Filmi kosovar me regji të Blerta Bashollit, ‘Zgjoi’ ka filluar rrugëtimin e tij në kinematë gjermane. Nga data 8 shtator do të keni mundësi ta shihni në shumë kinema në qytete të ndryshme në Gjermani, shkruan KultPlus.
Njoftimin e ka bërë vetë aktorja kryesore, Yllka Gashi e cila ka thënë se gjatë këtyre ditëve në disa nga shfaqjet e filmit, prezente do të jenë edhe Blerta Basholli dhe Fahrije Hoti.
Postimi i plotë i saj:
Të dashur miq, Filmi ynë “Zgjoi” ka filluar rrugëtimin e tij në kinematë gjermane. Nga data 8 Shtator do të keni mundësi ta shihni në shumë kinema në qytete të ndryshme në Gjermani. Për më shumë informata rreth datave të shfaqjes së filmit vizitoni faqen e distributorëve. https://jip-film.de/hive Gjatë këtyre ditëve në disa nga shfaqjet e filmit do të jenë prezente autorja e filmit Blerta Basholli dhe znj. Fahrije Hoti – inspirimi i filmit “Zgjoi”. Shpërndajeni lajmin mes miqëve e familjarëve që kanë deshirë ta shohin filmin. Falemnderit shumë! / KultPlus.com
Aktorja e njohur Yllka Gashi e cila prej vitesh jeton dhe vepron në Shtetet e Bashkuara të Amerikës, ditëve të fundit ka qëndruar në Prishtinë për pushime bashkë me familje. Sot, ajo ka marr rrugën për ShBA dhe si gjithmonë largimi nga vendlindja dhe malli për të din të shpërthejë ose në lot ose në fjalë që dalin nga zemra e është vështirë me i ndalë. Aktorja Yllka Gashi e cila vitin e kaluar ka pushtuar zemrat e publikut e kritikëve me nam botërorë me rolin e saj në filmin “Zgjoi”, se ka humbur asnjëherë modestinë e saj e mbi të gjitha dashurinë e saj të madhe për Prishtinën për të cilën ka shkruar gjerë e gjatë sot e ku në secilën fjalë ndihet dashnia e saj për vendlindjen e përshkrimet e gjithë atyre ditëve të kaluara në qytetin e saj janë më shumë se emocionuese.
Për më tepër KultPlus ju sjell postimin e plotë të Yllka Gashit:
Prishtinë të du!
E çdo herë që marr rrugë me t’lanë e me u largu prej teje,
Me shku n’shpinë tjetër – përtej Atlantikut,
Ni copë e zemrës pak më thehet,
E e kujtoj qysh haber s’kom pasë me e kuptu mërzinë e gurbetarëve të familjes,
Kur u përlotshin sa herë përshëndeteshin e u nisshin për Evropë
-atje ku veçse e kishin kriju jetën e re e i rritshin fmitë.
Prishtinë të du,
E mendja më shkon shpesh te ti,
Jo që je far qyteti piktoresk ose metropol që ëndërron dikush me jetu n’ty,
Ama je e jemja
Edhe bash hiq s’ka si ti!!!
Me krejt mangësitë që i ki,
Me aq sa ofron,
Me pluhnin e verës e lloqin e vjeshtës,
Trafikun e stërngarkumë,
Rrugët e ngushta,
E krejt behanet që i ki
për mu –
Je e veçantë dhe e bukur!
Prishtinë të du,
Se në ty jetojnë e për ty kontribojnë
E edhe vujnë nga mangësitë tua,
ata që m’i don loçka e zemrës-
familja jeme e plot miq e dashamirë.
T’du,
Se n’zemrën tande jam lindë e rritë, jam shkollu, eduku e kam ndërtu karrierë,
Kam njoftu gjith’far njerëzish,
Me disa prej tyne kam miqësi që koha veç i ka forcu e ju ka dhanë kuptim.
Në ty Prishtina jeme e kam gjetë dashninë,
E në ty m’ka beku Zoti me Ninën!
E në ty e kam shiju të bamit teze e hallë!
Prishtinë t’du,
Se në ty kam përjetu shumëçka të bukur
Po edhe të trishtë,
Se gjenerata jeme që osht rritë në t’90-tat,
I ka përjetu shkollat fillore të ndame e shkollat e mesme nëpër shpia të improvizume,
Largimin e dhunshëm nga puna t’prindve,
Demonstratat e studentëve,
E protestat e nanave të Kosovës me nga një bukë në dorë – n’mesin e tyne edhe mama jeme,
Gazin lotsjellës,
Milicinë e paramilitarët,
‘Racinë’ nëpër kafiqa,
Slloganet “Kosova Republikë”,
Besa, edhe helmimet me ujë në shkolla të mesme -plot prej kësaj gjenerate- i mbajmë n’mend.
Ama, Prishtinë
Unë e gjenerata jeme i kemi përjetu edhe shëtitjet nëpër korzë,
E në “Gradic” Pejton,
Shampitet e Elidës kur ajo ishte ndër të vetmet ambëltore n’qytet,
Platon’ e “Boro Ramizit”,
1 Majin në Gërmi,
“Lluna Parkun” n’Dardani,
Dodonën e “Talentin…”
Orët Letrare në “Fjala”, “Hanin e 2 Roberëve”, në “Koha”,
Kafiqat e Kurrizit,
Burekat e “Bosnes” në pushim t’gjatë t’shkollës,
Mbramjet e semi-maturës te Qafa…
Sendviqat e “Metros” në pauzë gjatë studimeve.
Përjetime t’varfnjakut kish mujtë me thanë dikush tash,
Po krejt këto imtësina
E kan’pasë lezetin e vet,
E janë t’papërsëritshme
Se ti qaq ke pasë takat me dhanë!
Në ty Prishtina jeme,
Ka jetu baba jem i dashtun ma shumë se 50 vjet, t’u t’i njoftë mirë pllamtë e kilometrat
E t’u kontribu në edukimin e dhjetëra gjeneratave,
E prej knaqësive t’mdhaja t’fminisë,
I kujtoj kohët kur m’merrte me veti te berberi në qendër e derisa ai i prente flokët, unë ulesha n’atë karrigen e naltë me kali t’argjentë.
E kur ai e përfundonte qethjen,
Ecshim dorë për dore
e te “3 sheshirat” në njanën prej atyne kioskave te vogla m’blente Kavabona ose Herba.
Çfarë lezeti!!!!
Ma mirë se n’Disneyland!
Prishtinë, unë të du
edhe për arsye se në ty e kam përjetu luftën,
e frikën deri n’palcë
kur me kallasha e tenka na kan’ pëzanë prej teje në 99tën,
Po mandej, çlirimit tand i jam gëzu me krejt qenjen e me autobusin e parë të “refugjatëve” jam kthy në damarët tu.
Të du Prishtinë,
Edhe për përjetimet e
Rinisë së hershme,
Me kaosin e frikshëm të pasluftës
për 4 vjet studime në Fakultetin e Arteve, me kushte jo t’mira,
po me entuziazëm e energji bombastike,
Për rolin e parë në Teatrin Kombëtar,
Punën e parë në KTV,
“Familjen Moderne” në studiot e RTK-së…
Krejt këto-
Kujtime të bukra e t’paharrushme –
Që veç ti mi ke dhuru!
Në ty Prishtinë,
I kemi duru reduktimet qesharake të rrymës e t’ujit me vite t’tana.
Me gjeneratorë që t’i shurdhonin veshtë në krejt anët e qytetit,
Me reduktime t’rrymës 4, 6, 8 e besa edhe 20:4 kanihere.
E ato 4 orë kur vinte rryma, punojshin veç dritat edhe aty-ktu naj “shteker”.
Ama,
Prej dashnisë ndaj teje
e knaqësisë që po t’përjetojmë t’lirë,
gajle se kishim!
Prishtinë,
Ti je shtëpi e shumë njerëzve që m’i don zemra,
Që më merr malli për ta kur jam larg,
Njerëz, për të cilët gëzohem e çlirohem kur e di që janë mirë me shëndet e rehati,
Njerëz, për të cilët shqetësohem e mërzitem, kur nij që ju ka ndodhë ndonjë e papritun.
E nuk po flas veç për familjen e miqtë!
Kur jom n’gjinin tand,
-Edhepse me bon nervoz shumë e më dëshpron shpesh-
Diqysh zemra m’pushon e shpirti sikur m’qetësohet!
Për ty Prishtinë e për njerëzit tu,
Me merr malli,
Shpesh
E shumë!
M’vjen pak inati kur t’shajnë e t’kritikojnë
Ata që jetojnë në ty,
e pak e hiq mundohen me t’përmirësu,
Ose ata që nuk t’i kan përjetu periudhat e stoicismit po kan përfitu prej teje
n’emën t’lirisë e të zhvillimit,
tu t’gulfatë e shfrytëzu në çdo aspekt.
Ti s’ki faj Prishtina jeme e mirë,
Se qytetarinë, edukatën e kulturën e përgjithshme nuk munesh me ja u msu krejtve që jetojnë n’ty.
Ti nuk e prodhon bërllogun prej qiellit, po e ki kontribut prej “qytetarëve” tu.
Mërzitna edhe kur i humbi debatet e s’kom argumente me t’mbrojtë!
Ama çka gjithmonë kom me pasë për ty
e me ty Prishtinë,
osht DASHNIA e dhembshuria!
Qe 7 vjet prej s’largu
T’i përjetoj kënaqësitë,
sukseset,
dështimet,
dëshprimet
E shpresat.
Me ni mallëngjim, që veç ata që s’jetojnë ma n’ty e kuptojnë,
Po në zemër e në mendje t’kom afër përherë e kur përmallohem fort
t’i kujtoj veç të mirat.
Se je e jemja
E s’ka edhe njo si ti!
Prishtina jeme
Të pafsha ma mirë,
Ma të pastër,
Ma të organizume,
Me kerre ma pak,
E gjelbërim ma shumë!
Me ndërtesa ma me shije,
Me pluhun minimal,
Me vende atraksioni për fëmijë, pleq e gra shtatzana,
Me qytetarë të vetëdijshëm që prona publike duhet me u rujtë e mbrojtë se ju takon krejtve.
T’pafsha që po të dojnë e po ta “dinë kimetin” ata që jetojnë në ty e që marrin vendime për ty.
E ti,
Më pritsh me dashamirësi e ngrohtësi si gjithmonë!
Prishtina jeme-
Qyteti i përhimtë,
Me makiatot ma t’mira n’dyje,
Me rininë ma t’bukur në rajon,
Me zemërgjansinë e mikpritjen ma t’madhe që dikush mundet me e përjetu.
Prishtina jeme,
Ku rreh zemra e mamës teme, Donës, Lilit e Adit!
Ku rriten e shkollohen Dini, Lisa, Mali, Omari, Lisi, Marini, Jora…
Në ditën e tretë të festivalit “Mirëdita, dobar dan!” është mbajtur debati “Paralele problematike: Ukraina dhe Kosova” në ‘Endžio HAB’ si dhe është shfaqur filmi tejet i sukseshëm “Zgjoi” nën regjinë e Blerta Bashollit. Dje, këto dy aktivitete shënuan edhe përfundimin e edicionit të nëntë të këtij festivali i cili u mbajt në Beograd tash e disa ditë, shkruan KultPlus.
Për të diskutuar rreth debatit “Paralele problematike: Ukraina dhe Kosova”, nën moderimin e zyrtarit për komunikim në BE, Filip Lukić, pjesëmarrësit në panel si: Sonja Biserko, Idro Seferi, Boris Varga dhe Visar Ymeri, folën rreth perceptimeve dominuese të pranishme si në Kosovë ashtu edhe në Serbi, lidhur me pushtimin e Ukrainës.
“Tema e luftës në Ukrainë shfrytëzohet për qëllime politike për të luajtur me traumat që janë ende prezente në rajonin tonë”, kjo do të ishte ajo pjesa me të cilën u përmbyll ky debat.
Por fillimisht, diskutimin e nisi reporterja Sonja Biserka e cila theksoi se data 24 shkurt nuk është një incident por luftë e planifikuar.
“Data 24 shkurt nuk është incident, por luftë e planifikuar. Por Putini gaboi në perceptim për Perëndimin. Investoi shumë para për të korruptuar majtistët. Ai u befasua kur bota perëndimore reagoi me solidaritet ndaj Ukrainës. Ai u befasua edhe nga rezistenca e Ukrainës. Kosova është pjesë e procesit të shpërbërjes së ish-Jugosllavisë”, thotë ajo.
Sipas saj, gjithçka filloi me grevën e studentëve e më pas për dy dekada ndodhi terror shtetëror.
“Shqiptarët u larguan nga institucionet. Pacifizmi i tyre ishte i veçantë. Por pas Daytonit, shqiptarët nisin të pyesin nëse Rugova po bënte politikë relevante. Kur u shfaq UÇK-ja, Beogradi nisi ndërhyrjen e madhe. Krahasimi i Kosovës dhe Ukrainës nuk qëndron. Putini me qëllim dhe dashakeqësi e keqpërdor rastin e Kosovës. Serbia synon ndarjen e Kosovës. E Putini e merr këtë lloj argumentimi për të akuzuar Perëndimin për shkelje të të drejtës ndërkombëtare në Kosovë”, shpalos Biserka.
Ndërsa, politikani Visar Ymeri ka thënë se një prej qëllimeve të luftës së Rusisë është ndryshimi i regjimit në Ukrainë.
