Aktorja e famshme, Katarina Dulaj-Josipi (Kati), lindi më 11 shtator 1923 në Zymë të Hasit (Prizren), shkruan KultPlus.

Shkrimtari Frrok Kristaj ka zbuluar pamje e detaje të rëndësishme nga jeta e aktores Katarina Dulaj- Josipi e njohur si Kati, të cilat KultPlus ua sjellë më poshtë.

Mendohej se aktorja s’kishte jetë private, për shkak të angazhimit të madh në rolet e shfaqjeve, por Kati u martua dhe lindi 2 fëmijë. U martua me Hilë Pjetrin (inxhinier pyjesh) dhe u bë edhe nënë. Lindi dy fëmijë që ndërruan jetë nga një sëmundje e rëndë, katër dhe dy vjeç. Më vonë mbeti edhe pa Hilën, të cilin pushteti serbo-jugosllav ia dëboi nga Kosova si person të padëshiruar dhe e strehuan në Shqipëri (Kavajë). Kati nuk u martua më kurrë. Mirëpo, një vit para se të ndërronte jetë (1968), vizitoi ish bashkëshortin në Kavajë, te familja e tij e re. Kati njohu gruan dhe 5 fëmijët e tyre. Dy fëmijët e mëdhenj (djali dhe vajza), mbanin të njëjtat emra, që patën dikur fëmijët e saj.

Ajo ndërroi jetë, më 29 prill 1969 në Prishtinë, në ditën e Shën Katerinës./ KulltPlus.com