Etiketë: Shqiperia turistike

Shqipëria turistike trend evropian, 20 milionë vizitorë në 2030

Posted on by Kult Plus

Kryeministri, njëherësh kreu i PS-së, Edi Rama prezantoi sot programin qeverisës të mandatit të katërt “Shqipëri 2030” sipas çdo sektori.

Duke u ndalur te turizmi dhe mjedisi, Rama tha se Shqipëria turistike është bërë trend evropian me 12 milionë turistë në 2024.

“Viti ka nisur janar-shkurt, 20 % më shumë vizitorë sesa janar-shkurti i vitit të kaluar. Mund të shkojmë në 20 milionë pa asnjë frikë në 2030, por nga ana tjetër duhet të ngadalësojmë turizmin masiv dhe duhet të fokusohemi shumë më tepër tek turizmi elitar dhe ekologjik dhe kemi rrugës projekte madhore, projekte që do të impaktojë në mënyrë serioze prodhimin e përgjithshëm kombëtar të vendit (PBP). Turizmi kontribuonte me shumë më pak se 1 miliard euro në ekonomi, sot jemi thuajse 5 miliardë euro të ardhura vetëm nga turizmi”, deklaroi Kreu i Ekzekutivit.

Gjithashtu, Rama nënvizoi se kur morën detyrën s’kishte një hotel real me pesë yje. “Yjet prodhoheshin, prodhoheshin tek partia. Emrat e hoteleve ishin kombinime mbiemrash edhe emrash kalamajsh. Sot kemi mbi 50 kontrata me hotele me pesë yje, të gjitha brandet e mëdha janë të interesuara të vijnë në Shqipëri”, deklaroi ai.

Rama tha se duhet patur parasysh gjithashtu se nga banorët e Shqipërisë ka pasur një numër shumë të rëndësishëm daljesh jashtë vendit për pushime apo për biznes dhe ky numër është 3-fishi i numrit që ishte.

“Banorët rezidentë në Shqipëri kanë dalë tre herë më shumë për turizëm biznes jashtë. Ça tregon kjo që janë varfëruar, apo që sot kanë më shumë mundësi, ndërsa brenda Shqipërisë në 2024 kanë lëvizur për turizëm 979 456 individë. Të gjitha këto janë të regjistruara. Lëvizjet për turizëm, e pamendueshme, e pamendueshme, e pamendueshme, jo shumë vite më parë”, shtoi ai.

Për mjedisin, Rama u ndal te “rritja e sasisë së hapësirës së zonës mbrojtura në 22% të territorit, 22% të territorit ne e kemi zonë të mbrojtur dhe kemi legjislacion të ri komplet evropian për zonat e mbrojtura, që i gjetëm të mbushura me çibanë dhe me tumore kënete nga të katër anët dhe në Shqipërinë 2030, synimi ynë është që të jemi një vend ku mbledhja dhe riciklimi i mbetjeve jo vetëm janë konform kuadrit të BE-së, por janë në një nivel tjetër nga ky që kemi sot, që është ku e ku me atë që kishim, por që është i pamjaftueshëm për atë që duhet të kemi”. /KultPlus.com

“Washington Post”, jehonë Shqipërisë turistike, alternativa më e mirë edhe krahasuar me Mikonos

Posted on by Kult Plus

Kolosi mediatik “Washington Post” i bën jehonë Shqipërisë turistike, e cila u ofrohet  lexuesve si alternativa më e mirë edhe krahasuar me Mikonosin në Greqi.

Kryeministri Edi Rama ndau sot artikullin e publikuar nga “Washington Post”, i cili promovon Shqipërinë si paketa më e plotë e turizmit të qëndrueshëm, në vend të destinacioneve të mirënjohura por edhe të mbipopulluara të Mesdheut.

Rama bëri të ditur se në artikull ftohen turistët të provojnë eksperiencën unike përgjatë bregdetit shqiptar me plazhe të kristalta, qytete antike dhe male perfekte për sporte natyrore.

