Kryeministri aktual Ramush Haradinaj sot i ka shprehur ngushëllime artistit Çun Lajçi.

Lajçi dje ka humbur vajzën e tij Bubulinën, një aktore që po ngjitej shkallëve të aktrimit por vdiq shumë e re.

“Jam i prekur thellë nga humbja e një jete të re. Bubulina Çun Lajçi braktisi ëndërrat e jetës, prindërit dhe miqtë e saj.
Ishte fëmijë artistësh dhe vet aktore, nga e cila pritej shumë, por ajo e mbylli ciklin e jetës para kohe.
Ngushëllimet më të sinqerta për familjen, në veçanti për mikun tim, Çun Lajçin.
Bëhuni të fortë dhe ruani kujtimet për të.
RH” – ka shkruar Haradinaj në rrjetin social Facebook.

Bubulina Lajçi ka ndërruar jetë dje, ndërsa siç kanë lajmëruar disa medie në Kosovë, kjo ka ndodhur shkaku i mbidozës.

Vetë artisti i ka kushtuar një poezi vajzës së tij të ndjerë, me anë të rrjeteve sociale, ku edhe ka marrë mijëra ngushëllime nga qytetarët e Kosovës. / KultPlus.com