“Intervenimi i NATO-s në Kosovë ka ardhur pas një numri të madh të krimeve dhe masakrave që janë kryer nga policia e ushtria serbe. Janë dhënë shenja për politika gjenocidale. Intervenimi i NATO-s ka qenë i përqendruar edhe territorialisht. Kurse invazioni rus ka tjetër qëllim: pushtimin e krejt Ukrainës. Tash rajoni ka filluar të shihet edhe më shumë si problem sa i përket sigurisë. Në këtë drejtim konsideroj se varësisht qasjes së Kurtit e Vuçiqit, Perëndimi do të ketë kërkesë më të madhe që të gjendet zgjidhje”, thotë Ymeri.
Sipas tij, në njërën anë, një prej qëllimeve të luftës së Rusisë duket se ka qenë dhe mbetet ndryshimi i regjimit në Ukrainë, gjë që nuk ka qenë rast i njëjtë me NATO-në dhe intervenimin në Kosovë.
“Unë mendoj që mund të ketë ngjashmëri në mënyrën se si i shohim zhvillimet e caktuara si bombardimet e shtëpive, përjashtimin e njerëzve nga Ukraina, natyrisht që kjo na evokon realitetin tonë gjatë luftës në Kosovë. Por në rrafshin politik, duhet të kemi parasysh se Pavarësia e Kosovës vjen si rezultat i shkrirjes së Jugosllavisë”, thotë ai.
Po ashtu, gazetari Idro Seferi përmendi bombardimet e NATO-s si dhe theksoi se nuk ekziston një ide e zgjidhjes së problemeve me marrëveshje.
“Për shumëkënd në Serbi lufta filloi me 24 mars 1999. Nuk përmendet tjetër gjë. Kur është përvjetori i bombardimit të NATO-s, njerëzit në Serbi mendojnë se shqiptarët gjithmonë kanë qenë kundër serbëve, se i vrisnin dhe gjithmonë ia dilnin. Rajoni ka humbur kontrollin në rrugën evropiane”, thotë Seferi.
Sipas tij, nuk ekziston ideja e zgjidhjes së problemeve me marrëveshje.
“Serbia nuk ka dashur që ta zgjidhje çështjen e Kosovës në mënyrë politike. Në vitet ’90 Serbia i shtyu shqiptarët e Kosovës që të bëjnë protesta pasi nuk e respektoi as marrëveshjen për t’i lejuar shqiptarët që të arsimohen. Ka narracion se shqiptarët kanë ardhur vonë në këto anë. Një politikë e tillë bën që të stagnojë i gjithë rajoni”, thotë ai.
Gjithashtu, gazetari dhe publicisti Boris Varga ka folur rreth se si lufta në Ukrainë nuk ka asnjë lidhje me Kosovën.
“Atje është kryer një krim i madh dhe Perëndimi mendon se Beogradi nuk mund ta ketë atë territor. Suksesioni si term është i manipuluar nga Putini për të realizuar objektivat e tij. Putini po shikon të shkaktojë konflikte etnike, siç bënte Serbia në Kosovë. Ka një plan serioz se si të merret një pjesë e Ukrainës dhe kjo nuk ka asnjë lidhje me Kosovën. Në disa debate të mbyllura e të hapura jam habitur se si mendojnë intelektualët e Serbisë. Kjo pasi Serbia nuk është ballafaquar me të kaluarën”, thotë Varga.
Kështu, në ditën e tretë si dhe njëkohësisht të fundit në kuadër të festivalit “Mirëdita, dobar dan!”, u shfaq edhe filmi i njohur “Zgjoi” me regji të Blerta Bashollit në Arkivin e filmit jugosllav.
Fiona Jelići nga Nisma Rinore për të Drejtat e Njeriut (Serbi) ishte ajo që doli në skenë për të përkujtuar se festivali “Mirëdita, dobar dan!” ka nisur si inspirim nga aktori shqiptar Bekim Fehmiu dhe se shfaqja e filmit “Zgjoi” është një rast i mrekullueshëm për ta kujtuar këtë fakt.
Ajo po ashtu, nuk la pa përmendur edhe sukseset e shumta të cilat i ka arritur filmi “Zgjoi”.
Me sallën e mbushur plot, të pranishmit shikuan dhe dëgjuan të vërtetën e personazhit kryesor, Fahrije Hoti, tek e cila nën aktrimin mahnitës të aktores Yllka Gashi, qysh në minutat e parë të filmit, ambicia për tu përballuar me një realitet patriarkal ku puna e grave nuk mund të kalojë përtej dyerve të shtëpisë, vërehet në sytë e saj në të cilat po të përhumbeshe thellë, atëherë do të ndjeje dhimbjen e madhe për zhdukjen e burrit të saj në luftën në Kosovë.
Përgjatë gjithë filmit, sytë e të pranishmëve dukshëm ishin të ngulitur tek ekrani i madh, nëpërmjet së cilit u shfaq puna e mrekullueshme e regjisores Blerta Basholli e cila frikën, brengën e shpresën i ngërtheu në një fuqi të vetme. Këto emocione të paraqitura në film ngjallën edhe emocione të shumta në publik. Në përfundim e sipër, teksa filmi po shënonte dhe fundin, audienca ishte ajo që shpërtheu në lot e njëkohësisht ndjeu thellë edhe dhimbjen e atyre familjeve që ende mbajnë shpresë për personat e pagjetur.
Ishin duartrokitjet e gjata, brohoritjet dhe fishkëllimat e shumta ato të cilat u lëshuan menjëherë qysh kur filmi shënoi fundin.
Filmi “Zgjoi” është filmi i vetëm nga Ballkani Perëndimor që hyri në listën e shkurtër për nominimin për ‘Oskar’ këtë vit. “Zgjoi” ka fituar çmime të shumta, përfshirë këtu edhe tri çmimet kryesore të “Sundance Film Festival”: Filmi më i mirë, Regjisorja më e mirë, dhe Çmimi i publikut. Ndërkaq, kujtojmë se premiera e filmit në Prishtinë u shfaq më 24 gusht të vitit 2021.
Në rolin kryesor luan Yllka Gashi, ndërsa në rolet tjera luajnë: Çun Lajçi, Kumrije Hoxha, Aurita Agushi, Kaona Sylejmani, Mal Noah Safçiu, Adriana Matoshi, Astri Kabashi, Molikë Maxhuni, Blerta Ismaili, Valire Haxhijaj Zeneli, Armend Smajli, Ilir Prapashtica, Xhejlane Terbunja, Shkelqim Islami etj.
Pas shfaqjes së filmit në Beograd, në skenë për një fjalë rasti doli edhe aktorja Adriana Matoshi, e cila tha se vetëm me art dhe kulturë është e mundur që të shprehen ato se çfarë janë përjetuar me të vërtetë.
“Jam shumë e lumtur që regjisorja më ka përzgjedhur për të prezantuar një nga shumë historitë e luftës që ekzistojnë në Kosovë. Ne me fuqinë tonë, sadopak, jemi munduar të arrinim diçka që dikush e ka përjetuar gjatë luftës. Jam me të vërtetë e lumtur që jeni sonte këtu për të parë atë se çfarë kemi përjetuar ne si popull. Vetëm me art dhe kulturë ka mundësi që t’i shprehim ato që me të vërtetë i kemi përjetuar. Me artin tonë dhe kulturën tonë, duhet të tregojmë se çfarë kemi në zemra tona”, thotë Matoshi.
Aktorja Branka Petriq
Kurse, për KultPlus foli aktorja Branka Petriq që njëkohësisht është edhe gruaja e aktorit shqiptar Bekim Fehmiu. Ajo e vlerësoi lartë punën e mrekullueshme të aktores Yllka Gashi si dhe regjisores Blerta Basholli.
“E pashë filmin dhe u gëzova shumë sepse kjo hapësirë e kinotekës jugosllave ishte e mbushur plot. Filmi ishte aq i mirë, aq i sinqertë, aq i thjeshtë por në të njëjtën kohë edhe i ndërlikuar, për shkak të gjithçkaje që solli jetë në situatat e grave në film. Qysh në momentin e parë që e pashë Yllka Gashin thashë si po e bënë atë. Është fantastike sepse në një anë kemi regjisoren Basholli dhe në anën tjetër është aktorja Gashi. Ju mund të shihni qartë se si ato punojnë së bashku aq bukur. Mendoj se të gjithë ata që panë filmin, ishin të impresionuar shumë nga ai. Jam jashtëzakonisht e lumtur sepse isha këtu sonte. Urimet e mia shkojnë për kinematografinë kosovare dhe të gjithë njerëzit që janë të përfshirë në industrinë e filmit.”
Edicioni i nëntë i “Mirëdita, dobar dan!” krejt në fund u përmbyll me një festë muzikore me DJ Genc Elezaj.
Bekim Fehmiu që ishte aktor me famë botërore u bë inspirim për krijimin e “Mirëdita, dobar dan!”. Përmes festivalit, vizitorët patën mundësinë që të mësojnë më shumë rreth kulturës dhe traditës së Kosovës e Serbisë përmes filmit, teatrit, muzikës e artit pamor.
Qëllimi i festivalit “Mirëdita, dobar dan!” është që përmes prezantimit të artistëve dhe performuesve të cilët përfaqësojnë skenën kulturore e bashkëkohore të Kosovës të bashkojnë komunitetet shoqërore e kulturore të Kosovës dhe Serbisë dhe të krijohet një traditë bashkëpunimi, që do të kontribuojë në arritjen e një normalizim të qëndrueshëm të marrëdhënieve mes Kosovës dhe Serbisë. / KultPlus.com
Aktorja e njohur tashmë për rolin e saj në filmin tejet të suksesshëm ‘Zgjoi’, së fundmi ka realizuar një intervistë për revistën teatrore “SEEstage”, shkruan KultPlus.
Më poshtë KultPlus ju sjell artikullin/intervistën e plotë të saj:
Tashmë me bazë në Nju Jork, por me origjinë nga Kosova, Yllka Gashi është ylli i filmit të mirënjohur të Blerta Bashollit, “Hive”, i bazuar në historinë e vërtetë frymëzuese të Fahrije Hotit. Yllka i tregon Natasha Tripney për përgjegjësinë që vjen me portretizimin e një personi të vërtetë në ekran dhe gratë që e frymëzojnë atë, transmeton KultPlus.
Me skenar dhe regji të Blerta Bashollit, “Hive” rrëfen historinë e Fahrije Hotit, trupi i bashkëshortit të së cilës nuk u gjet kurrë pas masakrës në Krushë të Madhe, dhe se si ajo luftoi për të mbijetuar dhe siguruar familjen e saj, duke u bërë sipërmarrëse dhe duke mbështetur gra të tjera në një situatë të ngjashme.
Natasha Tripney: Kur e dëgjuat për herë të parë historinë e Fahrijes dhe si arritët ta portretizonit atë në ekran?
Yllka Gashi: Fahrijen e kisha parë shumë në TV, ajo ishte organizatore e protestave që po mbaheshin çdo javë për të pagjeturit nga lufta. Dhe unë isha kliente e ajvarit të saj. Kështu që unë isha edhe fanse edhe kliente e saj! Kur Blerta tha: duhet të shkojmë ta takojmë dhe ndoshta, nëse është e interesuar, mund të na japë të drejtën të bëjmë një film për të, u emocionova shumë.
Pas takimit të parë, gjithçka ndryshoi për mua, sepse atëherë nuk ishte vetëm emocioni i takimit me të dhe dëgjimit të historisë së saj, por u bë një mision për ta nderuar atë, për të nderuar trashëgiminë e saj, dhe gjithçka që ajo kaloi, dhe gjithçka që ajo bëri për komunitetin e saj, se si ajo ndryshoi mendësinë e njerëzve.
Natasha Tripney: Si aktore, çfarë duhet të keni parasysh kur luani një person real?
Yllka Gashi: Kur ti si aktore portretizon dikë që është i gjallë, një person real, është përgjegjësi e madhe, sepse dëshiron ta nderosh, por edhe dëshiron që të të pëlqejnë dhe të miratojnë performancën tënde. Kur u takuam, mbaja shënime, studiova qëndrimin e saj, mënyrën se si flet, si e trajton veten. Pastaj pashë shumë dokumentarë për të. Prejardhja e saj ishte si një libër i hapur, sepse ishte gjithmonë e hapur dhe tregonte historinë e saj dhe të vejushave të tjera të Kosovës.
Bërja e filmave që bazohen në histori të vërteta është gjithmonë paksa e ndërlikuar. Me Fahrijen mund të kishim bërë shtatë filma, sepse ajo ka kaluar shumë. Por ne duhej të fokusoheshim në një moment të veçantë të jetës së saj për të bërë këtë film. Kur Blerta shkruante ajo ndante gjërat me mua, kështu që unë i dija të gjitha gjërat që ishin nxjerrë nga skenari. Dhe ato gjëra më ndihmuan si aktore, sepse kisha një ndjenjë më të mirë se si duhej ta portretoja.
Natasha Tripney: Më bën përshtypje që një nga gjërat filmike që filmi bën shumë mirë është të përcjellë punën – fizike dhe emocionale – të asaj që po bën. Ju tregon punën që kanë bërë këto gra. Si e përcollët këtë punë dhe forcën që ajo ka?
