarit artistik drejtori Londo preferoi ta niste me një provokim, me këngën e gjelave, që nënkupton që teatri që ai drejton është ngritur siç ka edhe slloganin e këtij viti “U ngritëm”. Kanë zgjedhur gjelin si simbol të këtij sezoni, për t’u zgjuar jo vetëm vetë, por edhe të tjerë.

“Gjelat kanë një të mirë që zgjojnë të zotin por dhe komshiun, është një tendencë për tu zgjuar të gjithë komshinjtë tanë, Ministria e Kulturës, të gjithë ata që kanë në dorë fondet publike. Me fondet e tre projekteve ne bëjmë 15. Këtë radhë ne kemi vendosur të mos qahemi, por të bëjmë 31 projekte”, tha Londo. E gjithë puna që bëhet në teatër sipas tij ka si qëllim për vepra me nivel. “Qëllimi i kësaj stine është teatër cilësor për të gjithë. Kthimi në vazhdën e emrave të njohur si Robert Ndrenika, Arben Derhemi, Gazmend Gjoka, kësaj radhe “Medea” do të rikthejë për tretin sezon rresht në skenën e TKE Luzia Xhuvanin, do të jetë pjesë e produksioneve dhe e mirënjohura e munguar Roza Anagnosti”, tha Londo. Teatri për fëmijëe hapi sezonin me shfaqjen “Princesha e gjelbër” e laboratori i TKES për fëmijë do të vijojë dhe me “Eni”, “Krishtlindje të rriturish”, “Matilda”, etj. Laboratori i TKES për adoleshentë sjell takimin e parë-Austin Winberg dhe Punishten Teatrore. Në repertor të teatrit do të jenë dhe shfaqje si “Shkolla e grave”, “Tramvaj me emrin dëshirë”, “Çfarë pa kryeshërbëtorja”. 12 veprat për të rritur janë ato me titull “Shumë zhurmë për asgjë” që çel dhe sezonin artistik vepër e Shekspirit, “Rojet e Taj” nga Rajiv Joseph, “Medea” nga Euripid, “Emri” Mathieu Delaporte Alexandre de la Patelliere, “Zonja presidente” Werner Schwab, “Gishti” Doruntina Basha, etj. Pjesë e këtij sezoni 2017-2018 është dhe Festivali i dramaturgjisë franceze. Ky sezon sjell bashkëpunimin me 4 regjisorë të huaj, por nuk do të mungojë dhe regjisori Altin Basha me shfaqjet e tij.

Ministria, shënime për buxhetin

Janë realizuar 350 shfaqje në këtë teatër sezonin e kaluar. Por problemet vijojnë me buxhetin për sezonin artistik. “Ishte një stinë me 350 shfaqje. Marrim më pak se 3 përqind të buxhetit që marrin 12 teatrot sëbashku dhe kryejmë 60 përqind të shfaqjeve” pohoi drejtori Kiço Londo. Buxheti i TKES arrin diku te rreth 55 mijë euro në vit për projektet artistike. “Kam folur vetë me ministren dhe ajo ka mbajtur shënim. Besoj se do të jetë e vëmendshme” pohoi mes të tjerave drejtori Londo për buxhetin, që akordon Ministria e Kulturës. “Ministria e Kulturës na detyrohet dhe 20 përqind fonde nga viti i kaluar dhe besoj që deri në fund të vitit do të na i akordojë”, shtoi Londo. Një problem shqetësues për të është dhe gjendja e teatrit shqiptar sot në përgjithësi. Sipas tij sot në teatrot në vend ndiqet një trajektore e gabuar. Për teatrin që drejton Londo vijoi të pohojë se aktiviteti do të jetë në tre salla, ajo Molier, Gëte dhe Lorka. / KultPlus.com

“Prishtina International Theater Festival” sjellë gjashtë shfaqje nga vendi dhe rajoni

Posted on by KultPlus

Festivali Ndërkombëtar i Teatrit “Prishtina International Theater Festival”, i cili është themeluar në hapësirat e Teatrit AAB “Faruk Begolli”, në qershor të vitit 2017, ka shpalosur programin për këtë edicion, shkruan KultPlus.

