Mbrëmë në Kino Armata në Prishtinë është shfaqur dokumentari i i alpinistes së parë shqiptare që ka ngjitur Everestin, Uta Ibrahimi, “Ajo’Mal”.
Në njoftimin e Ministrisë së Kulturës, thuhet se ky dokumentar promovon jo vetëm bukuritë e maleve tona, por edhe rëndësinë e alpinizmit për transformim e sukses.
““Ajo’Mal” është një ftesë për të eksploruar, për të mbrojtur natyrën tonë dhe për të shfrytëzuar potencialin e jashtëzakonshëm të bjeshkëve tona si destinacione, frymëzim dhe trashëgimi kulturore. Në këtë ngjarje ishin të pranishëm kryeministri Albin Kurti, Ministrja e Tregtisë, Rozeta Hajdari, zëvendësministrja e MKRS-së, Daulina Osmani, kryetari i Prishtinës, Përparim Rama, si dhe përfaqësues të akredituar ndërkombëtar në Kosovë e qytetarë”, thuhet në njoftimin e ministrisë.
Në këtë ngjarje, kryeministri Kurti vlerësoi dokumentarin, ndërsa shprehu falënderime për Utën, e cila me çdo ngjitje dhe projekt sjell krenari për Kosovën dhe promovon fuqinë e grave dhe vajzave në arritjen e majave personale dhe profesionale./KultPlus.com
Kryeministri i Kosovës, Albin Kurti, mbrëmjen e sotme e përmbylli me pjesëmarrjen e tij në shfaqjen e dokumentarit “Ajo’Mal”.
“Në këtë dokumentar “Ajo‘Mal”, të Uta Ibrahimit, pamë një grup vajza të reja, nën udhëheqjen e kësaj ikone tonë, e cila i kapërcen kufijtë e vetes dhe na thotë që edhe ne të tjerët mund të provojmë e të bëjmë diçka të ngjashme, dhe kjo fuqi vjen nga potenciali i jashtëzakonshëm që është diku në të ardhmen, e ne e aktualizojmë për shkak se besojmë” tha kryeministri në fillimin e fjalës së tij.
Në komunikatën për media thuhet se kryeministri shtoi se Kosova, është e rrethuar me bukuri natyrore mbresëlënëse – nga majat madhështore të Sharrit në juglindje, e deri tek Alpet Shqiptare në perëndim, që paraqesin thesaret e çmuara të vendit tone që përmes këtij dokumentari, po ndriçohen jo vetëm si destinacione, por e marrin edhe një dimension të ri si hapësira ku formohen karaktere, kultivohen ëndrra dhe ndërtohet e ardhmja.
“Malësia jonë me bjeshkë e vargmale të thepisura, shpeshherë ka qenë mburojë e popullit shqiptar, me gra e burra fisnikë. Përveçse këto bjeshkë na japin bukuri dhe frymëzim, ata na e rikujtojnë edhe një detyrim për t’i mbrojtur e ruajtur ato për brezin tonë, por edhe për brezat e ardhshëm. Duhet të kujdesemi për natyrën dhe malet tona, sikurse kujdesemi për shtëpitë tona dhe trupat tanë, sepse shkatërrimi i tyre nuk është vetëm humbje e bukurive natyrore apo e destinacioneve turistike, por edhe mohim i trashëgimisë sonë kulturore e shpirtërore si dhe rrezikim i mjedisit jetësor e i shëndetit të popullsisë”, tha kryeministri gjersa përmendi edhe sukseset e numërta të bjeshkatares Uta Ibrahimi.
Tutje kryeministri tha se “Ajo‘Mal” le të jetë një frymëzim për të gjithë ne, që të punojmë për një Kosovë më të fortë, më të gjelbër dhe më të bashkuar; ku të gjithë, sidomos vajzat dhe gratë, të kenë mundësinë të ngjiten në majat e tyre personale dhe profesionale.
Në përfundim të fjalës së tij, kryeministri Kurti shprehu falënderimet e tij për Utën, për punën e saj të pandalshme dhe për krenarinë që na e dhuron çdo herë kur ngre flamurin e shtetit tonë dhe të kombit shqiptar në majat më të larta të botës.
Vitin e kaluar, e gjithë bota u tund nga vdekjet tragjike në këtë maje, ku katër vajza brenda ekipit me të cilin alpinistja jonë ishte nisur, ndërruan jetë nga ortekët e avalanshet.
Tre muaj më parë, Uta u nis përsëri drejt Kinës me synimin për të ngjitur majën Shisha Pangma. Megjithatë, ekspertët konstatuan se rreziqet ishin të shumta, duke e bërë të pamundur nisjen e ekspeditës.
Pa humbur kohë, Uta vendosi të vazhdojë përpara dhe sfidoi majën Gasherbrum 2, duke e ngjitur me sukses këtë majë të lartë.
Ndërsa me datën 9 tetor 2024, Uta Ibrahimi arriti një tjetër moment historik në karrierën e saj të alpinizmit, duke ngjitur me sukses majën Shisha Pangma, një ndër majat më të vështira dhe rrezikshme të Himalajave. Pas dy tentativave të mëparshme, Uta me këmbëngulje dhe përkushtim triumfoi, duke shtuar një tjetër arritje të jashtëzakonshme në listën e saj të sukseseve. Kjo ngjitje u bë në kuadër të një ekspedite ndërkombëtare të organizuar nga Seven Summit Treks (SST), ku morën pjesë 29 alpinistë dhe Sherpa nga vende të ndryshme të botës.
Sipas raportimeve të SST, të gjithë pjesëtarët e ekipit arritën majën e Shisha Pangma me sukses në orën 6:00 të mëngjesit, me kohën lokale. Kjo arritje përbën një moment të rëndësishëm për 12 nga alpinistët që përfunduan sfidën e ngjitjes së 14 majave më të larta të botës, duke u bashkuar në klubin ekskluziv të 8000-metërsheve.
Një sfidë të cilën Uta pritet ta arrijë vitin tjetër duke u bërë e vetmja në Ballkan që ka arritur këtë sukses në Alpinizëm. Ky sukses i afrohet Uta Ibrahimit përfundimit të një misioni të jashtëzakonshëm, duke mbetur vetëm edhe një majë për të përmbushur qëllimin e saj të ngjitjes së të gjitha 14 majave më të larta të Himalajave.
Duke u bërë një nga gratë e pakta në botë që arrin këtë, Uta forcon pozicionin e saj si një nga alpinistet më të shquara ndërkombëtarisht dhe një frymëzim për shumë të rinj e të reja që ndjekin rrugën e saj drejt lartësive. Maja Shisha Pangma, me lartësinë e saj prej 8,027 metrash, është e njohur për kushtet sfiduese dhe rreziqet e mëdha që paraqet për alpinistët. Uta, përmes guximit dhe përkushtimit të saj të pandërprerë, dëshmoi edhe një herë se asgjë nuk është e pamundur kur ndjek një qëllim me përkushtim dhe vendosmëri.
