Gazeta prestigjioze zvicerane Neue Zürcher Zeitung (NZZ) ka botuar sot një presidentes së Kosovës, Vjosa Osmani, shkruar nga ekspertja austriake e Ballkanit (dhe Kosovës)  Adelheid Wölfl.

Më poshtë gjeni artikullin në gjuhën shqipe.

Si vajzë, ajo ka përjetuar luftën në Ballkan. Si kryetare e shtetit, Vjosa Osmani tani drejton një shoqëri të mbizotëruar nga meshkujt – ajo përpiqet ta nxisë dhe ta ndryshojë atë. “Të bëhem si Vjosa”, përgjigjigjen kosovaret e reja kur pyeten për të ardhmen e tyre, shkruan NZZ, transmeton albinfo.ch, përcjell KultPlus,

Jo më heronjtë e luftës, por arsimi, liria personale dhe ndërkombëtarizmi janë ato që kërkohen. Këto i mishëron saktësisht presidentja e re kosovare, Vjosa Osmani.
Ajo është idhull i vajzave dhe grave të reja në Kosovë.

Në zgjedhjet e fundit më 14 shkurt, juristja 38 vjeçe ndihmoi partinë e majtë nacionaliste Vetëvendosje për të fituar shumicën absolute. Ajo vetë mori 300,000 vota, të quajtura  preferenciale. Askush në shtetin më të ri në Evropë nuk ka arritur kaq shumë.

Vjosa Osmani është një përjashtim në Ballkan. Asnjë grua tjetër nuk ka aq fuqi sa ajo, ndaj asnjë tjetre nuk tregohet aq shumë respekt, përcjell albinfo.ch. Ajo është e patrembur, e zgjuar dhe i njeh detajet ligjore të kushtetutës kosovare dhe të drejtës ndërkombëtare. Është e qeshur, argumenton qartë dhe nuk ka frikë nga konflikti.

Ndoshta kjo ka të bëjë me formimin e saj të hershëm. Kur ajo ishte vajzë, gjatë luftës me Serbinë, familja e saj ishte detyruar të largohej nga veriu i Kosovës. Osmanit i kujtohet se ka ndjerë tytën e ftohtë të një pushke AK-47 që një ushtar serb i kishte futur në gojë.

Vështirë se ndonjë shoqëri tjetër në Evropë ka rezistuar aq shumë sa shoqëria kosovare që nga vitet 1990. Prandaj ata (kosovarët) nuk tolerojnë më asgjë. Edhe kur u duhet të presin dhe të ndalen, ata zhvillojnë strategji afatgjata. Janë elastikë kur është puna për të bërë sakrifica. Kur të vijë koha, ata luftojnë për të realizuar kthesën.

Vjosa Osmani mishëron këtë vetëbesim demokratik. Ajo është në pushtet sepse shumë kosovarë besojnë në të, trasnmeton albinfo.ch gazetën zvicerane. Besojnë se me të mund të ndryshohet, përkundër varfërisë, pavarësisht papunësisë së lartë, korrupsionit në zyra dhe izolimit të Kosovës.

Presidentja e re e shtetit dëshiron të çlirojë vendin për herë të dytë, siç e thotë thotë vetë ajo: nga njerëzit në gjyqësor dhe në polici, që bëjnë gjithçka për para, nga profesorët që japin nota provimi në këmbim të eurove, nga burrat të cilët nuk dua që gratë e tyre të shkojnë në punë.

Zgjedhja e saj kuptohet kështu: Tani është radha e grave dhe të rinjve. Gruaja me flokë kaçurrelë të gjatë dhe të errët ishte aktive politikisht si adoleshente. Ajo ka marrë diplomën e drejtësisë nga Universiteti i Pittsburghut në shtetin Pensilvania të SHBA-së, transmeton albinfo.ch. Më vonë ka luftuar si avokate para Gjykatës Ndërkombëtare të Drejtësisë për legjitimimin e pavarësisë së Kosovës.

Ajo ka qenë në parlament si pjesë e Lidhjes (Konservatore) Demokratike të Kosovës (LDK) në parlament, ku ndihej pakëndshëm në mesin e klikës së zotërve të vjetër. Prandaj themeloi Nismën “Guxo!” dhe votuesit e ndoqën atë. Koalicioni i saj mori më shumë se 50 për qind të votave. Asnjëherë më parë kaq shumë gra kosovare nuk janë zgjedhur në parlament dhe qeveri si sot.

Osmani përfaqëson kampin e djathtë por modern të shoqërisë kosovare. Ish-ushtarët që pozojnë në fotografi me armë para shqiponjave të zeza nuk kanë sjellë vende pune.

