Etiketë: Shqiperi

Muzeu Kombëtar “Marubi”, atraksioni më tërheqës për të huajt

Posted on by KultPlus

Me fillimin e sezonit të verës, turizmi lëviz me hapa shumë më të shpejtë. Kështu, në Shkodër shumë turist nga anë e kënd botës kanë ardhur për të vizituar qytetin dhe për t’u njohur me historinë e tij. Vitet e fundit, forma më e pëlqyer e kësaj njohjeje është nëpërmjet fotografisë.

Muzeu kombëtar i fotografisë “Marubi”, i vendosur në qendër të Shkodrës aty ku dikur ishte Banka, është kthyer në atraksionin kryesor për turistët e huaj dhe vendas. Nëpërmjet fotografive, ata shohin se Shqipëria nuk ishte vërtetë aq e prapambetur sa thuhet dhe se në të ekzistonte një kulturë e dëshmuar prej asaj fotografike.

Në ndarje të ndryshme të muzeut ka vajtime çka tregon një kulturë gjamash me baza pagane; ka dasma çka tregon një kulturë dashmash; ka pagëzime, meshë dhe falje të namazit.

Martesë, fotografi nga Gegë Marubi. Mungojnë të dhënat për këtë foto.

Funerali i Ferit Frashërit

Gjithashtu ka edhe familje të fisshme, fisshmëria dhe aristokracia e të cilëve shfaqet në gjithë aparencësn, duke nisur me veshjen, mënyrën e rregullimit të flokëve apo të kapeles e duke përfunduar me mënyrën se si i qëndrojnë, plot elegancë.

Lin Luka me grua, ditën e dasmës… Sikruse shihet, burri është në këmbë, ndërsa gruaja, ulur. Diçka e rrallë për kohën…

Edhe fotografitë e objekteve të dikurshme dëshmojnë për një arkitekturë unike të qytetit të Shkodrës, me ndikime të forta nga ajo italiane dhe austro – hungareze.

Katedralja e Shën Shtjefnit “në profil”.

Marubët qenë ato që ndoqën çdo ngjarje historike, prandaj fotografitë e tyre tregojnë pavarësinë, monarkinë, ardhjen e nazizmit, fashizmit, komunizmit dhe manifestimet e tyre.

Festime me rastin e Shpalljes së Pavarësisë, Shkodër.

Leximi i dekretit të shpalljes së Monarkisë në ballkonin e prefekturës së Shkodrës.

Dhe të huajt, në këtë muze, me anë të fotove që mbushin muret e tij njihen shumë mirë me gjithçka duan të dinë e të njohin për Shkodrën dhe Shqipërinë./KultPlus.com

200 mijë turistë pushojnë çdo ditë në plazhet shqiptare, të gjithë ankohen për një gjë

Posted on by Kult Plus

Policia e Shtetit thotë se nga monitorimi gjatë fundjavës i gjithë vijës bregdetare nga Velipoja në Sarandë, niveli i parametrave të sigurisë paraqitet në nivele të kënaqshme.

“Në një ditë plazhet shqiptare frekuentohen nga më shumë se 200 mijë turistë, dhe lëvizin në ditë 50 mijë automjete ose në një raport javor na rezulton se plazhet janë frekuentuar nga 1.4 milion turistë , shqiptarë dhe të huaj”, shprehet Albert Dervishaj.

Drejtori i rendit, zbulon për Top Channel edhe një nga ankesat e turistëve.

“Ne marrim shumë telefonata nga turistë shqiptarë dhe të huaj në numrin 112. Kryesisht shumica e ankesave lidhen me nivelin e zhurmave”, thotë Dervishaj.

Por krahas mos respektimit të orareve që lejohen për muzikën, ka edhe lokale natë që nuk garantojnë siguri për klientët, si në rastin e Dhërmiut.

“Ne nuk kemi mundësi të vendosim në çdo lokal apo biznes polic roje tek dera. Për këtë i kemi kërkuar këtyre bizneseve të marrin masat e nevojshme dhe ata e kanë mirëpritur”, thotë drejtori i rendit.

Duke parë vitin e kaluar fluksin e shtetasve Italian që zgjodhën Shqipërinë për të pushuar, këtë vit 6 efektivë të policisë italiane do patrullojnë në zonat bregdetare së bashku me kolegët shqiptarë./ KultPlus.com

Si qajnë burrat, ja riti shekullor (VIDEO)

Posted on by Kult Plus

Gjatë një ditë festimesh, organizuar në fshatin Pult të Dukagjinit, rreth 45 kilometër nga qyteti i Shkodrës, banorët organizuan edhe “gjamën e burrave”, një rrit ky tradicional, me të cilin nderoheshin të vdekurit në fshatrat e besimit katolik si në Dukagjin, Nikaj-Mërtur, Pult, Shalë, Shosh, Nën-Mavriq, etj. “Gjama e burrave ” shprehte keqardhjen dhe nderimin e vëllazërisë, shoqërisë, e miqësisë për të vdekurin.

Në një ceremoni vdekje numri i gjamave varionte sipas statusit të personit apo rrethanave tragjike të vdekjes, por nuk mund të kishte më pak se 2 gjama për çdo mashkull të vdekur.

“Gjama e burrave” në fjalorin e shqipes shpjegohet nën termin “gjëmë”, term i cili sot ka marrë kuptim disi më të gjerë, por në themel do të thotë pikërisht “vajtim burrash”.

“Gjama e burrave” është një ritual i trashëguar nga besimet pagane. Gjatë periudhës së komunizmit, gjama e burrave ishte e ndaluar, ndërsa vitet e fundit ajo është shfaqur në disa vdekje të veçanta si dhe ne raste ceremoniale, si pasqyrim i traditës së banorëve të fshatrave të Dukagjinit./ VOA

Reagon hoteli në Shqipëri që i tha kosovarit “racë derri, pak ua ka bërë Serbia”

Posted on by Kult Plus

Hoteli në Durrës, stafi i të cilit i kishte ofenduar rëndë një turist kosovar duke i thënë se “kosovarët janë racë derri dhe mirë ua ka bërë Serbia”, ka kërkuar falje publike.

Faqja në Facebook e Hotelit “Ylli i detit”, ka kërkuar falje publike për ofendimin e bërë qytetarëve kosovarë, duke thënë se personi i papërgjegjshëm që e ka bërë atë shkrim ka marrë dënimin e merituar.

“Kërkjomë ndjesë publike për shqetësimin dhe keqkuptimin që i është bërë klientit tonë nga njerëz te papërgjegjshëm të cilët morën ndërshkimin e merituar. Me Rrespekt Ylli DETIT”, thuhet në shkrimin e faqës së tyre në Facebook.

Leutrim B. nga Kosova kishte publikuar dëshmi nga komunikimi që ai ka pasur me stafin e hotelit nga Durrësi, përmes platformës komunikuese Messenger. Në bashkëbisedimin mes tyre bie në sy sjellja vulgare e stafit të hotelit nga Durrësi ndaj qytetarit nga Prishtina.

“Pas një dëshire me kalu vikendin në Shqipëri me familje me ju bashkangjitë shokëve të tjerë që ishin atje, deshta me rezervu një Hotel prej Prishtinës, që mos me u bo telash me gjetë dhomë kur shkoj atje pasi kam qenë edhe me fëmijë të vegjël. E pyes Hotel ‘Ylli i Detit’ , siç shihet edhe në foto, dhe më thotë se ne nuk bëjmë rezervime nga telefoni sepse duhet një kapare. E mirëkuptoj. E rezervoj diku tjetër ku nuk duhet kapare për një rezervim”, shkruan Leutrim B..

“Jeni racë derri, pak jua ka bërë Serbia”, reagimi ndaj një kosovari në Shqipëri

Posted on by Kult Plus

Një rast aspak i këndshëm i ka ndodhur një shtetasi të Kosovës përderisa kishte vendosur ta kalonte fundjavën në bregdetin e Shqipërisë.

Fillimisht, personi në fjalë kishte vendosur që të rezervonte një dhomë në një nga hotelet e Shqipërisë, mirëpo me të pyetur për dhoma të lira, atij i ishte kërkuar paradhënie nga hoteli ku ai po kërkonte të kalonte pushimet, shkruan Lajmi.net.

Në pamundësi për një gjë të tillë, pushuesi nga Kosova kishte refuzuar këtë kërkesë dhe kishte filluar të kërkonte për alternativa të tjera të hoteleve.

Disa ditë pasi që ky person kishte gjetur akomodim në një tjetër hotel ku nuk ishte i detyruar të paguante paradhënie, atij i shkruajnë përsëri nga hoteli ku ai fillimisht kishte kërkuar për dhoma të lira.

