Vlora Dumoshi, Ministre e Kulturës, Rinisë dhe Sportit, ka pritur sot në takim ambasadoren e Republikës së Francës në Kosovë, Marie-Christine Butel, me të cilën biseduan për bashkëpunimin dhe synimet e deritanishme të arritura në fushat të cilat janë në përgjegjësinë dhe mandatin e MKRS-së si dhe vazhdimin e mëtejmë të thellimit të relacioneve mes dy vendeve në këto fusha.

Ministrja Dumoshi ka informuar ambasadoren Butel për programin dhe planet që ka për qëllim t’i realizojë në udhëheqjen e MKRS-së, për bashkëpunimin me partnerët dhe miqtë e Kosovës, konkretisht të ministrisë.

Ministrja e njoftoi ambasadoren franceze për përkrahjen që do të ofrojë për institucionet dhe organizatat që merren me kulturë, rini dhe sport dhe angazhimin e saj për të arritur sa më shumë sukses brenda dhe jashtë vendit.

Po ashtu, ministrja e ka falënderuar ambasadoren dhe përmes saj qeverinë dhe popullin francez për kontributin e shtetit të Francës që e ka dhënë për Kosovën, si një partner i rëndësishëm dhe shtet mik dhe vazhdon të japë kontribut edhe më tutje me projekte konkrete siç është, fjala vjen Java e Frankofonisë në Kosovë.

Ministrja Dumoshi potencoi faktin se bashkëpunimi dhe përkrahja e shumë projekteve në fushën e kulturës dhe trashëgimisë duhet të vazhdojë dhe ajo tregoi gatishmërinë e saj për ta thelluar bashkëpunimin mes MKRS-së dhe ambasadës duke i forcuar edhe më shumë marrëdhëniet mes dy vendeve përmes kulturës e sportit duke i shkëmbyer përvojat e mira dhe ekspertët e këtyre fushave.

Ndërkaq ambasadorja franceze Marie-Christine Butel, e uroi Ministren Vlora Dumoshi për detyrën e re dhe e u shpreh se bashkëpunimi dhe përkrahja mes dy vendeve por konkretisht edhe ndaj MKRS-së do të vazhdojë.

Ajo theksoi se Republika e Francës dhe Republika e Kosovës, si dy vende të pavarura do të vazhdojnë të jenë përkrah njëra-tjetrës dhe ky relacion do të jetë i qëndrueshme dhe do të avancohet edhe në të ardhmen dhe rikonfirmoi se prania dhe mbështetja e Ambasadës në projekte konkrete do të vazhdojë duke u rritur në të ardhmen.

Gjatë takimit u diskutua edhe për prioritetet e përbashkëta të Ministrisë së Kulturës, Rinisë dhe Sportit dhe Ambasadës Franceze në Kosovë siç janë: fusha e arkeologjisë dhe trashëgimisë kulturore, kinematografia, promovimi i shkrimtarëve dhe librave kosovarë në Francë dhe anasjelltas. Bashkëpunimi ndër-kulturor mes dy vendeve është edhe më i mirë kur arti dhe kultura arrijnë të depërtojnë tek dy vendet. / KultPlus.com

Ministrja e Kulturës, Rinisë dhe Sportit, Vlora Dumoshi ka marrë pjesë në ceremoninë e organizuar nga Komiteti Olimpik i Kosovës “Laureatët 2019”, ku janë ndarë çmimet për sportistët dhe trajnerët më të mirë të sportit për vitin e kaluar.

Ministrja Dumoshi në emër të MKRS-së mbajti një fjalë rasti në ceremoninë në fjalë ku mes tjerash tha se sporti është një prej prioriteteve të ministrisë dhe do të ketë një vend të veçantë për shkak të sukseseve që ka kjo fushë në Republikën e Kosovës.

