Presidenti amerikan, Donald Trump, ka nënshkruar një urdhër ekzekutiv duke e shpallur anglishten gjuhë zyrtare të Shteteve të Bashkuara. Ai tha se kjo do të ndihmojë në sigurimin e një “shoqërie të bashkuar dhe kohezive”.
Kjo është hera e parë që SHBA-ja do të ketë një gjuhë zyrtare në nivel vendi, edhe pse rreth 30 shtete veçse kanë të përcaktuar gjuhën e tyre zyrtare.
“Nga themelimi i Republikës sonë, anglishtja është përdorur si gjuha jonë kombëtare”, tha Trump në urdhrin e publikuar më 1 mars.
“Dokumentet historike qeverisëse të kombit tonë, përfshirë Deklaratën e Pavarësisë dhe Kushtetutën, që të gjitha janë të shkruara në gjuhën angleze. Prandaj, ka ardhur koha që gjuha angleze të shpallet gjuhë zyrtare e SHBA-së”.
“Një gjuhë e caktuar në nivel vendi është në thelb të një shoqërie të bashkuar dhe kohezive, dhe SHBA-ja forcohet nga një qytetari që mund të këmbejë lirshëm ide në një gjuhë të përbashkët”.
Disa aktivistë kanë shprehur shqetësimet lidhur me ndikimin që mund të ketë kjo masë te personat që nuk flasin anglisht, veçmas në çështjet e imigracionit, procedurave të votimit dhe qasjes në ndihmë.
Ky vendim shfuqizon një urdhër të ish-presidentit Bill Clinton, që kërkonte nga agjencitë qeveritare dhe organizatat që merrnin fonde federale që të ofronin ndihmë gjuhësore për personat që nuk flasin anglisht.
Vendimi do t’i lejojë këto agjenci dhe organizata që të zgjedhin nëse duan të ofrojnë dokumente dhe shërbime në gjuhë të tjera.
Në urdhër thuhet se “krerët e agjencisë nuk janë të obliguar që të ndryshojnë, largojnë apo ndalojnë prodhimin e dokumenteve, produkteve apo shërbimeve të tjera të përgatitura apo të ofruara në gjuhë të tjera”.
Sipas ueb-faqes të Qeverisë amerikane, njerëzit në SHBA komunikojnë në më shumë se 350 gjuhë. Sipas Byrosë së Regjistrimit në SHBA gjuhët që fliten më së shumti, përveç anglishtes, janë gjuha spanjolle, ajo kineze, tagaloge, vietnameze dhe arabe. Po ashtu, disa gjuhë të amerikanëve autoktonë janë në mesin e gjuhëve që fliten në SHBA.
“Zotërimi i gjuhës angleze nuk hap vetëm dyer në aspektin ekonomik, por ndihmon banorët e rinj që të angazhohen në komunitetet e tyre, të marrin pjesë në traditat kombëtare dhe të kontribuojnë në shoqërinë tonë”, tha Trump.
“Ky urdhër njeh dhe kremton traditën e kamotshme të shumëgjuhësisë të qytetarëve amerikanë, të cilët e kanë mësuar anglishten dhe këtë traditë ia kanë përcjellë fëmijëve të tyre për brezat që do të vijnë”. /REL/ KultPlus.com
Ajo që ndodhi dje në Dhomën Ovale të Shtëpisë së Bardhë në Uashington në takimin midis presidentit amerikan Trump dhe atij ukrainas Zelenjskyt, përkundër dialogut të ashpër midis presidentit amerikan dhe atij ukrainas si dhe arrogancës që tregoi Trampi në raport me arritjen e një marrëveshjeje paqësore që niset mbi kompromiset që sjell raporti i forcave, siç janë ato në dobi të Rusisë, pa u përmendur shkaku i luftës (agresori) por interesi që ajo të ndalet, me ç’rast presidenti ukrainas u kundërpërgjigj se nuk do të pranojë paqen përmes kapitulimit, gjë që solli edhe largimin e tij nga Shtëpia e Bardhë, përkujton një rast të ngjashëm, nga prilli i vitit 1990 kur pas dëshmive të delegacionit të shqiptarëve në Këshillin për të drejta të njeriut, në Senatin Amerikan, nënkryetari i paritisë Republikane, Robert Dol, kërkoi të takohej sy më sy me dr Rugovën, atëherë kryetar i LDK-së dhe Dobrica Qosiqin, autor i Memorandumit të Akademisë Serbe të Shkencave, i cili ishte në krye të procesve që po çonin te shkatërrimi i Jugosllavisë.
Këtu po sjell një pjesë të kësaj bisede te Robert Dolit me Qosiqin dhe Rugovën, kur ai pas mospajtimeve me Qosiqin atij iu kërcënue se do të shkatërrohet Jugosllavia, ndërsa gjuhës pajtuese të Rugovës iu përgjegj me premtimin se do të kenë ndihmën amerikane deri te fitoja po qe se luftojnë me mjete paqësore për liri, demokraci, bazazi dhe qytetërim perëndimor…
Pra, takimi përfundoi me largimin (dëbimin) e njëanshëm të Qosiqit nga zyra e Robert Dolit… Dy vite më vonë, në maj të vitit 1992, Dobrica Qosiq u zgjodh kryetar i Jugosllavisë, ndërsa Rugova president i parë i Kosovës. Kërcënimi i Dolit ndaj Qosiqit doli të jetë i njëmndt: me shkatërrimin e Jugosllavisë nga bombardimet e NATO-s, siç ndodhi edhe çlirimi dhe krijimi i shtetit të Kosovës, pavarësia e të cilit u shpall më 17 02 2008.
PREMTIMET DHE KËRCËNIMET E ROBERT DOLIT DR RUGOVËS DHE QOSIQIT
Dëshmitë para Këshillit për të Drejtat e Njeriut të Senatit amerikan, kishin pasur rëndësi të dyfishtë. Sepse, na i kishin hapur dyert që të priteshim në institucionin më të njohur dhe më të fuqishëm të sistemit demokratik amerikan, dhe njëherësh, si subjekt politik ishim barazuar me atë serb, me çka për herë të parë do t’i jepet drita e gjelbër ngritjes së çështjes së Kosovës në nivelin e një preokupimi ndërkombëtar, pra që ajo nxirrej nga “kompetenca” e brendshme serbe ku rëndom shihej.
Edhe pse do të kalojë bukur kohë që kjo kthesë të zyrtarizohej, mund të thuhet se praktikisht efektet e saj janë hetuar edhe nga ne e edhe nga vetë Beogradi, prej nga dilte fare qartë se në njërën anë, nuk do të jenë në gjendje që problematikën e Kosovës ta mbajnë jashtë ndërkombëtarizimit të saj, dhe në tjetrën anë, do ta kuptojnë se epilogun e saj do ta ndikojnë amerikanët.