Yllka Gashi: Kaq ditë më është dashur të mbaj thasë me speca dhe të punoj me gjëra të rënda. Ishte fizikisht pak rraskapitëse, sigurisht, por ishte pjesë e personazhit, kështu që nuk e kisha problem ta bëja. Si femra shqiptare, nënat tona i kemi parë të punojnë gjatë gjithë jetës. Mamaja ime kishte një punë zyre, dhe pastaj ajo ende do të punonte shumë në shtëpi. E kisha atë shembull përpara. Kjo ndjenjë që merr audienca është e rëndësishme sepse në fillim, puna e këtyre grave ishte shumë fizike; ato nuk kishin makineritë, nuk kishin fabrikën e bukur që kanë tani, kështu që bënin gjithçka vetë. I mbanin specat. Ato blenë specat. Ato bënë gjithçka që shkon në prodhimin e ajvarit. E kam parë mamin duke bërë ajvar – e di se çfarë duhen për të bërë qoftë edhe disa kavanoza!
Natasha Tripney: A ka ndonjë kujtim të veçantë që do të mbetet me ju nga realizimi i këtij filmi?
Yllka Gashi: Ka kaq shumë. U ndjeva kaq e fuqishme, duke luajtur Fahrijen dhe duke qenë e qetë, por ende elastike dhe e fortë. Në skenën e parë që shihni në film [kur Fahrije shikon mbetjet njerëzore në përpjekje për të identifikuar burrin e saj të zhdukur] ishte një ditë shumë e nxehtë kur e xhiruam atë, atë skenë, dhe nuk e dija që brenda në çanta, ata vendosën kocka të vërteta. Kockat e kafshëve. Dhe ishte e tmerrshme. Por kjo më ndihmoi shumë. Nuk mendoj se ajo pozë e veçantë është ajo që shihni në film, por më ndihmoi kaq shumë që thjesht të mendoja: si ia dilni me diçka të tillë? Sa e vështirë është për këta njerëz që i kanë kaluar këto gjëra dhe të shkojnë e të shohin eshtrat e dikujt që e doni dhe dikujt që ju mungon? Sa tragjike është kjo? Dhe si e kapërceni atë?
Më bëri ta respektoja edhe më shumë, sepse ajo e bëri këtë shumë herë. Ajo shkoi dhe u përball me ato lloj situatash. Ajo është një grua kaq e fortë. Dua të them, po shihja kockat e kafshëve, dhe prapëseprapë u emocionova, dhe ishte pak traumë. Por ajo do të kërkonte eshtrat e të dashurve të saj, burrit dhe kushërinjve të saj dhe vjehërrave. Dhe ajo e bëri atë shumë herë. Sa e fortë duhet të jesh për ta bërë këtë?
Natasha Tripney: Sa e lehtë është të flasësh për këto gjëra, njerëzit ende të zhdukur dhe ndikimin mbi ata që kanë mbetur pas, në shoqërinë kosovare?
Yllka Gashi: Pasojat dhe traumat që lë lufta në shoqëri kanë nevojë për kohë për t’u shëruar. Fahrije, dhe njerëz të tjerë nga fshatrat e tjera, familjet e tyre janë masakruar, kanë kaluar kaq shumë tragjedi. Ka pasur dokumentarë dhe emisione bisedash ku njerëzit do të tregonin historitë e tyre, por ne duhet të bëjmë më shumë për veten tonë për t’u shëruar nga këto gjëra nga e kaluara dhe të tregohemi mjaft të zgjuar për të mos lejuar që historia të përsëritet. Nëse nuk mësoni nga diçka që ju ka ndodhur, përsëritni gabime ose e bëni veten të pambrojtur për ta kaluar atë përvojë, ose diçka të ngjashme, përsëri në të ardhmen.
Natasha Tripney: Filmi ka fituar çmime të shumta. U fut në listën e ngushtë të Oscar-it. Çfarë do të thotë kjo si për ju si interpretuese ashtu edhe për industrinë e gjerë të filmit në Kosovë?
Yllka Gashi: Viti 2021 ishte viti që shkëlqeu filmat kosovarë. Ka pasur shumë filma të realizuar nga kineastet femra – duke përfshirë “Luaneshat e Kodrës” dhe “Vera andrron detin” – me histori interesante, autentike, dhe ato shkuan në festivale, morën çmime, kritikët e filmit i donin. Ka qenë një vit i bukur. “Hive” pati një udhëtim të mahnitshëm kudo që shkoi. Kjo është shpërblyese. Ndihesh mirë si aktore, veçanërisht si dikush që kishte rolin kryesor; është kënaqësi sepse ndihesh sikur ke rëndësi. Ne jemi në një vend të mirë në Kosovë tani dhe shpresoj që ta mbajmë këtë pozicion dhe të vazhdojmë të ndajmë histori interesante, historitë tona.
Natasha Tripney: Më trego pak për hyrjen tënde në aktrim. Çfarë ju tërhoqi për të performuar në radhë të parë?
Yllka Gashi: Gjithmonë e kam ditur se do të bëj diçka në art. Isha një studente e jashtëzakonshme dhe kur isha më e re shkruaja tregime dhe i botoja në gazetat dhe revistat e asaj kohe, të cilat ishin të gjitha ilegale në vitet ’90, kur çdo gjë në gjuhën shqipe ishte ilegale.
Menjëherë pas përfundimit të luftës në Kosovë, pashë një njoftim për një audicion në Teatrin Kombëtar me David Gothart nga Anglia, i cili po vinte për të bërë një festival. Isha 17 vjeç dhe nuk kisha përvojë profesionale, por shkova në audicion. Dhe unë mora rolin e njërës nga tre Ofelitë në produksionin e tyre bashkëkohor të Hamletit. Mësova se kjo është ajo që dua të bëj. Unë dua të jem aktore. Ky u bë një profesion i shenjtë për mua. U pranova në Fakultetin e Arteve Dramatike në Universitetin e Prishtinës dhe fillova të studioj për aktrim. Në atë kohë në Kosovë nuk bëheshin mjaft filma, kështu që unë punova në teatër dhe TV.
Natasha Tripney: Çfarë roli luajti teatri në atë kohë në jetën e njerëzve, pas luftës?
Yllka Gashi: Isha shumë e re në atë kohë, kështu që jo gjithmonë e vetëdijshme për gjërat. Por, me Hamletin, për shembull, kemi bërë turne. Ne shkuam në Maqedoni dhe në Shqipëri dhe teatro të ndryshëm në Kosovë, kështu që njerëz të ndryshëm e panë shfaqjen dhe teatrot u zgjuan, për mungesën e një fjale më të mirë, sepse menjëherë pas luftës, shumë teatro ende nuk punonin. Dhe me Hamletin, duke shkuar në ato teatro, ata u hapën, me Hamletin që luhej atje – filluan të punojnë dhe bënë produksionet e tyre.
Natasha Tripney: Cilat femra ju frymëzojnë, si si interpretuese, ashtu edhe në jetën tuaj?
Yllka Gashi: Nëna ime ka qenë gjithmonë muza ime sepse është shumë e fortë dhe e zgjuar dhe ka kaluar shumë gjëra në jetën e saj dhe i ka kapërcyer me stoicizëm, por edhe të gjitha punëtoret e teatrit dhe filmit me të cilat kam punuar ndonjëherë, më duken shumë frymëzuese sepse jemi rritur në një shoqëri në të cilën shumë gjëra nuk ishin menduar të ndodhin për gratë. Nëse do të ishit aktore, ndonjëherë njerëzit do të mendonin se keni pasur moral të lirshëm, sepse duhet të luanit këto gjëra që për një shoqëri me mendje të ngushtë, nuk ishin aq të lehta për t’u përthithur. Kur pashë aktore të tjera të bënin gjëra, të ishin të guximshme dhe të ishin pioniere, kjo ishte frymëzuese dhe kjo kërkonte guxim.
“Zgjoi” lansohet në Mbretërinë e Bashkuar më 18 mars. / KultPlus.com
Nëna e këngëtares shqiptare me famë botërore, Rita Orës, Vera, sot nëpërmjet një ‘InstaStory’ në rrjetin social Instagram, ka bërë të ditur se filmi tejet i suksesshëm shqiptar “Zgjoi”, do të shfaqet në kinematë në Angli, shkruan KultPlus.
Ora ka ndarë një fotografi të një kinemaje, ku shihet dhe posteri i filmit “Zgjoi”.
“Në kinematë nga e nesërmja, në të gjithë Mbretërinë e Bashkuar”, ka shkruar ajo. / KultPlus.com
“Çdo shkrepje llogaritet në dramë për luftën e gruas kundër burrave të dhunshëm vendas për të mbijetuar dhe siguruar për fëmijët e saj në vazhdën e luftës”, kështu nis artikulli për filmin e suksesshëm “Zgjoi” të regjisores Blerta Bashollit nga gazeta prestigjioze “The Guardian”, shkruan KultPlus.
Filmi debutues i Blerta Bashollit është një film për mjaltin dhe gjithashtu për ajvarin, një pjatë e ëmbël nga ish-Jugosllavia e bërë nga patëllxhanë dhe speca të kuq. Por filmi ka shije të ashpër dhe të mprehtë, si kafeja e zezë, vazhdon tutje gazeta.
Sipas tyre, ai bazohet në historinë e vërtetë të Fahrije Hotit, një gruaje kosovare, bashkëshorti i së cilës u zhduk gjatë luftërave ballkanike të viteve 90, dhe kështu vetëm për të qëndruar gjallë dhe për të siguruar jetesën e saj, ajo formoi një kolektiv vetëm për gratë dhe vejat (ose të vejat e supozuara, që dëshirojnë një lajm përfundimtar se çfarë bënë forcat serbe me burrat e tyre të zhdukur) duke bërë mjaltë dhe ushqime të tjera për të shitur. Por filmi e tregon atë duke u përballur me mizogjininë brutale dhe dhunën nga burrat në fshatin e saj, të cilët mendojnë se ajo po e tejkalon veten. (Drama vjen me një mohim përmbyllës që thekson se disa prej tyre janë fiktive.)
“Aktorja kosovare me origjinë shqiptare Yllka Gashi është e shkëlqyer si vetë Fahrije, një grua që e filloi këtë biznes të paktën pjesërisht për të menaxhuar apo shuar hidhërimin e saj: kosherja në kopshtin e tyre u ngrit nga i shoqi. Kjo është mënyra e saj për të qëndruar pranë kujtimit të tij; ajo kujton se sa instiktive ishte kontakti i tij me bletët dhe se si ai nuk u pickua kurrë. Fahrije, nga ana tjetër, gjithnjë thumbohet dhe kjo është pjesërisht arsyeja pse ajo kalon kryesisht në ajvar; çdo thumbim është një kujtesë”, shkruhet në artikull.
Po ashtu, “The Guardian” thotë se ekziston një skenë e mrekullueshme në të cilën djali i vogël i Fahrijes po kreh flokët me mendime para pasqyrës, ndoshta me disa nxitje kotësie adoleshente. Duke e parë atë, Fahrije papritmas buzëqesh, me dashuri dhe dhimbje transparente, dhe pa pasur nevojë t’i thuhet mund të shohim se ajo mendon se ai i ngjan babait të tij. Vetë vjehrri i saj Haxhi (një interpretim i mrekullueshëm i aktorit dhe muzikantit veteran kosovar Çun Lajçi) është një figurë vezulluese, e cila përballet me agoninë dhe pikëllimin në mënyrën e tij, por gradualisht po e vlerëson Fahrijen. Kjo është një dramë shumë inteligjente, në të cilën çdo fjalë dhe çdo goditje ka rëndësi.
KultPlus ju sjell 25 vajzat dhe gratë e Kosovës që u shndërruan në zërin e vajzave, djemve, grave dhe burrave të Kosovës.
Vajzat dhe gratë e Kosovës po vazhdojnë të shkëlqejnë në fusha të ndryshme, duke shndritë nëpër botë.
Me rastin e 8 Marsit, KultPlus ka përzgjedhë 25 vajza e gra që nëpërmjet fjalimeve, performancës, muzikës, sportit, filmit e biznesit kanë ngritë dhe kanë përfaqësuar vendin në mënyrë dinjitoze, e duke shndërruar Kosovën në një Kosovë të artë, në një Kosovë që synon Oscar, në një Kosovë që me rrëfimet e nxjerra po nga ky vend, i ka treguar botës po për dhimbjen, kurajën dhe guximin e vajzave dhe grave të vendit më të ri në kontinentin e vjetër.
Po këto vajza dhe gra u shndërruan në inspirimin e shumë vajzave, djemve, grave e burrave, të cilët kuptuan se ëndrrat nuk duhet dhe nuk mbeten vetëm ëndrra.
KultPlus iu sjell në vazhdim një nga aktoret kosovare më të suksesshme vitin e kaluar, Yllka Gashi, e cila me rolin e saj në filmin “Zgjoi” arriti që aq mrekullisht ta portretizojë jetën e historinë e Fahrije Hotit.
Shtëpia e parashikimeve për çmime të ndryshme ndërkombëtare, duke përfshirë edhe Oscars, Variety, pati përfshirë Yllka Gashin në mesin e 15 aktoreve që do të përfshihen në listën e ngushtë për Çmimet e Akademisë Britanike të Filmit (BAFTA).
Yllka Gashi luajti rolin e saj në filmin “Zgjoi”, i cili ka bërë bujë të madhe, duke u përfshirë madje edhe në listën e ngushtë të çmimeve Oscars.