Në skenën e këtij teatri, do të shfaqin punën e tyre artistike trupa teatrore të vendeve e të rajonit.
Festivali fillon më datë 16 tetor dhe zgjatë deri më datë 21 tetor.

Këto data janë rezervuar për gjashtë shfaqje të mrekullueshme nga vendi dhe rajoni.

“Dhe jetuan të lumtura…?” – Kroaci, “Shërbëtoret” – Bullgari, “Vdes siç vdes një vend” – Shqipëri, “SPEAK MEDEA” – Iran, Darka e Thërrimeve – Maqedoni, Armiku i Popullit – Kosovë, janë shfaqjet që do të mirëpriten përgjatë këtij edicioni të parë të festivalit. / KultPlus.com

http://teatriaab.com/pitf/programi

Historia u gdhendë me ‘Një legjendë dashurie’ e me ‘Këmbë’, Trupa e Baletit të Kosovës mrekulloi audiencën kosovare

Posted on by KultPlus

Sarandë Selimi

Tepihu i kuq ishte shtruar. Shkallët e Teatrit Kombëtar të Kosovës ishin zbukuruar me vazo nga qelqi në të cilat kishte qirinj. Veçantia e kësaj mbrëmje vërehej që në hyrje. E ndryshe nga herët e kaluara gjithçka nisi me një fjalë rasti nga drejtori i Trupës së Baletit Kombëtar të Kosovës Ahmet Brahimaj. Ai me këtë fjalim tregoi për të gjithë të pranishmit që mbrëmja e së enjtes dhe premiera që do të shfaqej pas çastit që ai përfundon fjalimin, janë pikërisht për 45 vjetorin e themelimit të Baletit Kombëtar të Kosovës. Këtë mbrëmje u prezantua edhe monografia e titulluar ‘Këmbë’, që është shkruar nga Naser Shatrolli, shkruan KultPlus.

Një premierë që do të mbahet mend gjatë nga audienca e këtij institucioni, duke sjellë pas vete edhe një monografi që jo rastësisht është titulluar ‘Këmbë’. 45 vite jetë. Me shumë vështirësi, nga më të ndryshmet Baleti Kombëtar i Kosovës dëshmoi se qëndroi në këmbë, edhe atëherë kur lufta shkatërroi gjithçka, qëndroi në këmbë edhe përkundër mospërkrahjes institucionale, qëndroi në këmbë duke iu bërë ballë të gjitha vështirësive, për të shkëlqyer më 21 shtator ku festuan këtë jubile, që në skenën e madhe të Teatrit Kombëtarë të Kosovës solli për herë të parë, nën petkun e kryeministrit të vendit Ramush Haradinaj.

Artdashësit e këtij institucioni kulturor paksa u çuditën më ardhjen e kryeministrit. Por nuk ishte e jashtëzakonshme të çuditen, pasi që, pas 17 vite që Kosova gëzon lirinë nga okupatori serb, ishte Haradinaj që ia bëri sefte një ngjarjeje kulturor.

Holli i Teatrit Kombëtar të Kosovës, ishte i stërmbushur me njerëz. Karriget ishin të pakta por qëndrimi në këmbë nuk ishte problem i madh për ta. Skena u errësua dhe atë e pushtuan balerinët të veshur me veshje jashtëzakonisht të bukura me motive kombëtare. Skenografia paraqiste malet e Sharrit, kullat shqiptare, Ujëvarën e Drinit e krejt në fund në këtë skenografi mahnitëse u vendos edhe flamuri kombëtar. E krejt kësaj mrekullie iu shtuan edhe tingujt e krijuar nga i madhi Rexho Mulliqi.