Mesazhet e këtij përcaktimi do të kenë rast t’i marrin menjëherë si gjatë dëshmive para Këshillit të Senatit nga demonstrimi i admi-nistratës amerikane, edhe gjatë shfaqjes së Rugovës në rolin e dëshmitarit t’i jepej tretmani i liderit të shtetit, e edhe pas mbarimit të saj, kur senatori Robert Dol, në kabinetin e tij, do të kërkojë që të bisedonte për së afërmi me Rugovën dhe mua si dhe Qosiqin dhe peshkopin serb, që e kishte me vete. Ndonëse me senatorin Robert Dol, kishim pasur rastin të bisedonim paradite, kur na kishte pritur bashkërisht në Senat dhe na kishte uruar qëndrim të këndshëm në SHBA, dhe me këtë rast kishte lavdëruar përcaktimin tonë për demokraci, duke theksuar rolin prijës të LDK-së që duhej ta kishte në këtë lëvizje, ftesa e paparaparë për një bisedë të përbashkët me serbët në kabinetin e tij ishte më shumë se një gjest falënderimi për dëshmitë e bëra, që edhe është i kup-tueshëm në raste të tilla. Dhe, përnjëmend doli se senatori Robert Dol, pasi që paraprakisht me vëmendje kishte dëgjuar ato që do të thuhen nga të dy anët, kishte shqetësimin rreth thellimit dhe të ashpërsimit të krizës, ngaqë, si tha, fjala ishte për përcaktime dia-metralisht të kundërta, ku në njërën anë shfaqej opsioni paqësor i shqiptarëve me kërkesat për barazi, demokraci dhe kthim kah Perën-dimi, që i theksoi si të drejta dhe të pranueshme dhe në përputhje me frymën e ndryshimeve demokratike që kishte filluar të përfshinte vendet e lindjes, dhe në tjetrën anë shfaqej qëndrimi serb, si e quajti antidemokratik, meqë refuzon demokracinë si vlerë universale dhe mbështetej mbi të drejtën historike, e cila ishte e papranueshme.
Fjalët e Robert Dolit nuk do t’i pëlqejnë Qosiqit. Mezi do të presë t’i jepej fjala. Do të thotë se Serbia ishte e ballafaquar me rrezikun e separatizmit shqiptar, që tha se ishte i vjetër dhe synonte shkatërrimin e integritetit të saj. Shtoi se Kosova për Serbinë paraqet djep, shenjtëri dhe rrënjët e qenies së saj dhe fjalë të ngjashme nga ato që tashmë kishte thënë dhe pasqyruar edhe në Memorandumin më të ri të akademikëve serbë, ku ai mbante autorësinë.
Senatori Dol, ia ndërpreu fjalën me ato që do t’i thotë se as në programin e LDK-së as në çfarëdo prononcimi të shqiptarëve nuk i kishte rënë të shihte tjetër pos kërkesave për liri, barazi, demokraci dhe Perëndim.
“Shqiptarët, madje shfaqen edhe si mbrojtës të Jugosllavisë, por si të barabartë. Andaj, prej nga i merrni, zotëri, këto kërcënime?”, do t’i drejtohet Qosiqit.
“Nga sjelljet e tyre… Nga ato që ata bëjnë çdo ditë kundër nesh atje, kundër varreve tona, kundër shenjtërve tanë… Nga të gjitha….” Me teatralitet tha se në Kosovë rrezikohet qenia serbe, rrezikohej krishterimi perëndimor dhe vlerat e tij…
Rugova deshi të ndërhyjë, por ishte senatori Dol, i cili iu drejtua Qosiqit me pyetjen si e shihte zgjidhjen e problemit shqiptar atëherë? Me mjete demokratike, kur këtë e kërkojnë shqiptarët haptas, apo ndryshe?
Qosiqi sikur u zu ngushtë nga pyetja. Deshi të vazhdonte aty ku kishte mbetur dhe bëri me dorë nga dosja që kishte me vete, pjesë të së cilës kishte lexuar edhe pak më parë, e ku shqiptarët akuzoheshin në mënyrën më të vrazhdët dhe me të pavërteta që kishte sajuar propaganda serbe prej vitesh, por senatori nuk e la të kthehej andej.
“Pyetja është e drejtpërdrejt dhe fare e thjeshtë: do ta pranoni demokracinë apo jo?”
“Populli serb nuk mund të pranojë kurrfarë ndryshimesh qofshin ato edhe demokratike, që mund t’ia ndryshojnë pozitën nga ai shtet-formues në atë të pakicës. Kemi derdhur si shumë gjak gjatë këtyre pesëqind vjetëve të fundit që ta pranojmë një rrënim të tillë…” “Pra, nuk pranoni demokracinë?” “Nuk pranojmë asgjë që do të thotë vetëshkatërrim… Kjo është e drejtë e secilit popull… Kjo është në përputhje edhe me ligjet e natyrës…”
“Kjo më mjafton, zotëri… Për ju nuk vlejnë ligjet e civilizimit por ato të natyrës?!… “ Qosiqi bëri që të thoshte edhe diçka por nuk iu lejua nga Doli.
“Nëse vazhdoni kështu do ta rrezikonin Jugosllavinë dhe vetë Serbinë. Shtetet e Bashkuara të Amerikës nuk pranojnë dhunën si alternativë të demokracisë, e aq më pak si mjet mbrojtjeje për qëllime shtetmëdha…”
Pastaj na u drejtua neve.
“Do të mbeteni në kursin e filluar edhe pas gjithë kësaj që dëgjuat?”
Rugova, pa një pa dy tha:
“Kërkojmë liri, barazi, demokraci dhe botën perëndimore, zotëri…”
“Amerika është në anën e atyre që kërkojnë liri, demokraci dhe barazi…”
Robert Doli nuk foli tjetër. U ngrit dhe me këtë dha shenjë se takimi kishte marrë fund. Qosiqi sikur dëshironte të fliste edhe diçka, por ishte sekretaresha e senatorit, një kroate-amerikane e cila hapi derën dhe po na priste që të na përcillte më tutje. Senatori me çehre të prishur mezi sajoi fjalinë me të cilat na dëshirohej qëndrim i këndshëm në Amerikë dhe u kthye në kabinet. Sekretaresha e senatorit na foli diçka në një kroatishte tepër artificiale të përzier me anglishte dhe na përcolli deri te pjesa ku tashmë demonstrativisht prisnin përcjellësit e Rugovës të gatshëm ta merrnin. Qosiqi na dha dorën ftohtas, ndërkohë që Rugova me atë buzë-qeshjen e varur që kurrë nuk dihej se a paraqet kënaqësi apo hidhërim, i tha se do të dëshironim të shiheshim në rrethana kur që të dytë do të jenë njësoj të kënaqur.
“Kjo nuk do të ndodhë kurrë”, ia ktheu Qosiqi dhe bashkë me peshkopin që i shkonte pas si hije u larguan në pjesën e majtë të korridorit, ku i priste një zyrtar përcjellës.
Dhe duke i shikuar si po largoheshin se si m’u duk se korri-doreve të Senatit amerikan ata kishin lënë atë thirrjen për luftë, që para dy vitesh na e kishte bërë të ditur për herë të parë poeti Millan Komneniqi me rastin e takimeve të shkrimtarëve serbë dhe shqiptarë në Beograd.
(Shkëputje nga libri “Vitet e Gjermanisë”, botua dhjetor 2024, FAQE 249-246)/ KultPlus.com
Mediat po prodhojnë lajme me shpejtësi dhe çdo ditë sjellin informacione të reja për presidentin amerikan, Donald Trump, luftën në Ukrainë, NATO-n, Rusinë dhe për diplomacinë me ritëm të shpejtë.
Është e vështirë të jesh i informuar për të gjitha zhvillimet, por në këtë tekst po ju sjellim katër gjëra që duhet t’i dini.
