Dy fe, një tempull! Drama e vendosur në Shqipërinë thellë rurale dhe tradicionale trajton një ngjarje shumë të pazakontë: unitetin mes myslimanëve dhe katolikëve të cilët ndajnë mes tyre një xhami-kishë të përbashkët. Por a është e mundur?

Nga Black Nights Film Festival në Talin”, shkruan DMovies për filmin “Streha mes reve” të Robert Budinës. Kritika vijon me përshkrimin e filmit. Besniku jeton në mal me familjen e tij, në një fshat të vogël diku në Shqipërinë Veriore. Pamja është asgjë më pak se spektakolare.

Peizazhi i thepisur është i gjelbër dhe i bardhë, pjesërisht i mbuluar nga dëbora, pjesërisht i mbuluar nga bimësia e harlisur. Dhitë janë kudo, dhe duket se janë më të shumta në numër se njerëzit. Ata u sigurojnë qumështin, mishin dhe lëkurën e tyre vendasve, të cilët kanë një jetë të pasigurt, por relativisht të qëndrueshme dhe të kënaqshme.

Retë në titullin e filmit kanë një rëndësi të dyfishtë. Ato i referohen maleve ku ndodh historia, majat e tyre shpesh mbulohen me retë dhe kërkimit për një terren më të lartë moral, një lloj qielli ekumenik. Babai i sëmurë i Besnikut është mysliman (komunist), vëllai i tij Alban konvertohet ortodoks grek, ndërsa nëna e tij ishte katolike. Besniku nuk ka mundur të martohet me dashurinë e jetës së tij për arsye politike.

“Por mbi të gjitha, duket se fshatarët ende janë të ndikuar nga regjimi komunist i Enver Hoxhës, i cili ndalonte të gjitha llojet e fesë. Një ditë, Besniku merr hapin e pazakontë të gërvishtjes së murit të brendshëm të xhamisë, nën të cilin zbulohet muralja katolike. Dy eksperte femra nga instituti i monumenteve vijnë për të vlerësuar dhe rregulluar muralen. Pastaj vijnë lajmet tronditëse.

Xhamia më pak se gjashtë shekuj më parë (deri në 1470) ishte kishë. Pak a shumë si Hagia Sofia në Stamboll. Dhe për një kohë të gjatë, myslimanët i lejuan banorët katolikë që të praktikonin fenë e tyre në xhami një herë në javë”, shkruan DMovies.

Ky ishte një gjest politik nga turqit e atëhershëm, të cilët dëshironin të nxirrnin në pah tolerancën e tyre fetare. Shqipëria u bë shtet i pavarur 106 vjet më parë, më 28 nëntor 1912 (në fakt, Streha Mes Reve u shfaq në Black Nights Film Festival në ditën e Pavarësisë së Shqipërisë).

Vendasit myslimanë vendosin ti dhurojnë një “degë ulliri” komunitetit katolik dhe ta rihapin xhaminë një herë në javë për besimin e krishterë. Propozimi pritet sa me entuziazëm, aq edhe me përqeshje nga banorët. Në njëfarë mënyre, kjo ide jo shumë e zakonshme është e lidhur me dëshirën personale të Besnikut mbi lirinë fetare. Ai është fjalëpakë, dhe nuk është gjithmonë e lehtë të zbulohen qëllimet e tij, shkruan gazeta shqiptare.

Ndoshta jo rastësisht, njeriu i qetë dhe i turpshëm fillon një romancë me një nga femrat e ardhura në fshat si të donte të vlerësonte dëmin që ai i bën vetvetes. Streha Mes Reve është një dramë delikate dhe fisnike mbi arritjen e lirive personale dhe atyre fetare. Streha Mes Reve është duke u shfaqur në konkursin e edicionit të 22-të të Black Nights Film Festival të Talinit, i cili po zhvillohet tani. DMovies janë të ftuar si mysafirë të veçantë.

Sapo ka përfunduar me sukses premiera botërore e filmit “Streha mes reve” e regjisorit Robert Budina, shkruan KultPlus.

Premiera botërore e këtij filmi është bërë në kuadër të festivalit “Tallinn Black Nights Film Festival”, ky filmi ëdhe është në konkurrim zyrtar në këtë edicion të 22-të të festivalit.

I përzgjedhur për seksionin zyrtar, filmi spikati për skenat e realizmit magjik të xhiruara në natyrën e mrekullueshme të Valbonës, lojën e jashtëzakonshme të aktorit protagonist Arben Bajraktari në rolin e Besnikut, skenarin origjinal dhe temën e tolerancës dhe bashkëjetesës fetare.

Në rolet kryesore interpretojnë aktorët si Arben Bajraktaraj, Esela Pysqyli, Bruno Shllaku, Irena Cahani, Osman Ahmeti, Muzbajdin Qamili dhe Virus Shala.

Filmi rrëfen, historinë e Besnikut një bariu, besimtar i devotshëm mysliman, i cili zbulon që xhamia e vjetër e fshatit të vogël ku ai jeton, në Veri të Shqipërisë mes Alpesh, ka qenë dikur kishë.

Ky zbulim hap debate të zjarrta në komunitetet e ndryshme fetare që jetojnë aty. Besniku është pjesë e një familjeje anëtarët e së cilës kanë besime të ndryshme dhe bashkëjetojnë në paqe me njëri tjetrin, deri ditën që Fadili babai ish komunist i familjes vdes, dhe atyre u duhet të ndajnë shtëpinë e vjetër në fshat mes tyre. Këtë vendim e bën të vështirë, amaneti që babai ish komunist ka lënë.

Në rininë e tij Besniku ra në dashuri me një vajzë nga një familje e persekutuar dhe Fadili duke qenë komunist i thekur nuk e lejoi të birin të realizonte ëndrrën e tij. Kjo i shkaktoi Besnikut një traumë që koha nuk e shëroi. Fadili e vuajti gjithë jetën kompleksin për traumën që i shkaktoi të birit, të cilën u përpoq ta shlyente me amanetin që la në fund të jetës. Amaneti i babait, do t’ia vështirësojë Besnikut përpjekjen për të mbajtur së bashku familjen dhe komunitetet me besime të ndryshme fetare në fshat, dhe do ta bëjë të marrë një vendim të rëndësishëm për jetën e tij./ KultPlus.com