“Jam i lumtur, së pari që arritëm ta festojmë këtë ditë meqë kemi kaluar nëpër shumë probleme edhe si shtet edhe si popull edhe si komb dhe kryesorja është që e festuam 45 vjetorin në liri. Dhe e dyta jam i kënaqur me rezultatet e shfaqjes, publiku e mirëpriti dhe kryeministri Haradinaj na nderoj me ardhjen e tij, duke qenë se është kryeministri i parë që ka ardhë në një premierë. I vlerësoj të gjithë këta shikues që e duartrokitën kaq gjatë”, tha me pak fjalë për KultPlus, drejtori Ahmet Brahimaj.

‘Një legjendë për dashurinë’, erdhi në trojet shqiptare. Në oxhakun e Bardhëve lindi vajzë. Vendosën ta quajnë Borana (Teuta Krasniqi) me rastin e borës së parë. Borana rritet dhe bëhet vajza më e bukur në fshat. Të gjithë e duan. Djemtë e fshatit çmendeshin për bukurinë e saj. Bajrori (Fatmir Smani, Sead Vuniqi) dhe Ujkani (Sinan Kajtazi, Donmir Bilalli) janë dy djemtë që shprehin dëshirë të miqësohen më të. Borana ua vë një kusht të dyve. Ajo thotë se cili do ta rrëmbejë shaminë e kuqe do të miqësohet me të. Shaminë e rrëmben Bajrori dhe këtu nis gjithçka. Ujkani nga xhelozia e tepërt vendos të hakmerret.
Komplet këtë vepër e solli mjeshtri i koreografisë Pullumb Agalliu. Agalliu, për KultPlus, nuk i fshehu emocionet që kishte. Ai tha se tashmë ka realizuar ëndrrën. Koreografi rreth 70 vjeçar, që nga lozha ku shikonte balerinët tek luanin në skenë, luante bashkë me ta. Lëvizjet e tij ishin për tu admiruar dhe në fund u kënaq me suksesin.

“Çdo koreograf, çdo artist mundohet të bëjë çdo gjë gjithmonë mirë, por kjo është një shfaqje e veçantë për 45 vjetorin por gjithashtu ka edhe një të veçantë tjetër sepse është një shfaqje për mua e para kombëtare dhe e dyta pas ‘Halilit dhe Hajries’ ku aty isha asistent. Unë e realizova një ëndërr. Balerinët e Trupës së Baletit Kombëtar të Kosovës për mua janë yje, ata shkëlqejnë dhe është nga trupat më simpatike që unë i admiroj duke nis nga vajzat e djemtë më të vogël e deri tek Sinani që është artist i përkryer, Teuta, Jeta e të gjithë me rend”, tha Agalliu, i cili poashtu ekskluzivisht për KultPlus, tregoi se ka shumë mundësi të madhe të shkojë në Moskë në një konkurs ndërkombëtare me muzikën e kompozitorit Rexho Mulliqi.

Jo më kot u titullua ‘Një legjendë për dashurinë’. Në fund edhe pse bie nga shkëmbi për të mos e prekur dora e Ujkanit, Borana zgjohet nga gjumi i thellë posa e prek një fjollë bore. Dashuria e Boranës dhe Bajrorit triumfon.

Duartrokitjet nuk ndalen për disa minuta. Fjalët e mira nuk munguan as për shfaqje e as për monografi. Kjo gjë padyshim që e gëzoi shumë autorin e monografisë Naser Shatrollin. Ai për KultPlus, tha se kjo është nata më e veçantë e jetës së tij.

“Është shënuar një histori e kësaj trupe dhe këtij institucioni kulturor me 45 vite në këmbë. Krejt këtij rrumbullakimi 45 vjeçar kemi ardhë në një moment kur mua më është besuar ky libër me kaq rëndësi e kaq peshë. Falënderoj drejtorin Ahmet Brahimaj që ma ka besuar punën”, tha për KultPlus, Shatrolli, duke vazhduar tutje të tregoi se sa ka qenë e vështirë përmbledhja e materialit për këtë monografi 360 faqe e cila është përkthyer edhe në gjuhën angleze.