“Zotëri do vini? Keni bërë rezervim tek ne? Nëse jo na thoni?”, ishte pyetur ky pushues nga hoteli në fjalë.

E menjëherë pasi kosovari ishte përgjigjur se ka gjetur akomodim në një hotel tjetër, kishin filluar të sharat dhe ofendimet nga personat të cilët nuk dihet a janë pronarë apo nga personeli i këtij hoteli.

“Ju kosovaret jeni rrace derri, pak ua ka bërë Serbi”, ishin disa nga të sharat dhe ofendimet që ky pushues kishte marrë nga personeli i këtij hoteli.

Këtë shqetësim ky turist nga Kosova e ka shpërndarë me miqtë e tij në rrjetin social, Facebook.

E ky nuk është rasti i vetëm kur pushues nga Kosova kanë problem të tilla me akomodimet nëpër hotelet dhe vendet e tjera në Shqipëri.

Edhe gjatë sezoneve të tjera verore pushues nga Kosova dhe nga vendet tjera janë ankuar se ka shumë parregullsi në ofertat që fillimisht ofrojnë këto hotele në Shqipëri, të cilat as për afër nuk i ofrojnë kushtet për të cilat pushuesit paguajnë.

Ankesa ka pasur vazhdimisht edhe për fryerjen e faturave nga bizneset në Shqipëri për pushuesit kosovarë gjatë sezonës së verës.

100 fshatrat, destinacione të mirëfillta turistike

Posted on by Kult Plus

“Në këtë vend nuk mungon dija, por jo pasuria”, kjo është arsyeja për të cilën kryeministri Edi Rama kërkoi ndihmën e botës universitare për të krijuar Akademinë e Fshatrave. Ajo është fryt i një marrëveshjeje me Universitetin për projektin e 100 fshatrave, me qëllimin për t’i shndërruar ata në destinacione të mirëfillta turistike.

“Ne këto 100 fshatra do i kthejmë në destinacione të mirëfillta turistike për t’i dhënë hov një zhvillimi ekonomik dhe social, aty ku deri sot kjo duket e pamundur dhe për të nxjerrë në pah potencialet e mëdha për një qasje të ndryshme ndaj të nesërmes, kudo ku ka mundësi për të zhvilluar një bujqësi apo blegtori intensive janë tërësisht të kufizuar.”

Agroturizmi, thotë kryeministri, do ta kthejë vëmendjen nga fshati dhe do të jetë mekanizmi i daljes nga varfëria.

“Ne besojmë shumë që turizmi dhe në rastin konkret agroturizmi si një mekanizëm i tërheqjes drejt fshatit, falë bukurive të jashtëzakonshme natyrore, vlerave të trashëgimisë kulturore, historisë dhe historive për tu treguar është një instrument efikas dhe i papërdorur deri më sot për daljen nga varfëria.”

Qeveria synon që të tërheqë edhe vëmendjen e emigranteve drejt vendit, për të pasur prej tyre histori të suksesshme të investimeve në fshat./ Tv Klan

Arkitekti i Teatrit të ri Kombëtar projekton komisariatin modern në Nju Jork

Posted on by KultPlus

Arkitektit të njohur danez, Bjarke Ingels, i cili është edhe autor i projektit të Teatrit të ri Kombëtar, i është besuar projektimi i komisariatit të ri të policisë në Bronks të Nju Jorkut, i cili ka nisur të ndërtohet.

Lajmin e ka dhënë revista “Contract Magazine”, e cila gjithashtu thekson se e dizenjuar nga arkitekti i njohur me famë botërore, Bjarke Ingels dhe Studio BIG, komisariati i ri në Bronks do të jetë një strukturë e madhe moderne, që do të përfundojë në pranverën e vitit 2021.

Kryebashkiaku Veliaj ka postuar lajmin në Twitter, duke hequr një vijë paralele mes asaj që ndodh në SHBA dhe debatit në Shqipëri për ndërtimin e Teatrit të ri Kombëtar, dy projekte të realizuara nga i njëjti arkitekt me famë botërore.

“Habi e madhe si nuk u çua me rrokopujë e gjithë Policia e NYC të mos lejonte ndërtimin e komisariatit të ri, siç sillen disa me Teatrin e Ri”, shkruan Veliaj në Twitter.

Bjarke Ingels është autor i shumë projekteve të mëdha në gjithë botën, përfshirë edhe një nga kullat binjake në Nju Jork. /KultPlus.com

Banesa e Musine Kokalarit e rrënuar, premtimet për restaurim nuk janë mbajtur

Posted on by KultPlus

Katër vite pas djegies dhe shkatërrimit të plotë të banesës karakteristike të shkrimtares dhe disidentes Musine Kokalari, pas një zjarri të papritur që shkatërroi gjithçka, banesa trekatëshe në lagjen “Palorto” në qytetin e Gjirokastrës është lënë krejtësisht në harresë.

Të vetmit që po kujdesen për rrënojat e mbetura të banesës 120-vjeçare, të shpallur Monument Kulture i Kategorisë së Parë, janë trashëgimtarët e shkrimtares.

Arieta Kokalari, pasardhëse e kësaj familjeje dhe ideatore e muzeut “Kokalari”, pohon se pavarësisht premtimeve të dhëna për restaurimin e banesës, nuk ka pasur asnjë interesim nga institucionet përgjegjëse.

Keqardhja e saj është dëmtimi i qëllimshëm që po i bëhet banesës. Sot shtëpia i ka të dyja hyrjet të izoluara e të bllokuara nga gurët e hedhur nga brenda banesës prej fqinjëve. Kjo e bën të pamundur hyrjen në të. Zjarri i papritur i katër viteve më parë zhduku sende të rralla të hershme të banesës si dhe shkatërroi tavanet origjinale të ndërtuara në fillim të shekullit të kaluar. Ajo çka ka mbetur janë vetëm muret anësorë e qendrorë të banesës dhe premtimet e pambajtura për restaurimin dhe ringritjen e muzeut të disidentes Musine Kokalari.

Në shkurt të 2017-ës, ministrja e Kulturës Mirela Kumbaro në 100-vjetorin e lindjes se Musines Kokalarit, deklaroi se është bërë projekti për restaurimin e banesës nga Instituti i Monumenteve të Kulturës, por ndonëse ka kaluar një vit e gjysmë asgjë nuk është bërë. (BalkanWeb) / KultPlis.com

Numri i vizitorëve në Kalanë e Rozafës gjithnjë në rritje

Posted on by KultPlus

Monumentet e kulturës si vende atraksion dhe historike po presin çdo ditë e më shumë vizitorë vendas dhe të huaj. Fillimi i sezonit të ri turistik duket premtues pasi këto vende janë ”magnet” për turistët e huaj sepse kanë brenda tyre histori, kulturë dhe detaje mistike që ngjall jo pak kuriozitet tek vizitorët.

E lashta kalaja e Rozafës, në Shkodër vizitohet çdo ditë e më tepër nga të gjitha moshat, vend atraktiv ku historia, arkitektura, peizazhi fantastik ndërthuren në mënyrë të përkryer. Numri i vizitorëve është gjithnjë në rritje në këtë atraksion turistik i cili përveç bukurive mban dhe misterin e historisë së Rozafës.

Kalaja e Shkodrës në periudhën janar-qershor 2018 në total ka tërhequr 43690 vizitorë, nga të cilët 6623 është numri i atyre që kanë përfituar hyrje falas gjatë festave zyrtare, ditëve të shënuara të Trashëgimisë dhe të dielave të fundit të çdo muaji.

Kalaja e Rozafës ngrihet mbi një kodër shkëmbore në perëndim të qytetit, e rrethuar nga ujërat e tre lumenjve: Drinit, Bunës dhe Kirit. Kështjella Rozafa është monumenti historik më antik, shkruan atsh.

Në muret rrethuese të kalasë, të cilat përfshijnë rreth 9 ha tokë, dallohen qartë ndërtimet e katër periudhave: Balshajve (shek. XIV), zotërimi venecian (shek. XV), pushtimi osman (shek. XVI-XVII), dhe e Bushatlinjve (shek. XVIII-XIX).

E ndërtuar gjatë mbretërisë Ilire, përfaqësohet nga një legjendë që tregon mbajtjen e një premtimi, të Besës legjendare.

