Ministri i Kulturës Rinisë dhe Sportit, Kujtim Gashi, ka pritur në takim alpinisten Uta Ibrahimi. Fillimisht ministri e përgëzoi alpinisten Ibrahimi për sukseset e treguara deri më tani dhe gjatë këtij takimi ia dhuroi asaj flamurin e Republikës së Kosovës për ta vendosur në majat e Everestit gjatë këtij sezoni.

Në kuadër të mbështetjeve të shumta të cilat MKRS-ja ofron për sportistët tanë, Ministri Gashi i ofroi mbështetje financiare në vlerë prej 8 mijë euro alpinistes Uta Ibrahimi për ekspeditën e radhës të cilën do ta filloj në fund të muajit prill 2019.

Bëhet fjalë për ekspeditën në Himalaje në Nepal, në ngjitjen e radhës në majën Lhotse Jug 8516m (Lhotse South) e cila do të përcillet nga ekipi i National Geographic, ku do të bëhet edhe dokumentar për këtë ngjitje. Uta është pjesë e ekipit të ngjitëseve nga e gjithë bota, Koreja, Kina, Spanja, Kolumbia, Nepali dhe Kosova.

Me ketë rast ministri Gashi tha se ne po mbështesim në vazhdimësi sportistët të cilët kanë nevojë që të përkrahen për zhvillimin e aktiviteteve të tyre sportive dhe në pajtim me dispozitat e Ligjit për Sport dhe akteve tjera nënligjore të përcaktuara nga Ministria e Kulturës, Rinisë dhe Sportit. Duke pasur parasysh imazhin e Republikës së Kosovës në arenën ndërkombëtare, iniciativa e projekte të këtilla janë të mirëseardhura, u shpreh ministri Gashi.

Ndërsa Alpinistja Uta Ibrahimi u shpreh e kënaqur me mbështetjen financiare dhe falënderoi ministrin Kujtim Gashi për mbështetjen e vazhdueshme që po iu jep sportistëve. / KultPlus.com

Uta Ibrahimi, bëri historinë pasi u ngjit në Everest e në Manaslu, por ajo nuk u ndal asnjëherë, ajo vazhdon ngjitjet e saj me synimet më të larta, shkruan KultPlus.

Por, për të qenë sa më e përgatitur për këto ngjitje, prapa saj gjithmonë qëndrojnë njerëz që e përgatisin sa më mirë.

Bight Gear, kompania e njohur për veshmbathje kualitative për ekspedita, kanë zgjedhur ambasadoren e tyre të parë.

Ura Ibrahimi tashmë është zyrtarisht ambasadorja e parë e Bigt Gear dhe kjo gjë e ka bërë shumë të lumtur alpinisten shqiptare.

Përmes një statusi në Facebook, Uta ka shprehur falënderimin e saj për këtë Bight Gear të cilët i ka falënderuar që gjithmonë i kanë qëndruar pranë dhe e kanë përgatitur për ekspeditat e saj.

“Me njerëzit e mirë të Bight Gear njihem që nga 2018, kur më ndihmuan me veshmbathjet e tyre të kualitetit të lartë, për ekspedita, dhe gjithashtu më ndihmuan me përgatitjet fizike për ekspedita, së bashku me guidat e famshëm nga RMI Guides. 
Në thelb, Bight është më shumë se biznes. Është një kombinim i punës me dashni, e një grupi të ngushtë të personave të apasionuar pas maleve që e kanë vetëm një qëllim: të lehtësojnë dhimbjen e ngjitjeve në male.

Sot, ndihem krenare dhe e nderuar që ata më zgjodhën mua si Ambasadoren e parë të tyre.
Jam shumë falënderuese për mbështetjen dhe besimin e tyre, dhe me gjithë qejf do ti veshi teshat e tyre.”, ka shkruar Uta në Facebook. /KultPlus.com

Sot në Ditën Internacionale të Vajzave, Uta Ibrahimi përmes një video ka ndarë një urim të veçantë. Në këtë video Uta Ibrahimi dërgon mesazhe nga Namche Bazaar, Nepal, shkruan KultPlus.

Ajo me këtë video u është drejtuar vajzave duke thënë se kjo ditë njihet për të drejtat e paprekshme të tyre ndërsa ajo është duke përdorur zërin e saj në avokim të secilës vajzë që të ketë të drejta të barabarta që të shkëlqejë në jetën e saj.