“Pjesa e pasluftës nuk ka qenë e vështirë sepse ka qenë këtu, e pjesa e paraluftës nuk ka qenë aspak e lehtë, e kam ditë që është një përgjegjësi e jashtëzakonshme dhe sonte jam i kënaqur shumë, jam i kënaqur se ka një javë që libri ka nis të shpërndahet dhe mora fjalë të mira. Pak para viti të ri Ahmet Brahimaj mi ka dhënë sinjalet e para dhe atëherë kam startuar me një punë intensive, kam pas një ekip të shkëlqyer dhe mendoj që ky ka qenë suksesi”, theksoi Shatrolli.

Ndërsa për KultPlus, foli edhe njëra ndër balerinët e para të kësaj trupe Sabrie Spahiu. Ajo më shumë emocion tha se Pullumb Agalliu sonte ka dhënë një shfaqje e cila i ka mbushur me emocion. Poashtu ajo kujtoi edhe kohët e vështira që ka kaluar gjenerata e saj.

“Më kujtohet kur vumë në skenë baletin ‘Halili e Hajria’ dhe asistent koreografi ishte Pullumb Agalliu, dhe kur e sheh një koreograf 70 vjeçar që punon me aq pasion, si mos të kesh emocione. Ka qenë një jetë me shumë sfida, ashtu siç ka kaluar edhe kombi ynë. Unë e kam cekë edhe më herët që në vitin 1995 kur na larguan nga teatri e ndjeja veten të hendikepuar dhe nuk dinim se çfarë po ndodh me ne, e pas 8 vitesh që u kthyem në skenë loja artistike nuk ishte në gjendjen e duhur por ishte mjaftueshëm që ta lidhim me këtë gjeneratën e re që janë të mrekullueshëm”, tha ndër të tjera Sabrie Spahiu për KultPlus.

Krejt në fund, KultPlus, bisedoi edhe me balerinin Sinan Kajtazi, i cili para pak ditësh ka mbushur plotë 16 vite në skenë me Baletin Kombëtar të Kosovës. Sinani, kësaj radhe kërkoi një teatër të baletit, pasi që, sipas tij, tashmë durimi është sosur dhe kushtet ua pamundësojnë të zhvillohen edhe më tutje.

“Ne po ndihemi mirë që po shohim gjithë këtë publik që po vijnë të na mbështesin por nuk po ndjehemi mirë që nuk po kemi mjaftueshëm mbështetje nga institucionet e njerëzit përkatës. Për shfaqje të tilla kërkohet një skenë edhe një herë më e madhe se kjo që e kemi, kërkohet infrastrukturë moderne. Para dy javësh patëm një premierë në Shkup në teatrin e ri dhe normal që na vjen keq që një super teatër që është vetëm 80 km nga Prishtina nuk e kemi ne këtu. Ne çdo gjë po bëjmë përveç teatër jo”, tha Sinan Kajtazi për KultPlus, duke u shprehur tutje se të gjithë ne po jemi dëshmitarë të asaj se kur po dalin artistë nga Kosova e që po i zhvillojnë tjerat shtete ne po ndihemi mirë por do të ndihemi mirë nëse edhe artistëve brenda Kosovë u krijohen kushte për punë sepse asnjë artist nuk i ka kushtet e duhura. “Mundësitë janë vetëm dëshira mungon. Do dëshiroja që në 50 vjetorin të paktën ta festojmë në teatër të ri”, tha për fund ai.