“Ja edhe kolosi mediatik ‘Washington Post’, me jehonën e tij për Shqipërinë turistike e cila u jepet lexuesve si alternativa më e mirë edhe krahasuar me të superfamshmin Mikonosin fqinj, duke i ftuar të provojnë eksperiencën unike përgjatë bregdetit shqiptar me plazhe të kristalta, qytete antike dhe male perfekte për sporte natyrore si paketa më e plotë e turizmit të qëndrueshëm, në vend të destinacioneve të mirënjohura por edhe të mbipopulluara të Mesdheut”, shkruan Rama. / atsh / KultPlus.com

Shqipëria turistike në një prej guidave prestigjioze franceze

Posted on by Kult Plus

Lajmi u bë i ditur nga ministrja e Turizmit dhe Mjedisit, Mirela Kumbaro, e cila theksoi se “guida është format praktik, i dedikuar për të gjithë udhëtarët francezë dhe udhërrëfyesi ideal për ta njohur Shqipërinë, duke iu shtuar kështu promovimit tonë për gjithë botën frankofone”.

Ministrja Kumbaro tha se “72% më shumë vizitorë francezë mikpritëm në vitin 2022 krahasuar me vitin 2021”.

Për shkak të vijës së gjatë bregdetare Shqipëria ofron disa plazhe, nga veriu deri në jug, si në Velipojë të Shkodrës, në Shëngjin të Lezhës, në Durrës, Vlorë, Himarë dhe Sarandë, etj, plazhe këto që frekuentohen përveç shqiptarëve edhe nga shtetas të huaj, që zgjedhin Shqipërinë si një destinacion turistik gjatë muajve të verës. Gjithashtu, Gjirokastra, Berati, Butrinti, Kruja, Tirana, Shkodra, etj, janë destinacione të kërkuara për turizëm historik dhe kulturor. / KultPlus.com

Shqipëria, vend turistik që nga viti 1929

Posted on by Kult Plus

Shqipëria ka qenë destinacion turistik që në vitin 1929.

Drejtoria e Përgjithshme e Arkivave ka publikuar materiale që i referohen revistës ”Shqipëria Turistike”, botuar në vitin 1929 nga kompania “Adriatica” me qendër në Venecia, të Italisë. Kjo revistë (“Albania Turistica”) dëshmon ekzistencën e linjave të anijeve dhe avionëve për të gjithë turistët, të huaj apo shqiptarë, që preferonin të vizitonin Shqipërinë.

Ndërkohë në një postim të Administratës së Zonave të Mbrojtura Shkodër thuhet se që në nëntor 1934, revista kulturore “Minerva” në numrin e saj 25-të, përshkruan malet dhe zonat e Dukagjinit, duke bërë një guidë të thjeshtë turistike të zonës së Dukagjinit në përgjithësi dhe të Thethit në veçanti.

Një përshkrim-guidë prej 4 faqesh, nga faqja 21-24, i shoqëruar me 7 fotografi të peizazheve natyrore të zonës (Shtegu i Dhenve, Ujëvara në Shosh, Gryka e Ndërshqemit /Porta e Shalës, Lumi i Shalës, Qafë e Valbonës dhe Rrogami, Jezerca dhe grup alpinistësh).

Shkrimi i veçantë për Dukagjinin tregon potencialet e tij turistike, por edhe problemet që identifikon autori si hapja e rrugës së makinës dhe sistemimi i shtëpive për të pritur turistë.

Ndërsa nëse i referohemi “Archivio Centrale dello Stato” (Itali), mbi turizmin ne Shqipëri, përpara vitit ’39, thuhet se Shqipëria kishte struktura turizmi, por ishin të prapambetura e me kushte të dobëta higjenike.

Më pas, me ndërhyrjen italiane, Shqipëria turistike u promovua edhe nga Lloyd Triestino, kompani e rëndësishme e trasportit detar, si dhe në aktivitetet e panairit Fiera del Levante të qytetit të Barit./ KultPlus.com