“Si një vajzë që po ngjitet na majat më të larta të botës, ti duhet ta dish që çdo hap që e bëjë, unë i marr ambiciet dhe shpresat e juaja me mua. E konsideroj një mision timin që t’i rrezojë barrierat gjinore dhe të kundërshtoj konceptin e gabuar se vajzat janë të liga”, thotë në videon e saj Uta Ibrahimi me mesazhin që secila vajzë të besoj në vete./ KultPlus.com

Uta Ibrahimi, alpinistja e parë dhe e deri tash e vetmja shqiptare që po ngjitet majave më të larta të botës, pas ngjitjes së më të lartë në botë – Majës së Everestit, pas ngjitjes së dy majeve tjera – Manaslu (e 8-ta më e larta) dhe Lhotce (e 4-ta më e larta) – më 26 shtator, në ora 11.06 (China Time) e ngjiti me sukses edhe Majën Cho Oyu (maja e 6-ta më e lartë) 8,201 metra lartësi mbidetare, Tibet- Kinë. Këtë ngjitje ajo e bëri pa sasi shtesë të oksigjenit, edhe shënon edhe një rekord të ri për alpinistën shqiptare Uta Ibrahim.

“Kjo ngjitje ka qenë më sfiduese nga të gjithat deri me tani. Rotacionet e aklimatizimit kryesisht i kam bërë vet dhe të gjitha paisjet personale i kam bajt vet, pra pa ndihmën e Sherpave, deri në ditën e majës kur ju kam bashku ekipeve të tjera. Këtu kam pas pak ndihmë nga sherpat e ngjitjes, por kryesisht jam ngjitur me shumë peshë shtesë.” – thotë Uta.

Uta kishte planifikuar që të ngjitet pa sasi shtesë të oksigjenit, mirë në natën e majës, dikun në 7,800 metra, kanë filluar ti ngrihen gishtat e dorës, që e ka shtyer atë të përdor oksigjen vetëm deri në lindjen e diellit (afërsisht deri te maja e Cho Oyu-së).

“Këto ngjitje të harxhojnë shumë nga vetja. Të duhet forcë dhe motiv i bollshëm për me arritë drejt majës. Motivi dhe shtyrësi i ngjitjeve të mia është populli im dhe ndjenja e krenarisë kur valvoj flamurin e shtetit dhe të kombit. Për popullin tim, malet e mia” – shprehet Uta, e emocionuar.

Uta Ibrahimi tani gjindet në kampin bazë dhe së shpejti do të zbret në Kathmandu, Nepal. Pastaj me 7 tetor fillon ngjitjen në Amadablam, maje mjaft teknike, por jo e lartësisë 8,000m+.

Brenda 18 muajve, Uta Ibrahimi ka ngjitur 4 nga gjithsej 14 majeve më të larta në botë, që njihen si majet 8,000-jëshe (sepse të gjitha janë mbi 8,000m lartësi mbidetare).

Ekspedita është përkrahur nga: Qeveria e Kosovës, e në vecanti nga zv. Kryeministri Enver Hoxhaj, Federatën Bjeshkatare të Kosovës, Shba Pashtriku, Shba Dajti, Turkish Airlines, Familja Begeja dhe Birra Puka, UN Kosovo, UN Woman, UNICEF, UNFPA Kosovo.

Ekspedita “14 majet e Himalajeve” e ndërmarrë nga vet Uta Ibrahimi, ka për qëllim që të pushtojë të gjitha 14 majet më të larta në botë, që gjinden në malet e Himalajeve. Këtë e kanë bërë shumë pak njerëz në botë, dhe Uta synon që të jetë shqiptarja e parë që e arrinë këtë.

Uta Ibrahimi, gruaja shqiptare që bëri historinë pasi u ngjit në Everest e në Manaslu, tashmë ka marrë një rrugëtim tjetër, për të përmbushur misionin e saj të ngjitjes në 14 maje të larta të Himalajeve, shkruan KultPlus.