“Jemi jashtëzakonisht krenarë për arritjet e ekipit tonë dhe presim shumë ekspedita të tjera të suksesshme në të ardhmen”, deklaroi SST.
“Seven Summit Treks është i nderuar të ketë një ekip kaq të jashtëzakonshëm”.
Ndërkohë që e gjithë bota e alpinizmit ndjek me interes këtë rrugëtim, Uta mbetet një simbol i fuqisë dhe qëndrueshmërisë, jo vetëm për gratë, por për të gjithë ata që guxojnë të ëndërrojnë lart./ rtklive/ KultPlus.com
“She’s Mountain/Ajo’Mal” është projekti i Fondacionit Utalaya që së fundi ka hapë një thirrje për 15 të reja prej moshës 17 deri 25 vjet, të cilat mund të jenë pjesë e një ekspedite dy ditore nëpër malet e Kosovës.
Ky projekt që mbështetet nga Swiss Cooperation Office in Kosovo do të mbulojë shpenzimet e ekspeditës për pjesëmarrëset dhe afati për aplikim për këtë thirrje do të mbetet u hapur deri më 30 shtator.
Sot, në Ditën Ndërkombëtare të Maleve, alpinistja jonë e njohur, Uta Ibrahimi na sjell dokumentarin e saj “Uta-Ngjitja për Kosovën”.
Ky film dokumentar, lundron thellë në përvojat e fëmijërisë së Utes gjatë luftës në Kosovë dhe arrin të sintetizojë gjithë kujtimin e veprimtarinë e aktin e saj final. Në udhëtimin e saj për të ngritur flamurin e Kosovës në majën e botës, në Everest.
Uta është shprehur se është shumë e emocionuar që po e ndanë këtë dokumentar me publikun dhe ju fton ta ndiqni në rehatinë e shtëpive, në ekranet tuaja.
“Përtej shfaqjes së ngjitjes sime personale, dokumentari hedh dritë mbi punën e palodhur që kam bërë në Kosovë, duke u përpjekur të frymëzojë të rinjët që të ndjekin ëndrrat e tyre, pavarësisht sfidave me të cilat përballen. Kjo nuk është vetëm një histori ngjitjeje malore; ka të bëjë me tejkalimin e fatkeqësive, gjetjen e forcës në rrënjët e dikujt dhe nxitjen e një shpirti vendosmërie tek gjeneratat e ardhshme.
Bashkohuni me mua në këtë udhëtim, duke eksploruar majat e triumfeve personale dhe luginat e betejave të përbashkëta. ‘Uta-Ngjitja për Kosovën’ është një dëshmi e shpirtit të paepur njerëzor dhe besimit se çdo majë është e arritshme”, shkruan Uta.
Në mesin e 50 shteteve / grave nga e gjithë bota të cilat kanë kontribuuar në paqe në vendet e tyre, alpinistja kosovare, Uta Ibrahimi do të jetë pjesë e ekspozitës interaktive të artit rrugor të selisë së Kombeve të Bashkuara.
Kjo është një ekspozitë fotografike interaktive që paraqet portrete të grave paqendërtuese dhe paqeruajtëse dhe do të nderojë kontributin e tyre jetësor më 25 tetor, jashtë selisë së Kombeve të Bashkuara në Nju Jork.
Ngjarja, e organizuar nga Departamenti i Kombeve të Bashkuara për Operacionet e Paqes, Departamenti i Kombeve të Bashkuara për Çështjet Politike dhe Ndërtuese të Paqes, UN Women dhe Fondi i Iniciativës Elsie, zhvillohet në ditën e mbledhjes së Këshillit të Sigurimit për të vlerësuar pjesëmarrjen e grave në proceset e paqes në konferencën vjetore. Debat i hapur për gratë, paqen dhe sigurinë.
Pesëdhjetë portrete të mëdha të grave paqeruajtëse dhe paqendërtuese si pjesë e një Aksioni Inside Out Photobooth do të shërbejnë si një kujtesë e fuqishme për diplomatët dhe publikun për nevojën urgjente për të bërë më shumë për të siguruar përfshirjen e grave në përfundimin e konfliktit dhe ndërtimin e paqes së qëndrueshme.
Ky tetor shënon 23 vjet që nga miratimi i Rezolutës novator të Këshillit të Sigurimit të OKB-së 1325 (2000) mbi Gratë, Paqen dhe Sigurinë, e cila për herë të parë njohu rëndësinë e pjesëmarrjes së plotë, të barabartë dhe kuptimplotë të grave në përpjekjet për paqe.
Pavarësisht disa përparimeve që nga miratimi i kësaj rezolute historike, të drejtat e grave në mbarë botën mbeten nën kërcënim dhe zërat e tyre shpesh heshtin.
“Përparimi i pjesëmarrjes së plotë, të barabartë dhe kuptimplotë të grave në të gjitha proceset e paqes dhe politike dhe bërja e punës së paqeruajtësve të OKB-së më të përgjegjshme ndaj gjinisë dhe, për rrjedhojë, më efektive është një prioritet kryesor,” tha nënsekretari i përgjithshëm për operacionet e paqes, Jean-Pierre Lacroix. “Ne duhet të vazhdojmë përpara me të gjitha përpjekjet për të avancuar Axhendën e Grave, Paqes dhe Sigurisë për të krijuar kushtet e nevojshme për zgjidhje politike dhe paqe të qëndrueshme.”
Një prej këtyre ndryshimeve është Joenia Wapichana, anëtarja e parë dhe e vetme indigjene e Kongresit Kombëtar të Brazilit. “Lufta për paqe dhe dinjitet ka qenë gjithmonë një luftë e palodhshme për gratë indigjene,” tha ajo. Në mënyrë të ngjashme, Pétronille Vaweka, gruaja e parë ndërmjetëse e paqes në Republikën Demokratike të Kongos, foli për guximin dhe qëndrueshmërinë e grave: “Përballë rrezikut, gratë nuk dorëzohen, ato shtyjnë përpara”.
Në klimën aktuale sfiduese të sigurisë dhe politike, këto imazhe bindëse të paqeruajtësve të OKB-së, aktivistëve lokalë të paqes dhe ndërtuesve të paqes, nga Afganistani në Kolumbi, Qipro në Sudanin e Jugut, janë veçanërisht të rëndësishme në njohjen dhe promovimin e rolit të rëndësishëm të të gjitha grave në ndërtimin dhe mbrojtjen e paqes. .
“Edhe në këtë kohë shumë të vështirë, unë kam ende shpresë, sepse lëvizja globale për të drejtat e grave nuk pengohet kurrë nga pengesat, sepse ajo vetëm fiton adhurues dhe guxim me çdo padrejtësi, dhe sepse ajo mbetet elektorati më i madh dhe më i besueshëm për paqen.” tha Sima Bahous, nënsekretare e përgjithshme dhe drejtoreshë ekzekutive e UN Women.