Objekte të tjera me vlera të mëdha kulturore e që tregojnë shumë për historitë e kaluara të popullit tonë janë ,cisternat e ujit të shek XV, katedralja e shek XIII, e cila pas pushtimit osman u kthye në xhami. Po kështu aty ndodhet edhe muzeu i Rozafës, i cili shpjegon periudhat e ndryshme të kalasë./KultPlus.com

BBC: Bunk’Art, vendi më i fshehtë në Europë

Posted on by KultPlus

Shqipëria komuniste ishte kombi më i izoluar i Europës. Duke iu trembur një pushtimi, regjimi ndërtoi një bunker bërthamor të fshehtë. Sot ky bunker është një atraksion turistik.

Ai ishte i fshehur nga rruga. Një tunel i gjatë, i hapur përmes një kodre përballë, ishte e vetmja mënyrë për të hyrë. Ky nuk ishte një vend ku mund të shëtisje, ishte hyrja e një baze ushtarake.

Tuneli, i gjatë sa dyfishi i një fushe futbolli, është më i ftohtë se sa mjedisi përjashtë. Aty-këtu gjenden pellgje uji. Një kumbim harmonioz bëhet gjithnjë e më i fuqishëm ndërkohë që i afrohesh qendrës së tunelit. Pas, roja që qëndron në hyrje të tunelit duket sa një ushtar prej lodre.

Gjithsej, duhet të ecësh 198 metra për të arritur në një parking të panjohur që ndodhet në fund. Një godinë institucionale ngjyrë gri shfaqet përballë. Ky është “Bunk’Art 1” dhe një ecje prej pak minutash në rrugën që ndodhet pas të dërgon në një prej vendeve më të fshehta të Luftës së Ftohtë.

“Ky është vendi më i mirë për të qëndruar në Tiranë gjatë ditëve të verës kur termometri arrin 40 gradë Celsius”, thotë Artemisa Muço.

Muço punon si guidë në “Bunk’Art 1”. Vajza 24-vjeçare e diplomuar në histori kalon ditët e saj në një vend aq të fshehtë sa që njihej vetëm si “Godina 0774”, një emërtim i ftohtë për një strukturë që ishte ndërtuar për t’i mbijetuar fundit të botës, shkruan atsh.

Enver Hoxha ishte udhëheqësi i Shqipërisë për katër dekada. Nga përfundimi i Luftës së Dytë Botërore deri në mes të viteve 1980, ai udhëhoqi vendin sipas modelit stalinist të vetë-mjaftueshmërisë i ideuar për të kthyer Shqipërinë në një vend modern dhe të pavarur. Ishte një rrugë unike, zbatimi i tij plot zell i marksizëm-leninizmit lejonte shumë pak devijime. Shqipëria prishi marrëdhëniet me Jugosllavinë në vitin 1948, me Bashkimin Sovjetik në vitin 1961 dhe Kinën në vitin 1979, për shkak të braktisjes së detyrës socialiste nga këto vende.

Bashkë me këtë zell stalinist erdhi edhe paranoja. Hoxha, një ish partizan që kishte luftuar gjermanët në Luftën e Dytë Botërore, besonte se armiqtë nga Lindja dhe Perëndimi planifikonin të pushtonin këtë vend të vogël dhe malor. Ai urdhëroi zhvillimin e një programi gjigant të ndërtimit të bunkerëve, i cili do t’u mundësonte qytetarëve shqiptarë të luftonin një luftë guerrile nëpërmjet një rrjeti të gjerë bunkerësh. Dhe ndërkohë që zhvilloheshin luftimet, Hoxha, bashkë me pjesën tjetër të elitës drejtuese do të koordinonin rezistencën nga ky bunker.

“Godina 0774” është rezultati i paranojës unike të Hoxhës. E ndërtuar mes viteve 1972 dhe 1978, ajo ka më shumë se 300 dhoma të shpërndara në shtatë nivele nëntokësore, ku pjesa më e madhe ndodhet thellë brenda ultësirës së Malit të Dajtit. Është një kujtim klaustrofobik dhe pa dritare nga Lufta e Ftohtë në një prej cepave më të mbyllur.

Sikur perëndimi apo lindja të pushtonte, “Godina 0774” do të kishte qenë një vend aktiv. E gjithë mbrojtja e vendit do të organizohej nga këtu. Godina do të priste brenda deri në 300 persona, përfshirë edhe stafin e Shtabit të Përgjithshëm të vendit.

“Kishte mjaftueshëm ushqim, uji dhe karburant që të qëndronin të mbyllur për një vit”, thotë Muço.

Bunkeri u ndërtua nën një fshehtësi të plotë. Në një mur ndodhet një imazh i Hoxhës që e viziton ditën e inaugurimit, ku do të kalojë një prej pak netëve që i kishin mbetur para se të vdiste në vitin 1985. Pavarësisht kësaj, ai kishte apartamentin e tij, të kompletuar me një krevat luksoz, një zyrë sekretarie dhe një banjë të pajisur me një dush që funksiononte me motor me naftë. Dhomat private janë dekoruar me një material që ngjan si dru i zi.

“Është kompesatë. Ndërsa pjesa tjetër e dhomave, si ajo e kryeministrit, janë dekoruar me dru. Kjo është e vetmja dhomë që është punuar kështu”, thotë Muço.
Shqipëria kaloi nga qeverisja me një parti në zgjedhje parlamentare në vitin 1991, por pjesa tjetër e dekadave u shënuan nga kaosi. Në vitin 1997, qeveria e vendit ra pas dështimit të skemës së firmave piramidale, që goditën pjesën më të madhe të pasurisë së vendit. Rreth 2 000 persona u vranë dhe shumë baza ushtarake u bastisën për shkak të kaosit. “Godina 0774” ishte një prej tyre.

Kompleksi i bunkerëve u përdor për herë të fundit nga ushtria shqiptare për stërvitje në vitin 1999 dhe më pas u la pasdore. Vetëm në vitin 2014 u rihap falë përpjekjeve të gazetarit italian Carlo Bollino, i cili kërkonte të rikthente në dritë këtë relike të historisë së Shqipërisë së izoluar.
“Vendosa të hap Bunk’Art 1 në vitin 2014, kur ministria e kulturës nxori një njoftim për ide për të festuar 70-vjetorin e pavarësisë së Shqipërisë”, thotë ai për “BBC Future”.

“Deri në atë kohë ende nuk kishte një vend ku një turist madje as edhe një shqiptar të mund të mësonte për sekretet e periudhës komuniste”, vazhdon Bollino.
Ai thotë se “pati një ndjenjë të fuqishme gjatë vizitës së parë. Ndjeva emocionin për të eksploruar një vend të errët, misterioz që përcjell një ndjenjë të historisë”.

Kur godina u hap në vitin 2014 për një muaji, shkaktoi një tronditje, rreth 70 000 shqiptarë e vizituan.

“Shqiptarët mësuan se këtu ndodhet ky bunker për të cilin nuk dinin asgjë prej kaq shumë vitesh. Sikurse mund të vihet re ka shtëpi këtu rrotull. Madje edhe banorët e zonës kur erdhën këtu u habitën. Ishte shumë mahnitëse për ata që të shihnin se brenda në mal ndodhej një godinë e tillë”, thotë Muço.

Bollino nuk u përpoq që të ndërtojë vetëm një muze që ruan strehën e regjimit sikur të ishte një kapsulë kohe, por për të shtuar diçka më shumë. Shumë prej dhomave janë kthyer në mjedise arti, secila prej tyre paraqet një aspekt të ndryshëm të së kaluarës komuniste, ose të bëjë godinën të oshëtijë.
Dhomat e rinovuara në kompleksin si labirinth janë mbushur me produkte dhe pajisje që i rezistojnë kohës. Ekipi tani ka mbaruar se rinovuari më shumë se 100 prej dhomave të bunkerit. Pjesa më e madhe e kompleksit ka mbetur e parinovuar, ose thjeshtë janë jashtë afateve. Një bazë funksionale e ushtrisë ndodhet aty pranë dhe zyrtarisht kjo godinë mbetet pjesë e Ministrisë së Mbrojtjes.

Bollino e pranon se “kjo është një sfidë e madhe. Kjo ishte e vështirë nga një këndvështrim logjistik, sepse vendi është shumë i lagësht dhe çdo objekt i ekspozuar brenda pak ditësh përfshihet nga myku”.

“Por vështirësia më e madhe ishte kulturore. Mbledhja e dokumenteve dhe objekteve nga e kaluara komuniste ishte e mundimshme, por edhe më e vështirë ishte përpjekja për të tejkaluar paragjykimin mbi një vend në të cilin dëshiroja të tregoja një periudhë të tmerrshme të historisë së këtij populli. U mundova shumë që ta bëja këtë të qartë se të kujtosh faktet e periudhës komuniste nuk do të thotë të kesh nostalgji për komunizmin”, thekson ai.

