Presidentja e Kosovës, Vjosa Osmani, ka uruar të gjithë muslimanët për festën e Fitër Bajramit.
Në një postim në Facebook, ajo është shprehur se kjo festë duhet të na frymëzojë të gjithëve për ta forcuar mirëkuptimin dhe afërsinë ndaj njëri tjetrit.
“Lutjet tuaja në muajin e bekuar të Ramazanit qofshin të pranuara e kjo ditë qoftë e mbushur me gëzim, paqe, tolerancë dhe respekt të ndërsjellë, për të gjithë”, ka shkruar ajo./KultPlus.com
Sot janë bërë 16 vite që nga miratimi i Kushtetutës së Republikës së Kosovës, që u ratifikua me 9 prill të 2008 dhe ka hyrë në fuqi më 15 qershor 2008.
Kushtetuta është akti më i lartë juridik, që garanton të drejtat dhe liritë themelore të të gjithë qytetarëve të vendit.
Në këtë ditë të shënuar ka reaguar edhe presidentja Vjosa Osmani e cila është shprehur se Kushtetuta jonë është udhërrëfyese, ndaj zbatimi pakompromis i saj na ndihmon dhe përshpejton procesin tonë integrues drejt familjes së madhe euroatlantike.
“Sot, në ditën e miratimit të Kushtetutës, e cila është normë supreme që përcakton identitetin dhe vlerat e shoqërisë sonë demokratike, rikonfirmojmë përkushtimin tonë institucional për zbatimin dhe afirmimin e këtyre vlerave.
Kushtetuta jonë është udhërrëfyese, ndaj zbatimi pakompromis i saj na ndihmon dhe përshpejton procesin tonë integrues drejt familjes së madhe euroatlantike”, shkruan presidentja. / KultPlus.com
Presidentja e Republikës së Kosovës Vjosa Osmani ka ndarë mirënjohje për studentët e Fakultetit Juridik, të cilët u renditën në vendin e tretë në garën prestigjioze ku morën pjesë afër 400 universitete të botës, shkruan KultPlus.
Për këtë ceremoni, KultPlus ju sjell të plotë njoftimin e presidentes Osmani.
Mirënjohje Presidenciale për ekipin e fakultetit juridik që dolën të tretët në garën më prestigjioze të drejtësisë në botë.
Ata janë personifikimi më i mirë i rinisë sonë – të talentuar, të motivuar e të përkushtuar për ta arritur çdo sukses e për ta ngritur lart e më lart shtetin tonë.
Prandaj sot në prezencë të disa prej ish pjesëmarrësve të garës VIS moot, shumë prej të cilëve edhe kisha nderin t’i trajnoja për rreth 15 vite, si dhe të ekipeve më të reja të Universitetit tonë, të udhëhequr nga Donikë Qerimi, e mbi të gjitha në prezencë të prindërve të këtyre të studentëve të jashtëzakonshëm, shprehëm sërish mbështetjen e krenarinë tonë për studentët tanë./ KultPlus.com
Presidentja e Kosovës, Vjosa Osmani, ka rikujtuar se më 15 dhe 16 prill, Prishtina do të jetë nikoqire e përfaqësuesve nga rajoni dhe bota në Forumin Ndërkombëtar për Gratë, Paqen dhe Sigurinë.
Ajo ka ndarë një video në llogaritë e saj në rrjetet sociale, duke shkruar: “Me mbi 100 panelistë në dhjetëra panele diskutimi me temën “Ridefinimi i Sigurisë”, edicioni i dytë do të fokusohet në parandalimin e dhunës seksuale gjatë luftës, si dhe garantimin e sigurisë për gratë dhe vajzat gjersa përballen me sfidat e shkaktuara nga ndryshimet klimatike”.
“Shihemi së shpejti”, vazhdoi presidentja Osmani./KultPlus.com
Presidentja e Republikës së Kosovës, Vjosa Osmani, sot ka pritur në takim lamtumirës ambasadorin jorezident të Bangladeshit, Mosharraf Hossain Bhuiyan, të cilin e ka falënderuar për angazhimin gjatë mandatit të tij.
Presidentja Osmani shprehu mirënjohjen e përzemërt për angazhimin e palëkundur të Bangladeshit për thellimin e marrëdhënieve dypalëshe me Kosovën dhe mbështetjen e vazhdueshme ndër vite.
Në këtë linjë, Presidentja Osmani shtroi nevojën e mbështetjes nga Bangladeshit për forcimin e pozitës së Kosovës në arenën ndërkombëtare.
