Etiketë: Ulza

Ulza, destinacioni turistik në Dibër

Posted on by Kult Plus

Qyteza e Ulzës vetëm 1 orë e 10 minuta larg Tiranës, është një nga destinacionet më interesante për të kaluar fundjavën, mes qetësisë dhe bukurive që kjo qytezë ofron.

Tashmë atë e vizitojnë edhe turistë që vijnë nga qytete të tjera të vendit, si dhe turistë të huaj nga Italia, Franca, Gjermania, Çekia e Polonia.

E pozicionuar midis bashkive Mat dhe Mirditë, Parku Rajonal i liqenit të Ulzës ka një sipërfaqe prej 4,206 hektarësh dhe shtrihet nëpër të gjithë kurorën e liqenit të Ulëzës dhe Shkopetit, në një lartësi 400 m mbi nivelin e detit.

Kjo është zona turistike më e afërt për banorët e këtyre bashkive, të cilët e frekuentojnë edhe për plazh gjatë verës. Pas shpalljes Park Natyror Rajonal rreth pesë vite më parë, tashmë Ulzën e vizitojnë edhe turistë që vijnë nga qytete të tjera të vendit, si dhe turistë të huaj.

Në këtë qytezë, turistët vendas dhe të huaj shijojnë bukuritë natyrore si dhe pyjet e shumta duke bërë hiking dhe eksploruar shtigjet. Gjithashtu turistët e aventurës mund të shijojnë lundrimin me kanoe në liqen. Për të apasionuarit pas turizmit të kulturës mund të vizitojnë kullat e vjetra plot histori nga e kaluara dhe kishat.

Mikpritja dhe kulinaria e shumëllojshme nuk mungojnë në këtë qytezë ku vizitorët shijojnë ushqimi tradicional me bazë peshku dhe prodhimet bujqësore të zonës.

Ulëza ka shumë për t’i ofruar turistëve përgjatë gjithë vitit. / KultPlus.com

Shkopeti dhe Ulza, “përralla” turistike fare pranë Tiranës

Posted on by KultPlus

Të kujdesesh për natyrën dhe mjedisin dhe ta promovosh atë si asset turistik nëpërmjet aparatit fotografik është një obligim qytetar për këtë vend.

Shkopeti dhe Ulza, të bashkuara nga liqeni i tyre i përbashkët, jo larg Tiranës, në krahun e djathtë të hyrjes së Rrugës së Kombit, në hyrje të rrugës për në Burrel, një vend piktoresk ku gërshetohet natyra, mjedisi ujor me plazhe të vegjël lumor që shfrytëzohen gjatë verës, por, tani në periudhën dimërore të ofron një mjedis të këndshëm çlodhjeje dhe të ofron një gastronomi tepër autoktone. Ky vend i bukur ka 5 vjet që është shpallur Park Natyrorë dhe vizitorët në drejtim të tij vazhdojnë të rriten.

Kreu i Turizmit dhe Mjedisit, Blendi Klosi, në prill të këtij viti, në pjesëmarrjen e tij në ceremoninë e festimit të 5 vjetorit të shpalljes Park Natyrorë, u shpreh se “politika e qeverisë shqiptare është shndërrimi i Shqipërisë në një destinacion europian turistik”.

Dhe kjo, sipas tij, do të arrihet edhe duke zhvilluar të gjitha resurset për të ofruar alternativa turistike jo vetëm për vizitorët vendas por edhe të huaj. Shqipëria ka një magnet turistik dhe ne këtë detyrë kemi, që ne sot ta shndërrojmë Shqipëri në një destinacion turistik europian”.

Tashmë, Ulza Eco Park që mban në ekuilibër, mbrojtjen e mjedisit dhe zhvillimin e turizmit është kthyer në një model që duhet zhvilluar gjerësisht si turizmi i së ardhmes.

Eco Ulza Park është i pari model mbrojtje dhe zhvillimi, që e kthen këtë zonë nga një Park i thjeshtë Natyror në Eco Park në destinacion të ri turistik. Kjo zonë tashmë po frekuentohet edhe në stinët e tjera të vitit veç asaj të verës. Falë këtij projekti, përveç turizmit kulturor në këtë zonë po zhvillohen ecje në natyrë, sporte ujore, vozitje, kajake, intenerare biçikletash dhe në veçanti kulinaria dhe historia e zonës.

Shkopeti dhe Ulza janë shumë afër për një piknik në fundjavë, me vlera natyrore dhe historike, por dhe ekonomike për aksesin e tyre infrastrukturorë./a.g/KultPlus.com

Ulza Eco Park, destinacion tërheqës i turizmit gjithëvjetor

Posted on by Kult Plus

Ulza Eco Park, një destinacion i ri tërheqës, autentik, mikpritës dhe interesant i turizmit rural e atij gjithëvjetor i shtohet destinacioneve kombëtare të turizmit.

Një zonë ku ndërthuren bukuritë natyrore me trashëgiminë materiale shpirtërore, Ulza Eko Park krijon kushtet e nevojshme për zhvillimin e ekoturizmit, turizmit rural, eksplorues, e atij gjithëvjetor.

Në njësinë Administrative Ulëz u organizua sot një aktivitet i veçantë promovimi, që synon nxitjen e zhvillimit të turizmit qëndrueshëm, duke u ofruar turistëve shqiptarë dhe atyre të huaj një burim tjetër turistik.

Në një prononcim për ATSH-në, Prefekti i Qarkut Dibër, Nexhbedin Shehu ndalet te resurset natyrore të kësaj zone, e cila sot po promovohet si destinacion i mirëfilltë turistik.


Sipas Prefektit Shehu, Ulza Eko Park përfshin një park me liqene dhe male, një rajon mjaft atraktiv turistik që shtrihet nga Shkopeti deri në Ulëz.

“Në kuadër të projektit të Rilindjes Urbane, qeveria shqiptare ka investuar tashmë në infrastrukturën rrugore të qytezës së vogël së Ulzës, ku është drejt përfundimit segmenti prej 3 km, ndërsa pritet shtimi i investimeve në këtë zonë”, tha Prefekti Shehu.

Bashkia Mat, në bashkëpunim me Ministrinë e Turizmit dhe Mjedisit, Agjencinë Kombëtare të Zonave të Mbrojtura (AKZM), Agjencinë për Zhvillimin e Rajonit 2 (AZHR2), Fondacionin CNVP (Bashkojmë Vlerat e Natyrës me Njerëzit) dhe Fondi Shqiptar i Zhvillimit organizuan sot eventin hapës të ”Ulza Eco Park”, si destinacioni më i ri kombëtar i turizmit në Shqipëri.