Në fillim të kësaj jave më 5 dhe 6 gusht 2018, ajo ka realizuar ngjitjen alpine në malin ‘Mount Rainer 4392m, Washington State, USA / Southëest – via Kautz Glacier Route’ dhe kthimin në ‘DC Route’
Ajo përmes një postimi në Facebook, ka shpjeguar gjithë eksperiencën e kësaj ngjitje.

Nisja me datë 5 Gusht në ora 06.30, 1120m Shtegu fillimisht rrugë pylli, deri te Ujvara ‘Comet’ e gjatë rreth 100 metra. Pastaj, ngjitje pa shteg dhe nëpër gurë dhe akull deri në vend kampimin. Arritem në kamp rreth orës 12, në lartësi 2800m.Mbledhja e kampit dhe nisja drejt majës u bë në mesnatë, në ora 00.30. Ngjitja ishte teknike, fillimisht akull dhe gurë dhe pastaj vetëm akull. Shtegu ishte me plot qarje te akullnajave – cravasa të mëdhaja, që na e bëri rrugën dhe më të gjatë për shkak të kalimit të tyre. Gjithashtu, shtegu ishte i pjerrët dhe terren shumë i vështirë për ngjitje për shkak të ‘snoë penitentes’ (akull që krijohet në altitudë në formën e gishtave)”, ka treguar alpinistja Ibrahimi duke thënë se shtegu konsiderohet si shteg i vështirësisë 3, AI2-3, sipas organizatës për mbikqyrjen e parkut dhe kompanive të tjera që organizojnë guida në këtë mal.

Uta thotë se këtë ngjitje e cilëson si një eksperiencë shumë të bukur dhe si një përgatitje për sfidat e reja në Himalajë, ndërsa ka uruar Kosovën e Shqipërinë që iu bashkuan vendeve nga mbarë bota alpinistët e të cilëve janë ngjitur në këtë maje.

Arritja në maje në 08.50 ( 8.20) dhe kthimi në shtegun bazë ose shtegun DC, ku pastaj takuam dhe shumë ekipe të tjera. Eksperiencë shumë e bukur, përgatitje fizike e teknike për sfidat e tjera në Himalaya. Faleminderit Mount Rainer dhe Casey Grom. Urime Kosovë dhe Shqipëri. Shteti jonë i vogël i madh, për herë të parë u bë pjesë e listës së gjatë të alpinistëve nga gjithë bota që e ngjesin ketë mal”, ka shkruar Uta Ibrahimi ne postimin e saj./ KultPlus.com

Uta Ibrahimi, gruaja shqiptare që bëri historinë pasi u ngjit në Everest e në Manaslu, sonte po niset për në Himalaje.

Uta ka treguar se është në gjendje të mirë se dhe po e presin sfidat e radhës, 14 majat e Himalajave.

Ajo me anë të një statusi ka treguar më shumë detaje për rrugëtimin të cilin e nisi sonte.

Maja Lhoste 8,516 metra, maja e 4-të më e larta në botë, do të jetë maja e parë, synim i Utës.

Ja çfarë thotë më shumë Uta Ibrahimi.

Përsëri në Himalaje ~ pas ngjitjes historike të majës #Everest8848 dhe #Manaslu8163, sot po udhëtoj për Himalaje, në tentim për të ngjitur maja të tjera, në kuadër të projektit madhorë për ngjitjen e ’14 Majat e Himalayave’

Maja Lhoste 8,516 metra, maja e 4-të më e larta në botë, do të jetë maja e parë që do të tentoj të ngjitem në këtë ekspeditë.

Jam mirë fizikisht dhe psiqikisht. Gjithë këto muaj ushtrim intenzive, vrapim sindhe ushtrime në CrossFit Prishtina më japin besim që këtë herë do të provoj edhe një maje tjetër, menjëher pas ngjitjes në Lhotse, e që ky projekt varret prej përgjigjjeve prej donatorëve potencial.

Kjo ekspeditë u bë e mundur kryesisht falë përkrahjes financiare të donatorëve individualë, sponzorëve të ngushtë dhe njerëzve dashamirës e adhuresve të alpinizmit.
Si në çdo ekspeditë tjetër dhe këtë herë nisem me besim te plotë dhe më e përgatitur se asnjëherë, për të valuar flamurin e shtetit të Kosovës dhe atij të zemrës – Shqipërisë, në majat më te larta të rruzullit tokë.