‘Një legjendë për dashurinë’, reprizën e parë do ta ketë sonte me fillim nga ora 20:00. Ndërsa monografinë për 45 vite në ‘Këmbë’, mund ta ketë në dorë secili adhurues i këtij arti skenik./ KultPlus.com

Shfaqja kosovare “Eshtrat që vijnë vonë” fiton katër çmime në Maqedoni

Posted on by KultPlus

Me ftesë zyrtare të drejtorisë së Festivalit Ndërkombëtar të Teatrit ‘Risto Siskov’ në Strumicë të Maqedonisë – Teatri Kombëtar i Kosovës, ka pas nderin të hap edicionin e 25-të të këtij eventi me shfaqjen ‘Eshtrat që vijnë vonë’ të Teki Dërvishit, përcjellë KultPlus.

Këtë festival të rëndësishëm ndërkombëtar i cili është mbajtur me rastin e Ditës së Pavarësisë së Maqedonisë, e ka hapur Kryeministri i Republikës së Maqedonisë, Zoran Zaev. Të pranishëm në shfaqjen e Teatrit Kombëtar të Kosovës, ishtin edhe Ministri i Kulturës të Republikës së Maqedonisë, ambasadorë të akredituar dhe personalitete rajonale e ndërkombëtare të botës së teatrit.

Shfaqja kosovare ‘Eshtrat që vijnë vonë me tekst të Teki Dërvishit e regji të Martin Kochovskit, u percoll nga një publik i zgjedhur prej më shumë se 700 vetash. Në tryezën e rrumbullakët të organizuar me rastin e premieres kosovare, kritikë eminent të rajonit, vlerësuan lartë shfaqjen e TKK-së, tekstin, regjinë, ansamblin, strukturën dhe gjuhën avangarde të shfaqjes. Megjithate, në mediat e instrumentalizuara nga ekstremi shovenist , media të oligarkive të deplasuara politike të dedikuara për të prodhuar ‘fake news’, shfaqja kosovare u cilësua si projket që promovon ‘Shqipërinë e madhe’. Në përfundim të festivalit, juria shtatë antarëshe, në krye me Zija Sokoloviqin nga Bosnja dhe dramaturgun e njohur bullgar Stefan Jankov, i ndau katër çmime autoriale për shfaqje kosovare:

Eshtrat që vijnë vonë, ka fituar çmimin për:
Tekstin më të mirë – Teki Dërvishi
Regjia më e mirë – Martin Kochovsky
Kostumet më të mira- Juliana Nojman
Koreografia më e mirë

Vitin e kaluar shfaqja ‘Eshtrat që vijnë vonë’ kishte fituar Gran Prix /Çmimin e madh/ të Festivalit Evropian të Teatrit në Bukuresht të Romanisë. / KultPlus.com

‘Oh, Oh, xhulia’ me regji të Besim Ugzmajlit nis sezonin në Teatrin ‘Adriana’ në Ferizaj

Posted on by Kult Plus

Teatri i Qytetit ‘Adriana’ në Ferizaj, shumë shpejt pritet të nis sezonin me premierën ‘Oh, Oh, xhulia’.

Kjo shfaqje me tekst të Ephraim Kishon në skenën e teatrit ‘Adriana’ do të jetësohet nën regjinë e regjisorit Besim Ugzmajli.

Provat për këtë shfaqje tashmë veç kanë filluar, ndërsa për KultPlus, regjisori Ugzmajli, dha disa detaje për tekstin.
“ ‘Oh, Oh, xhulia’, është një komedi-parodi si version alternativ i ‘Romeo dhe Zhulieta’ të William Shakespeare. Por në versionin e Ephraim Kishon, Romeo dhe Zhulieta i kanë shpëtuar vdekjes. Ephraim Kishon është një autor që jo vetëm që ka shkruar shumë skenarë dhe drama, por është i njohur edhe si regjisor i cili ishte nominuar për Oscar. Provat vetëm sa kanë filluar dhe shfaqja pritet të jepet pas datës 20 tetor”, tha për KultPlus Besim Ugzmajli.