Gruaja që mban gjerdan me perla, pëlqen të marrë pjesë edhe në ndeshje futbolli, por mbi të gjitha tregon sukses në sigurimin që gratë e përdhunuara në luftën e vitit 1999 të marrin kompensimin. Ajo mbështet prindërit e rinj dhe ndërtimin e kopshteve për fëmijë.

Vjosa Osmani përpiqet të mbrojë sa më shumë që të jetë e mundur nga publiku dy vajzat e saj. Burri i saj punon në ministrinë e jashtme, por nuk ndërhyn në politikë.

Kohët e fundit, Osmani ka rënë në sy me kritikat e saj ndaj BE-së. E pyetur për Serbinë, ajo ndonjëherë ka reaguar ashpër, gjë që nuk e lehtëson dialogun midis fqinjëve ndërluftues. Osmani kërkon që Serbia të kërkojë falje për mizoritë e luftës të viteve 1990 para se të mund të fillojnë bisedimet. Toni i saj i zërit ka një anë populiste, herë nacionaliste.

Ajo dëshiron të anulojë një marrëveshje që paraardhësi i saj bëri me Presidentin e SHBA, Donald Trump.

Në Kosovë, pikët me shqiptarë nacionalistë mund të fitohen posaqërisht duke sharë Serbinë dhe duke larguar vëmendjen nga problemet e brendshme, përcjell albinfo.ch. Do të ishte i rëndësishëm tani përqendrimi në menaxhimin e pandemisë dhe pasojave shkatërruese të saj ekonomike dhe sociale.

Por Osmani kohë më parë është shprehur: “Ne nuk jemi zgjedhur që të kemi frikë nga telashet”./albinfo/ KultPlus.com

Presidentja e Republikës së Kosovës, Vjosa Osmani ka kujtuar sot të rënët në Rakoc dhe Lagje të Re, 22 vite më parë.

Në një shkrim në Facebook, Osmani ka thënë se pjesëtarët e Brigadës 162 “Agim Bajrami” e deshën lirinë dhe u flijuan për të.

 “22-vjet më parë, forcat e regjimit gjenocidal serb ia mësynë Rakocit dhe Lagjes së Re në Kaçanik. Në Betejën e 9 prillit të vitit 1999 për mbrojtjen e pragut të shtëpisë ranë 28 dëshmore e dëshmorë dhe 32 martirë. Pjesëtarë të Brigadës 162 “Agim Bajrami”, të UÇK-së, e deshën lirinë dhe u flijuan për të. Sakrifica e tyre është testament historie për rrugën deri te liria. Sot i kujtojmë me nder e respekt gjithë ato gra e burra, të cilët janë shtyllë e fuqishme e lirisë, pavarësisë dhe e shtetit tonë”, ka shkruar ajo.

“Përveç tjerash, Beteja e 9 Prillit dëshmoi edhe për guximin dhe  kontributin e grave për lirinë e vendit. Në altarin e lirisë, këtë ditë ranë: Lumnije Raka, Jehona Raka, Emsale Frangu, dhe Mukadeze Muhaxheri-Lika. Qoftë i përjetshëm kujtimi për dëshmoret, dëshmorët e martirët”, tha Osmani./ KultPlus.com

Presidentja Vjosa Osmani, në kuadër të Ditës Botërore të Shëndetit ka pritur sot në një takim një grup studentësh të mjekësisë.

Sipas njoftimit për media, ata kanë prezantuar aktivitet e tyre me studentët e rinj, trajnimet e organizuara për ta dhe përpjekjet që ikja e kuadrit mjekësor jashtë vendit të mos jetë opsion.

Osmani ka theksuar se investimi në arsim e shëndetësi duhet të jetë prioritet. Në këtë kontekst, ka përmendur se ikja e kuadrit mjekësor ka shkaktuar problem serioz për Kosovën.

“Duhet ta kthejmë trendin, në mënyrë që mjekët tanë ta shohin perspektivën këtu”, ka potencuar ajo.

Për këtë shkak, njoftohet se Osmani ka theksuar se duhet të kthehet vëmendja nga kjo sferë, në mënyrë që kuadrot shëndetësore të mbeten në Kosovë./ KultPlus.com

Presidentja e Kosovës, Vjosa Osmani sot ka nderuar kujtimin e personaliteteve që qëndrojnë në themelet e shtetit tonë, shkruan KultPlus.

Osmani ka vizituar varrin e presidentit Ibrahim Rugova, ka vizituar familjen Jashari në Prekaz, duke nderuar në kujtim Adem Jasharin.

