Etiketë: Zana Ramadani

Zana Ramadani e shpalosë Prishtinën në ekspozitën e tretë personale

Posted on by KultPlus

Arbër Selmani

Artistja Zana Ramadani ka lindur dhe është rritur në Prishtinë. Edhe sot ajo jeton në kryeqytet, prandaj lidhja e fuqishme e saj me qytetin nuk ka se si të mos reflektohet edhe në punën e saj.

Dy katet e Europe House – Shtëpisë së Evropës në kryeqytet mbrëmë u zbukuruan me punën artistike të Ramadanit, e cila e hapi ekspozitën e saj të tretë personale – “Vendi im”.

Ngjyrat më të ndezura e të ngrohta e sollën Prishtinën e shpirtit të Zana Ramadanit para publikut në hapjen e ekspozitës.

“Prishtina është vendi ku kam lindë dhe jam profesionalizu. Këtu kam familjen, punën, dhe inspirimi im vjen prej këtu. Unë në natyrë dal dhe akumulohem ndërsa më pas inspirimin e shprehi në mundësitë e mia shprehëse” tregon Zana për KultPlus.

Kati i parë, në hyrje të Europe House, pasqyron pikturat e ciklit të ri për qytetin, në të cilin Zana po punon tash e gati dy vite. Kujtime të fëmijërisë, ndjenja, emocione që lidhen me Prishtinën vijnë në tablotë e Ramadanit.

Kati poshtë sjellë grafikat, linogdhendjet, akuantinat, bakër-shkrimin dhe teknikat tjera të cilat ajo i ka për zemër, por të cilat i marrim më shumë kohë pasi kërkojnë disciplinë të punës dhe përkushtim. Zana është skenografe tash e dy dekada, prandaj i duhet një barazim mes punës artistike dhe profesionit të saj.

“Sapo isha edhe në pushime, dhe më shumë kam qenë zgjuar natën, bashkë me familjen, për ta parë perëndimin e Diellit por edhe lindjen e Hanës, momente këto të cilat unë i marr brenda dhe më pas i reflektoj në artin tim”

“Grafika më merr shumë kohë, prej skicimit e modelimit e deri te realizimi, ndërsa pikturën e dua sepse është më ekspresive, më e lirshme, teknikisht më e thjeshtë. Gjithmonë mundohem mos ta lë anash edhe profesionin tim” tregon Zana.

Ekspozita “Vendi im” erdhi në hapësirën ekspozuese të Europe House – shtëpia ku prezantohet arti, dikur Qendra Informative dhe Kulturore e BE-së.

Vjosa Berisha nga Europe House tregoi se ardhja e Zanës me ekspozitë veç sa e begaton këtë hapësirë dhe qasjen kulturore të cilën kjo hapësirë nuk e lë asnjëherë anash, duke sjellë artistë të rinj e të dëshmuar me punët e tyre më të reja.

Zana Ramadani është aktive në ekspozita kolektive, brenda dhe jashtë vendit, ndërsa bashkë me Eliza Hoxhën, Shqipe Kamberin, Mjellma Gorancin dhe Zake Prelvukajn përkujdesen ta shoqërojnë njëra tjetrën në grupin e tyre artistik. Së shpejti ato do t’i shohim në Bullgari, në Turqi e më pas edhe në Paris.

Punët e ekspozitës “Vendi im” janë në shitje. / KultPlus.com

Zana Ramadani akuzon ish presidentin gjerman Gauck për sjellje seksiste ndaj saj

Posted on by Kult Plus

“Ajo shkruan se gjatë fotografimit të përbashkët ai e ka përqafuar dhe a ka vënë krahun mbi ijet (kërdhokullat) e saj. “Unë prisja madje pothuaj që dora e tij të rrëshqiste më poshtë (…) Isha e prekur në mënyrë të pakëndshme, por e lash të ndodhte…”

Bashkëthemeluesja e lëvizjes feministe radikale “Femen” në Gjermani, shqiptarja nga Maqedonia, Zana Ramadani, është gjetur sërish nën dritat e reflektorëve. Ajo sot (e mërkurë) promovon librin e saj të dytë brenda një viti, atë me titullin “Sexismus. Über Männer, Macht und #Frauen” (Seksizmi. Mbi burrat, pushtetin dhe #gratë”). Libri i saj i parë, i botuar vitin e kaluar fliste për rrezikun islamik që kërcënon shoqëritë perëndimore, shkruan albinfo.ch.

