Etiketë: Visar Mulliqi

Alberina Haxhijaj

Me rastin e shënimit të 11 vjetorit të Pavarësisë së Kosovës, Galeria e Ministrisë së Kulturës “Qafa” ka hapur sot dyert e veta për të sjellë para publikut punën e artistit Visar Mulliqi. Kjo hapësirë nuk ka mjaftuar për të sjellë të tërësishme ekspozitën e Mulliqit të titulluar “Origjinaliteti” prandaj një pjesë e pikturave, të formatit të madh janë vendosur në objektin e ish-Rilindjes.

Mulliqi edhe këtë herë i ka qëndruar besnik pikturës abstrakte dhe ngjyrave të cilat i merr nga ambienti rrethues i vendlindjes së tij. Pikturat e reja të Mulliqit kanë një ngjashmëri edhe me punën e kaluar të artistit duke theksuar këtu ekspozitën “100% Origjinal”  të hapur në vitin 2018. Madje ngjyrat e përdorura e që shkrihen mjeshtërisht me njëra-tjetrën të kujtojnë ato të kaluarat e që ishin bazuar në peizazhet panoramike të cilat autori i kishte parë gjatë udhëtimeve nëpër Kosovë. Kjo ngjashmëri vjen si rezultat se edhe kjo ekspozitë është vazhdimësi e ciklit me të cilin artisti ka pesë vite që punon.

“Peizazhesh prej rrethit kosovar që i kam parë gjatë udhëtimeve me makinë e që më kanë lënë mbresa i kam transmetuar në pëlhurë, në mënyrë abstrakte me kontura të figuracionit”, pohon artisti.

Tablotë e realizuara, sipas kuratorit Maliqi edhe pse janë abstrakte, madje paksa edhe kaotike mund të cilësohen edhe si lajmëtare të optimizmit. Kjo vërehet përmes emërtimeve si “Anija e Shpresës”, edhe pse në mes tyre mund të gjejmë edhe “The Big mask” apo “Vallëzimi i ndyer”.

“Edhe në veprat e mëvonshme, në përmasat dhe variacionet e ndryshme, shfaqet ky dualizmi bazik, kombinimi i abstraksionit të lirë dhe ekspresiv me ndërhyrje racionalizuese të figurshmërisë si shënjuese e botës dhe jetës reale. Andaj kompozicionet e Mulliqit deklarohen me dy çelësa: janë psikograme të kërkimit të artit puro me shtytës që dirigjohen nga nënvetëdija, por janë edhe vegime dhe impresione nga jeta dhe natyra, për realizimin e të cilave artisti e vë në veprim përvojën dhe traditën e begatshme figurative të mjeshtërisë prej piktori që di t’i harmonizojë format dhe ngjyrat edhe kur ato janë në dukje imazhe kaotike”,  janë fjalët e Maliqit me të cilat ai e përshkruan këtë ndërthurshmëri.

Por sipas, kuratorit Shkëlzen Maliqi, Mulliqi shkon edhe me tej, ai sintetizon traditën e pikturës abstrakte duke aplikuar në mënyrë indirekte edhe përvojat e taborrit tjetër të modernizmit abstrakt, atë gjeometrik dhe konstruktivist. Një kombinim si ky, i dy rrymave abstakte, nuk është i rrallë në artin bashkëkohorë edhe pse vlerësohet se ka shumë rreziqe. Por piktori Visar Malliqit i realizon mjaftë bukur këto dy kombinime duke marrë aq sa ka nevojë nga këto dy rryma dhe duke sjellë kryevepra,  realizmi i saktë i të cilave dëshmon se emri i tij qëndron lartë në piramidën e artit bashkëkohor në Kosovë.

“Shënimin i 11 viteve si shtet i pavarur ka shërbyer si një motiv shtesë për autorin që të ritheksojë se artin abstrakt nuk duhet konsideruar si të largët dhe alienuar nga realiteti”, thekson kuratori Shkëlzen Maliqi.