Variety pati përfshirë Gashin në mesin e aktoreve kryesore në film, së bashku me aktore të njohura siç janë: Nicole Kidman, Lady Gaga, Emilia Jones etj. / KultPlus.com
Regjisorja Blerta Basholli është regjisorja kosovare që ka vendosë Kosovën në kryetituj të medieve më prestigjioze. Ka bërë historinë në Sundance Film Festival, ku për herë të parë ky festival i ka ndarë një filmi tre çmimet kryesore, e këto çmime i ka marr pikërisht filmi i Blerta Bashollit, që nëpërmjet filmit “Zgjoi” ajo ka dërguar dhimbjen, forcën dhe kurajon e grave shqiptare, shkruan KultPlus.
Filmi “Zgjoi” që nuk arriti të futej në pesëshen e filmave të nominuar për kategorinë e filmave në gjuhë të huaj, tashmë ka mbi 20 çmime të festivaleve më prestigjioze, sikurse që ka një rrugëtim të madh në rrjete të ndryshme të kinemave nëpër botë.
Dhe pikërisht Blerta Basholli tash e dy herë po i përjeton ethet e çmimeve Oscars. Për herë të parë ishte në rolin e asistentes së regjisë, për filmin artistik të metrazhit të shkurtë “Shok”, ku ky film me regjisorin Jamie Donoughue kishte arritur të përjetonte edhe emocionin e filmit të nominuar për Oscars.
Dhe për herë të dytë, por tash me një format tjetër, Blerta Basholli qau rrugën e gjatë deri te lista e ngushtë e filmave për çmimin Oscars, në cilësinë e skenaristes, regjisores dhe të një rrëfimi real.
Dhe tashti, kur u bënë publike filmat që vazhdojnë rrugëtimin për Oscars, producenti Yll Uka ka bërë të ditur për mediet se puna e ekipit Basholli, Uka e Bajgora fillon qysh tashti për projektin e radhës.
Blerta Basholli është në proces e sipër të filmit të saj të ri, e cila në deklaratat e saj nëpër medie të ndryshme ka potencuar se aktualisht i ka skenarët e gatshëm për pesë filma.
“Dy prej tyre janë në një fazë më të avancuar ndërsa njëri është tashmë në realizim e sipër. Fjala është për një film që tematizon jetën e të rinjve, adoleshentëve të moshës sime në vitet `90 në Kosovë, në kushtet e okupimit. Kam përshtypjen se, ndryshe nga temat e luftës, kjo temë sikur i mungon kinemasë sonë. Mendoj se ka qenë një jetë megjithatë dinamike dhe disi “Underground” dhe ja vlen të bartet në film. Edhe ky film do të jetë në koproduksion me Zvicrën dhe edhe këtu do të luajë një rol Yllka”, kishte deklaruar Blerta Basholli./ KultPlus.com
Qytetarët e Kosovës janë aktivizuar për të shpërndarë sa më shumë fotografinë e posterit të filmit “Zgjoi”, i cili është shumë pranë nominimit për Oscars, shkruan KultPlus.
Protagonistja e këtij filmi, Yllka Gashi, së fundmi është shprehur shumë falënderuese për përkrahjen e madhe që kanë shprehur njerëzit në rrjete sociale.
“Të dashur miq,Ju falemnderit nga zemra për gatishmërinë tuaj e për tërë përkrahjen!Fjalët janë të pakta për të shprehur mirënjohjen e falenderimin ndaj secilit prej jush që e keni shpërndarë dhe vazhdoni ta shpërndani postimin për nominimet në Oscars 2022.Jemi duke punuar me përkushtim e pasion të madh e shpresojmë shumë që të kemi fat e ta sigurojmë nominimin e parë e historik për Kosovën. Sido që të na prijë fati, jam tepër e nderuar nga dashamirësia e përkrahja juaj!Mbi 21 mijë shpërndarje, dy fish aq falenderime për çdo njërin nga ju!U gëzofshim bashkë më 8 Shkurt!”, ka shkruar ajo në “Facebook”.
Filmi “Zgjoi” me regji të Blerta Bashollit u fut në listën e ngushtë prej 15 filmave për të kaluar drejt çmimeve “Oscars”. / KultPlus.com
Janarin e kaluar, regjisorja Blerta Basholli ishte e lumtur që kishte hyrë në Festivalin e Filmit Sundance me filmin e saj debutues “Hive”. Filmi në gjuhën shqipe për një grua që fillon biznesin e saj pas Luftës së Kosovës ishte një perlë frymëzuese, por Basholli as që kishte guxuar të ëndërronte se sa larg do të arrinin, shkruan mediumi amerikan Associated Press transmeton KultPlus.
Jo vetëm që u bë filmi i parë në historinë e Sundance që fitoi tre çmimet më të mira në konkursin botëror të kinemasë, por tani ai ka një shans të madh për t’u bërë pretendenti i parë i Kosovës për Oscar në kategorinë më të mirë ndërkombëtare të filmit.
“Zgjoi” bazohet në historinë e vërtetë të Fahrije Hotit, e cila gjatë Luftës së Kosovës 1998-1999 u largua nga qyteti i saj i vogël i Krushës së Madhe dhe fëmijët e saj të vegjël. Kur ajo u kthye, burri i saj ishte zhdukur dhe ka të ngjarë të ketë vdekur dhe ajo nuk kishte asnjë mënyrë për të mbajtur familjen e saj. Duke përmbysur traditën dhe pritshmëritë, Hoti u bashkua me kolegët e veja të luftës dhe filloi të shiste ajvarin e bërë vetë, një erëz të bërë me speca të kuq, në tregjet lokale.
Biznesi i saj, Kooperativa Krusha, vazhdon të funksionojë edhe sot.
Basholli e ka hasur në lajme historinë e Fahrije Hotit vite më parë, në kohën kur ajo po merrej me studimet e saj në Universitetit e Nju Jorkut. Ajo e dinte se duhej të ishte një film dhe se Yllka Gashi, një aktore e njohur në Kosovë, duhet të luante. Basholli dhe Gashi u takuan me Fahrijen rreth vitit 2011 dhe kjo e përforcoi edhe më tej misionin e tyre për të treguar historinë e saj. Por do të duheshin gati nëntë vjet për të nisur filmin dhe dy të tjera para se të shkruhej historia në Sundance.
“Para se ta takoja, unë isha klient”, tha Gashi nga shtëpia e saj në Konektikat. “Më bëri përshtypje se si i lindi kjo ide, sepse bërja e ajvarit është një gjë tradicionale për gratë shqiptare, veçanërisht për gratë e brezit të nënës sonë. Ajo ishte kaq e zgjuar për ta përdorur këtë aftësi shumë praktike dhe për ta kthyer atë në një biznes. Që nga hera e parë që u ulëm me të dhe dëgjuam historinë e saj, thjesht rashë në dashuri me të. Ajo ka këtë dinjitet dhe këtë hir që të mahnit, edhe pse ka kaluar kaq shumë dhe ka kaluar shumë dhimbje, pikëllim dhe pasiguri, ajo është ende kjo grua e hirshme, e fortë që të frymëzon.”
Basholli dhe Gashi ishin të dy adoleshente në Kosovë kur shpërtheu lufta. Ata e mbajnë mend mirë atë dhe gjithashtu vitet e vështira.
“Rritja në vitet e 90-ta në Kosovë nuk ishte një kohë e mirë për të qenë fëmijë”, tha Gashi.
Por përvoja e ndarjes së historive të tyre dhe e realizimit të filmit dhe e vendosjes së tyre në këpucët e nënave të tyre u tregua në mënyrë më të lehtë në një farë mënyre.
“Ne jetuam për shumë vite në okupim, kështu që ishte një periudhë e gjatë që vërtet ishim dëshmitarë të shumë gjërave”, tha Basholli. “Por unë kurrë nuk e kam ditur historinë e Yllkës dhe se çfarë kishte kaluar dhe si u largua nga Kosova gjatë luftës dhe ajo nuk e dinte historinë time. Kështu që ne të dyja u hapëm me njëri-tjetrin… Është gjithashtu një mënyrë shërimi dhe një mënyrë për të treguar një histori që shpresojmë se nuk do të përsëritet.”
Gashi tha se ishte diçka që ajo as nuk e dinte se kishte nevojë.
“Kjo hapi një perspektivë të re, të jem i sinqertë, sepse mendoj se kolektivisht kurrë nuk kemi pasur mundësi të shërohemi si shoqëri, si komb, si popull, sepse ishim të etur për ta ndërtuar vendin”, tha Gashi. “Ne kurrë nuk morëm pasojat e luftës dhe traumat që na shkaktoi ajo lufta dhe gjithçka para luftës”.
Suksesi i “Hive” ka bërë që i gjithë vendi t’i brohorasë për to tanimë. Madje, njerëzit e kanë ndaluar Bashollin në rrugë për ta falënderuar që i ka bërë kaq krenarë.
“Njerëzit e njohin Yllkën sepse ajo është një aktore shumë e njohur dhe njerëzit e duan atë. Por të ndalosh regjisorin në rrugë dhe ta falënderosh atë, nuk është një gjë që ka ndodhur shumë këtu”, tha Basholli duke qeshur.
Ajo është pjesë e asaj që quhet Vala e Re e filmave në Kosovë. Gjatë vitit të kaluar, disa regjisore të tjerakanë pasur pjesë në festivale.
Basholli siç thotë ajo, është tipi skeptik i skuadrës, pasi as nuk e mendoi suksesin e “Zgjoit” në Sundance, por është e lumtur me efektin që është filmi duke pasur.
“Me të vërtetë më prek që njerëzit janë kaq krenarë për të. Me të vërtetë i bëri njerëzit të lumtur”, tha Basholli. “Kjo i jep shpresë njerëzve ashtu si Fahrije na dha shpresë neve kur ne punonim për filmin. Ajo kurrë nuk u dorëzua.”
“Hive” është ndër 15 filmat që hynë në listën e ngushtë të Oscars për filmin më të mirë ndërkombëtar, i cili është i pari për Kosovën. Ata do të mësojnë më 8 shkurt nëse do të jetë apo jo ndër pesë filmat që konkurrojnë për çmimin në Oscar më 27 mars. /KultPlus.com
Aktorja e njohur tashmë për rolin e saj në filmin tejet të suksesshëm ‘Zgjoi’, së fundmi ka realizuar një intervistë me kryeredaktorin e ‘Cineuropa’, Domenico La Porta, shkruan KultPlus.
Kryeredaktori i Cineuropa, Domenico La Porta, zhvilloi një bisedë me aktoren Yllka Gashi për ndikimin e filmit dhe se çfarë do të thoshte një nominim për çmimin Oscar për të gjitha gratë që ende po përballen me vështirësi sociale dhe kulturore në botë.
“Është e vërtetë. ‘Zgjoi’ bëri histori dhe ndihem shumë me fat që kam qenë pjesë e filmit dhe të jem plotësisht e sinqertë, ka qenë një vit i çmendur me pandeminë dhe gjithçka po ndodh në botë, por ne ishim me fat që ishim në disa vende personalisht dhe ‘Zgjoi’ iu shfaq një shtëpie të mbushur plot, ndaj kaq shumë njerëzve”, thotë Gashi.
Sipas saj, Fahrija është një grua e mahnitshme, ajo ka kaluar shumë në jetën e saj, por me gjithë dhimbjen dhe çdo gjë me të cilën u përball, ajo thjesht vazhdoi dhe nuk u dorëzua kurrë.
“Është kaq frymëzuese sepse Fahrija është një grua nga një fshat i vogël, një fshat që ka kaluar një masakër të tmerrshme ku i gjithë fshati është tramatizuar dhe vazhdon edhe sot e kësaj dite të jetë i tillë, veçanërisht për njerëzit e zhdukur. Por ajo ishte një nga ato udhëheqëse, një udhëheqëse e lindur. Dikush që ka atë karizëm, dikush që kishte një vizion nga i cili ajo kurrë nuk hoqi dorë. Ajo nuk donte të luante viktimën, por vetëm të merrte pjesët e mbetura dhe u përpoq të vazhdonte në jetë. Dhe në atë rrugëtim ajo ndihmoi komunitetin e saj, fëmijët e saj dhe la shembull për të tjerët. Pra, ajo më bëri shumë përshtypje dhe që kur e takova, u bë ëndërr për mua të luaja atë. Nuk është aq e zakonshme kur të jepet mundësia të portretizosh një karakter femëror kaq të qetë, por tejet të fuqishëm”, ka thënë Gashi.
Ajo tutje ka potencuar se Fahrija është një person e cila ka frymëzuar shumë, por mbi të gjitha, ajo ka bërë diçka nga hiçi.
“Në shumë nivele, unë u frymëzova prej saj, sepse ajo bëri diçka nga hiçi. Ajo i ndryshoi gjërat nga nevoja dhe për mua ky rol ishte një domosdoshmëri, sepse kam mësuar shumë prej saj përgjatë aktrimit. Gjatë filmit ne gjithashtu duhej të shkonim dhe të përballeshim me traumën tonë dhe nuk ishte vërtet e lehtë. Ishte pak e dhimbshme si eksperiencë. Por në të njëjtën kohë, përpiqem të jem optimiste dhe të shoh anën e mirë të gjërave, prandaj e mora këtë përvojë si një përvojë shëruese. Si fëmijë të luftës, ne po ashtu e kemi trajtuar të kaluarën tonë dhe Fahrija më frymëzoi dhe për shkak të mundësisë për ta portretizuar, u bëra një person më i mirë, të them të drejtën”, ka thënë tutje ajo.