Në takim u diskutua edhe për mundësitë e shkëlqyera për nxitjen e mëtejme të marrëdhënieve ekonomike dhe tregtare, me theks të veçantë në industrinë e tekstilit, e cila është e zhvilluar në Bangladesh.
Në këtë kontekst, u diskutua edhe për mundësinë e organizimit të një forumi të përbashkët ekonomik si një mundësi e shkëlqyer për bizneset nga të dyja vendet për t`i eksploruar perspektivat e bashkëpunimit në të ardhmen.
Presidentja Osmani, në këtë takim, e ka njoftuar ambasadorin Bhuiyan edhe për edicionin e dytë të Forumit për Gratë, Paqen dhe Sigurinë, i cili do të mbahet më 15-16 prill të këtij viti dhe i cili është një mundësi e mirë për bashkëpunim dhe dialog të mëtejshëm. / KultPlus.com
Presidentja e vendit, Vjosa Osmani, po merr pjesë në panelin e Forumit Diplomatik të Antalisë me temën “avancimi i diplomacisë në kohë trazirash”.
Osmani tha se përkundër që populli i Kosovës ka qenë viktimë e gjenocidit për shumë vite, viktimë e krimeve të luftës, që ka numrin më të madh të fëmijëve të vrarë në luftërat ballkanike e që ka mijëra gra të dhunuara, Kosova sërish e ka zgjedhur dialogun si mënyrën e vetme për të ecur përpara.
“Përkundër gjithë kësaj dhimbje, ne kemi zgjedhur dialogun si mënyra e vetme përpara, kemi zgjedhur zgjidhje paqësore si e vetmja rrugë. Edhe nga përvoja ime personale, sepse më dukët që jam rritur bashkë me Kosovën si shtet, edhe nga përvoja ime personale dhe e secilit person në shtetin tonë, mund të mësojmë se sa e vështirë është të zgjedhësh paqen e diplomacinë në kohë lufte”, tha Osmani.
Tutje, Osmani tha se në vitet e 90-ta, kur populli i Kosovës ishte viktimë e gjenocidit serb, Kosova zgjodhi edhe Marrëveshjen e Rambujesë, për të cilën tha se një pjesë e madhe e saj nuk ishte ajo çfarë ishte kërkuar, por sipas saj, ishte një zgjidhje paqësore që do ta ndalte luftën “dhe u desh t’i themi ‘po’, sepse hapte rrugë për aleanca”. /KultPlus.com
Sot shënohen 2 vite që kur Ukraina është në luftë nga agresioni rus, shkruan KultPlus.
Presidentja e Kosovës, Vjosa Osmani, përmes një postimi në rrjete sociale ka thënë se Kosova qëndron krah Ukrainës. “Liria do të mbizotërojë përsëri”, shkroi Osmani.
“Ne qëndrojmë me Ukrainën sepse e dimë se si është të paguash çmimin më të lartë për lirinë. Ne e dimë dhimbjen e humbjes së fëmijëve të pafajshëm; të dhunës seksuale gjatë luftës; e varreve masive me eshtrat e njerëzve tanë të dashur. Por liria fitoi dhe do të mbizotërojë përsëri! Slava Ukraina!”, ka shkruar ajo.
Ukraina akoma nuk e njeh Pavarësinë e Kosovës. /KultPlus.com
Presidentja Vjosa Osmani u ka bërë thirrje institucioneve të vendit që t’i ruajnë marrëdhëniet me aleatët e Kosovës. Ajo tha se për çështjen e dinarit nuk duhet të diskutohet me palën serbe në Bruksel, por zgjidhja sipas saj duhet të gjendet brenda Kosovës. Ndërkohë, BE-ja ka konfirmuar se ftesat për takim i janë dërguar palëve. Qeveria ka refuzuar të marr pjesë në takim.
Përplasjet e fundit të Qeverisë së Kosovës me SHBA-të dhe BE-në kanë ngjallur reagimin e presidentes Vjosa Osmani e cila i ka inkurajuar të gjitha institucionet e vendit që të bëjnë çmos në ruajtjen e raporteve me aleatët sidomos me SHBA-të. Sipas presidentes, Kosova ka probleme të mëdha të sigurisë me Serbinë prandaj, siç vlerësoi, vendit i duhen aleancat.
“Kosova nuk mund të ecë përpara vetë. Nëse dëshirojmë të ecim përpara si shtet këtë duhet ta bëjmë së bashku me aleatët. Edhe kushtetuta edhe aleatët”, ka thënë Osmani.