Mineralet
Administrata paraprake amerikane e pa luftën e Rusisë ndaj Ukrainës si një pushtim të paprovokuar që duhej të kundërshtohej për të ruajtur ligjin ndërkombëtar, duke përdorur sanksione për ta izoluar dhe ndëshkuar Moskën.
Trump ka adoptuar një diplomaci transaksionale. Ai ka vendosur përpara një marrëveshje për zhvillimin e përbashkët të mineraleve të rralla të Ukrainës, si një pikë kryesore për përfundimin e luftës.
Presidenti ka thënë se nënshkrimi i kësaj marrëveshjeje, që i jep Uashingtonit qasje në këto minerale, ka të bëjë me rikuperimin e shumave të mëdha të parave që ka investuar në mbrojtjen e Ukrainës. Kjo, praktikisht është një qasje e politikës Amerika e Para.
Për Ukrainën, hyrja e presidentit Volodymyr Zelensky, në Shtëpinë e Bardhë për të nënshkruar marrëveshjen është një çështje për të shpëtuar një aleancë që kohët e fundit duket se është prishur.
Macron dhe Starmer
Vizitorët e tjerë të Trumpit në Zyrën Ovale këtë javë ishin edhe krerët e aleatëve të kamotshëm të SHBA-së. Ata, po ashtu, po tentojnë t’i shpëtojnë raportet, pasi Trumpi vazhdimisht i ka kritikuar aleatët e NATO-s se po përdorin paratë e SHBA-së për mbrojtje.
Presidenti francez, Emmanuel Macron, mori shumë buzëqeshje dhe shtrëngim duarsh. Por, nuk ishte menjëherë e qartë nëse nga takimi me Trumpin doli diçka thelbësore. Dhe, të dy u përplasën – ndonëse në një mënyrë të sjellshme – për atë se kush kishte dhënë më shumë ndihmë për Ukrainën.
Trump e lavdëroi kryeministrin britanik, Keir Starmer, për zotimin se do të rrisë shpenzimet për mbrojtje të Mbretërisë së Bashkuar. Vizita e 27 shkurtit nga disa media britanike u cilësua si më e rëndësishmja në karrierën e Starmerit.
Një nga qëllimet kyç të Starmerit ishte të fitojë “sigurinë” e SHBA-së për një mision të mundshëm ushtarak evropian në Ukrainë, që do të vendosej për të mbrojtur një marrëveshje të mundshme armëpushimi apo të paqes.
Trupat në Ukrainë
Siguria është e nevojshme sepse forcat evropiane nuk do të mund t’ia dilnin vetë. Analistët ushtarakë kanë përmendur fusha si inteligjenca, logjistika dhe mbështetja ajrore ku nuk ka mbulim të plotë në krahët evropianë të NATO-s.
Ende është e paqartë nëse një gjë e tillë mund të ndodhë. Macroni e kishte sugjeruar këtë mision një vit më parë, por vetëm tani udhëheqësit kanë filluar të flasin hapur për të si një opsion i mundshëm.
Trump tha se e ka pyetur për forcat evropiane presidentin rus, Vladimir Putin, dhe ai është i gatshëm që ta pranojë një mision të tillë. Që atëherë, zyrtarët rusë kanë ngritur dyshime mbi këtë deklaratë: fillimisht zëdhënësi i Kremlinit, Dmitry Peskov, e më pas ministri i Jashtëm, Sergei Lavrov.
Ende jemi në pritje që Putini t’u përgjigjet deklaratave të Trumpit.
Trump dhe Putin
Bisedat e drejtpërdrejta telefonike mes Trumpit dhe Putinit, të zhvilluara javëve të fundit, kanë trazuar gjërat dhe kanë çuar në mbajtjen e bisedimeve të nivelit të lartë mes SHBA-së dhe Rusisë javën e kaluar në Riad. Komunikimi dypalësh është diçka e re dhe ka ndryshuar gjithë dinamikën.
Papritur, ideja e bisedimeve të paqes më nuk është vetëm teorike. Uashingtoni ka thënë se po ndjek dy qasje për të ulur në tavolinën e negociatave Ukrainën dhe Rusinë.
Por, është e qartë se qasja ndaj Rusisë shkon përtej çështjes së Ukrainës. Pas Riadit, kanë filluar lëvizjet për riorganizimin e ambasadave që mbetën me pak anëtarë stafi pas dëbimeve të diplomatëve nga të dyja palët. Po ashtu, ka lëvizje për mundësinë e raporteve ekonomike.
Kjo ka tronditur, si Ukrainën, ashtu edhe shtetet evropiane, duke çuar në shumë ndryshime të shpejta që u përmendën më sipër./REL/ KultPlus.com
Dhoma e Përfaqësuesve miratoi mbrëmjen e së martës planin e Presidentit Trump për uljen e taksave dhe për kufirin, duke i dhënë një shtysë të madhe axhendës së administratës së re për vitin 2025.
Të gjithë ligjvënësit demokratë votuan kundër, ndërsa një prej tyre abstenoi. Një ligjvënës republikan u shpreh kundër planit të presidentit në votimin 217-215.
Miratimi vjen pas një serie të pazakontë manovrash nga Kryetari i Dhomës së Përfaqësuesve, republikani Mike Johnson, i cili anuloi votimin, ndërsa ligjvënësit u njoftuan se nuk do të kishte votime të tjera gjatë natës. Më pas ai ndryshoi kursin, duke e hedhur ë buxhetin për votim.
Ndryshimi i rrjedhës së ngjarjeve erdhi pasi Johnson dhe republikani i dytë në krye të Dhomës së Përfaqësuesve, Steve Scalise, shpenzuan orë të tëra duke bindur të pavendosurit që të mbështesin planin, një hap paraprak për zgjatjen e shkurtimit të taksave të vitit 2017, të miratuar gjatë mandatit të parë të Presidentit Trump.
Të dy udhëheqësit thanë se vetë Presidenti Trump kishte kontaktuar gjithashtu ligjvënësit ngurrues në lidhje me nevojën për të çuar përpara planin prej 4.5 trilion dollarësh të uljes së taksave, i cili gjithashtu përfshin financimin e përpjekjeve të dëbimit të imigrantëve që jetojnë ilegalisht në Shtetet e Bashkuara, do të shtrëngonte sigurinë kufitare, heqjen e rregullave të tepërta në sektorin energjetik dhe mbulonte shpenzimet ushtarake.
“Presidenti ka biseduar me një numër ligjvënësish. Ai i ka bërë të njohura qëllimet e tij dhe dëshiron që ata të votojnë dhe ta çojmë përpara”, tha Johnson./VOA/ KultPlus.com
Presidenti i Republikës, Bajram Begaj uroi sot Presidentin e 47-të të SHBA-ve, Donald Trump për marrjen e detyrës.
Begaj u shpreh se, Shqipëria është krenare për aleancën dhe miqësinë e saj të fortë me SHBA-në.
“Urimet më të përzemërta në ditën tuaj të inagurimit si Presidenti i 47-të i Shteteve të Bashkuara të Amerikës, Donald Trump”, theksoi Begaj në një postim në rrjetin “X”
“SHBA mbetet dëshmi e patjetërsueshme e vlerave të demokracisë dhe burim paqeje dhe sigurie”, u shpreh Begaj.