Ju mund të shtoni zërin tuaj në shtytjen globale për pjesëmarrjen e grave duke bërë portretin tuaj në kabinën e fotografive Inside Out që ndodhet në vend dhe duke shtuar në instalimin “Paqja fillon me të”. / KultPlus.com
Alpinistja e njohur kosovare, Uta Ibrahimi e njohur ndryshe edhe si heroina jonë e maleve, tashmë ka mposhtur edhe K2 me lartësi 8,611 m, dhe e ka renditur “Malin Vdekjeprurës” në vendin e 11 në listën e saj të projektit 14/80000, shkruan KultPlus.
Ajo vazhdon të jetë gruaja e parë në Ballkan që ngrit flamujt e dy shteteve, duke shkëlqyer me akoma më shumë krenari.
Kjo arritje e madhe është një moment historik ndër të tjera, që i ka dhënë një frymëzim të fuqishëm komunitetit alpinist shqiptar.
Përkushtimi dhe vendosmëria e Uta Ibrahimit tregojnë se ajo është një udhëheqëse e vërtetë dhe një shembull frymëzues për të gjithë ne që kërkojmë të kalojmë kufijtë dhe të bëjmë ëndrrat tona realitet.
Uta e pa ndalshme, jo vetëm ndaj sfidave të ngjitjeve në majat më të larta në botë, po përballet edhe me sfida financiare të cilat po ia vështirësojnë rrugën për të përmbushur projektin e saj shumë të përzemërt, 14/8000.
Uta ka nevojë për mbështetjen tonë për të përfunduar misionin e saj. Edhe kontributi më i vogël ka rëndësi, ju mund ta mbështesni përmes:
Alpinistja e njohur Uta Ibrahimi e njohur edhe si Uta e maleve ka arritur edhe ngjitjen e saj të radhës. Ajo tashmë ka prekur majën e Broud Peak, me lartësi 8,051 metra, e njohur si maja e tetë më e lartë në botë, që ndryshe njihet edhe si motra e K2, përcjell KultPlus.
Uta e vendosi atë në renditjen e dhjetë në projektin e saj 14/8000.
Ajo me vete ka shumë flamuj, dhe me zemër plotë, ajo po bart flamujt e dy shteteve shqiptare, të cilët këto ditë po valëviten në pikat mbi 8000 metra.
“A ka më mirë se me qen shqiptar” është shprehja që e ndiejmë më shumë se kurrë këto ditë në ndjekje të Utës së maleve, që tashmë ajo njihet edhe si Uta jona.
Uta gjithashtu ka nevojë për mbështetjen e të gjithë neve. Të bashkohemi për të arritur lartësitë përmes Utes.
Edhe kontributi më i vogël ka rëndësi, ju mund ta mbështesni përmes:
Uta Ibrahimi e cila sapo ka realizuar ngjitjen e fundit në Nanga Parbat, po planifikon ngjitjen e radhës në Majën K2 dhe Broad Peak, ngjitje këto që do të rrumbullakojnë finalizimin e 14 Majave më të larta të Botës, shkruan KultPlus.
Por sfidat që e përcjellin Utën e Maleve janë financat, edhe në ngjitjen e fundit ka pas pak mbështetje institucionale, por edhe në ngjitjen e radhës ajo ka po të njëjta probleme.
Nëpërmjet një postimi ajo ka bërë thirrje për mbështetje nga donatorë të ndryshëm me sloganin “Për vendin tem, për malet e mia”.
KultPlus ju sjell të plotë kërkesën e Uta Ibrahimit për ngjitjen e radhës.
The time has come – Ka ardh koha
Shok e shoqe,
Sado qe po behet e veshtire e me e veshtire me vazhdu projektin e ngjitjes ne 14 Majat me te larta te Botes, qysh ne aspketin fizik e ashtu edhe emocional e financiar, deri sot hala spo dorezohna … keshtu qe vendosa me vazhdu edhe ma tutje!
Pas ngjitjes ne Nanga Parbat, keto 3 dite te pushimit jon kon ma shume stres se sa gezim … me i gjet edhe nje cope te madhe te pareve per me pas mundesi me vazhdu ma tutje.
Per arsye te licencimit te Federatave, as mjetet e sponsoreve aktual ende nuk po arrij me i marr per me i pagu ekspeditat. E gjithashtu, mbeshtetja nga Ministria e Sportit kete vit ka qene me e vogla e mundshme, e keshtu krejt per fund, FALEMINDERIT secilit (secili e dini kush jeni) qe me keni huazu pare, keni hi ne KREDI per mu, keni dhan nga xhepi juj, krejt kursimeve te mia prej puneve te mia per shume vjet, shoket e mi ne Nepal, familja jem ne Kosove, shume njerzve te mire qe po donojne ne https://makeachamp.com/utaibrahimi/40348 une neser po nisem per me vazhdu edhe njeren nga andrrat me te medhaja, ngjitjes ne Majen K2 dhe Broad Peak. Nime xhepin e kom 0, po zemren e kom plot
Keshtu, po i afrohemi cdo dite e me shume finalizimit te projektit te 14 Majave me te larta te Botes.
Alpinistja e njohur Uta Ibrahimi ka shndërruar në realitet një tjetër ëndërr të sajën. Sfidat e saj janë kthyer në triumf pasi ajo ka arritur në majën e shpellës së erërave – majën e malit të Dhaulagirit, shkruan KultPlus.
E mbështjellur nga mjegulla dhe veçantia e malit të shtatë më të lartë në tokë, Uta Ibrahimi edhe njëherë na ka treguar se nuk ka asnjë kufi për shpirtin aventurist.
Lajmi është bërë i ditur në faqen e saj Utalaya duke u shprehur se ky sukses vjen pas tre vitesh dhe dy tentativave të vështira të Utes.
“Ky mal i shkëlqyer është njohur si mali i shtatë më i lartë në të gjithë botën, me një lartësi të frikshme prej 8167 metrash. Sot, në orën 5:30 të mëngjesit, sipas orës së vendit në Nepal, Uta ka triumfuar në majën e malit. Kjo është thjesht një arritje e jashtëzakonshme. Le të shprehim nderimet tona dhe të falënderojmë Uta Ibrahimi për vullnetin, guximin dhe përkushtimin e saj të palëkundur”, shkruhet në njoftim.
Me arritjen e saj në majën më të lartë të Dhaulagirit, Uta Ibrahimi na tregon se asgjë nuk është e pamundur kur ndjekim ëndrrat tona me vendosmëri dhe përpjekje të palodhshme.