Por, e para e shtetit i ka dhënë të drejtë Qeverisë se për çështjen e dinarit nuk duhet të diskutohet në Bruksel me palën serbe. Për këtë tha se mund të gjendet një zgjidhje praktike. Kritikoi BE-në se rol jo balancues në proces të dialogut.
“Çështja e dianrit duhet të zgjidhet këtu në Kosovë. Kjo nuk do të duhet të shkaktonte përplasje me aleatët. Nëse ka vullnet me një takim midis institucioneve relevante do të dalin me një propozim konkret për rregulloren e BQK-së”, ka deklaruar ajo.
Pavarësisht se Qeveria përmes kryenegociatorit Bislimi ka refuzuar takimin në Bruksel me palën serbe ku do të flitej për dinarin, zëdhënësi i BE-së, Peter Stano, konfirmoi se ftesat i janë dërguar palëve për këtë takim i cili është paraparë të mbahet javën e ardhshme.
“Kemi dërguar ftesat për partnerët tanë për t’u marr me çështje të caktuara dhe e kemi spjeguar në thellësi këtë gjatë ditës së djeshme. Tani shpresojmë se të dyja palët do të mund të pajtohen me këtë dhe të zgjidhin çështjen që është shkaktuar nga një vendim i pafat dhe pa konsultime nga njëra palë që ka ndikuar tek pala tjetër. Ky është roli ynë si lehtësues. Ne nuk jemi komentues dhe të themi se cfarë po bëjmë, por po provojmë që të ndihmojmë partnerët që të gjejnë zgjidhje. Ne asnjëherë nuk spekulojmë rreth skenarëve “çka nëse”. Ne kemi dërguar ftesat, kemi vënë objektivat dhe kemi deklaruar përgatitjen tonë për të ndihmuar palët që të gjejnë zgjidhje”, ka thënë Stano të premten.
I dërguari i posaçëm për dialogun Kosovë-Serbi, Miroslav Lajëak, ka paralajmëruar hapa të ri në muajt të ardhshëm në proces të dialogut. Për këtë hapa presidentja Osmani tha se është e njoftuar nga vet Lajçak, për të cilin tha se mund të mos jetë më ndërmjetësues pas zgjedhjeve në BE.
“Në procesin e dialogut janë disa muaj vendimtarë sepse në maj janë zgjedhjet në BE, pas zgjedhjeve në BE do të kemi komisionerë të rinj, zyrtarë të rinj, që do ta marrin përsipër procesin e dialogut. Sipas të gjitha gjasave edhe ndërmjetësues të ri, nga ajo që më është thënë nga Lajçak, i cili e ka mandatin deri diku në gusht”, ka thënë presidentja.
Zëvendëskryeministri, Besnik Bislimin, ka refuzuar të marrë pjesë në takimin e thirru nga BE-ja për çështjen e dinarit, duke kritikuar ndërmjetësin e dialogut Miroslav Lajçak për shkelje të parimeve të tij cili sipas tij, kishte deklaruar se pa pajtim paraprak nga palët nuk mund të përcaktohet agjenda. /KultPlus.com
Presidentja e Kosovës, Vjosa Osmani, ka thënë se presidenti i Serbisë, Aleksandar Vuçiq qëndron prapa sulmit në Banjskë të Zveçanit ku u vra rreshteri i Policisë së Kosovës, Afrim Bunjaku.
Në një intervistë për mediumin arab “Al Aan” dhënë më 8 shkurt, të cilën Presidenca e Kosovës e shpërndau sot në Facebook, Osmani tha se , i është konfirmuar edhe nga aleatët se Vuçiqi qëndron pas sulmit të 24 shtatorit.
“Këto dëshmi janë konfirmuar nga aleati ynë më i rëndësishëm, dhe janë ndarë me shtetet anëtare të NATO-s. Gjithçka çon te Vuçiqi. S’po flasim te humbja e tij e kontrollit ndaj disa bandave. Po flasim për të se ka organizuar e urdhëruar sulmet nëpërmjet bandave. E tash po mundohet t’i ikë përgjegjësisë, duke dhënë disa emra. Të gjithë e dinë, kam pritur në zyre shumë mysafirë e liderë e ma kanë konfirmuar këtë. Ka raste edhe kur i kanë thënë Vuçiqit direkt, se kanë shumë dëshmi se ai ishte pas sulmit. Është konfirmuar kjo dëshmi nga aleatë të ndryshëm”, tha Osmani.
Ajo tha se secili shtet do të vendosë vetë se si do t’i përdorë këto dëshmi. Për hetimet vendore, ajo tha se një pjesë e tyre është publikuar, dhe për tjetrën do të vendosë Policia.