Në ditët kur në juria në Akademinë e Filmit po vazhdojnë votimet për filmat që do të nominohen për çmimet ‘Oscars’, aktorja Yllka Gashi ka ndarë dy fotografi me Fahrije Hoti, të cilën e portretizon në filmin ‘Zgjoi’, përcjell KultPlus.
“Fahrije Hoti – kjo grua e çeliktë që nuk u dorëzua para asnjë sfide, që dhimbjen e shndërroi në motiv për punë! Ndërmarrëse e suksesshme, nënë, gjyshe e shoqe e dashur. Inspirim për çdo gjeneratë!
Sa nder e privilegj që të njoh e sa fat e kënaqësi që t’kam portretizu në film!” – ka shkruar Gashi në Instagram./ KultPlus.com
Nesër do të fillojë votimi i anëtarëve të Akademisë Amerikane për të nominuar filmat për “Oscars 2022”, shkruan KultPlus.
Aktorja që luan rolin kryesor në filmin “Zgjoi”, Yllka Gashi sot ka bërë thirrje që të shpërndahet sa më shumë fotografia e filmit “Zgjoi” në rrjetet sociale, e që të njëjtën e ka bërë edhe regjisorja e filmit, Blerta Basholli.
E këngëtarja kosovare me famë botërore, Dua Lipa, i është përgjigjur kësaj thirrje dhe ka shpërndarë fotografinë e filmit “Zgjoi” që është shpërndarë fillimisht nga regjisorja Basholli, nëpërmjet një ‘InstaStory’ në rrjetin social Instagram. / KultPlus.com
“Gold Derby”, shtëpia amerikane e parashikimeve dhe lajmeve të çmimeve, së fundmi ka realizuar një intervistë me regjisoren Blerta Basholli dhe aktoren Yllka Gashi, në lidhje me filmin Zgjoi, film ky që po shënon histori për shtetin e Kosovës, shkruan KultPlus.
Në artikullin e ‘Gold Derby’, përveç përshkrimit të mesazhit që filmi Zgjoi përmban, shtjellohen edhe mesazhe e momente të ndryshme e të veçanta nga regjisorja Basholli dhe aktorja Gashi, të cilat shprehen se Kosova po bën tifo për këtë film.
“Filmi ka pasur një udhëtim vërtet interesant dhe të bukur që nga Sundance vitin e kaluar. 2021 ishte një rrugëtim i mirë për ‘Hive’ dhe për ne. Ne vijmë nga një vend i vogël dhe megjithëse kemi shumë histori të bukura për të treguar, ne vijmë nga një vend i vogël. [Pas hyrjes në listën e ngushtë] e gjithë Kosova po bën tifo për ne“, thotë Basholli.
“Presioni është shumë [i lartë] kur luan një person real që është gjallë. Ata mund të mos ju pëlqejnë ju ose mënyra se si i portretizoni ata. Ju keni këtë përgjegjësi të madhe për t’i nderuar ata dhe për t’u bërë atyre drejtësi. Ne nuk donim ta lëndonim Fahrijen, donim ta nderonim dhe të ndanim historinë e saj, sepse ne ishim të impresionuar prej saj. Si aktore e pashë. E pashë se si fliste. Vëzhgova qëndrimin e saj dhe mënyrën se si e trajtonte veten. Kjo ju ndihmon të dalloni tipare të vogla për t’ju ndihmuar të ndërtoni karakterin“, shpalos Gashi.
Më poshtë KultPlus ju sjell artikullin/intervistën e plotë të tyre:
Hyrja e Kosovës për filmin më të mirë ndërkombëtar të metrazhit të gjatë në Çmimet e 94-ta të Akademisë, “Hive”, tregon historinë e vërtetë të Fahrije Hotit (të luajtur nga Ylka Gashi), bashkëshorti i së cilës është zhdukur që nga lufta në Kosovë. Ajo ngre biznesin e saj të vogël për të siguruar jetesën e fëmijëve të saj, por ndërsa lufton kundër një shoqërie patriarkale që nuk e mbështet atë, ajo përballet me një vendim vendimtar. Filmi u drejtua dhe u shkrua nga Blerta Basholli, e cila është e emocionuar të përfaqësojë Kosovën për herë të parë në listën e ngushtë të Oscars 2022.
“Ndihem shumë mirë”, thotë Basholli. “Filmi ka pasur një udhëtim vërtet interesant dhe të bukur që nga Sundance vitin e kaluar. 2021 ishte një rrugëtim i mirë për ‘Hive’ dhe për ne. Ne vijmë nga një vend i vogël dhe megjithëse kemi shumë histori të bukura për të treguar, ne vijmë nga një vend i vogël. [Pas hyrjes në listën e ngushtë] e gjithë Kosova po bën tifo për ne.”
Gashi e dinte se donte të luante rolin e Hotit sapo të dëgjonte për filmin.
“Shkuam për të takuar Fahrijen për herë të parë”, përshkruan ajo. “Që atëherë, ‘Hive’ u bë një mision për ne. U bë një ëndërr për mua. E dija historinë e Fahrijes sepse ajo ishte shumë në TV. Ne pamë shumë histori për të vejat dhe se si ato po organizonin protesta për t’i bërë pyetje qeverisë për eshtrat e të dashurve të tyre. U desh mjaft kohë për të bërë filmin, nga viti 2011 deri në 2021 kur u shfaq premierë në Sundance. Kaq shumë gjëra ndodhën gjatë atyre viteve. Por unë kurrë nuk hoqa dorë nga kjo ëndërr dhe as [Blerta] nuk e hoqi dorë”.
“Presioni është shumë [i lartë] kur luan një person real që është gjallë”, vazhdon Gashi. “Ata mund të mos ju pëlqejnë ju ose mënyra se si i portretizoni ata. Ju keni këtë përgjegjësi të madhe për t’i nderuar ata dhe për t’u bërë atyre drejtësi. Ne nuk donim ta lëndonim Fahrijen, donim ta nderonim dhe të ndanim historinë e saj, sepse ne ishim të impresionuar prej saj. Si aktore e pashë. E pashë se si fliste. Vëzhgova qëndrimin e saj dhe mënyrën se si e trajtonte veten. Kjo ju ndihmon të dalloni tipare të vogla për t’ju ndihmuar të ndërtoni karakterin.”
Para se të xhirohej filmi, Basholli thotë se kanë kërkuar shumë fshatra në Kosovë për të gjetur një zonë që do të dukej realiste për kohën e portretizuar. “Ne po kërkonim një fshat që duket më i shkatërruar nga lufta,” shpjegon ajo. Në fshatin që ata filmuan, “Shtëpitë duken sikur të ishin djegur. Duket më e vjetër dhe duket më e vërtetë dhe autentike. Kjo është arsyeja pse vendosëm të xhironim atje. Ishte gjithashtu e vështirë për të xhiruar atje sepse rrugët janë shumë të vogla. Ne e donim fshatin dhe për fat gruaja që zotëronte shtëpinë ishte shumë e mirë për të punuar me të. Gjithçka që kërkova me të vërtetë nga të gjithë ishte të jem i sinqertë dhe i vërtetë. Le të mos përpiqemi të krijojmë diçka që nuk është e besueshme dhe autentike. Të gjithë vendosin zemrën dhe pasionin e tyre në këtë histori.”
“Hive” është filmi i parë ndërkombëtar që hyn në listën e ngushtë të Oskarit nga vendi i Kosovës. Është gjithashtu debutimi i filmit regjisorial nga roli i parë kryesor i Bashollit dhe Gashit.
Intervistën e realizuar nëpërmjet një video nga ‘Gold Derby’ e gjeni këtu. / KultPlus.com
Aktorja që portretizoi rolin kryesor në filmin ‘Zgjoi’, Yllka Gashi u ka bërë thirrje të gjithëve të shpërndajnë sa më shumë fotografinë e filmit në rrjete sociale meqë nesër fillon votimi i anëtarëve të Akademisë Amerikane për të nominuar filmat për Oscars 2022, shkruan KultPlus.
KultPlus ua sjell postimin e plotë të saj:
Të dashur miq,
Nesër fillon votimi i anëtarëve të Akademisë Amerikane për të nominuar filmat për Oscars 2022.
Kosova për herë parë është në listën e ngushtë me gjasa reale për të siguruar një nominim.
Duke ju falenderuar për përkrahjen e jashtëzakonshme që na e keni bërë gjatë krejt kësaj kohe, ju lus që ta shpërndani sa më shumë fotografinë e filmit tonë në rrjete sociale.
Bashkë për Kosovën drejtë Oscars 2022!!!
Kosova’s Official Entry for Oscars
Based on an inspiring true story, Hive tells the story of empowerment, resilience and triumph of Fahrije Hoti and the women of Krusha in a situation when giving up is knocking on your door.
Please support us by sharing and thank you a million times!./ KultPlus.com
Regjisorja e filmit më të suksesshëm në histori të kinematografisë së Kosovës, Blerta Basholli, ka zhvilluar një intervistë me gazetaren Tanya Konig për revistën Swizz Art Biz, përcjell KultPlus.
“Publiku reagoi për ndershmërinë e filmit”
Ishin fjalët e para të Bashollit në këtë intervistë, duke treguar se nuk ishte e fokusuar për të treguar luftën e Kosovës, por më shumë në ngjarjen se një grua ka zhvilluar biznes nga asgjëja.
“Gjithkush prej nesh është ndjerë i vogël në ndonjë moment, qoftë ajo kohë si një i ri apo për shkak të nacionalitetit tuaj, ngjyrës së trupit ose orientimit seksual. Shpresa ime ishte që publiku të mund të simpatizonte Fahrije Hotin”, ka thënë Basholli.
Regjisorja e filmit që shkroi histori në Festivalin e Filmit “Sundance”, duke fituar tre çmimet kryesore, vazhdon tutje duke treguar aventura e filmit “Zgjoi” në Zvicër.
“Në Cyrih kishte shumë publik shqiptarë. Disa nuk ishin të kënaqur me mënyrën se si portretizoheshin disa burra. Gjithsesi më falënderuan dhe thanë se ndonjëherë e vërteta dhemb, por duhet thënë. Filmi filloi shumë mirë në Kosovë dhe aktualisht është filmi më i shikuar”.
Foto : Astrit Ibrahimi
“Filmin erdhën tshihnin dy kosovarë të cilët prej 35 vitesh jetojnë në Zvicër dhe nuk kanë qenë kurrë më parë në kinema”
E pyetur se pse është kaq e rëndësishme përfaqësimi në një vend të huaj, 39 vjeçarja thotë se kur jeni në një vend të huaj, ndiheni të vogël. “Kjo është arsyeja pse njerëzit duan që të publikohen gjëra të mira për origjinën e tyre, njerëz të shumtë u çuditen me faktin që një film nga Kosova po shfaqet në Zvicër. Në audiencë ishin edhe dy kosovarë të cilët prej 35 vitesh jetojnë në Zvicër dhe nuk kanë qenë kurrë më parë në kinema. Ata më falënderuan për portretizimin e një gruaje me të cilën mund të identifikoheshin. Për mua ishte një përmbushje, sepse ky audiencë nuk është e lehtë për t’u arritur”.
Fahrije Hoti është një grua me shumë pak mbështetje në film, por megjithatë edhe burrat e kanë ndihmuar atë që të arrij sukses në zhvillimin e një biznesi. Gazetarja tutje shtroi pyetjen nëse nga filmi dëshironte të përcjellte mesazhin “gratë e mira – burra të këqij”, por Basholli thotë se ne nuk duhet të shohim vetëm njerëzit e këqij. Në film shohim edhe personazhe pozitivë meshkuj, si pronari i supermarketit që ndihmon Fahrijen. As vjehrri nuk është personazh negativ. Ai përpiqet të jetë sa më mbështetës që mundet. Ai është i kapur edhe pas traditës, por në të njëjtën kohë ka dëshirë ta ndihmojë atë. Situata nuk është e lehtë as për të, edhe ai ka humbur djalin. Natyrisht, nuk munguan as ata që e ofenduan Fahrijen në publik dhe e gjuanin me gurë. Kur filmi u shfaq në qytetin fqinj, disa u ndjenë të ofenduar. Por në përgjithësi, publiku e vlerësoi filmin sepse tregon emancipimin dhe qëndrueshmërinë e Fahrijes.
Sa i përket rolit të Fahrijes pas zhdukes së bashkëshortit të saj në shoqëri, nuk ishte i “vdekur”. Njerëzit presin që një e ve të mbyllet në shtëpi, të mos veshë grim ose rroba me ngjyra të ndezura dhe të vajtojë humbjen e burrit të saj. Sapo dikush nuk e bën këtë, personi blasfemohet. Fahrijes i thanë të mos punonte si e ve. Por kjo nuk ishte një opsion për të. Ajo gjithmonë donte të punonte, edhe kur burri i saj ishte ende gjallë. Nëse ai do të ishte gjallë, ata ndoshta do ta kishin ndërtuar biznesin së bashku. Dhe megjithëse nuk studioi kurrë, ajo nuk mund të identifikohej si shtëpiake. Pas luftës, ajo gjithashtu duhej të merrte më shumë përgjegjësi dhe të luante rolin e gruas dhe burrit në shtëpi në të njëjtën kohë. Këtë e bëri edhe për hir të fëmijëve të saj, përndryshe do të ishte çmendur dhe kjo nuk do t’i ndihmonte askujt. Natyrisht që dhimbja e humbjes është ende aty, edhe pas më shumë se 20 vitesh Fahrije Hoti pret kthimin e bashkëshortit.