Ngjitjet e mia janë ngjitjet e popullit tim. Nëpërmjet ekspeditave të mia promovoj shqiptarinë dhe malet tona. Si alpiniste femër dua të ngre vetëdijen edhe për çështjet gjinore në shoqërinë tonë. Dua të motivoj sa më shumë vajza që të arrijnë të ngjiten në male dhe maja.

Deri më tani ekspedita është mbështetur nga: 103 përkrahës në Platformën Kosova Ideas, Bonevet, Baruti, Ekipi i Agjencive të OKB-së në Kosovë- UNKT, Komuna e Gjilanit, Bashkia Tiranë, Gekos, Birra Puka, Kontakt shpk, Turkish Airlines, Butterfly Outdoor Adventure, Soma, Sonder, Villa Gërmia, Sofra dhe donacione të tjera të nga persona privat. Ndërkohë, për herë të parë një ekspeditë e tillë përkrahet nga Salomon, kompani internacionale e cila në mesin e shumë atletëve në botë, këtë herë, për herë të parë po përkrah atlet nga Kosova si dhe me shumë përkrahje nga gjithë komuniteti bjeshkatar nga gjithë shqiptaria!

Me dashni
Uta <3

Flutura. E fuqishmja Flutur. Flutura e Kosovës, e njohur si Uta, zbardhi zemrat e qytetarëve të vendit të saj ashtu siç është e bardhë Maja e Himalajës. Flamujt nuk i munguan, kuq e zi ishte ai me të cilin është rritur, ndërsa bardhë, kaltër e verdhë është flamuri me të cilin e prezanton shtetin. Uta Ibrahimi, gruaja e parë shqiptare që pushtoi Majën më të lartë në botë Everest (8848m), vjen me një rrëfim ndryshe për KultPlus. Uta me plotë dashni, në intervistën e fundvitit për KultPlus, shpalosi emocionet e ngjitjes së majës së Everesiti, që nga entuziazmi, vdekja e deri te dashuria që ka ndjerë kur ka pushtuar këtë majë. Uta, me flokët e bardhë, sytë e kaltër e buzëqeshje që nuk i ndahet asnjëherë nga fytyra, tregoi për të rejat që do sjellë në vitin 2018-të, dhe qëllimin e saj në pushtimin edhe të 14 majeve të tjera të larta në botë gjerë në vitin 2023.

Sarandë Selimi

KultPlus: Ju jeni gruaja shqiptare që keni bërë historinë me ngjitjen në majën e Everestit, cila është më e rëndësishme për ju, që jeni gruaja e parë shqiptare që jeni ngjitur në këtë maje, apo vetë pushtimi i kësaj maje?
Uta Ibrahimi: Ngjitja në majën më të lartë të tokës, Everest 8848m, për mua dhe gjithë popullin shqiptar, është ngjitje historike. Është fakt që për të gjithë alpinistët, ngjitja nëpër maje të larta të Himalayave është shumë e rëndësishme, jo veç për faktin e ngjitjes, por edhe për faktin e shënimit të historisë dhe kthimit shëndoshë e mirë në vend. Do të isha edhe më shumë e lumtur nëse në majën e botës do të kishte mbërri dikush nga gjeneratat e gjyshes apo nënës … mirëpo, si në shumë fusha të tjera edhe në alpinizëm jemi të vonuar, dhe tani ne jemi ata që po shënojmë histori për kombin dhe shtetin. Krenaria për sakrificën dhe mundin gjatë gjithë këtyre viteve, po vlerësohet shumë e më shumë, e sidomos nga populli nëpër të gjitha trojet tona shqiptare.