“Shqipëria është krenare për aleancën dhe miqësinë e saj të fortë me SHBA-në dhe mbetet e përkushtuar për të forcuar më tej partneritetin tone”, shtoi Presidenti Begaj./atsh/ KultPlus.com
Presidentja e Kosovës Vjosa Osmani, i ka dërguar një letër urimi presidentit të 47-të të ShBA-së Donald Trump, për marrjen e detyrës.
Ajo u shpreh se Kosova është e gatshme të punojë edhe me zëvendëspresidentin JD Vance dhe administratën amerikane, për të forcuar marrëdhëniet mes dyja vendeve.
“Për të promovuar vlerat tona të përbashkëta të lirisë dhe për të adresuar sfidat e kohës sonë”, u shpreh ajo.
“Në emër të popullit të Kosovës ju uroj suksese të mëdha”, theksoi Osmani.
Congratulations to President @realDonaldTrump on swearing-in as the 47th President of the United States of America.
Kosovo stands ready to work with you, Vice President @JDVance, and your administration to strengthen our special relationship, promote our shared values of… pic.twitter.com/tWJ4Ab8aCE
Presidenti amerikan, Donald Trump, ka thënë në inaugurimin e tij se po i kthehet presidencës me optimizëm, dhe se bota po sheh dritë me rizgjedhjen e tij.
“Prioritet ynë kryesor do të jetë që të krijojmë një komb që është krenar, prosperitare dhe i lirë”, ka thënë Trumpi.
“Amerika së shpejti do të jetë më e mirë, më e fuqishme, dhe shumë më e jashtëzakonshme se që ka qenë ndonjëherë”.
“I kthehem presidencës me optimizëm dhe vetëbesim që jemi në një fillim të një epoke ngazëllyese kombëtare”.
“Një dallgë ndryshimin po e merr me vete vendin dhe drita e diellit po bie mbi krejt botën dhe Amerika e ka mundësinë që ta shfrytëzojë këtë rast si asnjëherë më parë, por fillimisht duhet të jemi të sinqertë sa u përket sfidave të cilat i kemi përballë, të cilat ndonëse janë shumë në numër, do të shkatërrohen nga ky momentum shumë i mirë të cilin tani po e sheh bota në Shtetet e Bashkuara”.
Ish-presidentët amerikanë, Barack Obama, Bill Clinton dhe George Bush kanë mbërritur në ceremoninë e inaugurimit të presidentit të zgjedhur të ShBA-ve, Donald Trump.
Barack Obama u pa gruan e tij, Michelle. Javën e kaluar, zyra e saj konfirmoi se ajo nuk do të ishte e pranishme sot.
Ndërkohë, Bill Clinton dhe George Bush u panë të shoqëruar nga bashkëshortet e tyre, njofton Klankosova.tv.
Presidenti Joe Biden konfirmoi se ka lënë një letër në Zyrën Ovale për paraardhësin dhe pasardhësin e tij, presidentin e zgjedhur Donald Trump, raporton CNN.
I pyetur nga gazetarët jashtë Shtëpisë së Bardhë nëse ai ka shkruar një letër, Biden tha, “Po”, megjithëse nuk pranoi të jepte më shumë detaje.
“Kjo është mes meje dhe Trump”, tha ai.
Trump e kishte lënë një letër në vitin 2021 që Biden e përshkroi më vonë si “shumë bujare”.
Biden e mirëpriti Trumpin në Shtëpinë e Bardhë dhe pas një takimi të dy udhëtuan bashkë drejt Kongresit për ceremoninë e betimit.
“Mirë se erdhe në shtëpi”, i tha presidenti amerikan, Joe Biden, pasardhësit të tij, presidentit të sapozgjedhur Donald Trump, teksa e përshëndeti atë në Portikun Verior të Shtëpisë së Bardhë.
Kthimi i Trumpit në Shtëpinë e Bardhë përbën një ‘zhgënjim’ për Bidenin, i cili dikur e shihte veten si personin që parandalonte rikthimin e rivalit të tij në pushtet.
Ai përgënjeshtroi çdo ndjenjë ndërsa shtrëngoi dorën me Trumpin të hënën, duke e mirëpritur atë për çajin dhe kafen tradicionale përpara betimit.
Zyrtarët e Shtëpisë së Bardhë të njohur me planifikimin thonë se nuk ka pasur kurrë ndonjë debat nëse presidenti në largim do të merrte pjesë në hapat ceremonialë, pavarësisht nga fakti se katër vjet më parë, Trumpi nuk i dha të njëjtat mirësjellje ndaj Bidenit, transmeton Klankosova.tv./ KultPlus.com
Presidenti i zgjedhur i Shteteve të Bashkuara, Donald Trump tha të premten se Partia Republikane “do të bëjë përpjekjet e saj më të mira” për t’i dhënë fund praktikës së ndryshimit të orës, të cilën ai e quajti “të papërshtatshme dhe shumë të kushtueshme për vendin”.
Praktika që synon një përdorim më të mirë të orëve me dritë e kursim të energjisë – duke i lëvizur akrepat një orë përpara gjatë gjysmës së vitit në verë, për të shfrytëzuar sa më shumë mbrëmjet – ka qenë në fuqi pothuajse në të gjithë Shtetet e Bashkuara që nga vitet 1960. Por kjo çështje ka qenë një temë debati vitet e fundit.
Disa ligjvënës duan të qëndrojnë me orën lokale gjatë gjithë vitit, ashtu siç është, pa ndodhur ndryshimi, një pjesë kërkojnë që ndryshimi të ndodhë gjatë gjithë vitit, të tjerë duan të ruajnë status quo-në. Presidenti Joe Biden nuk ka mbajtur kurrë një qëndrim publik mbi këtë çështje.
Në mars të vitit 2022, Senati amerikan votoi njëzëri për ta bërë të përhershme çështjen e ndryshimit të orës, por përpjekja ngeci në Dhomën e Përfaqësuesve, për shkak të mungesës së konsensusit mbi këtë çështje.
Në mars një grup dypartiak senatorësh bëri një përpjekje të re në këtë drejtim.
Mbështetësit e ndryshimit të orës argumentojnë se kjo gjë sjell pasdite më me shumë dritë dhe më shumë aktivitet ekonomik gjatë muajve të dimrit. Kritikët thonë se një gjë e tillë i detyron fëmijët të shkojnë në shkollë në errësirë, pasi lindja e diellit vonohet me një orë.
Përkrahësit e eliminimit total të ndryshimit të orës thonë se ndryshimi dy herë në vit i saj, shkakton shqetësime të gjumit dhe probleme shëndetësore.
Kongresi nuk ka mbajtur asnjë seancë dëgjimore të re për këtë çështje për më shumë se dy vjet dhe Senati do të duhet ta shqyrtojë këtë çështje sërish, shkruan VOA, transmeton Klankosova.tv.
Ndryshimi i orës për gjatë vitit u përdor gjatë Luftës së Dytë Botërore dhe u miratua përsëri në vitin 1973 në një përpjekje për të reduktuar përdorimin e energjisë për shkak të një embargoje ndaj naftës, por vendimi nuk ishte popullor dhe u shfuqizua një vit më vonë.
Që nga viti 2015, rreth 30 shtete kanë prezantuar ose miratuar ligje për t’i dhënë fund ndryshimit të orës dy herë në vit. Disa shtete kanë propozuar që ta bëjnë këtë vetëm nëse shtetet fqinje bëjnë të njëjtën gjë.