“Gjatë shkrimit të skenarit, unë dhe Yllka Gashi u bëmë nëna”
Gjatë shkrimit të skenarit, Blerta Basholli dhe Yllka Gashi, protagonistja e filmit, u bënë nëna. “Ne u përpoqëm të kuptonim se si ndiheshe që duhet të rrisësh fëmijët e tu vetëm gjatë luftës. Është e vështirë të rritësh fëmijë në një shoqëri kur burri zhduket në të njëjtën kohë. Ne ndamë edhe përvojat tona të luftës, duke u munduar të empatizojmë Fahrijen”.
Basholli përmend edhe faktin se është rritur në një shoqëri patriarkale dhe kjo gjë shpesh herë e ka penguar atë në punën e saj, megjithatë në fund ia ka dalur që të arrijë majat e botës.
“Në një moment thjesht lodhesh dhe kupton se ndonjëherë duhet të bësh më shumë se një grua. Një shembull është në familje: nuk u diskriminova nga familja ime, por duke u rritur dëgjova gjëra të tilla si “a mund ta pastrosh këtë sepse si grua duhet të jesh në gjendje”. Gjithashtu qëndrimi se gratë duhet të jenë gjithmonë të rregullta dhe të afta të gatuajnë. Në një moment e kupton se nuk mund t’i bësh të gjitha. Ndryshova ngadalë gjërat në jetën time”, thotë ajo.
“Viti 2021, ishte një vit për kineastet, shënuam suksese ndërkombëtare”
Katër vitet e fundit e kanë parë Kosovën duke paraqitur filma për Oscar përmes tre regjisorëve kosovarë, e madje “Zgjoi” duke shkruar edhe histori. “Këta filma tani kanë qenë të suksesshëm sepse janë filma të mirë. Një juri ndërkombëtare i përzgjodhi këto nga hyrjet më të mira. Viti 2021 ishte i veçantë: Katër filma nga regjisore gra kosovare u shfaqën në festivale ndërkombëtare, përfshirë në Roterdam dhe Kanë, dhe filmi i Kaltrina Krasniq, Vera Dreams of the Sea, fitoi Çmimin e Madh në Tokio. Filmi im fitoi në Sundance dhe në shumë festivale të tjera. Ishte një vit për kineastet”.
E pyetur në qoftë se zgjedhja e Fahrijes ishte e qëllimshme, ajo rrëfeu edhe historinë e njohjes dhe gjithçka tjetër.
“Zgjedhja e një gruaje si personazhi kryesor nuk ishte një vendim i vetëdijshëm. Ne e takuam Fahrijen 10 vjet më parë, atëherë askush nuk e pyeste veten nëse gratë përfaqësoheshin mjaftueshëm – madje as në Hollywood. Thjesht doja ta shfaqja karakterin e saj të fortë në ekranin e madh dhe e zgjodha për shkak të historisë së saj. Ndoshta publiku tani ka reaguar, sepse gratë në fakt nuk janë të përfaqësuara sa duhet në mbarë botën. Jo vetëm Kosova është shoqëri patriarkale. Në vende si Zvicra, SHBA apo vende të tjera demokratike dhe të zhvilluara, ka gjithashtu shumë punë për t’u bërë kur bëhet fjalë për të drejtat e grave”.
Diaspora dhe remitancat e saj të dërguara ndër vite, kanë ndihmuar shumë familje që realisht ta mbajnë vetën gjallë nga ato para.
“Dikush mendon se diaspora fiton para lehtë dhe mirë. Kur isha refugjat në Gjermani gjatë luftës, takova dajën dhe kushërinjtë e mi dhe kuptova se sa e vështirë ishte për ta të fitonin para të mjaftueshme në një vend të huaj. Aty kuptova se ata nuk janë thjesht njerëz të pasur, por punojnë shumë për këto para për të mbajtur familjet e tyre të mëdha dhe për të dërguar para në Kosovë. Prindërit dhe vëllai im gjithashtu punuan shumë. Ne kemi ndihmuar njëri-tjetrin në kohë të vështira”.
Foto: Alex Boom
“Unë nuk isha një nga fëmijët e pasur që shkoi në shkollë”
Blerta Basholli ka përfunduar studimet në Amerikë, konkretisht në qytetin e New Yorkut, por nuk ishte aspak një nga fëmijët e pasur aty.
“Kam marrë një bursë nga dekani për tarifat e shkollimit. Unë jetoja me të dashurin tim që tani është burri im. Ai punonte në SHBA, gjë që na e bëri jetën pak më të lehtë. Më lejuan të punoja vetëm 20 orë në javë. Punoja në bibliotekën e shkollës dhe për një fotograf shqiptar që punësoi bashkëshortin tim”.
E pyetur për projektin e radhës, ajo tregon se ka të bëjë me një histori të moshës së rritur të bazuar në përvojën e saj si e re në Kosovën e pushtuar.
“Jam në fazën e shkrimit dhe tashmë kemi siguruar fonde nga Zvicra për zhvillimin e skenarit. Në Kosovë praktikisht nuk keni financim në këtë fazë. Ishim vërtet me fat dhe është hera e parë që paguhem për të shkruar”, rrëfen ajo.
‘Zgjoi’ tregon historinë e vërtetë të Fahrije Hotit, një e ve nga fshati Krushë e Madhe, e cila bëhet një sipërmarrëse pasi burri i saj u zhduk gjatë luftës së Kosovës në vitet 1990. Ajo bashkon forcat me të vejat e tjera në fshat dhe prodhon specialitetin ballkanik paprika, ajvar, të cilën gratë e shesin në një supermarket. Ajo që tingëllon e thjeshtë kërkon guxim dhe shumë bindje. Gratë përjetojnë rezistencë të madhe nga burrat në fshat dhe gratë gjithashtu duhet të binden se nuk vajtojnë vetëm burrat e tyre në shtëpi.
‘Zgjoi’ është filmi i parë artistik i shqiptarit kosovar Blerta Basholli dhe ka fituar disa çmime. Tani është një nga 15 filmat në garë për një nominim për Oscar. /KultPlus.com
Filmi artistik i metrazhit të gjatë “Zgjoi”, me skenar dhe regji të Blerta Bashollit, që tashmë është edhe në listën e ngushtë të filmave “Oscar” po vazhdon prezantimin në rrjetin e kinemave, shkruan KultPlus.
Sipas njoftimit të producentëve të këtij filmi, bëhet e ditur se filmi “Zgjoi” është gati për kinematë e Australisë dhe Zelandës së Re.
“Filmit i është konfirmuar se do të shfaqet në 18 kinema në Australi dhe 6 të tjera në Zelandë të Re. Kjo, pos tjerash, është një mundësi që shqiptarët që jetojnë në këto vende të kenë mundësi të shohin rrëfimin për Fahrije Hotin nën interpretimin e aktores Yllka Gashi.
Akademia Britanike e Arteve të Filmit dhe Televizionit (BAFTA) ka zbuluar listën e saj të gjatë të të nominuarve në 24 kategori për çmimet e saj të ardhshme të filmit, përcjell KultPlus.
“No Time to Die”, “Belfast” dhe “West Side Story” janë ndër filmat kryesorë të shpallur sot pas raundit të parë të votave.
Siç u raportua të hënën, në asnjë listë nuk është i përfshirë filmi shumë i sukesshëm “Spider-Man: No Way Home” pasi “dështoi të përmbushte kriteret e pranueshmërisë”, sipas BAFTA. Filmi fillimisht kishte kërkuar konsideratë për kategoritë e filmit më të mirë dhe efekteve speciale më të mira. Kompania Sony nuk pranoi të komentojë.
Në anën tjetër, BAFTA ka bërë të ditur nominimet për shumë kategori, siç është edhe ajo për aktoren më të mirë në rol kryesor.
Votimi i raundit të dytë, për të përcaktuar nominimet në kategoritë e votuara nga anëtarët, do të hapet midis 14-27 janar. Nominimet do të shpallen më 3 shkurt. Kjo do të pasohet nga votimi i raundit të tretë, për të përcaktuar fituesit, i cili do të hapet midis 9 shkurtit dhe 8 marsit.
15 performanca do të vazhdojnë në raundin e dytë të votimit dhe gjashtë të tilla do të nominohen. Për të përcaktuar këtë listë të gjatë, në raundin e parë u votua kapitulli i aktrimit; 12 më të mirat u futën automatikisht në listën e gjatë. Tre vendet e mbetura janë votuar nga juria Longlisting, e cila ka marrë në konsideratë 10 shfaqjet e ardhshme të vendosura nga votimi i kapitullit.
Raundi i dytë votohet nga një juri që do të marrë parasysh gjashtë nominimet. Në raundin e tretë, anëtarësia e përgjithshme e votimit do të zgjedhë fituesin në këtë kategori. 82 shfaqje u dorëzuan për shqyrtim.
Jessica Chastain – “The Eyes of Tammy Faye” Olivia Colman – “The Lost Daughter” Lady Gaga – “House of Gucci” Alana Haim – “Licorice Pizza” Jennifer Hudson – “Respect” Emilia Jones – “CODA” Nicole Kidman – “Being The Ricardos” Jennifer Lawrence – “Don’t Look Up” Frances McDormand – “The Tragedy of Macbeth” Renate Reinsve – “The Worst Person in the World” Claire Rushbrook – “Ali & Ava” Joanna Scanlan – “After Love” Kristen Stewart – “Spencer” Tessa Thompson – “Passing” Rachel Zegler – “West Side Story”
Njëri ndër mediumet amerikane, Variety, kishte përfshirë edhe aktoren nga Kosova, Yllka Gashi, në këtë nominim, megjithatë gara e ngushtë rezultoi që Gashi të mos nominohet.
Çmimet BAFTA do të mbahen në qendër të Londrës më 13 mars /KultPlus.com
The Hollywood Reporter ka vendosur Yllka Gashin në garë me aktorë të njohur si pretendente për të fituar çmimin Oscar, përcjell KultPlus.
“Nuk ka gjë të tillë si një Oscar për aktrimin më të mirë ndërkombëtar, por zgjedhja për çmimin Oscar për filmin më të mirë ndërkombëtar të këtij viti mund të vendoset si një garë midis veteranëve të aktrimit (Javier Bardem, Noomi Rapace, Dan Stevens) dhe të ardhurve (së pari italiani -timeri Filippo Scotti, debutimi kosovar Yllka Gashi), performancat e së cilës janë në qendër të pretendentëve për çmimet e vitit 2022.”
Së fundi, ‘Zgjoi’ ka hyrë edhe në listën e ngushtë për nominimet për festivalin prestigjioz ‘Oscars’.
‘Zgjoi’ përcjell Fahrije Hotin nga Krusha e Madhe (interpretuar nga aktorja Yllka Gashi), e cila është në kërkim të burrit të saj të humbur gjatë luftës në Kosovë. Ajo fillon një biznes bujqësor për ta siguruar mbijetësën e familjes së saj në një ambient tradicional patriarkal ku ambicia e saj për t’u zhvilluar nuk shihet me sy të mirë. Punët bujqësore fillojnë t’i ecin mbarë pos bletëve që janë shumë kaotike dhe agresive ndaj saj. Në rrugëtimin e saj për ta gjetur paqen me bletët, ajo fillon ta gjejë edhe paqen me veten për të jetuar në një situatë të re për të.
Për të lexuar të gjithë artikullin e The Hollywood Reporter klikoni KËTU/KultPlus.com
Nicole Kidman që sivjet po e synon çmimin e dytë Oscar në karrierë, e poashtu edhe atë BAFTA, e ka për konkurrente edhe aktoren nga Kosova, Yllka Gashin, e cila po vlerësohet lart për rolin në filmin “Zgjoi’.
E fitorja eventuale e kosovares karshi yllit të Hollywoodit, mund të konsiderohet një histori unike meqenëse, 16 vjetë më parë vajza nga Prishtina si ambasadore lokale e Vullnetit të Mirë e Kombeve te Bashkuara ishte angazhuar si shoqëruese e aktores australiane, derisa kjo e fundit po e vizitonte Kosovën në cilësinë e Ambasadores së Vullnetit të Mirë të UNIFEM-it për mbrojtjen e të drejtave të grave, shkruan Klankosova.tv.
Madje, gjatë vizitës së zhvilluar më 2006, kishin bërë edhe shumë fotografi bashkë.
Në këtë listën për BAFTA, Gashin e futi mediumi amerikan “Variety” që bën parashikimet e nominimeve për çmimet më prestigjioze në botë. Dy aktoret po përmenden si favorite edhe për cmimin Oscar./KultPlus.com
Shtëpia e parashikimeve për çmime të ndryshme ndërkombëtare, duke përfshirë edhe Oscars, “Variety”, sot ka përfshirë aktoren Yllka Gashin në mesin e 15 aktoreve që do të përfshihen në listën e ngushtë për Çmimet e Akademisë Britanike të Filmit (BAFTA), me ç’rast ka reaguar edhe aktorja Yllka Gashi nëpërmjet një postimi në rrjetet sociale, shkruan KultPlus.
