Etiketë: Shqipe Sylejmani

Malet, verërat dhe traditat e Kosovës, në serialin e televizionit zviceran

Posted on by Kult Plus

Serialin e përshkon ballafaqimi i Shqipe Sylejmanit me pyetjet rreth identitetit, dallimeve dhe ngjashmërive në mes të dy “atdheve” të saj, Kosovës dhe Zvicrës.

Gjatë javës që shkoi, në televizionin e transmetuesit nacional zviceran srf është dhënë një serial me emisione kushtuar Kosovës. Bëhet fjalë për Serialin “G&G Grenzenlos” – Me Shqipe Sylejmanin në Kosovë”.

Siç mund të kenë parë ata që e kanë ndjekur këtë serial, shkrimtarja nga Bazeli, e lindur 35 vite më parë në Prishtinë, gjatë një jave ka prezantuar traditat, ushqimet dhe thesaret e tjera nga shtëpia e saj e dytë, Kosova.

Në njërin nga episodet e shfaqura, Shqipja ka dërguar ekipin televiziv nga Zvicra në bodrumin e njohur të verës “Stone Castle” në Rahovec. Aty, ajo, në bashkëbisedim me shefen e shitjes të kësaj ndërmarrjeje ka hedhur dritë jo vetëm mbi prodhimin aktual të verës në Kosovë por edhe mbi traditën në të cilën mbështet kjo degë e rëndësishme e ekonomisë kosovare.

Më tej në emision flitet për traditat fetare në Kosovë, ku pjesën dërmuese e përbëjnë myslimanët por ku, ushtrimi i besimit mbetet një çështje individuale, siç e thotë autorja e emisionit. Pasi seriali është xhiruar gjatë kohës së Ramazanit, aty sillet një darkë (iftar) në të cilën janë ftuar Shqipja dhe ekipi televiziv.

Në një episod tjetër bëhet fjalë për malet e Kosovë, gjegjësisht skitarinë dhe ecjen malore. Duke ecur nëpër shtigjet malore të Sharrit, në Brezovicë, Shqipja flet për traditën e skive në Kosovë, që lidhet kryesisht me këtë qendër. Në këtë pikë ajo bën edhe paralelet me Zvicrën që me peizazhin e saj është një vend tipik për sportet e dimrit dhe ecjen në male.

Më tutje prezantohet tradita e kuzhinës shqiptare, kosovare, përmes vizitës në shtëpinë e moderatores së njohur Xheraldina Vula, në Brezovicë, ku ajo përgatit një gjellë karakteristike të vendit. Në vazhdim, Shqipja është e ftuar në emisionin për kuzhinën, që Xheraldina drejton në rtv21.

Traditat popullore në veçanti vallet shqiptare, janë në fokus të një episodi të radhës, që realizohet në ambientet e Ansamblit Kombëtar “Shota”.

Gjithë serialin e përshkon ballafaqimi i Shqipe Sylejmanit me pyetjet rreth identitetit, dallimeve dhe ngjashmërive në mes të dy “atdheve” të saj, Kosovës dhe Zvicrës. Dhe, ajo përpiqet të shpjegojë pastaj kompleksitetin e kësaj teme, kaq të pranishme në mediat e këtushme.

“Vendi më i rëndësishëm në Evropë, për Kosovën, është Zvicra. Në fund të fundit, këtu jeton një nga diasporat më të mëdha të saj – dhe pikërisht rrënjët e saj dëshironte t`i bëjë më të njohura seriali “G&G Grenzenlos” – Me Shqipe Sylejmanin në Kosovë”. Kështu, veç tjerash  thuhet ë prezantimi e serialit, pjesë nga i cili mund të shikoni në videot në vijim./ albinfo.ch / KultPlus.com

Shqipe Sylejmani nominohet për “Fytyrën e Vitit” në SRF: Këtu mund të votoni!

Posted on by KultPlus

Shqipe Sylejmani shkruan: Është një nder i madh për mua të jem ndër të nominuarit e këtij viti për “G&G Awards: Fytyrat e Vitit” nga @srffacesandstories.