“Sot nderova kujtimin edhe për të pagjeturit. Janë mbi 1600 persona për të cilët ende nuk dihet asgjë. Memoriali për nder të të pagjeturve të Kosovës në oborrin e Kuvendit të Republikës së Kosovës është kujtimi ynë dhe malli i çdoditshëm i familjarëve për të cilët liria do të ketë kuptim, kur për më të dashurit e tyre do ta kenë një adresë e mbi të gjitha kur do të ketë drejtësi. Ata janë pengu jonë, janë testamenti i luftës, janë paqja e papërfunduar”, ka shkruar Osmani në Facebook.

Në fotografitë e bashkangjitura, Osmani ka kujtuar edhe gratë e dhunuara gjatë luftës, ku thotë se Kosova numëron afro 20  mijë gra të dhunuara nga regjimi gjenocidal serb.

“Kosova numëron afro 20 mijë gra të dhunuara gjatë luftës nga regjimi gjenocidal serb. Te memoriali “Heroinat”, sot nderova kujtimin për secilën nga to. Njëzetë mijë plagë të hapura, njëzetë mijë heroina për të cilat drejtësia asnjëherë nuk u vu në vend. Kryesit e krimeve monstruoze duhet të dënohen, shteti i Kosovës duhet t’i ofroj heroinave drejtësi, përkrahje, e jetë me dinjitet”, shtoi Osmani.

Ajo ka shtuar se çështja e të pagjeturve do të jetë përkushtim i pandalshëm për të

Më poshtë mund të lexoni statusin e plotë:

Sot nderova kujtimin e personaliteteve më ikonike që qëndrojnë në themelet e shtetit tonë.

Te varri i arkitektit të shtetit të Kosovës, presidentit Ibrahim Rugova bëra nderime në kujtim të këtij burrështetasi, i cili pati kurajën për t`i afruar të gjithë afër vetes, për ta bërë të mundshëm misionin e bërjes së shtetit. Ai e bëri Kosovën me shumë miq. Ne sot po e  forcojmë shtetin dhe po i kultivojmë aleancat, sepse siç thoshte ai: shtëpia mbahet me miq!

Kurse në Prekaz, nderova nderova kujtimin për Bacën Adem dhe Familjen Jashari, të cilët na bëjnë krenar çdo ditë të jetës sonë, të cilët na rikujtojnë rrugën e vështirë deri te liria dhe të cilët janë e vërteta e përpjekjes sonë kombëtare për liri! Ai si komandant dhe shumë luftëtarë të UÇK-së, mbrojtën dinjitetin tonë si popull me rezistencën, mosnënshtrimin, luftën dhe sakrificën.

Por, lufta jonë për liri pati tagrin e vetë.

Kosova numëron afro 20 mijë gra të dhunuara gjatë luftës nga regjimi gjenocidal serb. Te memoriali “Heroinat”, sot nderova kujtimin për secilën nga to. Njëzetë mijë plagë të hapura, njëzetë mijë heroina për të cilat drejtësia asnjëherë nuk u vu në vend. Kryesit e krimeve monstruoze duhet të dënohen, shteti i Kosovës duhet t’i ofroj heroinave drejtësi, përkrahje, e jetë me dinjitet.

Sot nderova kujtimin edhe për të pagjeturit. Janë mbi 1600 persona për të cilët ende nuk dihet asgjë. Memoriali për nder të të pagjeturve të Kosovës në oborrin e Kuvendit të Republikës së Kosovës është kujtimi ynë dhe malli i çdoditshëm i familjarëve për të cilët liria do të ketë kuptim, kur për më të dashurit e tyre do ta kenë një adresë e mbi të gjitha kur do të ketë drejtësi. Ata janë pengu jonë, janë testamenti i luftës, janë paqja e papërfunduar!

Përgjatë punës sime, çështja e të pagjeturve do të jetë përkushtim i pandalshëm, sikurse edhe kujtimi i përhershëm për ta!/ KultPlus.com

Vjosa Osmani-Sadriu sot do të pranojë detyrën e presidentes së Kosovës, dy ditë pasi mori votat e mjaftueshme në Kuvend për të qenë shefe e shtetit.

Siç ka njoftuar Presidenca e Kosovës të hënën, për shkak të situatës me pandeminë s’do të organizohet ceremoni e inaugurimit, por do të ketë një sërë aktivitetesh për të shënuar pranimin e detyrës.

Sipas agjendës së nisur nga Zyra për Informim, ceremonia do të nisë në orën 10:00 me arritjen e Osmanit para ndërtesës së Kuvendit të Kosovës për të ta mbyllur në orën 17:00, kur do të presë komandantin e Forcës së Sigurisë së Kosovës, gjenerallejtënant, Rahman Rama dhe gjeneralë të tjerë.