Ka prekje surreale. Ato që duken si kosha për letra të dekoruara me yje të kuq në fakt janë pastrues të ajrit, që lëshojnë oksigjen për të pastruar ajrin nga dioksidi i karbonit që krijohet brenda. Maskat e gazit të tipit sovjetik, lloji i maskave që u furnizua Shqipëria kur ishte miqësore me Moskën, që aredojnë korridoret, i kujtojnë vizitorëve ankthin në rritje që të sillte ky vend që mendohej të bëhej shtëpia e përkohshme e 300 personave.
Kompleksi është i kufizuar, por jo i vogël. Në zemër të tij ndodhet një sallë kuvendesh e madhe mjaftueshëm për të mbajtur 100 persona. Nga këtu, Hoxha dhe elita e regjimit do të lexonin fjalime për ata që ndodheshin të mbyllur brenda kësaj strehe rezistente ndaj sulmeve atomike. Tani është shndërruar në një teatër dhe vend koncertesh, kur hyn brenda ka një bar të vogël, ku luhen koncerte xhazi dhe roku. Këtu ka një ironi poetike, sepse të dyja janë zhanre muzikore që ishin ndaluar gjatë regjimit të Hoxhës.

Koncerte të tjera planifikohen të zhvillohen në këtë godinë, që shumë shpejtë është duke u shndërruar në një prej atraksioneve më turistike në Shqipëri. Bollino thotë se ka edhe plane të tjera.

“Porjekti im i radhës ka të bëjë me një nga koridorët jugorë të Bunk’Art 1, në të cilin dua të krijoj një ekzebicion fotografik me skena nga jeta e përditshme, gjithnjë duke iu referuar periudhës komuniste. Kjo do të jetë një mundësi për të prezantuar vizitorët me një pjesë tjetër të vendit që tani është zhdukur”, thotë Bollino.

“Në shtator do të provojë një lloji teatri përfshirës. Do të rikthej karaktere të së shkuarës në korridoret e Bunk’Art dhe vizitorët mund të takohen dhe ndërveprojnë me ta. Ky është një tjetër hap drejt një projekti edhe më ambicioz që ka të bëjë me instalimin e një bazamenti për realitet virtual”, shprehet gazetari italian.

Ndërkohë, Bunk’Art po bëhet një arsye për të vizituar Tiranën. Senada Murati, pjesë e ekipit që kujdeset për kompleksin, thotë se ka filluar të ketë gjithnjë e më
shumë interes nga vizitorët që vijnë nga Britania e Madhe dhe SHBA-ja madje edhe nga Zelanda e Re.

Muço thotë se Bunk’Art është përpjekur të qëndrojë sa më neutral të jetë e mundur politikisht, po u larguar nga faktet që lidhen me izolimin komunist të Shqipërisë. Gjatë udhëheqjes 40-vjeçare mendohet se janë ekzekutuar rreth 5 500 persona dhe burgosur rreth 25 000 të tjerë. Qytetarët shqiptarë mund të qëlloheshin menjëherë nëse kapeshin duke u përpjekur të kalonin barrierat që izolonin kufijtë e vendit.

“Mendoj se muzeu duhet të jetë shumë i ndjeshëm. Ne prezantojmë këtu dritën dhe errësirën e komunizmit, kështu që njerëzit mund të vendosin”, thotë ajo.
“Disa vizitorë, vazhdojnë të vijnë me fotografinë e Hoxhës në xhep”, tregon Murati.

(Përktheu Gent Sinani)

Nënshkruhet për herë të pestë radhazi Kalendarit Kulturor Kosovë-Shqipëri

Posted on by Kult Plus

Ministri i Kulturës, Rinisë dhe Sportit i Republikës së Kosovës, Kujtim Gashi dhe Ministrja e Kulturës së Republikës së Shqipërisë, Mirela Kumbaro- Furxhi, në ambientet e Lidhjes Shqiptare të Prizrenit, nënshkruan sot Protokollin e Bashkëpunimit për Kalendarin e Përbashkët Kulturor Vjetor, të pestin vit radhazi.

Përmes këtij akti, dy vendet janë pajtuar për përfshirjen e aktiviteteve kulturore në një kalendar të përbashkët, i cili është i bazuar në “Deklaratën e përbashkët për bashkëpunim dhe partneritet strategjik ndërmjet Këshillit të Ministrave të Republikës së Shqipërisë dhe Qeverisë së Kosovës” nënshkruar në Prizren më datë 11 janar 2014.

Kalendari i sivjetmë i përbashkët kulturor do të realizohen aktivitete në fushën e trashëgimisë, që kanë të bëjnë me digjitalizimin e trashëgimisë dhe trajnime e edukim në fushën e restaurimit dhe konservimit; ekspozita në fushën e arkeologjisë dhe të muzeve, në fushën e teatrove do të mbahet festivali mbarëkombëtar i teatrit dhe do të realizohen shfaqje teatrale si në Kosovë ashtu edhe në Shqipëri, në fushën e filmit do të jepen premierat e pesë filmave. Në fushën e artit pamor do të realizohet një ekspozitë e në Shqipëri. Këtë aktivitete do t’i bartin institucionet kombëtare përkatëse të kulturës.

Nënshkrimin e këtij kalendari ministri Kujtim Gashi e ka cilësuar si ditë shumë të rëndësishme për të dy vendet. “Është ditë shumë e veçantë për Kosovën dhe Shqipërinë. Nënshkrimin e kalendarit vjetor kulturor e kemi ideuar në lokacion të veçantë në shtëpinë tonë të përbashkët. Ky akt hap rrugë të reja të bashkëpunimit mes Kosovës dhe Shqipërisë”, ka thënë ministri.

Ministri Gashi ka pohuar se të gjitha institucionet e kulturës dhe trashëgimisë do të kenë aktivitete të përbashkëta edhe në Kosovë edhe në Shqipëri.

“Mendoj që ky është një moment që dy institucionet tona janë në krye të organizimeve pa e prek pjesën e pavarur të institucioneve të kulturës. Besoj që këtë vit është më i veçantë sepse jemi ndalë në aktivitetet specifike”, u shpreh Gashi duke shfaqur edhe vlerësim për punën e ministres Kumbaro në raport me lobimin për anëtarësimin e Kosovës në UNESCO.

Në anën tjetër, Ministrja e Kulturës së Shqipërisë, Mirela Kumbaro-Furxhi, tha se kultura e dëshmon më së miri se nuk ka kufi tjetër mes Kosovës dhe Shqipërisë përveç atyre administrativ.

“Është për mua viti i pestë si Ministre e Kulturës të nënshkruaj këtë kalendar por duke pranuar siç e tha edhe ministri është që është një formalizim i një aktiviteti e një bashkëpunimi që merita në radhë të parë i shkon institucioneve të kulturës”, tha ministrja.

Ajo pati vlerësim për institucionet e kulturës dhe skenën e pavarur kulturore të Kosovës. “Ne kemi njohur të gjithë energjinë që ka skena e pavarur e Kosovës me të cilën duam ta kemi një bashkëpunim por edhe për të mësuar më shumë sepse skena e pavarur ne Tiranë nuk e ka të njëjtën pjekuri. Kufijtë janë administrativë kultura është si lumenjtë. Lumenjtë kur kalojnë vijën e ujin nuk pyesin a ka kufi. Ne duhet te krijojmë të njëjtin mjedis për kulturën”, vlerësoi Kumbaro.

Që të dy ministrat thanë se koncepti i kalendarit të përbashkët është i hapur dhe do të përfshihen të gjitha vendet ku ka shqiptarë.

“Koncepti i kalendarit të përbashkët kulturor është një koncept që është një skenë e hapur me Maqedoninë, me Malin e Zi, padyshim edhe me Greqinë por jo vetëm”, tha në fund ministrja shqiptare. / KultPlus.com

21 milion shtetas të huaj kanë vizituar Shqipërinë nga 2013-2017

Posted on by Kult Plus

Rreth 21 milion shtetas të huaj kanë vizituar Shqipërinë nga viti 2013 deri në vitin 2017, duke shënuar një rritje mesatare prej 12% në vit.

Zëvendësministri i Turizmit, Hajrulla Çeku pjesëmarrës në llogaridhënien publike të qeverisë në Durrës, bëri me dije se shpenzimet e turistëve të huaj janë rritur për vitin 2017 me 8.5% duke kaluar mesatarisht 4.2 netë qëndrimi në vendin tonë.