Kjo shfaqje sjellë në rolet kryesore aktorët: Shpëtim Selmani, Vjosa Tasholli, Sherif Bega, Edona Berisha, Mevlan Saraçi dhe Milot Salihu./ KultPlus.com

Ben Apolloni me shfaqjen ‘Natë misterioze’ në teatrin ‘Aleksandër Moisiu’

Posted on by KultPlus

Teatri “Aleksandër Moisiu” në Durrës kësaj radhe do të mirëpres një shfaqje të re dhe shumë të veçantë, provat për të cilën tashmë veç kanë filluar, shkruan KultPlus.

Bëhet fjalë për shfaqjen “Natë misterioze” të autorit Ferdinand Hysi, e të cilën në skenë do ta sjellë regjisor nga Kosova Ben Apolloni.

Drama, rrëfen për një takim misterioz të katër personazheve që nuk e dinë se kush janë dhe janë në kërkim të identitetit. E kjo i bën që të shkojnë në një vend misterioz, në një shtëpi misterioze dhe të takohen me personazhe tjerë, që janë shumë misterioz. Se a do të zgjidhen gjithë këto mistere të një nate, mbetet të shihet në premierë.

Shtatë personazhet e kësaj drame do t’i sjellin në skenë aktorët: Suela Bako, Mimoza Marjanaku, Xhejni Fama, Amos Muji Zaharia, Gjergj Doçi, Marvin Tafaj dhe Ervin Doko.

Për datën e premierës ende nuk është vendosur, por KultPlus do të ju njoftoj me kohë. / KultPlus.com

Dino Mustafiq rikthehet në Tiranë, përzgjedh aktorët për shfaqjen “Nëna e fëmija”

Posted on by KultPlus

Regjisori i njohur boshnjak Dino Mustafiq është rikthyer sërish në Tiranë, pas suksesit me veprën “Equus” që u ngjit në skenën e Teatrit Kombëtar.

Nën shoqërinë e Ema Andreas, Mustafiq ka dëgjuar intepretimet e aktorëve meshkuj që hynë në audicion për një rol në shfaqjen “Nëna e fëmija”, e Jon Fosse që do të vihet në skenë nga Dino Mustafiq. Dukej një numër i madh djemsh nën moshën 25 vjeç të interesuar për këtë rol.

Në këtë audicion u përzgjodh aktori Matia Llupa. Tulla – Culture Center do të presë ‘Nëna e fëemija’ të Fosse, me regji të Dino Mustafiq në fund të muajit tetor.

Vepra do të mbështetet nga Fondacioni M.A.M.I lindur në Bosnjë, me origjinë shqiptare, Dino Mustafiq, e ka lidhur jetën herët me skenën. Ai është diplomuar në Akademinë e Arteve të Bukura në Sarajevë, dhe është drejtor i një festivali ndërkombëtar teatror MESS, që mbahet në Sarajevë prej gati 20 vitesh. Në skenën e Teatrit Kombëtar ai solli pak muaj më parë një nga veprat më të vështira të Peter Shaffer.

Vendosja në skenë e veprës së Peter Shaffer nuk është hera e parë e bashkëpunimit të regjisorit Mustafiq me teatrot shqiptare.

Me Teatrin shqiptar në Shkup ka ngjitur në skenë shfaqjen “Gjenerali i ushtrisë së vdekur”, vepër e Ismail Kadaresë. Në bashkëpunim me Teatrin Kombëtar të Kosovës ka ngjitur në skenë veprën teatrore “Rock’N’Roll”. Po ashtu, sërish në bashkëpunim me Teatrin Shqiptar në Shkup, ka sjellë shfaqjen “Opera për tre grosh”. “Nëna e fëmija” e dramaturgut norvegjez Fosse është ngjitur më parë në skenën e Teatrit Kombëtar të Kosovës, nën regjinë e Bekim Lumit. Drama trajton një temë universal, që është ajo e abortit dhe braktisjes së fëmijës, përmes katër personazheve. Një djalë kthehet tek e ëma pas më shumë se 20 vjetësh në kërkim të arsyes për braktisjen e tij. / KultPlus.com