Ajo tashmë është një simbol i forcës dhe frymëzimit për gjithë gratë dhe burrat në të gjithë botën, të cilët mundohen të tejkalojnë çdo vështirësi dhe të arrijnë lartësinë më të lartë të ëndrrave të tyre. / KultPlus.com
Në Ditën Botërore të Maleve, alpinistja kosovare, Uta Ibrahimi, ka publikuar dokumentarin ‘Run for Sharr’ me të cilin bën thirrje që të ruhet sharri dhe pasuritë bimore e shtazore që ai ofron, si një prej maleve që zënë vendin e dytë në Evropë për kapacitetin ujor, përcjell KultPlus.
Në vijim KultPlus ua sjell postimin e plotë të alpinistes Ibrahimi:
Urime Dita e Maleve.
Malet e Sharrit, jane malet me te dashtuna per mu. Më kanë tjetërsu, më kanë bë njeri ma të mirë, njeri ma të lumtur, ma të ndjeshëm edhe më të fortë.
Sharri më kanë ndihmu me arrit qëllime te mëdha ne jetë, sikurse me u ngjit ne Majat ma të nalta të Botës. Më ka frymëzu me e dashtë edhe më shumë natyrën e me dhanë gjithcka prej vetes për ruajtjen e saj.
Miq, ju që ende nuk e keni ecë Sharrin, këto male janë të jashtzakonshme në çdo stinë.
Pranvera, vera, vjeshta dhe dimri, të gjitha kanë potencial të madh turizmi, por jo nëse nuk i rujmë edhe nuk i dojmë malet tona. Malet ruhen e duhen, at’here kur nuk prehen, nuk ndërtohen, nuk asfaltohen.
Eshtë momenti i fundit për të gjithë ne, ta gjejmë një mënyrë, ta kemi një plan, të përfitojmë nga natyra pa e dëmtuar atë. Ta ruajmë dhe ta kthejmë natyrën në anën tonë dhe të zhvillimit të vendit tonë.
Çdo hap, cdo fushë e luginë e Maleve të Sharrit është ndryshe prej tjetrës, e pasur me burime ujore, bimë, lule të bukura, kafshë të egra dhe të rralla.
Mijëra lule, bimë e drunjë në këto male janë unike. I rrallë është edhe Rrëqëbulli i Sharrit.
Ndërtimet pa leje në zonat e ndaluara, ndërtimet e hidrocentraleve pa kurrëfar planifikimi, premja e drunjve, bërllogu që ta nxen frymën, gjuetia – duhet me u ndalën.
Duhemi me i nejt gati krejt bashkë, na me raportu e institucionet tona me dënu krimin e vazhdueshëm, jo vec në Malet e Sharrit, po në krejt malet tona.
Dua që ky dokumentar te ju inspiroj, e ta bëj të mundur që heren e ardhshme të flasim sa mijë drunj janë mbjellë, jo sa janë pre.
Unë për vete, sa të kem frymë do t’vazhdoj me ju ngjit Sharrit sepse aty mbushem me dashni.
Ndjenjen qe e përjetoj në Sharr kam dëshirë me e nda me të gjithë që i has nëpër ekspeditat e mia në Himalaja. Ju flas të gjithëve dhe kam dëshirë edhe ata me ardhë këtu dhe me ja përjetu bukurinë Sharrit. Por miq të dashur, dashnia jeme e pafund s’mjafton me i rujt këto male.
Andaj, ju ftoj ta shikojmë këtë dokumentar bashk, të realizuar nji vit më parë dhe ju ftoj që t’bëhemi bashkë për me i rujt malet tona./ KultPlus.com
E njohur ndryshe si “Uta e Maleve”, Uta Ibrahimi, është gati për ekspeditën e saj të radhës, ku ka udhëtuar për në Pokara të Nepalit, shkruan KultPlus.
Ajo do ta ngjitë një prej çative të Botës, konkretisht Majën Dhaulagiri, me lartësi mbidetare 8167 metra.
Uta ishte munduar të ngjitej edhe më herët, por e kishte marrë lajmin për humbjen e të atit dhe tani, ajo po kthehet përsëri, me dhimbje, por më e fortë se kurrë.
Postimi i plotë:
“Tungjatjeta nga Pokara, Nepal
Erdh koha për ekspeditën tjetër në njërën prej çative të Botës, Maja Dhaulagiri 8167
Dhaulagiri është maja e 7 prej majave më të larta në botë, e gjithashtu e 8 nga 14 për mu.
Dhaula do të thot verbues, i bardhë, i bukur dhe (Giri) do të thotë mal.
Është mal shumë i bukur, por shumë po e kam të vështirë me u kthy mbrapa.
Para dy viteve, gjatë kohës sa isha duke tentu ngjitjen në këtë maje, e humba nji copë shpirti, e humba njerin ma të dashtun në tokë, bibin
Po kthehna, me dhimbje shumë, ama ma e fortë se kurr. Po kthehna për bibin, me ju afru ma shumë, me ja ndi energjinë edhe me e bo krenar”, shkruan ajo. /KultPlus.com
Alpinistja më e njohur nga Kosova, Uta Ibrahimi, ka ftuar të gjithë qytetarët e Kosovës që të bashkohen me të në vrapim nëpër Malet e Sharrit, shkruan KultPlus.
E njohur për ngjitje nëpër malet e majat më të ndryshme të botës, aktiviteti i radhës për Utën do të jetë vrapimi në Malet e Sharrit.
Postimi i plotë i saj:
“Sot n’Sharr
Kanë mbet edhe 48 ditë për me u ba gati e me vrapu në Malet e Sharrit, në garën e vetme në Ballkan mes dy shteteve, Kosovë e Maqedoni, High Scardus Ultra
Sharri, vargmal magjik, e qe jemi me fat që e kemi, na lidh me Shqipërinë e Maqedoninë, na lidh njerëzit mes vete, na lidh me vetën, na bjen gëzim, dashni, e xixa në sy!
Kemi me vrapu për me e promovu jetën e shnetshme, vendin tonë, kulturën e traditën e maleve të Sharrit … por ma së shumti, kemi me vrapu për me mbrojt Sharrin #vrapopersharr #runforsharr
Bashkohuni. Regjistrohuni! Merrni shoqet / shokët, janë 3 diciplina (20, 50 dhe 100km) e njona prej tyne, gjithqysh që ka me ju përshtat!”, thuhet në postim. /KultPlus.com
Dita Botërore e Mjedisit 2022 është dita më e madhe ndërkombëtare për mjedisin dhe shënohet çdo vit më 5 qershor, shkruan KultPlus.
Udhëhequr nga Programi i Kombeve të Bashkuara për Mjedisin (UNEP) dhe mbahet çdo vit që nga viti 1973, ai është bërë platforma më e madhe globale për shtrirjen mjedisore. Ajo festohet nga miliona njerëz në mbarë botën.
Për këtë ditë, Uta Ibrahimi ka ndarë një foto me disa fëmijë duke kaluar kohë në natyrë.