Shkrimtarja, publicistja dhe aktivistja e njohur Shqipe Sylejmani nga Kantoni Baselland është nominuar për titullin “G&G Awards: Fytyrat e Vitit”. Nominimi i saj është bërë në kategorinë “Brückerbauer:innen” (Ndërtues/e urash), shkruan albinfo.ch.

Këto janë fytyrat dhe historitë më emocionuese të vitit 2022, shkruan srf.ch.
Më 1 prill 2023 do të prezantohet për herë të dytë spektakli “G&G Awards”. Shikuesit do të ndihmojnë përmes votimit në përcaktimin se kush do të jetë “Fytyra e Vitit”.

Redaktorët e emisionit “Gesichter & Stories” (nga SRF)  “TELE” dhe “GlücksPost” prezantojnë për herë të dytë çmimin “G&G Awards”, transmeton albinfo.ch. Fytyrat dhe historitë më të mira të vitit 2022 do të nderohen në disa kategori, në mes tjerash ehde në atë të Ndërtuesve të urave.

Ja se si e përshkruan srf, të nominuarën, Shqipe Sylejmani. Shqiptarja kosovare ka ardhur në Zvicër në moshën katër vjeçare. Por ëndrra e saj për një jetë më të mirë këtu, i është turbulluar: asaj i është dashur të durojë ngacmimet lidhur me emrin e saj, madje edhe fyerjet raciste në Festivalin Zviceran të Mundjes dhe Alpeve (që u mbajt verën e kaluar). Si autore, 35-vjeçarja reflekton mbi jetën mes dy botëve.

Të kujtojmë: Shqipe Sylejmani është zgjedhur Personalitet i Vitit 2022 nga redaksia e platformës mediale albinfo.ch, në kategorinë e kulturës dhe aktivizmit social.

Shqipja është e vetmja femër në këtë kategori ndërsa të nominuarit tjerë janë futbollistë dhe këngëtarë, të gjithë “secondos”, dmth qytetarë zviceranë, me prejardhje të huaj.

Ndërsa Shqipe Sulejmani ka bërë me këtë rast një postim në FB, ku shkruan: Është një nder i madh për mua të jem ndër të nominuarit e këtij viti për “G&G Awards: Fytyrat e Vitit” nga @srffacesandstories.

Nuk e di se me çfarë e kam merituar këtë, duke pasur parasysh atë që të nominuarit e tjerë bëjnë çdo ditë për kulturën dhe shoqërinë, përcjell albinfo.ch. U jam edhe më shumë mirënjohës atyre që tashmë e kanë vlerësuar pafundësisht kontributin tim me këtë nominim. Ka njerëz dhe projekte vërtet të shkëlqyera, të nominuar këtu dhe nëse dëshironi, jeni të mirëpritur të votoni për projektin tuaj të zemrës këtu.
E fundit por jo më pak e rëndësishme: “FALEMINDERIT. Preke hunen, si thojn te na.”. (Këtë fjalinë, në fund fare, e ka shkruar shqip.

Votimin për Shqipen, mund ta bëni në linkun më poshtë:

https://www.srf.ch/sendungen/gesichterundgeschichten/g-g-awards-das-sind-die-spannendsten-gesichter-und-geschichten-2022?srg_shorturl_source=ggawards&fbclid=IwAR0aha_VSy-PuZg3GvvRhO1xBemuXxmq5C3z7k-L7aXl95Lc-vxLp2ZzmTc

Shqipe Sylejmani me kostum shqiptar, në Festën Zvicerane të Mundjes dhe Alpeve 2022

Posted on by KultPlus

Ajo, në paradën e madhe të gushtit 2022, do të veshë kostume tradicionale nga Kosova e Medvegja  dhe shpreson se do t`i bashkohen edhe shqiptarë të tjerë.

Festa Federale Zvicerane e  Mundjes dhe Alpeve ESAF do të zhvillohet në Pratteln (Kantoni Baselland) në vitin 2022. Në prag të ngjarjes tradicionale, Komuna Pratteln, e njohur si multikulturore dhe “shumëngjyrëshe”, është marrë me çështjen e identitetit dhe rrënjët e njerëzve nga ky regjion.