“Gjitha dëshmitë janë aty për ata që duan t’i shohin. Por, ka disa shtete që s’duan t’i përdorin e të tjerat që duan t’i injorojnë. Por, historia na ka mësuar rëndë në shumë raste, se kur autokratët mundohen të qetësohen, atëherë ata inkurajohen të bëjnë më tepër e jo më pak”, tha Osmani. /KultPlus.com
Në nderë të 16-vjetorit të Pavarësisë së Kosovës është bërë pritja shtetërore nga krerët më të lartë të institucioneve të vendit.
Në fjalën e saj, presidentja e vendit, Vjosa Osmani, tha se 16 vjet më parë, Kosova hodhi një hap historik drejt forcimit të lirisë së saj dhe duke e hapur një kapitull të ri, që u kurorëzua me shpalljen e Kosovës Republikë.
“17 shkurti do të mbahet mend përherë si një pikë kthese historike dhe një kapitull gëzimi në historinë moderne të vendit tonë, por është po ashtu një përkujtim i çdo vitshëm i barrës së lartë të përgjegjësisë që peshon mbi supet tona. Një përgjegjësi për ta ndërtuar dhe kultivuar një shtet, bazuar në parimet e lirisë, demokracisë dhe drejtësisë”.
“Rrugëtimi ynë gjer më sot ishte shumëçka por assesi i lehtë. Rezistenca paqësore ndër vite e udhëhequr nga arkitekti i shtetit tonë, presidenti historik Ibrahim Rugova, e pasuar nga rezistenca e armatosur nga kryekomandanti Adem Jashari me familje dhe UÇK-ja është rrjedhojë e rezistencës së trashëguar ndër breza por edhe e vetëdijes së lartë se çmimi i lirisë është më i shtrenjtë por edhe më i çmuari”, tha Osmani.
Më tej, e para e shtetit tha se Kosova është krenare që në rrugëtimin e saj për shtet të pavarur, pati mbështetjen e vazhdueshme të aleatëve të saj ndërkombëtarë, e veçanërisht të ShBA-ve dhe shteteve të Evropës.
“Ashtu si në ditët tona më të errëta, ata qëndruan pranë nesh edhe në rrugëtimin me sfida plot të shtetndërtimit. Suksesi i Kosovës është edhe sukses i partnerëve dhe aleatëve tanë, andaj gjersa ecim përpara me vizion të qartë për të ardhmen euro-atlantike, aleancat mbeten kyçe, partneritetet thellësisht të rëndësishme e bashkëpunimi është çelësi që na sjell më afër së ardhmes më të denjë e më premtuese”.
“Faleminderit ShBA-ve, faleminderit NATO dhe faleminderit të gjitha shteteve mike, të cilat më 1999 ishin në anën tonë, në anën e drejtë të historisë, duke na mbrojtur nga shfarosja nga regjimi gjeoncidal i Serbisë. Po aq sa ishin të rëndësishëm aleatët kur ne përmbushëm ëndrrën tonë për liri e shtet, po kaq të rëndësishëm janë edhe sot gjersa angazhohemi e punojmë fort për ta mbrojtur lirinë tonë, shtetin tonë dhe të ardhmen tonë”, tha tutje Osmani.
Tutje, Osmani tha Kosova është e denjë dhe e meriton vendin e saj në gjirin e familjes euroatlantike dhe sipas saj, gjersa jo çdo herë mund të shihet qartë, çdo ditë është një hap më afër së bëri këtë ëndërr të kamotshme të popullit të Kosovës një realitet.
“Teksa synimin e kemi që lirinë ta mbrojmë me çdo kusht, që shtetin ta bëjmë edhe më të fuqishëm e të integruar në strukturat euroatlantike, le ta bëjmë këtë me përkushtim të pashoq e krah për krah me miqtë dhe aleatët tanë. Kosova është mbi të gjitha”, tha Osmani. /KultPlus.com
Presidentja Vjosa Osmani në 16 vjetorin e pavarësisë së Kosovës, ka pranuar telegram urimi nga Mbreti i Mbretërisë së Bashkuar, Charles III.
Në letrën e tij, Mbreti Charles III ka thënë se vlerëson lidhjen në mes të shteteve tona, duke theksuar se shpreson se do të vazhdojë bashkëpunimi i ngushtë në çështjet e rëndësishme globale, nga të cilat do të përfitojnë brezi ynë i ardhshëm.
