Etiketë: UP

Fushata “Në mbështetje të studentëve të Universitetit të Prishtinës” ka për qëllim ngritjen e fondeve që do të mundësojnë mbështetjen e studentëve të Universitetit të Prishtinës të cilët kanë synim fillimin e rrugëtimit të tyre në ndërmarrësi përmes Qendrës së Ndërmarrësisë dhe Inkubimit, VentureUp.

Kjo fushatë u mundësua falë biznesmenit dhe filantropit Shqiptaro-Amerikan, Ramiz Kukaj, pronar i restaurantit të mirënjohur në Nju Jork ‘Çka ka Qëllu’, i cili pranoi ftesën që t’i bashkohet kësaj iniciative duke e ditur nevojën e madhe që studentë e këtij Universiteti kanë për qasje ndaj mundësive dhe resurseve për të krijuar një të ardhme të suksesshme për veten dhe vendin.

“Vazhdimisht themi se rinia është e ardhmja e Kosovës, mirëpo shpesh-herë e shohim se rinia po vazhdon të ballafaqohet vet me sfidat dhe problemet, dhe rrallë herë marrin ndihmën dhe mbështetjen e nevojshme drejt suksesit. Jemi me fat të kemi një rini kaq aktive, ambicioze dhe kapacitet të arrijë majat botërore, dhe tash e kemi mundësinë konkrete t’u japim një ndihmë të vogël, por që do të thotë shumë për ta, për ndërmarrjet që do të krijojnë dhe pashmangshmërisht në zhvillim të vendit” u shpreh Kukaj.

Venture Up është Qendra e Ndërmarrësisë dhe Inkubatori i Universitetit të Prishtinës. Kjo qendër ofron mbështetje për ndërmarrës, mentorim dhe trajnim për studentët të cilët dëshirojnë të transformojnë idetë e tyre në biznese reale, dhe organizata të vet-qëndrueshme.

Me fondet e ngritura, VentureUp synon të inkuboj 17 ndërmarrje të reja ‘startup’, me 51 ndërmarrës të rinj, të ofrojë trajnime online për 14 javë, të ofrojë 150 orë mentorim për studentët, si dhe 60 orë/muaj trajnime në Aftësi të Buta. Qëllim është që të aftësohen 4,800 të rinj deri në Shtator të 2020-së.

Ju mund të dhuroni duke klikuar në linkun:  https://bit.ly/2zTl8Ua

Viti i ri akademik 2020/2021 në Universitetin e Prishtinës mund të mos nisë më 1 tetor, ashtu siç e parasheh Statuti i UP-së.

Kjo pasi që Parlamenti Studentor ka drejtuar një kërkesë që fillimi i tij të shtyhet për dy javë. Kërkesa është bërë për shkak se këtë vit mbajtja e provimeve në afatet e qershorit e shtatorit mund të marrë më shumë kohë sesa viteve të kaluara, pasi studentët duhet të ndahen në disa grupe për t’i respektuar masat e distancës sociale.

Sipas kryetarit të Parlamentit studentor, Bledian Geci, kjo shtyrje duhet të bëhet në mënyrë që organizimi i provimeve të mos interferojë me vitin e ri akademik. Ka thënë se presin që Universiteti ta miratojë kërkesën e tyre. Kurse, Rektorati i Universitetit të Prishtinës ka bërë të ditur për KOHËN se kërkesa për shtyrjen e fillimit të vitit të ri akademik do të trajtohet të premten nga Senati.

Përveç tjerash, pritet të vendoset edhe për hapjen e afatit të provimeve të qershorit dhe mënyrën e mbajtjes së tyre. Koha.net / KultPlus.com

Disa nga organizatat e studentëve të Universitetit të Prishtinës, të mbështetur nga shoqëria civile, kanë mbajtur sot një protestë para Ministrisë së Arsimit, Shkencës dhe Teknologjisë.

Nëpërmjet kësaj proteste ata kanë kërkuar anulimin e vendimit të ministres në detyrë të Arsimit, Hykmete Bajrami, për emërimin e tre anëtarëve të këshillit drejtues, si dhe anulimin e mbajtjes së zgjedhjeve në këtë institucion të lartë arsimorë.

Me anë të kësaj proteste, përveç që shprehën pakënaqësi, ata gjithashtu kërkuan nga Ministrja Bajrami, që të tërheq vendimet ose të dorëhiqet nga pozita.

Derisa nuk përmirësohet situata me pandeminë Covid-19, Senati i Universitetit të Prishtinës nuk pritet të vazhdojë me marrjen e vendimeve për zgjedhjen e personelit akademik, sipas konkursit të fundit të hapur muaj më parë.

Sipas përfaqësuesve të UP-së, trajtimi i propozimeve të fakulteteve për zgjedhjen dhe avancimin e stafit akademik është vështirë të realizohet online, raporton KOHA.

Për këtë arsye, sipas prorektorit për kërkime shkencore, Faton Berisha, nuk kanë planifikuar të mbajnë mbledhje online për trajtimin e këtyre kërkesave.