Presidenti i Shteteve të Bashkuara, Joe Biden, tha të hënën se Shërbimi Sekret ka nevojë për “më shumë”, një ditë pasi agjentët e parandaluan një tjetër përpjekje për ta vrarë ish-presidentin Donald Trump.
Trump shpëtoi pa u dëmtuar pas një “tentimi për ta vrarë atë” në klubin e tij të golfit në Floridë më 15 shtator, tha Byroja Federale e Hetimeve, FBI.
Ky incident, i cili ndodhi vetëm nëntë javë pasi Trumpi i mbijetoi një atentati në Pensilvani, ka ngritur pyetje për sigurinë e kandidatit të republikanëve për president vetëm 50 ditë para zgjedhjeve tejet të polarizuara presidenciale në Shtetet e Bashkuara.
FBI-ja dhe shteti i Floridës janë duke hetuar se si një i dyshuar 58-vjeçar ishte në gjendje të afrohej disa qindra metra afër Trumpit me një pushkë dhe dylbi.
FBI-ja tha se është duke e kryer një hetim ndaj “asaj që duket të jetë një tentim për ta vrarë ish-presidentin Trump” dhe për votimet e mundshme.
Presidenti Biden tha për gazetarë në Shtëpinë e Bardhë të hënën: “Një gjë dua ta bëj të qartë, Shërbimi [Sekret] ka nevojë për më shumë ndihmë, dhe mendoj se Kongresi duhet t’u përgjigjet nevojave të tyre”, tha Biden.
“Falë Zotit presidenti është mirë. Mendoj se kemi nevojë për më shumë personel”, shtoi ai.
Pas incidentit, Trump i lartësoi Shërbimin Sekret dhe policinë, duke i quajtur “patriotë të guximshëm dhe të përkushtuar” për garantimin e sigurisë së tij.
As FBI-ja, e as policia nuk e kanë bërë të ditur emrin e të dyshuarit, por mediat amerikane si, CNN, Fox News, CBS News dhe New York Times, e kanë identifikuar atë si Ryan Wesley Routh, një 58-vjeçar banor i Havait.
Routh është punëtor ndërtimi me një histori të gjatë telashesh me policinë, sipas të dhënave publike. Ai u zhvendos në Havai disa vite më parë nga Karolina e Veriut dhe ka shprehur mbështetje për demokratët dhe për Ukrainën në llogaritë e veta në rrjetet sociale, përfshirë duke kërkuar grumbullimin e të hollave për mbrojtjen e Ukrainës.
Ndërkohë, presidenti i Ukrainës, Volodymyr Zelensky, ka thënë se ndihet i lumtur që Trumpi nuk është dëmtuar dhe që tani është i siguruar.
“Është gjë shumë e mirë që i dyshuari për tentim vrasje është arrestuar shpejt”, tha Zelensky në X.
Në Moskë, Kremlini tha se lidhjet e të dyshuarit me Ukrainën tregojnë se Uashingtoni po “luan me zjarrin” me politikën e saj mbështetëse për Kievin, i cili po lufton për t’i zmbrapsur forcat pushtuese të Rusisë.
Mediat amerikane raportuan se Routh ka postuar shpesh në rrjetet sociale për luftën në Ukrainë dhe ka pasur uebsajte ku ka kërkuar grumbullimin e të hollave dhe rekrutimin e vullnetarëve për të shkuar në Kiev për t’iu bashkuar luftës kundër pushtimit të plotë të Ukrainës, që Moska e nisi në shkurt 2022. /REL/ KultPlus.com
Ish-presidenti Donald Trump ka deklaruar se dëshiron që miliarderi Elon Musk të shërbejë në administratën e tij nëse ai fiton në nëntor.
“Ai është një djalë shumë i zgjuar. Unë sigurisht që do ta bëja, nëse ai do ta bënte atë, sigurisht që do ta bëja. Ai është një djalë brilant,” tha Trump kur u pyet nëse do t’i ofronte Musk një kabinet apo pozicion këshillues, raportoi Reuters të hënën.
Musk nuk iu përgjigj drejtpërdrejt deklaratave të Trump, megjithëse ai postoi një foto të krijuar nga AI duke folur në një foltore të etiketuar “DOGE Department of Government Efficiency” të hënën në X.
Akronimi duket se është një referencë për Dogecoin , një kriptomonedhë që Musk ka promovuar më parë.
“Jam i gatshëm të shërbej”, ka shkruar Musk në postimin e tij.
Bisedimet për bashkimin e Musk në një administratë të dytë Trump kanë qenë të përhapura muajt e fundit. Në maj, The Wall Street Journal tha se Musk kishte folur me Trump për t’u bashkuar me qeverinë e tij .
Musk hodhi poshtë raportin e The Journal në një postim X , duke thënë se “nuk ka pasur asnjë diskutim për një rol për mua në një Presidencë të mundshme Trump”.
Megjithatë Musk duket se e ka zbutur qëndrimin e tij për të punuar për një administratë të mundshme Trump.
Ish-presidenti Donald Trump njoftoi për një sulm kibernetik ndaj një prej faqeve të internetit të fushatës së tij.
Ndërsa ende po zbulohen detaje rreth këtij rasti, kandidati republikan për Nënpresident, JD Vance dha disa intervista të dielën, në të cilat ai sulmoi kandidatët demokratë për President. Ndërkaq, siç njofton korrespondentja e Zërit të Amerikës Veronica Balderas Iglesias, Nënpresidentja Kamala Harris dhe Guvernatori i Minesotës Tim Walz vazhdojnë fushatën të cilën e kanë përqëndruar në çështjet ekonomike.
Lajmi për sulmin kibernetik ndaj kandidatit republikan për President Donald Trump vazhdoi të mbizotërojë njoftimet e shtypit disa orë pasi ai shkroi për këtë të shtunën në platformën e tij të mediave sociale “Truth”.
Ai shkroi: “Sapo u informuam nga firma ‘Microsoft’ se një nga faqet tona të shumta të internetit ishte sulmuar nga qeveria iraniane”. Zyrtarët iranianë i kanë hedhur poshtë akuzat.
Dokumentet që dyshohet se janë marrë përfshinin informacione për kandidatin republikan për Nënpresident, JD Vance. Ai u shfaq të dielën në disa media, por pyetjet u përqëndruan tek gara presidenciale.
Në rrjetin ABC, senatori i Ohajos i hodhi poshtë kritikat për deklaratat mbi familjen që ai ka bërë në të kaluarën dhe e ridrejtoi vëmendjen te politikat e kandidatëve demokratë.
“Pse nuk flasim për inflacionin? Pse nuk flasim për faktin se çmimet e ushqimeve janë të papërballueshme për shkak të politikave të Kamala Harrisit?”, tha zoti Vance.
Ekonomia ishte gjithashtu një pikë diskutimi në një tubim të së shtunës të Nënpresidentes Harris në Las Vegas.
“Premtimi im kur të bëhem presidente është se ne do të vazhdojmë luftën tonë për familjet e shtresës së mesme, duke përfshirë rritjen e pagës minimale dhe heqjen e taksave për bakshishet e kamarierëve”, tha Nënpresidentja Harris.
Rivali republikan bëri një premtim të ngjashëm në të kaluarën dhe akuzoi zonjën Harris për vjedhjen e zotimit të tij për të hequr taksat mbi bakshishet e punonjësve të restoranteve.