“Trojanet” prezantohen në ambientin e Etno Fest

Posted on by KultPlus

Projekti ndërkombëtar “Trojanet”, program i teatrit amerikan La Mama nga New York, tashmë ka mbërritur në Kosovë, për ta jetësuar bashkëpunimin me Qendrën për Art dhe Komunitet – Artpolis, përcjellë KultPlus.

Në kuadër të këtij projekti është organizuar një prezantimin publik me arritjet e punëtorisë “Trojanet” në ambientin e EtnoFestit në fshatin Kukaj, prezantimi bëhet më datë 9 shtator nga ora 19:00, duke mundësuar të gjithë të pranishmëve të ekspozohen ndaj elementeve kulturore të muzikës, vallëzimit dhe historisë të cilat do të finalizohen me shfaqje.

Disa nga artistët të cilat janë pjesë të kësaj punëtoria janë kryesisht emra të njohur të skenës kosovare dhe ndërkombëtare si: Ilire Vinca, Anisa Ismajli, Kushtrim Qerimi, Aurita Agushi, Sheqerie Buqaj, Lulzim Bucolli, Flutur Mustafa, Qendresa Kajtazi, Edlir Gashi, Fisnik Sykaj, Daniela Markaj dhe shumë artistë të rinj, si: Fjolla Hana, Skender Podvorica, Redon Kika, Alban Goranci, Edon Shileku, Margarita Ukaj, Rajmonda Ahmetaj.

Njëherësh të përfshirë në këtë punëtori janë edhe dhjetëra artistë profesional, muzikantë dhe të rinj nga komuniteti serb në Kosovë të cilët së bashku praktikisht po arrijnë të jetësojnë pjesë nga shfaqja “Trojanet”.

Ky projekt është zhvilluar ndër vite, ndërsa në muajin maj të 2018-së do të realizohet edhe në festivalin FemArt shfaqja “Trojanet” nga grupi i artistëve dhe artisteve nga të gjithë komunitetet e Kosovës. / KultPlus.com

Një çift gay kërkon të martohet sonte në Teatrin Kombëtar të Kosovës

Posted on by KultPlus

Qendra Multimedia nga Prishtina, e konsideruar si ‘njëra nga kompanitë teatrore më interesante nga Evropa Juglindore’, sjell sërish në skenë, në një trajtim krejtësisht politikisht jo-korrekt, një performancë argëtuese politike dhe provokative, kësaj here mbi çështje që kanë të bëjnë me komunitetin LGBTI, përcjellë KultPlus.

“55 shades of gay” është një rrëfim burleskë për politikat rreth LGBTI në Ballkan dhe Evropë.

Politikanët lokalë të Ballkanit përpiqen të manipulojnë e mashtrojnë zyrtarët e BE-së, mercenarët humanitarë të NGO-ve ndërkombëtare, e që bukur shpesh shfrytëzojnë terrenin homofob për të vjelur fonde e për të realizuar projektet e tyre sociale e edukative [të tipit të punëtorive e seminareve për mënyrën e përdorimit të kondomëve], ndërsa që zyrtarë të BE–së, duke shfrytëzuar pozitën e tyre superiore financiare e politike, përpiqen t’i nënshtrojnë të gjithë.

Në këtë trini [Manipulim. Abuzim. Nënshtrim], pyetja që shtron shfaqja është: A është i mundur një çlirim seksual [sexual liberation] në Ballkan? Ose, a mundet Ballkani ta nisë një ‘Pranverë ballkanike të revolucionit seksual’?