Me “Tracht lacht – Brauchtum verbindet” (Kostumi buzëqesh – zakonet bashkojnë), është krijuar një projekt i cili, që nga 6 nëntori 2021 synon të tregojë këtë kulturë zvicerane në mënyrë të freskët, të bukur dhe pasuruese. Me Shqipe Sylejmanin këtu bën pjesë edhe një pjesë e kulturës shqiptare.

Komuna e Pratteln-it do të jetë nikoqire e Festivalit Zviceran të Mundjes dhe Alpeve ESAF 2022. Veprimtaria tradicionale zvicerane, e cila zhvillohet çdo tre vjet, pritet me shumë interes në këtë komunë multikulturore, trasnmeton albinfo.ch. Projekte individuale tashmë duhet ta përgatisin shpirtërisht rajonin  për ngjarjen e madhe, përfshirë këtu edhe projektin “Tracht lacht – Brauchtum verbindet” (Kostumi buzëqesh – zakonet bashkojnë), i cili ka pasur uverturën e tij më 6 nëntor 2021. Temat si tradita, zakonet dhe rrënjët kulturore synojnë të fokusojnë anën shumëngjyrëshe të Pratteln-it dhe Zvicrës.

“Me veshjen tonë ne shprehim atë që është e rëndësishme për ne, atë që përcakton se kush jemi. Dhe nëse veshja është një kostum tradicional, atëherë kësaj i shtohet e gjithë origjina jonë kulturore – rrënjët tona. Imagjinoni sikur i gjithë Pratteln-i multikulturor të vinte me kostumet e tij të ndryshme – çfarë flakërimi ngjyrash do të kishim!

Dhe kjo është pikërisht ajo që synon projekti ynë “Tracht lacht – Brauchtum verbindet” (Kostumi buzëqesh – zakonet bashkojnë). Synimi pra është që të festohet ky diversitet, “thotë Andrea Sulzer, Shef i Arsimit / Kohës së Lirë / Kulturës në Pratteln dhe menaxher i projektit të “Tracht lacht – Brauchtum verbindet”.

Për të mbështetur projektin, Sulzer ka sjellë ambasadorë/et që kanë lidhje të veçantë me temën e veshjeve tradicionale. Në mesin e tyre është edhe Shqipe Sylejmani, autore e romanit integrues “Burde & Segen” (Barrë dhe bekim), e cila do të prezantojë një nga kostumet kosovare.

“Jeta me dy zemra në një gjoks është më e lehtë kur të mundësohet të bashkosh këto dy botë”, shpjegon banorja e Pratteln-it, transmeton albinfo.ch. Ajo, për paradën e madhe të gushtit 2022, do të veshë kostume të ndryshme tradicionale nga Kosova dhe Medvegja  dhe shpreson se do t`i bashkohen edhe shumë shqiptarë të tjerë.

“Për herë të parë në historinë e Zvicrës, traditat tona, si kostumet tradicionale, zënë vend në një event të tillë. Prandaj do të ishte mirë që në paradë të kishim kostume tradicionale nga të gjitha trevat shqiptare. Pra, ejani!”, thotë ambasadorja e lindur në Prishtinë.

Gjallërimi i kostumeve tradicionale dhe festimi i rrënjëve kulturore është ajo që e bën kaq të veçantë projektin “Tracht lacht – Brauchtum verbindet”, transmeton albinfo.ch. Andrea Sulzer ndihet entuziast për projektin: “Përurimi ynë më 6 nëntor 2021 ishte njëherësh përurim i hapjes së studios së qepjes – prandaj sillni kostumet dhe veshjet tuaja tradicionale!” Veshjet dhe kostumet tradicionale, të cilat do të bëhen në studion e qepjes dhe tregimit të “Tracht lacht” deri në verën e vitit 2022, do të shfaqen në paradën e Festivalit Zviceran të Mundjes dhe Alpeve ESAF 2022./albinfo.ch/ KultPlus.com

Promovohet në Nju Jork libri ‘Burden and Blessing’ i Shqipe Sylejmanit

Posted on by Kult Plus

Në ambientet e Konsullatës së Përgjithshme të Republikës së Kosovës në Nju-Jork u promovua libri “Burden and Blessing” i autores Shqipe Sylejmani.