“Për vitet 2013-2017 afërsisht 21 milionë shtetas të huaj erdhën në Shqipëri, duke shënuar një rritje mesatare prej 12% në vit. Shpenzimet e turistëve të huaj janë rritur me 8.5% për vitin 2017, ku këta vizitorë kanë kaluar mesatarisht 4.2 netë qëndrimi në Shqipëri, duke shpenzuar 63 euro në ditë. Rreth 1.7 miliardë euro ishte kontributi i turizmit në Shqipëri për vitin 2017, mbi 200 milionë euro më shumë se një vit më parë.
Numri i vizitorëve në monumente nga 320 mijë në 2013, arriti 660 mijë në vitin 2017”, – theksoi ai./ KultPlus.com

Rikthehet “The Voice Kids”

Posted on by Kult Plus

“The Voice Kids” rikthehet, duke ftuar sërish të gjithë fëmijët për të qenë pjesë e aventurës më spektakolare në ekran.

Qershori është muaji i audicioneve në të gjitha qytetet kryesore të Shqipërisë, për fëmijët e moshave nga 6 deri në 14 vjeç. Dyert do të rihapen në 8 qershor në audicionin e Tiranës, në orën 11:00, tek Piramida, në Top Channel.

Më datë 11 qershor “The Voice Kids” do të udhëtojë drejt qytetit të Shkodrës, ku do të zhvillohen audicionet pranë Pallatit të Kulturës. Kërkimi i talenteve do të vazhdojë në qytetin e Korçës, më datë 14 qershor, te Teatri i Kukullave, për t’u pasuar me audicionet e qytetit të Vlorës, më datë 17 qershor.

Për herë të parë, “The Voice Kids” do të zhvillojë audicione në qytetin e Kukësit, pranë Pallatit të Kulturës, më datë 19 qershor, për t’u pasuar nga audicionet e Prishtinës një ditë më pas, më datë 20 qershor.

Rrugëtimi vazhdon drejt Durrësit, tek Qendra Kulturore e Fëmijëve më datë 23 qershor. Dhe mundësia e fundit për të qenë pjesë e audicioneve është data 29 qershor, sërish në Tiranë, tek Piramida.

Të gjitha audicionet do të zhvillohen duke filluar prej orës 11:00.

Ëndrra e madhe e skenës së “The Voice Kids” është e hapur për këdo që mendon se duhet të provojë veten në këtë “talent show”. Ju presim të gjithëve në një edicion tjetër të paharrueshëm dhe me emocione të mëdha.

08 Qershor 2018 – Audicioni i Tiranës, Studiot e Top Channel, Piramida, ora 11:00
11 Qershor 2018 – Audicioni i Shkodrës, Pallati i Kulturës, ora 11: 00
14 Qershor 2018 – Audicioni i Korçës, Teatri i Kukullave, ora 11:00
17 Qershor 2018 – Audicioni i Vlorës, Pallati i Kulturës, ora 11:00
19 Qershor 2018 – Audicioni i Kukësit, Pallati i Kulturës, ora 11:00
20 Qershor 2018 – Audicioni i Prishtinës, zyrat e Top Channel, Pallati i Rinisë dhe Sporteve, ora 11:00
23 Qershor 2018 – Audicioni i Durrësit, Qendra Kulturore e Fëmijëve, ora 11:00
29 Qershor 2018 – AudicioniiTiranës, Studiot e Top Channel, Piramida, ora 11:00./ Top Channel

“Emerging Europe”: 48 orë në perlën e bregdetit shqiptar

Posted on by Kult Plus

Media britanike “Emerging Europe” promovon vlerat turistike dhe kulturore të Durrësit, në një artikull mjaft interesant.

Guida e Qytetit të Durrësit: 48 orë në perlën e bregdetit shqiptar
Qyteti i dytë më i madh i Shqipërisë, Durrësi, ka qenë një portë ballkanike për të gjithë botën. Grekët, romakët dhe bizantinët shfrytëzuan të gjithë portin e tij të mrekullueshëm natyror dhe ende vazhdon të mbetet një nga portet më të frekuentuara të Adriatikut.

Përse duhet vizituar tani?
Me amfitetatrin më të madh romak në Ballkan, muret bizantine, frutat e mrekullueshme të detit dhe një jetë argëtuese nate, Durrësi ka një bregdet plot stil dhe elegancë të cilin në pak vende mund ta gjesh. Çmimet gjithashtu mbesin një fraksion i asaj që do t’ju duhej të paguanit në ndonjë vend tjetër.

Si mund të vini në Durrës?
Durrësi ka një distancë të shkurtër nga kryeqyteti i Shqipërisë, Tirana, vetëm një gjysmë ore larg, (kur trafiku nuk është i rënduar). Taksia mund t’ju sjellë nga aeroporti i Tiranës vetëm për 30-40 euro. Nga qendra e Tiranës ka autobusë dhe mini autobusë të cilët nisen çdo 30 minuta dhe kushtojnë pothuajse asgjë. Durrësi është përqendruar në portin e tij: qyteti i vjetër zë gadishullin e vogël në perëndim të portit, plazhi i gjatë ranor është në lindje.

Gjumi
Nëse dëshironi të qëndroni në qytetin e vjetër atëherë zgjedhja jonë është Hotel Nais, mjaft i thjeshtë, por shumë i këndshëm, ku do të gjeni nje shtrat dhe mëngjes të shijshëm dhe një kafene të mrekullueshme buzë rrugës. Nëse dëshironi pak më shumë luks dhe një hotel ku të bëni dhe plazh, Hotel Palace është ai që ju kërkoni.

Dita 1

Grekët dhe romakët
Fillo ditën me Muzeun Arkeologjik (Rruga Taulantia 32), ndoshta muzeu më i mirë në qytet dhe një abetare e vërtetë në historinë shqiptare. Më pas kthehu pranë Amfiteatrit Romak. Në shikim të parë ju mund të mendoni se është lënë pak pas dore; e vërteta është që është ndërtuar gjatë sundimit të Adrianit rreth vitit 100 pas Krishtit, u dëmtua nga tërmeti dy herë dhe më vonë u shkatërrua nga osmanët në shekullin e 16-të. U gërmua në vitin 1966, dhe e rrethuar nga ndërtimet moderne, ajo që ka mbetur është më se e mjaftueshme për të përcjellë një shkallë dikur epike. Një kishë e krishterë, e shtuar në shekullin e 13-të, është e ruajtur mjaft mirë me pamjet e saj të brendshme mahnitëse.

Gjenden dhe disa mbetje arkeologjike të tjera, Forumi Bizantin dhe banjot Romake, të cilat gjenden në veri të sheshit “Liria“, një hapësirë mjaft e këndshme e rrethuar nga ndërtesat moderne, ku pasditeve gjallërohet nga qytetarët që ulen e bisedojnë e fëmijë që luajnë. Nëse do të bëni një shëtitje në kodrën e Durrësit do të shihni një vilë mbretërore të braktisur e njohur si vila e mbretit Zog, i vetmi mbret i Shqipërisë i cili mbretëroi nga viti 1928-1939. Ndërtesa u përdor si një shtëpi mysafirësh për personalitete të huaja gjatë sundimit komunist në Shqipëri, e më pas u rrëmbye në 1997 gjatë futjes së Shqipërisë në anarki kur një numër skemash piramidale u shembën.

Mbrëmjet Veneciane
Bulevardi elegant “Epidamn”, rruga kryesore e qytetit të vjetër, e veshur me palma, kafene, restorante, dyqane dhe bare, të çon deri në port. E ashtuquajtura “Torra Veneciane” pranë detit dhe muri rrethues i saj janë mbetjet më të ruajtura të fortifikimeve bizantine të qytetit. Ka disa vende të këndshme për të ngrënë në këtë zonë (duke përfshirë dhe kafenenë tek ‘Torra’), por ia vlen të shëtisni vetëm 10 min përgjatë bregut ku do të gjeni Bar–Restorant “Aragosta“ (Rruga Taulantia 71), restoranti më i mirë në zonë ku ju mund të hani ushqim deti.

Dita 2

Plazhi
Me rërën e tij të artë dhe të butë me një sipërfaqe të gjerë, plazhi i Durrësit është një qytet vibrant në vetvete. Gjatë fundjavës në stinën e verës duhet të shkosh herët për të gjetur një vend: nëse jeni duke kërkuar një plazh të vetmuar duhet të shkosh më në jug. Në momentin që je stabilizuar, nuk ke pse të lëvizësh më gjatë ditës: shitësit ambulantë gjatë gjithë ditës do t’ju ofrojnë kafe, çaj, kokteile, panine dhe çdo gjë tjetër që do t’ju nevojitet. E ndërkohë që të gjitha lokalet konkurojnë me njëra-tjetrën se kush të vendosë muzikën më të bukur në sfond, çdo gjë kthehet në një atmosferë tipike ballkanike, të zhurmshme.