Në vijim, gjeni mesazhin e plotë të urimit nga Mbreti Charles III:
Presidentja e Republikës së Kosovës, Vjosa Osmani ka pranuar një telegram urimi për 16 vjetorin e pavarësisë nga Presidenti i Shteteve të Bashkuara të Amerikës, Joseph R.Biden Jr.
Me këtë rast, Presidenti Biden ka konfirmuar se Kosova dhe Shtetet e Bashkuara ndajnë një miqësi dhe partneritet të qëndrueshëm të përforcuar nga vizioni i përbashkët për një rajon më paqësor, më të sigurt dhe më prosperues.
Në vijim, gjeni letrën e plotë të urimit, të dërguar nga Presidenti Biden:
Presidentja e Kosovës, Vjosa Osmani, në konferencën e përbashkët për media me ministrin gjerman të Mbrojtjes, Boris Pistorius, ka përmendur sulmet e njëpasnjëshme nga Serbia të cilat janë bërë mujave të fundit, pasi siç tha ajo, kjo e fundit ka ikur pa pasoja.
Osmani tha se duhet të ketë pasoja për Serbinë për shkak të tendencave të saj që ajo të kuptojë mesazhin qartë dhe të ndalojë veprimet që rrezikojnë gjithë rajonin e Kosovës.
Ndër të tjera, Osmani përmendi keqpërdorimet që janë bërë me emrin e KFOR-it dhe flamurin gjerman në periudhën kur edhe është kryer sulmi i Banjskës. Për këtë, ajo tha se duhet të mbrohet kufiri mes Kosovës dhe Serbisë.
“Masa e parë që duhet të ndërmerret është që kufiri mes Kosovës dhe Serbisë të jetë i sigurt sepse një ndër arsyet pse sulmi i 24 shtatorit ka ndodhur për shkak se për muaj të tërë para sulmit serb, nëpërmjet rrugëve ilegale ka arritur të kontrabandojë armë të stilit ushtarak, të kontrabandojë uniforma dhe të ka arritur të kontrabandojë edhe automjete të blinduara. Ta keni parasysh që ka pasur raste që ata kanë keqpërdorur emrin e KFOR-it duke vendosur atë në autoblinda vetëm për t’i sjell brenda Kosovës dhe ka pasur edhe raste kur kanë keqpërdorur flamurin gjerman për një gjë të tillë duke vendosur kështu në rrezik jo vetëm Kosovën por edhe prezencën gjermane. Prandaj duhet ta mbrojmë kufirin me çdo kusht që të parandalohet shpërndarja e këtyre armëve. E dyta, sa më të fuqishme të jenë mesazhet politike në raport me Serbinë aq më mirë do të jetë për sigurinë dhe stabilitetin rajonal”, tha ajo. /KultPlus.com
Presidentja e Republikës së Kosovës, Vjosa Osmani ka ngushëlluar familjen Metaj, për vdekjen e profesorit universitar, Kadri Metaj.
Ngushëllimi i Presidentes Osmani:
E nderuar familje Metaj,
Jam thellësisht e pikëlluar nga shuarja e filozofit e profesorit universitar, Kadri Metaj.
Puna dhe kontributi i tij në sferën akademike, do të mbetet testament dhe kujtim i përhershëm për të.
Ju shpreh ngushëllime të sinqerta familjes, miqve, Universitetit të Prishtinës dhe Shoqatës së Filozofëve të Kosovës!
Në këto çaste të rënda për familjen, bashkëndjej me ju dhe ju inkurajoj që të gjeni forcë në përballimin e dhimbjes.
I përhershëm qoftë kujtimi për profesor Kadri Metajn!/KuktPlus.com
Presidentja e Kosovës, Vjosa Osmani, ka biseduar sot me kreun e shtetit të katarit, Tamim Bin Hamad Al Thani, përcjell KultPlus.
Nëpërmjet një postimi në platformën X, presidenjta Osmani njoftoi se gjatë kësaj bisede, ata diskutuan për marrëdhëniet e shkëlqyera mes Kosovës dhe Katarit si dhe për heqjen e ndërsjellë të vizave.
Në vijim, KultPlus ua sjell postimin e presidentes Osmani:
E kënaqur të flas me H.H. Sheikh Tamim Bin Hamad Al Thani sot, mik dhe aleat i madh i Kosovës.