KultPlus: Nëse mund të krahasohet emocioni i ngjitjes në një ndër majet më të larta të botës me ndonjë emocion tjetër, më cilin do ta krahasoje?
Uta Ibrahimi: Është ndjenjë e pakrahasueshme … është edhe ndjenjë vështirë që mund të përshkruhet, ishte… ishte… sikur me të prekë dora e Zotit e me të përndritë .. kurrë në jetë nuk do ti harrojë momentet e para të lindjes së diellit të datës 22 Maj 2017 … Ndihem shumë mirë që kam qenë e vetëdijshme dhe çdo moment të kësaj ngjitje e kam përjetuar maksimalisht.
KultPlus: Çfarë keni menduar në ato momente drejt ngjitjes?
Uta Ibrahimi: Nuk mund të them se kam pas shumë momente që kam menduar për tema të caktuara … më shumë kam kujtuar njerëzit e dashur, njerëzit e familjes dhe shoqërinë të cilët bashkë me mua, kemi kaluar një fazë me sfida dhe sakrifica. Një moment që do ta veoja, ëshë kur arrita në maje, edhe gjatë kohës kur pushoja dhe shihja atë mrekulli, me shkoi mendja te njerëzit e vendit tim, sa të vogla e sa të parëndësishme m’u dukën krejt grindjet, inatet, kacafytjet mes njerëzve. Toka prej atje lartë, ishte shumë e bukur e qetë e me shumë dashni.

KultPlus: Përgjatë rrugëtimit drejt majës së Everestit, a ka pasë raste kur i ke thënë vetes se pse i ke hyrë kësaj rruge?
Uta Ibrahimi: Ka pas shpesh momente të tilla, sidomos kur lodhja ishte shumë e madhe .. mirëpo asnjëherë aq serioze sa të më kthente poshtë … ose ndoshta pse dashnia për ngjitje në maje ka qenë shumëfish më e madhe se sa mendimet për lodhjen.

KultPlus: Në anën tjetër edhe rreziqet nuk mungojnë drejt këtij rrugëtimi, pikërisht brenda asaj periudhe, kjo majë i mori jetën afro 16 alpinistëve nga vende të ndryshme të botës, keni menduar për vdekjen?
Uta Ibrahimi: Po është e vërtetë. Numri i vdekjeve në Everest është shumë i lartë për shumë arsye. Para se të filloja ekspeditën, ndonjëherë shikoja video në youtube, edhe pse refuzoja të shihja video e dokumentar, tmerrohesha kur i shihja këto video … atje, kam parë njerëz që kanë qenë të sëmurë, njerëz që kanë qenë afër vdekjes, kam parë edhe trupa të njerëzve të vdekur … Momentin e parë që jam përballë me një alpinist sllovak, i cili veç ishte afër vdekjes ka qenë e tmerrshme. Ishte zona mes kampit 4 dhe majës, diku në 8400-8500 metra ku edhe ish një pjesë shumë e pjerrët dhe ishte kombinim i gurit dhe akullit, dhe me këtë rast ngjitja ishte edhe më e vështirë … dhe për ta tejkaluar këtë alpinist duhej që të afroheshe dhe të zhvendosje siguresat prej njërës anë në tjetrën, dhe në këto raste ishe fizikisht shumë afër njerëzve dhe kishe mundësi që të kuptoje më mirë gjendjen e të tjerëve…Më kujtohet që jam ndal dhe kam dashur ti jap diçka prej ushqimeve të pakta që i kisha në njërin xhep … dhe në ato momente kanë filluar disa alpinistë nga mbrapa të bërtasin, dukë më thënë që të vazhdoja me ecje.
E kam kuptuar që në momente të tilla duhet të ecësh, sepse nuk ke asnjë mundësi që të ndihmosh njëri tjetrin. Pas kësaj, kam parë edhe disa trupa të cilët kishin vdekur disa ditë përpara … edhe ajo në momentet e para ishte e tmerrshme, dhe më pas .. sikur gjithçka normalizohej dhe ëndrra drejt majës vazhdonte të mbetej prioritet.

KultPlus: Dhe pavarësisht rreziqeve, suksesi i Everestit duket se ju magjepsi, ju po brenda këtij viti pushtuat edhe majën tjetër, atë të Nepalit, cilën përvojë e konsideroni më të veçantë?
Uta Ibrahimi: Për herë të parë në Himalaya kam qenë në dhjetor të vitit 2016 .. ku u magjepsa me mrekullinë që ka ditur nëna natyrë të krijojë. U mahnita me kulturën, malet e sidomos me njerëzit dhe dashninë e pasionin e tyre për malet. Krejt kjo ka ndikuar në mënyrë madhështorë në Utën e maleve. U ktheva me plot jetë dhe ëndrra. E fillova ëndrrën e 14 Majeve të Tokës. Gjithsej janë 14 maje më të lartat në rruzullin tokë, e të cilat janë mbi 8000 metra lartësi mbidetare. Kjo ëshë ëndrra të cilën do ta ndjek edhe për 6 vitet e ardhshme (2023) ku do të provoj ngjitjen edhe në 12 Maje të tjera … 2 prej tyre tani veç i kam realizuar me sukses, Everestin 8848 dhe Manaslu 8163. Më e veçanta në krejt këto ngjitje ëshë maja më e lartë e tokës! Fakti që s’ka më më lartë, të bën të ndihesh si njeriu me më shumë fat në këtë tokë.