Ambasadori Isufaj përgëzoi znj. Sylejmani për talentin e saj në të shkruar. Librin e saj të parë e cilësoi si një dëshmi të rrugëtimeve shumëvjeçare të diasporës shqiptare nëpër botë, për të cilin rrugëtim secili ka një tregim për të thënë.

Znj. Sylejmani, në prani të audiencës-dashamirëve të librit, lexoi disa copëza tregimi të përzgjedhura enkas për Diasporën Shqiptare në Nju-Jork. Anekdotat, tregimet e mitet e interpretuara qenë dëshmia më e mirë e zbulimit të gjurmëve jetësore të personazheve nga Kosova, Shqipëria, Mali i Zi e Maqedonia, të cilat gjithmonë mall e barrë i patën të afërmit dhe vendet e tyre kulturore e historike./KultPlus.com

Promovohet libri i autores shqiptare në Kolegjin e Harvardit në Amerikë

Posted on by Kult Plus

Libri ‘Barrë dhe Bekim’ i autores shqiptare me bazë në Zvicër, Shqipe Sylejmani, u promovua për herë të parë në SHBA në Kolegjin e Harvardit pranë komunitetit shqiptaro-amerikan.

Në një ngjarje dy-orëshe, autorja filloi promovimin e librit të saj para komunitetit prezent me lexime të shkëputura nga novela ‘Barrë dhe Bekim’, të cilat u shoqëruan me pika muzikore shqiptare nën interpretimin e jashtazkonshëm të këngëtares Arjeta Zuta. 

“Këtë promovim libri ia kushtoj gjyshit tim, i cili ndrroi jetë vetëm një ditë më parë, mirëpo që inspiroi këtë vepër dhe vazhdon të jetojë mes rreshtash të këtij libri dhe në mendjet e lexuesve,” u shpreh zj. Sylejmani teksa filloi ngjarja prmovuese.

Shqipe Sylejmani lindi në 1988 në Prishtinë, Kosovë, mirëpo jeton në Zvicër prej moshës 4 vjeçare. Studioi gazetarinë dhe komunikimin në Cyrih ku më pas punoi si gazetare në Zvicër dhe Nju Jork. Që prej 2018-ës, është përfshirë në promovime kulturore si dhe është presidente e asociacionit “Kulturwerkstatt: Techno”. Në librin e saj të parë, novelën ‘Barrë dhe Bekim’, ajo shiqon mbrapa në përvojën e saj të migrimit dhe udhëtimet në vendin amë. 

“Eventi ishte tejet mbresëlënës. Mendoj që studentet dhe të ftuarit përfituan nga eventi dhe eksperiencat që Shqipja ndau me ne. Promovimi i librit ishte po aq unik sa dhe libri.” tha Gred Braho, Kryetar i Asociasionit të Studentëve Shqiptar në Harvard.

Ngjarja u mbështet nga Shoqata e Studentëve Shqiptarë të Kolegjit Harvard, e cila ka për qëllim të bashkojë studentët me origjinë shqiptare dhe studentët e interesuar për kulturën shqiptare, historinë dhe çështjet bashkëkohore. 

Në një bashkëbisedim përcjellës, pjesëmarrësit ndanë mendimet dhe pikëpamjet e tyre mbi çështjet dhe vlerat shqiptare, sfidat e identiteteve paralele, si dhe identifikimin kombëtar. 

Ndër tjera, Sokol Lushllari nga organizata MAAS BESA tha se është e rëndësishme për të që të ruaj kulturën dhe traditën shqiptare, dhe se duke qenë prezent në ngjarjen promovuese të librit ai dhe të tjerët po ndihmojnë të ruajnë dhe promovojnë atë.  / KultPlus.com

Shqipe Sylejmani e boton edhe në gjuhën shqipe romanin e saj ‘Barrë & Bekim’

Posted on by Kult Plus

Shkrimtarja shqiptare, e cila jeton dhe vepron në Zvicër, Shqipe Sylejmani, ka botuar në gjuhën shqipe romanin ‘Barrë & Bekim’, përcjell KultPlus.

Romani i cili fillimisht u publikua në gjuhën gjermane, tani vjen për publikun shqiptar edhe në gjuhën shqipe, e këtë e ka bërë të ditur vetë autorja përmes një postimi në rrjete sociale.