Ja fjala e plotë e Ministres Dumoshi:

I nderuar Z. Hasani – President i KOK (Komiteti Olimpik i Kosovës)
I nderuar Z. Marius Vizer President i Federatës se Ndërkombëtare te Xhudos(IJF)
Te nderuar Kryetarë te Federatave – Sekretarë të Federatave
Të nderuar pjesëmarrës,
Shumë të dashur sportistë,
Zonja dhe zotërinj,

Kam kënaqësinë e veçantë qe në ceremoninë e laureatëve t’ju drejtohem si Ministre e Kulturës, Rinisë dhe Sportit e Republikës së Kosovës. Edhe më e lumtur që sot kemi mes nesh Presidentin e Federatës Ndërkombëtare të Xhudos, Z. Marius Vizer me të cilin sapo pata nderin të kem një takim.

Z. President, falënderimet janë të pakta për krejt angazhimin tuaj në avancimin e sportit kosovar dhe sportistëve tanë në arenën ndërkombëtare.

Njëkohësisht, ndihem e lumtur për punën dhe sukseset e sportisteve dhe trajnerëve në ciklin olimpik të cilët kanë arritur rezultate cilësore. Kjo bazuar edhe ne angazhimin e organizatave sportive, të cilat me këmbëngulësi e punë të palodhshme kanë arritur suksese të jashtëzakonshme.

Lëvizja olimpike bazohet në vlera dhe po të njëjtat vlera i ka përqafuar edhe Komiteti Olimpik i Kosovës. Për Ministrinë e Kulturës, Rinisë dhe Sportit, sporti është prioritet. Në Mandatin qe unë udhëheq sporti do të ketë vend të veçante për shumë arsye, mbi të gjitha për pasionin e madh që kam personalisht për sportin. Shpreh vlerësimin e konsideratën time për kontributin e vlefshëm të komunitetit sportiv në Kosovë, në të gjitha fazat e zhvillimit te sportit në Republikën e Kosovës.

Si Ministre e Kulturës, Rinisë dhe Sportit, bazuar ne programin qeverisës kemi përcaktuar objektivat e qarta ne zhvillimin e sportit, duke përmirësuar infrastrukturën ligjore dhe investimet ne standardizimin e infrastrukturës sportive si mbështetje për organizatat sportive për zhvillimin e sportit.

Për mua ka qenë privilegj i veçantë të organizoj për herë të parë pritjen e ekipit olimpik për ngjarjen më të madhe në sport – Lojërat olimpike verore, ku Kosova u stolis me medaljen e artë të cilën ia dhuroi Majlinda Kelmendi. Prandaj veçmas faleminderit Majlinda e Driton që na bëtë krenarë.

Njëkohësisht dua të shpreh mirënjohje dhe të falënderoj Kombëtaret e futbollit, hendbollit, basketbollit, volejbollit sporteve individuale, xhudos, mundjes, atletikës, boksit, karatesë, etj.

Ju garantoj që do të punoj ngushtë me organizatat sportive ne përmirësimin e qeverisjes se mirë duke avancuar programet të cilat rrisin efikasitetin në realizimin e qëllimeve te përbashkëta.

Uroj dhe shpresoj që sportistët tanë duke arritur norma olimpike do te rrisin Ekipin Olimpik te Kosovës dhe Republika e Kosovës të paraqitet me vajzat dhe djemtë me te mirë në Tokio 2020.

Krahëhapur do ti presim të kurorëzuar me medalje olimpike. / KultPlus.com

Ministra e Kulturës, Rinisë dhe Sportit, ka pritur sot në takim delegacionin e Ambasadës së Republikës së Turqisë në Republikën e Kosovës, të kryesuar nga ambasadori i Turqisë në Kosovë, Çağrı Sagar, me të cilët ministrja bisedoi për vazhdimin e bashkëpunimit mes dy vendeve.

Ministrja Dumoshi ka vlerësuar kontributin e shtetit të Turqisë që e ka dhënë për Kosovën, me theks në fushat që mbulon MKRS-ja, sidomos në fushën e trashëgimisë kulturore.