Ekspozita “Origjinaliteti” do të qëndrojë e hapur deri më 5 mars. / KultPlus.com

Alberina Haxhijaj

Artisti Visar Mulliqi që nga viti 2011 nuk ka ekspozuar në Prishtinë ndërsa pas shtatë viteve ai është rikthyer për të sjellë një ekspozitë e cila lidhet me elemente tradicionale.

Ekspozita e tij “100% Origjinal”, u hap mbrëmë në Galerinë e Fakultetit të Arteve në Prishtinë.

Të gjitha punimet që u prezantuan në këtë rikthim artistik ë Mulliqit lidhen me traditën shqiptare dhe kujtimet të cilat artisti i ka nga fëmijëria. Përmes kësaj ekspozite ai solli Kosovën ashtu siç e kujton, gjatë vizitave të ndryshme së bashku me prindërit e tij, gjersa është i vetëdijshëm për ndryshimet që ka pësuar Kosova në aspektin e arkitekturës dhe në fushat tjera të jetës. Sipas tij ngjyrat e ndezura dhe energjia të cilat e japin këto ngjyra, gjenden akoma të pranishme në peizazhin e Kosovës.

“Punimet e mia, panoramat apo peizazhet janë realizuar në Kosovë, vende të cilat i kam vizituar kur kam qenë i vogël, së bashku me prindër. Prandaj e kam quajtur ekspozitën “100% Origjinal” pasi që jam i këtij vendi dhe këtu shfaqet identiteti im, puna ime e pa marrë askund”, thekson artisti për KultPlus.

Në këtë ekspozitë e cila ka rreth 30 piktura, të pranishmit patën mundësi që të shikonin edhe një cikël të vogël, në të cilin mund të vëreheshin kasolle të vjetra, të marra përsëri nga kujtimet e fëmijërisë. Ndërsa tema e gjithë kësaj ekspozite i shërben artistit si pikënisje për zhvillimin e artit të tij.
“Ngjyrat e ndezura janë shumë me rëndësi sepse Kosova i ka ngjyrat e ndezura sidomos në vjeshtë dhe në pranverë. Kjo mundet me u pa nëpër Kosovë, në punime kam krijuar edhe një lloj stoicizmi të cilin unë gjithmonë e bëj. Këtu gjithmonë ka më pak lëvizje, ato fortunat e ndryshme, por stoik ka me qenë populli jonë dhe njerëzit që jetojnë këtu, diçka që shihet edhe në punime”, tha ai për KultPlus duke shtuar se gjërat kanë ndryshuar ndër vite mirëpo kjo është Kosova që ai e ka në nëndijen e tij.

Kuratori i kësaj ekspozite – Zeni Ballazhi, konsideron se në krijimtarinë e piktorit paraqitet një pikturë ekspresioniste figurative e dimensioneve të ndryshme me një fuqi emocionale.

“Pikturat e Visar Mulliqit plotësojnë lidhshmërinë tek njëra-tjetra, sigurojnë një dimension ekspresionist, e që ngritë shikueshmërinë dhe kënaqësinë tek publiku. Këto piktura për nga vlerat e tyre, justifikojnë plotësisht interesimin dhe vlerësimin e lartë të profesionistëve dhe artdashësve të shumtë si dhe nga vetë piktori i cili i koncepton si “100% origjinale”, është shprehur ai.

Për artistin Brane Kovic, piktori është i pranishëm fuqishëm në jetën kulturore të mjedisit të tij dhe i frymëzuar nga një traditë e caktuar ekspresioniste. Një ndër përfaqësuesit tjerë të shquar, ishte babai i tij Muslim Mulliqi.

“Nga regjistrat e ndryshëm të ofruar në tryezë dhe vepra të piktorit, Visar Mulliqi na zbulon imagjinatën e tij të veçantë, që rezulton nga një studim i thellë në një mjedis në të cilin është formuar dhe prej nga ka trashëguar”, është shprehur ai.

Artisti pritet që të hapë një ekspozitë tjetër në Prishtinë, në janar të vitit të ardhshëm. Ndërsa kjo ekspozitë do të qëndrojë e hapur deri më 10 maj në Galerinë e Fakultetit të Arteve. / KultPlus.com