Në shfaqje, një çift gay bën kërkesë për kurorëzim në një qytet provincial konservativ dhe thellësisht homofob. Kërkesa bëhet në kohën kur shoqata italiane Don Bosco ka nisur në qytet ndërtimin e një fabrike për prodhimin e prezervativëve, një projekt ky që është përkrahur financiarisht nga Bashkimi Evropian dhe që synon zvogëlimin e papunësisë në atë qytet ku papunësia shkon deri në 90%. Intelektualë, artistë, politikanë, përfaqësues të fesë e bombahedhës profesionistë angazhohen që kjo martesë të mos ndodhë, pavarësisht se martesa e çifteve të së njëjtës gjini lejohet me kushtetutën e vendit, të cilën kryeministri e ka nënshkruar sipas udhëzimeve të BE-së.

“55 shades of gay” është realizuar nga një kastë e 5 aktorëve të mrekullueshëm kosovarë dhe nga një ekip i artistëve teatrorë eminentë nga Gjermania, Kosova, Franca dhe Serbia.

Në këtë shfaqje me tekst të Jeton Neziraj dhe regji të Blerta Neziraj, luajnë aktorët: Tristan Halilaj, Bujar Ahmeti, Shengyl Ismaili, Semira Latifi, Alketa Sylaj

Luan Durmishi (vokal), skenografia dhe kostumet nga Sebastian Ellrich, muzika: nga Irena Popovic /dhe koreografia është realizuar nga Florian Bilbao.

Shfaqja “55 shades of gay” vjen sonte premierë në Teatrin Kombëtar të Kosovës në ora 20:00. Repriza e parë e shfaqjes vjen nesër në po të njëjtën kohë. / KultPlus.com

Marigona Qerkezi e mrekullueshme në paraqitjen e saj në Rossini Opera Festival

Posted on by KultPlus

Jeta Zymberi

Sopranoja kosovare Marigona Qerkezi, e cila tashmë ka përfshirë një teren të gjerë me prezantimet e saj në teatrot më prestigjioze në botë, së fundi debutoi edhe në ‘Rossini Opera Festival’ me rolin Madama Cortese, shkruan KultPlus.

“Është privilegj i madh për mua që pata rastin të perfeksionohem dhe rritem profesionalisht me specialistin Rossinian të shekullit, Maestro Alberto Zedda. Prandaj këtë debutim, me plot zemër ia dedikova maestros së ndjerë, Alberto Zedda”, tha fillimisht sopranoja Marigona Qerkezi për KultPlus.

Të debutojë me rolin Madama Cortese nga opera “Il Viaggio a Reims” e kompozitorit Rossini , pikërisht në Rossini Opera Festival, që është festivali më prestigjioz në mbarë botën, i dedikuar ekskluzivisht për kompozitorin Gioacchino Rossini, në vendlindjen e tij Pesaro – Itali, padyshim që ka një rëndësi të jashtëzakonshme për karrierën e sopranos kosovare.

Por, e gjithë kjo erdhi si rezultat i punës së verifikuar pas audicionit të realizuar disa muaj më herët, ku Qerkezi u përzgjodh si fituese nga mbi 300 konkurrentë nga e mbarë bota.

“Periudhë e gjatë dhe intensive e përgatitjeve dhe provave, u shpalos në skenën e Teatro Rossini, dhe u ndoq nga 10.000 shikues në platformën e transmetimit direkt online”, ka treguar tutje Qerkezi.

Për këtë interpretim të sopranos kosovare kanë shkruar edhe kritikat në mediat italiane.

“Marigona Qerkezi, që së shpejti do të jetë Madama Cortese në Gran Teatre del Liceu në Barcelonë, interpretoi mrekullisht këtë rol, duke i merituar duartrokitjet e para të shfaqjes, dhe ovacionet “Bravissima” ende pa e mbaruar pjesën e saj, ovacione të cilat u shpërndanë dhe e përmbushen sallën sapo ajo mbaroi arien”, shkruan një nga kritikat në mediat Italiane. / KultPlus.com