Etiketë: Zihni Sako

‘Impromptu’, nga fondi i të rinjve, në teatrin ‘Zihni Sako’ të Gjirokastrës

Posted on by Kult Plus

 “Fondi i Teatrit për të Rinj” me mbështetjen e Ministrisë së Ekonomisë, Kulturës dhe Inovacionit, sjell shfaqjen “Impromptu”, të autorit Tad Mosel.

Shfaqja me regji të Artemis Belulit, do të vihet në skenën e teatrit “Zihni Sako” të Gjirokastrës. Ajo tregon historinë e katër aktorëve dhe administratorit të cilët duhet të improvizojnë një shfaqje, ku ashtu si jeta, perceptohet si një argëtim i pastër por papritur transformohet në një dramë në “modalitetin Pirandello”.

Procesi i arritjes së qëllimeve për çdo personazh vjen parësore, madje më e rëndësishme se vetë përfundimi i tyre si karaktere, për shkak të kompromiseve që ata kanë bërë me administratorin, në një luftë për të ekzistuar para publikut.

Shfaqja ngre një pyetje ekzistenciale: “Cili duhet të jetë raporti i duhur i së vërtetës kundrejt iluzionit drejt një jete të balancuar?”. Me anë të saj vihet në pah vetëdija e gjithësecilit dhe raporti i tyre me kompromiset e skenës. Kjo pyetje e shtyn shfaqjen të ketë komponentë të një teatri absurd, duke sulmuar komoditetin e personazheve ndaj vetëkënaqësisë, me qëllim vendosjen e publikut përballë sfidave njerëzore, si: izolimi i individit, dëshpërimi dhe përpjekja për gjetjen e vetëvetes në këtë realitet./atsh/ KultPlus.com

109 vjet nga lindja e Zihni Sakos, kontributorit të Fjalorit të Gjuhës Shqipe

Posted on by Kult Plus

Zihni Sako është autori i njërit prej teksteve të parë të folklorit në shkollat e larta. Ndër veprat letrare të tij janë novela “Bereqeti”, “Ditë të gëzueshme”, disa vëllime me vjersha për fëmijë, vëllime me tregime etj.

Ka lindur në Gjirokastër më 27 mars 1912. Ka kryer studimet e larta për filologji në Universitetin e Athinës në vitet 1931 – 1936 dhe më pas u kthye në Atdhe ku ka punuar fillimisht si mësues në fshatrat e Gjirokastrës, Korçës e Beratit dhe më vonë në vitet ’40 në Gjimnazin e Gjirokastrës që sot mban emrin e Asim Zenelit.

Me pushtimin e vendit në vitet e para të tij vazhdoi punën si mësues dhe më vonë kaloi në mal partizan në çetat e Gjirokastrës ku ka qenë komisar i tyre. Ka kryer një veprimtari të gjerë patriotike duke luftuar deri në çlirimin e vendit.

Mbas mbarimit të luftës iu kthye punës dhe ka qenë për disa kohë sekretar i përgjithshëm i Ministrisë së Arsimit,pastaj ka shkuar në Moskë ku ka dhënë mësimin e gjuhës shqipe në Universitetin e Moskës dhe më vonë u kthye në Shqipëri fillimisht në Institutin e Shkencave ku ishte sekretar dhe drejtues i sektorit të folklorit./ KultPlus.com

Gjirokastër, nis puna për rikonstruksionin e teatrit “Zihni Sako”

Posted on by Kult Plus

Në qytetin e Gjirokastrës ka nisur puna për restaurimin e teatrit “Zihni Sako”, i cili do të kthehet në një hapësirë tejet të rëndësishme për jetën kulturore e artistike të qytetit të gurtë.

Kryetari i bashkisë së Gjirokastrës, Flamur Golemi, shprehu kënaqësinë që më në fund nisën punimet për restaurimin e teatrit “Zihni Sako”, të cilin e cilësoi “hapësire kaq shumë të rëndësishme për jetën kulturore e artistike të Gjirokastrës”.

“Për vite me radhë në këtë teatër nuk është bërë asnjë rregullim thelbësor, por thjesht arnime aty-këtu sa për të thënë se diçka po bëhej edhe për trupën e aktorëve, të cilët i kanë dhuruar Gjirokastrës shfaqje dhe emocione për vite me radhë, por për fat të keq kurrë nuk kanë pasur ambiente pune dinjitoze”, – nënvizoi Golemi, duke shtuar se as spektatorët që shkonin në teatër nuk kishin kushte komoditeti.

Kryebashkiaku Golemi shprehet se me ndërhyrjen që po bëjmë falë ndihmës së çmueshme të miqve tanë italianë, përmes programit IADSA dhe një pjesë të buxhetit nga vetë të ardhurat e bashkisë, nëse gjithçka shkon sipas planit, është i bindur në pranverë ky investim i shumëpritur do të përfundojë.

Teatri “Zihni Sako” u themelua në 27 nëntor 1968 nën udhëheqjen e regjisorit Bernard Kokalari, i cili vuri për herë të parë në skenën premierën dramatike “Shokët”. Plejada e aktorëve të teatrit “Zihni Sako”, kanë dhënë mbi 100 premiera dhe ka marrë pjesë në takimet kombëtare, ku ka merituar edhe çmime.’/atsh/KultPlus.com