“Ta shoh emrin tim, të filmit “Zgjoi”, të Blerta Bashollit e produksionit Ikonë, e emrin e Kosovës në këso listash, më duhet ta pranoj që zemra më bëhet mal nga gëzimi e krenaria, por edhe nga mirënjohja e falenderimi që e kam për ata me të cilët kam pasur fatin e mirë ta bëjmë këtë film”, ka shkruar Gashi.
KultPlus ju sjell postimin e plotë të saj:
Mediumi i mirënjohur amerikan “Variety” që bën parashikimet e nominimeve për çmimet më prestigjioze në botë, paraqet edhe emrin tim për mundësinë e futjes në listën e gjatë të nominimeve për çmimet BAFTA në Britani të Madhe, në mesin e plot aktoreve me renome ndërkombëtare si Nicole Kidman, Frances McDormand, Olivia Colman, Penelope Cruz, Jessica Chastain, Kristen Stewart etj.
Ta shoh emrin tim, të filmit “Zgjoi”, të Blerta Bashollit e produksionit Ikonë, e emrin e Kosovës në këso listash, më duhet ta pranoj që zemra më bëhet mal nga gëzimi e krenaria, por edhe nga mirënjohja e falenderimi që e kam për ata me të cilët kam pasur fatin e mirë ta bëjmë këtë film.
Ky është nder shumë i veçantë edhe nëse mbetet vetëm parashikim medial!
Me ose pa nominim, sepse as nuk dua të mendoj shumë e të preokupohem me diçka që nuk është në dorën time e nuk varet nga unë, fat të madh e nder jetësor e konsideroj mundësinë që e kam pasur ta portretizoj një grua të jashtëzakonshme siç është zonja Fahrije Hoti e të punoj me një regjisore të mrekullueshme e tepër punëtore që më inspiron çdo ditë si Blerta Basholli dhe me produksionin Ikonë që janë shumë meritor për çdo sukses që e kemi pasur deri tash!
Nicole Kidman Niamh Algar Emilia Jones Jessica Chastain Yllka Gashi Lady Gaga Jodie Comer Alana Haim Olivia Colman Penelope Cruz Tessa Thompson Kristen Stewart Jasmine Batchelor Frances McDormand/ KultPlus.com
Shtëpia e parashikimeve për çmime të ndryshme ndërkombëtare, duke përfshirë edhe Oscars, Variety, ka përfshirë Yllka Gashin në mesin e 15 aktoreve që do të përfshihen në listën e ngushtë për Çmimet e Akademisë Britanike të Filmit (BAFTA), shkruan KultPlus.
Yllka Gashi luajti rolin e saj në filmin “Zgjoi”, i cili ka bërë bujë të madhe, duke u përfshirë madje edhe në listën e ngushtë të çmimeve Oscars.
Variety ka përfshirë edhe Gashin në mesin e “Aktores kryesore në film, së bashku me aktorë të njohur siç janë: “Nicole Kidman, Niamh Algar, Emilia Jones etj”.
Raundi i parë i votimit për çmimet BAFTA mbyllet të hënën, më 3 janar. Akademia Britanike do të shpallë listën e saj të gjatë në të gjitha kategoritë më 12 janar.
Nominimet zyrtare të BAFTA do të shpallen më 3 shkurt. Çmimet BAFTA janë planifikuar të zhvillohen më 13 mars. /KultPlus.com
Intervistoi: Jeta Zymberi Fotografia: Artan Korenica
Rreth dy dekada më parë bëri hapin fillestar drejt aktrimit. Ishte vetëm 17 vjeçare ku u bë pjesë e një audicioni që ishte një shkëndijë së artit shqiptar po i shtohej një artiste krejt e veçantë. Dhe nuk u desh shumë kohë që ajo të dëshmonte diçka të tillë, pasi shumë shpejt bëri debutimin e saj të parë televiziv në serialin “Familja Moderne”. Tutje jetësoi edhe disa role në film e teatër, por viti 2015 e gjeti me një vendim të ri. Ajo bashkë me familje u larguan drejt Shteteve të Bashkuara të Amerikës ku jeton edhe sot. As atje nuk qëndroi larg aktrimit, por shkëlqimin e saj të merituar e arriti pas gati një dekade ku me artin e saj shpërthej kufijtë.
Yllka Gashi e cila është e njohur për mbështjelljen e plotë të personazheve të saj, duke kapur nuancat, modelet e të folurit dhe personalitetet e tyre, është shumë e kujdesshme edhe në përzgjedhjen e roleve. Në rolet e saj në teatër, film e seriale, ajo është transformuar në njerëz kaq të ndryshëm duke fituar kështu dashurinë e publikut gjatë rrugës. Ndërsa një nga cilësitë më mbresëlënëse të aktores është aftësia e saj për të mbajtur vëmendjen tuaj pa sforcim, për t’u dukur sikur aktrimi në një film është gjëja më e natyrshme që një person mund të bëjë.
E thjeshtë e modeste që suksesi vetëm sa e ka bërë më falënderuese e më të përkushtuar, Yllka këtë vit ka pushtuar zemrat e publikut e kritikëve me nam botërorë me rolin e saj në filmin “Zgjoi”.
Tek “Zgjoi”, ajo banon plotësisht në një figurë të botës reale – këtë herë në atë të zonjës Fahrije Hoti. Bazuar në historinë e vërtetë të Fahrije Hotit, gruas luftarake që ngriti biznesin e ajvarit në Krushë të Madhe, për Yllkën, siç potencon ajo, ky rol ishte nder jetësorë.
Performanca e saj në këtë film tashmë i ka dhënë asaj çmime dhe ka marrë vlerësime të mira nga kritikët. Madje gazeta amerikane ‘The Austin Chronicle’ shkroi se “performanca e Yllka Gashit është një nderim për një grua që ndryshoi jetën në heshtje, pa u bërë kurrë një shenjtore”.
Yllka bëri një kërkim të gjerë rreth jetës së zonjës Hoti përpara se të fillonin xhirimet. Ajo takoi personalisht atë e ëndërroi përreth një dekade jetësimin e këtij roli. Por, kur “Zgjoi” erdhi në jetë, ai erdhi për të bërë histori për kinematografinë kosovare. Në “Sundance Film Festival” u shpall fitues i trefishtë. Rrugës deri më sot ku filmi mori vëmendjen botërore si filmi i parë i gjatë nga Kosova që ka hyrë në listë të ngushtë për çmimin “Oscar”, ai ka marrë edhe dhjetëra çmime të tjera, duke u bërë pothuajse çdo muaj lajm në mediat botërore.
Por gjithë këtë sukses Yllka nuk e gëzoi me shumë entuziazëm. Ishte dhimbja për humbjen e babait që asaj i krijoi një zbrastësi të madhe dhe sikur balancoi emocionet. Por ajo është e lumtur që të paktën babai arriti të shoh suksesin e filmit në Sundance çka e bëri edhe shumë krenarë.
Për rrugëtimin e saj, gjithë këtë sukses të filmit “Zgjoi” ku ajo bart në supe rolin kryesorë, për ndjesinë, sfidat, triumfet e gjithçka tjetër, ajo përgjigjet plot përkushtim e sinqeritet në një intervistë për KultPlus.
Fotografia: Fadil Berisha
KultPlus: Një prej aktoreve më të dashura për publikun shqiptar, sot ka marrë dashurinë e botës, si ndihet Yllka pas gjithë këtij suksesi me filmin “Zgjoi”?
Yllka: Faleminderit për fjalët e bukura e për vlerësimin së pari! Ndjehem e lumtur dhe shumë e nderuar!
KultPlus: Ka kohë që nuk ishit pjesë e skenës kosovare, pasi që prej vitesh jetoni në Amerikë. Por duket se u kthyet në kohën e duhur dhe me projektin e duhur. Si e pritet ftesën e regjisores Blerta Basholli për të qenë pjesë e filmit “Zgjoi”?
Yllka: Ideja për ta bërë “Zgjoi-n” daton që nga viti 2011. Atë kohë ishim duke punuar bashkë me Blertën në një projekt tjetër, derisa ajo bëhej gati për filmin e diplomës në NYU. Kur e pat ndarë me mua idenë për ta takuar znj. Fahrije e nëse ajo pajtohet, atëherë edhe për të bërë një film për të dhe unë ta luaj atë, përgjigjja ime e menjëhershme ka qenë PO! Shumë gjëra kanë ndodhur ndërmjet vitesh prej 2011 deri në 2019 kur e kemi xhiruar filmin, mirëpo ne të dyja- i kemi qëndruar besnike njëra tjetrës dhe idesë fillestare duke e ushqyer ëndrrën e njëjtë që së bashku ta bëjmë këtë film.
KultPlus: Nga momenti që të është propozuar roli e deri te takimi me zonjën Fahrije Hotin, çka të sillej nëpër mendje?
Yllka: Të dyja kanë ndodhur në të njëjtën kohë pothuaj. Së pari ka qenë ideja ta takojmë zonjën Fahrije e të flasim me të, pastaj brenda asaj jave e kemi kontaktuar dhe kemi shkuar në Krushë. Kam qenë shumë kureshtare ta takoj personalisht znj. Fahrije sepse duke e ditur tragjedinë që e kane kaluar gratë e Krushës dhe duke qenë konsumatore e produkteve të tyre disa vite radhazi, gjithmonë kam pasur respekt, simpati, e dhembshuri për to. E pas takimit me to, ato më kanë inspiruar tej mase.
KultPlus: Po pas takimit, sa besoje që do ta portretizoje këtë grua në mënyrën e duhur dhe në fund pasi përfunduan xhirimet, cili ishte komenti që ia bëre vetes?
Yllka: Në takimin e parë, ne jemi mahnitur me znj. Fahrije. Me karakterin e saj, me dinjitetin e stoicizmin që e karakterizon, por edhe me ngrohtësinë e mikpritjen e saj. Ka qenë takim i gjatë dhe mbaj mend që u patëm emocionuar shumë nga rrëfimi i saj dhe sakrificat e sprovat nëpër të cilat ajo e gratë e Krushës kanë kaluar. Që nga atëherë, për mua u bë ëndërr ta luaj këtë grua të jashtëzakonshme në film e mision të nderoj figurën e saj. E kam ëndërruar e pritur këtë rol për gati 10 vite, kam menduar për të, për jetën e saj, për sfidat me të cilat është përballur dhe mënyrën se si i ka kaluar ato, prandaj kur filluan xhirimet nuk ka pasur as pengesë e as vështirësi që më është dukur e pakalueshme ose e pamundur. Ajo energji më ka përcjellë gjatë gjithë xhirimeve dhe është reflektuar në punë, por edhe ka ndikuar te pjesa tjetër e ekipit si shtysë e motiv. Përgjegjësia për ta bartur në supe personazhin e dramën e jetës së znj. Fahrije padyshim që ka qenë e madhe, mirëpo e kam pasur besimin e plotë në vendimet e Blertës dhe bashkërisht jemi munduar që ta bëjmë më të mirën. Pas xhirimeve, ishte ndjenjë e plotësimit, se një mision u krye me sukses edhe pse e dija që Blertën e producentët i pret një fazë e re e punës në postproduksion të filmit.
KultPlus: “Zgjoi” është filmi i parë kosovar që ka arritur një sukses të tillë, por njëkohësisht përmes këtij filmi ju shpalosët para botës talentin dhe shpirtin tuaj artistik, a e keni menduar që një ditë do ta përjetoni gjithë këtë sukses?
Yllka: Po e them me modesti por me bindje të plotë po. Sepse thellësisht besoj që secilit artist që punon me përkushtim i vjen koha e vet, i vjen koha e shkëlqimit dhe mundësia ta marr vëmendjen e duhur. Ky sukses nuk ka ndodhur brenda natës, është punuar e investuar në të për një kohë shumë të gjatë. Dhe gjithsesi është edhe fat i madh! Edhe më parë sa kam jetuar e punuar në Prishtinë, jam angazhuar në projekte – seriale televizive, filma apo shfaqje teatrale- që kanë pasur sukses, shikueshmëri e disa prej tyre edhe janë shpërblyer ndërkombëtarisht. Natyrisht, “Zgjoi” ka bërë histori dhe nuk krahasohet, mirëpo sukseset, çmimet e popullariteti nuk janë ndonjë risi për mua dhe nuk më kanë ndikuar ndonjëherë në ndryshim të karakterit apo etikes së punës. Sukseset janë stimulues e motivues i mirë, por nuk janë gjithçka e as nuk të përkufizojnë si njeri, si artist ndoshta po, por jo edhe si njeri! Për “Zgjoin” nga fillimi e kam pasur një parandjenjë të fortë që do të jetë film i mirë sepse rrëfimi është i tillë dhe Blerta ka punuar me pasion e këmbëngulësi të jashtëzakonshme disa vite me radhë, pastaj producentët Ylli, Valoni e Agoni janë angazhuar me përkushtim në çdo aspekt të organizmit e të parapërgatitjeve për xhirim e për postproduksion. Kameramanin Alex Bloom e kemi pasur shumë të mirë, montazherin Enis Saraçin gjithashtu, ekipin e aktorëve të jashtëzakonshëm, ekipi i filmit kanë punuar me shumë vullnet e pa përtesë, xhirimet na kanë shkuar mbarë e me lehtësi, pra të gjithë kanë investuar që puna të kryhet mirë. Kështu që e kam ditur se nga gjithë ajo punë e ai përkushtim, rezultati do të jetë i mirë patjetër. Jam e gëzuar që kam pasur fat e mundësi të jap kontribut në këtë film e ta gëzojmë bashkërisht këtë sukses!