“Ditën Botërore të Ambientit – World Environment Day’ e kalova bashk me fëmijë nga Komunat e Prizrenit, Dragashit e Shtërpcës, me Festivalin ‘Toka e fëmijëve’, projekt i Utalaya Foundation. E ku ka ma mirë se me fëmijë?! Me nda eksperienca, me bo lonëra në natyrë, me i mësu për malet, ngjitjet, e ma së shumti me fol për ambientin. Qështu, zemra mal”, shkruan Ibrahimi. /KultPlus.com
Alpinistja Uta Ibrahimi përmes një postimi në Facebook ka njoftuar se me datën 12 maj ka ngjitur me sukses Majën Makalu 8485 metra, përcjell KultPlus.
Ajo njofton se kjo ngjitje është gjysma e projektit të saj të madh ‘14 Majat e Himalayave- Utalaya’.
Në vijim gjeni postimin e saj:
O njerëz të mirë, e dij që nji kohë të gjatë kam qenë jasht rrjeteve sociale dhe komunikimit me botën ..
Për krejt këto javë kam qenë në shpinë tem të dytë, në vargmalin e Himalayave, duke e ndjek andrrën tem e të popullit tem, ngjitjen nëpër çatitë e botës, 14 Majat e Himalayave.
Këtë herë, me datë 12 Maj ngjita me sukses Majën Makalu 8485m / maja e pestë më e larta në botë.
Për mua kjo ngjitje është më e veçanta sepse ishta ngjitja e 7 prej 14, e këtu është gjysma e projektit të madh ‘14 Majat e Himalayave- Utalaya’.
I pata premtu vetës, që nëse do të ngjes gjysmën e 14-tave, do ta vazhdoj deri në fund .. ❤️
Shihemi në 8K e tjera,
Shumë dashni nga larg, më vonë më shumë informata./ KultPlus.com
Alpinistja më e suksesshme në histori të Kosovës, Uta Ibrahimi, është gati për ngjitjen e saj të radhës në majën “Makalu”, maja e pestë më e lartë në botë, shkruan KultPlus.
Përmes një postimi në “Facebook”, Ibrahimi ka shkruar se në këtë rrugëtim do ta ketë përkrahjen e Ministrisë së Kulturës, Rinisë dhe Sportit.
Postimi i saj i plotë:
“Para disa dite pata kenaqesine me e taku zv. Ministren e Sportit, znj. Daulina Osmani. Biseduam per shume mundesi te bashkepunimeve ne te ardhmen, e gjithashtu e falemderova per perkrahjen e Ministria e Kulturës, Rinisë dhe Sportit per ngjitjen e radhes ne Makalu, si vazhdimesi e ekspeditave të ngjitjes në 14 Majat e Botes. Maja Makalu eshte maja e pesta në botë, ndersa per mua do te jete e shtata ne radhen e 8000 metershave. Shpresoj shume qe edhe kesaj here do ta valvoj flamurin e Kosoves ne maje te Botes, e te kthehem mire e te vazhdojme bashk drejt rrugetimin te ngjiteve te tjera ne 8000″.
Përpos takimit me MKRS-në, Ibrahimi këtë vit është takuar edhe me kryetarin e Komitetit Olimpik, Ismet Krasniqin. /KultPlus.com
Dokumentari i realizuar për Uta Ibrahimin po shfaqet nëpër festivale të ndryshme botërore, derisa shumë shpejt do të vijë edhe në Kosovë, shkruan KultPlus.
Përmes një postimi të bërë në rrjete sociale, është publikuar edhe një video e shkurtër e dokumentarit që përshkruan rrugëtimin e alpinistes, teksa kjo e fundit përpiqet të bëhet personi i parë nga Kosova që ngjitet në majën më të lartë në botë, Everest.
“Për ne si regjisorë, historia e Utës kapërcen aventurën dhe sportin. Jo vetëm sepse Uta vjen nga Kosova dhe u rrit gjatë një konflikti të ashpër etnik, por edhe sepse, si një grua nga Kosova, asaj i është dashur të luftojë për sponsorizim dhe njohje gjatë gjithë jetës së saj. Uta tani ka ngjitur gjashtë nga 14 majat e botës 8000 metra dhe qëllimi i saj është të ngjitet në pjesën tjetër. Askush, mbi të gjithë ne, nuk do të habitej nëse ajo e arrinte këtë më shpejt se sa vonë”, thuhet në njoftimin e regjisorëve.
Por ky film i shkurtër, i prodhuar nga Vest Media në bashkëpunim me Fondacionin Utalaya, ka të bëjë me ngjitjen e saj në Everest, atë që e vendosi atë në hartën brenda dhe jashtë vendit.
Duke përdorur pamjet që janë xhiruar me Utën, familjen dhe miqtë e saj në Kosovë, të kombinuara me pamjet personale të Utës të filmuara gjatë ekspeditës, mendohet që të jetë një histori që do të frymëzojë gratë dhe vajzat e reja anembanë botës. /KultPlus.com
Alpinistja e njohur, Uta Ibrahimi, e cila njihet për energjinë dhe pozitivitetin e madh që posedon, së fundi ka lajmëruar se do të fillojë ngjitjen edhe në ‘Makalu’, që njihet si mali i pestë më i lartë në botë si dhe në ‘Nanga Parbat’ që njihet si mali i nëntë më i lartë në Tokë, shkruan KultPlus.
Lajmin e ka bërë të ditur Ibrahimi përmes një postimi në llogarinë e saj personale në Facebook.
“Ju lutemi, mbështesni ekspeditën time Utalaya 14×8,000 dhe së bashku mund të bëjmë histori”, ka shkruar ajo.
Më poshtë KultPlus ua sjell postimin e saj të plotë:
Ngjitja e 6 nga 14 majat me te larta te botes, te merr shume nga vetja e koha. Të bën shpesh të vësh në dyshim motivimin, e qëllimin.
Këtë vit, unë do të tentoj ngjitjen në #Makalu dhe #NangaParbat …
Ju lutemi, mbështesni ekspeditën time Utalaya 14×8,000 dhe së bashku mund të bëjmë histori.
Për shekuj me radhë, njerëzit janë magjepsur nga malet e shumë prej tyre madje edhe janë tmerruar nga ta. Sporti i alpinizmit përfshin në vete ngjitjen e majave të ndryshme të botës, gjë që mund të jetë e rrezikshme e jo edhe shumë e preferueshme për shumë njerëz, megjithatë një rast i tillë nuk është Uta Ibrahimi, e cila hoqi dorë nga “jeta” e saj e kaluar për të filluar sportin e alpinizmit, e madje për të hyrë edhe në librat e rekordeve, shkruan KultPlus.
Thënia “Bëni një karrierë të asaj që ju pëlqen të bëni. Suksesi do të vijojë”, doli të jetë e vërtetë për alpinisten Uta Ibrahimi ,e cila në të kaluarën ka qenë drejtoreshë e marketingut nëpër kompani të ndryshme të Kosovës, por lidhja e madhe me natyrën rezultoi që ajo të ndjek zemrën e saj dhe realisht të pushtojë majat më të larta të botës.