Gjatë ditës së parë në zyrë, Osmani do të presë edhe xhudistët kampionë nga Peja.

Osmani u zgjodh të dielën presidente e vendit. / KultPlus.com

Presidentja Vjosa Osmani procesin e mbrëmshëm ku ajo u zgjodh presidente e vendit, e ka quajtur një përmbyllje të dijnititshme dhe vulosje të një shembulli të mirë funksionimit të demokracisë, shkruan KultPlus.

Nëpërmjet një postimi në Facebook, Osmani ndër të tjera ka shkruar se të luftosh padrejtësitë dhe veprime e gabuara nuk është vetëm çështje vote, por përmbushja më e madhe e rrugëtimit politik.

Tutje ajo ka cituar mësimin që Jusuf Gërvalla kishte nxjerrë nga nëna e tij, Ajshe, si kujtesë për secilën herë që përballemi me pengesa.

Më poshtë mund të lexoni statusin e saj të plotë:

Mbrëmë e përmbyllëm dinjitetshëm një kaptinë të zgjedhjeve demokratike, si dhe e vulosëm edhe njërin ndër shembujt më të mirë të funksionimit të demokracisë, duke respektuar në plotëni vullnetin e qytetarëve.

Vullneti i qytetarëve, i shprehur më 14 shkurt u plotësua dhe  institucionet e vendit të dala nga ky vullnet u konstituuan plotësisht.

Jam plotësisht e vetëdijshme për pritshmëritë që ju i keni. Por, po ashtu jam e vetëdijshme që misioni ynë është shumë më shumë se sa angazhim politik, ngaqë se çdo mision i nisur me bekimin e qytetarëve e që derivon nga vullneti i tyre, është mbi të gjitha, mision fisnik. Andaj nga ne pritet të dijmë të dallojmë se si të ndajmë të mirën nga e keqja, të bëjmë diferencën në mes të së tashmes dhe të kaluarës, të dijmë se kur është koha e duhur të ndërmarrim veprime madhore, duke u siguruar që çdo veprim i yni na sjell një hap më afër Kosovës për të cilën flasim kaq shumë; një hap më afër Kosovës ashtu siç e duam dhe e ëndërrojmë.

Të luftosh padrejtësitë e të sfidosh veprimet e gabuara, të shtysh përpara kauza që e përmirësojnë jetën e njerëzve që na rrethojnë, të qëndrosh fort prapa bindjeve tuaja kur e di që diçka është e drejtë dhe duhet bërë, nuk është thjesht çështje e një vote apo deklarimi publik, është përmbushja më e madhe dhe arritja më kulminante në realizimin me sukses të misionit tonë në këtë rrugëtim politik. Veprime të tilla, veprime guximtare, veprime që i japin kah shpresëngjallës historisë, janë dëshmia më e pastër e madhështisë së secilit e secilës nga ne.

Kur zgjedhet rruga e drejtë, asnjëherë nuk është e lehtë e pengesat janë të mëdha. Por kur përballeni me to, kujtojeni gjithnjë atë që heroi ynë kombëtar Jusuf Gërvalla e shkroi si mësim që kishte marrë nga nëna e tij, Nëna Ajshe:

“Rruga e nderit është më e zorshmja, por është e vëtmja rrugë e drejtë për njeriun. E kush është munduar për nder, nder ka gjetë”!

Në këtë rrugëtim, shpresoj t’u kem të gjithëve bashkudhëtarë. Na priftë e mbara!/ KultPlus.com

Zgjedhja e një gruaje për presidente në Kosovë për herë të dytë mori vëmendje edhe në mediat ndërkombëtare.

“Reuters” e nis artikullin duke thënë se Vjosa Osmani, një juriste me profesion, u shkollua në SHBA dhe se ishte kandidatja e Vetëvendosjes për postin e presidentes.

“Vjosa Osmani ishte në detyrë si presidente e Kosovës që nga nëntori i vitit të kaluar kur paraardhësi i saj, Hashim Thaçi, dha dorëheqje për shkak se u përballë me gjyq për krime lufte në Holandë”, shkruan Reuters.

Për zgjedhjen e Osmanit presidente shkroi edhe e famshmja gjermane “Deutsche Welle” e cila në rreshtin e parë e quan atë lidere karizmatike.

“Liderja karizmatike 38 vjeçare mori mbështetjen nga parlamenti në një votim që u bojkotua nga parta serbe. Ish-presidenti Hashim Thaçi e la postin në nëntor pasi u akuzua për krime lufte”, nis shkrimi i DW.

Gazeta turke “Anadolu Agency”, derisa dha lajmin se Kosova ka një presidente të re tregoi pak edhe për figurën e Osmanit. / KultPlus.com