Edhe pse janë shtuar thirrjet që zonja Harris të japë më shumë detaje rreth planeve të saj ekonomike, vrulli i fushatës është i pamohueshëm, tha senatorja demokrate Amy Klobuchar në rrjetin ABC.
“Ajo i ka dhënë zemër vendit duke filluar nga Filadelfia në Viskonsin e deri tek tubimi në Arizona me mbi 15,000 pjesmarrës. Njerëzit janë të interesuar të ecin përpara”, thotë senatorja Klobuchar.
Zonja Harris do të kthehet në Uashington të dielën pas një aktiviteti politik në San Francisko. Ajo dhe presidenti Joe Biden pritet të bëjnë një paraqitje publike së bashku të enjten në Meriland.
Ish Presidenti Donald Trump është planifikuar të mbajë fjalim për ekonominë të mërkurën në Karolinën e Veriut./ voa/ KultPlus.com
Kandidati republikan për president, Donald Trump, propozoi që të debatojë me zëvendëspresidenten demokrate Kamala Harris në Fox News më 4 shtator, por fushata e Harris u kundërpërgjigj se Trumpi po përpiqej të tërhiqej nga një debat që tashmë ishte caktuar të transmetohej në ABC.
Rregullat do të ishin të ngjashme me debatin e parë me presidentin Joe Biden, i cili që atëherë ka hequr dorë nga oferta e tij për rizgjedhje, tha Trump në një postim në Truth Social vonë të premten. Por këtë herë do të kishte një “audiencë të plotë në arenë” dhe do të zhvillohej në shtetin e fushëbetejës së Pensilvanisë, tha Trump.
Trump dhe Biden kishin rënë dakord për një debat të dytë më 10 shtator në ABC News, për të cilin ish-presidenti kishte sugjeruar që të zhvendosej në Fox, rrjeti më i njohur me ndjekësit e tij, transmeton Klankosova.tv.
Harris e cila të premten siguroi votat e delegatëve të nevojshëm për të siguruar nominimin e Demokratëve në zgjedhjet e 5 nëntorit, tha të shtunën se planifikon të marrë pjesë në debatin e planifikuar fillimisht, raporton Reuters, transmeton Klankosova.tv.
Harris, e cila të premten siguroi votat e delegatëve të nevojshëm për të siguruar nominimin e Demokratëve për zgjedhjet e 5 nëntorit, tha të shtunën se ka në plan të marrë pjesë në debatin e planifikuar fillimisht.
“Është interesante se si ‘çdo kohë, çdo vend’ bëhet ‘një kohë specifike, një hapësirë specifike e sigurt’,” shkroi ajo në platformën e mediave sociale X. “Unë do të jem atje më 10 shtator, siç ka rënë dakord ai. Shpresoj për ta parë atë atje”.
Zëdhënësi i Harris, Michael Tyler tha se Trump ishte “duke vrapuar i frikësuar” dhe se fushata e saj ishte e lumtur të diskutonte debate të mëtejshme pas atij të 10 shtatorit, për të cilat “të dyja fushatat tashmë kanë rënë dakord”.
Të shtunën, Trump tha në Truth Social se Harris “ka frikë ta bëjë këtë” dhe se do ta shohë atë më 4 shtator, “ose nuk do ta shoh fare”.
Të dy kandidatët kanë kapërcyer vendin në mënyrë agresive, me Trumpin duke provuar linja të reja sulmi kundër Harrisit, raporton Reuters, transmeton Klankosova.tv
Drejtoresha e Shërbimit Sekret amerikan, Kimberly Cheatle tha sot se atentati ndaj ish-presidentit Donald Trump është “dështimi më i madh operacional” i agjencisë në dekada.
“Më 13 korrik, ne dështuam”, u tha zonja Cheatle ligjvënësve të hënën, gjatë një seance dëgjimore në Kongres. Ajo shtoi se merr përgjegjësinë e plotë për gabimet e agjencisë lidhur me sulmin në tubimin elektoral të republikanit Trump në Pensilvani në fillim të këtij muaji.
Drejtoresha e Shërbimit Sekret dëshmoi para një komisioni të Kongresit, mes thirrjeve në rritje për dorëheqjen e saj për shkak të dështimeve të masave të sigurisë në tubimin ku një 20 vjeçar i armatosur tentoi të vriste ish-presidentin Trump.
Komisioni Mbikëqyrës i Dhomës së Përfaqësuesve dëgjoi deklaratat e zonjës Cheatle në paraqitjen e parë të saj para ligjvënësve që nga sulmi i 13 korrikut në Pensilvani, që la të vdekur një pjesëmarrës në tubim.
Zoti Trump u plagos në vesh dhe dy pjesëmarrës të tjerë u plagosën nga Thomas Matthew Crooks, i cili hapi zjarr nga çatia e një objekti aty pranë.
Ligjvënësit kanë shprehur zemërim dhe kanë ngritur pikëpyetje se si një person i armatosur arriti t’i afrohej kaq shumë kandidatit republikan për president, kur ai supozohej të ishte i mbrojtur.
Shërbimi Sekret e ka pranuar se ka mohuar disa kërkesa të fushatës së zotit Trump për masa shtesë sigurie në aktivitetet e tij para atentatit.
Sekretari i Sigurisë Kombëtare, Alejandro Mayorkas e cilësoi atentatin si një “dështim”, ndërsa disa ligjvënës kanë kërkuar dorëheqjen e zonjës Cheatle ose shkarkimin e saj nga presidenti Joe Biden.
Shërbimi Sekret ka thënë se drejtoresha e agjencisë nuk ka ndërmend të dorëhiqet. Deri tani, ajo ka mbështetjen e presidentit demokrat dhe sekretarit të sigurisë kombëtare.
Zyrtarët i kanë thënë agjencisë së lajmeve ‘Associated Press’ se para atentatit, forcat e zbatimit të ligjit janë vënë në dijeni të veprimeve të dyshimta të autorit të sulmit, afër vendit ku po mbahej tubimi. Ai ishte vërejtur duke kryer matje të distancës nga çatia prej nga sulmoi, tek skena ku më vonë u ngjit ish-presidenti. Po ashtu kanë qarkulluar pamje të Crooks pranë perimetrit të sigurisë.
Më vonë dëshmitarët e panë atë duke u ngjitur në çatinë e një objekti që ndodhej 135 metra larg skenës ku ish-presidenti mbajti fjalimin para mbështetësve të tij.
Ai qëlloi disa herë me një armë automatike, ndërsa në xhep kishte një pajisje për aktivizimin e një mjeti shpërthyes në makinën e tij të parkuar aty pranë.
Sulmi ndaj zotit Trump ishte përpjekja më serioze për vrasjen e një presidenti apo kandidati për president që nga plagosja e Ronald Reaganit më 1981.
Autoritetet po vazhdojnë hetimet mbi motivin e autorit të sulmit, por deri tani nuk kanë gjetur ndonjë prirje ideologjike që do të hidhte më shumë dritë mbi sulmin.
Hetuesit që kontrolluan telefonin e tij gjetën fotografi të republikanit Trump, demokratit Biden dhe zyrtarëve të tjerë të lartë të qeverisë. Hetuesit zbuluan gjithashtu se ai kishte kërkuar në internet datat e Kuvendit Kombëtar të Partisë Demokrate dhe datat e tubimeve tjera të zotit Trump. Ai kishte kërkuar edhe informacione mbi depresionin./VOA/ KultPlus.com
Kamala Harris dha deklaratën e saj të parë për shtyp që kur Joe Biden u largua nga gara presidenciale.