Ministrja përmes ambasadorit Sakar e falënderoi qeverinë dhe popullin turk për përkrahjen dhe ndihmën që kanë dhënë dhe që japin për shtetin e Kosovës.

Ministrja Dumoshi shprehu gatishmërinë për thellim të bashkëpunimit edhe mes MKRS-së dhe ambasadës turke për të realizuar projekte të përbashkëta konkrete.

Ndërkaq, ambasadori turk Sakar, e uroi ministren Dumoshi për detyrën e re dhe e premtoi se bashkëpunimi dhe përkrahja ndaj MKRS-së do të vazhdojë. Mysafirët e informuan ministren për projektet që janë realizuar deri më tani nga qeveria turke në Kosovë.

Ambasadori theksoi se Turqia e Kosova do të vazhdojnë të jenë përkrah njëra-tjetrës edhe në të ardhmen dhe rikonfirmoi se mbështetja e Ambasadës në projekte të ndryshme do të vazhdojë dhe bashkëpunimi do të thellohet edhe më tej. / KultPlus.com

Ministrja Vlora Dumoshi ka pritur sot në një takim një grup të rinjsh nga Komuna e Prishtinës, me të cilët diskutoi për problemet, sfidat dhe pritshmëritë që kanë të rinjtë, jo vetëm të kryeqytetit por në tërë vendin.

Ministrja i njoftoi të rinjtë kryeqytetas për politikat dhe programin që ka Ministria e Kulturës, Rinisë dhe Sportit (MKRS) për fushën e rinisë. Ajo gjatë bashkëbisedimit me të rinjtë diskutoi por objektivat dhe strategjinë që ka MKRS-ja për të rinjtë, aktivizimin e tyre të mëtejmë në jetën sociale e institucionale dhe në avancimin e tyre në përgjithësi.

Ndër të tjera, ministrja Dumoshi i informoi të rinjtë se do ta kenë mbështetjen dhe përkushtimin e plotë të saj në bashkëpunimin me ta për të çuar përpara synimet e përbashkëta të MKRS-së dhe interesat e të rinjve përmes aktiviteteve e projekteve konkrete ku të rinjtë e Republikës së Kosovës, përpos shkëmbimit të përvojave të mira në kampet që do të organizohen me mbështetje të ministrisë, do të përkrahen edhe do të rritet bashkëpunimi me Këshillat për Veprim Rinor Lokal (KVRL-të) anë e kënd komunave të Kosovës.

Në kuadër të fuqizimit të kapaciteteve të organizatave rinore, Ministrja Vlora Dumoshi, u shpreh se organizatat që merren me rininë do të subvencionohen në ngritje të kapaciteteve të tyre për të nxitur nismat kreative, për të përkrahur integrimi shoqëror të të rinjve përmes kulturës, sportit e rekreacionit, dhe organizimet tradicionale të të rinjve, siç është Dita Ndërkombëtare e Rinisë më 12 gusht.

Po ashtu ministrja u shpreh se do të angazhohet maksimalisht në mbështetje të të rinjve ku do të ketë rritje të vazhdueshme të buxhetit për këtë sektor jetik të shtetit të Kosovës, do të jetësohet strategjia për rini duke zbatuar aktivitetet që parashihen sipas planit të veprimit dhe programit që ka MKRS-ja për rininë në Kosovë.

Ministrja i kushtoi vëmendje dhe përmendi edhe përfaqësimin e të rinjve në nisma kombëtare e ndërkombëtare qofshin ato të rajonit apo më gjerë, duke e konsideruar se këto nisma janë edhe një përvojë e mirëseardhur për të rinjtë në Kosovë, të cilët do të kenë mundësinë e zbulimit dhe zhvillimit të interesave dhe talenteve të tyre. Këto përfaqësime rinore po ashtu do të rrisin kohezionin social ndëretnik mes të rinjve.