KultPlus ua sjell postimin e plotë të saj:

Të dashur miq

Që kur kam shkruar rreshtat e parë të këtij libri, kam ëndërruar ta tregoj atë në të gjithë botën.

Viti i fundit më ka kërkuar pothuajse gjithçka dhe më ka çuar në kufijtë e mi aq shpesh – kjo është pjesë e ëndërrimit dhe realizimit. Fakti që kam ardhur deri këtu është për shkak të shumë njerëzve përreth meje dhe përndryshe nuk do të ishte kurrë e mundur.

Prandaj, plot përulësi dhe mirënjohje, ju paraqes:

„Barrë & Bekim”.

Romani më në fund shfaqet në gjuhën që më është vënë në rrugën time: shqipen. Dhe në gjuhën me të cilën shpresojmë se do të ndikojë në të gjithë botën: anglisht.

Është lumturia ime më e madhe të ndaj jetën e Shotes dhe historinë e saj me ju – tani mund ta porosisni online kudo në botë dhe e gjeni ne tregun të Kosovës me Shtëpien Botuese ALBAS. Faleminderit për bashkpunimin në ketë edhe @librarialbas_prishtine @thinkbagency dhe sidomos @janinemehmeti & @tringeramadani .

PS: Kopertina ka një kuptim të veçantë për mua: batanija e qëndisur me dorë vjen nga nëna ime. Pra, ka më shumë nga rrënjët e mia, familja ime dhe unë në këto histori në këto vepra. Faleminderit për të gjitha pohimet, dashurinë dhe mbështetjen tuaj.

Është koha për të lëshuar Shote në botë.

Me dashuri, Shqipe./KultPlus.com

Shkrimtarja Shqipe Sylejmani promovoi librin “Bürde & Segen“ në Cyrih

Posted on by KultPlus

Është bërë e ditur se shkrimtarja shqiptare, e cila jeton dhe vepron në Zvicër, Shqipe Sylejmani, ka promovuar mbrëmë botimin e librit të saj më të fundit në gjuhën gjermane “Bürde & Segen“ (Barrë&Bekim), shkruan albinfo.ch.

Shqipe Sylejmani ka lindur në Prishtinë, Kosovë, në vitin 1988 dhe jeton në Zvicër që kur ishte katër vjeçe. Ajo studioi gazetari dhe komunikim në Cyrih dhe punoi ndër të tjera si gazetare në Zvicër dhe New York. Që nga viti 2018 ajo është përfshirë në fushën e financimit kulturor dhe është presidente e shoqatës “Kulturwerkstatt: Techno”.

Libri i saj u promovua mbrëmë, më 22.10.2020, në Cyrih të Zvicrës, ku të pranishëm ishin një numër i madh i libërdashësve. Përveç kësaj, promovimi u shoqërua edhe me muzikë popullore e folklorike.

Shkrimtarja Shqipe Sylejmani mbajti edhe një fjalim në lidhje me librin e saj “Bürde & Segen“, duke pasqyruar disa pjesë të librit para audiencës së pranishme, shkruan tutje albinfo.ch.

Në librin “Bürde & Segen“ trajtohen tema interesante, ndërthurje historie, me të cilën autorja me mjeshtërinë e saj letrare rrëfen përvojën e saj të migrimit dhe udhëtimet në vendlindjen e saj.

Romani rrëfen historin e vajzës që jeton në Zvicër dhe ka gjithçka që të afërmit e saj në Kosovë mund të dëshirojnë: lirinë, mundësitë dhe ambiciet. Megjithatë, edhe në fëmijërinë e saj, ajo ndjeu se gjithnjë i ka humbur diçka. Kur gjyshja i vdes dhe e lë me një fletore me destinacione udhëtimi në Shqipëri, Kosovë, Mal të Zi dhe Maqedoninë e Veriut, e reja vendos të udhëtojë në këto vende vetëm për të gjetur qartësi në lidhje me jetën e saj. Në udhëtimin e saj ajo jo vetëm zbulon anekdota të vjetra, histori dhe mite, por gjithashtu gjen miq të rinj, dashuri dhe veten, shkruan albinfo.ch./ KultPlus.com