E me këtë ide nuk po pajtohen të gjithë anëtarët e Senatit. Dekani i Fakultetit Filozofik, Bujar Dugolli, ka deklaruar se nuk ka asnjë pengesë që mbledhjet e Senatit të vazhdohen online. Ai ka treguar se tashmë e ka bërë një kërkesë të tillë, por nuk ka marrë ende përgjigje nga menaxhmenti i UP-së.

Ndërkaq, dekani i Fakultetit të Arteve, Agim Selimi, ka treguar se për shkak të situatës së krijuar me pandeminë, mund të ketë vonesa në procesin e konkursit, por shton se shqyrtimi i kandidatëve që kanë aplikuar nuk do të duhej të realizohej në distancë.

Senati, që është përgjegjës për shqyrtimin e propozimeve për zgjedhjen dhe avancimin e stafit akademik, përbëhet nga 42 anëtarë prej tyre rektori, prorektorët, sekretari i përgjithshëm i UP-së, anëtarë të stafit akademik e administrativ dhe anëtarë nga parlamenti i studentëve.

“Koha” ka kërkuar të dhëna nga Rektorati për numrin e kandidatëve për staf akademik që janë në pritje të zgjedhjes ose avancimit sipas konkursit të fundit, mirëpo nuk ka marrë përgjigje tash e disa ditë. Koha.net / KultPlus.com

Me rastin e Ditës Botërore të Librit, Universiteti i Prishtinës “Hasan Prishtina”, ka mbajtur një diskutim virtuarl për librin në kohën e karantinës, transmeton Klan Kosova.

Sipas njoftimi të UP-së thuhet se nga kjo ligjëratë, qindra studentë përfituan këshilla e sugjerime për shfletimin e librave.

“Prof. dr. Sali Bashota, prof. ass. dr. Nerimane Kamberi, prof. asoc. dr. Rrahman Paçarizi dhe prof. ass. dr. Majlinda Bregasi, nën moderimin e ass. Durim Abdullahut, dhanë opinionet e tyre në lidhje me librin në kohën e karantinës, falë diskutimit virtual të organizuar nga Universiteti i Prishtinës “Hasan Prishtina”, me rastin e Ditës Botërore të Librit”.

“Nga kjo ligjëratë, qindra studentë përfituan këshilla e sugjerime për shfletimin e librave, të cilat u cilësuan si libra që duhet lexuar në këtë kohë karantine. Ndër të tjera, në këtë ligjeratë u diskutua edhe për ndërlidhjen e leximit me mediat, universitetin dhe shoqërinë”.

“Përmes këtij aktiviteti, UP-ja ka shënuar 23 Prillin, ditë e cila është shpallur nga UNESCO si Dita Botërore e Librit dhe e së Drejtës së Autorit”, thuhet në këtë njoftim.

Universiteti i Prishtinës “Hasan Prishtina” po vazhdon t’u japë ndihmë institucioneve shëndetësore në luftimin e pandemisë.

Përmes një komunikate të lëshuar të enjten, UP-ja ka bërë të ditur se ka vënë në funksion gjitha resurset. Po ashtu, ka bërë të ditur si i ka ofruar Institutit Kombëtar të Shëndetit Publik disa pajisje KOHA.

“Universiteti i Prishtinës ‘Hasan Prishtina’, që nga përhapja e pandemisë COVID-19 në vendin tonë, ka vënë në funksion resurset humane dhe ato materiale në ndihmë të institucioneve dhe komunitetit, me mision tejkalimin e situatës së krijuar sa më parë dhe me më pak pasoja. Në kuadër të kësaj, Fakulteti i Bujqësisë dhe Veterinarisë në UP, ka kultivuar bashkëpunim të ngushtë dhe të vazhdueshëm me Institutin Kombëtar të Shëndetit Publik, për t’i shërbyer interesit të përbashkët për mbrojtjen e shëndetit publik”, thuhet në komunikatë.

UP-ja ka cituar edhe profesorin Kurtesh Sherifi, të ketë thënë: “Fakulteti ynë ka përkrah IKShPK-në me kite për 500 mostra për ekstrahim të ARN-së së virusit në realizimin e metodës molekular-biologjike RT-PCR, si dhe me huazim të pajisjes Thermocycler për amplifikim dhe detektim të gjenomit të virusit”.

Sipas tij, FBV-ja, po ashtu, i ka dhënë si huazim Institutit, për një kohë të pacaktuar disa pajisje laboratorike, si: centrifugë, termomikser, vorteks, pipeta dhe tri lampa UV për dekontaminim të kabineteve mikrobiologjike, pra aty ku testohen mostrat për analiza molekulare-biologjike me RT-PCR.

“Fakulteti i Bujqësisë dhe Veterinarisë njëherësh ka shprehur vullnetin që në rast të nevojës, ata mund të shërbejnë edhe me staf profesional, të cilët mund ta ndihmojnë Departamentin e Mikrobiologjisë Molekulare në kuadër të institutit, në testimin e mostrave të pacientëve me SARS-CoV-2”, thuhet tutje në komunikatën e UP-së.