Vetëm një ditë para promovimit të librit të saj të ri, emri i Zanës lakohet nga gazetat gjermane lidhur me një akuzë që ajo e drejton në këtë libër në një adresë shumë të lartë. Aktivistja dhe shkrimtarja Ramadani ngre akuza kundër jo më pak se ish presidentit gjerman Gauck. Atë e fajëson për seksizëm ose për një sjellje “të papërshtatshme” që ai e paska treguar ndaj saj, sjellje kjo sipas Zanës, në kufi me ngacmimin seksual.

Skena që përshkruhet në librin i cili promovohet sot, ka ndodhur në qershor të vitit 2016, në kështjellën Bellevue të Berlinit, shkruan gazeta “Berliner Zeitung”. Zonja Ramadani ishte aty në mesin e një numri të madh të ekspertëve të integrimit, që ishin ftuar si mysafirë të presidentit federal, transmeton albinfo.ch.

Duke bërë aluzion rreth daljeve të saj publike me gjinj të zbuluar gjatë protestave kundër diskriminimit të gruas, që i bënte si aktiviste e grupit “Femen”, presidenti do ta ketë pyetur Zanën nëse ajo do të zhvishej edhe aty, në kështjellë. Pasi që ajo i kishte thënë se fustani i saj ishte shumë i komplikuar për një gjë të tillë, Gauck do t`i ketë thënë se ai, po qe nevoja, mund ta ndihmonte.

Kështu së paku e citon Zana Ramadani atë në librin e saj. Dhe për të mos mbetur puna me kaq, ajo shkruan se gjatë fotografimit të përbashkët ai e ka përqafuar dhe a ka vënë krahun mbi ijet (kërdhokullat) e saj. “Unë prisja madje pothuaj që dora e tij të rrëshqiste më poshtë, drejt prapanicës. (…) Isha e prekur në mënyrë të pakëndshme, por e lash të ndodhte. E çfarë do të bëja unë? Ai ishte president federal”, shkruan Zana Ramadani, përcjell albinfo.ch.

Por, edhe pse kjo situatë i ishte dukur e pakëndshme atëbotë, Zana nuk ishte e interesuar ta vendoste presidentin në shtyllën e turpit, ka theksuar ajo në bisedë me “Berliner Zeitung”. Ajo, e kishte mbijetuar “sjelljen e tij konfuze” pa dëmtime.

Ndërsa, i pyetur nga gazeta “Berliner Zeitung”, ish presidenti Gauck nuk ka dashur të marrë qëndrim. Në vend të tij është përgjigjur avokati i tij, Christian Schertz.

“Akuza e zonjës Ramadani nuk ka asnjë bazë. Po të lexohet teksti më saktësisht, aty shkruan se z. Gauck e ka vendosur dorën rreth saj ashtu siç është e zakonshme për bërjen e një fotografie të përbashkët. Pastaj në tekst shprehet vetëm një supozim se dora mund të rrëshqiste më poshtë, gjë që realisht aspak nuk ka ndodhur. Të nisesh nga një rrethanë e tillë dhe ta quash atë “ngacmim”, është thjesht absurde. Po ashtu, pas leximit të saktë të tekstit, nuk shihet se ajo e fajëson atë që ta ketë prekur në mënyrë të pamoralshme”, përfundon avokati.

Cilado që të jetë e vërteta rreth rastit “Gauck”, një gjë duhet të thuhet: se si me librin e parë, ashtu dhe me këtë të riun, Zana Ramadani ka qëlluar mainstreamin e kohës: libri i saj mbi seksizmin pra publikohet në kohën kur gjithandej në botë vlon nga akuzat kundër ngacmimeve seksuale dhe kur lëvizja kundër tyre “MeeTo” është shumë aktuale./ KultPlus.com