Diskutuam për marrëdhëniet e shkëlqyera Kosovë – Katar, përpjekjet për forcimin e pozitës ndërkombëtare të Kosovës, zgjerimin e mundësive për investime dhe marrëveshjen e ardhshme për heqjen e ndërsjellë të vizave./KultPlus.com
Presidentja e Kosovës, Vjosa Osmani, gjatë ceremonisë përkujtimore të masakrës së Reçakut, ka thënë se 15 janari i vitit 1999 është kujtesë e përhershme për brutalitetin ndaj fëmijëve, grave dhe burrave që e pësuan veç se ishin shqiptarë.
“Është kujtesë e jona e përhershme për brutalitetin ndaj fëmijëve, grave dhe buraave të cilët e pësuan vetëm për shkak se ishin shqiptarë”, tha ajo.
Presidentja Osmani tha se “jemi këtu për të kërkuar drejtësi”.
“15 janari i vitit 1999 i tronditi themelet e ndërgjegjes njerëzore kudo në botën demokratike. Bota përjetoi një ndër masakrat më të tmerrshme që ka ndodhur në Evropë në fund të shekullit XX. Kjo masakër ka dëshmitarë të gjallë që përjetuan llahtarinë e asaj dite. Përveç banorëve të mbijetuar, dëshmitë e të cilëve janë thelbësore për zbardhjen e autorëve të krimit, kjo masakër pati një kryedëshmitar i cili ndodhet me ne edhe në këtë përvjetor. Ambasadori William Walker”, u shpreh ajo.
Osmani tha se familjarët e viktimave të Reçakut dhe shteti i Kosovës janë në anën e të vërtetës, për të cilën tha se është përmbledhur më së miri në fjalitë e ambasadorit Walker.
“Thirrja për drejtësi për ta është në funksion të mbrojtjes së dinjitetit njerëzor të viktimave dhe familjeve të tyre. Kërkimi i drejtësisë nuk është thjeshtë një kërkesë, është detyrë e shenjë që kapërcen kufijtë, etnitë dhe përkatësitë politike. Familjet e të masakruarve meritojnë që autorët e këtij krimi kundër njerëzimit të dalin para drejtësisë. Ata dhe shteti ynë janë në anën e së vërtetës dhe kjo është e përmbledhur më së miri në fjalitë e ambasadorit Walker, në Recak ka ndodhur krim kundër njerëzimit”, tha ajo.
“Faktet janë më të fuqishme sesa propaganda e vazhdueshme serbe, e vërteta është gjithmonë më e fuqishme sesa gënjeshtra, ndaj për Reçakun ka vetëm një të vërtetë, më 1999 civilët janë vrarë mizorisht nga një regjim gjenocidal nga regjimi i Millosheviqit. Kjo e vërtetë ishte atëherë, është edhe sot dhe do të mbetet përherë e tillë, pavarësisht se sa tenton ta mohoj regjimi në vazhdimësi i Millosheviqit, ai i Vuçiqit”, tha ajo. /GazetaExpress/ KultPlus.com
Presidentja e Kosovës, Vjosa Osmani, ka dekretuar formalisht hapjen e Misionit të Posaçëm të Republikës së Kosovës në Selinë e Shenjtë, përcjell KultPlus.
Nëpërmjet një postimi në Facebook, presidentja Osmani ka thënë se ky është një hap i rëndësishëm në thellimin e raporteve në mes të Kosovës dhe Selisë së Shenjtë.
Në vijim KultPlus ua sjell postimin e plotë të presidentes Osmani:
Pas dy vitesh pune intensive me Selinë e Shenjtë, kam dekretuar formalisht hapjen e Misionit të Posaçëm të Republikës së Kosovës në Selinë e Shenjtë.
Ky është hap i rëndësishëm për Kosovën dhe raportet tona me Selinë e Shenjtë, të cilat do të vazhdojmë t’i thellojmë./KultPlus.com
Fraza e fundit me të cilën përmbylli fjalimin para gazetarëve në fundvit presidentja Vjosa Osmani ishte një e shkëputur nga filmi i famshëm i këtij viti “Barbie”.
Për këtë Osmani mori vëmendjen edhe të mediave ndërkombëtare.
Një artikull për këtë e ka shkruar media amerikane, Politico.
Me një xhaketë sportive rozë të ndezur, presidentja e Kosovës Vjosa Osmani kishte një mesazh për të mbyllur një konferencë për shtyp për gazetarët, shkruan ky medium.
“This Barbie is the President”, tha ajo, duke bërë shenjë me veten ndërsa dhoma shpërtheu në duartrokitje.
Osmani – e cila u zgjodh si presidentja e dytë grua e Kosovës në vitin – ka qenë një avokate dhë mbështetëse e barazisë gjinore në vendin e vogël ballkanik, duke folur kundër dhunës ndaj grave dhe duke kryesuar kabinetin më të barabartë gjinor në historinë e Kosovës.