Ditët larg
Nëse nuk mund të shkoni në bregdetin e Durrësit, (në të vërtetë shumë njerëz do t’ju pëshpërisnin në veshin tuaj që më e mira e rivierës shqiptare gjendet në Jug).
Duhet të drejtoheni për në Parkun kombëtar të Divjakë-Karavastasë ose thjesht (Laguna e Karavastasë) rreth 20 minuta në jug të qytetit, një zonë e gjerë me laguna, pyje dhe këneta. Jo larg prej këtej gjendet Manastiri më i vjetër i Shqipërisë, Manastiri i Ardenicës i shekullit të 13-të, kisha e Shën Marisë, e cila përmban disa ikona të holla të pikturuara nga Athanas Zografi, një shqiptar që ishte një nga artistët kishtarë më të kërkuar të shekullit të 18-të.

Darka e fundit
Restoranti në Hotelin Oaz, në Golem në fundin jugor të plazhit të Durrësit, ka tryeza aq afër detit sa ju mund të ndjeni aromën e jodit. Peshk i freskët, ushqim deti i mahnitshëm nën një perëndim të mrekullueshëm e bëjnë një nga vendet më të preferuara në qytet.

Durrësi në një paragraf
Plotësisht ballkanik, me një gusto të pagabueshme italiane. Peshk dhe fruta deti të mrekullueshëm dhe me një çmim që nuk mund ta gjeni në asnjë vend tjetër. Gjenden të gërshetuara mbetjet e një të kaluare shqiptare kristiane me minaret dhe xhamitë e myslimanizmit të sotëm. Merr me qira një makinë dhe bëj një xhiro gjatë gjithë bregdetit deri në Lagunën e Karavastasë./ATA/ KultPlus.com

Kroçera gjermane zgjedh Vlorën, 400 turistë zbulojnë Shqipërinë (FOTO)

Posted on by Kult Plus

Edhe pse sezoni turistik ende nuk ka nisur zyrtarisht, Shqipëria me bukurinë dhe historinë e saj ka bërë për vete turistët e huaj, të cilët kanë zgjedhur të zbulojnë më shumë rreth saj.

Ditët e fundit në portin e Vlorës, u ankorua kroçera “BERLIN” me rreth 400 turistë gjermanë të ardhur nga Porti i Kotorrit, Mali i Zi.

Turistët vizituan qytetet turistike të Shqipërisë si Vlora (Llogara), Apolonia e Fierit dhe Beratin.
Kjo është kroçera e parë që ka mbërritur për këtë vit në portin e Vlorës. Më pas udhëtimi i turistëve gjermanë vazhdoi drejt Korfuzit.

Porti i Vlorës është kthyer tashmë në një pikë të rëndësishme të itinerarit të anijeve turistike që përshkojnë Mesdheun.Bashkëpunimi i frytshëm mes “Portit Detar” Vlorë sh.a, dhe kompanive turistike vendase e të huaja ka rritur në mënyrë të ndjeshme numrin e turistëve që mbërrijnë në portin e Vlorës.


Kjo është hera e dytë që Krocera “Berlin” viziton Poritn e Vlorës./ATSH

Si reflektohej 1 Maji në Tiranë gjatë vitit 1955 (FOTO)

Posted on by Kult Plus

Në shumë vende të botës përkujtohet më 1 maji, dita e punëtorëve. Dita e Punës, ose Festa e Punëtorëve, është një festë që festohet më 1 maj të çdo viti, e cila synon të kujtojë angazhimin e lëvizjeve sindikale dhe vështrimin ekonomik-social të punëtorëve.

Dita e Punëtorëve është e njohur në shumë vende të botës, por jo në të gjitha. Më saktësisht, ajo i referohet kujtimit të protestave të punëtorëve që synonin një të drejtë të madhe dhe që konsistonte ne orarin e punës, në 8 orë. Këto protesta çuan në nxjerrjen e një ligji që u miratua në 1866 në Illinois (SHBA).

KultPlus ju sjellë një fotografi të rrallë e cila tregon për atmosferën në Tiranë, pikërisht me këtë datë gjatë vitit 1955.

Po ashtu KultPlus ju sjellë edhe një fotografi tjetër të vitit 1969 , ku banorët qëndrojnë mbi një kamionetë me mjetet e tyre të punës, flamurin ndërsa shkruhej “25 vjet Shqipëri Socialiste”./ KultPlus.com

Fëmijët shijojnë aktivitetet e South Outdoor Festival (FOTO)

Posted on by Kult Plus

Gili Hoxhaj

South Outdoor Festival tashmë është në ditën e dytë derisa po shënon rrugëtimin e edicionit te dytë të Festivalit. Ky festival që ngërthen shumë aktivitete sportive, kreative dhe kulturore dhe si i tillë ka mbledhur mjaft shumë vizitorë rreth vetes, të cilët po e gjejnë veten në fusha të ndryshme. Fshati Vuno që është në afërsi të Himares, këtë vit është epiqendra e këtij edicioni, ndërsa në shumë vende rreth Himarës po zhvillohen aktivitetet të këtij festivali. Arkitektura e veçantë e kësaj zone e veçmas e fshatit Vuno po e bën edhe më të paharruar eksperiencën që ky festival po e sjellë. Pozita gjeografike po i jep edhe më shumë gjallëri aktiviteteve të këtij edicioni.


E veçanta e këtij festivali është se ka mbledhur rreth vetes njerëz të moshave te ndryshme duke u dhënë të gjithëve mundësinë që ta përjetojnë një përvojë te paharruar nga ky vend e festival. Shumë fëmijë sot kanë shijuar atë çfarë ka përgatitur ky festival për ta. Me këngë, poezi e shumë lojëra atraktive, e aktivitete artistike ata kanë vallëzuar e shprehur kreativitetin e tyre.
Një pjesë e trajnerëve të Qendrës Sportive “Smart”, janë pozicionuar në një ambient të fshatit Vuno, prej nga shihen shumica e ndërtesave të këtij fshati. Përmes eksperiencave të tyre, ata po i njoftojnë të pranishmit më mënyra te ndryshme te argëtimit dhe aktiviteteve sportive.

Njëri nga trajnerët e kësaj Qendre është edhe Gentian Vuca i cili tha për KultPlus se këto aktivitete janë mjaft të rëndësishme për shkak se i njoftojnë turistët dhe shqiptarët me natyrën e kësaj zone dhe gjatë kësaj kohë të jenë edhe sa më aktiv përmes lojërave të ndryshme.

“Ne ofrojmë aktivitete sportive për fëmijë të grupmoshave të ndryshme dhe duke iu përshtatur edhe terenit malor, ne përpiqemi që tu ofrojmë gjithë sigurinë fëmijëve në mënyrë që të kënaqen sa më tepër në këtë aktivitet. E veçanta e kësaj është se edhe të rriturit po bëhen pjesë e aktiviteteve në lojëra të ndryshme dhe sfidat po rriten nga momenti në moment ndërsa po vijnë secilën herë e më tepër njerëz andaj po e shfrytëzojmë sa më shumë këtë dite të bukur”, u shpreh ai për KultPlus.

South Outdoor Festival po ashtu mbrëmë ka sjellë edhe një koncert të mrekullueshëm të “Tre muskutierëve”, duke e bërë kështu këtë edicion të paharruar. Edhe sot pritet që të ketë mjaft shumë aktivitete për pjesëmarrësit e këtij festivali. / KultPlus.com

“Skënderbeu” dhe delegacioni i komunave arbëreshe i ‘pushtojnë’ zyrën Veliajt

Posted on by Kult Plus

Një delegacion prej 60 personash, ardhur nga komunat arbëreshe të Italisë, në përbërje të së cilëve ishte dhe Loris Castriota Scanderbeg, stërnipi i Gjergj Kastriotit u pritën në një takim të veçantë nga kryetari i bashkisë së Tiranës, Erion Veliaj.

Gjatë këtij takimi, kryetari i bashkisë Lungro Giuseppino Santoianni dhe Noè Andreano kryetar i bashkisë së Casalvechio-s, theksuan se Tirana është kthyer në një kantier të hapur ku po punohet për zhvillimin e qëndrueshëm të qytetit. “Është një kantier i hapur. Unë ju komplimentoj, një kryetar bashkie aktiv! Nuk është e lehtë, e kuptoj, por unë pashë se, si në Durrës, si në Vlorë edhe këtu në Tiranë ka një lëvizje, rinisje të këtij komuniteti. Kështu që ju bëj komplimentet dhe urimet më të mira për vazhdimësinë dhe për të forcuar gjithmonë e më tepër marrëdhëniet e bashkëpunimit mes Arbërisë dhe Shqipërisë”, – theksoi kryetari i bashkisë së Lungro-s, Giuseppino Santoianni.