Si filloi të merrej me sportin e alpinizmit, si ishte jeta e saj në të kaluarën, cilat janë vështirësit më të mëdha që ajo ka hasur, arritjet e jashtëzakonshme dhe jeta personale, Uta Ibrahimi në një intervistë për KultPlus rrëfen shumëçka për karrierën e saj të bujshme, duke mos harruar edhe misionet e së ardhmes.
E ke përmendur që karrierën profesionale e ke filluar në 2011, mirëpo përpara saj çfarë ka qenë duke bërë Uta realisht? Si lindi pasioni për të filluar me “Hiking”?
Uta Ibrahimi: E vërtetë. Ju edhe shumë të tjerë mundeni me mendu që është shumë vonë me fillu diçka të re në atë moshë. Në vitin 2011 kam qenë 28 vjeç. Ecjet ditore, të shkurtëra, nëpër male dhe natyrë kam bërë edhe para vitit 2022, me familje po edhe me shoqëri. Ndërkaq, me klube bjeshkatare, më saktësisht me Arben Islamin apo “Hiking Njeri” ka qenë po ashtu ky vit.
Çka kam qenë duke bërë përpara? Shumë përpara, unë kam lind e jam rrit në Gjilan. Shkollën fillore dhe të mesme e kam përfundu atje. Gjithashtu, kam qenë bashketbolliste e Klubit “Drita” për 7-8 vite. Sporti gjithmonë më ka pëlqy shumë. Ëndrra ime ka qenë me vazhdu me u marrë me basketboll edhe profesionalisht, mirëpo në atë kohë, nuk kam pas shumë mundësi me e zgjedh një rrugë të tillë. Kështu, pasi përfundova shkollimin e mesëm, erdha në Prishtinë dhe fillova fakultetin ekonomik, ofertën me fillu punën si asistente e lëndëve të Makroekonomisë dhe Marketikungut për dy vite ma ofruan vetë universiteti. Më pas nëpër kompani kogja të njohura si drejtoreshë e departamenteve të marketingut. Kam punuar punë shumë të mira dhe lezetshme, deri në vitin 2015 kur e ngjita Malin e Bardhë apo Mount Blanc dhe vendosa t’i lë të gjitha punët dhe t’i përkushtohem një profesioni të ri të punës, atë si guide dhe ngjitjes nëpër malet e vendit, rajonit dhe pse jo edhe botës.
Pasioni – gjithmonë më ka pëlqy me u marrë me sport. Çfarëdo. Edhe futboll shpesh. E gjithashtu natyra dhe dashnia për drunjtë e lumejtë, ka ardh qysh në moshën e vogël, kur me prindërit, motrat e vëllaun, pushimet verore gjithmonë i kemi kalu nëpër tenta dhe kampe të ndryshme. E Hiking, ka qenë vetëm vazhdimësi e asaj që e kam fillu që e vogël, vetëm se deri në atë kohë, nuk kam pas shumë informacione se si mundem me fillu diçka të tillë.
Të bëhesh personi i parë që arrin të ngjitet në majën më të lartë në botë nga Kosova, është diçka e jashtëzakonshme. Si u ndjeve kur ndodhi kjo gjë?
Uta Ibrahimi: Jam ndje njeri më i lumtur në botë. Kurrë as edhe një ndjenjë tjetër deri më tani nuk e ka zëvendësu ndjenjen e arritjes në çatinë e botës, e lindjen e diellit me pa prej atje. Thjesht, zemrën në kuptimin e plotë të fjalës e kam pas plotë e përplotë.
Fakti që ti je një grua, e bën karrierën tënde edhe më të jashtëzakonshme. Kjo pasi gruaja në Kosovë është në diskriminim e sipër dhe arritjet “vëhen në hije”, cili është mesazhi i juaj për të gjithë gratë?
Kohë të ndryshme, kam dhënë mesazhe të ndryshme për gratë. Ndoshta edhe duke kalu nëpër faza të jetës, e gjithashtu duke punu shumë që me ndryshu këtë mentalitet.
Mendoj qe në Kosove për çka ne mburremi më së shumti është për gratë e Kosovës. Kur ndalem me mendu se cilët janë emrat e njerëzve që nime kanë bë dicka për këtë vend, as edhe nje burrë nuk më bjen në mend.
Me këtë fakt, mendoj qe diskriminimu na ka ba ma të forta. Nime na kanë dhanë krah.
Une personalisht para tentimit për në ngjitjen e Majës Everest, kam pas marrë komente prej më të ndryshmëve, e tani mendoj që ato veç më kanë bë më të fort, edhe më kanë ndihmu me arrit qëllime të medha.
Mesazhi per grate:
Gratë duhen me i përkrah gratë. Vetëm atëherë diskrimini s’ka me ekzistu.
Ushtrimet për një sport sikurse futbolli ndodhin në një fushë ose diku tjetër. Por, çfarë përfshijnë ushtrimet e një personi që merret me “Hiking”, pra, si ushtrojnë alpinistët?
Uta Ibrahimi: Ushtrimet që unë i bëj janë shumë të laramanishme. Bëj vrapim malor gati çdo mengjes me grupin “X Trailers” në Germi. Kur nuk jam në Kosovë, vrapoj kudo tjeter. Gjithmonë, kah do që shkoj, e kam një çantë me veshje të vrapit.
Pastaj, CrossFit – me Crossfit Prishtina. Verës bëj biçikletë, e rock climbing, dimrit bëj ski edhe ice climbing, edhe normalisht seanca e tretë e ditës është yoga, para gjumit.
Zakonisht flej në orën 21.30 edhe zgjohem në orën 5.30. Ushqehem shumë mirë, edhe tentoj me pas disipline.
Normalisht gjatë ditës punoj me Fondacionin Utalaya edhe gjatë fundjavës punoj si guide për Butterfly Outdoor Adventure. Shumë shpesh edhe bëj punë vullnetare – përmes prezantimeve nëpër shkolla dhe çerdhe, etj.
Eksperiencat e vazhdueshme me “Hiking” kanë ndikuar që ju të përjetoni aventura të ndryshme, por cilën e veçoni ju më së shumti?
Uta Ibrahimi: Eksperiencat nëpër male e maja të nalta qesin në pah vetëm vlerat e mira e të bukura që i ke. Ato te cilat ti nuk je krenar që i ke, ngadal ngadal ju vazhdoni t’i eliminoni. Kështu gjithmonë kam thënë që malet të tjetërsojnë, e sidomos “Himalayat” më kanë ba me kuptu se sa te vegjël jem, e sa të pa rëndësishme janë gjërat e pa rëndesishme, zënkat, inatet, xhelozitë, etj. Malet per mu nuk janë vetëm sfida fizike, po shumë sfida psiqike. E kjo, të transformon si njeri. Te bon njeri ma të lumtun. E të bon me ju dijtë rëndësinë edhe gjerave shumë të vogla në jetë.