Besnik Emërllahu, tashmë ka marrë titullin inxhinier pasi ditë më parë diplomoi në Fakultetin e Inxhinierisë Mekanike në Universitetin e Prishtinës “Hasan Prishtina”.

Ai u bë studenti i parë që temën e diplomës arriti ta mbrojë në mënyrë virtuale me temën “Diagonstikimi kompjuterike i sistemeve të automjeteve në autoservisin “Fatoni”, njofton Klan Kosova.

Kjo formë e re e diplomimit, erdhi pasi UP-ja mori vendim që temat e diplomës të studentëve të mbrohen përmes platformave online, pas situatës së krijuar nga virusi Covid- 19.

Besniku thotë se kjo metodë është aq e mirë sa që duhet të përdoret edhe pas daljes nga karantina.

“Kjo metodë duhet të gjejë aplikim edhe pas kësaj pandemie sepse për studentët është më e lehtë, pasi që studenti është më pak i stresuar dhe ndjehet më lirë në mënyrën e të shprehurit”, tregon ai.

Këtë ceremoni e nisi dekani i FIM-it, prof. dr. Ahmet Shala dhe sipas procedurave mbrojtja u bë para komisionit i cili u përbë nga: prof. dr. Ilir Doçi (kryetar), prof. dr. Arbnor Pajaziti (mentor-anëtar) dhe prof. ass. ar. Ramadan Duraku (anëtar).

Kjo mënyrë e diplomimit ka nisur për nivelin baçelor, por pritet të vazhdohet edhe me atë master, me qëllim që të u mundësohet studentëve diplomimi në kohë.

Departamenti i Psikologjisë i Universitetit të Prishtinës “Hasan Prishtina”, së bashku me studentët e programit master “Psikologji Shkollore dhe Këshillim”, sot, në kuadër të ueb faqes së UP-së kanë lansuar faqen shendetimendor.uni-pr.edu.

Faqja synon të ofrojë video psikoedukuese për shëndetin mendor dhe ruajtjen e tij gjatë pandemisë COVID-19.

“Situata e fundit e krijuar me pandeminë COVID-19 dhe masat e marra si kufizimi i lëvizjes, mungesa e kontakteve sociale, ndryshimi i rutinës ditore dhe frika nga e panjohura, mund të shkaktojnë potencialisht parehati të përgjithshme, që mund të manifestohet me stres dhe ankth me intensitet të ndryshëm tek qytetarët. Departamenti i Psikologjisë në bashkëpunim me studentët ideuan dhe realizuan një faqe praktike dhe të thjeshtë, ku qytetarët mund të marrin informata praktike përmes videove psikoedukuese për gjendjet e caktuara të shëndetit mendor si stresi apo ankthi dhe në të njëjtën kohë të informohen se si mund të ballafaqohen me ato në kushte shtëpie. Intervenimet e rekomanduara janë të bazuara në evidencë shkencore se kanë ndikim pozitiv në uljen e intensitetit të ankthit, stresit dhe gjendjeve të tjera të shëndetit mendor, që mund të vështirësojnë funksionimin e përditshëm të qytetarëve”, thuhet në njoftimin e UP-së.

Sipas njoftimit, faqja është e konceptuar me seanca.

“Në seancën e parë trajtohet stresi, në të dytën ankthi dhe në të tretën mendimet brengosëse. Për momentin, aktive është vetëm seanca e pare, ndërsa seanca e dytë dhe e tretë do të aktivizohen brenda javës së ardhshme. Secila seancë ka informata për gjendjet e caktuara dhe rekomandimet për ushtrime, se si mund të zbutet intensiteti i këtyre gjendjeve të shëndetit mendor. Gjatë javëve në vijim planifikohen që të shtohet edhe një seancë specifike për familje dhe fëmijë”, thuhet tutje në njoftim.

Tutje njoftohet se projekti i realizuar i përgjigjet nevojave të shëndetit mendor publik.

“Adresimi i nevojave të shëndetit mendor në këtë periudhë, ku secili qytetar ndihet jashtë zonës së komfortit është shumë e rëndësishme. Po ashtu, projekti i realizuar teston ofrimin e shërbimeve online. Situata e krijuar ka sfiduar profesionet e shëndetit mendor, pasi ato janë kryesisht të varura nga ofrimi të shërbimeve ndaj personit. Universiteti i Prishtinës, së bashku me stafin dhe studentët, mbetet i përkushtuar të ndihmojë qytetarët në ruajtjen e shëndetit të vet, familjes dhe me këtë të kontribuojë në shëndetin e komunitetit në përgjithësi. Kostot përcjellëse të realizimit të projektit janë mundësuar nga Universiteti i Prishtinës dhe Kuvendi Komunal i Prizrenit”, njofton UP. Koha.net / KultPlus.com