Teksa i uroi mirëseardhjen në Tiranë, kreu i bashkisë Erion Veliaj u shpreh se Tirana po punon për të rikuperuar kohën e humbur në këto 27 vite. “Jam shumë i lumtur që jemi këtu sot dhe ky ka qenë një vit fantastik: Viti i Skënderbeut dhe besoj ka qenë një arsye, një mundësi edhe të shikohemi, edhe të takohemi si një familje e madhe. Dua t’ju uroj mirëseardhjen në Tiranë, në shtëpinë tuaj. Ju kërkoj ndjesë! Tirana është e gjitha një kantier, e keni parë kudo po punohet, edhe arsyeja është se kemi humbur shumë kohë, 27 vjet, kështu që duhet të punojmë shumë shpejt të rikuperojmë kohën që kemi humbur. Jam i lumtur që miku im, Fate Velaj, ka mundësuar këtë vizitë në Tiranë”, – nënvizoi Veliaj.

Loris Castriota Scanderbeg, i cili është stërnipi i Heroit tonë Kombëtar Gjergj Kastriotit, theksoi se rezultatet e arritura këto vite falë ndërhyrjeve për përmirësimin e infrastrukturës, por jo vetëm, kanë bërë që gjithmonë e më shumë të flitet pozitivisht për Shqipërinë.

“Rezultatet se si është transformuar pozitivisht Tirana, sigurisht me bashkëpunimit e qeverisë, por me përgjegjësinë e madhe që merr kryetari i bashkisë së Tiranës, po i shikojmë dhe jo vetëm për aspektet e jashtme si transformimi i një sheshi apo i shumë lagjeve, por edhe me ndërhyrjet me vlera arkitektonike sepse kryetari i bashkisë zgjedh edhe bashkëpunime prestigjioze me arkitektë italianë. I kemi ndjekur këto gjëra dhe na bëhet shumë qejfi. Fakti është se ju po ndërhyni dhe në shumë sektorë socialë duke vlerësuar dhe bashkëpunimet e bukura prandaj kjo na bën krenar që të mund të flasim gjithmonë e më mirë për Shqipërinë”, tha Loris Castriota Scanderbeg. /m.z//r.e/

Së shpejti fillojnë aventurat e “South Outdoor Festival”

Posted on by Kult Plus

South Outdoor Festival i kthyer tashmë në një traditë me qëllim promovimin e fshatrave për zhvillimin e turizmit këtë vit do të startojë në Vuno dhe do të zgjas për tri ditë nga data 27 deri më 29 prill, shkruan KultPlus.

Disa nga fshatrat ku pjesëmarrësit e këtij festivali do të eksplorojnë bukurinë dhe misteret që fshehin janë Kuçi, Kudhësi, Çorraj, Qeparoi dhe Borshi, ku nuk do të mungojnë edhe aktivitetet e plazhit (kayaking, zhytje, volejboll, plazh) në gjiret e mahnitshme të Jalës dhe Gjipesë! Argëtimet gjatë ditës dhe çlodhja në mbrëmje rreth zjarrit në kampin me çadra të ngritura, do të jenë thelbi i mikpritjes së këtij festivali. Nuk do të mungojë edhe muzika live, si dhe iso-polifonia ( Trashëgimia Kulturore e ruajtur nga UNESCO), që do të dëgjohet gjatë gjithë festivalit.

Fshati i Vunoit ka një arkitekturë të pasur dhe unike në gjithë zonën e bregdetit dhe konsiderohet si një nga qendrat më të rëndësishme të trashëgimisë kulturore, ku gjendet në afërsi të Kishës së Shën Spiridonit. Atje do të mbahen shumë aktivitete, do të ketë muzikë, kampe, lojra, seminare, forume, aktivitetet kulinarie, etj. Ujërat e mrekullueshme të plazhit të Jalës, ofrojnë mundësi për sportet ujore. Aktivitete të tjera si hiking, biking, do t’i ofrojë mali.

Vunoi ka një pamje magjepsëse, ku të jep përshtypjen e një Akropoli të madh që del nga shkëmbinjtë. Është një shembull i shkëlqyer i arkitekturës rajonale si në shtëpitë dhe kishat, të ruajtura që nga shekulli i tetëmbëdhjetë. / KultPlus.com

Shëtitore e re për turistët në plazhin e kristaltë të Jalit

Posted on by Kult Plus

Plazhi i Jalit, rreth pesë kilometra larg nga rruga kombëtare Vlorë-Sarandë, në dalje të fshatit Vuno, është një prej destinacioneve të preferuara turistike për shumë shqiptarë dhe të huaj gjatë sezonit të verës.

Uji i detit Jon në këtë plazh jo shumë larg Dhërmiut, me ngjyrat e papërsëritshme të ujit, si bluja e thellë, jeshilja smerald, portokallia e ndezur në perëndim, janë një spektakël i vërtetë në këtë peizazh tipik mesdhetar.

I strukur thellë, mes kodrinave me ullinj e me shtëpitë e bukura të Vunoit mbi kokë, gjelbërimit të përhershëm të shkurreve, i rrethuar me shkëmbinj të lartë, që krijojnë gjire të vegjël e të mahnitshëm, plazhi i Jalit frekuentohet më shumë sidomos nga të rinjtë.

Falë një investimi të Bankës për Zhvillim të Këshillit të Europës (CEB) dhe të realizuar nga Fondi Shqiptar i Zhvillimit, këtë sezon turistik plazhi i Jalit do të ketë edhe shëtitoren e re, ku pushuesit vendas e të huaj do të kenë mundësi të shijojnë spektaklin e perëndimit të diellit në shëtitjet e pasdites.

Kryetari i bashkisë së Himarës, Jorgo Goro, tha për ATSH-në se “kjo shëtitore do të përfundojë para muajit qershor të këtij viti, në mënyrë që të vihet në dispozicion të pushuesve”.

“Ky investim së bashku me projektin për kthimin si fshatra historikë të Dhërmiut dhe Vunoit, si dhe shëtitoren e Dhërmiut, kap shifrën e rreth 7-8 milionë euro”, theksoi Goro, shkruan atsh.

Sipas tij, këto investime do të bëjnë që plazhet e jugut të tërheqin sa më shumë turistë pranë tyre.

Plazhi i Jalit është nga vendet më të bukura dhe të veçanta për ujin, rërën, klimën dhe jodin e detit. Një parajsë natyrore e vizatuar si nga dora e njeriut, plazhi i Jalit, është një nga atraksionet kryesore të të gjithë krahinës, falë peizazhit mahnitës, plazheve të pastra me rërë të bardhë dhe ujërave të kristalta.

Famën dhe emrin plazhi i Jalit e krijoi që kur u zgjodh nga elita ushtarake gjatë viteve 70-të, për t’u ndërtuar qendra e pushimeve për ushtarakët, e cila vazhdon të funksionojë edhe sot si e tillë.

Bukuria e gjirit do t’iu bëjë për vete që lart në kodër, vend i cili i bën të gjithë të ndalojnë për të shkrepur fotografi. Kjo është edhe arsyeja se pse në internet fotot më popullore të Jalit, janë pikërisht ato të gjirit nga maja e kodrës./ KultPlus.com

Këngëtarja rrëfen kujtimet që ka nga Shqipëria: E vizitoj shpesh

Posted on by Kult Plus

Pak kohë më parë këngëtarja me origjinë shqiptare Eleni Foureira ka deklaruar origjinën e saj. Këngëtarja shqiptare këtë vit do të përfaqësojë Qipron në Eurovizion dhe ka dhënë një intervistë në mediat greke ku ka theksuar se e viziton shpesh atdheun e saj pasi ka gjyshërit ende në Shqiperi.

Githashtu ajo thekson se ato kujtime që ka për vendin e saj nuk mund t’i harroj kollaj, ndonëse nuk ka jetuar shumë vite.

“Nuk harrohen, ato përvoja më kanë bërë kjo që jam sot. Të them të vërtetën, kam vetëm kujtime të mira. Ne jemi katër motra e vëllezër, një familje e madhe. Më kujtohen vite të bukur dhe papritur më kujtohet që ndryshon gjithçka. Nisi lufta, me plumba, me dhunë”, shprehet Eleni Foureira.

Ajo nuk ka lënë pa përmendur gjyshërit e saj, arsyeja përse vjen shpesh në vendin tonë.

“Gjyshja dhe gjyshi jetojnë aty, dhe shkoj shpesh për t’i parë. Krenohen dhe gëzohen me aq sa kam arritur janë të lumtur për mua”, shtoi Eleni Foureira.

