Etiketë: Sterjo Spase

‘Kur shpërblehet njeriu? – Kur e kujton veten të lumtur!’

Posted on by Kult Plus

Ç’është jeta për ty? – e pyeta.
-Flluska sapuni, – m’u përgjigj.
-Po vdekja?
-Shpërblimi i jetës!
-Ç’është bota?
-Një pikë helm në hapësirë!
-Ç’është më e kuptuar në Botë?
-Vdekja.
-Cila është kafsha më e egër?
-Njeriu!
-Po më e butë?
-Ajo që s’ka lindur!
-Cili njeri ju duket më i poshtër?
-Ai që ndryshon veten me një emër të huaj dhe ai që punon aq mizorisht sa që nuk kujton as vdekjen!
-Ç’është budallallëku?
-Të duash një gjë që s’e ke dhe të kujtosh se je ai që s’je!
-Po puna më e mençme?
-Te gëzosh të tanishmen!
-Ç’është më e afërme?
-Vdekja!
-Po më e largët?
-Zemra ime me tënden dhe fillimi e fundi i hiçit.
-Çfarë është e pavdekur?
-Hapësira!
-Çfarë është më e bukur?
-Fantazia!
-Po më e shëmtuar?
-Sëmundja!
-Më e hidhur?
-Jeta!
-Më e ëmbël?
-Hiçi!
-Ç’gjë është më e madhe?
-Libri i Botës!
-Po më e rëndë?
-Fjala!
-Më e pamundur? – Këtu u mendua pak, sikur donte të çlodhej. më shikoi një copë herë në fytyrë si me habi e pastaj duke m’i shtrënguar të dy duart, më tha me butësi:
-Edhe në të pyetur duhet mjeshtëri! Çfarë pyetët tani?
-Çfarë gjë ju duket tani dhe do t’ju dukej mbas disa mijë vjetëve – sikur të jetonit – si e pamundur?
-Të ndryshosh veten dhe formën, dmth jam unë të bëhem ti, dhe jam njeri dhe të bëhem pëllumb!
-Kur shpërblehet njeriu?
-Kur e kujton veten të lumtur!
-Çfarë gjë ju duket më e mërzitur?
-Çdo send është më i mërzitur se njeri tjetër!
-Çfarë gjë ju duket më e vështirë?
-Të jesh njeri!
-Po më e lehtë?
-Të krijosh krijesë njerëzore!
-Cili është ngushëllimi i të pasurit?
-Pesha e qeses!
-Po i të vobektit?
-E ardhmja!
-Nuk ju kuptoj, – i thashë për së dyti.
-Vdekja! -mu përgjigj serioz
-Po ç’përmban jeta e njeriut?
-Vetëm dyshime!

Pse?! – Sterjo Spasse/ KultPlus.com

Përurohet shtëpia-muze kushtuar shkrimtarit Sterjo Spase

Posted on by Kult Plus

Në fshatin Gollomboç, komuna e Pustecit, sot u hap Muzeu i Sterjo Spases, shkrimtarit të njohur shqiptar me origjinë maqedonase, i lindur në këtë fshat të vogël të Prespës.

Në ceremoni mori pjesë edhe ambasadori i Maqedonisë në Tiranë, Danço Markovski, si dhe djali i Sterjos, Ilinden Spase.

Muzeu i Sterjo Spases është pjesë e projekteve Smart_Cul_Tour, i bashkëfinancuar nga BE-ja në kuadër të thirrjes së dytë të programit IPA për bashkëpunim ndërkufitar midis Republikës së Maqedonisë së Veriut dhe Republikës së Shqipërisë, 2014 – 2020.

Projekti u zbatua nga pesë partnerë nga dy vendet fqinje, përkatësisht bashkia e Manastirit – partner kryesor, si dhe komuna Pustec, IN “Instituti dhe Muzeu” – Manastir, Drejtoria për Mbrojtjen e Trashëgimisë Kulturore – Korçë dhe Qendra Kulturore Rinore – Manastir, partnerë.

Sterjo Spase lindi në vitin 1914 Gollomboç, njëri nga fshatrat maqedonishtfolës buzë liqenit të Prespës ndërsa vdiq në vitin 1989 në Tiranë. Sterjo shkollën fillore e kreu në Korçë, ndërsa shkollën Normale në Elbasan. Më pas nisi punë si mësues në fshatin Derviçan në jug të Gjirokastrës, ku nisi të shkruante romanin që njihet shkurt Pse!?. Më vonë nisi një kurs me korrespondencë për pedagogji në Firencë të Italisë, por nuk arriti të marrë provimet e fundit. Me Kutelin, Kokonën dhe Hakiun qe bashkëthemelues i të përkohshmes “Revista letrare” në Tiranë më 15 shkurt 1944.

Për nder të tij, shkolla e vjetër në fshatin Gollomboç, prej nga e ka prejardhjen ai, u shndërrua në hapësirë reprezentative si ekspozitë muzeore me objekte personale të Sterjo Spases.

Tre vite më parë, presidenti i Shqipërisë Ilir Meta i dha pas vdekjes çmimin “Kalorës i Urdhrit të Flamurit”. Atëherë Meta u shpreh se romani i tij i famshëm “Pse” paralajmëroi krijimin e letërsisë bashkëkohore në Shqipëri, duke shtuar se Sterjo Spase është një figurë e rëndësishme jo vetëm në Shqipëri, por në Ballkan dhe Evropë./ KultPlus.com

Nis restaurimi i shtëpisë së Sterjo Spases, djali i tij dhuron dorëshkrime origjinale për muzeun

Posted on by Kult Plus

Drejtoria Rajonale e Kulturës në Korçë ka nisur restaurimin e shtëpisë Muze të Sterjo Spases. Në Muzeun e parë në Pustrec do të ekspozohen jo vetëm dorëshkrime origjinale të shkrimtarit, por edhe objekte tradicionale të zonës.

Restaurimi i shtëpisë muze të shkrimtarit Sterjo Spase në fshatin Gollomboç ka nis të marrë jetë. Specialistët e trashëgimisë, në drejtorinë Rajonale të Kulturës në Korçë, e sheh këtë objekt muzeal, jo vetëm përfaqësues për zonën, por edhe si një urë ndërlidhëse mes vendit tonë edhe Maqedonisë së Veriut.

“Ky është një projekt ndërkufitar, i financuar nga BE. Ka qenë një punë shumë e madhe për të realizuar shtëpinë muze, të Sterjo Spases, që lidh më së miri vendin tonë edhe Maqedoninë e Veriut. Një urë e tillë lidh edhe kombinon turizmin edhe trashëgiminë kulturore. Është muzeu i parë lokal, që ndërtohet në këtë zonë”, shprehet Gjergji Koki, drejtori i DRKT Korçë.

Në këtë godinë, ku shkrimtari i romanit “Pse” jetoi rreth 9 vite do të ekspozohen, pas restaurimit të projektit ndërkufitar të financuar nga Bashkimi Europian, rreth 25 dorëshkrime edhe objekte personale të autorit.

“Vlerësimi i figurës së Sterjo Spases, e meritonte. Këtu s’do jetë vetëm një muzeum me dorëshkrime, por edhe kostume tradicionale të zonës, që janë përdor nga zona në vitet ë mëparshme, që do jenë interesante nga turistët”, shprehet Pali Kolevski kryetari i bashkisë Pustec.

Pas 6 muajsh, muzeu i parë do të shndërrojë Gollomboçin, në një nga atraksionet e preferuara për turistet që do të zgjedhin të vizitojnë Bashkinë e Pustecit. / Shqiptarja.com / KultPlus.com