KultPlus: Pavarësisht këtyre sukseseve, udhëheqësve të Kosovës duket se nuk iu bëri shumë përshtypje ky fakt, ata nuk organizuan ndonjë pritje për këtë sukses, edhe përkundër asaj se ju vendosët flamurin e Kosovës në të dy majet, të ka zhgënjyer ky fakt?
Uta Ibrahimi: Kam vendos që këto ngjitje ti bëj me 2 flamujt, atë me të cilin u rrita dhe atë me të cilin shtet prezantoj. Udhëheqësit na nderuan duke shkruar nga një status në FB, ashtu sikurse shumë organizata të tjera në Kosovë dhe Shqipëri. Nuk u bë asgjë tjetër më shumë … përveç nderit që më bëri presidenti i Shqipërisë Ilir Meta. Do të vazhdoj ngjitjet e mia bashkë me përkrahjen e popullit shqiptarë, gjithandej nëpër trojet shqiptare, ndërsa politika dhe njerëzit në krye, sot janë dhe nesër nuk janë … e kur nuk janë më, janë të pavlerë. E ne jemi këtu gjithmonë.

KultPlus: Por në anën tjetër populli u entuziazmua nga guximi i juaj, është më e fuqishme kjo dashuri e njerëzve se sa vetë injoranca e udhëheqësve?
Uta Ibrahimi: Populli ka qenë dhe vazhdon të jetë motivi im kryesor i ngjitjeve të mia. Pa dashninë e popullit, këto ngjitje do të ishin të pamundura. I kam falënderuar prej zemrës shumë herë e vazhdoj ta bëj sa herë ta kem mundësinë.

KultPlus: Dhe emri i juaj zyrtar është Flutura, një emër që simbolizonë lirinë, mu sikurse pasioni i juaj, të vjen keq që tashmë nuk njiheni me emrin Flutura por Uta?
Uta Ibrahimi: Flutura është emri që ma ka vënë gjyshja, e Uta është emri që ma kanë lënë mbesat, e që dy emrat janë të lidhur shumë me mua, dhe nuk më vjen keq cila do që përdoret.

KultPlus: Dhe për fund, Uta Ibrahimi u shndërrua brenda një viti në një alpiniste tejet të shkëlqyer duke pushtuar dy maje shumë të rëndësishme, çfarë sfida keni vënë para vetës për vitin 2018?
Uta Ibrahimi: Viti 2018 do të jetë po ashtu me plot ngjitje dhe aktivitete në Kosovë dhe më gjerë. Do të vazhdojë prezantimet nëpër shkolla fillore, universitete, organizata etj. për të ndarë eksperiencën time me të rinjtë e kësaj toke, me qëllimin e inspirimit të gjeneratave të reja dhe ndjekjes së ëndrrave. Do të vazhdoj promovimin e Kosovës dhe Shqipërisë si destinacion për turizëm nëpërmjet organizimit të toureve për turistët e huaj nëpërmjet kompanisë time, Butterfly Outdoor Adventure. Si dhe qysh edhe e ceka më lart, përveç ngjitjeve të mia nëpër Kosovë dhe rajon, plani kryesor është të ngjiten në 12 maja të tjera të Himalayave, 2 prej tyre do ti kem në 2018 … më shumë informata do ti lancojmë në Janar 2018.
Për fund, të gjithë njerëzve të kësaj toke ua uroj Vitin e Ri, duke ua kujtuar që jeta është shumë më e bukur kur jemi një me natyrën, kur e ruajmë ambientin ku jetojmë, kur e përkrahim njëri tjetrin e kur japim dashni te njëri tjetri.
Gëzuar 2018. Utalaya Himalaya!/KultPlus.com

Alpinistja shqiptare Uta Ibrahimi është pritur sot nga audienca në Beograd, për një prezantim publik të organizuar nga Belgrade Fund for Political Excellence, shkruan KultPlus.