Këngëtarja me origjinë shqiptare tashmë është një nga emrat më të lakuar në muzikën greke./a.me/KultPlus.com

1972, pamje të rralla nga vizita e Bekim Fehmiut në Shqipëri (FOTO/VIDEO)

Posted on by Kult Plus

Aktori i madh shqiptar Bekim Fehmiu, në disa pamje të rralla në vitin 1972 në Shqipëri.

Përmes një dokumentari të krijuar nga Kinostudio “Shqipëria e re” në vitin 1972, në këtë vizitë, Bekim Fehmiu, shprehu gëzimet e tij për arritjet e kinematografisë shqiptare dhe uroi për suksese më të mëdha në të gjitha fushat e kulturës dhe të artit, përcjell KultPlus.

Përpos artistëve Bekim Fehmiu shkoi edhe në Lidhjen e Shkrimtarëve, ku u takua me kryetarin e saj dhe disa shkrimtarë të tjetër shqiptarë, ndër ta në këto incizime duket të jetë edhe shkrimtari i madh Ismail Kadare.

Ky dokumentar përfshin shumë vende që vizitori Bekim Fehmiu. Ai në Krujë vizitoi Kalanë dhe Muzeun Historik. Ndërsa kur e pyetën Bekim Fehmiun se a do të kishte dëshirë të luante një film shqiptar, ai u përgjigj në mënyrë shumë kuptimplote: “Do të isha i lumtur”.

Po sjellim në vijim dokumentarin e plotë të kësaj vizite të gjatë të Bekim Fehmiut në Shqipërinë e vitit 1972./ KultPlus.com

https://www.youtube.com/watch?v=t2j-osGzk78

Agjencia britanike e Guidave të Turizmit zgjedh Shqipërinë destinacion për muajin mars

Posted on by Kult Plus

Arkeologët dhe artdashësit, udhëtarët dhe historianët, shijuesit e verës dhe vëzhguesit e zogjve: të gjithë do të marrin me vete kujtime të pashlyeshme nga një udhëtim në Shqipëri.

Kështu e ka hapur artikullin e saj për Shqipërinë, Agjencia Britanike e Guidave të Turizmit, e cila e shikon Shqipërinë si një destinacion të rëndësishëm për të bërë turizëm elitar, transmeton kp.

Artikulli flet për vende të cilat turistët e huaj mund të vizitojnë, duke filluar që nga malet e larta që sipas tyre janë streha e fundit për disa specie, vendndodhjen perfekte gjeografike të Shqipërisë për vëzhgimin e zogjve të ndryshëm, si dhe një sërë vendesh të tjera me rëndësi historike.

Në këtë artikull përmendet gjithashtu pasuria e lartë që ka Shqipëria në turizmin kulturor dhe historik, diçka e cila nuk duhet t’i shpëtojë syrit të një turisti, gjithashtu një vend të veçantë zinte dhe kuzhina vendase, ku shkruhet se, “ushqim shumë i mirë peshku dhe vera lokale i japin kënaqësi atyre të dhënë pas gastronomisë”./ KultPlus.com

20 arbëreshë të Italisë pushtojnë Shqipërinë për Vitin e Skënderbeut

Posted on by Kult Plus

“Të dua Arbëri” një aktivitet me përmasa mbarëkombëtare pritet të zhvillohet nga data 1 deri ne 6 Maj në Shqipëri në kuadër të shpalljes nga Qeveria Shqiptare, të vitit 2018 si Viti i Skënderbeut.

Aktivitetet do të shtrihen në Tiranë, Krujë, Lezhë, Bulqizë, Peshkopi dhe Dibër të Madhe. Grupeve etnike do t’u shtohen edhe një grup i madh i shqiptarëve të Italisë. Gjatë ditëve të aktivitetit një grup prej të paktën 20 arbëreshësh, do të performojnë në muzikë, teatër, kulinari, traditat më të mira të spikatura, nga enciklopedia njerëzore e arbëreshëve, paraardhësve të shqiptarëve të Italisë, një nga rastet unikale në botë të ruajtjes në këtë formë kaq sublime të jetës së të parëve të tyre.

Në kuadër të shkëmbimit të këtyre traditave dhe aktivieteve të larmishme që do të zhvillohen në Tiranë dhe në rrethe të vendit, Qendra Albanian Excellence në Tiranë dhe Shoqata Vorea, me qendër në Frascineto, Itali, kanë nënshkruar pak ditë më parë në në këtë qytezë të vogël të Kalabrisë një marrëveshje bashkëpunimi. Frascineto banohet nga shumica e një popullate arbëreshe. Sipas Presidentes së Albanian Excellence, Flora Nikolla: “Marrëveshja ka në qendër të saj, evindentimin ,vlerësimin, njohjen dhe përhapjen e traditës arbëreshe, një qëndrese kjo kolektive e admirueshme ndaj të parëve të tyre, që kurse u detyruan të lënë Arbërinë pas shekullit XV, me vdekjen e heroit kombëtar të shqiptarëve, Gjergj Kastrioti Skënderbeu.”

Kjo marrëveshje u nënshkrua në Komunën e Frascineto-s, në prani të Kryetarit të Komunës, Dr. Angelo Catapano, për Albanian Excellence nga Drejtoresha Ekzekutive e Qendrës, znj. Flora Nikolla dhe për Shoqatën Vorea nga Drejtoresha Ekzekutive, znj. Lucia Martino.

“Kjo marrëveshje parashikon një bashkëpunim dyvjeçar mes dy shoqatave të njohura për aktivitetin e tyre konkret në favor e në mbështetjes të vlerave më të mira shqiptare dhe arbëreshe, në kulturë, art dhe turizëm , një sferë për të cilën dy shoqatat do të angazhohen përmes shumë iniciativa të reja, nisur edhe nga që turizmi është më pak i zhvilluar mes dy vendeve në kohën e ushtrimit të turizmit kulturor, elitar dhe emocional me nota argëtimi:”, tha Flora Nikolla për “Shqiptarja.com”.

Marrëveshja, parashtron njëherazi edhe organizimin e aktivitetit shumëdimensional. Në bazë të kësaj Marrëveshje, gjatë këtyre ditëve , grupi prej të paktën 20 arbëreshësh i bashkohet projektit “Të dua Shqipëri ! ” Kryetari i Komunës së Frascinetos, Dr . Catapano , ka përgëzuar palën shqiptare për nënshkrimin e kësaj marrëveshje duke e cilësuar si “një hap më shumë më afrimin mes Arbëreshëve të Italisë dhe Shqipërisë”.

Ai falënderoi gjithashtu të dy shoqatat , për vullnetin e tyre të mirë në organizmin e aktivitetit “Të dua Arbëri “ në muajin Maj në Shqipëri, duke u shprehur optimist që ky aktivitet kaq domethënës , do të vijojë edhe me aktivitete të tjera nga të dyja shoqatat , shqiptare dhe italo-arbëreshe.

Zonja Lucia Martino, aktiviste e njohur edhe në bashkëpunimet e mëparshme dhe një zonjë e rrallë në ruajtjen dhe zhvillimin e traditës arbëreshe tha se, ishte e emocionuar dhe priste me padurim zhvillimin e “Të dua Arbëri”, ku ajo do të prezantonte njëherazi me grupin e saj të gjithë atë punë të vullnetshme e plot dashuri, që ka bërë për një kohë të gjatë, në krijimin e traditës teatrore , të ruajtjes së kulturës së gjithë kahershme shqiptare përfshirë edhe kulinarinë të cilën ajo me shumë zell, dëshiron t’ua bashkëngjisë edhe menuve të restoranteve shqiptare.

Flora Nikolla, drejtuese e Qendres Albanian Excellence është shprehur se projekti, “Të dua Arbëri”, është një projekt i ndërtuar, me dhe mbi dashuri e vlerësim për këtë pjesë shqiptaro-italiane, të cilët me devotshmëri kanë ruajtur deri më tani, gjuhën, traditat, doket shkrimin e shqipes, ashtu sikundër edhe ritet fetare.

Flora Nikolla është shprehur më tej se “në të gjitha fushat sikundër edhe letërsia arbëreshe, ka shumë krijues, poetë, shkrimtarë, intelektualë të njohur, jo vetëm në Itali e Shqipëri por kudo edhe në mërgatë dhe kjo është një detyrë më shumë e shoqatës që ajo drejton për evidentimin dhe botimin e tyre në një të afërme, në vëllime të veçanta, si një vlerë e shtuar e këtij fenomeni historik dhe me vlera unikale”./ KultPlus.com