Harris, ish-prokurorja e përgjithshme e Kalifornisë, pritet të mbështetet shumë gjatë fushatës së saj për të zëvendësuar Biden si kandidate demokrate.
“Kamala Harris u qëndron përballë mashtruesve dhe kriminelëve. Donald Trump është një kriminel i dënuar”, thuhet në deklaratë.
Ammar Moussa, një ish-zëdhënës i fushatës së Bidenit, i cili tani po punon për Harris, shtoi: “Zëvendëspresidentja Kamala Harris i ka mbajtur kriminelët përgjegjës gjatë gjithë karrierës së saj – dhe Donald Trump nuk do të jetë ndryshe”.
Ndërsa Harris e ka “kushtuar karrierën e saj për ta bërë jetën më të mirë për njerëzit që punojnë”, Moussa vazhdoi, “Trump kujdeset vetëm për veten”.
Trump tha të dielën se beson se Harris do të jetë “më e lehtë për t’u mposhtur” se Biden pasi fushata e tij filloi sulmin e saj të parë kundër hyrjes së re në zgjedhjet presidenciale, shkruan The Telegraph.
Drejtoresha e Shërbimit Sekret Amerikan Kimberly Cheatle publikoi të hënën deklaratën e saj të parë që nga atentati i ndodhur të shtunën ndaj ish-presidentit të ShBA-së Donald Trumpit.
Më poshtë mund të lexoni deklaratëne e plotë të publikuar nga CNN:
“Dëshiroj të filloj duke shprehur ngushëllimet e mia më të thella për familjen dhe miqtë e Corey Comperatore, i cili u vra gjatë atentatit ndaj jetës së ish-presidentit Donald Trump në Butler, Pensilvani, të shtunën, si dhe atyre që u plagosën gjatë këtij akti dhune të pakuptimtë.
Personeli i Shërbimit Sekret në terren lëvizi me shpejtësi gjatë incidentit, me ekipin tonë kundër snajperistit që neutralizoi sulmuesin dhe agjentët tanë po zbatonin masa mbrojtëse për të garantuar sigurinë e ish-presidentit Donald Trump.
Që nga të shtënat, unë kam qenë në kontakt të vazhdueshëm me personelin e Shërbimit Sekret në Pensilvani, i cili punoi për të ruajtur integritetin e skenës së krimit derisa FBI-ja mori rolin e saj si agjencia kryesore e hetimit në tentativën për vrasje. Unë kam qenë gjithashtu duke u koordinuar me detajet mbrojtëse për ish-presidentin Trump dhe kam informuar presidentin Biden për detajet e incidentit.
Shërbimi Sekret po punon me të gjitha agjencitë federale, shtetërore dhe lokale të përfshira për të kuptuar se çfarë ndodhi, si ndodhi dhe si mund të parandalojmë që një incident si ky të mos ndodhë përsëri. Ne e kuptojmë rëndësinë e rishikimit të pavarur të shpallur dje nga presidenti Biden dhe do të marrim pjesë plotësisht. Ne gjithashtu do të punojmë me komitetet përkatëse të Kongresit për çdo veprim mbikëqyrës.
Incidenti në Pensilvani ka çuar në mënyrë të kuptueshme në pyetje në lidhje me përditësimet ose ndryshimet e mundshme të sigurisë për Konventën Kombëtare Republikane në Milwaukee. Shërbimi Sekret i ShBA-së, në bashkëpunim me partnerët tanë federalë, shtetërorë dhe vendorë të zbatimit të ligjit dhe sigurinë publike, harton plane operacionale të sigurisë për Ngjarjet e Sigurisë Speciale Kombëtare (NSSE) që të jenë dinamike në mënyrë që t’i përgjigjet një mjedisi kinetik të sigurisë.
Jam e bindur në planin e sigurisë që kanë vendosur koordinatori ynë i Shërbimit Sekret RNC dhe partnerët tanë, të cilin e kemi shqyrtuar dhe forcuar pas të shtënave të së shtunës. Planet e sigurisë për Ngjarjet e Sigurisë Speciale Kombëtare janë krijuar për të qenë fleksibël. Ndërsa konventat përparojnë dhe në përputhje me udhëzimet e presidentit, Shërbimi Sekret do të përshtatë vazhdimisht operacionet tona sipas nevojës për të garantuar nivelin më të lartë të sigurisë dhe sigurisë për pjesëmarrësit e kongresit, vullnetarët dhe qytetin e Milwaukee. Përveç përmirësimeve shtesë të sigurisë që siguruam detajet e ish-Presidentit Trump në qershor, ne kemi zbatuar gjithashtu ndryshime në detajet e tij të sigurisë që nga e shtuna për të siguruar mbrojtjen e tij të vazhdueshme për konventën dhe pjesën e mbetur të fushatës.
Shërbimi Sekret është i ngarkuar me përgjegjësinë e jashtëzakonshme për të mbrojtur liderët aktualë dhe të mëparshëm të demokracisë sonë. Është një përgjegjësi që unë e marr jashtëzakonisht seriozisht dhe jam e përkushtuar për ta përmbushur atë mision.”
Papa Françesku e ka dënuar atentatin që iu bë të shtunën ish-presidentit amerikan Donald Trumpit.
Ai ngjarjen e quajti episod të dhunës që lëndon njerëzit dhe demokracinë, raporton Sky News, transmeton Klankosova.tv.
Në një deklaratë nga Vatikani, Papa tha: “Selia e Shenjtë shpreh shqetësimin e saj për episodin e dhunës së mbrëmshme, që lëndon njerëzit dhe demokracinë, duke shkaktuar vuajtje dhe vdekje”.
“I bashkohemi lutjes së peshkopëve amerikanë për Amerikën, për viktimat dhe për paqen në vend, në mënyrë që arsyet e dhunës të mos mbizotërojnë kurrë”.
Festivali i Filmit në Kanë i këtij viti filloi dje, me ngjarjet jashtë ekranit që ka të ngjarë të jenë po aq dramatike sa historitë në përzgjedhjen e premierave të filmave të mbushur me yje.
Filmat e shumëpritur përfshijnë projektin e vetëfinancuar të regjisorit Francis Ford Coppola, Megalopolis, ndërsa të pranishmit patën një paraqitje të shkurtër të Sebastian Stan si një Donald Trump i ri në The Apprentice.
Filmat më të mëdhenj të dy javëve do të përfshijnë gjithashtu pjesën më të fundit të ekskluzivitetit
të Mad Max të George Miller.
Por ka zëra se një sërë aktorësh dhe kineastësh mund të akuzohen publikisht për abuzim seksual; ekziston një kërcënim për grevë nga punonjësit e festivalit; dhe një drejtor iranian mori pjesë disa ditë pasi u largua nga vendi i tij pasi mori një dënim me burg.
Këtu janë disa gjëra që duhet t’i kushtoni vëmendje ndërsa Kana hapi tapetin e saj të kuq.
Nëse mendonit se hobet tuaja ishin të shtrenjta, kurseni një mendim për regjisorin veteran Francis Ford Coppola, i cili ka shpenzuar 120 milion dollarë (95 milion £) duke bërë Megalopolis.