KultPlus: Filmi po vazhdon të shfaqet nëpër kinema, si në Kosovë, Evropë e Amerikë, madje në Kosovë ka thyer rekord shikueshmërie, jeni mësuar tashmë me këtë sukses apo ende po ju përcjellin emocione të forta?
Yllka: Secili prezantim që e kemi bërë ka ardhur me emocione të veçanta sepse jemi takuar me njerëz të ri të cilët e shihnin filmin për herë të parë dhe emocionet e përshtypjet e tyre ishin të sinqerta. Është ndjenjë shumë e veçantë kur i dëgjon komentet pas shfaqjes së filmit ose e sheh publikun të përlotur duke dalur nga salla dhe e kupton që kanë bashkëndjerë me personazhin e filmin.
KultPlus: Me rolin tuaj në filmin “Zgjoi” ju keni fituar tri çmime si aktorja më e mirë në tre festivale të mëdha botërore, sa janë të rëndësishme çmimet për ju?
Yllka: Çmimet janë të mirëseardhura padyshim, posaçërisht kur vijnë nga festivale prestigjioze e me traditë sepse aty konkurrenca është e madhe dhe nuk ka kompromis. Është nder kur të çmohet puna e sakrifica që e ke bërë për një projekt të caktuar. Disi të duket që po vuloset merita jote dhe që ja ka vlejtur barra qiranë për krejt mundin e bërë, mirëpo çmimet nuk janë gjithçka dhe nuk janë gjithmonë synim. Për mua është shumë me rëndësi që puna të bëhet mirë dhe pos punës, edhe procesi të shkojë mbarë sepse mund të bësh një rol të mirë e të kesh fat të marrësh çmime, mirëpo nëse nuk ke kaluar mirë gjatë kohës sa e ke punuar atë rol dhe nuk ke krijuar miqësi e raporte të shëndosha të punës, të cilat do të sjellin punë e bashkëpunime të reja apo nuk kë mësuar diçka nga ajo përvojë, disi edhe shpërblimet që mund të vinë janë më të zbehta. Mirëpo, kur puna bëhet mirë e procesi shkon mbarë dhe pastaj ajo shpërblehet edhe me çmime, kënaqësia është e plotë e më domethënëse!
KultPlus: Ambasadorët më të mirë shteti i Kosovës i ka artistët, së fundmi këtë e dëshmuat edhe ju pasi përdorët zërin tuaj për të kërkuar nga Spanja njohjen e Kosovës shtet, si u prit kërkesa juaj, kishte reagime?
Yllka: Thënë të drejtën, unë nuk e kam menduar aspak çfarë pasojash apo reagimesh mund të ketë ajo kërkesë dhe nuk e kam bërë si deklaratë pompoze politike. Artistët ndoshta edhe duhet të qëndrojnë larg politikës, mirëpo artistët poashtu janë ata që kanë zë e ndikim e platforma më të fuqishme se sa diplomatët e politikanët. Për mua ajo kërkesë ka qenë organike dhe e sinqertë dhe më është dukur moment i përshtatshëm që ta shpreh një dëshirë e ëndërr të përbashkët tonën. Të gjitha gazetat në Spanjë por edhe këto vendoret pastaj e bënë lajm atë deklaratë. Për mua ai moment ka qenë i veçantë në karrierën time padyshim, mirëpo nga zemra e shumë sinqerisht kam dashur që atë çast gëzimi personal t’ia kushtoj popullit e vendit tim!
KultPlus: Në premierën e filmit në Amerikë nuk mungoi as Presidentja e Republikës së Kosovës Vjosa Osmani dhe Dua Lipa e cila edhe përkrahi filmin duke e shpërndarë para mijëra ndjekësve të saj në rrjete sociale, si e vlerësuat këtë veprim të Duas?
Yllka: Oh Dua!!! Dua është dashuri e madhe si emri që ka! Mua më pëlqen shumë muzika e saj dhe jam fanse e Dua-s nga dita e parë. Ajo është shumë inspiruese! Dua Lipa është shembull i shkëlqyeshëm se si është një yll i vërtetë, që para së gjithash mbetet njeri modest e me këmbë në tokë. E lindur e e rritur në Londër, me karrierë shumë të suksesshme, sensacion ndërkombëtar që i ka arritur majat e suksesit me punë e talent, Dua para së gjithash mbetet një vajzë e dashur, e bukur brenda e jashtë, e ëmbël, e afërt e modeste dhe shumë e lidhur me familjen e saj. Jemi me fat që ajo është e jona dhe me krenari këtë fakt e tregon para miliona fansave të saj në botë. Ajo na ka nderuar pa masë bashkë me prindërit e saj dhe jemi shumë mirënjohës e falënderues për përkrahjen e tyre! Gjithashtu presidentja e Kosovës – Vjosa Osmani na ka nderuar me përkrahjen e saj që nga suksesi në Sundance për çfarë e falënderojmë e jemi mirënjohës!
KultPlus: Fotografia ku shiheni bashkë, ju, presidentja Vjosa Osmani, këngëtarja Dua Lipa dhe regjisorja Blerta Basholli, është përcjellë me reagime të shumta nga publiku të cilët janë shprehur shumë krenarë për sukseset e vajzave shqiptare, po ju si e shihni rrugëtimin e tyre duke përfshirë edhe vetën këtu, jeni krenare?
Yllka: Krenare dhe shumë e lumtur, por edhe tejet mirënjohëse për dashurinë e respektin dhe për përkrahjen e jashtëzakonshme që na e kanë dhënë publiku! Kur gratë bëhen bashkë duke e përkrahur njëra tjetrën, bota bëhet vend më i mirë e jeta më e bukur!
KultPlus: Me filmin “Zgjoi” ju jeni shprehur që keni realizuar ëndrrën e fëmijërisë, cila është ëndrra e radhës që prisni ta realizoni?
Yllka: Ah, ka shumë!
KultPlus: Cila ka qenë kritika më e mirë dhe ajo më pak e mirë që keni marrë për rolin tuaj në filmin “Zgjoi”?
Yllka: Ajo që po më kujtohet tash sepse ka ndodhur rishtazi është komenti shumë dashamirës i Kongresmenit Elliot Engel i cili ishte i pranishëm në New York në premierën e filmit në Film Forum dhe kur e mori fjalën të na uroj për punën tonë, në fund tha “You deserve the Academy Award for your acting!”.
KultPlus: ‘Zgjoi’ është filmi që Kosova ka përzgjedhur për Oscars, tashmë të gjithë bashkë me ju jemi në pritje të publikimit të nominimeve ‘Oscars’, e ku përfundimisht do të kuptohet nëse ky film do ta përfaqësojë Kosovën në akademinë e çmimeve më të njohur në gjithë botën. Por duke qenë pjesë e filmit, kuptohet qe emocionet më të forta i bartni ju. Çfarë prisni realisht nga kjo garë?
Yllka: Është fat i madh që kemi hyrë në listën e ngushtë dhe tash jemi në konkurrencë me 14 filma të tjerë, disa prej tyre shumë të suksesshëm e me regjisorë që tashmë janë të shpërblyer me Oscar në karrierën e tyre. Është luftë e ashpër dhe shumë e vështirë. Është edhe punë fati se ka shumë anëtarë të Akademisë të cilët do të votojnë dhe shijet janë të ndryshme. Më afër nominimit Kosova nuk ka qenë kurrë, kjo është e sigurtë. Do të ishte nder i jashtëzakonshëm nëse nominohemi sepse për ne ky tashmë nuk është qëllim personal por ka kaluar në qëllim më të madh, posaçërisht duke e parë gëzimin e krenarinë, motivimin e shpresën që këto suksese po lënë tek njerëzit tanë. Mendoj që e meritojmë të paktën të nominohemi sepse filmi është shpërblyer dhjetëra herë deri tash në festivale të ndryshme nëpër botë e nga juri të ndryshme. Gjithashtu edhe kritikat kanë qenë pozitive si nga kritikët e filmit e njerëzit e industrisë, poashtu edhe nga publiku i thjeshtë por, prapë po e them ka shumë konkurrencë dhe lufta tash bëhet e pamëshirshme sepse vetëm pesë filma arrijnë të nominohen. Çka më gëzon e nderon është fakti që me e pa nominim në Oscars, “Zgjoi” ka bërë histori në Sundance si filmi i parë më i shpërblyer në kategorinë e filmave ndërkombëtar dhe për të kanë shkruar gazetat më prestigjioze në botë si New York Times, Vogue, Variety, Deadline, Indiewire, LA Times, Screendaily, Cineuropa, Austin Chronicles e shumë të tjera duke e përmendur Kosovën, luftën e fundit, masakrat në Krushë dhe suksesin e znj. Fahrije Hoti. E në dashtë Zoti e paçim fat, nominimi në Oscars do të ishte një tjetër sukses e nder i madh për të gjithë!
KultPlus: A keni pasur oferta për projekte të reja, nëse po a mund të zbuloni diçka?
Yllka: Po, ofertat nuk kanë munguar asnjëherë fatbardhësisht. Kam qenë unë ajo që është dashur t’u them jo disa projekteve për shkaqe të ndryshme, të largësisë, kohës së papërshtatshme të xhirimeve etj. Por tash ofertat janë shtuar edhe më shumë dhe kjo më gëzon pa dyshim. Jam në bisedime për dy projekte, por ende në fazë të hershme dhe nuk guxoj të bëjë asgjë publike.
KultPlus: Si ka ndikuar në jetën tuaj suksesi që po përjetoni kohëve të fundit?
Yllka: Më ka gëzuar padyshim, mua, familjen e të afërmit e mi. Ka hapur dyer të reja e mundësi të reja. Mirëpo, unë këtë vit kam humbur babain tim kështu që, edhe sukseset e gëzimet i kam përjetuar disi më me rezervë pas asaj. Gëzohem që ai e ka parë filmin e ka qenë shumë krenar për çmimet në Sundance dhe përkrahës e motivues i madh i imi gjatë tërë jetës… mirëpo humbja e tij, ka lënë zbrazëti në jetën time dhe në të njëjtën kohë më ka shërbyer edhe si barometër që t’i përjetoj gjërat me modesti e pa ndonjë ekzaltim të tepruar. Pos kësaj jeta ime është e thjeshtë dhe modeste. Suksesi nuk ma ka ndryshuar fokusin e as përkushtimin ndaj asaj që për mua është e shenjtë e kjo është familja ime. Unë ende merrem ekskluzivisht me vajzën time Ninen, me punët e obligimet e nënës e të gruas, pastroj, gatuaj e planifikoj çfarë do të bëjmë në vikend. Natyrisht krejt këto, duke pasur shumë takime e intervista online me angazhime extra për punë. Kam pasur edhe udhëtime të shpeshta që nga shtatori, të cilat kanë qenë të mirëseardhura si mini aventura, mirëpo në cep të mendjes gjithmonë e kam familjen time, posaçërisht Ninen sepse jemi të lidhura dhe e kam të vështirë të jem larg saj dhe nuk ka gjë në botë që më përmbushë më shumë se koha e kaluar me të!
KultPlus: Kujt ja dedikon Yllka gjithë këtë sukses?
Yllka: Shumë njerëz janë meritor për sukseset e mija dhe u jam mirënjohëse përgjithmonë për ndihmën, dashurinë, kontributin, këshillat e durimin. Familjes time -prindërve, motrave, vëllait, burrit tim Albianit e vajzës sime Nines- së pari e më së shumti sepse ata më kanë përkrahur e motivuar në çdo hap të jetës dhe jam mirënjohëse përjetësisht! Pastaj edhe atyre të cilët janë meritor në këtë sukses e me të cilët e kemi bërë krejt këtë punë – ekipit të filmit, në veçanti Blerta Bashollit e Yll Ukës! Por, pa e harruar gruan që na ka inspiruar e vazhdon të na inspirojë znj. Fahrije Hoti dhe gratë heroina të Krushës! Edhe publikut, publikut të mrekullueshëm që pa kushte na ka përkrahur, i ka mbushur sallat e kinemave kudo dhe është gëzuar bashkë me ne!
KultPlus: Krejt për fund, po flasim për mirënjohjen që e more së fundi nga qyteti i Stamfordit ne Connecticut, dhe ju deklaruat se para gjashtë viteve, nëpër ato rrugë, ju me vajzën tuaj keni bërë vetëm shëtitje, pa menduar se pas gjashtë viteve do të nderoheni nga ajo komunë, pasi jemi edhe në fund vit, këtë pjesë e ndërlidhim me dëshirat e të rinjve, Yllka, thjeshtë na trego, sa guxojmë të ëndërrojmë?
Yllka: Sa të kemi qejf e imagjinatë! Ëndrrat e shpresat janë ato që na e mbajnë shpirtin gjallë e të ri gjithmonë! Janë motivuesi më i mirë për punë! Ëndërroni çka t’ua do loçka e zemrës e punoni me vullnet që ato ëndrra të jetësohen e të bëhen realitet edhe mos u dorëzoni para sfidave sepse sa më shumë sfida që tejkaloni me dinjitet aq më i kënaqshëm e domethënës bëhet suksesi!