Nga ana e tyre, të rinjtë e uruan Ministren Dumoshi për detyrën e re dhe shpalosën disa prej ideve dhe pritshmërive që kanë prej saj si ministre dhe MKRS-së. Ata u shprehën të kënaqur me gatishmërinë e ministres Dumoshi për të mbështetur të rinjtë dhe theksuan se shpresojnë se do të gjejnë mirëkuptimin dhe përkrahjen për projektet që kanë për qëllim të realizojnë në të ardhmen. /KultPlus.com

Vlora Dumoshi, Ministre e Kulturës, Rinisë dhe Sportit (MKRS), priti sot në një takim përfaqësuesit e Zyrës Rajonale për Bashkëpunim Rinor (RYCO) të kryesuar nga zëvendës-sekretari Fatos Mustafa.

Temë diskutimi e takimit ishte fusha e rinisë, ku konkretisht u diskutua për politikat, programin dhe prioritetet që do t’i ketë MKRS-ja, për një sektor kaq të rëndësishëm të Republikës së Kosovës, si dhe bashkëpunimin rajonal të të rinvje.

Ministrja Dumoshi i njoftoi përfaqësuesit e RYCO-s se rinia do të jetë ndër prioritetet e saj gjatë mandatit sa do të udhëheq MKRS-në. Ministrja e konfirmoi mbështetjen e plotë dhe përkushtimin e saj ndaj sektorit të rinisë dhe u shpreh se do të bashkëpunojë me organizatat që merren me çështjet e rinisë, duke përfshirë edhe RYCO-n.

Ajo e falënderoi përfaqësuesit e RYCO-s për punën e deritashme dhe kërkoi angazhim edhe më të madh për shtrirje dhe aktivitete më të shumta të rinisë. Ministrja gjithashtu kërkoi që të rinjtë e Kosovës si dhe Kosova si shtet të përfaqësohen në mënyrë sa më dinjitoze në të gjitha nismat rajonale.

Ndërsa, përfaqësuesit e RYCO-s, i uruan marrjen e detyrës ministres Dumoshi dhe e njoftuan për aktivitetet e Zyrës Rajonale për Bashkëpunim Rinor (RYCO) dhe për projektet që RYCO ku ka mbështetur organizatat rinore dhe shkollat e mesme në Kosovë dhe në rajon. / KultPlus.com

Ministrja e re e Kulturës, Rinisë dhe Sportit, Vlora Dumoshi, ka qenë viktimë e sulmeve kibernetike, pak orë para se ta marrë zyrtarisht postin e saj. Dikush ka hapur llogari në Twitter me emrin e saj, dhe ka shpërndarë lajme të rreme, duke thënë se ka vdekur shkrimtari Ismail Kadare

Një llogari në rrjetin social Twitter, me emrin e ministres Dumoshi, sot ka publikuar disa postime në të cilat thuhej se ka vdekur shkrimtari Ismail Kadare.

Postimet janë shkruar në gjuhën angleze, madje në njërin prej tyre thuhet se lajmin për vdekjen e Kadaresë, Dumoshit ia ka konfirmuar edhe ministrja e Kulturës, Rinisë dhe Sportit të Shqipërisë, Elva Margariti.

Pas këtyre postimeve në Twitter, ka reaguar ministrja Dumoshi në profilin e saj në Facebook, ku ka thënë se ajo nuk ka asnjë llogari në Twitter.

“Sapo u njoftova se dikush ka hapur një llogari të rrejshme në emër timin në rrjetin social Twitter dhe të njëjtën e ka keqpërdorur, duke lëshuar lajme të rrejshme -fake news. Dua të ju informoj se unë nuk kam asnjë llogari në Twitter”, ka shkruar Dumoshi.

Madje ajo ka shtuar se këtë rast do ta paraqesë në Departamentin e Krimeve Kibernetike në Policinë e Kosovës.

“Menjëherë do ta paraqes rastin në Policinë e Kosovës, departamentin e krimeve kibernetike.
Dëshiroj të shpreh keqardhjen time për këdo që mund të jetë trazuar nga këto lajme të rrejshme, duke keqpërdorur emrin tim”, ka shkruar Dumoshi.