“Në arsim, sport, kulturë, biznes, shkencë apo politikë, gratë kanë treguar se janë të afta të arrijnë majat e suksesit… Për të gjitha gratë dhe vajzat e republikës, sot dhe çdo ditë: Mos ndaloni kurrë së ëndërruari, por më e rëndësishmja, kurrë mos ndaloni së besuari”, tha Osmani në një deklaratë për Ditën Ndërkombëtare të Gruas këtë vit.
Barbie, filmi kryesor i Hollywoodit i verës 2023, ka një tjetër lidhje befasuese me Prishtinën. Filmi përfshin një skenë të këngëtares angleze dhe shqiptare Dua Lipa, e cila u emërua Ambasadore Barbie — më falni, ambasadore nderi — e Kosovës në vitin 2022.
Aktualisht nuk ka ndonjë të dhënë nëse Barbieland e njeh Kosovën, përmbyll artikullin Politico. /KultPlus.com
Presidentja e Kosovës, Vjosa Osmani në takimin e Këshillit për Demokraci dhe të Drejta të Njeriut, tha se fokusi në këtë vit e sidomos në pjesën e dytë të vitit ka qenë ruajtja dhe garantimi i sigurisë në vend për shkak të agresionit të Serbisë.
“Viti përpara kërkon koordinim të vazhdueshëm institucional dhe veprime të mëtejme konkrete me qëllim të arritjes së objektivave dhe shënimit të sukseseve të fusha të ndryshme të cilat ua kemi borxh qytetarëve tanë”, tha ajo.
Osmani në takimin e Këshillit për Demokraci dhe të Drejta të Njeriut, i ka bërë thirrje qytetarëve të Kosovës të respektojnë rregullat që kanë të bëjnë më liberalizimin e vizave që do të jenë nga 1 janari i viti 2024, përcjell gazeta Express.
Ajo ka thënë se Kosova ka pasur arritje në këtë vit, duke përmendur rangimin në disa fusha. Po ashtu ka përmendur edhe aplikimin në Këshill të Evropës dhe kalimin në fazën e parë në këtë rast. E para e endnit tha se dhe aplikimi për statusin e kandidatit për BE. / KultPlus.com
Presidentja e Kosovës, Vjosa Osmani, ka pritur në takim të rregullt ambasadorin e Shteteve të Bashkuara të Amerikës, Jeffrey Hovenier, ku ishte prezente dhe drejtoresha për Evropën jugore dhe qendrore në Departamentin Amerikan të Shtetit, Colleen Hyland.
Sipas komunikatës së presidencës, në takim Osmani dhe Hovenier kanë diskutuar për zhvillimet e fundit në vend.
“Në takim, Presidentja Osmani bisedoi për zhvillimet e fundit në vend, si dhe u fol për format konkrete të avancimit të partneritetit e bashkëpunimit me Shtetet e Bashkuara të Amerikës”, thuhet në komunikatë.
Së fundmi, Osmani në një deklarim për mediat ndërkombëtare, tha se Serbia planifikon sulme të reja, derisa ajo vazhdon të ketë kontakt të vazhdueshëm me Ambasadorin Amerikan. /KultPlus.com
Presidentja e Kosovës, Vjosa Osmani, ka takuar sonte në Bruksel edhe presidenten e Komisionit Europian, Ursula von der Leyen.
Osmani shkruan në platformën X, që i ka ritheksuar Leyenit, domosdoshmërinë e heqjes së masave aktuale të BE-së, ndaj Kosovës.
”Një diskutim thelbësor me presidenten e KE-së, Ursula von der Leyen, në Bruksel. Theksova rëndësinë e mbështetjes së Komisionit për Kosovën dhe domosdoshmërinë që masat aktuale të hiqen. Ne mirëpresim Planin e ri të Rritjes, për të cilin Kosova, ka propozuar reforma konkrete”. /KultPlus.com
Presidentja Vjosa Osmani ka dhënë një deklaratë për media para hyrjes në Samitin BE-Ballkani Perëndimor në Bruksel, shkruan KultPlus.
Në samitin BE-Ballkani Perëndimor që po zhvillohet të mërkurën në Bruksel, Osmani deklaroi se Kosova posedon informata në lidhje me planet e Serbisë, për ta sulmuar prapë Kosovën, siç deklaron ajo.
Këto informacione, sipas Osmanit, janë shumë alarmante dhe duhet të merren me seriozitet të plotë.