Ke hapur librin e rekordeve dhe historisë disa herë për Kosovën, a ka qenë ky një synim i menduar qysh kur ke filluar karrierën?
Uta Ibrahimi: Jo asnjëherë nuk e kam nis ecjen në mal për me shënu rekorde apo histori per vendin. Ecjen e kam fillu vetëm për me jetu ma ndryshe, më shëndetshem. Me qenë ma afer ma natyrën e malet, me vetën.
Po sikur idea të kishte qenë më shënu rekorde, atëherë edhe kur e kam përfundu Everestin, kam mundur edhe me u ndal, sikurse plotë alpinistë nepër botë. Por unë e kam vazhdu, dhe jo vetëm në ngjitjet në Himalaya, por secili njeri që më percjell pak në rrjete sociale e dinë që unë malet e sportin e bëj në baza ditore, dhe jo vetëm për rekorde.
Viti 2020 dhe 2021 ka qenë shumë ndryshe për të gjithë njerëzit, si ishte për ty viti me COVID-19? Si shkuan ngjitjet, a u anulua gjithçka? Pra, eksperiencat e juaja gjatë dy viteve të fundit?
Uta Ibrahimi: Në vitin e parë të pandemisë gjithcka është anuluar për mua. Pavarësisht që ka pas ngjitesa që kanë vazhdu ekspeditat, mirëpo unë kam dasht me i respektu rregullat e udhëtimeve, edhe kërkesën e nanës natyrë, e me e lanë me marrë pak frymë.
Mendoj që ka qenë nje pazuë e domosdoshme për tokën. Mendoj që secilit prej neve, na ka bë mirë ajo kohë, ku secili kemi pas kohë me reflektu, me pushu prej intensitetit, prej zhurmave, etj.
Personalisht kam qëndruar kryesisht në Kosovë, duke bërë vrapime çdo ditë, kam be rekorde në vrapime, kam bërë gara në vrapime ultra 100 më shumë kilometra, etj.
Ndërsa, në vitin e dytë, kur filloi gjithçka me u kthy si ma parë, edhe unë u ktheva në ekspedita dhe e ngjita Majën Annapurna 8091 metra, si maja me vdekjet me te medhaja në historinë e Himalayave, e më pas edhe Majën Lenin 7134 metra, etj.
E gjithashtu në vitin 2021, gjatë kohës sa isha në ekspedita në Himalaya, në kampin bazë të. Dhalagirise, në mes të akullnajave në 4600 metër lartësi mbidetare, e mora lajmin e humbjes së babait, njerit ma të dashtun të jetës, shokut ma te mirë në jetë, e përkrahësit ma te madh të jetës time. Ky lajm përveç që mka trondit, e m’ka mërzit jashtëzakonisht shumë, m’ka ndryshu ne përceptimin e jetës, e planeve për të ardhmen.
Ke marrë pjesë dhe je ftuar në shumë vende të botës dhe rrjedhimisht ke bërë edhe promovimin e Kosovës në shumë vende, madje në mënyrën më dinjitoze të mundshme. Si e vlerëson këtë?
Uta Ibrahimi: Jam e ftuar, vizitoj vende të ndryshme – kryesisht aty ku ka male, bej prezantime për Kosovën, për historinë, kulturën, jetën e njerëzve këtu. Shumë shpesh përceptimet e njerëzve kanë ndryshu tepër shumë në momentet që kemi diskutu. Edhe mendoj që kjo është një punë që e bëj për vendin tem, sepse me të vertetë besoj që Kosova është vend shumë i bukur, me shumë potencial, me shumë njerëz të mirë, dhe njerëzit rreth e rreth botes duhen me e kuptu.
Kjo, ka qenë dhe vazhdon të jetë një mision i imi i ngjitjeve në 14 majat më të larta të tokës, ku nëpërmjet ngjitjeve, une dua të promovoj vendin dhe në të njejtën kohë t’i inspiroj gjeneratat e reja në Kosovë për ta parë jetën më ndryshe, me më shumë ngjyra.
Komiteti Olimpik i Kosovës nuk ka të përfshirë “alpinistët” si pjesë të tyre, e së fundmi ke zhvilluar një takim me ta. Për çfarë biseduat?
Uta Ibrahimi: Ka qenë hera e parë që jam taku me Kryetarin e Komitetit Olimpik, Ismet Krasniqi dhe sekretarin e përgjithshëm, Besim Aliti. Pas sa viteve ngjitje nepër majat e botës.
Më kanë prit shumë mire. Jam njoftu më detajisht me procedurat dhe punën e Komitetit Olimpik. E kam kuptu që alpinizmin në formën që unë e bëj ( pasi që nuk është garë), nuk hyn në listën e sporteve garuese dhe nuk është pjesë e garave olimpike. Por prapë, nuk duhet me u anashkalu mundësia e takimeve më të shpeshta, apo edhe ndihmesave në përkrahje financiare të ekspeditave të mia etj. Por pavarësisht kësaj, se çka unë kam postu në rrjtete em ia sociale, me të vërtet nuk ka pas kurrëfar prapavije mbrapa, krejt çka kam dasht është të sjellë debat në mes të KOK apo edhe Federatës Bjeshkatare të Kosovës.
Së fundmi ke qenë pjesë e Festivalit “Erzurum”, e fillove këtë vit me një vend shumë të ftohtë. Por, cila do të jetë e ardhmja e juaj, apo maja e re që do ta ngjitësh?
Uta Ibrahimi: Çdo vit, gjatë dimrit tentoj me gjetë një vend më të afërt edhe me ushtru në ngjitje në akull – sikurse kjo e Erzurumit.
Këto ngjitje më ndihmojnë në përgratitjet e mia drejt Majave 8000 metra, e përveç tjerash atje takoj njerëz nga bota e profesionit të njejte dhe normalisht ndajmë eksperienca të ngjitjeve, ideve peër projekte të përbashkëta, etj. kështu që këto ekspedita janë gjithmonë të mirëseardhura.
E ardhmja është Maja Makalu 8643 metra, Maja e 5 me e nalta në botë. Dhe tani jam në fazën e parë të gjetjës së fondeve.
Fondet janë gjithmone problematike. Une nëpër secilën ekspeditë kam punu shumë që me i siguru financat për ekspedita. Së fundi jam në një fushatë për shtijen e kapelave dhe bandave me brendin Utalaya 14×8000 , ku secili qe po e blen kapelen po e ndihmon ngjitjen në Makalu.
Si një eksperte dhe profesioniste e jashtëzakonshme në fushën e alpinizmit, cilat janë këshillat e juaja për të rinjtë ose njerëzit që aktualisht merren me këtë fushë?