“Himalajet më kanë sjellë paqen me veten, ma ka mësuar tolerancën dhe më ka mësuar të pranoj njerëzit ashtu si janë. Ky është një stad psiqik dhe emocional, që pak njerëz në jetë mund ta arrijnë”, ka thënë ajo para audiencës beogradase.

Ajo gjatë prezantimit foli edhe për atë se si përkrahja e institucioneve kosovare dh atyre shqiptare po rritet. “Institucionet duan ta shohin vendin që ngjitet në majat e larta të botes, bashkë me vendet e tjera dhe kjo është gjë e mirë, sepse konsideroj që ngjitjet e mia nuk janë të Uta Ibrhahimit, por janë ngjitje të popullit shqiptarë”, ka thënë ajo.

Ngjarja është pjesë e projektit të titulluar “Ndryshimi mendësisë, ndërtimi i besimit përmes inovacionit”. Pjesë e shumë aktiviteteve të këtij projekti nga Belgrade Fund for Political Excellence bashkë me partneret e tjerë si organizata Aktiv Democracy for Development, janë edhe prezantimet publike të personave të suksesshëm.

Uta si gruaja e parë shqiptare që pushtoi majën më të lartë të botes Everest u shpreh të jetë e kënaqur me këtë ftesë dhe e lumtur që i është dhënë rasti ta ndajë përvojën e saj me njerëzit në Beograd. Uta për momentin është në përgatitje për udhëtimin e radhës në Himalaje për të pushtuar maja të tjera./KultPlus.com

Fondi i Beogradit për Ekselencë Politike ka ftuar alpinisten kosovare Uta Ibrahimi, që në Beograd të tregoj rrëfimin e saj për ngjitjen në majën e Everestit, ngjitje kjo që e bëri edhe si gruan e parë shqiptarë që ka pushtuar këtë majë të lartë prej 8.848 metrave, shkruan KultPlus.

Ky takim me Uta Ibrahimin do të mbahet më 16 nëntor, prej orës 19:00, në Qendrën Kulturore për Dekontaminim.

Uta Ibrahimi është alpiniste nga Kosova e cila brenda vitit ka bërë dy ngjitje, në atë të Everestit, e cila edhe i dha titullin e gruas së parë shqiptare në pushtimin e Everestit, më pas ka pasuar edhe ngjitja në majën e Nepalit, për të shënuar kështu dy ngjitje tejet të suksesshme Brenda vitit. /KultPlus.com

Uta Ibrahimi është femra e parë që ngjitet në dy maje kaq të larta brenda një viti,duke kujtuar se Uta është femra e parë shqiptare që është ngjitë në majën e Everestit, shkruan KultPlus.

Alpinistja shqiptare Uta Ibrahimi ka shënuar një tjetër histori, sa i përket ngjitjeve, shkruan KultPlus. Sot, në të gdhirë, me orën lokale të Nepalit, Uta Ibrahimi është ngjitë në majën e Manasolus, 8160 m e lartë.

Xhimi Begeja ka thënë se Uta Ibrahimi është femra e parë që ngjitet në dy maje kaq të larta brenda një viti,duke kujtuar se Uta është femra e parë shqiptare që është ngjitë në majën e Everestit, ngjitje kjo që ka ndodhë në maj të këtij viti. /KultPlus.com

Uta Ibrahimi e cila ka më shumë se dhjetë ditë që është nisë të pushtojë edhe Majën e Manaslu, ka arritë tashmë në bazën 2, shkruan KultPlus.

Vetë Uta Ibrahimi ka njoftuar për KultPlus se ajo tashmë ka arritë në kampin 2, në lartësi prej 6200 metrave lartësi, duke përshkuar kështu rrugëtimin e saj fillimisht në kampin bazë, pastaj në atë të parin, e tash është vendosur në kampin 2.

Maja në Manaslu është 8163 metra e lartë dhe është në dhjetëshen e majave më të larta të botës. kjo ngjitje në një ndër majat më të larta të botës është duke u mundësuar nga Shoqata Dajti, ajo e Pashtrikut, Frutomania, Komuna e Gjilanit, Birra Puka dhe Butterfly Outdoor Adventure./KultPlus.com