“Të gjitha informatat që ne i kemi është se Serbia po planifikon sulme të reja, unë do t’i informojë të gjithë liderët evropianë sot për informatat që institucionet tona të sigurisë së bashku me partnerët i kanë mbledhur në këtë drejtim, sepse këto janë alarme të cilat të gjithë ne duhet t’i marrim shumë seriozisht dhe të veprojmë si preventivë në mënyrë që Serbia mos ta destabilizojë më rajonin tonë”, deklaroi Osmani.
Luftat dhe sakrificat që po zhvillohen nëpër botë, sipas presidentes së Kosvoës janë kohë të vështira për të gjithë Evropën.
“Ky samit është duke ndodhur në një kohë të vështirë për Evropën dhe për të gjithë botën për shkak të një sërë konfliktesh që po ndodhin anë e kënd botës dhe natyrisht që edhe natyrisht që vëmendja e të gjithë partnerëve tanë është te të gjitha këto konflikte. Këto konflikte që po ndodhin në botë dëshmojnë se sa e rëndësishme është paqja në Ballkanin Perëndimor. Për fat të keq Serbia akoma udhëhiqet nga njerëz që dëshirojnë ta kthejnë prapa rajonin tonë në vitet e 890-ta, ne nuk duhet të lejojmë që një logjikë e tillë të triumfojë, prandaj po punojmë me partnerët tanë në BE në mënyrë që të rritet siguria në Kosovë dhe sidomos aspekti i sigurisë rreth kufirit me Serbinë dhe e dyta që të hiqen masat ndaj Kosovës, është e domosdoshme që të ketë masa ndaj Serbisë për aktin e agresionit që është kryer më 24 shtator. Për fat të keq deri më tani nuk ka pasur asnjë veprim dhe nëse vazhdohet pa asnjë veprim ose masë ndaj Serbia, ajo do ta marrë këtë si një lloj nxitjeje”, tha ajo tutje.
Ajo gjithashtu pati për të thënë diçka edhe për sulmin e Serbisë ndaj Kosovës më 24 shtator, duke shtuar se kërkon nga Bashkimi Evropian masa parandaluese, dhe jo medoemos ndëshkuese.
“Kur flas për masat, dua të jem e qartë se nuk po flas për ndëshkim, po flas për parandalim dhe për fat të keq historia ka treguar se kjo është e vetmja gjuhë që kupton Serbia, mosvendosja e masave për të është ftesë që të sulmojë sërish. Vuçiqi më së miri do t’i kuptonte masat financiare nga BE-ja”, ka shtuar Osmani. /KultPlus.com
Presidentja e Kosovës, Vjosa Osmani, ka takuar presidenten e Komisionit Evropian, Ursula von der Leyen.
Osmani ka shkruar në rrjetin social X, se me von der Leyen ka biseduar mbi përafrimin e Kosovës me Bashkimin Evropian.
“Gjithmonë një kënaqësi e madhe për t’u takuar me presidenten e Komisionit Evropian Ursula von der Leyen dhe të diskutojmë se si mund ta afrojmë Republikën e Kosovës me BE-në”, shkruan Osmani. /KultPlus.com
Më 27 Nëntor shënohet “Dita e Forcës”, ku do të mbahet edhe një manifestim qendror në kazermën “Adem Jashari”, shkruan KultPlus.
Duke filluar nga ora 10:00 deri në orën 13:00 do të organizohet “Dita e Hapur”, ku qytetarët janë ftuar që të marrin pjesë.
Presidentja e Kosovës, Vjosa Osmani, do të marrë pjesë në këtë manifestim nga ora 11:00.
Njoftohet se deklarimi për media i personaliteteve të larta shtetërore, me rastin e kësaj dite, do të bëhet nga ora 11:50-12:10.
“Në këtë ditë festive, të gjithë qytetarët janë të mirëpritur në të gjitha kazermat e FSK-së, si në: Prishtinë, Mitrovicë, Istog, Gjilan, Prizren, Ferizaj dhe Pomozatin, ku do të ekspozohen pajisje, armatime, demonstrime si dhe aktivitete të ndryshme, që dëshmojnë kapacitetet e FSK-së”, thuhet në njoftim.
Në të njëjtën ditë, duke filluar nga ora 19:00, Ministria e Mbrojtjes ka ftuar qytetarët të pasqyrojnë koncertin e bendit frymor të FSK-së dhe të Filarmonisë së Kosovës, që do të mbahet në Sallën e Kuqe – Pallati i Rinisë. /KultPlus.com