Uta Ibrahimi: Mos me harru sigurinë për vetën, me shpërnda sa ma shumë te të tjerët dhe me bo maksimumin që me e rujt natyrën.
Majat e botës janë bërë diçka e zakonshme për ty, por a ke menduar (ose a ka pasur momente) që ndonjëherë të largohesh nga ky profesion?
Uta Ibrahimi: Ka pas momente, sidomos kur e kam humb babain. Kur flas për sakrificë, shpesh njerëzit nuk e kuptojnë se për çka e kam fjalën. Eh, nuk po flas që mungoj nëpër evente të tjera në jetë, por edhe kur nuk je afër atëherë kur njerin ma të dashtun të jetës nuk kam arrit me e taku, edhe një herë përpara se me shku në botën tjetër. /KultPlus.com
Alpinistja kosovare, Uta Ibrahimi, ka përfunduar aventurën e saj në Festivalin “Erzurum”, shkruan KultPlus.
Përmes një postimi në llogarinë zyrtare në “Facebook”, Ibrahimi i ka dhënë lamtumirën këtij festivali.
“Mirëupafshim Erzurum, ishte fantastik kësaj radhe. Ditën e fundit duke u ngjitur në Ice Park e sfidova vetën edhe në një shkallë më lartë dhe tani nuk frikësohem që të udhëheqi në një rrugë. Tani është koha që të kthehem në shtëpi dhe të trajnohem për Himalaya 2022”.
Në fund ajo gjithashtu falënderoi të gjithë që ndihmuan atë në këtë Festival.
“Utalaya partnerët e mi në ngjitje në akull dhe ngarje së bashku për 3000 km, janë më të mirët”, shtoi ajo.
Ibrahimi ka shkruar disa herë histori për Kosovën në ngjitje të majave më të larta të botës. /KultPlus.com
Uta Ibrahimi është duke marrë pjesë në Festivalin e ngjitjes së akullit “Erzurum”, shkruan KultPlus.
Përmes një postimi në llogarinë zyrtare në “Facebook”, Ibrahimi ka bërë me dije se është duke kaluar kohë të mirë.
“Rruga e preferuar e ditës së sotme në Festivalin e ngjitjes së akullit Erzurum, edhe pse litari është i mirë, prapë me shumë vështirë për të kaluar aty”, shkruan ajo.
Bashkangjitur me këtë postim, Ibrahimi ka përfshirë edhe një fotografi me qen, ku thotë se edhe ai ishte pjesë e ekipit.
“Po shijoj shumë akullin, por jo aq shumë të ftohtin”, ka shkruar në fund ajo.
Erzurum, i cili është rreth 1900 m mbi nivelin e detit, ka qenë një vendbanim që në periudhat e para të historisë. /KultPlus.com
Alpinistja kosovare, Uta Ibrahimi, së fundmi përmes një postimi në rrjetin social Facebook, ka reaguar rreth mos përfshirjes së alpinizmit dhe bjeshkatarisë në listat e Komitetit Olimpik të Kosovës, përcjell KultPlus.
“Para dy jave në shtetin fqinjë – Maqedoni, janë shpërbly sportista e alpinista për secilën arritje që e kanë ba .. e mos te harrojmë që Kosova ka mjaftueshëm alpinista që kanë ba mjaftueshëm jo veq në Kosovë por edhe në botë”, ka shkruar Ibrahimi.
KultPlus ju sjell postimin e plotë të saj:
Nëpër krejt shtetet e botës, e edhe shtetet fqinje, në çdo fund-vit Komitetet Olimpike apo edhe Federatat Bjeshkatare mbedhen dhe shpërblejnë sportistët, të fushave të ndryshme, e tu mos e lan anash asnjiher alpinizmin – ngjitjet në vend apo ngjitjet nëpër maja të nalta!
Mirënjohjet janë njifar motivimi, shtyse, për sportista. Na japin zemër me vazhdu ma shumë, edhe vitin tjetër, e tjetrin e kështu me radhë!
Në Kosovë, Komiteti Olimpik i Kosovës nuk e kanë fare në listat e tyne alpinizmin / bjeshkatarinë .. personalisht, përveq shares në FB, skam pas as takime e as ftesa në asnjërën prej organizimeve të tyre.
A duhet me na konsideru si sportista?! A duhet me na shpërbly? A duhet edhe Federata Bjeshkatare Alpiniste e Kosovës – FBAK me ba organizime të tilla? A duhet Federata me u aktivizu edhe me shty alpinizmin në listën e sportiseve në Komitet sikurse sportet e tjera?!
Para dy jave në shtetin fqinjë – Maqedoni, janë shpërbly sportista e alpinista për secilën arritje që e kanë ba .. e mos te harrojmë që Kosova ka mjaftueshëm alpinista që kanë ba mjaftueshëm jo veq në Kosovë por edhe në botë.
Ky postim është bë veq per me sjell debat konstruktiv, e me u mundu qe ndoshta bashkarisht me u permiresu.
Fotoja nga Ekspedita e Annapurna 8091. / KultPlus.com
Alpinistja kosovare, Uta Ibrahimi, ka ndarë një përvojë shumë interesante nga rutina e saj e mëngjesit, e cila është ndryshe nga shumica e njerëzve, shkruan KultPlus.
Përmes një postimi në llogarinë zyrtare në “Facebook”, Ibrahimi ka bërë të ditur se është një njëri i mëngjesit dhe i pëlqen të vrapoj.
“Unë jam njeri i mëngjesit. Më pëlqen të zgjohem herët dhe të dal jashtë. Dal për vrap, kurdo, shkallë, shteg.. diçka që më sfidon fizikisht dhe gjithashtu më bën mendjen të fokusuar për gjithë ditën!”, shkroi ajo.
Ibrahimi konsiderohet të jetë njëra ndër alpinistet më të sukesshme që ka pasur ndonjëherë Kosova, ku ka ngjitur disa prej majave më të larta dhe më të rrezikshme në botë siç janë Mali Everest e gjithashtu edhe majen Annapurna. /KultPlus.com
Me përkrahje të Ministrisë së Kulturës, Rinisë dhe Sportit, është organizuar trajnim dy ditor në bjeshkatari, yoga, praktikat e kampingut, aktivitete rekreative në natyrë, punëtori për turizmin malor dhe punën e guidës me të rinj të zonave të ndryshme të Kosovës.
Trajnimi është implementuar nga Fondacioni Utalaya, dhe ka pasur për qëllim angazhimin e të rejave dhe rinjve në aktivitete sportive/rekreative në natyrë përmes ecjes malore.
Ky aktivitet u realizua në dy faza: (1) prezantimin online dhe përzgjedhjen e të rinjve; (2) realizimi i projektit ne terren, ku 20 nxënës patën mundësinë të ndjekin trajnimin në fshatin Zaplluzhë, në afërsi të Maleve të Sharrit./ KultPlus.com