Duke luajtur Adam Driver si një arkitekt që rindërton një qytet të goditur nga tragjedia, Laurence Fishburne dhe Dustin Hoffman gjithashtu shfaqen në këtë festival.
Nëse keni menduar se Kana mund të mos ketë lidhje me zhvillimin e zgjedhjeve presidenciale në SHBA, atëherë keni gabuar. Kjo për shkak se historia e rrugës e një Donald Trumpi të ri në politikë është dokumentuar në filmin The Apprentice. Regjisori Ali Abbasi ka debutuar me Sebastian Stan si një Trump të ri dhe Maria Bakalova si gruan e tij të parë, Ivana. Kritikët kanë shprehur gjithashtu interesin e tyre për të parë qëndrimin e yllit të “Succession”, Jeremy Strong ndaj mentorit të Trump, Roy Cohn./tema/KultPlus.com
Festivali i Filmit në Kanë i këtij viti filloi dje, me ngjarjet jashtë ekranit që ka të ngjarë të jenë po aq dramatike sa historitë në përzgjedhjen e premierave të filmave të mbushur me yje.
Filmat e shumëpritur përfshijnë projektin e vetëfinancuar të regjisorit Francis Ford Coppola, Megalopolis, ndërsa të pranishmit patën një paraqitje të shkurtër të Sebastian Stan si një Donald Trump i ri në The Apprentice.
Filmat më të mëdhenj të dy javëve do të përfshijnë gjithashtu pjesën më të fundit të ekskluzivitetit të Mad Max të George Miller.
Por ka zëra se një sërë aktorësh dhe kineastësh mund të akuzohen publikisht për abuzim seksual; ekziston një kërcënim për grevë nga punonjësit e festivalit; dhe një drejtor iranian mori pjesë disa ditë pasi u largua nga vendi i tij pasi mori një dënim me burg./ KultPlus.com
Sikurse e kishte paralajmëruar disa kohë më parë, ish-presidenti amerikan Donald Trump do të hapë rrjetin e tij social të quajtur “Truth Social”. Sikurse vet ai e deklaroi, ky rrjet do konkurrojë rrjetet e tjera si Facebook apo Twitter.
“Jam i emocionuar që do ju shpërndaj të vërtetën nëpërmjet rrjetit Truth”, shtoi ai. Facebook Inc i pezulloi llogaritë e ish-presidentit amerikan Donald Trump në Facebook dhe Instagram për dy vjet. Ai u ndalua për një kohë të pacaktuar nga të dy rrjetet sociale në janar pas postimeve që bëri në trazirat e Kapitolit të SHBA-së./lapsi.al/ KultPlus.com
Balona me ajër, e gjatë 6 metra, u bë simbol i protestave britanike kundër presidentit amerikan në largim.
Balona me ajër, karikatura që personifikon Donald Trumpin e që u bë simbol i Britanisë së Madhe kundër presidentit amerikan ka siguruar vendin e vet në histori brenda një muzeu me rëndësi.
Balona e mbushur me helium, e paguar me fonde të grumbulluara, e shfaq Trumpin si një bebe të zhurmshme të portokalltë që mban pelene, me duart e tij të vogla, që shtrëngojnë një telefon. Fillimisht ajo qe shfaqur mbi sheshin e Parlamentit gjatë protestave për vizitën e parë presidenciale të Trumpit në Britani, në vitin 2018. U rishfaq për vizitën e tij shtetërore në vitin 2019 dhe gjithashtu u shfaq në Francë, Argjentinë, Irlandë, Danimarkë dhe vende të tjera në SHBA.
Tani, pas turneut global, balona e Trumpit si bebe, e dizajnuar nga Matt Bonner dhe e konstruktuar nga “Imagine Inflatables of Leicester”, është marrë nga Muzeu i Londrës. Do të ruhet dhe do të shfaqet si pjesë e koleksionit që ka nën mbrojtje muzeu.
Kreatoret e portretit kanë thënë se po shpresojnë që të shërbejë si një rikujtim për luftën kundër “politikave të urrejtjes”.
“Përderisa ne jemi të kënaqur që balonën e Trumpit si bebe, tani ka hyrë në histori së bashku me vetë Trumpin, ne nuk jemi nëniluzion që ky është fundi i historisë”, kanë thënë ata në një deklaratë për media.
“Ne shpresojmë që vendi i bebes në Muze do të jetë si një rikujtim për kohën kur Londra ishte kundër Trumpit dhe do t’i nxisë ata që e shohin, që ta kuptojnë se si mund të vazhdojnë luftën kundër politikave të urrejtjes. Mbi të gjitha, ne shpresojmë që bebja Trump shërben si rikujtim i politikave të rezistencës që kanë ndodhur gjatë mandatit të Trumpit”.
Me shfaqjen e balonës në vitin 2018, Nigel Farage e ka quajtur “ofendimi më i madh që i është bërë një presidenti amerikan”. Trumpi pati thënë: “Hamendësoj se e kanë vendosur balonën që të mos ndihem i mirëpritur e që nuk kam arsye të shkoj në Londër”.
Sharon Ament, drejtoresha e Muzeut të Londrës, ka thënë: “Sigurisht që muzeu nuk është politik dhe se nuk ka një qëndrim në lidhje me politika në Amerikë”. Por balona prek një përgjigje tipike britanike – satirën. “Ne e përdorim shakanë shumë. Dhe ne i ngacmojmë politikanët. Ky është një shembull i madh i kësaj”.
Balona tashmë ka arritur në Muze, ka thënë ajo, e palosur në një valixhe. “Është në kohë pasi që po vjen te ne në ditët e fundit të presidentit Trump si president… gjëra më ikonike është për momentin në karantinën e muzeut. Të gjitha objektet duhet që të vendosen në karantinë, para se ato të bëhen pjesë e koleksionit pasi që mund të kenë insekte”.
Muzeu është një strehë për shëmbëlltyra, që është “një përgjigje nga londinezët”, ka thënë ajo. “Kjo ide ka lindur në Londër…ishte e jashtëzakonshme dhe kreative”.
“Kjo balonë ishte vetëm një copëz e vogël e një lëvizjeje globale”, ka thënë realizuesi. “Një lëvizje që është udhëhequr nga njerëzit e margjinalizuar, të cilët janë prekur më së shumti nga politikat e Trumpit – roli i të cilit në këto momente nuk duhet nënvlerësuar”. /Koha/ KultPlus.com
Presidenti i Shteteve të Bashkuara të Amerikës, Donald Trump, ka treguar prapaskena nga takimi mes Kosovës dhe Serbisë më 4 shtatorit në Shtëpinë e Bardhë në Uashington.
Kandidati për t’u zgjedhur sërish si President ShBA-ve, në një tubim për fushatë zgjedhore tha se nuk u nevojit shumë kohë për t’u arritur marrëveshja mes shteteve.
“Marreveshja në mes Kosovës dhe Serbisë u arrit për 15 minuta. Derisa palët që ishin në Zyrën Ovale të Shtëpisë së Bardhë, përqafoheshin e putheshin”, u shpreh Trump në Bullhead City, Arizona.
Donald Trump tha se gjatë takimeve përfaqësuesve të Kosovës dhe atyre të Serbisë, siç thotë ai iu ka thënë se a janë budallenjë që po vriten mes vete./Front Online/ KultPlus.com
